17/04/2025
ज्ञापनपत्र / प्रेस विज्ञप्ति
बीरगञ्जमा भएको साम्प्रदायिक घटनाप्रति हाम्रो गम्भीर ध्यानाकर्षण भएको छ। मुस्लिम समुदाय जातीय र धार्मिक दुवै हिसाबले अल्पसङ्ख्यक समुदाय हो । नेपालमा मुस्लिम समुदायको गौरवमय इतिहास रहेको छ । देशप्रतिको हाम्रो प्रेम र श्रद्धा सयौं वर्षको सद्भावपूर्ण ऐतिहासिक सहकार्य र समाजमा हाम्रो अन्तरघुलनले प्रमाणित गर्दछ। तर, केही असामाजिक तत्वहरूबाट हाम्रो समुदायको सद्भाव, राष्ट्र प्रेम र शान्तिकामी छविलाई धमिल्याउने कुप्रयासहरू पटक पटक हुँदै आएको छ । वीरगञ्जको घटना यसैको एउटा श्रृङ्खला हो। गत वर्ष सर्लाही र नेपालगञ्जमा पनि मुस्लिम समुदायमाथि यस्तै आकमण भएको थियो ।
वीरगञ्जमा भएको घटना सङ्गठित अपराध हो । यस्तो वितण्डा आफ्नै आँखाअगाडि भइरहँदा पनि प्रहरी प्रशासन मूकदर्शक भएर बसी रह्यो । स्थिति गम्भीर भएपछि जिल्ला प्रशासन कार्यालयले निषेधाज्ञा जारी गरेर स्थितिलाई नियन्त्रणमा लिन खोजेको हो तर स्थिति बिग्रने कुरामा प्रहरी प्रशासनको मौनताले ठूलो भूमिका निर्वाह गरेको छ । तोडफोड, कुटपीट, अश्लील शब्दावलीबाट गालीगलौज, धम्कीजस्ता अराजक गतिबिधि प्रहरी प्रशासनको सामुन्ने भइरहेको दर्जनौ भिडियो सामाजिक सञ्जालमा छ्याप्छ्याप्ती छ । वीरगञ्ज मात्र होइन देशभर खास गरी तराई/मधेशमा बसोबास गर्ने मुस्लिम समुदाय त्रसित छ । यसले लोकतन्त्रको अवमूल्यन र मानवअधिकार तथा संविधानप्रदत्त मौलिक हकको हनन भएको छ । एउटा अल्पसङ्ख्यक समुदायमाथि यसरी पटक पटक आक्रमण हुनु घोर आपत्तिजनक छ ।
वीरगञ्जमा हनुमान जयन्तिलगायत अन्य धार्मिक प्रदर्शनमा फरक रुट प्रयोग हुँदै आएकोमा यसपटक मुस्लिम बाहुल्य क्षेत्रबाट रुट निर्धारण गर्नु र योजनाबद्ध रुपमा केही अतिवादी युवाहरूले हतियार प्रदर्शन गर्दै मुस्लिम बस्तीमा आतंक फैलाउन खोज्नु गम्भीर र षड्यन्त्रपूर्ण योजनाको द्योतक हो। रक्षात्मक रुपमा मुस्लिमहरूले ढुङ्गा फ्याँकेको प्रत्यक्षदर्शी बताउँछन् र उपलब्ध भिडियोहरूमा त्यही देखिएको छ । घटना हुनुभन्दा एक दिन अघिको एउटा ह्वाट्सएप ग्रुपको अडियो बाहिरिएको छ जसमा केही अतिवादीहरूले मियांहरूलाई कुटपीट गर्न सबैले झण्डा र तरबार समेतका हथियारहरू बोक्नु भन्ने सन्देश दिइएको छ । यसले पनि यो घटना संगठित र योजनाबद्ध ढङ्गले भएको हो भन्ने कुरा प्रष्ट छ ।
यदि यस किसिमका अपराध गर्नेहरूलाई पटक पटक छुट दिने हो भने देशमा अराजकता, हत्या, हिंसा र अशान्ति डढेलोझै फैलने छ भन्ने कुरा जो कोहीले पनि बुझ्न सक्दछ । यस किसिमका घटनाहरु पटक पटक दोहोरिरहेको र एउटा लक्षित समुदाय यसको शिकार भइरहेको एउटा कानूनी राज्यले कसरी मूकदर्शक भएर हेरिरहन सक्दछ? नेपाली सेना हुँदा हुँदै तथाकथित सम्राट् सेना र अन्य सेनाको नामले साम्प्रदायिक गतिविधि बढ्दै जानुले नेपालको सुरक्षा संयन्त्रलाई गिज्याउँदैन ? बेलैमा यस्ता गैरकानूनी गतिविधिलाई रोकिएन भने यसले देशमा अर्को शक्तिशाली समानान्तर सेना खडा हुन सक्ने प्रबल आशंका गर्न सकिन्छ ।
बीरगञ्ज घटनामा कलिला उमेरका युवाहरूको प्रयोग भएको छ । कता लगिदैछ देशका भविष्यका कर्णधारहरूलाई ? कस्तो प्रशिक्षण पाइरहेको छ यस पुस्ताले? के राज्यको लागि यो गम्भीर प्रश्न होइन ? देशमा शान्ति, सुव्यवस्था र सुशासनलाई चुनौती दिने खालका गतिविधिहरू गृह प्रशासनकै सामुन्ने हुनुलाई आम नेपाली जनताले के भन्ने ?
यस सङ्गठित आपराधिक गतिविधिमा संलग्न व्यक्ति जुनसुकै समुदायको भएता पनि, त्यस्ता व्यक्तिलाई तुरून्त कानूनी दायरामा ल्याई सख्त कारबाही गरियोस् । र, देशमा दीगो शान्तिको लागि काम गरियोस्, तत्कालिक घटनालाई मत्थर मात्र गर्दै कसैले गरेको अपराधलाई छुट दिने काम नरियोस् ।
यस प्रेस विज्ञप्तीमार्फत् हामी नागरिक सुरक्षाको प्रत्याभूति, लक्षित समुदायप्रतिको पटक पटकको आक्रमण र त्यस समुदायको छवि धमिल्याउने भास्य निर्माण गर्ने षड्यन्त्रतर्फ राज्यको ध्यानाकर्षण गराउँदै यस कुचेष्टाको समयमै उपचार गर्न जोडदार माग गर्दछौं ।
नजरुल हसन फलाही
अध्यक्ष, इस्लामी संघ नेपाल
