17/05/2026
༈མ་ཡུམ་དཀོན་མཆོག་པདྨ་མཆོག་རྗེས་སུ་དྲན་པའི་སྙན་ཚིག
འཇིག་རྟེན་ན་ཚོད་ན་བཟའ་རྒྱན་ཆས་རྫིག །
ཡིད་ལ་མི་མཉེས་འདོད་ཡོན་སྒྱུ་མར་གཟིགས། །
དམན་ཆས་ཚུལ་བཟུང་སེམས་ཀྱི་རང་ཞལ་བལྟས། །
མ་ཡུམ་པདྨའི་ཐུགས་བསྐྱེད་ཨེ་མ་རྨད། །
འབྲུག་པ་ཨ་མི་ཏ་པའི་དགོན་སྡེ་དང་། །
སྔ་འགྱུར་ཀཿ ཐོག་གཞི་ཆེན་བཻ་རོའི་གླིང་། །
གཉིས་ཀར་བཀའ་དྲིན་གཞལ་མེད་དཔལ་དུ་ཤར། །
བསྟན་པའི་སྲོག་ཤིང་ཆེན་མོར་གྱུར་པ་ལགས། །
མཆོག་གི་སྲས་པོ་༧རྒྱལ་དབང་འབྲུག་པ་དང་། །
ཡབ་ཆེན་གཞི་ཆེན་བཻ་རོ་རྣམ་གཉིས་ཀྱིས། །
བསྟན་འགྲོའི་དོན་ཆེན་མཛད་པའི་ཕྱག་ལས་ལ། །
ཕྱག་ཕྱིར་གྲུ་འདེགས་གནང་བའི་བཀའ་དྲིན་ཆེ། །
ཐུགས་ཀྱི་ཡི་དམ་མགོན་པོ་འོད་དཔག་མེད། །
མཚན་སྔགས་བཟླས་པ་དུང་ཕྱུར་དུ་མ་གསོག །
བྱང་ཆུབ་ལམ་ལ་གཤེགས་པའི་སྐྱེལ་མ་རུ། །
སྣང་མཐའི་མཚན་སྔགས་ཐུགས་ཀྱི་ཟེའུ་འབྲུར་སྨིན། །
༧རྒྱལ་དབང་འབྲུག་པ་མཆོག་གི་བཀའ་དགོངས་བཞིན། །
མ་ཡུམ་འདས་མཆོད་ཐེངས་གཉིས་དུས་ཚོད་ལ། །
སངས་རྒྱས་འོད་དཔག་མེད་པའི་མཚན་སྔགས་ཟབ། །
དུང་ཕྱུར་གསོག་སྒྲུབ་བྱེད་པའི་གྲལ་དུ་ཞུགས། །
བདག་ཀྱང་སྐལ་བཟང་གོ་སྐབས་ཐོབ་པ་ལྟར། །
དྲིན་ཅན་མ་ཡུམ་ཡིད་ལ་ལྷང་ལྷང་དྲན། །
གང་ཐུབ་སྙིང་པོ་བཟླས་པའི་དགེ་ཚོགས་འདི། །
མ་ཡུམ་ཐུགས་བཞེད་འགྲུབ་པའི་ཆེད་དུ་བསྔོ། །
༧རྒྱལ་དབང་འབྲུག་པ་མཆོག་དང་དངོས་སུ་མཇལ། །
བཀའ་མོལ་ལྷུག་པོར་ཞུ་བའི་གོ་སྐབས་ཐོབ། །
འདས་མ་ད་གསུམ་ལམ་སྟོན་ཟབ་མོའི་བཀའ། །
མང་དུ་སྩལ་བས་སྙིང་གི་མུན་པ་སངས། །
བརྩེ་ཆེན་བླ་མའི་ལམ་སྟོན་སྙིང་བཅངས་ནས། །
མ་ཡུམ་དགོངས་པ་ཆོས་དབྱིངས་ཡོངས་འགྲུབ་སྟེ། །
བདག་ཀྱང་ཚེ་རབས་ཀུན་ཏུ་ཐེག་མཆོག་ལམ། །
མི་ཕྱེད་དད་པས་བགྲོད་པའི་དཔལ་ཐོབ་ཤོག །
བཻ་རོ་གླིང་དགོན་པའི་མཁན་མིང་འཛིན་པ་དཔལྡན་ཆོས་གྲགས་ནས།།
🙏🙏🙏
