25/07/2026
࿑ ཞལ་གདམས་གསེར་ཕྲེང་ལས། ཁྱད་པར་དུས་ཆེན་ཚེས་བཅུར་ཨོ་རྒྱན་ང་༔ གངས་ཅན་བོད་ཡུལ་ས་སྟེང་ཁྱབ་པར་འོང་༔ ཉི་ཟླའི་ཟེར་དང་འཇའ་ཆེན་ཆར་རྡུལ་ལ༔ ཆིབས་ཏེ་མོས་པའི་བུ་ཡི་བར་ཆད་སེལ༔ ཞེས་སོགས་བདེན་གསུང་རྡོ་རྗེའི་ཚིག་གིས་ཞལ་བཞེས་གཙིགས་སུ་འཛིན་ཏེ། པདྨའི་རིང་ལུགས་འཛིན་པ་༧སྐྱབས་རྗེ་སྨྱོ་ཤུལ་ཡང་སྲིད་རིན་པོ་ཆེ་དང་། ༧མཁའ་འགྲོ་རིན་པོ་ཆེ་པདྨ་ཆོས་སྒྲོན་མཆོག་གི་གཙོས་ཕྱོགས་གྲུ་ཁག་གི་མཁན་སྤྲུལ། བླ་སློབ། དགེ་འདུན། སྐྱ་སེར་ཕོ་མོ་བཅས་ཀྱི་འཁོར་ཕུན་སུམ་ཚོགས་པས་མཐའ་བརྒྱན་པའི་གྲོལ་བ་བཞི་ལྡན་གྱི་༧སྐུ་གདུང་རིན་པོ་ཆེ་ཡེ་ཤེས་ཀྱི་སྐུ་ཞལ་རྗེན་པར་བཞུགས་པའི་དྲུང་། དུས་ཆུ་སྟོད་ཟླ་བའི་ཡར་ཚེས་༨ ནས ༡༠ བར། ཆོས ༧བདུད་འཇོམས་འོག་མའི་ཟབ་ཆོས་བླ་གྲུབ་གཏེར་བདུན་འདུས་སྒོ་ནས་དཀྱིལ་འཁོར་གྱི་དལ་ཞལ་ཕྱེས་ཏེ། ཉིན་ཐ་མར་རིག་འཛིན་གོང་མའི་མཐོང་བརྒྱུད་ཕྱག་བཞེས་མཐོང་གྲོལ་གར་འཆམ་ཆེན་མོའི་བྱིན་ཆར་ཕབ་སྟེ་སྣང་སྲིད་རྟེན་དང་བརྟེན་པ་དག་པར་བྱས།།
