03/12/2025
राष्ट्रिय एकता अभियानको मुख्यमन्त्रीको निर्णयप्रति गम्भीर ध्यानाकर्षण : मदरसा बोर्ड विधेयकमाथि प्रश्न
जनकपुरधाम – मधेश प्रदेश सरकारले मदरसा शिक्षा बोर्ड गठनसम्बन्धी विधेयकलाई सैद्धान्तिक सहमति दिएर प्रदेश सभामा दर्ता गर्ने तयारी गरेको प्रति राष्ट्रिय एकता अभियानले गम्भीर चासो व्यक्त गरेको छ। मुख्यमन्त्री सरोज यादव नेतृत्वको मन्त्रिपरिषद्ले गरेको उक्त निर्णय 'संवेदनशील विषय' रहेको भन्दै अभियानले यसको सुरक्षा, सामाजिक सद्भाव र कानुनी शासनमा पर्न सक्ने सम्भावित प्रभावबारे प्रश्न उठाएको छ।
राष्ट्रिय एकता अभियानका मधेश प्रदेश ईन्चार्ज मनिष पुर्वे द्वारा जारी प्रेस विज्ञप्तिमा उल्लेख छ कि यो निर्णय पर्याप्त सुरक्षा मूल्यांकन, व्यापक छलफल र सम्भावित प्रभावहरूको अध्ययन नगरी हतारमा अघि बढाइएको देखिन्छ।
विज्ञप्तिमा धार्मिक संस्थाहरूको दायराभित्र अनियमित गतिविधि, दर्ता तथा मानवस्रोत व्यवस्थापनमा पारदर्शिताको अभाव जस्ता समस्याहरू बढ्दै गएकोतर्फ संकेत गरिएको छ। अभियानले समुचित नियमनको अभावमा आन्तरिक सुरक्षा, सीमा व्यवस्थापन र जनसांख्यिकीय स्थायित्वमा दीर्घकालीन जोखिम उत्पन्न हुन सक्ने आशंका व्यक्त गरेको छ।
अभियानका मुख्य मागहरू
राष्ट्रिय एकता अभियानले प्रदेश सरकार समक्ष मदरसा बोर्ड विधेयक र सम्बन्धित सरकारी निर्णयबारे विस्तृत अध्ययन र सार्वजनिक स्पष्टीकरणको माग गरेको छ। अभियानका अन्य प्रमुख मागहरू यसप्रकार छन्:
विस्तृत अध्ययन र स्पष्टीकरण: मदरसा शिक्षा बोर्ड तथा त्यससँग सम्बन्धित सबै सरकारी निर्णयहरूको विस्तृत अध्ययन, छानबिन तथा तथ्यसहितको सार्वजनिक स्पष्टिकरण तुरुन्त प्रस्तुत गरियोस्।
कडा नियमन: मदरसा, मस्जिद तथा अन्य धार्मिक/शैक्षिक संरचनाहरूको दर्ता, आर्थिक पारदर्शिता, मानवस्रोत नियुक्ति र व्यवस्थापनसम्बन्धी नियमन कडाइका साथ कार्यान्वयन गरियोस्।
कानुनी कारबाही: अवैध प्रवेश, कागजपत्रविहीन बसोबास वा कानुनी प्रक्रियाविपरीत गतिविधि भेटिए निष्पक्षरूपमा कानून अनुसार कारबाही गरियोस्।
सुरक्षा मजबुती: प्रदेश–संघ समन्वयमार्फत सीमा सुरक्षा तथा आन्तरिक सुरक्षा संयन्त्रलाई थप मजबुत बनाइयोस्।
सार्वभौमिकता र जिम्मेवारीमा जोड
अभियानले राष्ट्रको सार्वभौमिकता, स्थिरता र सुरक्षा जस्ता संवेदनशील विषयमा राज्यका सबै निकायले दुरदर्शी, पारदर्शी र जिम्मेवार ढङ्गले काम गर्नुपर्नेमा जोड दिएको छ।
राष्ट्रिय एकता अभियानले नागरिकहरूलाई शान्तिपूर्ण, संवैधानिक र तथ्यमा आधारित छलफल तथा जागरणमा सहभागी हुन अपिल गरेको छ।
मनिष पुर्वे
प्रदेश ईन्चार्ज, मधेश प्रदेश
राष्ट्रिय एकता अभियान
