http://www.tiktok.com/@maranathachurch

Maranatha Church Kerabari, Kerabari-8, Prathibha Tole, Biratnagar (2026)

06/10/2026

मङ्गलबार, ६ अक्टोबर, असोज २०

परमेश्वरले तपाईंलाई निको पार्न सक्नुहुन्छ (५)
“उहाँले आफ्नो वचन पठाउनुभयो, र तिनीहरूलाई निको पार्नुभयो, अनि तिनीहरूलाई विनाशतर्फ जानबाट बचाउनुभयो ” (भजनसंग्रह १०७ः२०
चङ्गाई र निरन्तर राम्रो स्वास्थ्यका लागि यहाँ एउटा प्रार्थना दिइएको छः “हे पिता, तपाईंको वचनको सामर्थ्य नै मेरो चङ्गाई र निरन्तर असल स्वास्थ्यको स्रोत हो । यसले घोषणा गर्दछ कि तपाईंले मलाई सबै विनाशबाट बचाउनुभएको छ । मैले विगतमा केही यस्ता निर्णयहरू गरेको हुन सक्छु जसले मेरो जीवनमा खराब स्वास्थ्य निम्त्यायो, तर तपाईंले मलाई ख्रीष्टमा क्षमा गर्नुभएको छ र तपाईंले मलाई सबै रोग, पीडा, कमजोरी र बिरामी अवस्थाबाट निरन्तर बचाइराख्नुहुन्छ । तपाईंको वचनले भन्छः ‘किनभने तिमीले परमप्रभुलाई आफ्नो वासस्थान बनाएका छौ, यसैकारण तिमीमाथि कुनै खराबी आइपर्नेछैन, न त कुनै रुढी तिम्रो पालको नजिक आउनेछ’ (भजनसंग्रह ९१ः९–१०) ।” “तपाईं मेरो शरणस्थान र मेरो वासस्थान हुनुहुन्छ । तपाईंको उपस्थितिमा कुनै रोग छैन र म तपाईंमा नै रहने भएकाले मेरो जीवनमा बिरामीपन टिक्न सक्दैन । म सुरक्षित छु किनभने म ख्रीष्टमा छु । तपाईंको वचन भन्छ, ‘कमजोरले भनोस्, “म बलियो छु”’ (योएल ३ः१०) ।” “त्यसैले म कमजोर महसुस गर्दा पनि आफूलाई बलियो भन्छु । प्रभु, तपाईंको वचनले भन्छ कि तपाईंले मेरो मुख उत्तम कुराहरूले तृप्त पार्नुहुने छ ताकि मेरो जवानी नयाँ बनोस् (भजनसंग्रह १०३ः५) । तपाईं नै मेरो पूर्ण सन्तुष्टिको स्रोत हुनुहुन्छ, र म विश्वास गर्छु कि मेरो जवानी र बल नयाँ हुँदैछ । फलस्वरूप, म ख्रीष्टमा सम्मानजनक रूपमा वृद्ध हुँदै जाने छु । प्रभु, तपाईंको वचन भन्छ कि मैले तपाईंलाई पुकार्दा तपाईंले मलाई उत्तर दिनुहुने छ । संकटमा तपाईं मलाई साथ दिनुहुने छ; मलाई बचाउनुहुने छ र मलाई आदर गर्नुहुने छ । दीर्घायुले तपाईं मलाई तृप्त पार्नुहुने छ र मलाई आफ्नो मुक्ति देखाउनुहुने छ
(भजनसंग्रह ९१ः१५–१६) ।” “त्यसैकारण, म तपाईंको वचनमा खडा हुन्छु र विश्वासद्वारा घोषणा गर्दछुः ‘म मर्ने छैन तर जीवित रहने छु र परमप्रभुका कामहरूको वर्णन गर्ने छु’ (भजनसंग्रह ११८ः१७) ।”
यसैले जब हामी आफूलाई कमजोर महसुस गर्छौँ, तब पनि परमेश्वरको जीवित वचनको प्रतिज्ञामा खडा भएर विश्वासद्वारा आफ्नो स्वास्थ्य र बलको घोषणा गर्नुपर्छ ।
परमेश्वरले तपाईंलाई धेरै आशिष दिनुभएको होस् ।

05/10/2026

सोमबार, ५ अक्टोबर, असोज १९

परमेश्वरले तपाईंलाई निको पार्न सक्नुहुन्छ (४)
“जसले असल भूमिमा बीउ प्राप्त ग-यो, त्यो त्यही हो जसले वचन सुन्छ र बुझ्छ, अनि जसले वास्तवमै फल फलाउँछ ।” (मत्ती १३ः२३)
अहिलेसम्म तपाईंले प्रतिफल देख्नुभएको छैन भन्दैमा तपाईंको प्रार्थनाको सुनुवाइ भइरहेको छैन भन्ने हुँदैन । परमेश्वरको वचन एउटा बीउ हो; यसलाई फल फलाउन समय चाहिन्छ । परमेश्वरको वचन तपाईंको जीवनमा जरा गाडेर बढ्दै गर्दा, तपाईंले विश्वास गर्नुभएको कुरामा अडिग रहनका लागि उहाँसँग अनुग्रह माग्नुहोस् । परिस्थिति जस्तोसुकै भए पनि, कृतज्ञ हुन सधैँ उत्तम हुन्छ । सैतान चाहन्छ कि तपाईं आफ्नो जीवनमा सुधार भएका पक्षहरूका लागि परमेश्वरलाई धन्यवाद दिनुको साटो, नबदलिएका परिस्थितिहरू र परिवर्तन नभएका कुराहरूमा मात्र ध्यान केन्द्रित गर्नुहोस् । जब तपाईं विश्वासमा खडा हुनुहुन्छ र वचनलाई आफ्नो भित्र काम गर्न दिनुहुन्छ, तब चङ्गाईको बारेमा परमेश्वरका प्रतिज्ञाहरूमा मनन गरिरहनुहोस् । परमेश्वरको वचनले तब काम गर्छ जब तपाईं यसलाई आफ्नो हृदयमा रोप्नुहुन्छ । आफ्नो जीवनमा परमेश्वरका प्रतिज्ञाहरू निरन्तर बोलिरहनुहोस् र त्यो बीउलाई गोडमेल गरिरहनुहोस् । परमेश्वरले भन्नुभएको छः “जसरी आकाशबाट पानी र हिउँ पर्छ र पृथ्वीलाई भिजाएर अन्न उमार्छ र खेती गर्नेलाई बीउ र खानेलाई रोटी दिन्छ, त्यसरी नै मेरो मुखबाट निस्किने वचन पनि हुने छ । त्यो मकहाँ व्यर्थै फर्कने छैन, तर मैले चाहेको काम त्यसले पूरा गर्ने छ र जुन कामका लागि मैले त्यो पठाएको थिएँ, त्यसमा त्यो सफल हुने छ” (यसैया ५५ः१०–११) । परमेश्वरले आफ्नो वचनको बारेमा के भन्नुभयो त ? “यसले मैले चाहेको काम पूरा गर्ने छ, र जहाँ मैले पठाएको थिएँ, त्यहाँ यो सफल हुने छ ।” यसकारण आफ्नो विश्वासलाई बलियो बनाउनुहोस् र परमेश्वरको वचनमा अडिग रहनुहोस्ः “म यस कुरामा विश्वस्त छुः जीवितहरूको देशमा मैले परमप्रभुको भलाइ देख्न पाउनेछु” (भजनसंग्रह २७ः१३) ।
त्यसैले परमेश्वरको वचन कहिल्यै असफल नहुने शक्तिशाली बीउ भएकाले परिस्थिति जस्तोसुकै देखिए पनि उहाँको प्रतिज्ञामा दृढ भई विश्वास गरिरहनुहोस् ।
परमेश्वरले तपाईंलाई धेरै आशिष दिनुभएको होस् ।

04/10/2026

आइतबार, ४ अक्टोबर, असोज १८

परमेश्वरले तपाईंलाई निको पार्न सक्नुहुन्छ (३)
“यदि हामीले हरेस खाएनौँ भने... उचित समयमा हामीले कटनी गर्ने छौँ ।” (गलाती ६ः९)
निको हुने प्रक्रिया विभिन्न तरिकाले हुन सक्छ । कहिलेकाहीँ परमेश्वरले चमत्कार गर्नुहुन्छ र तुरुन्तै कसैलाई निको पार्नुहुन्छ । अन्य समयमा उहाँले व्यक्तिलाई क्रमशः (बिस्तारै) निको पार्नुहुन्छ । बाइबल र येशूले गर्नुभएका धेरै चमत्कारहरूलाई हेर्दा, उहाँले सधैँ एउटै तरिकाले मानिसहरूलाई निको पार्नुभयो होला भन्ने सोच्न सजिलो हुन्छ । तर नजिकबाट नियाल्दा, हामी देख्छौँ कि धेरैजसो अवस्थामा उहाँले एउटै कुरा दोहो-याउनु भएन । उदाहरणका लागि, उहाँले अन्धाहरूलाई यसरी निको पार्नुभयोः
१. मत्ती ९ः२९ मा, येशूले दुईजना अन्धाहरूको आँखा छोएर मात्र निको पार्नुभयो ।
२. मर्कूस १०ः५२ मा, उहाँले अन्धा बारतिमासलाई नछोइकन उनीसँग बोलेर मात्र निको पार्नुभयो ।
३. मर्कूस ८ः२२–२५ मा, उहाँले एकजना अन्धाको आँखामा थुक लगाइदिनुभयो र उनी पूर्ण रूपमा निको नभएसम्म दुई पटक हात राख्नुभयो ।
येशू मानिसहरूलाई निको पार्न कुनै एउटा मात्र विधिमा बाँधिनुभएको थिएन तर उहाँ सधैँ तिनीहरूलाई निको पार्न चाहनुहुन्थ्यो । विधि जेसुकै भए पनि निको हुनेहरूले उहाँको शक्ति र निको पार्ने क्षमतामा निरन्तर विश्वास देखाएका थिए आज पनि यही कुरा सत्य हो ! यदि तपाईंले चङ्गाईको लागि प्रार्थना गर्नुभयो र तुरुन्तै केही भएन भने, त्यसको अर्थ तपाईंको विश्वास कमजोर भयो भन्ने होइन । यसको अर्थ परमेश्वर तपाईंसँग रिसाउनुभएको छ वा तपाईंले दुःख पाएको उहाँ चाहनुहुन्छ भन्ने पनि होइन । यसको अर्थ त केवल यो हो कि, अब तपाईंले परमेश्वरलाई उहाँको वचनका लागि धन्यवाद दिने र तपाईं दिनप्रतिदिन निको हुँदै हुनुहुन्छ भनेर विश्वास गर्ने समय आएको छः “उहाँकै चोटहरूद्वारा तिमीहरू निको भयौ” (१ पत्रुस २ः२४) । यसको अर्थ यो हो कि जुन कुरा आत्मिक संसारमा पहिले नै पूरा भइसकेको छ, त्यो ढिलो–चाँडो भौतिक संसारमा प्रकट हुने छ । परमेश्वरको दृष्टिकोणबाट, तपाईंको चङ्गाईको मूल्य तिरिइसकेको छ ।
परमेश्वरले कुन विधि वा कति समयमा निको पार्नुहुन्छ भन्ने कुरामा भन्दा पनि उहाँको प्रतिज्ञामा अटल खडा भई विश्वास गरिरहनुहोस् ।
परमेश्वरले तपाईंलाई धेरै आशिष दिनुभएको होस् ।

03/10/2026

शनिबार, ३ अक्टोबर, असोज १७

परमेश्वरले तपाईंलाई निको पार्न सक्नुहुन्छ (२)
“उहाँले मेरा सबै पापहरू क्षमा गर्नुहुन्छ र मेरा सबै रोगहरू निको पार्नु हुन्छ ।”
(भजनसंग्रह १०३ः३)
भजनकारले लेखेका छन्ः हे मेरो प्राण, परमप्रभुको प्रशंसा गर्,
र उहाँका सबै उपकारहरू नबिर्सी-- जसले तेरा सबै पापहरू क्षमा गर्नुहुन्छ,
र तेरा सबै रोगहरू निको पार्नुहुन्छ, जसले तेरो जीवनलाई मृत-लोकबाट मुक्त गर्नुहुन्छ,
र तँलाई करुणा र कृपाको मुकुट लगाइदिनुहुन्छ (पद २–४) । दाउदले यी चार कुराहरू आफूलाई सम्झाएका थिए, र तपाईंले पनि त्यसै गर्नुपर्छः
१. परमेश्वरले उनका सबै पाप क्षमा गर्नुभएको थियो ।
२. परमेश्वरले उनका सबै रोगहरू निको पार्नुभएको थियो ।
३. परमेश्वरले उनको जीवनलाई मृत्यु र विनाशबाट बचाउनुभएको थियो ।
४. परमेश्वरले उनलाई प्रेम, दया, करुणा र अनुग्रहको मुकुट पहिराउनुभएको थियो ।
बाइबलमा लेखिएको छः “अनि ठूलाठूला भिड उहाँकहाँ आए र तिनीहरुले साथमा ल्याएका शारीरिक अपाङ्गता भएकाहरु दृष्टिविहीन, बोल्न नसक्नेहरु र अरु धेरैलाई उहँका चरणमा राखिदिए अनि उहाँले तिनीहरुलाई निको पारिदिनुभयो” (मत्ती १५ः३०) । के येशूले निको पार्नुभएका यी मानिसहरू ‘नयाँ गरी जन्मेका’ इसाईहरू थिए ? होइन, यो घटना त क्रूसको मृत्युभन्दा अघि भएको थियो । विचार गर्नुहोस् तः यदि येशू ती सबैलाई निको पार्न चाहनुहुन्थ्यो भने, तपाईं त उहाँको सन्तान हुनुहुन्छ जसले मुक्तिको लागि ख्रीष्टमाथि भरोसा राख्नुभएको छ; उहाँले तपाईंलाई पनि निको पार्नुहुन्छ । के तपाईं विश्वासी हुनुहुन्छ ? यदि हुनुहुन्छ भने, यो वचन पढ्नुहोस् र यसमा अडिग रहनुहोस्ः “विश्वास गर्नेहरूका साथमा यी चिन्हहरू हुने छन्... तिनीहरूले बिरामीहरूमाथि हात राख्ने छन्, र तिनीहरू निको हुने छन्”
(मर्कुस १६ः१७–१८) । याकुबले लेखेका छन्ः “ के तिमीहरूमध्‍ये कोही बिरामी छ? त्‍यसले मण्‍डलीका एल्‍डरहरूलाई बोलाओस्‌ । तिनीहरूले प्रभुको नाउँमा त्‍यसलाई तेलले अभिषेक गरेर त्‍यसका निम्ति प्रार्थना गरून् र विश्‍वासको प्रार्थनाले बिरामीलाई बचाउने छ र प्रभुले त्‍यसलाई निको पार्नुहुने छ” (याकुब ५ः१४–१५) । यदि तपाईं बिरामी हुनुहुन्छ भने, परमेश्वरको वचनमा अडिग रहनुहोस् र उहाँले तपाईंलाई निको पार्नुहुने छ भनी विश्वास गर्नुहोस् ।
परमेश्वर आफ्ना सन्तानका सबै पाप क्षमा गर्न र रोगहरू निको पार्न पूर्ण रूपमा सामर्थी र इच्छुक हुनुहुन्छ, त्यसैले उहाँको वचन र विश्वासको प्रार्थनामा अडिग रहनुहोस् ।
परमेश्वरले तपाईंलाई धेरै आशिष दिनुभएको होस् ।

02/10/2026

शुक्रबार, २ अक्टोबर, असोज १६

परमेश्वरले तपाईंलाई निको पार्न सक्नुहुन्छ (१)
“म चाहन्छु,’ उहाँले भन्नुभयो । ‘निको होऊ !” (मत्ती ८ः३)
बाइबलले भन्छः “एकजना कुष्ठरोगी उहाँकहाँ आयो र उहाँको अगाडि घुँडा टेकेर भन्यो, ‘प्रभु, यदि तपाईंले चाहनुभयो भने, तपाईंले मलाई निको पार्न सक्नुहुन्छ ।’... येशूले हात बढाएर उसलाई छुनुभयो र भन्नुभयो, ‘म चाहन्छु, निको होऊ !’ र तुरुन्तै उसको कुष्ठरोग निको भयो” (पद २–३) । परमेश्वरले निको पार्नुहुन्छ भन्ने कुरामा उहाँको इच्छा हो कि होइन भनेर हामी दुविधामा परेको चाहनुहुन्न । त्यसैले उहाँले अनुग्रहपूर्वक हामीलाई आफ्नो वचन दिनुभएको छ ।दाउदले भनेका छन्ः “हे परमप्रभु मेरा परमेश्वर, सहायताको निम्ति मैले तपाईंलाई पुकारेँ, र तपाईंले मलाई निको पार्नुभयो । तपाईंले मलाई चिहानबाट बचाउनुभयो” (भजनसंग्रह ३०ः२–३) । परमेश्वर हाम्रो चङ्गाई (निको हुने कुरा) प्रति यति गम्भीर हुनुहुन्छ कि उहाँले यसलाई क्रूसमा येशूको मृत्युसँग जोड्नुभएको छ । “हामी पापको निम्ति मरेर धार्मिकताको निम्ति बाँचौँ भनी उहाँले आफ्नै शरीरमा हाम्रा पापहरु क्रूसमा बोक्नुभयो । उहाँकै चोटहरूद्वारा तिमीहरू निको भयौ ।” (१ पत्रुस २ः२४) । जसरी हामी क्रुसमा मृत्युमाथि ख्रीष्टको विजय र हाम्रो मुक्तिको बारेमा शंका गर्दैनौँ, त्यसरी नै हामीलाई निको पार्ने पिताको इच्छामा पनि शंका गर्नु हुँदैन । यी शब्दहरूलाई ध्यान दिनुहोस्, “तिमीहरू निको भयौ ।” यो भूतकालमा छ । परमेश्वरको दृष्टिकोणबाट, तपाईंको चङ्गाईका लागि आवश्यक सबै कुरा क्रूसमा पूरा भइसकेको छ । ती कुष्ठरोगीलाई येशूले निको पार्न ‘सक्नुहुन्छ’ भन्ने थाहा थियो, तर उहाँले ‘चाहनुहुन्छ’ कि हुन्न भन्ने मात्र थाहा थिएन । येशूले तीनवटा शक्तिशाली शब्दद्वारा उसको शंका मेटाइदिनुभयोः “म चाहन्छु ।” अनि उहाँले भन्नुभयो, “निको होऊ !” बाइबलले बताउंछ, कि ती व्यक्तिको रोग तुरुन्तै निको भयो । बाइबलले यो पनि बताउंछः “येशू ख्रीष्ट हिजो, आज र सधैँभरि एकै समान हुनुहुन्छ” (हिब्रु १३ः८) । यसको अर्थ तपाईं पूर्ण विश्वासका साथ परमेश्वरकहाँ जान सक्नुहुन्छ र आफ्नो रोग निकोको लागि उहाँमा भरोसा गर्न सक्नुहुन्छ ।

तसर्थ, पूर्ण विश्वाससाथ र सम्पूर्ण भरोसामा परमेवरसामु खडा हुनुहोस्, उहाँ निको पार्ने परमेश्वर हुनुहुन्छ ।
परमेश्वरले तपाईंलाई धेरै आशिष दिनुभएको होस् ।

30/09/2026

बिहीबार, १ अक्टोबर, असोज १५
आराम र पुनस्र्थापनाका लागि समय निकाल्नुहोस् ।
“परमप्रभुको बाटो हेर्नेहरूले नयाँ बल प्राप्त गर्ने छन् ।” (यसैया ४०ः३१)
थकित महसुस हुनुले तपाईंलाई तीनवटा कुरा सिकाउँदछः
(१) तपाईंको शरीरलाई आराम चाहिएको छ,
(२) जीवनलाई एक सामान्य मानवीय गतिमा लैजानुपर्छ, र
(३) केही समय परमेश्वरको उपस्थितिमा मात्र रहनुपर्छ ।
परमेश्वर स्वयम् आफैले “सातौँ दिनमा विश्राम लिनुभयो” (उत्पत्ति २ः२) । यस बारे सोच्नुहोस् त ! परमेश्वर जो सर्वव्यापी हुनुहुन्छ, जसले सबै कुरा जान्नुहुन्छ र जो सर्वशक्तिमान हुनुहुन्छ,उहाँले त विश्राम गर्नुभयो भने, तपाईंलाई चाहिँ विश्राम चाहिँदैन भन्ने किन लाग्छ ? यदि तपाईं सधैँ काममा मात्र घोटिने स्वभावको हुनुहुन्छ भने, केही घण्टा मात्र भए पनि काम नगरी बस्नु तपाईंको लागि गाह्रो बानी हुन सक्छ । तर विश्राम एउटा यस्तो ‘गुप्त हतियार’ हो, जुन परमेश्वरले शत्रुलाई तपाईंलाई हराउन दिनुभएको हो । जब तपाईं पूर्ण रूपमा थाक्नुहुन्छ, तपाईं न त परमेश्वरको लागि उपयोगी हुनुहुन्छ, न त अरू कसैको लागि । सैतानले तपाईंलाई यता र उता दौडधुप गराइरहनु र सधैँ व्यस्त राखिरहनुको मुख्य कारण यही हो । यदि उसले तपाईंलाई नराम्रो लत, गलत सम्बन्ध वा खराब बानीमा फसाउन सकेन भने, उसले तपाईंलाई ‘धेरै असल काम’ गरेर थकाउने जाल बुन्छ । उसले तपाईंलाई यति गलाउन चाहन्छ कि जब वास्तविक लडाइँ आउँछ—जुन लड्नका लागि तपाईं जन्मिनुभएको हो, तब तपाईं लड्नै नसक्ने गरी थाकिसक्नुभएको हुनुहुने छ । यूहन्नाले लेखेका छन्ः “जसरी तिम्रो प्राणको उन्नति भइरहेछ, त्यसरी नै सबै कुरामा तिम्रो उन्नति होस् र तिमी स्वस्थ रहो भनी म प्रार्थना गर्दछु” (३ युहन्ना २) । तर जब तपाईंको प्राण थकित हुन्छ र आराम वा पुनस्र्थापनाका लागि समय हुँदैन, तब तपाईंको आत्मिक उन्नति भइरहेको हुँदैन । अब के गर्ने त ? आफ्ना सबै योजना र नयाँ कार्यहरूलाई येशूको चरणमा सुम्पिदिनुहोस् । उहाँको निर्देशनको पर्खाइमा बस्नुहोस् । यदि उत्तर आउन ढिलो भयो जस्तो लाग्छ भने, यो वचनमा अडिग रहनुहोस्ः “परमप्रभुको बाटो हेर्नेहरूले नयाँ बल प्राप्त गर्ने छन् ।”
“आराम केवल रोकिएर बस्नु होइन, परमप्रभुको उपस्थितिमा नयाँ बल प्राप्त गर्नु हो ।”
परमेश्वरले तपाईंलाई धेरै आशिष दिनुभएको होस् ।

30/09/2026

बुधबार , ३० सेप्टेम्बर , असोज १४ गते रेबिका राईको घरमा भएको सङतिमा सहभागी सबै मंडली परिवारलाई परमेश्वरले धेरै आशिष दिनुभएको होस् ।

30/09/2026

बुधबार, ३० सेप्टेम्बर, असोज १४
“तिमीहरू एकले–अर्कासँग आ–आफ्ना पाप स्वीकार गर ।” —याकुब ५ः१६
आफ्ना कमीकमजोरीहरू स्वीकार गर्नुहोस्।
आज तपाईं जता फर्कनुहुन्छ, कोही न कोही आफ्नो खराब छनोट, कमजोर कार्यसम्पादन, वा गलत व्यवहारको लागि बहाना बनाइरहेको देखिन्छ, वा घटि कमजोरी स्वीकार गर्न नसकिरहेको देखिन्छ । तापनि हामीले सबै गल्ती गर्छौं । गल्ती स्वीकार गर्ने एउटा उत्कृष्ट उदाहरण राजा साउलले दाउदलाई अन्यायपूर्वक खेदो गरेको घटनामा पाइन्छ । दाउद भगौडा बने, अनि यस प्रक्रियामा केही पुजारीहरूसँग मदत माग्दा अनजानमा उनीहरूको जीवनलाई जोखिममा पारे । पुजारी अहिमेलेकले उनलाई खाना र तरवार दिए अनि उनको तर्फबाट परमेश्वरलाई सोधे । राजा साउलको मुख्य गोठालो दोएगले यो सबै कुरा देख्यो अनि ती पुजारीको बारेमा कुरा लगाइदियो । साउलले अहिमेलेकको सामना गरे, उनलाई दाउदसँग षड्यन्त्र गरेको आरोप लगाए, अनि उनी र पचासी अन्य पुजारीहरू र उनीहरूका सम्पूर्ण परिवारहरूलाई मार्न दोएगलाई आदेश दिए । ‘अहीमेलेकका अबियाथार नाउँ भएका एक जना छोराचाहिँ भागेर दाउदकहाँ गए । साउलले कसरी परमप्रभुका पुजाहारीहरूलाई मारे सो कुरा तिनले दाउदलाई बताइदिए । तब दाउदले तिनलाई भने, “त्यस दिन एदोमी दोएग त्यहाँ थियो, र त्यसले साउललाई भन्ला भन्ने मलाई थाहा थियो । तिम्रा पिताका सबै जहानका मृत्युको कारण मै भएँ”’ (१ समुएल २२ः२०–२२ ) । कस्तो स्वीकारोक्ति ! कुनै बहाना छैन, केवल एक स्वीकारोक्ति कि उनले उनीहरूको सहायता मागेर भयानक गल्ती गरेका थिए । उनको अर्को कथनले त्यस्तो गल्ती दोहो्याउने र सम्भव भएसम्म क्षतिपूर्ति गर्ने उनको प्रतिबद्धता देखाउँछ : “तिमी यहाँ मसँग बस, नडराऊ । तिम्रो प्राण लिन खोज्नेले मेरो पनि प्राण लिन खोजेको छ । तिमी मसँग सुरक्षित रहने छौ” (१ समुएल २२ः२३ ) । मानिसहरूले गल्ती गर्छन् । तिनीहरूमा कमी कमजोरीहरू हुन्छन् । परमेश्वर हाम्रो हरेक कमजोरीमा सहायता गर्न हाजिर हुनुहुन्छ ।
शान्ति तब मात्रै आउँछ जब हामी एकअर्कासँग हाम्रा कमजोरीहरू स्वीकार गर्छौं ।

परमेश्वरले तपाईंलाई धेरै आशिष दिनुभएको होस् ।

29/09/2026

मंगलबार, २९ सेप्टेम्बर, असोज १३
“उनीबाट एकातिर लागेर तिनी मानिसहरूकहाँ गए ।” —१ समुएल १७ः३०

निरुत्साहित तुल्याउनेहरूसँग कसरी व्यवहार गर्ने।
गोल्यतसँग लड्न दाउदलाई निरुत्साहित गर्ने पहिलो व्यक्ति उनकै आफ्नै दाजु थिए । ‘एलिआबले सुने र उनी रिसले चूर भए । उनले दाउदलाई यसो भनेर सोधे, “तँ यहाँ के गरिरहेछस्? वनमा भएका ती अलिकता भेडाहरू हेर्न तैँले कसलाई जिम्मा दिएर आइस् ? म तँलाई चिन्दछु, घमण्डी र दुष्ट हृदय भएको । तँ लडाइँ हेर्नलाई मात्र आएको होस् ।” दाउदले भने “मैले अहिले के गरेको छु र ? मैले बोल्नु पनि नहुने ?” उनीबाट एकातिर लागेर तिनी मानिसहरूकहाँ गए, र त्यही प्रश्न दोहो-याए’ (१ समुएल १७ः२८–३०) । यसरी निरुत्साहित गर्ने मानिसहरुका कुरालाई लिएर अत्यधिक महत्व दिने जालमा नफस्नुहोस् । तपाईंको जीवनमा मूल्य थप्नेहरूसँग समय बिताउनुहोस्, तपाईंबाट घटाउनेहरूसँग होइन । राजा साउलले पनि दाउदलाई यस्तो भने, “तिमी गएर त्यस पलिस्तीसँग लड्न सक्नेछैनौ । तिमी त ठिटा मात्र छौ, र त्योचाहिँ जीवनभरि नै लडाइँ गर्दैआएको छ” (पद ३३) । तर दाउद गोल्यतसँग कति अनुभव छ भन्ने कुरामा चिन्तित थिएनन्, किनभने उनलाई थाहा थियो कि उनका परमेश्वर सर्वशक्तिमान् हुनुहुन्छ । हामी आफ्नो विश्वासलाई हामीले देख्न सक्ने कुरामा मात्र सीमित गर्छौं भने यो कति दुःखद हुन्छ । कुनै कामको लागि हामी अयोग्य छौँ भनेर सोच्नु भनेको आत्मकेन्द्रित हुनु र परमेश्वरबाट अलग भएर आफ्नै क्षमताहरूमा ध्यान केन्द्रित गर्नु हो । उहाँमा भर नपर्ने यस्तो स्वतन्त्र सोचले परमेश्वरलाई समीकरणबाट बाहिर निकाल्छ र उहाँले घोषणा गर्नुभएको यो तथ्यलाई बेवास्ता गर्छ कि उहाँको शक्ति हाम्रो कमजोरीमा सिद्ध हुन्छ (२ कोरिन्थी १२ः९–१० हेर्नुहोस्) । दाउदको जेठो दाजु “एलिआब” को नामको अर्थ “परमेश्वर मेरो बुबा हुनुहुन्छ” भन्ने हुन्छ । यो कति विडम्बनापूर्ण छ, किनभने उनलाई परमेश्वरमा कुनै भरोसा थिएन ।
त्यसैकारण विजय अनुभव गर्न, तपाईंले पहिले आफ्नै नजिकका मानिसहरूको शंका र अविश्वासलाई जित्नुपर्ने हुन सक्छ ।

परमेश्वरले तपाईंलाई धेरै आशिष दिनुभएको होस् ।

28/09/2026

सोमबार, २८ सेप्टेम्बर, असोज १२
“हामी जान्दछौँ, उहाँलाई प्रेम गर्नेहरूका निम्ति हरेक कुरामा परमेश्वरले भलाइ नै गर्नुहुन्‍छ ।” —रोमी ८ः२८

परमेश्वर तपाईंको पक्षमा काम गरिरहनुभएको छ।
बाइबल यी शब्दहरूसाथ सुरु हुन्छ : ‘आदिमा परमेश्वरले आकाशमण्डल र पृथ्वी सृष्टि गर्नुभयो । पृथ्वी आकारविनाको र शून्य थियो । अथाह समुन्द्राथि अन्धकार थियो, र परमेश्वरका आत्मा पानीमाथि परिभ्रमण गर्दैरहनुहुन्थ्यो । अनि परमेश्वरले भन्‍नुभयो, “उज्यालो होस् ‌।” तब उज्यालो भयो । र परमेश्वरले उज्यालोलाई हेर्नुभयो, त्यो असल थियो’ (उत्पत्ति १ः१–४ ) । तपाईंको जीवन अस्तव्यस्त देखिँदा समेत, अस्तव्यस्तताबाट सुव्यवस्था अनि अन्धकारबाट ज्योति ल्याउनुहुने परमेश्वरले तपाईंको जीवनलाई अर्थपूर्ण बनाउन मदत गर्न सक्नुहुन्छ भनी तपाईंले उहाँमा भरोसा गर्न सक्नुहुन्छ । “हरेक कुरामा परमेश्वरले भलाइ नै गर्नुहुन्छ” (रोमी ८ः२८) भनी जब तपाईं विश्वास गर्नुहुन्छ, यसले हुने नराम्रा कुराहरूलाई पुनःपरिभाषित गर्दछ । तपाईंको जीवनको सबैभन्दा खराब दिन उत्तम दिनमा परिणत हुन सक्छ । प्रत्येक बादलमा चाँदीको घेरा हुन्छ, अनि प्रत्येक नकारात्मक पक्षको सम्भाव्य विपरित सकारात्मक पनि हुन्छ । जब तपाईं यो दृष्टिकोणबाट जीवनको व्याख्या गर्नुहुन्छ, यसले तपाईंलाई साहस दिन्छ कि सबै कुरा ठिक हुनेछ । यसले तपाईंलाई निश्चय दिन्छ कि उत्तम कुरा आउन बाँकी नै छ किनभने परमेश्वरले भन्नुभएको छ । “जुन योजनाहरू मैले तिमीहरूका निम्ति बनाएको छु, ती म जान्दछु ... ती तिमीहरूका उन्नतिको निम्ति हुन्” (यर्मिया २९ः११ हेर्नुहोस्) । तर कहिलेकहीँ तपाईंले पनि भूमिका खेल्नुपर्ने हुन्छ । परमेश्वरले स्वर्गीय नियुक्तिहरू स्थापित गर्दै हुनुहुन्छ, तर तपाईंले तिनीहरूको पालना गर्नुपर्छ । परमेश्वरले वरदान दिनुहुन्छ, तर तपाईंले आफ्नो वरदानलाई प्रज्वलित पार्नुपर्छ । परमेश्वरले बोलाइरहनुभएको छ, तर तपाईंले जवाफ दिनुपर्छ (यसैया ६ः८ हेर्नुहोस्) । परमेश्वरले तपाईंको पाइलाहरूलाई निर्देशित गरिरहनुभएको छ, तर तपाईंले पवित्र आत्मासँगै पाइला चाल्नुपर्छ ।
यदि तपाईंले विश्वासयोग्यतापूर्वक आफ्नो भूमिका निर्वाह गर्नुभयो भने, तपाईंको निम्ति काम गर्ने आफ्नो भूमिका परमेश्वरले पूरा गर्नुहुने छ भनी तपाईंले उहाँमा भरोसा गर्न सक्नुहुन्छ ।

परमेश्वरले तपाईंलाई धेरै आशिष दिनुभएको होस् ।

Maranatha Church Kerabari

06/10/2026

05/10/2026

04/10/2026

03/10/2026

02/10/2026

30/09/2026

30/09/2026

30/09/2026

29/09/2026

28/09/2026

Address

Website

Alerts

Contact The Place Of Worship

Shortcuts

Share

Category

Listing takedown request