Maranatha Church Kerabari

26/08/2026

बुधबार, २६ अगस्ट, भदौ १०
“हरेक विचारलाई वशमा पार्दैं ।” —२ कोरिन्थी १०ः५

“त्यसलाई पक्रेर रद्दीको टोकरीमा फालिदेऊ।”
लेखक म्याक्स लुकाडोले लेखेका छन् : ‘केही समयअघि, एक आमाले मलाई तिनको आठ वर्षको छोराको लागि प्रार्थना गर्न आग्रह गरिन् । ऊ निरन्तर देखिने तस्बिरहरू र डरलाग्दा दृश्यहरूको कारण विचलित थियो जसले गर्दा ऊ एकलै रहने र भयभीत बनेको थियो । ती कुराहरूको कारण उसको रातको निद्रा पनि हराएको थियो । हामीले भेटेको दिन, उसका आँखा आँसुले भरिएका थिए र ऊ आफ्नी आमासँग टाँसिएको थियो । तिनले उसलाई डाक्टरहरूकहाँ लगेकी थिइन्, तर केहीले पनि काम गरेको थिएन । मैले उसलाई भनेँ कि उसको जीवनमाथि शैतानको कुनै अधिकार छैन । वास्तविक लडाइँहरू मनमा लडिन्छन् । कि परमेश्वरले हामीलाई हरेक विचारलाई अधिनमा राख्न मदत गर्नुहुनेछ । मैले उसलाई बाइबलको एउटा पद कण्ठ गर्न र डरलाग्दा विचारहरू उसको दिमागमा आउँदा प्रत्येक पटक त्यही पद उद्धृत गर्न भनेँ । मैले उसलाई भने, “आफ्नो हात उठाऊ र त्यो विचारलाई पक्रेर रद्दीको टोकरीमा फालिदेऊ । अनि त्यसो गर्ने बित्तिकै, त्यसको सट्टामा धर्मशास्त्रको एउटा पद राखिहाल ।” त्यसपछि हामीले उसलाई तेलले अभिषेक गर्यौं र उसको लागि प्रार्थना गर्यौं । पाँच दिनपछि, उसकी आमाले ठुलो प्रगति भएको कुरा बताइन् । “गत हप्तादेखि, मूर्तिहरू गायब भएका छन्, उसले अब तिनीहरूलाई देख्न सक्दैन । उसले राती भजन २५ः५ बाट धर्मशास्त्रको यो खण्ड पढ्छ : “तपाईंको सत्यतामा मलाई डो-याउनुहोस् र मलाई सिकाउनुहोस्, किनकि तपाईं नै मेरा उद्धारका परमेश्वर हुनुहुन्छ ।” मलाई विश्वास छ कि यसले उसलाई ख्रीष्टको नजिक ल्याएको छ । उसले डरलाग्दा विचारहरूलाई रद्दीको टोकरीमा फ्याँकने रणनीति प्रयोग गरेको छ । उसले भन्यो कि जब उसले ती विचारहरूलाई फ्याँक्न खोज्यो, उसको टाउको दुख्थयो । मैले सोधेँ, “तिनीहरूलाई के ले हटायो ?” उसले मुस्कुराउँदै भन्यो, “मलाई थाहा छ परमेश्वरले तिनीहरूलाई हटाइदिनुभयो ।”’
त्यसैकारण तपाईंको लागि आजको वचन छ – “त्यसलाई पक्रेर रद्दीको टोकरीमा फालिदिनुहोस् ।”
परमेश्वरले तपाईंलाई धेरै आशिष दिनुभएको होस् ।

25/08/2026

मंगलबार, २५ अगस्ट, भदौ ९
“तिमीहरू निको हुन सक भनेर एक–अर्काको लागि प्रार्थना गर ।” —याकुब ५ः१६

प्रार्थनाले धेरै फरक पार्छ।
ख्रीष्टियन मुटु रोग विशेषज्ञ डा. रान्डोल्फ बर्डलाई प्रार्थनाले निको पार्ने काम “वैज्ञानिक रूपमा मापनयोग्य” प्रभाव पार्छ कि पार्दैन भन्ने कुरा जान्न ठुलो रुची थियो । उनले भनेका छन्, “धेरै प्रार्थनापछि, के गर्ने भन्ने विचार मकहाँ आयो ।” दस महिनाको अवधिमा, एउटा कम्प्युटरले सान प्रान्सिस्को जनरल अस्पतालको कोरोनरी केयर युनिटमा रहेका ३९३ बिरामीहरूलाई दुई समूहहरू मध्ये एकमा तोकेको थियो । पहिलो समूहलाई घरेलु प्रार्थना समूहहरूले प्रार्थना गरिदिन्थे । दोस्रो समूहका लागि प्रार्थना गरिँदैनथ्यो । घरेलु प्रार्थना समूहहरूमा विभिन्न ख्रीस्टियन सम्प्रदायका थिए । तिनीहरूलाई बिरामीहरूको नाम र तिनीहरूको रोग र अवस्थाहरूको संक्षिप्त विवरण मात्र दिइन्थ्यो । ती बिरामीहरूलाई प्रत्येक दिन प्रार्थना गरिन्थ्यो । प्रार्थना गरिएका बिरामीहरू प्रार्थना नगरिएकाहरू भन्दा यसरी फरक थिए :
(१) तिनीहरूलाई एन्टिबायोटिक आवश्यक पर्ने सम्भावना पाँच गुणा कम थियो ।
(२) तिनीहरूको फोक्सोमा तरल पदार्थ विकास हुने सम्भावना तीन गुणा कम थियो ।
(३) कसैलाई पनि सासफेर्नको लागि भेन्टिलेटरमा जोडिनु आवश्यक परेन ।
(४) थोरैको मात्रै मृत्यु भयो । यदि त्यसरी अध्ययन गरिएको प्रविधि नयाँ औषधी वा प्रक्रिया भएको भए, यसलाई नयाँ सफलताको रूपमा घोषणा गरिने थियो । विश्वासद्वारा रोग निको हुन्छ भन्ने कुरा इन्कार गर्ने पुस्तकका लेखक डा. विलियम नोलनले समेत भनेका छन्, “यस्तो लाग्छ कि जाँचबुझ पार गरेर यो अनुसन्धान सत्य प्रमाणित हुनेछ ... सायद हामी डाक्टरहरूले हाम्रा सिफारिस पत्रहरूमा “दिनको तीन पटक प्रार्थना गर्नुहोस्” भनी लेख्नुपर्ने छ । पुरानो करारमा, हामी पढ्छौँ : “म तँलाई फेरि स्वस्थ बनाउनेछु, र तेरा चोटहरू म निको पार्नेछु, परमप्रभु भन्नुहुन्छ” (यर्मिया ३०ः१७) । नयाँ करारमा, याकुबले लेखे : “विश्वासको प्रार्थनाले बिरामीलाई बचाउनेछ, र प्रभुले त्यसलाई निको पार्नुहुनेछ ... तिमीहरू निको हुनलाई एउटाले अर्काको निम्ति प्रार्थना गर” (याकुब ५ः१५–१६) ।
यसकारण अरू क्षेत्रमा जस्तै स्वास्थ्यको क्षेत्रमासमेत प्रार्थनाले धेरै फरक पार्छ ।
परमेश्वरले तपाईंलाई धेरै आशिष दिनुभएको होस् ।

24/08/2026

सोमबार, २४ अगस्ट, भदौ ८
“के दुई जना आपसमा सहमत नभएसम्म सँगसँगै हिँड्छन् ।” —आमोस ३ः३

वित्तीय सीमाहरू निर्धारण गर्नुहोस्।
आजकल धेरैजसो विवाहहरू आर्थिक समस्याका कारण असफल हुन्छन् भन्ने कुरा कुनै रहस्य रहेन । व्यक्तिगत ऋण तिर्न वा हाम्रो आर्थिक अपेक्षाहरू पूरा गर्न असफल हुँदा अन्य सम्बन्धहरू पनि जोखिमामा पर्न सक्छन् । यी समस्याहरूलाई कम गर्न निम्न तीनवटा रणनीतिले धेरै मदत गर्नेछन् :-
(१) आफ्नो पति-पत्नीसँग छलफल गर्नुहोस् कि तपाईंहरू प्रत्येकले अर्काको अनुमति बिना प्रत्येक दिन कति खर्च गर्न सक्नुहुन्छ । यो सीमाभन्दा माथिको कुनै पनि रकमलाई “मुख्य” मानिनेछ र त्यो रकम खर्च गर्न पूर्ण सहमति आवश्यक पर्नेछ । प्रत्येक जोडीले आफ्नो घरायसी आम्दानीको आधारमा “मुख्य” खरिदलाई फरक तरिकाले परिभाषित गर्नेछन्, त्यसैले सहमति भएको कुरामा अडिग रहनुहोस् । यो महत्त्वपूर्ण छ । यदि तपाईं त्यो कारोबारमा सहमत हुनुहुन्न भने, हानि हुँदा एकअर्काप्रति औँला उठाउने प्रवृत्ति हुन्छ ।
(२) आफ्नो परिवारलाई बताइदिनुहोस् कि व्यक्तिगत ऋण तपाईंको “पारिवारिक नीति” को विरुद्ध छ । यदि तपाईंले अपवादमा यो नीति विपरित गर्ने निर्णय लिनुभयो भने, आफ्नो पति वा पत्नी पूर्ण सहमतिमा छन् भनी सुनिश्चित गर्नुहोस् । यदि तपाईं बुद्धिमान हुनुहुन्छ भने, तपाईंले सर्तहरू र तिर्नुपर्ने मितिहरू लिखित रूपमा राख्नुहुनेछ ।
(३) आफ्नो बच्चा, पति-पत्नी, वा अरू कसैलाई रकम उपलब्ध गराएर वा सधैँ उनीहरूको आर्थिक सुरक्षा पर्खाल बनेर गैरजिम्मेवार नबनाउनुहोस् । नाइँ भन्नुहोस् । नत्र त्यसरी नाइँ नभन्दा तपाईंले परमेश्वरको सबैभन्दा प्रभावकारी सिद्धान्तहरू मध्ये एकलाई बाधा पु-याउनुहुन्छ – व्यक्तिगत व्यवहारको रोप्ने र कटनी गर्ने सिद्धान्त । वास्तविक परिपक्वता तब आउँछ जब यो पाठ सिकिन्छ । प्रेम कठोर हुनुपर्छ ! यदि तपाईं अरूलाई गैरजिम्मेवार बन्न सक्षम तुल्याउने व्यक्ति हुनुहुन्छ भने, परमेश्वरसँग अहिले नै त्यस्तो हुनबाट रोक्नको लागि शक्ति माग्नुहोस् । उदाहरणका लागि, तपाईंको घरमा कुनै वयस्क सदस्य अझै पनि केही काम नगरी बस्छ भने, उसबाट घरखर्चका लागि मासिक रूपमा केही योगदानको माग गर्नुहोस् । यसले चरित्र निर्माण गर्ने प्रेम प्रदर्शन गर्दछ, जुनचाहिँ वास्तविक प्रेम हो ।
यसकारण यदि तपाईंले वित्तीय सीमाहरू निर्धारण गर्नु आवश्यक छ भने, त्यसो गर्नुहोस् !
परमेश्वरले तपाईंलाई धेरै आशिष दिनुभएको होस् ।

23/08/2026

आइतबार, २३ अगस्ट, भदौ ७
“जाओ ... मैले तिमीहरूलाई आज्ञा गरेका सबै कुरा पालन गर्न तिनीहरूलाई सिकाओ ।” —मत्ती २८ः१९–२०

इतिहास उहाँको कथा हो।
येशूले बोल्नुभएका शब्दहरूले संसारलाई सदाको लागि परिवर्तन गरिदियो । यी उहाँका चेलाहरूलाई अन्तिम निर्देशनहरू थिए : “स्वर्ग र पृथ्वीमा समस्त अधिकार मलाई दिइएको छ । यसकारण जाओ, र सबै देशका जातिहरूलाई चेला बनाओ, पिता र पुत्र र पवित्र आत्माको नाउँमा तिनीहरूलाई बप्तिस्मा देओ, मैले तिमीहरूलाई आज्ञा गरेका सबै कुरा पालन गर्न तिनीहरूलाई सिकाओ” (पद १८–२०) । येशूका अनुयायीहरूले यो कुरालाई गम्भीरतापूर्वक लिए : “हरेक दिन तिनीहरूले मन्दिरमा र घर–घरमा गएर येशू नै ख्रीष्ट हुनुहुन्छ भनी सिकाउन र प्रचार गर्न छोडेनन्” (प्रेरित ५ः४२) । तिनीहरूले याद राखे कि तिनीहरूले त्यस्ता मानिसलाई पछ्याएका थिए जसले प्रत्येकलाई सिकाउनुभयो अनि जसले तिनीहरूलाई सबै मानिसहरूलाई सिकाउन आज्ञा दिनुभयो । तिनीहरूले त्यसै गरे । तिनीहरूले पुरुष र महिला, दास र स्वतन्त्र दुवैलाई सिकाउन लागे । संसारका कतिपय महान् शिक्षण संस्थाहरू ख्रीष्टका अनुयायीहरूद्वारा स्थापित भएका थिए । अक्सफोर्ड र क्याम्ब्रिज विश्वविद्यालयहरू तेह्रौं शताब्दीमा सुरु भए । (अक्सफोर्ड विश्वविद्यालयको आदर्श वाक्य भजन २७ः१ बाट लिइएको हो : “प्रभु मेरो ज्योति हुनुहुन्छ ।”) जर्ज मार्सडेन नामक अमेरिकी प्राध्यापकले टिप्पणी गरेका छन् : “अमेरिकी इतिहासको बारेमा एउटा उल्लेखनीय तथ्य यो हो कि म्यासाचुसेट्सको निर्जन स्थलमा अवतरण गरेको छ वर्षभित्र प्युरिटनहरूले त्यस्तो शिक्षण संस्था स्थापना गरे जुन चाँडै नै एक प्रतिष्ठित कलेज बन्यो ।” यी शब्दहरू विद्यार्थी पुस्तिकाबाट लिइएका हुन् : “प्रत्येक विद्यार्थीलाई स्पष्ट रूपमा निर्देशन दिइयोस् र गम्भीरतापूर्वक राम्रोसँग विचार गर्न दबाब दिइयोस् कि उसको जीवन र अध्ययनको मुख्य लक्ष्य परमेश्वर र येशू ख्रीष्टलाई जान्नु हो, जुन अनन्त जीवन हो (युहन्ना १७ः३) । तसर्थ ख्रीष्टलाई ... सबै ठोस ज्ञान र सिकाइको एक मात्र जगको रूपमा राख्नु हो ।” त्यो हार्वार्ड विश्वविद्यालय थियो ! अनि अमेरिकामा स्थापित सुरुका १३८ वटा कलेज र विश्वविद्यालयहरू मध्ये ९२ प्रतिशत ख्रीष्टका अनुयायीहरूद्वारा सुरु गरिएका थिए ।
सत्यता यही हो : उहाँका वचनले हामीलाई जानकारी मात्र दिँदैनन्, तिनीहरूले हामीलाई रूपान्तरण पनि गर्छन् ।
परमेश्वरले तपाईंलाई धेरै आशिष दिनुभएको होस् ।

22/08/2026

शनिबार, २२ अगस्ट, भदौ ६
“परमप्रभुले मात्र बुद्धि दिनुहुन्छ ।” —हितोपदेश २ः६

बुद्धिको लागि प्रार्थना गर्नुहोस्‌।
एफिससको मण्डलीको लागि पावलको प्रार्थना यहाँ छ : “परमेश्वरले... तिमीहरूलाई बुद्धि र प्रकाशको आत्मा दिउन्” (एफिसी १ः१७) । कलस्सी मण्डलीको लागि, उनले परमेश्वरलाई “सारा आत्मिक बुद्धि र समझमा उहाँको इच्छाको ज्ञान” ले भरिपूर्ण बनाइदिनुहुन बिन्ती गरे (कलस्सी १ः९) । याकुबले लेखे : “यदि तिमीहरूमध्ये कसैलाई बुद्धिको अभाव छ भने ... परमेश्वरलाई त्यसले मागोस्, र त्‍यसलाई त्यो दिइनेछ । तर त्यसले कत्ति पनि शंका नगरी विश्वाससाथ मागोस्” (याकुब १ः५–६) । बाइबल पढेर पनि हामीले ईश्वरीय बुद्धि प्रापत गर्न सक्छौँ । यसैकारण सुसमाचारको खातिर आफ्नो शिर काटिनुअघि आफ्नो अन्तिम पत्रमा पावलले आफ्ना उत्तराधिकारी तिमोथीलाई यस्तो लेखे, “तिमी बाल्यकालदेखि पवित्र–धर्मशास्त्रसँग परिचित छौ, जसले ख्रीष्ट येशूमा भएको विश्वासद्वारा मुक्तिको निम्ति तिमीलाई शिक्षा दिन सक्छ” (२ तिमोथी ३ः१५) । तपाईं जुन बुद्धिअनुसार चलिरहनुभएको छ त्यो बुद्धि परमेश्वरबाट आएको हो भन्ने कुरा तपाईंले कसरी थाहा पाउन सक्नुहुन्छ ? “जुन बुद्धि स्वर्गबाट आउँछ त्यो पहिले शुद्ध हुन्छ, तब त्यो शान्तिप्रिय, कोमल, विचारशील, कृपापूर्ण र असल फलले भरिएको, पक्षपातरहित र कपटरहित हुन्छ” (याकुब ३ः१७) । जब जवान सोलोमनले इस्राएलको सिंहासन ग्रहण गरे, परमेश्वरले उनलाई सोध्नुभयो, “तिमी मसित के माग्छौ ?” (१ राजा ३ः५) । सोलोमनले जवाफ दिए : “तपाईंको प्रजालाई ठिकसित शासन गर्नलाई बुझ्ने मन आफ्नो दासलाई दिनुहोस् ... सोलोमनले यो कुरा मागेकामा परमप्रभु प्रसन्न हुनुभयो” (१ राजा ३ः९–१०) । फलस्वरूप, सोलोमन अहिलेसम्म जन्मिएका मानिसहरूमध्ये सबैभन्दा बुद्धिमान मानिसका रूपमा चिनिए अनि उनले बाइबलका तीनवटा पुस्तक लेखे । अनि उनलाई बुद्धि दिनुहुने परमेश्वरले तपाईंलाई पनि त्यो दिनुहुनेछ । यसको लागि तपाईंले गर्नुपर्ने काम भनेको प्रार्थना गर्नु र आफ्नो हृदय र मनलाई उहाँको वचनमा लगाउनु मात्रै हो ।
यसर्थ यदि तपाईंलाई समझ र बुद्धिको खाँचो छ भने, परमेश्वरसँग बुद्धिको लागि प्रार्थना गर्नुहोस् ।
परमेश्वरले तपाईंलाई धेरै आशिष दिनुभएको होस् ।

22/08/2026

21/08/2026

शुक्रबार, २१ अगस्ट, भदौ ५
“आजको दिन परमप्रभुले सृजनुभएको हो, यसमा हामी आनन्दित होऔँ र रमाऔँ ।” —भजन ११८ः२४

तपाईंको जीवनको सबैभन्दा महान् क्षण अहिल्यै हो।
तपाईंको जीवनको सबैभन्दा महान् क्षण अहिल्यै हो । यो क्षण आनन्ददायी, खुसी वा सजिलो भएकाले होइन, तर यो तपाईंसँग भएको एक मात्र क्षण हो । विगतको प्रत्येक क्षण अपूरणीय रूपमा बितेर गएको छ । यो कहिल्यै फर्केर आउने छैन । यदि तपाईं त्यहीँ बस्नुहुन्छ भने, तपाईंले आफ्नो जीवन गुमाउनुहुन्छ । अनि भविष्य पनि सधैँ त्यहाँ कतै परै रहन्छ । तपाईं भोलिको लागि पर्खँदै वा भोलिको बारेमा चिन्ता गर्दै अनन्तकाल बिताउन सक्नुहुन्छ । यदि तपाईं त्यस्तो भविष्यमा बस्नुहुन्छ भने पनि तपाईंले आफ्नो जीवन गुमाउनुहुनेछ । यो क्षण परमेश्वरको तपाईंलाई अपरिवर्तनीय उपहार हो । सबैभन्दा महत्त्वपूर्ण कुरा, यो क्षण महत्त्वपूर्ण छ किनभने यो त्यही क्षण हो जहाँ परमेश्वर हुनुहुन्छ । यदि तपाईं परमेश्वरको साथमा रहने हो भने, तपाईं अहिले पनि उहाँसँग हुनुपर्छ – यसै क्षणमा । त्यसैले भजनकार भन्छन् : “आजको दिन परमप्रभुले सृजनुभएको हो, यसमा हामी आनन्दित होऔँ र रमाऔँ ।” त्यसैले अगमवक्ता यर्मियाले भने कि परमेश्वरको कृपा कहिल्यै अन्त्य हुँदैन किनभने “ हरेक बिहान उहाँको कृपा नयाँ हुन्छ” (विलाप ३ः२३) । त्यसैकारण प्रेरित पावलले भनेका छन्, “कसरी हिँड्छौ ध्यानसँग हेर ... समयको पूरा सदुपयोग गर ... प्रभुको इच्छा के छ, सो बुझ” (एफिसी ५ः१५–१७) । ईश्वरशास्त्री फ्रेडरिक बुचनरले लेखेका छन्, “बिहान, दिउँसो, साँझ — दिनका प्रहरहरू, कुनै पनि दिनका, तपाईंको दिन र मेरो दिनका । यी अनुग्रहका वर्णमाला हुन् । यदि बोल्ने परमेश्वर कतै हुनुहुन्छ भने, पक्कै पनि उहाँ यहाँ बोल्नुहुन्छ : बिहान ब्युँझँदा र काम गर्दा, टाढा जाँदा र फेरि फर्कँदा, तपाईंले भेट्ने मानिसहरू र तपाईंले पढ्ने पुस्तकहरू मार्फत, अनि अँध्यारोमा निदाउँदा ।”
यी सबैको एउटै अर्थ हुन्छ —तपाईंको जीवनको सबैभन्दा महान् क्षण अहिल्यै हो ।
परमेश्वरले तपाईंलाई धेरै आशिष दिनुभएको होस् ।

20/08/2026

बिहीबार, २० अगस्ट, भदौ ५
“म कसलाई पठाऊँ, र हाम्रा निम्ति को जाने ?” अनि मैले भनेँ, “म हाजिर छु ! मलाई पठाउनुहोस् ।” —यसैया ६ः८

तपाईंले कहिले प्रतिक्रिया जनाउनुहुन्छ, त्यो महत्त्वपूर्ण छ।
के तपाईंलाई ती दस जना जासुसहरूको सम्झना छ जसले परमेश्वरको प्रतिज्ञा पूरा गर्ने क्षमतामाथि शंका गरेका थिए र इस्राएलीहरूलाई प्रतिज्ञा गरिएको भूमिमा प्रवेश गर्नबाट रोकेका थिए ? तिनीहरूको शंका परमेश्वरको लागि यति घृणित थियो — उहाँले मिश्रबाट प्रस्थान र लाल समुद्रको विभाजन मार्फत पहिले नै आफ्नो शक्ति प्रकट गरिसक्नुभएको थियो — त्यो देखेर परमेश्वरले त्यहीँ न्याय ल्याउनुभयो । भोलिपल्टै, इस्राएलीहरूले पूरै भिन्न प्रतिक्रिया जनाए । तिनीहरूले आफ्नो मन परिवर्तन गरे, तर अब धेरै, धेरै ढिलो भइसकेको थियो । एक दिनको ढिलाइले तिनीहरूको चालिस वर्ष गुम्यो ! तिनीहरूले प्रतिज्ञा गरिएको भूमि गुमाए किनभने तिनीहरूको प्रतिक्रिया जनाएको समय धेरै ढिलो भएको थियो । अब यसको अर्थ तपाईंले अवसर गुम्ला भन्ने डरमा जिउनुपर्छ भन्ने होइन । आखिर, परमेश्वर दोस्रो मौकाको परमेश्वर हुनुहुन्छ (योना ३ः१ हेर्नुहोस्) । तर कृपया यो बुझ्नुहोस् : निष्क्रियता पनि एउटा कार्य हो , अनि अनिर्णय पनि एउटा निर्णय हो । आखिर, जब तपाईं परमेश्वरसँग व्यवहार गर्दै हुनुहुन्छ, तपाईंको प्रतिक्रिया समय धेरै महत्त्वपूर्ण छ । पावलको सेवा दमस्कसको बाटोमा ख्रीष्टसँग उनको जीवन परिवर्तन गर्ने भेट हुँदा सुरु भयो । तुरुन्तै उनले घुँडा टेकेर कराए : “प्रभु, मैले के गरेको तपाईं चाहनुहुन्छ ?” (प्रेरित ९ः६) । यसैयाको पुस्तकमा, जब स्वर्ग खुल्यो र परमेश्वरले भन्नुभयो, “म कसलाई पठाऊँ, र हाम्रा निम्ति को जाने ?” तुरुन्तै अगमवक्ता यसैयाले भने, ‘“म हाजिर छु ! मलाई पठाउनुहोस् ।” उहाँले मलाई भन्नुभयो, “जाऊ गएर यी मानिसहरूलाई भन”’ (यसैया ६ः८–९) । तपाईं परमेश्वरभन्दा अगाडि जान चाहनुहुन्न, अनि तपाईं उहाँभन्दा पछि पनि रहन चाहनुहुन्न । उहाँले तपाईंलाई दिनुभएका अवसरहरूलाई छिटो, निर्णायक रूपमा र साहसपूर्वक सकेसम्म सदुपयोग गर्न चाहनुहुन्छ ।
तपाईंको लागि आजको वचन यही छ : तपाईंले प्रतिक्रिया जनाउने समय महत्त्वपूर्ण छ ।
परमेश्वरले तपाईंलाई धेरै आशिष दिनुभएको होस् ।

19/08/2026

बुधबार, १९ अगस्ट, भदौ ४
“किनकि हाम्रो युद्धका अस्त्र–शस्त्र सांसारिक होइनन्, तर किल्लाहरू नाश गर्ने ईश्वरीय सामथ्र्य तिनमा छ ।” —२ कोरिन्थी १०ः४

तपाईंले आफ्ना समस्यामथि विजय पाउन सक्नुहुन्छ।
आजको समस्या भोलिको पनि समस्या हो भन्ने हुँदैन । त्यस्तो ठानेर आफैलाई बन्दी नबनाउनुहोस् । आफैलाई यस्तो पहिचान दिने काम नगर्नुहोस् : “म चिन्ता गर्ने व्यक्ति मात्रै हुँ ।” “कुराउटे बानी मेरो कमजोरी हो ।” “मेरो बुबा पिउने व्यक्ति हुनुहुन्थ्यो, यसकारण मलाई लाग्छ म पनि त्यस्तै बन्ने छु ।” त्यस्तो काम बन्द गर्नुहोस् ! यस्ता शब्दहरूले शैतानसँग सम्बन्ध सृजना गर्छन् । तिनीहरूले उसलाई तपाईंको आत्मासम्म पहुँच प्रदान गर्छन् । तपाईंले पराजित, दुःखी जीवन जिउनुहोस् भन्ने परमेश्वरको इच्छा होइन । पुरानो आवाजहरू सुन्न्न छोडिदिनुहोस् र नयाँ छनोटहरू गर्नुहोस् । “सिमानाका रेखाहरू मेरो निम्ति रमणीय स्थानमा परेका छन् ‌। साँच्चै, मैले आनन्दमय पैतृक–सम्पत्ति पाएको छु” (भजन १६ः६) । आफ्नो उत्तराधिकार अनुसार जिउनुहोस्, आफ्नो परिस्थिति अनुसार होइन । पहिल्यै परमेश्वरले तपाईंलाई विजयको प्रतिज्ञा दिनुभएको छ अनि लडाइँका लागि हतियारहरू प्रदान गर्नुभएको छ । “किनभने हामी संसारका हौँ, तापनि सांसारिक लडाइँ त लड्दैनौँ । किनकि हाम्रो युद्ध अस्त्र–शस्त्र सांसारिक होइनन्, तर किल्लाहरू नाश गर्ने ईश्वरीय सामर्थ्य तिनमा छ” (२ कोरिन्थी १०ः३–४) । यहोसुले यरिहोमाथि कसरी विजय प्राप्त गरे ? परमेश्वरको रणनीति प्रयोग गरेर : “करारको सन्दूक उठाओ, र सात जना पूजाहारी भेडाका सिङका सात वटा तुरही भिरेर परमप्रभुका सन्दूकको अगाडि हिँडून्” (यहोसु ६ः६) । करारको सन्दूक परमेश्वरको उपस्थितिको प्रतीक थियो । यहोसुले यसलाई मानिसहरूको लामको बिचमा राखे । हरेक गतिविधि परमेश्वरको वरिपरि घुमेको थियो । विजयको रहस्य भनेको आराधना, धर्मशास्त्र र प्रार्थनाको हतियार प्रयोग गरेर परमेश्वरलाई आफ्नो जीवनको केन्द्रमा राख्नु हो । परमेश्वरले प्रदान गर्नुहुने हरेक उपकरण प्रयोग गर्नुहोस् : धर्मशास्त्र कण्ठस्थ गर्ने र प्रार्थनामा अर्जविन्ति काम लगायत । टिभी बन्द गर्नुहोस् र बाइबल अझै धेरै खोल्नुहोस् । चिन्ता कम गर्नुहोस् र बढी प्रार्थना गर्नुहोस् ।
यसरी परमेश्वरको उपस्थितिबाट दैनिक रूपमा शक्ति प्राप्त गरेर तपाईंले आफ्ना समस्याहरूमाथि विजय प्राप्त गर्न सक्नुहुन्छ ।
परमेश्वरले तपाईंलाई धेरै आशिष दिनुभएको होस् ।