25/08/2026
ƘA’IDOJIN ZAMA ADMIN KO MODERATOR NA JAMI’AR ALQUR’ANI
1. YA KASANCE MAI GASKIYA DA AMANA
Ba ya amfani da matsayin Admin ko Moderator wajen cutar da wani, yaudarar mutane, ko neman wata moriya ta kansa.
2. YA KASANCE MAI TSORON ALLAH
Ya fahimci cewa aikin Admin ko Moderator amana ne, kuma duk abin da yake wallafawa, amincewa da shi, gogewa ko hana shi yana da alhaki a kansa.
3. YA KASANCE MAI ILIMIN ADDINI MAI INGANCI
Ba lallai sai ya kasance babban malami ba, amma ya kamata ya san abin da ya dace a wallafa da abin da bai dace ba. Idan bai tabbatar da wani bayani ba, kada ya gaggauta wallafa shi.
4. YA IYA TANTANCE SAHIHANCIN HADISI DA MAGANA
Kada ya kawo Hadisi kawai saboda ya gan shi a Facebook, WhatsApp ko wani wuri. Ya kamata ya kula sosai kada a danganta wa Manzon Allah ﷺ abin da bai faɗa ba.
5. YA KASANCE MAI BIN ƘA’IDOJIN GROUP
Dole ne ya mutunta duk dokokin da aka kafa wa JAMI’AR ALQUR’ANI, kuma kada ya yi amfani da matsayin Admin ko Moderator wajen karya waɗannan dokoki.
6. KADA YA ZAMA MAI SON RIGIMA
Admin ko Moderator ya kamata ya kasance mai natsuwa. Idan aka samu saɓani tsakanin mambobi, ya kamata ya iya magance matsalar cikin hikima ba tare da ƙara rura wutar rikici ba.
7. YA KASANCE MAI KYAKKYAWAN HALI DA HAƘURI
Domin zai yi mu’amala da mutane daban-daban. Kada ya kasance mai zagi, cin mutunci, raini, girman kai ko nuna isa.
8. YA KASANCE MAI AIKI DA HIMMA
Ba wai a ba shi matsayin Admin ko Moderator sannan ya ɓace ba. Ya kamata ya kasance yana sa ido kan group, yana taimakawa wajen kiyaye tsari da tabbatar da cewa ana samun abubuwan ilimi masu amfani.
9. KADA YA YI AMFANI DA GROUP WAJEN TALLATA KANSA
Mukamin Admin ko Moderator ba damar tara suna, followers, tallata kansa ko neman kuɗi ba ne. Ya fahimci cewa manufar JAMI’AR ALQUR’ANI ita ce yada ilimi da abin da zai amfani Musulmi.
10. YA MUTUNTA SAURAN ADMINS DA MODERATORS
Duk wanda aka ba wannan matsayi ya fahimci cewa ba shi kaɗai ne mai iko ba. Ya kamata a samu haɗin kai, shawara, mutunta juna da aiki tare.
11. KADA YA GOGE POST KO YA ƊAUKI MATAKI BA TARE DA DALILI BA
Idan akwai matsala, ya bi tsarin da aka kafa. Kada ya yi amfani da ikon Admin ko Moderator saboda son rai, abota, ƙiyayya ko rashin jituwa da wani.
12. YA KASANCE MAI KIYAYE SIRRIN GROUP
Abubuwan da s**a shafi harkokin cikin gida na Admins, Moderators ko mambobi bai kamata ya riƙa fitar da su waje ba, musamman abubuwan da aka tattauna cikin sirri.
13. YA KASANCE BA MAI SON ZUCIYA BA
Ba ya fifita abokansa, ’yan uwansa ko waɗanda yake so. Yana amfani da adalci wajen kula da kowa.
14. YA KASANCE MAI SHIRYE YA KARƁI GYARA
Idan aka nuna masa kuskure, kada ya yi fushi ko ya ɗauka an raina shi. Idan an tabbatar da kuskurensa, ya gyara cikin sauƙi.
15. YA KASANCE MAI FAHIMTAR NAUYIN MUKAMIN ADMIN KO MODERATOR
Ya fahimci cewa Admin ko Moderator ba matsayi ne na girman kai ko nuna iko ba. Amana ce, hidima ce da nauyi a gaban Allah.
16. KADA ADMIN KO MODERATOR YA AMINCE DA DUK WANI POST DA BAI DACE DA ƘA’IDOJIN JAMI’AR ALQUR’ANI BA
Kafin a amince da kowane post, Admin ko Moderator ya tabbatar cewa abin da aka wallafa ya dace da manufar group, yana ɗauke da ilimi ko fa’ida, kuma bai saɓa wa koyarwar Musulunci da dokokin group ba.
Idan post ɗin yana ɗauke da abin da bai dace ba, a ƙi amincewa da shi (Reject) ba tare da son rai, abota ko ƙiyayya ba.
Haka kuma, kada a amince da post saboda kawai wanda ya wallafa shi aboki ne, ɗan uwa ne ko sananne ne. Ana duba abin da ke cikin post, ba mutumin da ya wallafa shi ba.
17. KADA ADMIN KO MODERATOR YA AMINCE DA (APPROVE) POST ƊIN DA AKA YI SHARING
Duk wani post da aka shigo da shi daga wani group, Page ko account ta hanyar Share/Sharing, ba za a amince da shi ba.
Admin ko Moderator zai amince ne kawai da post ɗin da aka rubuta ko aka wallafa kai tsaye domin JAMI’AR ALQUR’ANI, kuma ya cika duk ƙa’idojin group.
18. KADA ADMIN KO MODERATOR YA YI AMFANI DA MATSAYINSA WAJEN FIFITA WANI
Ba a yarda Admin ko Moderator ya amince da post, ya goge post, ya hana wani, ko ya ɗauki mataki saboda dangantaka, abota, ƙiyayya ko wani abu na kansa. Manufar group da ƙa’ida su ne abin dubawa.
19. ADMIN KO MODERATOR YA KASANCE ABIN Koyi GA MAMBOBIN GROUP
Ya kamata halinsa, maganarsa da yadda yake mu’amala da mutane su zama abin koyi. Kada ya nemi mambobi su bi ƙa’ida alhali shi kansa baya bin ta.
20. KAFIN A NAƊA MUTUM ADMIN KO MODERATOR, A TABBATAR DA CANCANTARSA
Ba za a naɗa mutum Admin ko Moderator saboda yawan magana, yawan followers, abota ko sanayya ba. Za a duba amana, tsoron Allah, ilimi, halayya, natsuwa, ƙwarewa da fahimtar dokokin JAMI’AR ALQUR’ANI.
MUHIMMIN BAYANI:
Matsayin Admin ko Moderator na JAMI’AR ALQUR’ANI amana ne ba gata ba, hidima ce ba mulki ba, nauyi ne ba abin alfahari ba.
Duk wanda aka ba wannan matsayi ya kamata ya tuna cewa manufar ita ce kare martabar group, yada ilimi mai amfani, da taimakawa wajen ganin JAMI’AR ALQUR’ANI ta kasance wuri na ilimi, tarbiyya da faɗakarwa.
Allah Ya taimaki duk wanda zai ɗauki wannan nauyi, Ya ba shi ikhlasi, hikima da adalci. Amin.
ADMIN:
Abu Ja'afar Assunny ✍️
Abu Ammar Assunny ✍️
