https://www.facebook.com/102270241735256/

NKST Ama-Mkd URCC, Km4 Gboko Road Terwase Agbadu Makurdi, Makurdi (2026)

22/08/2026

IHWA I MYOM
SATI PEPE
21-08-2026

UPASALMI 118:8

TER NGU KIMBIR U KAAN ER DE GEMAN SHIMA VEREN SHA OR HEN TAR NE GA

Aluer or a doo inja nan nan, shin nana lu a tahav shin inyaregh nan nan kpa de geman uma wou cii haren sha nan ga.

Hanmo or cii nan geman inja, kwagh hungur nan, nan musan ijiir, nan voron, nan gbe angev, nan been
iyol, nan kpen.
Ngun nahan kpa u de u suur sha Ter u kpen ga la u suur sha or heregh? Ka nyi tom u nenge or nan eren shin tar ne orgen nan lu a vande eren ga?

Er or la a lu heela a nan ne iwasen ve ne hungur a Aȏndo nahan, fa nen, "shighe" ngu a er kwagh a or je i cier iyol.
Ka Ter ngu a kar ken or nan na u iwasen ye, nahan guda u suur sha Aȏndo ga zee?
U ver shima sha or kper u nder nan kpe ve. Mba ve suur sha Ter yȏ vea va ahenge ga.
Ior mbagen nyen ve suur sha ior, mimi yȏ ior mbara mba a kpe ga kpa kera mba a agee a yiman ve ga, mbagen yȏ i ngohol ior mbara
sha ikev ve kera.
Angom, hen u suur sha Ter tseegh. Or mom ngu tsoron ga, or mom ngu Aȏndo ga, kper or a na u kunya kpa Ter yȏ una na u kunya ga.
Kwagh u i yilan er Ku la je yȏ a fa u numun ior gbenda je cier
iyol. U lu vea or u wasen we sha gbashima, ku di kpa ua va sha gbashima u toon nan.
De suur sha or ga.

IVUR I UMBUR:
YEREMIA17 : 5
“Tee ngu kaan nahan er: Or u nan
suur sha or man nan gem inyamyolough i ̱ hingir agee, anan, man ishima i nan i pav a Ter yô, nan ngu a ifan iyol.”

BIBILO I ORON SHA NYOM: : UPASALMI 120-123;
1KORINTE 6

Terem, tôôm shima sha ior sha m ver ashe am sha We ken iti I Yesu Kristu.
Amen.

20/08/2026

IHWA I MYOM
TOMANYIIN PEPE
20-08-2026

MBAGALATIA 6 : 1

KÔÔM OR U NAN GBE SHA ISHIGH YOU LA A SHIMA I LEGH LEGH.

Tiv ve kaa er nyinya ngi angahar anyiin kpa i gbe. Aȏndo kpa fa kwagh ne.
Ka nahan ve A kaa hen ape se ȏr ne er aluer or nongo gbev yȏ i koom nan a shima i legh legh ye.
Ior kpishi hen er gbenda u eren kwagh a or u a gbe la yȏ ka di tswam tseegh. Zayol wam yo, mbakristu nyian kpishi ka ve fatyo u eren tom a or u nan gbe ga la. Aaven kpishi i pasem er ior mba gen venda u duen van msen sha ci u or u a lu hemen msen la gba sha ishigh vev
yum. Shi ior mbagen vea wa u kwagh u venda u yem man aluer kwagh za tser u yȏ, ka ve yila u ka u pasen we vie vie er yange ve soo u wasen we kpa we u venda yȏ i tser u ve.
Ku! angbianev, saa or a hee keng man ne wase nan ye? Orgen yange kaa a kwase na er a mough zende tomataan a za tsa shin makurdi sha ciu kper pepe yȏ una mough u yemen yȏ. Kwase ne venda tsa sha Gboko er una mough kper tughtugh. Kper nahan yȏ ura nôô je gande.
Er kwase ne za nyoron makurdi yȏ mato iv. Angbianev av, kwagh ne nahan or kera ungwa kera ga! Nom la ka u gban ngorom er nyen u kaa er nyi? Ka pe ka u hemban fan kwagh a mo je la, yȏ i er u ve! Ku! Nahan doo ga, saa a u umbur or asorabo nan keng man u wase nan ye?
Kôôm or u a nongo gbev la a shima i leghlegh. We kpa Aȏndo Una kaa er Una er a we er u er a mba ve gbe sha ishigh iyou la nahan a lu nana?
Ngun ka u kaan we er u rumun u dondon isholibo ga kpa nongo bee Yesu u yange kaa a idya kwase la er "yem de kera eren isholibo ga" la.
U zenda orisholibo kera nana za kpe yange a pine mshir tom wou a uma u nan.
Gbev mbu or mbu de hingir tyokyaa i we moron iyol ga. U wa kwagh, ve ungwa ga ve, kpa de kuren ve ivav sha ci u nyen ve venda u yum ga. Saa hanmo or nana ungwa er nyen u wam kwagh m venda ve kwagh a tserem nyian ga.
U ember gbev mbu or, Ter ngu A kar a iyugh Na sha nan kera.
Ôr ivur i umbur la tso u tagher a kwagh.

IVUR I UMBUR:
ANZAAKAA24 : 17 – 18

BIBILO I ORON SHA NYOM: UPASALMI 119:49-104;
1KORINTE 4

Terem tesem u suur sha a We ken akaa atseren mo cii, ken iti i Yesu, Amen.

19/08/2026

IHWA I MYOM
TOMATAR PEPE
19-08-2026

MATEU 19 : 27

KA NYI WE U UNDU SHA CIU DONDON YESU?

“Tsô Peteru gema kaa a Na er: Yô, nenge ase, se undu akaa cii, se dondo U, nahan ka nyi je sé va zua a mini?"

Hen ape se ôr ne, Peteru hen a hen kwagh ne ga, a fa, shi a pase jighlii er, se undu akaa ase cii. Mimi je we u u ulu orȏn ingyeren ne hegen ne, ka nyi jim u de i saa sha ci u iti Yesu ne? Mose undu icivir i ken ya u Farou
dondo onov mba Ter ken ican ve la Heb 11:24-26, Abraham undu tar na
man ityô na jimin u dondon Aȏndo Heb 11:8, Rutu undu ityô na man
mba aondo vev rumun u dondon Naomi u za civir Aȏndo u lseael.
Elisha undu kpenga cii u dondon Ter 1Utor 19:19-21, we kpa man u
undu kwagh la sha chi Yesu gadia or mom fa iyange ga.
I de hungur we ga, ne mba ne de akaa a saa ne la injar ngi poo je Mateu 19:29. U zua a akaa ou heregh shi uma u tsoron kpaa.
Aluer u tema man u zua a akaa ken uma wou u tar ne aa a saa u sha ci u iti i Yesu ga yȏ u ngu a hii zende ne ga. Ne mba ne undu akaa cii la taver nen asema heregh, injar ngi van kpee je.

IVUR I UMBUR:
MARKU 10 : 21
“Yesu gem kenger un yô, a doo Un
ishima, a kaa a na er: Kwagh shi u môm tsô; za, za tôô akaa a u lu a mi la cii, tee, na mbaatsanev, nahan wea lu a kwagh u injaa sha; yô, va dondo sha a Mo."

BIBILO I ORON SHA NYOM: UPASALMI 116-118;
1MBAKORINTE 2

Terem, Nam agee , m undu akaa cii m dondo u ken iti i Yesu Kristu.
Amen.

19/08/2026

Mbakristu ne nder nyian Sha u yav enev nena?

19/08/2026

MSEN U PEPE 🙏
Se sughul man se wuese we Aôndo wase🙏
Mdue wase man mhidi wase hen iyange ne Aôndo ahemen se cii ken iti i Yesu Kristu Tor wase Amen 🙏

18/08/2026

IHWA I MYOM
TOMAHAR PEPE
18-08-2026

MATEU 18:23-35

DE OR LA IBO NA A MLIAM ASHE

"Nahan Abishai wan u Seruya pine tor er: Inja na nan iwa i kpen ne i ̱gbe tuhwan terem tor nahana? Shi de m̱ per, m̱ za gber un ityough. Shi Davidi kaa a Abishai kua mbayev nav cii er: De nen un kera, a ̱ gba tuhwan tsô gadia ka Ter A ne un ian ye..”

Mayange alu de nan ian we or nana za nongo iyongo iyou ga, u ban a
orjime ga. Davidi ka or u Aȏndo jimin ci. Davidi ngu yevese mbaihomov van sha gbenda, shi a va tagher a orgen, ngula di mough u tuwhan Davidi taver taver je. Ka hen shighe ne Abishai ta due won er Davidi a na un inya uwe una kure fiim i Shimei kpa Davidi venda er ka Ter A na ian ye.

Alu i de maan we iyol u nan ian we ior ve nongo iyongo iyou, or nana lu eren je er i doo u, alaghga nana va nyor ken kwagh u we iyol you kpa u kera mem ga yȏ.
Ka m ungwa or kaan er nan ngu or kristu man na gba suwen num kaan er nan lu a mbayev mbaageev aluer i soo ga yȏ nana na ian tsô u nenge a kwagh.

Davidi ti yȏ fa dedoo er orjime na ka Aȏndo.
Nyen i kor Yesu kristu tsô Peteru tsuwa sanker inja er a hemba
Aȏndo jimin agee yȏ, Yesu kaa er u hen wer me fatyô u sônon Terem
man hegen je kpaa Una tindim a akum a mbatyomov mba shaav, á
hemba pue kar uhar gaa?
Mateu 26:53.

Ka shima iyou a er shighe u or nan hii u la ga kpa ka shima i Aȏndo. Nahan yȏ de Ter A tindi u a ior mba
nongon iyongo you iyol Na.
Er i lu nahan ior ngohol iyongo you nongo kpa ken mkur yȏ ve nyor a we ken zayol ve?
U ngu nongon u na ian we ior ve
nongo iyongo iyouwe?
Inja na yȏ sha mhen wou yȏ ior mbala hemba mban a agee a Aȏndo?
Wea wa Aȏndo kwagh sha ikev yȏ de kera keren zayol seer ga.

IVUR I UMBUR
1PETERU 2 : 23
“Zum u i laha Un kpaa mayange A
or iyev sha mlaha la ga, er A ya ican kpaa A ta hwa ga, kpa A gema A wa
sha ikev i Un u A er ijir sha mimi la.”

BIBILO I ORON SHA NYOM:
UPASALMI 112-115;
1KORINTE 1

Terem mo kpa wasem m wa hanma kwagh sha ikev You ken iti i Yesu Kristu.
Amen

17/08/2026

IHWA I MYOM
HIITOM PEPE
17-08-2026

ANZAAKAA 24: 17-18

U EMBER GBEV MBU ORIHOM WOU TER UNA TOO IYUGH NA SHA NAN KERA KEN

“Zum u orihom wou nan gbe yô, de ember ga, zum u nana nôngo gbev kpaa, ishima you i ̱de ember ga, sha er Ter A̱ de nengen, i ̱vihin Un, man A̱ gema A̱ kar a iyugh Na sha a nan kera ga.”

Er i lu nahan u ember shighe u kwagh a tser or ihom wou vee?
Ka m ungwa mba ve kaan er mba eren Kristu kpa ashighe kpishi kwagh a tser orihom ve yȏ ve tile hen tembe u kaan er Aȏndo u ainge huwa tion wondo.
M pine mer A huwa tion wondu ka u eren anumbe?
Shin a huwa ka vegher mom?
Mimi yȏ u orȏn sha mimi yȏ orihom wou yȏ kwagh a tser nan u er bee u nyor iember je a gande. Kpa Bibilo gema ȏr kwagh u kpilighyol heen er, aluer we u de ember gbev mbu or ihom ga yȏ Ter di gema Atoo iyugh Na sha nan kera.
Kwagh ne shile iyol.
M pine mer Una too a za ver sha ana?
Ka sha we u u ember la gaga?
Aȏndo soo er se de we ave sha iyongo yase vea orgen la ga, na Un ian, wea wa Aȏndo kwagh sha ikev yȏ too ave sha. Er i hii ve mbaihomov ou ve teman bem bem yȏ alaghga tsô kwagh ka una tser ve u sen ve shinii?
Yȏ dugh kwagh u a zer a mo gbem yȏ Aȏndo kor un ve ga la ken zwa wou kera.
Ken Obadiah ivur 12 kpa Ter venda a Edom ( tsombor u Isou) er ve de ember sha ci u gbev mbu Yudah (tsombor u Yakou) ga. Ihom i uter la je na yȏ, er Yudah nyor ken zayol yȏ, Edom cir gbenda u karen, ember kpishi, shi ve ya ve ishar kpaa. Nahan Aȏndo kaa er ve de ember sha ci u Yudah ga Aȏndo nengen ken shima aluer u ngu ember ken shima kpa a fa.
U fatyo u geman ijiroron i Aȏndo ga, shi de henen wer ka gbenda u we u soo la Ter Una kar sha u, u eren tom a orihom wou ga. U zer gbem Ter Una too iyugh na sha ve kera kpa a lu sha ciu u zungwen orihom wou la ga kpa sha ciu koom we.
U soo u lun oryilan ijir, or oron ijir, or u nan mtsaha iyol you we?
Or a hii u yȏ, ôr Aȏndo shi nan Un ian man shighe.
Tom u orȏn yev kpa ka u wou ga. Pase ya wou kwagh ne dedoo, ve de ember shighe u ango ve u a soo ve ga la a nyor ken zayol la ga.

IVUR I UMBUR:
LUKA6 : 27

BIBILO IORON SHA NYOM:
UPASALMI 109-111;
NBAROMANU 16

M son mer Tere Nam agee u wan shima a mba ve korom ihom la ken iti i Yesu Kristu.
Amen.

16/08/2026

IHWA I MYOM
LAHADI PEPE
16-08-2026

ORPASENKWAGH 8 : 11

SHIMA WAN MAN ERDOO U AȎNDO YANGE IJIRORON I ORSHOLIBO GA

“Kpa er i kur ijirôron i sha tom u ifer fefa ga yô, man ishima i ônov mba iorov i taver sha u eren ifer nahan ye.”

Kwagh ne na ican, i kaa er injar isholibo ka ku shi Aȏndo tsahan ifer, shi mbaaferev mba a ifan iyol, shi ku ve kpa doo Ter shima ga.
Ka se ungwa kwagh ne gbang yȏ se kpishi se ver ashe ser or a er sholibo je nana gba nana kpe, kpa ka a lun nahan ga yȏ i na se ican.
Aȏndo ka u zungwen mhoonom, wan shima, shi eren dedoo a ior mba ve lu a gema asema ga je kpaa. Te yange sha ior cii, noon ula sha ior cii, orperapera man orsholibo cii kpa A wa ioon Na ken ave. M timbir u ijiroron i Aȏndo tese er a pir ashe ga. Shididi de henen wer iveren i Aȏndo hen we tese er A rumun a rumun aeren ou abo la ga.
Vegher u a hembe zan se iyol je yȏ, ka er ka or eren isholibo bavelaa nan zan a mi a ve kpa shi Aȏndo u a tsahan isholibo ne a wa shima a nan, ngula kpa ma i cier iyol kpishi ga, kpa ka er, shi Aȏndo ngu a lu di eren a nan tsembelee helegh la. Ka or tema hen ijiir i eren ifer kpa erdoo u Aȏndo a lu di nyoron a nan heregh. We kwagh ne na u ican gaa?
U ngu a ngohol erdoo u Aȏndo shighe u u fe dedoo wer u vihi Un shima gaa?
M nenge ior kpishi gba ahon sha ciu m rumun u sha mhoon u Aȏndo sha mbaihomov vev.
Kwagh ne na onov mba Aȏndo kpishi vor sha ci u ve nenge mbaaferev ve lu zan hemen yȏ. Tar ka u Ter, Una fatyo u zungwen hanma or u a soo u zungwen cii, ka i yam la ga!
De yaven hunden shima ga, shima wan i Aȏndo man erdoo u Aȏndo yange ijiroron sha asorabo ou ga. Gema shima hegen er ian i lu akar ga ne.
Mhoonom ma Aȏndo ka ma timbir ijiroron kpa ma yangen ijiroron ga.
Mhoonom ma Aȏndo ka ian nan sha isholibo ga, shima wan Na ka mrumun u isholibo ga, mtsaha ngu keghen sha.
Aluer A kure ijir i fer fese ga kpa we de taver a taver ken ifer ga.

IVUR I UMBUR:
MBAROMANU 2 : 4

BIBILO I ORON SHA NYOM: UPASALMI 107-108;
MBAROMANU 15:22-33

Terem m sugh U sha shima i wan You a mo. Me kera tsume sha kwagh ne ga ken iti i Yesu Kristu,
Amen.

15/08/2026

IHWA I MYOM
SATI PEPE
15-08-2026

2SAMUEL 16 : 12

LU VING SHIMEI LA A TUWHAU ALAGHGA TSÔ TER UNA GEMA A ER A WE DEDOO

“Alaghga Aôndo Una nenge ican yam, man Ter Una gema A er a mo dedoo sha ci u ityuhwanev mbi a tohom nyian ne.”

"Man shi de we iko sha akaa a i lu ôron la cii ga, sha u de va ongo er kpan wou a toho u ga;"

Angom lu or u hemban henen a hen kwagh sha ityuhanew shin zayol u a ve la, we de lun or u hemban wan a wa zwa sha kwagh fese ga.
U tamber shighe gen u pine iyol you wer, ngun nahan ka Ter A ne ian ga zee?
M tema m ngu henen mer, ka nyi imbya or Davidi yange lu jim jim?
Ka nyi imbya jighjigh u nan la? Imbya or u nengen a tyuhwanev er ka gbenda ugen u Aȏndo nan iveren ne lan shima tsô?
We u fatyo je?
Se mough heen kpa shi u fatyo ga? A tuwhau, a wau aie iyol, a nzughul a we shin a er nyi i nyoon je kpaa too wer ka di gbenda ugen u Ter shi A ve a mi yange la sha u nan we iveren je la. Hemban henen a hen kwagh shighe u kwagh a va u inya la de hemban lamen a lam ga.
M nenge gbang yȏ, Shimei ne ka or wan iyongo jim jim. Man ngu tswen ga, a ngee sha ajiir kpishi je.
We Shimei ngu u a mande u ityuhanev ga?
A wa u aie iyol ga?
Ivur pue kar utar la kaa er , Davidi ti soo iyongo ga yȏ, a lu yemen kwagh na sha gbenda vea ior nav, kpa shi Shimei gba teran sha kpe igyungu keren awen. Ka uma u Shumei vough je la. Mba ve ikua ga, ka ve lu ica kpa ve ker iyongo i taver.
I kaa er Davidi lu yemen vea ior nav a tile ga.
Uma u tar ne u due u kaa we hanma iwa i i gbehe sha gbenda wou u tile u zenda er ne mbagen ne eren nahan ne yem ica ga. Davidi ti tile ga lu yemen a yem hemen.
Shighe gen Ushimei vea tile ken ica nahan vea tuwhau a tuhwa jim jim, kpa wa shima yemen heregh. Na Aȏndo ian A er tom a Ushimei mba ve tim sha we la iyol Na. Ka er u lu hemban u lun ving shighe u Shimei a lu hiin we la Ter ngu a hemban nongon sha ci wou ye.
De or la nana tuwhau er nan soo cii, shi cuku tso Ter Una er a we dedoo.

BIBILO I ORON SHA INYOM: UPASALM 105-106;
MBAROMANU 15:1-21

M gema u Shimei mba ken uma wam cii m wa sha ikev You Ter. Gema Ityuhanev vev ilum iveren ken iti i Yesu Kristu,
Amen.

14/08/2026

IHWA I MYOM
TOMATAAN PEPE
14-08-2026

MATEU 18 : 20

SAA SHA SHIMA I WAN MAN U DE OR IBO SE FATYO U KOHOL KEN ITI TER YE

“Gadia her ape ior ihiar shin itiar ve kohol ken iti Yam yô, Mo kpaa M ngu ve her atô je."

Ne lu a tahav nan nan kpa ne zua ga yȏ ne fatyȏ u eren ma kwagh ga.
Mo yȏ m fa me saa a kor ave keng a er kwagh u Kristu ne ga, kpa er m lu va oron bibilo iyol yam yȏ, m mase kaven me, Aȏndo yol Na kpa gba or umace ken mzough - Ter, Wan man Cighan Jijingi.
M nenge a ajiir ken Bibilo kpishi u tesen er saa se zua keng se er kwagh ye.
Bibilo kaa er aluer anmgbianev vea zua shima imom yo a doo shi a hom kpaa (upasalmi 133:1).
Ape se ȏr ne i kaa er aluer ior i uhar shin utar vea zua ken iti Na yȏ Un A lu hen a to ve. Shi aluer se zua se sagh shin se kange ma kwagh shin tar ne yȏ, ka pe sha kpa a lu vough je la (Mateu 18:18) M nenge sha akaa ne yȏ m yem u timen sha u fan er i hii ve se lu zan hemen ga yȏ. Kwagh u mpav ne nyor taver. Kwagh u hii hii u a doo u ior mba ve soo zuan vea fa yȏ, i mar se kposo kposo. Ka ne lu ngo je kpa aeren a zua ga. Nahan saa se lu a shima wan man m de u den anmgbianev ibo ve la keng ve se yem hemen. We u nenge nena? Beem shighe gen ka u hen wer, ken tar cii ka we i kohol ior mbalanen kwagh i haa ve ikua awe yȏ?
Angom ka we tseegh ga, orgen nana orou i nan, u eren a er uwu kpa a hembau. Kwagh u vesen yȏ m ngu zamber ne, waan nen shima a ayol a en, ka ior cii ve lu a kwaghfan u marami ga. M de u den anmgbian kwagh bo ka tsar u vesen u karen lun ken mzough. Aluer i vihi tsar ne kera yȏ se zua nena? Mimi yȏ ior ou mban lan kwagh. U ngu pinen er i hii ve m fe
yȏ? Ka Jijngi A pasem ye. Waan shima ave, de gbe num ga. Ka teran u Ter Ana u je la. Saa ne wan shima shi ne deen anmgbianev ibo ve ga yȏ ne za hemen ga. Mbagen ka dang nahan u nenge za ve iyolo? Ka we u lu a iti ye, ka we u lu a Aȏndo ye. Ve yȏ mba kwagh u saan ve ga. Ter Atese u kwagh u a lu u u er yȏ fese.

IVUR I UMBUR:
MBAKOLOSE 3 : 13

BIBILO I ORON SHA NYOM:
UPASALMI 103-104;
MBAROMANU 14

Na se Jijingi Wou u den ibo man wan shima la ken iti Yesu Kristu.
Amen.

NKST Ama-Mkd URCC

22/08/2026

20/08/2026

19/08/2026

19/08/2026

19/08/2026

18/08/2026

17/08/2026

16/08/2026

15/08/2026

14/08/2026

Address

Telephone

Website

Alerts

Contact The Place Of Worship

Shortcuts

Share

Category

Listing takedown request