15/07/2026
*Labarin Mutumin Kirki da Matarsa Mai Kaifin Harshe*
* 13*
Akwai wani mutum salihi wanda yake da mata mai tsananin wahalar mu'amala. Matar ta kasance mai rowa ce, kuma mai kaifin harshe. Suna da 'ya'ya da dama tare, kuma saboda ƙaunar da yake wa 'ya'yansa, ya kasance yana haƙuri da halayenta, yana kuma yawan roƙon Allah Ya shirye ta.
Da ranar Idi ta kusa, mutumin ya yi ta ƙoƙari da aiki tuƙuru domin ya tara kuɗin sayen ragon layya. Allah cikin falalarsa Ya taimake shi, har ya samu kuɗin kafin Idi da 'yan kwanaki.
Sai ya tafi kasuwa ya sayi rago matsakaicin girma, mai kyau kuma mai yawan gashi. Ya yi farin ciki ƙwarai da shi, yana cewa a ransa:
"Wannan ragon zai faranta wa matata da 'ya'yana rai."
Amma yana cikin dawowa daga kasuwa, sai ya hango wani dattijo kwance a bakin hanya, yana dab da fitar numfashinsa na ƙarshe. Ya duba gaba da baya, bai ga kowa ba. Sai ya yi tunani: "Me zan yi yanzu?"
Sai ya ɗauki dattijon ya kai shi ƙarƙashin wata bishiya, sannan ya tambaye shi:
— "Ina gidanka yake?"
Dattijon ya ce:
— "A ƙarshen wannan hanyar."
Sai mutumin ya hangi wani yaro a kusa, ya kira shi ya zo. Ya ba shi ragon, ya kwatanta masa gidansa, ya ce ya kai shi can. Shi kuma ya ɗauki dattijon a kafaɗarsa ya nufi gidansa.
Sai dai yaron bai san ainihin gidan ba. Ya yi kuskure, ya kai ragon gidan maƙwabcin mutumin salihin, ya ba su yana cewa:
— "Ga ragon layyarku nan."
Bai faɗi wa ya aiko da shi ba, kuma bai faɗi daga wa yake ba.
Maƙwabtan kuwa talakawa ne. Ba su da ikon sayen ragon layya. Mai gidan ya kasa magana saboda tsananin farin ciki. Ya fashe da kuka, ya ɗaga idanunsa sama yana cewa:
"Ya Ubangiji! Ka yi mana rahama."
Ya ɗauka cewa wani mai kyautatawa ne ya ba su.
'Ya'yan gidan s**a yi murna matuƙa, har murnar tasu ta ja hankalin matar mutumin salihin. Ta leƙo ta taga tana cike da mamaki da hassada, tana cewa:
"Daga ina waɗannan talakawa s**a sami irin wannan babban rago? Daga ina s**a sami kuɗi?"
Zuciyarta ta cika da hassada.
Bayan wani lokaci mutumin salihin ya dawo gida cikin gajiya, yana tsammanin zai tarar da 'ya'yansa cikin murna saboda ragon. Amma sai ya tarar da gidan shiru.
Nan take matarsa ta fito tana masifa, tana cewa:
— "Ka ga abin mamaki? Waɗancan maƙwabtan sun sami babban rago! Ta yaya? Daga ina? Yanzu ga su can suna rawa da murna, sun dame mu da hayaniya!"
Harshenta bai daina zagi da magana ba, yayin da mijin yake cikin mamaki, domin ya fahimci kuskuren da ya faru.
Sai ta tambaye shi:
— "Ina ragon layyar?"
Ya amsa cikin natsuwa:
— "Zai iso. Ina jiransa."
Bayan ya ɗan yi haƙuri kaɗan, sai ya fita zuwa gidan maƙwabcinsa talaka. A ransa yana cewa zai bayyana musu kuskuren da ya faru, domin ya yi zaton za su fahimta.
Ya buga ƙofa.
Da maƙwabcin nasa ya buɗe ƙofa ya gan shi, sai ya rungume shi yana kuka saboda farin ciki. Ya fara ba shi labarin yadda Allah Ya yi masa baiwa, Ya faranta ran iyalansa da matarsa mai haƙuri.
Mutumin salihin ya yi murmushi kawai ya ce:
"Lallai Allah Mai yawan kyauta ne. Kai mutum ne da ka cancanci alheri. Allah Ya sanya albarka."
Sai ya juya ya tafi.
Yana tafiya yana jin kunya. Ya ce a zuciyarsa:
"Ta yaya zan lalata farin cikin wannan iyalin talakan ta hanyar ƙwace musu ragon?"
A ƙarshe ya yanke shawarar ya bar musu ragon saboda Allah, yana fatan samun lada daga gare Shi. Bai gaya musu cewa kuskure ne ya jawo hakan ba.
Yana ci gaba da tafiya har ya isa gidan dattijon da ya taimakawa. Ya buga ƙofa domin ya duba lafiyarsa.
Sai ɗan dattijon ya fito.
Mutumin ya tambaye shi:
— "Yaya mahaifinka yake yanzu?"
Saurayin ya ce:
— "Kai ne ka ceci mahaifina?"
Sai ya shigar da shi ciki.
Dattijon ya yi masa godiya sosai, sannan ya rantse masa cewa ba zai bar shi ya tafi ba sai ya karɓi kyautarsa.
Kyautar kuwa ita ce babban ɗan maraƙi.
Mutumin salihin ya rasa abin cewa. Ya yi ƙoƙarin ƙin karɓa, amma dattijon ya ƙi yarda.
Sai mutumin ya fita daga gidan yana kallon sama, hawaye suna zuba daga idanunsa, tsakanin farin ciki da mamakin karamcin Allah.
Domin ya bar rago saboda Allah, sai Allah Ya musanya masa da babban ɗan maraƙin sa.
Tsarki ya tabbata gare Ka, Ya Ubangijina! Kai ne Mafi Girman Mai Kyauta.
"Shin, akwai wani sakamakon kyautatawa face kyautatawa?" (Suratu Ar-Rahman: 60)
Darasi:
Wannan labari yana ɗauke da darasi mai girma kan haƙuri, taimakon mabukata, kyautatawa saboda Allah, da kuma cewa duk wanda ya bar wani abu saboda Allah, Allah zai musanya masa da abin da ya fi shi alheri.
Duk da haka, wannan labari ne ba sanannen hadisi ko labari ingantacce ba ne daga Annabi ﷺ, don haka ya kamata a ɗauke shi a matsayin labarin nasiha, ba a matsayin abin da aka tabbatar ya faru ba.
Allah Ya bamu ikon kyautatawa da hakuri. Amin
*✍️Abou Khadeejatu Assalafeey* Abdullah Auwal Assalafeey
30/01/1448.
15/07/2026.
