12/07/2026
Assalamu Alaikum.
Tunatarwa Ga Masu Faɗa a Ji da Iyaye Kan Muhimmancin Tarbiyyar Yara
Hisbah U/Mu'azu Detachment na kira ga dukkan shugabannin al'umma, masu faɗa a ji, iyaye da masu ruwa da tsaki da su ƙara himma wajen kula da amanar tarbiyyar yaran da Allah Ya ɗora musu.
A wannan lokaci da ake ci gaba da fuskantar matsalolin lalacewar tarbiyya, ya zama wajibi kowa ya sauke nauyin da ke kansa. Ana ci gaba da samun matsaloli irin su shaye-shaye, shirye-shiryen da ke lalata tarbiyya, haɗa DJ a wuraren da bai dace ba, da sauran ɗabi'u marasa kyau da ke jawo gurɓacewar tarbiyyar matasa.
Abin takaici, yanzu har ana samun ƙananan yara masu shekaru ƙasa da goma sha biyu (12) suna faɗawa cikin shaye-shaye da sauran munanan ɗabi'u. Wannan babban abin damuwa ne da ke buƙatar haɗin kan iyaye, shugabanni da daukacin al'umma.
Mu sani cewa Allah Madaukakin Sarki zai tambaye mu game da amanar da Ya ba mu. Saboda haka, kada mu yi shiru idan muka ga abin da ke lalata tarbiyyar al'umma. Wasu na da ikon taimakawa wajen dakile miyagun ayyuka amma suna yin sakaci ko ƙin ba da haɗin kai.
A baya-bayan nan an samu rahotannin yawaitar ayyukan da s**a saɓa wa addini da ɗabi'a, ciki har da zina, shaye-shaye, da kuma wasu munanan laifuffuka da ke barazana ga makomar al'ummarmu. Wannan yana nuna cewa lokaci ya yi da kowa zai tashi tsaye domin kare tarbiyyar 'ya'yanmu da makomar jikokinmu.
Muna kira ga kowa da kowa da ya ba da gudummawarsa wajen yaƙi da duk wani abu da ke lalata tarbiyyar al'umma. Idan muka haɗa kai, da izinin Allah za mu samu al'umma mai tarbiyya, zaman lafiya da kyawawan ɗabi'u.
Allah Ya kiyaye al'ummarmu, Ya shiryar da 'ya'yanmu, Ya kuma ba mu ikon sauke amanar da Ya ɗora mana. Amin.
Hisbah U/Mu'azu Detachment
12/07/2026
