31/05/2026
ITAN IGBESI AYE APOSTELI ANDERU.
-------------------------------------------
ÌTÚMỌ ORUKỌ RẸ.
-------------------------------
Orúkọ Áńdérù (Andrew) jẹ́ orúkọ Gíríìkì tí ó túmọ̀ sí “Ọkùnrin,” tàbí “alágbára.” Ó jẹ́ orúkọ tí ó tan mọ́ ọ̀rọ̀ Gíríìkì mìíràn tí ó túmọ̀ sí “ìgboyà” tàbí “akíkanjú" Bí ó tilẹ̀ jẹ́ pé ìdílé rẹ̀ jẹ́ Hébérù, àwọn òbí Áńdérù yan orúkọ Gíríìkì yìí fún un.
SAAJU KI O TO BA JESU PÀDÉ.
--------------------------------------------
1. Ṣáájú Kí Ó Tó Bá Jésù Pàdé,
Áńdérù jẹ́ ọmọ ìlú Bétsáídà ní Gálílì, ó sì jẹ́ apẹja pẹ̀lú Símónì Pétérù, ẹ̀gbọ́n rẹ̀.
"Jesu nrin leti okun Galili, o ri awọn arakunrin meji, Simoni, ẹniti a npè ni Peteru, ati Anderu arakunrin rẹ̀, nwọn nsọ àwọn sinu okun: nitori nwọn jẹ apẹja" Matiu 4:18.
2. Kí a tún rántí pé, ṣáájú kí ó tó tẹ̀lé Jésù, Áńdérù tún jẹ́ ọ̀kan nínú àwọn tí wọ́n ń tẹ̀lé Jòhánù Oníbaptísí. Èyí fi hàn pé:
- Ọkàn rẹ̀ ń wá Ọlọ́run.
- Óní ìfẹ́ sí òtítọ́.
- Kò kàn jẹ́ apẹja lasan, ṣùgbọ́n ó tún jẹ́ ẹni tí ọkàn rẹ̀ ń wá Mèsáyà.
Jòhánù 1:35–40
“...àwọn ọmọ-ẹ̀yìn rẹ̀ méjì sì gbọ́ ọ̀rọ̀ rẹ̀, wọ́n sì tọ Jésù lẹ́yìn... Ọ̀kan nínú àwọn méjèèjì tí ó gbọ́ ọ̀rọ̀ Jòhánù, tí ó sì tọ̀ ọ́ lẹ́yìn, ni Áńdérù, arákùnrin Símónì Pétérù.”
NIGBATI O BA JESU PÀDÉ.
--------------------------------------------
Ìpàdé Áńdérù pẹ̀lú Jésù jẹ́ ìpàdé tó yí ayé rẹ̀ padà patapata.Nígbà tí Jòhánù Oníbaptísí tọ́ka sí Jésù gẹ́gẹ́ bí Ọdọ-Agutan Ọlọ́run, Áńdérù tẹ̀lé Jésù. Ó fẹ́ mọ ẹni tí Jésù jẹ́.Ẹsẹ̀ BíbélìJòhánù 1:36
“Jòhánù sì wo Jésù bí ó ti ń rìn, ó ní, Kíyèsi i, Ọdọ-Agutan Ọlọ́run!”Lẹ́yìn tí Áńdérù bá Jésù pàdé, ohun àkọ́kọ́ tó ṣe ni pé ó lọ wá arákùnrin rẹ̀, Pétérù.
Jòhánù 1:40–42.
“Òun kọ́kọ́ rí Símónì arákùnrin ara rẹ̀, ó sì wí fún un pé, A ti rí Mèsáyà... Ó sì mú un tọ Jésù wá.”
Èyí jẹ́ ohun pàtàkì gan-an. Áńdérù jẹ́ ẹni:•tó kọ́kọ́ ri Jésù, tó sì yara pe ẹlòmíràn wá sọ́dọ̀ Rẹ̀. Ìyẹn ni ẹ̀mí oníwàásù tòótọ́. Lẹ́yìn náà, Jésù pe Áńdérù àti Pétérù ní kedere lati di ọmọ-ẹ̀hìn.
LẸYÌN TI O BA JESU PÀDÉ.
-------------------------------------------
Lẹ́yìn tí Áńdérù bá Jésù pàdé:
1. O di ọ̀kan lára àwọn àpósítélì méjìlá tí Jésù yàn
Mátíù 10:2-4.
2. Ó jẹ́ ọ̀kan lára àwọn ọmọ ẹ̀yìn tí ó súnmọ́ Jésù jù lọ, bí ó tilẹ̀ jẹ́ pé kò fi bẹ́ẹ̀ hàn gbangba nínú àwọn ìtàn ìwé Mímọ́ bí Pétérù, Jákọ́bù, àti Jòhánù. Síbẹ̀, ó kópa pàtàkì nínú iṣẹ́ ìránṣẹ́ Jésù.
Fún àpẹẹrẹ:
- Oun ni ẹni tí ó tọ́ka sí ọmọdé kan tí ó ní ìṣù àkàrà márùn-ún àti ẹja méjì nígbà tí Jésù ń bọ́ ẹgbẹ̀rún márùn-ún ènìyàn Jòhánù 6:8-9.
- Ó tún jẹ́ ọ̀kan lára àwọn tí ó mú àwọn Gíríìkì wá sọ́dọ̀ Jésù Jòhánù 12:20-22. Ese ọrọ Ọlọrun yi lo jẹ ki a mọ pe' Aposteli Anderu na ko ipa pataki lẹyìn Jesu, nitori nigbati awọn ara Giriiki yi wa si ọdọ Filipi lati ri Jesu ọdọ Apositeli Anderu ni Fílípì kọkọ mun awọn ènìyàn yi lọ. Ẹjẹ ki a ka ẹsẹ ọrọ Ọlọrun naa.
Johanu 12:20-22 wipe'
"Awọn Hellene kan si wà ninu awọn ti o gòke wá lati sìn nigba ajọ:
Awọn wọnyi li o tọ̀ Filippi wá, ẹniti iṣe ará Betsaida ti Galili, nwọn si mbère lọwọ rẹ̀, wipe, Alàgba, awa nfẹ ri Jesu.
Filippi wá, o si sọ fun Anderu; Anderu ati Filippi wá, nwọn si sọ fun Jesu".
BI O TI SE ISE-IRANSE RẸ.
-------------------------------------------
Lẹ́yìn àjíǹde Jésù àti igoke lọ sí ọ̀run Rẹ, Áńdérù lọ láti wàásù ìhìn rere ní àwọn agbègbè oríṣiríṣi. Àwọn itan Ijọ sọ pé ó wàásù ní:
- Gíríìsì
- Ásíà Kékeré, àti
- Sítíà (Scythia).
Ó jẹ́ ajíhìnrere tí ó ní ìgboyà, ó sì dojú kọ ọ̀pọ̀lọpọ̀ ìṣòro nínú iṣẹ́ ìránṣẹ́ rẹ̀. Ó jẹ́ ẹni tí ó mú ọ̀pọ̀lọpọ̀ ènìyàn wá sọ́dọ̀ Krístì nípasẹ̀ ìwàásù rẹ̀ àti iṣẹ́ ìyanu tí ó ṣe.
IRU IKU TI APOSTELI ANDERU KU.
-------------------------------------------
ìtàn sọ pé Áńdérù kú ikú ajẹ́rìíkú ní Gíríìsì (Greece) ni ilu kan ti a mọsi Patras. Wọ́n sọ pé gómìnà Róòmù, Aegeates, ni ó pa á nítorí pé ó kọ̀ láti fi ẹ̀sìn Krístì sílẹ̀.
Wọ́n kàn án mọ́ àgbélébùú tí ó ní ìrísí “X” (crux decussata), tí a mọ̀ sí “Àgbélébùú Saint Andrew.”
Itan sọ wipé' ó wàásù láti orí àgbélébùú na fún ọjọ́ méjì kí ó tó kú. Ikú rẹ̀ fi hàn pé ó jẹ́ olóòótọ́ sí Jésù títí dé òpin.
OHUN TI IGBE AYE
APOSTELI ANDERU KỌWA.
-------------------------------------------
Ìgbésí ayé Aposteli Áńdérù kọ́ wa ní ọ̀pọ̀lọpọ̀ awọn ẹ̀kọ́ pàtàkì:
1. Ìtara fún ìhìn rere: Ó tètè mọ Jésù, ó sì lọ pe ẹ̀gbọ́n rẹ̀ Peteru wá si ọdọ Jesu. Èyí fi hàn pé ó ṣe pàtàkì láti pín ìhìn rere pẹ̀lú àwọn ẹlòmíràn.
2. Ìwà ìrẹ̀lẹ̀: Bí ó tilẹ̀ jẹ́ ọ̀kan lára àwọn àpósítélì àkọ́kọ́, kò fi bẹ́ẹ̀ wá ògo fún ara rẹ̀. Ó máa ń wà lẹ́yìn ìkọ̀kọ̀, ṣùgbọ́n ó ṣe iṣẹ́ pàtàkì.
3. Ìgboyà àti ìfaradà: Ó dojú kọ ikú ajẹ́rìíkú nítorí ìgbàgbọ́ rẹ̀, èyí sì fi hàn pé ó ní ìgboyà àti ìfaradà nínú ìgbàgbọ́ rẹ̀.
4. Ìgbẹ́kẹ̀lé nínú Ọlọ́run: Ó gbẹ́kẹ̀ lé Jésù láti bọ́ ẹgbẹ̀rún márùn-ún ènìyàn pẹ̀lú ìṣù àkàrà díẹ̀ Jòhánù 6:8.
------------------------------------------
Ẹ Fi comment yin s'ọwọ si abẹ post yi, fun igboriyin ati ibeere.
Lati le ma ri awọn
audio, video ati
awọn pdf ẹkọ wa gba,
Ẹdarapo mọ Whatsapp
group ise-iranse yi.
Pelu Whatsapp Link 🔗 yi:
https://chat.whatsapp.com/F7TSdwr1fKh1wKO8HXjIKw?mode=gi_t
WhatsApp +2348124247703.
𝑶𝒍𝒂𝒔𝒖𝒏𝒌𝒂𝒏𝒎𝒊
𝑨𝒍𝒂𝒃𝒊 𝑱𝒆𝒔𝒖𝒎𝒃𝒐.
