29/09/2025
TOMATAAN SETEMBA 19
TINELOHO: KA NYI MBA VEA LU UMA LA VEA TESE SHA SHIE U KU WOUWE?
BIBILO I ÔRON: AERENAKAA 9:39 - "tso Peteru mough, gba yemen a ve imongo. Za ar yo, ve unde a na sha iyou i sha. Kasev mba côgholov cii tile a na, lu vaan tesen uriga man akondo a Tabita lu kor, zum u lu a ve imôngo her yo"
Takerada u Yakubu kaa er, "Mciviraôndo u wang u a lu a acôghor iyol sha ishigh ki Aôndo ga yo ka un ne: ka u za sôron ancôgholov kua kasev mba côgholov ken ican ve" Mo yo m fatyô u fan keng ga, kpa ka ilum er ior mbagenev jimjim yo, kwagh ne wanger ve ga nahan. Ka vea lu hen ma ijiir yo, mba fe ve sha erdoo yange imôm kpaa ga. Ve yo tom ve ka u hiin iyongo man kôron ior za wuhen. Ior mbagen vihi tu cier iyol. Ve mba yan kwagh mba nan or ga. Ka ve lu a iwa ga kpa ve ngee sha hunda er ior ve er teghlee, aniwa u hunden ngu ken ya ne. Akaa ne cii, ka ayenge a zendan ior hen ave kera. We yo u ngu a ya, zwa buter wou hanma shighe yo, mo kwagh gbem a ior gao. Aye anngôm! Ngura nahan ka Kristu u nyi la?
Tabita ti yo er alu uma yo, alu eren erdoo a ior mba wan ndor. Er va kpe kera yo, kasev mbacôgholov lu vaan tesen akondo. We u va kpe, ya wou je kpa alaghga vea lu ember er, kpei, daar ne yôhol ve, ahumbe aa ta ior iyol hegen shinii? Anmgbianev, nea yaan yo umbur nen ner, ancôgholov kpa mba. Shi i de hungur ne ga, alu u kpe kpa ieren iyou yo i kpen ga. Alu or ade tsughun we ga, kwagh gba sha kwagh u erdoo wou hen mba ve we ndor awe la dedoo. Lun er ka sha ci wou tseegh Aôndo man A nau er A nau la ga. Hanma shie u u va lu a ian cii yo, ôr Mateu 25:31-46 tsa u nenge er u eren a ior dedoo ilu kwagh u hange hange yo.
Anngôm, we yo ava vaau sha nyi shighe u ku wou we? Tabita yô i vaa un sha ieren i dedoo. Ne mba ne ye ne ne ior la, taver nen asema, mfa ka i yina ga, nyian je kpa mbara ve lu keghen je la.
Msen
Terem mo yô nam u eren mimi, sha er mea va kera lu ga kpa mba vea lu uma la vea lu a akaa a tesen yo. M sôn ken iti i Yesu Kristu. Amen.
