19/08/2026
KAIWA MATAKIN DUNIYA A MUSABAQA — SHINE MAFI KOLOLUWAR NASARA
Alhamdulillāh! Alhamdulillāh! Alhamdulillāh!
Godiya ta tabbata ga Allah Maɗaukakin Sarki, Wanda yake sarrafa duniya yadda Ya so, kuma Yake ɗaukaka wanda Ya so zuwa inda Ya so.
Hakika, kaso mafi yawa na masu sha’awar musabaqa suna mafarkin kaiwa kololuwar fagen musabaqa. Kuma a yau, ɗaya daga cikin manyan kololuwar da mai musabaqa zai iya kaiwa ita ce samun damar halartar Musabaqar Sarki Abdul’Aziz ta Ƙasa da Ƙasa, tare da wakiltar ƙasarsa a gaban duniya.
Duk wanda Allah Ya ba shi wannan dama, to lallai ya samu babbar nasara, tagomashi da ɗaukaka wadda ba kowa ne yake samu ba, sai wanda Allah Ya zaɓa Ya kuma nufa masa alheri.
Amma duk da haka, ba samun matsayi ko lashe gasa kaɗai ne kololuwar nasara ba.
Kololuwar nasara ita ce ka yi wannan hidima domin Allah, ka kasance mai gaskiya da ikhlasi, sannan ka tuna daga inda ka fara.
Ka tuna yadda Allah Ya ɗaga ka daga ƙaramar hukumarka, zuwa matakin jiha, daga nan zuwa matakin ƙasa, har yau Allah Ya kai ka matakin duniya. Wannan kaɗai babbar ni’ima ce da ta cancanci godiya.
Samun matsayi a cikin musabaqa kuwa, zaɓi ne na Ubangiji. Allah ne Yake ba wa wanda Ya so, a lokacin da Ya so, kuma yadda Ya so.
Saboda haka, wakilanmu masu albarka da daraja, muna mika muku cikakkiyar godiyarmu bisa ƙoƙarin da kuka yi na wakiltar ƙasarmu da mutunci, tare da ɗaukaka sunan Najeriya a wannan babban dandali na duniya.
Dukkanku kun yi nasara! 🏆❤️
Ba wai nasara ce ta lambar yabo kawai ba; nasara ce ku kai matsayin da miliyoyin masu karatun Alƙur’ani suke burin kaiwa.
Allah Ya saka muku da alheri, Ya ƙara ɗaukaka ku, Ya sanya Alƙur’ani ya zama hujja a gare mu, Ya cecemu da shi ranar Alƙiyama, Ya kuma sanya mu cikin Ahlul-Qur’ani, mutanen Allah da zaɓaɓɓunsa.
اللهم اجعل القرآن ربيع قلوبنا ونور صدورنا وحجة لنا لا علينا. 🤲🏽📖
