https://youtube.com/channel/UCTd79nPdoW5mjgNnSPx50Hw

Food For Soul - ACM, Yangon (2026)

07/10/2026

စိတ်ပုတီးစိတ်ခြင်းအကျိုးကျေးဇူး စိန့်ဒေါမိနစ်အားမယ်တော်သခင်မဖော်ပြခဲ့သော စိတ်ပုတီး၏အကျိုးကျေးဇူး (၁၅) ချက်...

၁။ 🌹စိတ်ပုတီးစိပ်ခြင်းဖြင့် ငါ့ကိုဝတ်ပြုသူများအား အထူးကျေးဇူးတော်များကို ချပေးမည်။

၂။ 🌹စိတ်ပုတီးစိပ်သူများအား ငါကာကွယ်မည်။

၃။ 🌹စိတ်ပုတီးအားဖြင့် ငရဲမီးဒဏ်ကိုကာကွယ်သောလက်နက်တစ်ခုဖြစ်စေပြီးအခြားအပြစိရှိသော အခြေအနေများမှ ကင်းရှင်းစေမည်။

၄။ 🌹ကောင်းသောအလေ့အကျင့်ကိုတိုးပွားစေပြီး ဝိညာဥ်အတွက်ကြွယ်ဝသော သနားဂရုဏာကို ရရှိစေလိမ့်မည်။

၅။ 🌹စိတ်ပုတီးစိပ်၍ ငါ့ထံအပ်နှံသောဝိညာဥ်များသည် ပျက်စီးခြင်းသို့မရောက်နိုင်ပါ။

၆။ 🌹နက်နဲလှသောအချက်များကို စိတ်ပါဝင်စားစွာဆင်ခြင်လျက် စိတ်ပုတီးစိပ်သူများသည် အသေဆိုးနှင့်သေရမည်မဟုတ်။

၇။ 🌹ယုံကြည်စွာစိတ်ပုတီးစိပ်သူများသည် စက္ကရမင်းတူးများကိုမခံယူဘဲ သေရမည်မဟုတ်။

၈။ 🌹စိတ်ပါဝင်စားစွာ စိတ်ပုတီးစိပ်သူများသည် အသက်ရှင်နေစဥ်ဖြစ်စေ၊ သေဆုံးပြီးဖြစ်စေ၊ ဘုရားသခင်၏အလင်းတော်အောက်မှာ ကြွယ်ဝသောကျေးဇူးတော်များကို ခံစားရပါလိမ့်မည်။

၉။ 🌹စိတ်ပုတီးစိပ်သူများကို ငရဲငယ်မှကယ်ချွတ်ပေးမည်။

၁၀။ 🌹စိတ်ပုတီးစိပ်သူများသည် ကောင်း
ကင်နိုင်ငံတွင် မြင့်သောဂုဏ်ကိုရရှိကြမည်။

၁၁။ 🌹စိတ်ပုတီးစိပ်၍ တောင်းလျှောက်သည့်ဆုကျေးဇူးတော်အားလုံးကို ရရှိကြလိမ့်မည်။

၁၂။ 🌹စိတ်ပုတီးကိုဖြန့်ဝေသူများအား လိုအပ်သောဆုကျေးဇူးတော်များကို ချပေးမည်။

၁၃။ 🌹စိတ်ပုတီးစိပ်သူများအတွက် အသက်ရှင်နေစဥ်ဖြစ်စေ၊ သေဆုံးပြီးနောက်
ဖြစ်စေ၊ ကောင်းကင်နိုင်ငံရှိ သိကြား၊ သူတော်သူမြတ်များတို့၏ ထောက်ခံချက်ရရှိစေဖို့ ငါ၏သားတော်ထံမှ ခွင့်ပြုချက်ရယူပေးထားမည်။

၁၄။ 🌹စိတ်ပုတီးစိပ်သူအားလုံးသည် ငါ၏သားသမီးများဖြစ်ကြပြီး ယေဇူးခရစ္စတူး၏ညီအစ်ကိုမောင်နှများဖြစ်ကြသည်။

၁၅။ 🌹စိတ်ပုတီးစိပ်သည့်အကျိုးအမြတ်သည် နောင်ဘဝ၌လည်း ဆုကျေးဇူးတော်များကိုရရှိစေဖို့ နိမိတ်လက္ခဏာဖြစ်သည်။

05/10/2026

လွယ်ခမ်းမယ်တော်၏သွေးမျက်ရည်ကျခြင်း ~~~~~~~~~~~~~~~~~~~~~~~ 💭

ကြိုတင်နိမိတ်နှင့် ကျေးဇူးတော်များ
ရှမ်းပြည်နယ်မြောက်ပိုင်းရှိ ဘာသာသူများ၏ ယုံကြည်ခြင်းခရီး၌ အထင်ကရ သမိုင်းဝင်ဖြစ်ရပ်တစ်ခုဖြစ်ခဲ့သည့် "လွယ်ခမ်းမယ်တော် သွေးမျက်ရည်ကျခြင်း" ဖြစ်စဉ်သည် ယခုဆိုလျှင် (၁၀) နှစ်ပြည့်မြောက်သည့် သမိုင်းမှတ်တိုင်ဆီသို့ တိုင်ခဲ့ပြီဖြစ်သည်။

ထူးဆန်းအံ့ဩဖွယ် နိမိတ်နှင့် ငိုကြွေးသံ
၂၀၁၆ ခုနှစ်၊ အောက်တိုဘာလ (၇) ရက် ညနေ (၃:၀၀) နာရီအချိန်ခန့်တွင် လားရှိုးဂိုဏ်းအုပ်သာသနာ၊ လွယ်ခမ်းတိုက်နယ်ရှိ ယေဇူးဘုရင်ဘုရားကျောင်းဝင်း ၌ ထူးဆန်းသော အဖြစ်အပျက်တစ်ခု စတင်ခဲ့သည်။ အမျိုးသမီးတစ်ဦး၏ ရှိုက်ကြီးတငင် ငိုကြွေးနေသည့် အသံကို လွယ်ခမ်းတစ်ရွာလုံးရှိ ဘာသာသူများ တပြိုင်နက်တည်း ကြားခဲ့ကြရသည်။ ရွာအပေါ်ပိုင်း ဟိုခိုရပ်ကွက်မှ ဘာသူများက ရွာအောက်ပိုင်းမှလာသောအသံဟု ထင်မှတ်ကြပြီး၊ ရွာအောက်ပိုင်းမှ ဘာသာသူများကလည်း ရွာအပေါ်ပိုင်းမှ ငိုသံထွက်ပေါ်လာသည်ဟု မှတ်ချက်ပြုခဲ့ကြသည်။ ရွာသူရွာသားအများစုက မိသားစုပြဿနာကြောင့် အမျိုးသမီးတစ်ဦးဦး ငိုကြွေးနေခြင်းဖြစ်မည်ဟု ယူဆခဲ့ကြသော်လည်း ထိုငိုကြွေးသံ မည်သည့်အရပ်မှ လာသည်ကိုမူ မည်သူမျှ အတိအကျ စုံစမ်းအတည်ပြုနိုင်ခြင်း မရှိခဲ့ပေ။

သွေးမျက်ရည် ပေါ်ထွန်းလာခြင်း

ထိုနေ့ ညနေ (၆:၀၀) နာရီခန့်တွင် ဆပ်ဖြေခြင်း သီလရှင်စစ္စတာကက်သရင်းနှင့် အတူ ဘော်ဒါကျောင်းသူ/သား (၄၀) ခန့်သည် မယ်တော်ဂူရှေ့၌ စိပ်ပုတီးစိပ် ဆုတောင်းနေကြစဉ် ပိုမိုအံ့ဩဖွယ်ရာ နိမိတ်ကို စတင်တွေ့ရှိခဲ့ကြသည်။ မယ်တော်ဂူရှိ လုဒ်(စ်) မယ်တော်သခင်မ ဆင်းတုတော်၏ မျက်လုံးတော်မှ သွေးမျက်ရည်များ တစ်စက်စက် ကျဆင်းနေသည်ကို ဘော်ဒါကျောင်းသား မောင်လဂျာ၊ မောင်တိန့်ဘောမ်နှင့် ကျောင်းသူအချို့က စတင်မြင်တွေ့ခဲ့ကြသည်။
ထိုအကြောင်းကို ၎င်းတို့အချင်းချင်းတီးတိုးပြောဆိုနေကြသည်ကို စစ္စတာရ်မှ ဆုတောင်းနေစဥ် ငြိမ်ငြိမ်သက်သက်ရှိကြ ရန်သတိပေးခဲ့သည်။

ဆုတောင်းအပြီးတွင် ကျောင်းသူကျောင်းသားများက မယ်တော်ဆင်းတုတော်ထံ အလုအယက် သွားရောက်ကြည့်ရှုကြရာ စစ္စတာကက်သရင်းကလည်း လိုက်ပါကြည့်ရှုပြီး မယ်တော်၏ သွေးမျက်ရည်ကို လက်ညှိုးဖြင့် တို့ကြည့်ခဲ့သည်။ ထိုအခါ သွေးစစ်စစ်ဖြစ်နေသည်ကို တွေ့ရှိရသဖြင့် နီးစပ်ရာ လူကြီးများထံ သတင်းပို့ခဲ့သည်။ ထိုသတင်းသည် ရွာအတွင်းသို့ တခဏချင်း ပျံ့နှံ့သွားခဲ့ပြီး ရွာသူရွာသားများ မယ်တော်ဂူရှေ့သို့ တခဲနက် စုရုံး ရောက်ရှိလာခဲ့ကြသည်။ အဖြစ်အပျက် ဖြစ်ပွားချိန်တွင် သာသနာပိုင် ဆရာတော်ဘုရားနှင့် ဘုန်းတော်ကြီးများသည် တောင်ကြီး၊ ဘုရားဖြူတွင် နှစ်ပတ်လည် ဥပုသ်စောင့်နေကြချိန်ဖြစ်၍ ရွာ၌ဘုန်းတော်ကြီးများ
မရှိသော်လည်း တာဝန်ရှိသူများက မယ်တော်ဆင်းတုတော် အနား သွားရောက်ခြင်းကို စနစ်တကျ တားမြစ်ပေးခဲ့ကြပြီး ဘာသာသူများက ညလုံးပေါက် စိပ်ပုတီးစိပ်၍ ပူဇော်ဆုတောင်းခဲ့ကြသည်။

နိမိတ်၏ အဓိပ္ပာယ်နှင့် သမိုင်းဆိုင်ရာ ဖြစ်တည်မှုအမိမယ်တော်၏ သွေးမျက်ရည်ကျခြင်းသည် သားသမီးများ ရင်ဆိုင်ကြုံတွေ့ရတော့မည့် ဒုက္ခဝေဒနာများကို ကြိုတင်သိရှိ၍ စာနာ ဝမ်းနည်းခြင်းကြောင့် ဖြစ်သည်ဟု ဘာသာသူအပေါင်းက ယုံကြည်ကြသည်။ အမှန်ပင် မယ်တော် သွေးမျက်ရည်ကျပြီးနောက်ပိုင်း ရှမ်းပြည်နယ်မြောက်ပိုင်း ဒေသတစ်ခုလုံး၌ မငြိမ်မသက်မှုများနှင့် စစ်ပွဲများ ဆက်တိုက် ဖြစ်ပွားခဲ့ကာ ပြည်သူအများ ဒုက္ခပင်လယ်ဝေခဲ့ကြရသည်မှာ ယနေ့ထက်ထိတိုင် ဖြစ်သည်။သို့သော်လည်း အဆိုပါ သွေးမျက်ရည်ကျသည့် ဖြစ်စဉ်ပြီးနောက် လွယ်ခမ်းမယ်တော်ထံ လာရောက်ဆုတောင်းကြသော ဘာသာသူများသည်—
စိတ်နှလုံး အေးချမ်းခြင်း၊
ကျေးဇူးတော်အမျိုးမျိုး ခံစားရရှိခြင်း၊
ရောဂါဝေဒနာများ ကင်းဝေးပျောက်ကင်းခြင်း စသည့် ထူးဆန်းသော ကျေးဇူးတော်များကို ခံစားခဲ့ကြရသည်။

ထိုထူးမြတ်သော အဖြစ်အပျက်ကို အောက်မေ့ဖွယ်ရာအဖြစ် နှစ်စဥ်နှစ်တိုင်း၏ အောက်တိုဘာလ (၇) ရက်နေ့တွင် မယ်တော်သွေးမျက်ရည်ကျသည့် အထိမ်းအမှတ် ပွဲတော်ကို ဆည်ကားသိုက်မြိုက်စွာ ကျင်းပလာခဲ့ကြသည်။ယခုနှစ် ၂၀၂၆ ခုနှစ်၊ အောက်တိုဘာလ (၇) ရက်နေ့သည် မယ်တော်၏ သွေးမျက်ရည်ကျခြင်း (၁၀) နှစ်ပြည့်မြောက်သည့် သမိုင်းဝင်နေ့ရက်ဖြစ်သည်။ ထို့ကြောင့် ယခုအခါ၌လည်း သာသနာတော်နှင့်ဘာသာသူအပေါင်းတို့က ဤ (၁၀) နှစ်ပြည့် အထိမ်းအမှတ် ပွဲတော်ကြီးကို ယခင်နှစ်များထက် ပိုမိုဆည်ကားသိုက်မြိုက်စွာ ကျင်းပနိုင်ရန်အတွက် ပြင်ဆင်လျက် ရှိပါသည်။ လွယ်ခမ်းမယ်တော်၏ သွေးမျက်ရည်ကျခြင်းသည် ကရုဏာတော်ရှင် အမိမယ်တော်၏ သားသမီးများအပေါ် ထားရှိသော ချစ်ခင်းမေတ္တာ၊ ကရုဏာ နှင့် ဆင်းရဲဒုက္ခများထဲမှ ကူညီ မစမည့် နိမိတ်တစ်ခုအဖြစ် လွယ်ခမ်းတိုက်နယ်နှင့် သာသနာတစ်ခွင်တွင် ကာလအဆက်ဆက် ထင်ရှားကျန်ရစ်နေမည် ဖြစ်ပါသည်။

🖋️ Sr. Mary Nang Li, SHS
Photo courtesy of Kyese Myanmar

05/10/2026

🌹စိန့်မာရိယား ဖော့စတီးနား ဂိုဝါစကာ🌹

အောက်တိုဘာလ (၅)ရက်နေ့သည် အမိသာသနာတော်က စိန့်မာရိယားဖော့စတီးနား ဂိုဝါစကာပွဲကို ကျင်းပစေပါသည်။ သူမသည် (၁၉၀၅-၁၉၃၈)ခုနှစ်တွင် အသက်ရှင် နေထိုင်ခဲ့သော ကညာစင်နှင့်ရူပါရံမြင်သောသူဖြစ်ပါသည်။

စိန့်မာရိယား ဖော့စတီးနားသည် ပိုလန်နိုင်ငံတွင်မွေးဖွားခဲ့ပြီး တိတ်ဆိတ်စွာဖြင့် ဒုက္ခခံထမ်းကာ ရဟန်းတော်များ၊ အမိသာ သနာတော်နှင့် ကမ္ဘာတစ်ခုလုံးအတွက် စိတ်အားပြင်းပြစွာ ဆုတောင်းပေးခဲ့သည်။

သူမသည် ဂရုဏာရှင်ယေဇူး (Divine Mercy) ကိုစတင်ဆုတောင်းခဲ့သူဖြစ်ပြီး ထူးခြားဆန်းကျယ်သောအတွေ့အကြုံများ ကိုသူမ၏နေ့စဥ်မှတ်တမ်းတွင် ရေးသားခဲ့သူဖြစ်သည်။ သူမကို AD (၂၀၀၀) ခုနှစ်က ရဟန္တာတင်မြှောက်ခြင်းခံရသည်။

"Jesus, I trust in Thee" ဟု ဂရုဏာရှင် ယေဇူးထံ ဆုတောင်းခဲ့သည်။

St. Maria Faustina, pray for us!

Ref: God's Word

🖋️ ဇီဝဇိုး (မင်းတပ်)

#ဇီဝဇိုး_မင်းတပ်

02/10/2026

☘️🌹✞︎ကိုယ်စောင့်သိကြားများပွဲ ကျင်းပလာရသည့်အကြောင်းရင်း ✞︎🌹☘️

အောက်ဘာလ (၂)ရက်နေ့သည် ကိုယ်စောင့်သိကြားများပွဲအဖြစ် အမိသာသနာတော်က ကျင်းပစေပါသည်။ ပြီးခဲ့သည့်စက်တင်ဘာလ (၂၉)ရက်နေ့က သိကြားတမန်တော်ချုပ်များဖြစ်ကြသော စိန့်မိုက်ကယ်၊ စိန့်ဂါဗြီအဲလ်နှင့် စိန်ရာဖာအဲလ်တို့ပွဲ ကျင်းပခဲ့ကြပါသည်။ အဘယ့်ကြောင့်ကိုယ်စောင့်သိကြားများပွဲ သီးသန့်ကျင်းပရပါသလဲ။

သိကြားတမန်တော်ချုပ်များသည်လူသားတစ်ရပ်လုံးအနေဖြင့် ကြည့်ရှုကာကွယ်ကြသူများဖြစ်ပြီး လူတစ်ဦးတစ်ယောက်၏အ ကာအကွယ်ယူရာ (personal protection) အဖြစ် သူတို့ကိုအကူအညီတောင်းခံလို့မရဟု ဆိုကြသည်။ သို့အတွက်ကြောင့် ဘုရား သခင်က ကိုယ်စောင့်သိကြားကို လူတစ်ဦးစီအတွက် သီးသန့်ခန့်ထားရခြင်းဖြစ်ပေမည်။

လူတစ်ဦးတစ်ယောက်စီ၌ ကိုယ်စောင့်သိကြားတစ်ပါးရှိသည်ဆိုသည့် သွန်သင်ချက်သည် အမိသာသနာတော်က သတ်မှတ်ထားခြင်းမဟုတ်ပေ၊ ယုံကြည်ရာအချက်လည်းမဟုတ်ပေ။ သို့သော်လည်း ၎င်းသည် ဓမ္မဟောင်းကျမ်းနှင့်ဓမ္မသစ်ကျမ်းနှစ်ခုစလုံးတွင် တွေ့ရသည်။

သခင်ယေဇူးက ဆိုသည်မှာ "သင်တို့ သည်ဤသူငယ်တို့တွင် တစ်ဦးကိုမျှမထီမဲ့ မြင်မပြုမိစေရန်သတိပြုကြလော့။ အ ကြောင်းမူကား သင်တို့အား ငါအမှန်ဆိုသည်မှာ ဤသူငယ်တို့၏ ကောင်းကင်တမန်တော်တို့သည် ကောင်းကင်ဘုံရှင် ငါ့ခမည်းတော်ကိုအစဉ်မပြတ်ဖူးမြော်လျက်ရှိကြ ၏။" ထို့ကြောင့် ကလေးငယ်များပင်လျှင် ကိုယ် စောင့်သိကြားရှိလျှင် ဤသိကြားတမန်များ သည် ကမ္ဘာမြေပေါ်၌ တာဝန်ထမ်းသကဲ့သို့ ဘုရားရှင်၏ မျက်မှောက်တော်၌ ရှိနေကြသည်။

ကနဦး၌ သိကြားတမန်များအားလုံးတို့ ၏ပွဲကို စိန့်မိုက်ကယ်၏ပွဲနေ့တွင် အတူတကွကျင်းပခဲ့ကြသည်။ ကိုယ်စောင့်သိကြားများပွဲ သီသန့်ကျင်းပသောပွဲမှာ AD (၁၄၁၁)ခုနှစ် ဗာလင်စီယာ (Valencia)မြို့တွင် စတင်ခဲ့သည်။

Breviary ကိုပြုပြင်ပြောင်းလဲသည့်အ ချိန် (၁၆)ရာစု၌ ဒေသနှင့်ဆိုင်သောပွဲနေ့များ ကြားတွင်ပါဝင်လာပြီး AD(၁၆၀၈)ခုနှစ်တွင် General Calender ၌ ပွဲနေ့တစ်ခုအဖြစ် သတ်မှတ်လာခဲ့ကြသည်။ စိန့်မိုက်ကယ်၊ စိန့် ဂါဗြီအဲလ်နှင့် စိန်ရာဖာအဲလ်ပွဲနေ့ပြီး နောက်တစ်ရက်တွင်ကျင်းပခဲ့ကြသည်။

ဤပွဲကျင်းပရခြင်း၏အကျိုးကျေးဇူးများထဲမှ တစ်ခုမှာ ဘုရားသခင်က ကျွန်ုပ်တို့တစ်ဦးတစ်ယောက်စီတိုင်းကို ဂရုစိုက်နေ သည်ဆိုသည့်အချက်ကို အမှတ်ရစေသည်။ ကျွန်ုပ်တို့အယောက်စီတိုင်းကို ကြည့်ရှုစောင့်ရှောက်ပြီး ဘုရားသခင်ဆီဆုတောင်းပေးသော ကိုယ်စောင့်သိကြားများရှိသည်ကို ဤပွဲကျင်းပခြင်းအားဖြင့်သတိရကြစို့။

ကျွန်ုပ်တို့မကောင်းမှုပြုလုပ်သောအချိန်၊ အပြစ်နွံထဲ၌ ကြာမြင့်စွာနေမိသည့်အချိန်၊ ဘုရားသခင်အလိုတော်နှင့်ဆန့်ကျင်စွာနေမိသည့်အချိန်၊ နောင်တမရသောအချိန်၊ ချစ်ခြင်းမေတ္တာမဲ့နေသောအချိန်များ၌ ကျွန်ုပ်တို့သိကြားတမန်များ ဝမ်းနည်းနေပေမည်။

ထို့ကြောင့် နေ့တိုင်းနေ့တိုင်း အသက်ရှင်နေထိုင်သောဘဝ၌ ကိုယ်၏သိကြားတမန်များကို ခေါ်တပြီး အကူအညီတောင်းခံကြစို့။ သူတို့ကို ပျှော်ရွှင်စေမည့် ဘဝအသက်တာကို ရှင်သန်ကြပါစို့။

Ref: Universalis App
: God's Word 2020

🖋️ ဇီဝဇိုး (မင်းတပ်)

𝙿.𝚜 𝐇𝐚𝐩𝐩𝐲 𝐅𝐞𝐚𝐬𝐭𝐝𝐚𝐲 𝐭𝐨 𝐚𝐥𝐥! 𝐌𝐲 𝐠𝐮𝐚𝐫𝐝𝐢𝐚𝐧 𝐚𝐧𝐠𝐞𝐥, 𝐠𝐮𝐢𝐝𝐞
𝐦𝐲 𝐟𝐨𝐨𝐭𝐬𝐭𝐞𝐩 𝐚𝐧𝐝 𝐦𝐲 𝐰𝐚𝐲!

#ဇီဝဇို_မင်းတပ်

29/09/2026

“သားရဲ့ပထမဆုံးနေ့ဟာ သားရဲ့နောက်ဆုံးနေ့ဖြစ်သွားခဲ့တယ်” 😢💔

🎂 မွေးနေ့ 🎂

ကျွန်တော် မွေးတဲ့နေ့ကို
အမေက မှတ်ထားပေးဖို့ အချိန်မရခဲ့ဘူး။

တကယ်တော့ ကျွန်တော်လည်း
ကိုယ့်မွေးနေ့ကို ကိုယ်မှတ်ထားဖို့ အချိန်မရခဲ့ပါဘူး။

ကျွန်တော် ဒီလောကကြီးထဲမှာ
မိနစ်ဘယ်လောက် နေခဲ့ရသလဲဆိုတာတောင် မသိဘူး။

ကျွန်တော်သိတာက—

အမေ့ဝမ်းဗိုက်ထဲမှာ နေခဲ့တဲ့ နောက်ဆုံးနေ့ဟာ
ကျောက်တော်က နေ့တစ်နေ့ ဖြစ်တယ်။

အမေ့ဝမ်းထဲမှာတော့
အပြင်လောကကြီးက ဘယ်လိုပုံစံလဲဆိုတာ
ကျွန်တော် မမြင်ဖူးဘူး။

ဒါပေမယ့် အသံတွေတော့ ကြားရတယ်။

အမေ လမ်းလျှောက်ရင်
တဒုတ်ဒုတ်မြည်တဲ့ အမေ့နှလုံးခုန်သံ။

အမေ တစ်ယောက်ယောက်နဲ့ စကားပြောရင်
ဝိုးတဝါးကြားရတဲ့ အမေ့အသံ။

တစ်ခါတလေ အမေက
ဝမ်းဗိုက်ကို လက်နဲ့ပွတ်ပြီး စကားပြောတတ်တယ်။

ဘာပြောတာလဲတော့ ကျွန်တော် နားမလည်ဘူး။

ဒါပေမယ့်
အဲဒီအသံကြားတိုင်း ကျွန်တော် လှုပ်ပြတတ်တယ်။

အမေက ရယ်တယ်။

အဲဒီအချိန်တွေမှာ
ကမ္ဘာကြီးဆိုတာ အမေ့ရယ်သံလို
နွေးနွေးထွေးထွေး နေရာတစ်ခုလို့
ကျွန်တော် ထင်ခဲ့မိတယ်။

တစ်နေ့တော့—

အပြင်ဘက်က အသံတွေ ပြောင်းသွားတယ်။

လူတွေ အော်သံ။

ပြေးသံ။

ပြီးတော့
ကောင်းကင်ပေါ်က ကြောက်စရာအသံကြီးတစ်ခု။

ကျွန်တော် ဘာမှ မသိဘူး။

ကျွန်တော်သိတာက
အမေ့နှလုံးခုန်သံ ရုတ်တရက် မြန်လာတာပဲ။

ဒုတ်… ဒုတ်… ဒုတ်…

အမေ ပြေးနေသလား။

အမေ ကြောက်နေသလား။

ကျွန်တော်လည်း အမေ့ဝမ်းထဲမှာ
လိုက်ပြီး ကြောက်နေခဲ့တယ်။

ပြီးတော့—

ကမ္ဘာကြီးတစ်ခုလုံး ကွဲထွက်သွားသလို
အသံကြီးတစ်ခု ကြားလိုက်ရတယ်။

အမေ လဲကျသွားတယ်။

ကျွန်တော်နေတဲ့ ကမ္ဘာလေးလည်း
တုန်ခါသွားတယ်။

အပူတွေ။

မီးခိုးတွေ။

လူတွေရဲ့ အော်ဟစ်သံတွေ။

အမေ့နှလုံးခုန်သံကတော့
ခုနကထက် ပိုမြန်နေတုန်းပဲ။

အဲဒီနောက်
ကျွန်တော့်ကို တစ်စုံတစ်ရာက
အပြင်လောကဆီ တွန်းပို့နေတယ်။

အမေက ကျွန်တော့်ကို မွေးနေပြီထင်တယ်။

ကျွန်တော် အမြဲစောင့်နေခဲ့တဲ့နေ့။

အမေ့မျက်နှာကို ပထမဆုံးမြင်ရမယ့်နေ့။

ကောင်းကင်ကြီးကို ပထမဆုံးမြင်ရမယ့်နေ့။

အမေ့ရင်ခွင်ထဲမှာ
ပထမဆုံးအကြိမ် အိပ်ရမယ့်နေ့။

ဒါပေမယ့်—

ကျွန်တော် ပထမဆုံးမြင်လိုက်ရတဲ့ ကမ္ဘာကြီးက
အမေပြောပြခဲ့မယ်ထင်တဲ့ ကမ္ဘာကြီး မဟုတ်ဘူး။

အပြာရောင်ကောင်းကင် မဟုတ်ဘူး။

စိမ်းလန်းတဲ့ သစ်ပင်တွေ မဟုတ်ဘူး။

ကျွန်တော် ပထမဆုံးမြင်လိုက်ရတာက
မီးရောင်တွေ။

မီးခိုးတွေ။

ပြိုကျနေတဲ့ အရာတွေ။

ပြီးတော့
မီးလောင်ဒဏ်ရာတွေနဲ့ အမေ။

ကျွန်တော် ငိုခဲ့သလား။

မငိုနိုင်ခဲ့ဘူးလား။

မသိတော့ဘူး။

အမေ့လက်က ကျွန်တော့်ကို
တစ်ကြိမ်လောက် ထိခဲ့သလားဆိုတာလည်း
မမှတ်မိတော့ဘူး။

ဒါပေမယ့် အမေ—

သား မွေးလာခဲ့တယ်နော်။

အမေ လပေါင်းများစွာ သယ်လာခဲ့တဲ့ သား။

အမေ့မျက်နှာကို ကြည့်ချင်ခဲ့တဲ့ သား။

အမေ့နို့ကို သောက်ချင်ခဲ့တဲ့ သား။

အမေ့ရင်ခွင်ထဲမှာ အိပ်ပြီး
အမေ့နှလုံးခုန်သံကို
အပြင်ဘက်ကနေ ဆက်နားထောင်ချင်ခဲ့တဲ့ သား။

သားမှာ အိပ်မက်တွေတောင် မမက်တတ်သေးပါဘူး အမေ။

လမ်းလျှောက်ဖို့ မတတ်သေးဘူး။

စကားပြောဖို့ မတတ်သေးဘူး။

လူမျိုးဆိုတာ မသိဘူး။

နိုင်ငံရေးဆိုတာ မသိဘူး။

စစ်ဆိုတာ မသိဘူး။

ဘယ်သူက ဘယ်သူ့ရန်သူလဲဆိုတာလည်း
သား မသိခဲ့ဘူး။

သားသိတာ တစ်ခုပဲရှိတယ်။

အမေ့နှလုံးခုန်သံ။

ဒါပေမယ့်
သား ဒီကမ္ဘာကြီးထဲ ရောက်လာတဲ့နေ့မှာပဲ

ကောင်းကင်ပေါ်က ကျလာတဲ့ အရာကြီးက
သားရဲ့အသက်ကို နုတ်ယူသွားတယ်။

မွေးစာရင်း မရှိခဲ့ဘူး။

နာမည်တောင် ရှိခဲ့မယ်မထင်ဘူး။

သားရဲ့ ပထမဆုံးနေ့ဟာ
သားရဲ့ နောက်ဆုံးနေ့ ဖြစ်သွားခဲ့တယ်။

ဒါပေမယ့် အမေ—

သား မကြောက်တော့ပါဘူး။

ဘာဖြစ်လို့လဲဆိုတော့
အမေလည်း သားနဲ့အတူ လိုက်လာခဲ့တယ်မဟုတ်လား။

အမေ့ဝမ်းထဲမှာ နေခဲ့တုန်းကလိုပဲ
အခုလည်း အမေနဲ့သား
အတူတူပဲ။

တစ်ခုပဲ သား နားမလည်တာက

သားတို့နဲ့ တစ်ခါမှ မသိ၊
တစ်ခါမှလည်း မတွေ့ဖူးတဲ့
ကောင်းကင်ပေါ်က လူကြီးတွေက

သားတို့ သားအမိကို ဘာလို့များ
အညှိုးတကြီး လာသတ်ကြတာလဲဟင်။

(ကျောက်တော်မြို့၊ အိန္ဒိယစျေး ဗုံးကျဲခံရမှုမှာ ပိုက်သည် ရွာသူ မခင်မာနွယ်(အသက်၃၂နှစ်)ဟာ ကိုယ်ဝန် ၉ လ ရှိနေပြီဖြစ်ပြီး မီးလောင်ကျွမ်းနေဆဲ ကလေးမီးဖွားခဲ့ကာ ကလေးရော မိခင်ပါ မီးလောင် သေဆုံးခဲ့ပါတယ်)

CRD: Zin Thaw Naing

မြန်မာပြည်ကြီး အမြန်ဆုံးငြိမ်းချမ်းပါစေဗျာ
အပြစ်ကင်းတဲ့ကလေးသူငယ်များ ဘေးရန်ကင်းကြပါစေ။

28.9.2026

#ကျောက်တော်

29/09/2026

လုဒယ်မြို့၌ရဟန်းမင်းကြီးနှင့်အတူ လူပေါင်း ၅၀,၀၀၀ မီးတိုင်များဖြင့်လမ်းလျှောက်ခြင်း🕯️

ပြင်သစ်နိုင်ငံ၊ လုဒယ်မြို့
၂၈/၉/၂၀၂၆

ဖယောင်းတိုင်များကိုယ်စီ ကိုင်ဆောင်ထားကြသော ဘာသာဝင်ယုံကြည်သူ လူဦးရေ (၅၀,၀၀၀) ခန့်သည် ပုပ်ရဟန်းမင်းကြီး လီယိုနှင့်အတူ လုဒယ် သာသနာ့နယ်မြေအတွင်း စုပေါင်းလမ်းလျှောက်ခဲ့ကြပြီး၊ ၁၈၅၈ ခုနှစ်တွင် Bernadette Soubirous ထံ ဘုရား သခင်၏မယ်တော် ထင်ရှားပြသခဲ့သည့် ဂူအနီးမှတစ်ဆင့် ရိုဆာရီ ဘာဆီလီကာ (Rosary Basilica) ဘုရားကျောင်းတော်ဆီသို့ ဦးတည်လျှောက်လှမ်းခဲ့ကြသည်။ ထိုသို့ လမ်းလျှောက်ဆုတောင်းသူများထဲတွင် ဝေဒနာရှင် လူမမာအများအပြားလည်း ပါဝင်ခဲ့ကြသည်။

ပုပ်ရဟန်းမင်းကြီးက ရိုးရာမပျက် ပြုလုပ်မြဲဖြစ်သော ဤမီးထွန်းစီတန်းလှည့်လည်ခြင်း၏ မြစ်ဖျားခံရာကို ယခုလို ပြန်လည်အမှတ်ရ မိန့်ကြားခဲ့သည်။ "ကျွန်ုပ်တို့ဟာ ဒီညမှာ မယ်တော်က စိန့်ဘာနေဒက်ကတစ်ဆင့် ရဟန်းမင်းကြီးတွေထံ တောင်းဆိုခဲ့တဲ့ ဒီနေရာကို စီတန်းလှည့်လည်ပြီးလာကြပါ ဆိုတဲ့ စကားကို တုံ့ပြန်ဖို့အတွက် စုဝေးရောက်ရှိနေကြတာ ဖြစ်ပါတယ်။"

ရဟန်းမင်းကြီးလီယိုက ဤစီတန်းလှည့်လည်ပွဲ၏ အလင်းရောင်ကို "မျှော်လင့်ခြင်းရဲ့ အလင်းရောင်" ဟု ခေါ်ဆိုခဲ့သည်။ လူ့ဘဝခရီးလမ်းသည် များ သောအားဖြင့် စမ်းသပ်မှုများနှင့် ပြည့်နှက်နေတတ်သော်လည်း ဘုရားသခင် ၏ချစ်ခြင်းနှင့် ကယ်တင်ခြင်းကို ခံရသော "ယေဇူးခရစ်တော်၏ သားသမီးများဖြစ်ရခြင်း" ဟူသည့် ဝမ်းမြောက်ခြင်းမျိုးလည်း ရှိတတ်ကြောင်း မိန့်ကြားခဲ့သည်။

"ဝေဒနာရှင် လူမမာတွေဟာ ဘုရား သခင်နဲ့ အခြားသူတွေအပေါ် ထားရှိတဲ့ ယုံကြည်ခြင်း၊ မေတ္တာတရားတွေကတစ်ဆင့် ဘဝရဲ့အသွင်ကူးပြောင်းမှု ဖြစ်တည်လာပုံကို ပြသတဲ့ ထူးခြားတဲ့ သက်သေခံတွေ ဖြစ်ကြပါတယ်။ ဒါကို အမှန်တကယ် နားလည်နိုင်ဖို့ဆိုရင် ဒီနေရာကို ကိုယ်တိုင်လာရောက်ပြီး ချစ်လှစွာသော ဝေဒနာရှင်များနဲ့အတူ ဒီစီတန်းလှည့်လည်ပွဲမှာ ပါဝင်ဆင်နွှဲရမှာ ဖြစ်ပါတယ်။"

"ဒါကြောင့် ကျွန်တော်တို့ဟာ ဒီလော ကမှာ အသက်ရှင်ခွင့်ရသရွေ့ ရှေ့သို့ အစဉ်အမြဲ လျှောက်လှမ်းရင်း မိမိတို့ရဲ့ ခရီးလမ်းကို သစ္စာရှိရှိ ဆက်လက်ဖြတ် သန်းဖို့ ခေါ်ခြင်း ခံထားရတာဖြစ်ပါတယ်။ မယ်တော်မာရီယာဟာ ကျွန်တော်တို့ရဲ့ ရှေ့ကနေ လမ်းပြသွားနေပါတယ်။"

"မယ်တော်မာရီယာဟာ ကမ္ဘာကြီးအတွက် 'လိုအပ်နေတဲ့ မျှော်လင့်ချက်' ကို ပေးသနားပါတယ်" ဟု ပုပ်ရဟန်း မင်းကြီးက မိန့်ကြားခဲ့သည်။ "ကျွန်တော်တို့ရဲ့ အရေးကြီးဆုံးနဲ့ အရေးတကြီး လိုအပ်ချက်တွေ၊ မိမိတို့ရဲ့ ပုဂ္ဂိုလ်ရေးဆိုင်ရာ ကိစ္စရပ်တွေနဲ့ ကမ္ဘာကြီးအတွက် ဆုတောင်းချက်တွေကို မယ်တော်သခင်မရဲ့ခြေတော်ရင်းမှာ လာရောက် ပုံအပ်ဆုတောင်းကြပါစို့" လို့ရဟန်းမင်း ကြီးက မိန့်ကြားခဲ့ပါသည်။

Photo courtesy of the original uploaders

29/09/2026

သိကြားတမန် စိန့်မိုက်ကယ်၊ စိန့်ဂါဗြီအဲလ်၊ စိန့်ရာဖာအဲလ်တို့၏ပွဲနေ့ ☘️🌹🎻🎻🌹☘️

စက်တင်ဘာလ(၂၉)ရက်နေ့မှာ အမိသာ သနာတော်က သိကြားတမန်တော်ချုပ်များဖြစ်ကြသောစိန့်မိုက်ကယ်၊ စိန့်ဂါဗြီအဲလ်နှင့် စိန်ရာဖာအဲလ်တို့၏ပွဲနေ့အဖြစ် ကျင်းပစေပါသည်။

ဤသိကြားတမန်တော်ချုပ်များသည် သူတို့၏ကိုယ်စီတာဝန်ကို ထမ်းဆောင်နေကြရသည်။ သူတို့သည် ကမ္ဘာပေါ်၌ ဘုရား သခင်၏အထူးစေတမန်လုပ်ငန်းကိုလုပ် ဆောင်သော ဘုရားသခင်၏သတင်းသယ် ဆောင်သူများ (Messengers of God) ဖြစ်ကြသည်။

ဟေဘရူးဘာသာဖြင့် စိန့်မိုက်ကယ်၏ အဓိပ္ပါယ်မှာ "ဘုရားသခင်ကိုမည်သူအံတုနိုင်မည်နည်း"(Who is like God)၊ စိန့်ဂါဗြီအဲလ်၏အဓိပ္ပါယ်မှာ "ဘုရားသခင်၏ခွန်အားတန်ခိုး" (The power of God)ဖြစ်ပြီး စိန့်ရာဖာအဲလ်၏အဓိပ္ပါယ်မှာ "ဘုရားသခင်ကုသတော်မူပြီ" (God has healed) ဖြစ်သည်။

⛳ ဗျာဒိတ်တော်ကျမ်းအရစိန့်မိုက်ကယ် သည် ကောင်းကင်စစ်တပ်ကြီး၏ ခေါင်း ဆောင်ဖြစ်သည်။ သူသည် စစ်သားများကို ကာကွယ်မှိုင်းမသော သိကြားတမန်တော်ကြီးဖြစ်သည်။

⛳ ဒါန်နီအဲလ်ကျမ်း၌ စိန့်ဂါဗြီအဲလ်သည် ပရောဖက်များ၏ဗျာဒိတ်ရူပါရုံအချို့ကို ရှင်းပြရန်ပေါ်လာသောသိကြားတမန်တော် ကြီးဖြစ်ပြီး မယ်တော်မာရိယားအားအမိန့် တော်ပြန်ရာ၌ သတင်းသယ်ဆောင်သောသူဖြစ်သည်။

⛳ တိုဘိဝတ္ထု၌ စိန့်ရာဖာအဲလ်သည် တိုဘိကို မျက်စိကွယ်ခြင်းမှ ပြန်သက်သာလာ အောင် ကုသပေးခဲ့သော သိကြားတမန်တော်ကြီးဖြစ်သည်။

စိန့်မိုက်ကယ်၊ စိန့်ဂါဗြီအဲလ်၊ စိန့်ရာဖာအဲလ်နာမည်ကို ခံယူကြသောရဟန်းတော်များ၊ စစ္စတာရ်များ၊ ကိုရင်ကြီးများ၊ ဘာသာတူညီအစ်ကိုမောင်နှများအားလုံးအတွက် သတိရဆုတောင်းပေးကြပါစို့။ ။

Ref: God's Word 2020
Universalis App

✍️ ဇီဝဇိုး (မင်းတပ်)

#ဇီဝဇိုး_မင်းတပ်

28/09/2026

ပြင်သစ်နိုင်ငံ Our Lady of Loudes မယ် တော်ဂူရှေ့မှာ ရဟန်းမင်းကြီးလေအို သွား ရောက်ဆုတောင်းခဲ့ပါတယ်။

Loudes မယ်တော်ဂူမှာ သွားရောက်ဆုတောင်းတဲ့ ရဟန်းမင်းကြီး (၃) ပါးမြောက်ဖြစ်ပါတယ်။

လုဒယ်မယ်တော်ဂူဟာ နှစ်စဉ်ဘုရားဖူးသူ အများဆုံးထဲက နေရာတစ်ခုဖြစ်ပါတယ်။
မယ်တော်မာရီယာရဲ့ ကုသပေးမှုရရှိသူအများ ကြီးရှိတာကြောင့် အမြဲတမ်း ဘုရားဖူးသူ စည်ကားနေတာဖြစ်ပါတယ်။

လုဒယ်မယ်တော်ဂူမှာ မရောက်ဖူးသေးပေမယ့် ဘုရားဖူးခရီးသည်များအဆိုအရ မယ်တော်ဂူဘေးမှာ ကျိုင်းထောက်တွေ၊ Wheelchair စွန့်ပစ်ထားတာတွေ ရှိတယ်လို့ဆိုပါတယ်။ မယ်တော်ဆီအကူအညီတောင်းရင်း ကျန်းမာ လျက် အိမ်ပြန်သွားကြတာဖြစ်ပါတယ်။

တစ်နေ့ကျရင် Our Lady of Loudes မယ်တော်ဂူဆီ သွားရောက်ဆုတောင်းဖို့ မျှော်လင့်မိပါတယ်။

Photo courtesy of the original uploaders

28/09/2026

ပြင်သစ်နိုင်ငံ Notre-Dame de Lourdes
မှာ ရဟန်းမင်းကြီး Pope Leo XIV ၏မစ္ဆားပူဇော်ခြင်းတက်ရောက် သိန်းချီရှိခဲ့ပါတယ်။

ပြင်သစ်နိုင်ငံက လောကီဆန်လာပြီပြောကြပေမယ့် ယုံကြည်ခြင်းရှိနေသေးတယ်ဆိုတာ မြင်တွေ့ရပါတယ်။

မြန်မာပြည်ကို ယုံကြည်ခြင်းမျိုးစေ့ ယူဆောင်လာပေးခဲ့ကြတဲ့ MEP သာသနာပြုများ၊ PIME သာသနာပြုများ အစဉ်ကျေးဇူးတင်လျက်ပါ။

Photo courtesy of the original uploader

27/09/2026

ပြင်သစ်နိုင်ငံသို့ ရဟန်းမင်းကြီး၏သမိုင်းဝင် သိုးထိန်းခရီးစဉ်ကြွတော်မူခြင်း 🇨🇵🤝🇻🇦

၂၆/၉/၂၀၂၆
ပြင်သစ်နိုင်ငံ၊ ပါရီမြို့။

၂၀၂၆ ခုနှစ် စက်တင်ဘာလ ၂၆ ရက်နေ့က ပါရီမြို့တွင် ပြုလုပ်ခဲ့သော ကွင်း ပြင်၌ ဝတ်ပြုဆု‌တောင်းခြင်းမစ္ဆားတရားတွင် ပုပ်ရဟန်းမင်းကြီး လီယို (၁၄) က ဘုရားသခင်၏ ရှေ့မှောက်တွင် လူတိုင်းသည် ထူးခြားပြီး အစားထိုးမရနိုင်သူ များဖြစ်ကြကြောင်း တရားနာပရိသတ်အပေါင်းတို့အား မိန့်ကြားခဲ့ပါသည်။

ယင်းဝတ်ပြုကိုးကွယ်ခြင်း အခမ်း အနားပြုလုပ်သော Place de la Concorde ရင်ပြင်တွင် လူဦးရေ ခန့်မှန်းခြေ ၈၀၀,၀၀၀ ခန့် စုဝေးခဲ့ကြသည်။ မိသားစုများမှာ ပျော်ပွဲစားဖျာများ ခင်းကျင်းထိုင်နေကြပြီး၊ ကလေးငယ်များမှာလည်း Champs-Élysées လမ်းမတစ်လျှောက်တွင် စောင့်ဆိုင်းနေခဲ့ကြကာ လူအများအပြားမှာမူ ပုပ်ရဟန်း မင်းကြီး စီးနင်းလာမည့် မော်တော်ယာဉ်ကို တစ်ချက်မျှ မြင်တွေ့ခွင့်ရရန် နာရီပေါင်းများစွာ မတ်တတ်ရပ် စောင့်ဆိုင်းခဲ့ကြသည်။

ဝတ်ပြုပွဲတွင် ကူညီပေးရသော တရား ထောက်များ (altar servers) လူငယ်များထဲတွင် ဒေါင်းဆင်ဒရုန်း (Down syndrome) ဝေဒနာခံစားနေရသည့် လူငယ် (၆) ဦးလည်း ပါဝင်ခဲ့သည်။

ပုပ်ရဟန်းမင်းကြီးလီယိုက သူ၏ တရားဒေသနာတွင် “ကျွန်ုပ်တို့ထဲမှ မည်သူမျှ ဂဏန်းသင်္ချာတစ်ခု သို့မဟုတ် မှတ်တမ်းစာအုပ်ထဲက အမည်စာရင်းတစ်ခုမျှသာ မဟုတ်ဘဲ၊ ထူးခြားပြီး အစားထိုးမရနိုင်သည့် လူသားတစ်ဦးစီ ဖြစ်သည်” ဟု မိန့်ကြားခဲ့သည်။

ပြင်သစ်နိုင်ငံ၏ရေရှည်တည်တံ့ခိုင်မြဲသော ကိုးကွယ်ယုံကြည်မှုသမိုင်း ကြောင်းကို ဆက်ခံကြမည့် လူအုပ်ကြီးကို မျှော်ကြည့်ရင်း၊ ဒဏ်ရာရရှိထားသော ယေဇူးခရစ်တော်၏ နှလုံးသားတော်တည်းဟူသော မြစ်ဖျားခံရာမှ သောက်သုံးကြရန် ရဟန်းမင်းကြီးက တိုက်တွန်းခဲ့သည်။ လူတို့၏ ဘုရားသခင်အပေါ် ဆာငတ်မှု၊ အသက်ရှင်ခြင်း၊ သမ္မာတ ရား၊ စည်းလုံးညီညွတ်ခြင်းနှင့် ငြိမ်းချမ်း ခြင်းတို့အတွက် ဆာငတ်မှုများကို ရဟန်း မင်းကြီးက မိန့်ကြားခဲ့ပြီး သန့်ရှင်းသော ဝိညာဉ်တော်၏ အသက်စမ်းရေသည် ပြင်သစ်နိုင်ငံတစ်ဝှမ်းလုံးသို့ စီးဆင်းပါစေကြောင်း ဆုတောင်းပေးခဲ့သည်။

ဤဝတ်ပြုဆုတောင်းပွဲသည် ရဟန်း မင်းကြီး၏ သာသနာပြုခရီးစဉ်တွင် အဓိကကျသော အခိုက်အတန့်တစ်ခု ဖြစ်ခဲ့သည်။ ထို့နောက်တွင် ရဟန်းမင်းကြီးသည် မယ်တော်ထင်ရှားပြသခဲ့ရာ ဂူဆီသို့ ဆုတောင်းရန်အတွက် Lourdes မြို့သို့ ဆက်လက်ထွက်ခွာခဲ့သည်။ သို့ သော်လည်း ပါရီမြို့၏မြို့လယ်တွင် ချန်ထားရစ်ခဲ့သော ရဟန်းမင်းကြီး၏ သဝဏ်လွှာမှာမူ ရှင်းလင်းပြတ်သားနေဆဲဖြစ်သည်။ "လူတိုင်းသည် အရေးပါပြီး မည်သူမျှ ဂဏန်းသင်္ချာတစ်ခုမျှသာ မဟုတ်ပါ" ဟူ၍ ဖြစ်သည်။

Photo courtesy of Vatican News

Food For Soul - ACM

07/10/2026

05/10/2026

05/10/2026

02/10/2026

29/09/2026

29/09/2026

29/09/2026

28/09/2026

28/09/2026

27/09/2026

Address

Website

Alerts

Contact The Place Of Worship

Shortcuts

Share

Listing takedown request