မဟာဝိဟာရေက်ာင္းတိုက္-လွည္းကူး

29/04/2026

29/04/2026

ရဟန်းနှင့် လောကီ မင်္ဂလာ
------

ဗုဒ္ဓသာသနာဝင် ရဟန်းအဖြစ် ဝန်ခံနေကြတဲ့ ပုဂ္ဂိုလ်တွေဟာ လောကီမင်္ဂလာနဲ့ စပ်ပြီး ပယ်သာ ပယ်ဖို့ သင့်ပါတယ်၊

အဲဒီ လောကီမင်္ဂလာတွေကို အားမပေးသင့်ပါဘူး။ ဒါပေမဲ့ အချို့ ရဟန်းတော်များက ဒီလောကီမင်္ဂလာကို အားပေး ပြောဟောနေကြတာလည်း ရှိနေတယ်၊

ဥပ္ပါတခေါ်တဲ့ ဘေးဥပါဒ်များ အိပ်မက်များ လက္ခဏာများနဲ့ စပ်ပြီး ဘယ်လို မကောင်းကျိုး ဖြစ်တတ်တယ်၊ အဲဒီလို မကောင်းကျိုး မဖြစ်ရအောင် ဘာလုပ်ရမယ် စသည်ဖြင့် ယတြာချေပုံတွေလည်း သင်ပြပေးနေကြတယ်၊ စီးပွားဖြစ်အောင် ရာထူးတိုးတက်အောင် ဘယ်လို လုပ်ရမယ်၊ ဘာကို ဆောင်ထားရမယ်စသည်ဖြင့်လည်း ညွှန်ကြား ပေးနေကြတယ်၊ ဘေးရန် ကင်းချင်တဲ့သူ ကြီးပွားချမ်းသာချင်တဲ့သူ ရာထူး တည်မြဲ တိုးတက်ချင်တဲ့ သူတွေကလည်း အဲဒီလို လောကီမင်္ဂလာ ပြုလုပ်ပေးတဲ့ ဆရာတွေကို ကိုးကွယ် ဆည်းကပ်နေကြတယ်၊

ဒါကြောင့် လောကီမင်္ဂလာကို ဟောပြနေတဲ့ ရဟန်းတွေမှာလည်း ဘုန်းတန်ခိုး ကြီးနေကြတယ်။

ဒါပေမဲ့ ဒီတရားဂါထာအရဆိုရင်တော့ အဲဒီ လောကီမင်္ဂလာတွေကို အလေးမပြုသင့်ပါဘူး၊ ပယ်နိုင်အောင် သီလ သမာဓိ ပညာ အကျင့်ကိုသာ ကြိုးစားအားထုတ်ပြီး ကျင့်သင့်ပါတယ်။

(မဟာစည်ဆရာတော်၊ သမ္မာပရိဗ္ဗာဇနီယသုတ်၊ ၂၂)

ဘုန်းကြီးတို့မှာ ရက်ရာဇာ ပြဿဒါးစသည်ကို အယုံအကြည်မရှိပေမယ့် အလှူမင်္ဂလာပြုလိုတဲ့ ဒကာ ဒကာမတွေကျတော့ သူတို့အလိုအတိုင်း ခွင့်ပြုထားရပါတယ်၊

ကျောင်းဆောက်တဲ့အခါလည်း အခါကောင်းရွေးပြီး ပန္နက်ရိုက်တာ အုတ်မြစ်ချတာကို ခွင့်ပြုထားရပါတယ်၊

ဘာကြောင့်လဲ ဆိုတော့ အကြောင်း မညီညွတ်လို့ တစ်စုံတစ်ရာ အဆင်မပြေဘဲ ဖြစ်နေရင် ရက်ကောင်း
အချိန်ကောင်း မရွေးရတဲ့ အတွက်ကြောင့်လို့ ပြောစရာ
ဖြစ်မနေရအောင်လို့ပါပဲ။

(မဟာစည်ဆရာတော်၊ သမ္မာပရိဗ္ဗာဇနီယသုတ်၊ ၁၅)

28/04/2026

ရဟန်းတို့၏ ဘဝနေနည်း (၁၇)

28/04/2026

ဘုရားပွဲတွေ သတိပြု
------
တချို့ဌာနတွေမှာ ဘုရားပူဇော်ပွဲဆိုပြီး ပွဲလမ်းသဘင်တွေနဲ့ အကြီးအကျယ် ကျင်းပတာရှိတယ်၊ အဲဒီလိုပွဲလမ်းသဘင်တွေကို မြတ်စွာဘုရားသာ သက်တော်ထင်ရှားရှိရင် ခွင့်ပြုမှာ မဟုတ်ပါဘူး၊

နောက်ပြီးတော့ ဈေးပွဲကြီးတွေနဲ့ ဘုရားပူဇော်ပွဲတွေဟာလဲ ဘုရားအလိုတော်ကျဖြစ်ပုံ မရပါဘူး၊

ရွှေဘိုအနောက် ရေဦးနယ်ဘက်မှာ တန်ခိုးကြီး ဘုရားသုံးဆူရှိသတဲ့၊ အဲဒီ သုံးဆူထဲက တန်ခိုးအကြီးဆုံး စေတီတော်ဘုရားပူဇော်ပွဲမှာ နွားသားတွေ ရောင်းဝယ် စားသုံးကြတဲ့အတွက် နွားအကောင်ရေ တစ်ထောင်ကုန်သတဲ့၊ တန်ခိုးအလတ်စားဘုရားပွဲတော်မှာ နွားအကောင်ရေ ၇၅၀ ကုန်သတဲ့၊ တန်ခိုးအငယ်စား ဘုရားပွဲတော်မှာ နွားအကောင်ရေ ၅ဝဝ ကုန်သတဲ့၊ အင်မတန် ကြောက်စရာကောင်းတာပဲ၊ ဒီလို ဘုရားပွဲတော်တွေ အကြောင်းပြုပြီးတော့ ဆိတ်တွေ၊ ကြက်တွေ၊ ဘဲတွေ သေတာလဲ အများကြီး နေမှာပဲ၊ မြတ်စွာဘုရားသာ သက်တော်ထင်ရှားရှိနေရင် ဒီလိုပွဲတွေကို ခွင့်ပြုမှာ မဟုတ်ပါဘူး။

(မဟာစည်ဆရာတော်၊ သက္ကပဉှသုတ်၊ ၃၀)

27/04/2026

ရဟန်းတို့၏ ဘဝနေနည်း (၁၆)

27/04/2026

သီချင်းတရား မဟောသင့် မနာသင့်ကြောင်း
-------

တချို့ ကတော့ ပါဠိကို သီချင်းသံလို ရွတ်ဆိုတာလဲ ရှိပါတယ်၊

အဲဒါကတော့ “ ဝိနည်းနဲ့လဲ ဆန့်ကျင်တယ်၊ တရားနာသူတွေမှာလဲ ကိလေသာ ပွားစေတယ်၊ ဒါကြောင့် ပါဠိကို သီချင်းလို ဖြစ်အောင် ရွတ်ဆိုတာလဲ နေရာမကျဘူး၊ မသင့်ဘူး၊ အဲဒီလိုဟောတဲ့ တရားကို ကောင်းတယ်လို့လဲ မချီးမမွမ်းရ၊ အားမပေးရဘူး၊

နောက်ပြီးတော့ တချို့ ဓမ္မကထိကများက တရားဟောရင်း သီချင်းတွေကို ဆိုပြတာလဲရှိတယ်လို့ ကြားသိရတယ်၊ အဲဒါကတော့ သာသနာပြုတာ မဟုတ်ဘူး၊ သာသနာဖျက်ရာ ရောက်တယ်၊

အဲဒီလို သီချင်းဆိုတဲ့ ပုဂ္ဂိုလ်လဲ ရဟန်းဆိုရင် အာပတ်တွေ များစွာသင့်တယ်၊ တရားနာသူတွေမှာလဲ အကုသိုလ်တွေ များစွာဖြစ်ပွားတယ်၊

အဲဒီလို သီချင်းတရားကို နာပြီး အားပေးတဲ့ သူတွေဟာ သာသနာပျက်အောင် အားပေးရာလဲ ရောက်တယ်၊ ဒါကြောင့် အဲဒီလို သီချင်းတရားကိုတော့ ရှောင်ကြဉ်ဖို့ လိုပါတယ်။

(မဟာစည်ဆရာတော်၊ သက္ကပဉှသုတ်၊ ၂၉)

26/04/2026

ရဟန်းတို့၏ ဘဝနေနည်း (၁၅)

26/04/2026

အမျိုးသမီးများ သိဒ္ဓိတင် သတိပြု
-------

ယခုနေအခါမှာ ထွက်ရပ်ပေါက် ပုဂ္ဂိုလ်ယောင်ယောင်နဲ့ မထေရ်ကြီးအချို့က အမျိုးသမီးကလေးများ ခေါင်းကို လက်ဖြင့် ပွတ်သပ်ပြီးတော့တောင် သိဒ္ဓိတင်ချီးမြှောက်တာ ရှိတယ်လို့ ကြားရတယ်၊

အဲဒါဟာ ဝိနည်းပညတ်တော်က လုံးဝ တားမြစ်ထားတဲ့ အမှုပါပဲ။ ရဟန်းများမှာ သမီးတို့ အမိတို့တောင် မထိပါးရဘူးလို့ ပညတ်ထားတာ ရှိပါတယ်၊

မိန်းမအရုပ်တောင် သာယာတဲ့စိတ်ဖြင့် မကိုင်ရဘူးလို့ ပညတ်ချက်ရှိပါတယ်။

ဒါကြောင့် အဲဒီလို ထိပါးမှုဟာလည်း ကိုယ်၏ ရိုင်းပြမှုလို့ ဆိုရမှာပဲ။

(မဟာစည်ဆရာတော်၊ ဗြဟ္မဝိဟာရတရားတော်၊ ၁၅၀၊ ၁၅၉)

25/04/2026

ရဟန်းတို့၏ ဘဝနေနည်း (၁၄)

25/04/2026

ခရီးသွားလျှင် သပိတ်နှင့် ရေစစ် ယူရမည်
-------

ယခုကာလမှာ အချို့ရဟန်းတော်များကတော့ ရောက်ရာမှာ စားစရာက အလွယ်တကူရနေတာနဲ့ သပိတ်ကိုတောင် မယူဘဲ ပေါ့ပေါ့ပါးပါး သက်သက်သာသာ သွားလေ့ရှိကြပါတယ်။

ဘုရားလက်ထက်, အဋ္ဌကထာဆရာများလက်ထက် ကာလဆီကတော့ ပတ္တစီဝရမာဒါယ-သပိတ်, သင်္ကန်းကိုယူ၍လို့ ဆိုထားတဲ့အတိုင်း သံဃာ့အစည်းအဝေး သွားတဲ့အခါ, ဥပုသ်ပြုသွားတဲ့အခါမှာတောင် သပိတ်နှင့်သင်္ကန်းသုံးထည်ကို ယူသွားလေ့ရှိကြပါတယ်၊

ဒါကြောင့် ဘုန်းကြီးတို့ကတော့ ခရီးဝေးသွားတဲ့အခါဖြစ်စေ, မြို့ထဲ သီးသန့် ဆွမ်းစားသွားတဲ့အခါဖြစ်စေ သပိတ်ကိုလည်း ယူသွားဖို့ရာ ညွှန်ကြားထားပါတယ်။

နောက်ပြီးတော့ အရေးကြီးတဲ့ ပရိက္ခရာတစ်ခုကတော့ ရေစစ်ပဲ၊ အဲဒီရေစစ် မပါဘဲ ယူဇနာဝက်စသည် ရှည်တဲ့ခရီးကိုသွားရင် ဒုက္ကဋ်အာပတ်သင့်တယ်၊

တစ်ယူဇနာဆိုတာ ပါဠိအဘိဓာန်ကျမ်းစသည်မှာ ပြဆိုထားချက်အရအားဖြင့် ၁၂-မိုင်ကျော်ကျော် ၁၃-မိုင်နီးပါးရှိတယ်၊ ယူဇနာဝက်ဆိုရင် ၆-မိုင်ခွဲလောက်ရှိတယ်၊ ယခုခေတ်မှာ ၆-မိုင်ခွဲလောက်ခရီးကို မော်တော်ယာဉ်စသည်ဖြင့် မကြာခဏသွားနေကြရတာပဲ၊

ယခုခေတ် သုတေသီဆရာတို့၏ ယူဆချက်အရအားဖြင့် တစ်ယူဇနာဆိုတာ ရှစ်မိုင်လောက်ရှိတယ်၊

ဒါကြောင့် ယူဇနာဝက်ဆိုတာဟာ ၄-မိုင်လောက် ရှိတယ်လို့ ယူဖို့ပါပဲ။

အဲဒီတော့ ရန်ကုန်, မန္တလေးတို့လိုမြို့ထဲမှာ ကိစ္စကြီးငယ်ရှိလို့ သွားတဲ့အခါ ၄-မိုင်လောက်ဝေးရင် ရေစစ်ပါဖို့လိုပါတယ်၊ သီးခြားရေစစ်မပါရင် လက်ကိုင်ပုဝါကို ရေစစ်အဖြစ် နှလုံးသွင်းပြီး ယူသွားဖို့ပါပဲ၊ ဒါမှမဟုတ်ရင်လည်း အကြောင်းရှိတဲ့အခါ မိမိ ဝတ်ထားတဲ့သင်္ကန်းဖြင့် ရေစစ်သောက်မယ်လို့ နှလုံးသွင်းသွားဖို့ပါပဲ။

(မဟာစည်ဆရာတော်၊ ဗြဟ္မဝိဟာရတရားတော်၊ ၁၅၀၊ ၁၅၁)

24/04/2026

ရဟန်းတို့၏ ဘဝနေနည်း (၁၃)