http://www.goodshepherdmyanmar.org/

Good Shepherd Myanmar, Bogyoke Aung San Street, Yangon (2026)

25/05/2026

"Fear much your own weakness, but never let your confidence in God fail; let that be boundless."—St. Mary Euphrasia

မေလ(၂၅) ရက်၊ ၂၀၂၆။

လူတစ်ဦးချင်းစီ၌ အားနည်းချက်များနှင့် လုပ်ရည်ကိုင်ရည်၊ အရည်အချင်းအကန့်အသတ်များ ရှိကြခြင်းသည် ကျွန်ုပ်တို့၏ လူသားဆန်ခြင်း၏ သဘောသဘာဝကို ဖော်ပြနေခြင်း ဖြစ်ပါသည်။
ဤလူသားဆန်ခြင်းကို ရိုးသားစွာ ဝန်ခံခြင်းနှင့် နေ့စဉ်ဘဝ၏ စိန်ခေါ်မှု အခက်အခဲများကို ရင်ဆိုင်ရခြင်းသည် ကျွန်ုပ်တို့အတွက် အားလျော့စိတ်ပျက်ဖို့ရန် မဟုတ်ပဲ၊
🔵 ဘုရားသခင်၏ အတိုင်းအဆမဲ့ ကရုဏာတော်နှင့်
🔵 ကိုယ်တော်၏ ချစ်ခြင်းမေတ္တာတော်ကို ပိုမိုကိုးစားတတ်စေရန်အတွက်သာ ဖြစ်ပါသည်။
ထို့ကြောင့် မိမိကိုယ်ကို ယုံကြည်မှုရှိခြင်းထက် ဘုရားရှင်အပေါ်ထားရှိသော မယိမ်းယိုင်သည့် ယုံကြည်ကိုးစားမှုကို အခြေခံလျက်၊ ကျရောက်လာမည့် နေ့ရက်တိုင်းကို မျှော်လင့်ခြင်းအပြည့်ဖြင့် ရဲဝံ့စွာ လျှောက်လှမ်းနိုင်ကြပါစေ။
အာမင်။

24/05/2026

သန့်ရှင်းသောဝိညာဉ်တော်ဘုရားပွဲနေ့တော်မြတ်
Pentecost Sunday 🔥🕊

မေလ (၂၄) ရက်၊ ၂၀၂၆။

သခင်ယေရှု ခရစ်တော် ရှင်ပြန်ထမြောက်တော်မူပြီး ရက်ပေါင်း (၅၀) ရက်မြောက်‌သောနေ့တွင် သန့်ရှင်းသောဝိညာဉ်တော်ဘုရားသည် မယ်တော်မာရီယားနှင့် တပည့်တော်ကြီးများအပေါ် ဆင်းသက်တော်မူခဲ့သည်။ “Pentecost” ဟူသော စကားလုံးသည် ဂရိဘာသာစကား “Pentēkostē” မှ ဆင်းသက်လာပြီး “ငါးဆယ်မြောက်နေ့” ဟု အဓိပ္ပာယ်ရပါသည်။ ဤနေ့ကို ကက်သလစ်အသင်းတော်ကြီး၏ မွေးနေ့အဖြစ်လည်း သတ်မှတ်ကြပါသည်။
တပည့်တော်များသည် ယခင်က ကြောက်ရွံ့ခြင်းနှင့် ပုန်းကွယ်ခြင်းများအတွင်း ရှိနေခဲ့ကြသော်လည်း၊ သန့်ရှင်းသောဝိညာဉ်တော်ဘုရား၏ တန်ခိုးတော်အားဖြင့် ရဲရင့်သော သက်သေခံသူများအဖြစ် ပြောင်းလဲခဲ့ကြသည်။ သူတို့သည် အမျိုးမျိုးသောဘာသာစကားတို့ဖြင့် ဧဝံဂေလိတရားကို ဟောပြောနိုင်ခဲ့ကြပြီး၊ လူမျိုးအသီးသီးမှ လူပရိတ်သတ်များသည်လည်း မိမိတို့၏ အသီးသီး‌သောမိခင်ဘာသာစကားများဖြင့် တရားတော်များကိုကြားသိနားလည်နိုင်ခဲ့ကြသည်။ ထိုနေ့တွင်ပင် လူပေါင်းထောင်ချီတို့သည် ယုံကြည်ခြင်းသို့ ပြောင်းလဲကာ ဆေးကြောခြင်းခံယူခဲ့ကြပါသည်။
‘Pentecost Sunday’ သည် ဤအံ့ဖွယ်ဖြစ်ရပ်တစ်ခုတည်းကိုသာ အောက်မေ့သတိရသောနေ့မဟုတ်ဘဲ၊ ယနေ့အသင်းတော်နှင့် ယုံကြည်သူတိုင်းအတွက်လည်း သန့်ရှင်းသောဝိညာဉ်တော်ဘုရား၏ မစခြင်း၊ လမ်းညွှန်ခြင်းနှင့် အသစ်တဖန်ပြုပြင်‌ပေးခြင်းကို တောင်းခံရသောနေ့ဖြစ်ပါသည်။
ယနေ့ကမ္ဘာတွင် မတည်ငြိမ်မှုများ၊ ကြောက်ရွံ့မှုများ၊ စိတ်ပင်ပန်းနွမ်းနယ်မှုများနှင့် အမြင်မတူကွဲပြားခြင်းများကြား၌ အသက်ရှင်နေကြရသူများအားလုံးအတွက် အထူးဆုတောင်းပေးကြပါစို့။ သန့်ရှင်းသောဝိညာဉ်တော်သည် ကျွန်ုပ်တို့၏နှလုံးသားများကို ပြန်လည်အသက်ဝင်စေပြီး၊ အမှန်တရား၊ ငြိမ်းချမ်းခြင်းနှင့် မျှော်လင့်ခြင်း၏ သက်သေခံသူများအဖြစ် ပြောင်းလဲပေးတော်မူပါစေ။
အာမင်။

22/05/2026

စိန့်ရီတာပွဲနေ့
The Feast of St. Rita of Cascia

မေလ ၂၂ ရက်၊ ၂၀၂၆။

စိန့်ရီတာ၏ ဘဝအသက်တာသည် နာကျင်မှု၊ ဆုံးရှုးမှုများနှင့် စမ်းသပ်ခြင်းများကြားတွင် ဘုရားသခင်၌ ယုံကြည်ခြင်းကို ဘယ်သောအခါမျှ မစွန့်လွှတ်ခဲ့သော သစ္စာရှိသော ကက်သလစ်အမျိုးသမီးတစ်ဦး ဖြစ်ပါသည်။
ခက်ခဲကြမ်းတမ်းသော အိမ်ထောင်ရေးဘဝ၊ ခင်ပွန်းဖြစ်သူ လုပ်ကြံခံရခြင်းနှင့် ရင်သွေးသားသမီးများကို ဆုံးရှုံးရခြင်းတိုကို ကြုံတွေ့ခဲ့ရသော်လည်း၊ သူမသည် လက်တုန့်ပြန် မုန်းတီးခြင်းလမ်းကို မရွေးချယ်ခဲ့ပဲ၊ "ခွင့်လွှတ်ခြင်း၊ ငြိမ်းချမ်းခြင်းနှင့် ဘုရားသခင်အပေါ် လုံးဝပုံအပ်ကိုးစားခြင်း" ဖြင့်သာ အသက်ရှင် ဖြတ်သန်းခဲ့ပါသည်။
ယနေ့ကမ္ဘာတွင် စစ်ပွဲများ၊ အကြမ်းဖက်မှုများနှင့် မတည်ငြိမ်မှုများကြား၌ မိခင်များစွာသည် မိမိတို့၏ ခင်ပွန်းများနှင့် သားသမီးများကို ဆုံးရှုးနေရဆဲ ဖြစ်ပါသည်။
ရှင်ရီတာ၏ဘဝက နာကျင်မှုများကြားတွင်ပင် လူသားတစ်ဦးအနေဖြင့် မေတ္တာ၊ ခွင့်လွှတ်ခြင်းနှင့် ယုံကြည်ခြင်းကို ဆက်လက်ရွေးချယ်နိုင်ကြောင်း သက်သေပြနေပါသည်။ သူမသည် ဆုံးရှုံးခြင်းများအတွင်း၌ပင် ဘုရားသခင်၏ ငြိမ်းချမ်းခြင်းကို ရှာဖွေခဲ့ပြီး၊ မျှော်လင့်ချက်ပျောက်ဆုံးနေသောသူများအတွက် ယနေ့တိုင် အားပေးနှစ်သိမ့်မှုပေးနေဆဲဖြစ်ပါသည်။
ယနေ့တွင် သားသမီးများကို ဆုံးရှုံးခဲ့ရသော မိခင်များ၊ မုဆိုးမများ၊ စစ်ပွဲနှင့် အကြမ်းဖက်မှုများကြားတွင် ခက်ခဲပင်ပန်းစွာ အသက်ရှင်နေကြရသူများ၊ ဝမ်းနည်းခြင်းနှင့် ကြေကွဲခြင်းများကိုတိတ်ဆိတ်စွာ ခံစားနေကြရသူများ အားလုံးအတွက် အထူးတလည် ဆုတောင်းပေးကြပါစို။

“စိန့်ရီတာ၊ နာကျင်မှုများကြားတွင် စိတ်နှလုံး၌ မျှော်လင့်ခြင်းကို ဆက်လက်ထိန်းသိမ်းနိုင်စေရန် ကျွန်ုပ်တိုအတွက် ဆုတောင်းပေးတော်မူပါ။”
အာမင်။

22/05/2026

ဝိညာဉ်တော်ဆုကျေးဇူး (၇) မျိုး

ဉာဏ်ပညာရှိခြင်း
နားလည်တတ်ခြင်း
အကြံယူတတ်ခြင်း
အင်အားသတ္တိရှိခြင်း
သိမြင်တတ်ခြင်း
ဘုရားတရားကြည်ညိုခြင်း
ဘုရားသခင်ကို ကြောက်ရွံခြင်း

18/05/2026

"Let us be kind, very kind to the poor."—St. Mary Euphrasia

ကျွန်ုပ်တို့သည် လူအများ၏မေ့လျော့ခြင်းကိုခံနေကြရသူများ၊ ရုန်းကန်လှုပ်ရှားနေရသူများနှင့် ဆင်းရဲဒုက္ခခံစားနေရသူများကို မေတ္တာတရားဖြင့် ကူညီကမ်းလှမ်းနိုင်သူများဖြစ်ကြပါစေ။
အာမင်။

17/05/2026

သခင်ယေဇူး မိုးကောင်းကင်သို့တက်ကြွတော်မူသောပွဲနေ့ကြီး (၇ ကြိမ်မြောက် အီစတာ တနင်္ဂနွေနေ့)
The Solemnity of Ascension of The Lord (7th Sunday of Easter)

မေလ (၁၇) ရက်နေ့၊ ၂၀၂၆။

ရှင်ပြန်ထမြောက်တော်မူပြီးနောက် ရက်ပေါင်းလေးဆယ်အကြာတွင် သခင်ယေရှုသည် တပည့်တော်များ၏ရှေ့မှောက်၌ ကောင်းကင်ဘုံသို့ တက်ကြွတော်မူခဲ့သည်။
သခင်ဘုရား၏ ကောင်းကင်ဘုံသို့ တက်ကြွတော်မူခြင်းသည် ကျွန်ုပ်တို့အား မြေကြီးပေါ်ရှိ စိုးရိမ်ပူပန်မှုများနှင့် ခက်ခဲမှုများကြားတွင်ပင် မျှော်လင့်ခြင်းမပျောက်စေဘဲ အသက်ရှင်သန်ရန် သတိပေး‌နေပါသည်။ ယုံကြည်ခြင်းဖြင့် အသက်ရှင်သန်သူတို့၏ နောက်ဆုံးရည်မှန်းချက်မှာ ဘုရားသခင်နှင့် ထာဝရပေါင်းစည်းခြင်းဖြစ်ကြောင်းကိုလည်း ကျွန်ုပ်တို့ ဆင်ခြင်နှလုံးသွင်းကြပါစို့။
ယနေ့ကမ္ဘာတွင် စစ်ပွဲများ၊ မတည်ငြိမ်မှုများ၊ ဆင်းရဲဒုက္ခများနှင့် အနာဂတ်မသေချာမှုများကြား၌ ရုန်းကန်နေကြရသူများအတွက် အထူးဆုတောင်းပေးကြပါစို့။
"ကောင်းကင်ဘုံသို့ တက်ကြွတော်မူသော အိုသခင်ယေရှု၊ ကျွန်ုပ်တို့၏နှလုံးသားများကို မျှော်လင့်ခြင်းနှင့် ယုံကြည်ခြင်းဖြင့် ပြည့်စုံစေတော်မူပါစေ။ "
အာမင်။

15/05/2026

စိန့်မေရီယူဖရေစီယား၏ ဆုတောင်းသံ

တေးဆို - Sr. Elizabeth Joseph (RGS) & Sr. Candida (RGS)
ဂီတာ - Rose Mary

14/05/2026

လယ်ယာလုပ်သား ရှင်အီစီဒေါ၏ ပွဲနေ့
The Feast of Saint Isidore, the Laborer

မေလ (၁၅) ရက်၊ ၂၀၂၆။

မေလ (၁၅) ရက်တွင် တောင်သူလယ်သမားများ၊ ခွန်အားဖြင့် အသက်မွေးဝမ်းကျောင်းပြုကြသူများနှင့် မိမိတို့၏ မိသားစုများဖူလုံရေးအတွက် နေ့စဉ်ကြိုးစားလုပ်ကိုင်ရှာဖွေနေကြသူများကို ကြည့်ရှုစောင့်မတော်မူသော နိမ့်ချခြင်းနှင့်ပြည့်စုံသည့် လယ်ယာလုပ်သား ရှင်အီစီဒေါ၏ ပွဲနေ့အဖြစ် အသင်းတော်မှ သတ်မှတ်ကျင်းပပါသည်။

ရှင်အီစီဒေါသည် စပိန်နိုင်ငံ၊ မက်ဒရစ် မြို့အနီးတွင် နေထိုင်ခဲ့သော ရိုးရှင်းသည့် လယ်ယာလုပ်သားတစ်ဦးဖြစ်ပြီး၊ ဆင်းရဲနွမ်းပါးသော်လည်း ဘုရားသခင်အပေါ် ယုံကြည်ခြင်း၊ ဆုတောင်းခြင်းနှင့် အလုပ်ကြိုးစားခြင်းတို့ဖြင့် ရှင်သန်နေထိုင်ခဲ့သူဖြစ်ပါသည်။ နေ့စဉ်လုပ်ငန်းမစတင်မီ မစ္ဆားတက်ရောက်၍ ဘုရားသခင်ကို ဦးထိပ်ထားကာ၊ မိမိ၏ တနေ့တာအလုပ်နှင့် ပင်ပန်းမှုများကိုပင် ယုံကြည်ခြင်းဖြင့် ပူဇော်တတ်သူဖြစ်ပါသည်။
ရှင်အီစီဒေါ၏ဘဝသည် ရိုးသားစွာအလုပ်လုပ်ကိုင်ပြီး မိမိတာဝန်ကို သစ္စာရှိစွာထမ်းဆောင်ရင်း ဘုရားသခင်နှင့် နီးစပ်သောအသက်တာကိုရရှိနိုင်ကြောင်းကို ကျွန်ုပ်တို့အား သက်သေပြလျက်ရှိပါသည်။

ယနေ့ခေတ်တွင် အထူးသဖြင့် လယ်ယာစိုက်ပျိုးရေးလုပ်ကိုင်သူများစွာသည် မတည်ငြိမ်မှုများ၊ စီးပွားရေးအခက်အခဲများ၊ သီးနှံပျက်စီးမှုများနှင့် အနာဂတ်မသေချာမှုများကြားတွင် ကြိုးစားရှင်သန်နေကြရပါသည်။ မိသားစုဘဝများရပ်တည်နိုင်ရန် အတွက် နေပူမိုးရွာမရှောင်ဘဲ လုပ်ကိုင်ကြသော်လည်း၊ သူတို့၏ပင်ပန်းမှုနှင့် စွန့်လွှတ်မှုများကို လူအများက မမြင်နိုင်ကြသည့်အချိန်များလည်း ရှိနေပါသည်။

ထို့ကြောင့် ယနေ့တွင် နိုင်ငံတကာရှိ တောင်သူလယ်သမားများအားလုံးအတွက်၊ အထူးသဖြင့် အခက်အခဲများကြားတွင် ဆန်စပါးစိုက်ပျိုးလုပ်ကိုင်နေကြသော မြန်မာနိုင်ငံမှ လယ်သမားများအတွက် ဆုတောင်းပေးကြပါစို့။ မိသားစုများကို ထောက်ပံ့နိုင်ရန် နေ့စဉ်ကြိုးစားလုပ်ကိုင်နေကြသူများ၊ အလုပ်အကိုင်မတည်ငြိမ်မှုများနှင့် ရုန်းကန်နေကြရသူများ၊ လူမမြင်သော ဝန်ထုပ်ဝန်ပိုးများကို ထမ်းဆောင်နေကြရသူများအတွက်လည်း ဆုတောင်းပေးကြပါစို့။

"ရှင်အီစီဒေါ၊ ကျွန်ုပ်တို့နှင့် အလုပ်လုပ်ကိုင်နေသူအားလုံးအတွက် ဆုတောင်းပေးတော်မူပါ။"
အာမင်။

13/05/2026

တပည့်တော်ကြီး ရှင်မဿိ၏ ပွဲနေ့
(The Feast of Saint Matthias, the Apostle)

မေလ (၁၄) ရက်၊ ၂၀၂၆။

ရှင်မဿိသည် သခင်ခရစ်တော်ကို သစ္စာဖောက်ခဲ့သော ယုဒရှကာရုတ်၏နေရာတွင် အစားထိုးရန် ရွေးချယ်ခံခဲ့ရသည့် တပည့်တော်ကြီးအဖြစ် အမှတ်ရကြသူဖြစ်ပါသည်။ မူလတပည့်တော်ကြီး (၁၂) ပါးစာရင်းတွင် အစဦးစွာက မပါဝင်ခဲ့သော်လည်း၊ သူသည် သခင်ခရစ်တော် အမှုတော်ဆောင်စဉ်ကာလတစ်လျှောက်လုံးတွင် သခင်ဘုရားနောက်သို့ တစိုက်မတ်မတ် လိုက်ပါခဲ့သူဖြစ်ပြီး သခင်ဘုရား၏ ရှင်ပြန်ထမြောက်ခြင်းကိုလည်း ကိုယ်တိုင်ကိုယ်ကျ မျက်မြင်တွေ့ရှိခဲ့သည့် သစ္စာရှိသော တပည့်သားတစ်ဦး ဖြစ်ပါသည်။
အသင်းတော်၏ရှေးဦးကာလများတွင် တပည့်တော်ကြီးများသည် သစ္စာဖောက်မှုနှင့် ဆုံးရှုံးမှုများကြောင့် စိတ်နှလုံးထိခိုက် နာကျင်နေရကြရသည်။ ထိုအချိန်တွင် ဘုရားသခင်သည် တိတ်ဆိတ်ငြိမ်သက်စွာဖြင့် ထိုလစ်လပ်နေသော နေရာတွင် ရှင်မဿိကို အစားထိုးရွေးချယ်တ‌င်မြှောက်ပေးခဲ့ပါသည်။ သူ၏ ရွေးကောက်တင်မြှောက်ခံရတော်မူခြင်းသည် ကျွန်ုပ်တို့အား သင်ခန်းစာတစ်ခု ပေးနေပါသည်။ ၎င်းမှာ သစ္စာရှိခြင်းနှင့် ယုံကြည်ခြင်းတို့သည် လူအများက အသိအမှတ်မပြုမီ အချိန်အတော်ကြာကတည်းကပင် တိတ်ဆိတ်စွာဖြင့် ပျိုးထောင်တည်ဆောက်ထားနှင့်ပြီးသော အရာများပင်ဖြစ်ကြောင်း ဖြစ်ပါသည်။
အသင်းတော်၏ အစဉ်အလာများအရ ရှင်မဿိသည် ညှဉ်းပန်းနှိပ်စက်မှုများ ပြင်းထန်နေသည့်ကာလများ၌ပင် ဧဝံဂေလိတရားတော်ကို ရဲရဲဝံ့ဝံ့ ဆက်လက်ဟောပြောခဲ့ပြီး နောက်ဆုံးတွင် ယုံကြည်ခြင်းတရားအတွက် အသက်ပေးလှူခဲ့သော ဓမ္မအာဇာနည်တစ်ယောက်ဖြစ်ပါသည်။
ရှင်မဿိ၏ ဘဝအသက်တာသည် ကျွန်ုပ်တို့အား ဘုရားသခင်၏ရွေးကောက်တော်မူခြင်းကိုခံရသူများသည် အမြဲတမ်းထင်ရှားကျော်ကြားကြသူများ မဟုတ်ကြဘဲ၊ ယုံကြည်ခြင်းတရား၌ ပြည့်ဝသောသူများဖြစ်ကြသည်ကို ဖော်ပြနေပါသည်။

"တပည့်တော်ကြီး ရှင်မဿိ၊ ကျွန်ုပ်တို့အား ခက်ခဲသောအချိန်များတွင် သစ္စာရှိရန်၊ မိမိတို့၏ ယုံကြည်ချက်၌ ခိုင်မြဲရန်နှင့် ဘုရားသခင်၏ ခေါ်တော်မူသံရောက်လာသည့် အချိန်တိုင်းတွင် အသင့်ရှိနေစေရန် ခွန်အားပေး လမ်းညွှန်ပေးတော်မူပါ။"
အာမင်။

12/05/2026

ဖာတီမာမယ်တော်ပွဲနေ့
Feast Day of Our Lady of Fatima

မေလ (၁၃) ရက်၊ ၂၀၂၆။

မေလ (၁၃) ရက်နေ့သည် အမိမယ်တော် ဖာတီမာမြို၌ သိုးထိန်းကလေးများထံ ထင်ရှားပြခဲ့သော ကျေးဇူးတော်နေ့ထူးနေ့မြတ် ဖြစ်ပါသည်။

၁၉၁၇ ခုနှစ်၊ မေလ (၁၃) ရက်နေ့တွင် ပေါ်တူဂီနိုင်ငံ၊ ဖာတီမာရွာလေးရှိ သိုးထိန်းကလေး (၃) ဦးဖြစ်သော လူစီယား၊ ဖရန်စစ္စကိုနှင့် ဂျာစင်းတာတိုရှေ့မှောက်၌ အမိမယ်တော်သည် ပထမဆုံးအကြိမ် စတင်ထင်ရှားပြခဲ့ရာမှ ဖာတီမာမယ်တော်ပွဲနေ့ ဟူ၍ဖြစ်ပေါ်လာခဲ့သည်။

"မာရိယား" ဟူသောအမည်သည် "ကျေးဇူးတော်နှင့် ပြည့်စုံခြင်း" ဟု အဓိပ္ပာယ်ရပါသည်။ မယ်တော်၏ ရိုးသားဖြူစင်ခြင်း၊ နှိမ့်ချခြင်းနှင့် ဘုရားရှင်အပေါ် ထားရှိသော ယုံကြည်ခြင်းများကို အတုယူရင်း ကျွန်ုပ်တို၏ ခရစ်ယာန်အသက်တာကို ပြည့်ဝစွာ နေထိုင်ကြပါစို။

"ငြိမ်းချမ်းခြင်း၏ဘုရင်မ... ကျွန်ုပ်တို့ဖိုငှာ ဆုတောင်းပေးတော်မူပါ။" 🙏🕯
အာမင်။

09/05/2026

အမေများနေ့
[Mothers' Day]

မေလ (၁၀)ရက်၊ ၂၀၂၆။

နှစ်စဉ် မေလ၏ ဒုတိယအပတ် တနင်္ဂနွေနေ့တိုင်းသည် ကမ္ဘာတဝန်းလုံးရှိ မိခင်များ၏ မေတ္တာနှင့် ဂုဏ်ကျေးဇူးကို အထူးတလည် အောက်မေ့ဂုဏ်ပြုသော နေ့ရက်ဖြစ်ပါသည်။

ယနေ့ မေလ (၁၀)ရက်နေ့တွင် ကျရောက်သော "အမေများနေ့" အားအမှူးထား၍ ကမ္ဘာတဝန်းလုံးရှိ မိခင်များအားလုံး ကိုယ်စိတ်နှစ်ဖြာ ကျန်းမာချမ်းသာကြပါစေကြောင်းနှင့် ဘုရားရှင်၏ ကောင်းကြီးမင်္ဂလာများ ခံစားရပါစေကြောင်း ကောင်းသောသိုးထိန်းမိသားစုမှ လှိုက်လှဲစွာ ဂုဏ်ပြုဆုမွန်ကောင်း တောင်းအပ်ပါသည်။

Good Shepherd Myanmar

25/05/2026

24/05/2026

22/05/2026

22/05/2026

18/05/2026

17/05/2026

15/05/2026

14/05/2026

13/05/2026

12/05/2026

09/05/2026

Address

Telephone

Website

Alerts

Contact The Place Of Worship

Shortcuts

Share

Category