http://www.goodshepherdmyanmar.org/

Good Shepherd Myanmar, Bogyoke Aung San Street, Yangon (2026)

26/08/2026

စိန့်မော်နီကား (St. Monica) ၏ ပွဲနေ့
ဩဂုတ်လ (၂၇) ရက်၊ ၂၀၂၆။

“ကျွန်ုပ်တို့သည် မိမိချစ်ရသောသူများအတွက် ဆုတောင်းခြင်းကို ဘယ်လောက်ကြာကြာ ဇွဲမလျှော့ဘဲ လုပ်ဆောင်နိုင်ကြပါသလဲ?” 🌿

နှစ်စဉ် ဩဂုတ်လ (၂၇) ရက်နေ့တွင် ကက်သလစ်အသင်းတော်သည် ယုံကြည်ခြင်း၊ စိတ်ရှည်ခြင်းနှင့် ဇွဲမလျှော့ဘဲ ဘုရားသခင်ထံတော်၌ ဆုတောင်းခဲ့သူ St. Monica ၏ ပွဲနေ့ကို ဂုဏ်ပြုကျင်းပပါသည်။ သူမသည် အထူးသဖြင့် မိခင်များအတွက် ယုံကြည်ခြင်းနှင့် မိသားစုအတွက် မလျော့သောဇွဲဖြင့် ဆုတောင်းခြင်း၏ စံနမူနာတစ်ရပ်အဖြစ် အမှတ်ရခံရသူ ဖြစ်ပါသည်။

St. Monica သည် မြောက်အာဖရိကရှိ Tagaste တွင် ခရစ်ယာန်မိသားစုမှ မွေးဖွားခဲ့ပြီး Patricius အမည်ရှိ ခရစ်ယာန်မဟုတ်သူနှင့် လက်ထပ်ခဲ့ပါသည်။ ခင်ပွန်း၏ ခက်ထန်သောစိတ်နေစိတ်ထားနှင့် မိသားစုဘဝအတွင်း ကြုံတွေ့ရသော အခက်အခဲများကြားတွင် သူမသည် စိတ်ရှည်ခြင်း၊ မေတ္တာနှင့် ယုံကြည်ခြင်းတို့ဖြင့် အသက်ရှင်ခဲ့ပြီး ယင်းအမှုတို့ကြောင့် ခင်ပွန်းသည်လည်း မသေဆုံးမီတွင် ခရစ်ယာန်ယုံကြည်ခြင်းကို လက်ခံခဲ့ပါသည်။

သို့သော် သူမ၏ အကြီးမားဆုံး စိုးရိမ်ပူပန်မှုမှာ သားဖြစ်သူ Augustine ဖြစ်သည်။ St. Monica သည် နှစ်ပေါင်းများစွာ မလျော့သောဇွဲဖြင့် အယူမှားများဖြင့် ဘုရားသခင်နှင့် ဝေးကွာနေခဲ့သော Augustine အတွက် ဆုတောင်းခဲ့သည်။ နောက်ဆုံး၌ Milan မြို့ရှိ Bishop St. Ambrose နှင့်တွေ့ဆုံမှုအပြီးတွင် Augustine ၏စိတ်နှလုံးသားသည် ပြောင်းလဲလာခဲ့သည်။ ထို့နောက် သူသည် ဘုရားသခင်ကို ယုံကြည်လာခဲ့ပြီး အေဒီ ၃၈၇ ခုနှစ်တွင် ဆေးကြောခြင်းခံယူခဲ့ပါသည်။ နောင်တွင် Augustine သည် ဆရာတော်တစ်ပါး၊ အသင်းတော်၏ အထင်ကရ သူတော်စင်တပါးနှင့် Doctor of the Church ဖြစ်လာခဲ့ပါသည်။

St. Monica ၏ အသက်တာသည် မိမိချစ်မြတ်နိုးရသူများအတွက် ဆုတောင်းပေးခြင်း၊ စိတ်ရှည်စွာ စောင့်ဆိုင်းခြင်းနှင့် ဘုရားသခင်၏ ကရုဏာတော်ကို ယုံကြည်ကိုးစားခြင်းတို့၏ သက်သေခံချက် ဖြစ်ပါသည်။ သူမ၏ သားဖြစ်သူ St. Augustine ကိုယ်တိုင်သည်လည်း မိခင်၏ ယုံကြည်ခြင်း၊ ဆုတောင်းခြင်းနှင့် ခိုင်မာသော ယုံကြည်ခြင်းအသက်တာကို သူ၏ ကိုယ်တိုင်ဖြောင့်ဆိုဝန်ခံချက် (Confessions) တွင်ရေးသားခဲ့ပါသည်။

ယနေ့ St. Monica ၏ ပွဲနေ့တွင် မိသားစုနှင့် မိမိချစ်ရသူများအတွက် ဆုတောင်းပေးနေသူတိုင်း သူမ၏ ဇွဲနှင့် ယုံကြည်ခြင်းမှ ခွန်အား ယူနိုင်ကြပါစေ။ ကျွန်ုပ်တို့၏ ဆုတောင်းချက်များသည် ချက်ချင်းအဖြေရမလာသည့်အခါတွင်လည်း စိတ်မပျက် အားမလျော့ဘဲ ဘုရားသခင်၏ ကရုဏာတော်ကို ယုံကြည်ကာ ဆက်လက်ဆုတောင်းနိုင်ကြပါစေ။

St. Monica၊ ကျွန်ုပ်တို့အဖို့ငှာ ဆုတောင်းပေးတော်မူပါ။ အာမင်။

ယနေ့၌ ပွဲနေ့ကျရောက်သော Sr. Monica (RGS) အတွက်အထူးသတိရ ဆုတောင်းပေးကြပါစို့။

23/08/2026

တမန်တော်ကြီး St. Bartholomew ၏ ပွဲနေ့
ဩဂုတ်လ (၂၄) ရက်၊ ၂၀၂၆။

နှစ်စဉ် ဩဂုတ်လ (၂၄) ရက်နေ့တွင် ကက်သလစ်အသင်းတော်သည် သခင်ယေဇူးခရစ်တော်၏ တမန်တော် (၁၂) ပါးအနက် တစ်ပါးဖြစ်သော St. Bartholomew ၏ ပွဲနေ့ကို ကျင်းပပါသည်။ သူသည် ခရစ်တော်ထံမှ ခေါ်တော်မူခြင်းကို ခံယူခဲ့ပြီး ဧဝံဂေလိတရားကို သက်သေခံခဲ့သော တမန်တော်တစ်ပါး ဖြစ်ပါသည်။

ဓမ္မသစ်ကျမ်းတွင် St. Bartholomew ၏ အသက်တာနှင့်ပတ်သက်သော အချက်အလက်များကို အနည်းငယ်သာ တွေ့ရပါသည်။ သို့သော် သခင်ယေဇူးက သူ့အား တမန်တော်တစ်ပါးအဖြစ် ရွေးချယ်ခဲ့ပါသည်။ သခင်ခရစ်တော်၏ ရှင်ပြန်ထမြောက်ခြင်းနှင့် ကောင်းကင်ဘုံသို့ တက်ကြွခြင်းတို့ပြီးနောက်တွင် တမန်တော်များအား အပ်နှင်းခဲ့သော ဧဝံဂေလိတရား ပြန့်ပွားရေးလုပ်ငန်းတွင် ပါဝင်ခဲ့ပါသည်။

ရှေးခရစ်ယာန်အစဉ်အလာများအရ St. Bartholomew သည် ခရစ်တော်၏ သတင်းကောင်းကို ဒေသအများအပြားသို့ သွားရောက်ဟောပြောခဲ့ပြီး၊ အထူးသဖြင့် Armenia နိုင်ငံနှင့် သူ၏ သာသနာပြုလုပ်ငန်းကို ဆက်စပ်မှတ်ယူကြပါသည်။ သူသည် ဧဝံဂေလိတရားအတွက် နှိပ်စက်ညှဉ်းပန်းမှုကို ရင်ဆိုင်ခဲ့ရပြီး ယုံကြည်ခြင်းအတွက် အသက်ပေးခဲ့သည်ဟု ခရစ်ယာန်အစဉ်အလာများတွင် မှတ်တမ်းတင်ထားပါသည်။

ယနေ့၌ တမန်တော်ကြီး St. Bartholomew ၏ ပွဲနေ့ကို အကြောင်းပြု၍ ကျွန်ုပ်တို့သည် အခက်အခဲများနှင့် ဆန့်ကျင်မှုများကြားတွင် ခရစ်တော်အပေါ် သစ္စာရှိစွာ ရပ်တည်ပြီး၊ မိမိတို့၏ နေ့စဉ်ဘဝတွင် မေတ္တာ၊ ယုံကြည်ခြင်းနှင့် အမှန်တရားအတွက် သက်သေခံနိုင်ကြပါစေ။

St. Bartholomew၊ ကျွန်ုပ်တို့အဖို့ငှာ ဆုတောင်းပေးတော်မူပါ။ အာမင်။

22/08/2026

မာရီးယားဘုရင်မပွဲနေ့ | The Feast of the Queenship of Mary
ဩဂုတ်လ (၂၂) ရက်၊ ၂၀၂၆။

“မာရီးယားကို ဘာကြောင့် ဘုရင်မဟု ခေါ်ဆိုကြပါသလဲ?” 👑🌿

နှစ်စဉ် ဩဂုတ်လ (၂၂) ရက်နေ့တွင် ကက်သလစ်အသင်းတော်သည် မာရီးယားဘုရင်မပွဲနေ့ကို ကျင်းပပါသည်။ ဤပွဲနေ့ကို ပုပ်ရဟန်းမင်းကြီး Pius XII က ၁၉၅၄ ခုနှစ်တွင် Ad Caeli Reginam စာချွန်တော်ဖြင့် သတ်မှတ်ခဲ့ပြီး၊ နောက်ပိုင်းတွင် ဩဂုတ်လ (၂၂) ရက်နေ့သို့ ပြောင်းလဲသတ်မှတ်ခဲ့ပါသည်။

သမ္မာကျမ်းစာတွင် ကောင်းကင်တမန် ဂါဗြီအဲလ်က မာရီးယား၏ သားတော်သည် ဒါဝိဒ်၏ ထီးနန်းကို ရရှိ၍ ထာဝရအုပ်စိုးမည့်သူ ဖြစ်ကြောင်း ပြောကြားခဲ့ပါသည်။ အဲလိဇဘက်ကလည်း မာရီးယားကို “ကျွန်ုပ်၏ သခင်၏ မိခင်” ဟု ခေါ်ဆိုခဲ့ပါသည်။

ထို့ကြောင့် မာရီးယား၏ ဘုရင်မဂုဏ်သည် သူမ၏သားတော် ယေဇူးခရစ်တော်၏ ဘုရင်ဖြစ်ခြင်းနှင့် ဆက်နွယ်နေပါသည်။ မာရီးယားသည် ဘုရားသခင်၏ အလိုတော်ကို နှိမ့်ချစွာ လက်ခံခဲ့ပြီး ခရစ်တော်၏ မိခင်အဖြစ် သစ္စာရှိစွာ အသက်ရှင်ခဲ့သူ ဖြစ်ပါသည်။

ယနေ့ မာရီးယားထံမှ နှိမ့်ချခြင်း၊ သစ္စာရှိခြင်းနှင့် မေတ္တာဖြင့် အစေခံခြင်းတို့ကို သင်ယူကြပါစို့။ အခက်အခဲများကြားတွင်လည်း ဘုရားသခင်ကို ယုံကြည်ပြီး အလိုတော်အတိုင်း လျှောက်လှမ်းနိုင်ကြပါစေ။

အို ကောင်းကင်ဘုံ၏ဘုရင်မ၊ ကျွန်ုပ်တို့အဖို့ ငှာ ဆုတောင်းပေးတော်မူပါ။
အာမင်။

20/08/2026

"I can do things you cannot; you can do things I cannot; together
we can do great things." _ Mother Teresa

ဘုရားသခင်က လူတိုင်းကို မတူညီတဲ့ အရည်အချင်းတွေနဲ့ ကျေးဇူးတော်တွေကို ပေးထားပါတယ်။
ကိုယ်မလုပ်နိုင်တဲ့အရာကို သူလုပ်နိုင်တယ်။ သူမလုပ်နိုင်တဲ့အရာကို ကိုယ်လုပ်နိုင်တယ်။ ဒါကြောင့် တစ်ယောက်ရဲ့အားနည်းချက်ကို တစ်ယောက်က ဖြည့်ပေးပြီး တစ်ယောက်ရဲ့အားသာချက်ကို တစ်ယောက်က အားပေးနိုင်ပါတယ်။
အတူတူလက်တွဲတဲ့အခါ ကိုယ်တစ်ယောက်တည်း မလုပ်နိုင်တဲ့အရာတွေကိုတောင် ကြီးမားတဲ့ အရာတွေအဖြစ် အကောင်အထည်ဖော် လုပ်ဆောင်နိုင်မှာ ဖြစ်ပါတယ်။

19/08/2026

စိန့်ဂျွန်ယုဒ်(စ်)၏ ပွဲနေ့ ကျေးဇူးတင်မစ္ဆားတရားတော်မြတ်
ဩဂုတ်လ (၁၉) ရက်၊ ၂၀၂၆ ခုနှစ်။

ယနေ့ ဩဂုတ်လ (၁၉) ရက်နေ့တွင် ကောင်းသောသိုးထိန်းသီလရှင်အသင်းဂိုဏ်း၏ ဝိညာဉ်ရေးဖခင် စိန့်ဂျွန်ယုဒ်(စ်) ၏ ပွဲနေ့၌ ကျေးဇူးတင်မစ္ဆားတရားတော်မြတ်ကို ကောင်းသောသိုးထိန်းသီလရှင်ကျောင်း၊ ရန်ကုန်မြို့၌ ကျင်းပပြုလုပ်ခဲ့ပါသည်။
ကျေးဇူးတင်မစ္ဆားတရားတော်မြတ်ကို ရန်ကုန်ဇုန်မှူး Rev. Fr. Dominic Thet Tin၊ St. John မောင်‌ထောလေး ကျောင်းထိုင်ဘုန်းတော်ကြီး Fr. Nicholas Thein Aung နှင့် ပုသိမ်သာသနာမှ Fr. Steven Tin Moe တို့မှ ပူဇော်ပေးခဲ့ကြပါသည်။

စိန့်ဂျွန်ယုဒ်(စ်) သည် ဘုရားသခင်၏ မေတ္တာနှင့် သနားခြင်းကရုဏာတော်ကို လူသားများထံ သက်သေခံဟောပြောခဲ့သူဖြစ်ပြီး၊ ကောင်းသောသိုးထိန်းသီလရှင်အသင်းဂိုဏ်းအတွက် ဝိညာဉ်ရေးအမွေအနှစ်နှင့် စံနမူနာကောင်းများကို ချန်ထားပေးခဲ့သူ ဖြစ်ပါသည်။

ဤယနေ့၌ စိန့်ဂျွန်ယုဒ်(စ်)၏ ကြားဝင်ဆုတောင်းခြင်းအားဖြင့် ကောင်းသောသိုးထိန်းသီလရှင်များအားလုံးနှင့် ကောင်းသောသိုးထိန်းသာသနာ့လုပ်ငန်းများကို ဆောင်ရွက်နေကြသူများအပေါ်၌ဘုရားရှင်၏ ကျေးဇူးတော်နှင့် ကောင်းချီးမင်္ဂလာများ အစဉ်သက်ရောက်ပါစေ။
စိန့်ဂျွန်ယုဒ်(စ်)၊ ကျွန်ုပ်တို့အဖို့ငှာ ဆုတောင်းပေးတော်မူပါ။
အာမင်။

18/08/2026

စိန့်ဂျွန်ယုဒ်(စ်)၏ ပွဲနေ့
ဩဂုတ်လ (၁၉) ရက်၊ ၂၀၂၆။

နှစ်စဉ် ဩဂုတ်လ (၁၉) ရက်နေ့တွင် ကောင်းသောသိုးထိန်းသီလရှင်များသည် မိမိတို့၏ ဝိညာဉ်ရေးဖခင် စိန့်ဂျွန်ယုဒ်(စ်) (St. John Eudes) ၏ ပွဲနေ့ကို ဂုဏ်ပြုကျင်းပကြပါသည်။

စိန့်ဂျွန်ယုဒ်(စ်)သည် ပြင်သစ်နိုင်ငံမှ ထင်ရှားသော သာသနာပြုရဟန်းတစ်ပါးဖြစ်ပြီး Our Lady of Charity of Refuge သီလရှင်အသင်းဂိုဏ်းနှင့် The Congregation of Jesus and Mary (Eudists) ရဟန်းအသင်းဂိုဏ်းကို တည်ထောင်ခဲ့သူ ဖြစ်ပါသည်။ ထို့အပြင် ယေဇူးရွှေနှလုံးတော်နှင့် မယ်တော်၏ နှလုံးတော် အပေါ် သဒ္ဓါကြည်ညိုမှုကို အထူးအားပေးယုံကြည်ခဲ့သူတစ်ဦးလည်း ဖြစ်ပါသည်။

ဂျွန်ယုဒ်(စ်)ကို ၁၆၀၁ ခုနှစ်၊ နိုဝင်ဘာလ (၁၄) ရက်နေ့တွင် ပြင်သစ်နိုင်ငံ Normandy ဒေသရှိ Ri ကျေးရွာအနီးတွင် တောင်သူလယ်သမားမိသားစု၌ မွေးဖွားခဲ့ပါသည်။ အသက် (၁၄) နှစ်အရွယ်တွင် Caen မြို့ရှိ Jesuit College ၌ ပညာဆည်းပူးခဲ့ပြီး ၁၆၂၃ ခုနှစ်တွင် The Oratory of Jesus အသင်းဂိုဏ်းသို့ ဝင်ရောက်ခဲ့ပါသည်။ ၁၆၂၅ ခုနှစ်၊ အသက် (၂၄) နှစ်တွင် ရဟန်းသိက္ခာခံယူခဲ့ပြီး မကြာမီ နော်မန်ဒီဒေသ၌ ပလိပ်ရောဂါကပ်ဘေး ကျရောက်သောအခါ မိမိအသက်အန္တရာယ်ကိုပင် မငဲ့ကွက်ဘဲ နေမကောင်းသူများနှင့် ဒုက္ခရောက်နေသူများကို ကူညီဆောင်ရွက်ပေးခဲ့ပါသည်။ ထို့နောက် ပြင်သစ်နိုင်ငံတစ်ဝှမ်း၊ အထူးသဖြင့် Normandy ဒေသတွင် သာသနာပြုလုပ်ငန်းအဖြစ် တရားဒေသနာများ လှည့်လည်ဟောကြားရင်း ထင်ပေါ်ကျော်ကြားလာခဲ့ပါသည်။

၁၆၄၁ ခုနှစ်တွင် အကူအညီလိုအပ်နေသော အမျိုးသမီးများနှင့် ဘဝသစ်ပြန်လည်စတင်လိုသော အမျိုးသမီးများကို ကူညီပေးရန် Our Lady of Charity သီလရှင်အသင်းကို တည်ထောင်ခဲ့ပါသည်။ ၁၆၄၃ ခုနှစ်တွင် The Oratory of Jesus အသင်းမှ ထွက်ပြီး The Congregation of Jesus and Mary (Eudists) အသင်းဂိုဏ်းကို တည်ထောင်ခဲ့ပါသည်။ ထိုအသင်းဂိုဏ်း၏ အဓိကလုပ်ငန်းတစ်ရပ်မှာ ရဟန်းဖြစ်သင်ကျောင်းများကို ဖွင့်လှစ်ကာ ရဟန်းလောင်းများ၏ ပညာရေးနှင့် ဝိညာဉ်ရေးဘဝကို မြှင့်တင်ပေးပြီး ထိရောက်သော သာသနာပြုများအဖြစ် ပြင်ဆင်ပေးခြင်း ဖြစ်ပါသည်။

ဘုန်းတော်ကြီး ဂျွန်ယုဒ်(စ်)သည် ယေဇူးရွှေနှလုံးတော်နှင့် မယ်တော်၏ နှလုံးတော် ကို သဒ္ဓါကြည်ညိုရန် အစဉ်ဟောပြောသွန်သင်ခဲ့သူ ဖြစ်ပါသည်။ ထို့အပြင် ယေဇူးခရစ်တော်၏ နှလုံးတော်နှင့် မယ်တော်မာရီးယား၏ နှလုံးတော်၊ မင်္ဂလာရှိသော မစ္ဆားတရားတော်မြတ်နှင့် Divine Office အတွက် ဆုတောင်းမေတ္တာများကို ရေးသားခဲ့ပြီး၊ Sacred Hearts အပေါ် ယုံကြည်ကိုးစားခြင်းနှင့် ဆုတောင်းခြင်းကို အားပေးခဲ့ပါသည်။

စိန့်ဂျွန်ယုဒ်(စ်)သည် ၁၆၈၀ ခုနှစ်၊ ဩဂုတ်လ (၁၉) ရက်နေ့တွင် သက်တော် (၇၈) နှစ်၌ Caen မြို့တွင် ကွယ်လွန်ခဲ့ပါသည်။ အသင်းတော်က သူ၏ သန့်ရှင်းမြင့်မြတ်သော အသက်တာနှင့် ထူးခြားသော ပါရမီများကို အဆင့်ဆင့် အသိအမှတ်ပြုခဲ့ပါသည်။ ၁၉၀၃ ခုနှစ်၊ ဇန်နဝါရီလ (၆) ရက်နေ့တွင် Pope Leo XIII က သူ၏ ထူးခြားသော ပါရမီများနှင့် သူတော်စင်ဘဝအတွက် အသိအမှတ်ပြုမှုကို ကြေညာခဲ့ပြီး၊ ၁၉၀၈ ခုနှစ်၊ မေလ (၃) ရက်နေ့တွင် Pope Pius X က သူနှင့်သက်ဆိုင်သော အံ့ဖွယ်ဖြစ်ရပ်များကို အတည်ပြုခဲ့ပါသည်။ ထို့နောက် ၁၉၀၉ ခုနှစ်၊ ဧပြီလ (၂၅) ရက်နေ့တွင် Pope Pius X က သူတော်စင်အဖြစ် အဆင့်မြှင့်တင်ရန် မတိုင်မီ သူတော်သူမြတ်တင်မြောက်ခဲ့ပြီး၊ ၁၉၂၅ ခုနှစ်၊ မေလ (၃၁) ရက်နေ့တွင် Pope Pius XI က စိန့်ပီတာ ရင်ပြင်၌ ရဟန္တာအဖြစ် တင်မြှောက်ခဲ့ပါသည်။

ယနေ့တွင် စိန့်ဂျွန်ယုဒ်(စ်)ကို သူ၏ သာသနာပြုခြင်း၌ စိတ်အားထက်သန်မှု၊ ကရုဏာ၊ အကူအညီလိုအပ်သူများအပေါ် မေတ္တာထားခြင်း၊ ရဟန်းများ၏ ပညာရေးနှင့် ဝိညာဉ်ရေးဖွံ့ဖြိုးမှုအပေါ် အလေးထားခြင်း၊ ယေဇူးရွှေနှလုံးတော်နှင့် မယ်တော်၏ နှလုံးတော်အပေါ် နက်ရှိုင်းသော သဒ္ဓါကြည်ညိုမှု တို့ကြောင့် အမှတ်ရကြပါသည်။

အထူးသဖြင့် ကောင်းသောသိုးထိန်းသီလရှင်များအတွက် Our Lady of Charity of Refuge ၏ အမွေအနှစ်သည် စိန့်ဂျွန်ယုဒ်(စ်)၏ အသက်တာနှင့် နက်ရှိုင်းစွာ ဆက်နွယ်နေပါသည်။ သူ၏ အသက်တာက ကျွန်ုပ်တို့အား အခက်အခဲများကြားတွင် မေတ္တာနှင့် ကရုဏာကို လက်တွေ့ပြသရန်၊ အကူအညီလိုအပ်နေသူများကို မျှော်လင့်ချက်ပြန်လည်ရရှိစေရန် ကူညီပေးရန်နှင့် ခရစ်တော်၏ နှလုံးတော်မှ ထွက်ပေါ်လာသော မေတ္တာကို မိမိတို့၏ အသက်တာဖြင့် ဆက်လက်မျှဝေရန် ဖိတ်ခေါ်နေပါသည်။

စိန့်ဂျွန်ယုဒ်(စ်)၊ ကျွန်ုပ်တို့အဖို့ငှာ ဆုတောင်းပေးတော်မူပါ။ အာမင်။

17/08/2026

ကောင်းသိုးထိန်းသီလရှင် အသင်းဂိုဏ်း၏ ဝိညာဉ်ရေးဖခင် စိန့်ဂျွန်ယုဒ်(စ်)၏ အထုပ္ပတ္တိအကျဉ်း
ပွဲနေ့ - ဩဂုတ်လ (၁၉) ရက်။

15/08/2026

Child Protection Awareness Session
💥💥💥
မော်လမြိုင်သာသနာ၊ မြိတ်ဇုံတာဝန်ခံဘုန်းတော်ကြီး Fr.Hubert Myo Thant Oo၏ ဖိတ်ကြားချက်ဖြင့် ကောင်းသောသိုးထိန်းသီလရှင်များဖြစ်ကြသော Sr.Jennifer Kay Thi Kyaw, Sr.Rosaline Lay Khine နှင့် Sr.Teresa Sao Khamတို့မှ ကလေးသူငယ်များအတွက် ကလေးသူငယ်ကာကွယ်စောင့်ရှောက်ခြင်း ပညာပေးသင်တန်းကို မြိတ်မြို့ရှိ ကလွင်ကျောင်းခန်းမတွင် သြဂုတ်လ (၈) ရက်နေ့၌ ပြုလုပ်ပေးခဲ့ပါသည်။
ကလေးငယ် (၁၈၂)ဦးတက်ရောက်ခဲ့ကြပြီး၊ အပြန်အလှန်ဝေငှမှုနှင့် ဆွေးနွေးညှိုနှိုင်းနိုင်ခြင်း၊ အချင်းချင်းကြား၌တစ်ဦးနှင့်တစ်ဦးလေးစားစွာပြုမူနေထိုင်နိုင်ရန် အခွင့်အရေးတစ်ရပ်ကို ဖန်တီးပေးနိုင်ခဲ့ပါသည်။
💥💥💥
ကလေးသူငယ်များ၏ဘဝလုံခြုံရေးနှင့် အနာဂတ်ကောင်းမွန်ရေးအတွက် အတူတကွ ဖန်တီးပေးကြပါစို့။

15/08/2026

မယ်တော်မာရီယာကောင်းကင်ဘုံသို့ ပင့်ဆောင်ခံရခြင်းပွဲနေ့။
ဩဂုတ်လ (၁၅)ရက်၊ ၂၀၂၆။

ယနေ့သည် အမိမယ်တော်မာရီယာ၏ ခန္ဓာနှင့် ဝိညာဉ်တို့သည် ကောင်းကင်ဘုံသို့ ဘုန်းကျက်သရေရှိစွာဖြင့် ပင့်ဆောင်ခြင်းခံရသော မင်္ဂလာရှိသောပွဲနေ့ဖြစ်ပါသည်။
အမိမယ်တော်သခင်မသည် ကျွန်ုပ်တို့အတွက် မျှော်လင့်ခြင်းနှင့် နှစ်သိမ့်ခြင်း၏ နိမိတ်လက္ခဏာဖြစ်ပါသည်။ ကျွန်ုပ်တို့၏ ဘဝခရီးလမ်းတွင် ကြုံတွေ့ရသော အခက်အခဲများနှင့် ဆင်းရဲဒုက္ခများသည် အဆုံးသတ်မဟုတ်ဘဲ ဘုရားသခင်နှင့်အတူ ထာဝရအသက်ရှင်ခြင်းသို့ ဦးတည်နေကြောင်း မာရီယာ၏ အသက်တာက ကျွန်ုပ်တို့ကို သတိပေးနေပါသည်။

ယနေ့၌ ကျွန်ုပ်တို့သည်
🔹 အခက်အခဲများကြားတွင်ပင် ဘုရားသခင်၏ ကျေးဇူးတော်များကို သတိရပြီး ကျေးဇူးတင်ကြပါစို့။
🔹 မိမိတို့၏ ဘဝနှင့် မိသားစုများအတွက် အပျိုစင်မာရီယာ၏ ကြားဝင်ဆုတောင်းခြင်းကို ယုံကြည်စွာ တောင်းခံကြပါစို့။
🔹 မျှော်လင့်ချက်မပျောက်ဘဲ ဘုရားသခင်ထံ ယုံကြည်ခြင်းကို ဆက်လက်အပ်နှံကြပါစို့။

အို ကောင်းကင်ဘုံသို့ ပင့်ဆောင်ခြင်းခံရသော မင်္ဂလာရှိသော အမိမယ်တော်မာရီယာသခင်မ၊ ကျွန်ုပ်တို့အတွက် ဆုတောင်းပေးတော်မူပါ။
အာမင်။
🎈🎈🎈
ယနေ့၌ ပွဲနေ့ကျရောက်သော Sr. Rebecca Kay Thi Oo (RGS) - Provincial Leader နှင့် Sr. Assumpta Shwe (RGS) - Local Leader တို့အား ဆုတောင်းပေးကြပါစို့။

14/08/2026

ပြင်းထန်ဝမ်းပျက်ဝမ်းလျှောရောဂါ ကာကွယ်ရေး အသိပညာမျှဝေခြင်း
ဩဂုတ်လ (၁၄) ရက်၊ ၂၀၂၆။

မြန်မာနိုင်ငံအတွင်း လက်ရှိကြုံတွေ့နေရသော အရေးပေါ်အခြေအနေများနှင့် ကျန်းမာရေးဆိုင်ရာ စိန်ခေါ်မှုများအကြား ဝမ်းပျက်ဝမ်းလျှောရောဂါများကို ကာကွယ်နိုင်ရန် လိုအပ်သော အသိပညာများ ရရှိစေရန် ရည်ရွယ်၍ “ပြင်းထန်ဝမ်းပျက်ဝမ်းလျှောရောဂါ ကာကွယ်ခြင်း” ခေါင်းစဉ်ဖြင့် အသိပညာမျှဝေခြင်းအစီအစဉ်ကို ဩဂုတ်လ (၁၄) ရက်၊ ၂၀၂၆ ခုနှစ်တွင် ရန်ကုန်ကောင်းသောသိုးထိန်းသီလရှင်ကျောင်းရှိ ဧည့်ခန်း၌ ပြုလုပ်ခဲ့ပါသည်။

အဆိုပါ အသိပညာမျှဝေခြင်းအစီအစဉ်တွင် Dr. Valentina Soe Myint မှ ပြင်းထန်ဝမ်းပျက်ဝမ်းလျှောရောဂါ ဖြစ်ပွားနိုင်သည့် အခြေအနေများ၊ ရောဂါကာကွယ်နိုင်ရန် လိုက်နာသင့်သည့် ကျန်းမာရေးနှင့် သန့်ရှင်းရေးဆိုင်ရာ အလေ့အထများ၊ နေ့စဉ်ဘဝတွင် သတိပြုဆောင်ရွက်သင့်သည့် အချက်များကို အသိပညာမျှဝေပေးခဲ့ပါသည်။

ဤအသိပညာမျှဝေခြင်းမှတစ်ဆင့် မိမိတို့၏ ကျန်းမာရေးကို ပိုမိုဂရုစိုက်နိုင်ခြင်းနှင့်အတူ လုပ်ငန်းခွင်နှင့် မိမိတို့နှင့် ဆက်နွယ်နေသော လူမှုအသိုင်းအဝိုင်းအတွင်း ရောဂါကာကွယ်ရေးဆိုင်ရာ အသိပညာများကို ပြန်လည်မျှဝေကာ အရေးပေါ်အခြေအနေများတွင် ပိုမိုသတိရှိစွာ တုံ့ပြန်ဆောင်ရွက်နိုင်ရန် သိရှိနားလည်ခဲ့ပါသည်။

အရေးကြီးသော ကျန်းမာရေးဆိုင်ရာ အသိပညာများကို လာရောက်မျှဝေပေးခဲ့သော Dr. Valentina Soe Myint အား ကောင်းသောသိုးထိန်းမိသားစုမှ အထူးကျေးဇူးတင်ရှိပါသည်။

ဝမ်းပျက်ဝမ်းလျှောရောဂါနှင့် အခြားကျန်းမာရေးအခက်အခဲများကို ရင်ဆိုင်နေရသူများ၊ ရေဘေးနှင့် အခြားအရေးပေါ်အခြေအနေများကြောင့် ထိခိုက်ခံစားနေရသော မြန်မာနိုင်ငံသူ၊ မြန်မာနိုင်ငံသားများအားလုံး ဘေးကင်းကျန်းမာကြပါစေကြောင်း ဆုတောင်းမေတ္တာပို့သအပ်ပါသည်။
အခက်အခဲများကြားတွင် အချင်းချင်း မေတ္တာနှင့် ကရုဏာထား၍ လိုအပ်သူများကို ဆက်လက်ကူညီစောင့်ရှောက်နိုင်ကြပါစေ။
အာမင်။

Good Shepherd Myanmar

26/08/2026

23/08/2026

22/08/2026

20/08/2026

19/08/2026

18/08/2026

17/08/2026

15/08/2026

15/08/2026

14/08/2026

Address

Telephone

Website

Alerts

Contact The Place Of Worship

Shortcuts

Share

Category

Listing takedown request