https://www.facebook.com/107143934424391/

𝐏𝐚𝐮𝐥 𝐓𝐮𝐧𝐦𝐢𝐧 𝐌𝐢𝐧𝐢𝐬𝐭𝐫𝐲, Hlegu Township, Phaungyi, Mingohn, Yangon (2026)

01/05/2026

ကျွန်တော် ခရစ်တော် ကို စ ယုံကြည်ကတည်းက ယနေ့အချိန်ထိ ညတိုင်း မပျက်မကွက် ဆုတောင်းခဲ့တာ တခုရှိပါတယ်။ ကျွန်တော် ချမ်းသာဖို့ နာမည်ကြီးဖို့ မဟုတ်ခဲ့သလို ယုတ်စွအဆုံး ကျွန်တော် အချုပ်အနှောင်ထဲ မှာရှိနေချိန်မှာတောင် ကျွန်တော့်လွတ်မြောက်မှုအတွက် ဆုတောင်းဖို့ မေ့နေချိန်ရှိခဲ့ပါတယ်။ ဒါပေမယ့် အမေစု နဲ့ ဦးဝင်းမြင့် အပါအဝင် မတရားချုပ်နှောင်ခံထားရသူအပေါင်း ခြွင်းချက်မရှိ လွတ်မြောက်ဖို့ ကတော့ ဘယ်သောအခါမှ ဆုတောင်းဖို့ မမေ့ခဲ့ပါ။ ဘုရားသခင် အသက်ရှင်ပါတယ်။ ကျွန်တော်တို့ ဆုတောင်းသံကို အမြဲ နားစွင့်နေပါတယ်။ မယုံလည်း ဆုတောင်းကြည့်ပါ။ စမ်းသပ်ကြည့်ပါ။
ဘုရားသခင်နာမသာ၍ဘုန်းကြီးပါစေ။
ဟာလေလုယ
အာမင်

01/05/2026

ဘုရားသခင်၏ပြည့်စုံသောသတ်မှတ်ချက်

သောကြာနေ့ | မေလ (၁) ရက်

နေ့စဉ်ခွန်အားဖတ်ရန် ။ ။

ဖတ်ရန် ကမ္ဘာဦးကျမ်း ၁:၂၆-၃၁ | သမ္မာကျမ်းစာတစ်နှစ်တာ ၃ ရာ ၁၀-၁၁ နှင့် လု ၂၁:၂၀-၃၈

ထိုသို့ ဘုရားသခင်သည် မိမိပုံသဏ္ဌာန်နှင့်အညီ လူကို ဖန်ဆင်းတော်မူ၏။ ဘုရားသခင်၏ ပုံသဏ္ဌာန်တော်နှင့်အညီ လူယောကျ်ား လူမိန်းမကို ဖန်ဆင်းပြီးလျှင်...။ [ က ၁:၂၇ ]

၁၉၆၀ နှစ်များတွင် အမေရိကန်ပြည်ထောင်စု အစိုးရရုံးအချို့တွင် အသုံးပြုသည့် မင်ကလောင်တံ(ink pen)များကို သတ်မှတ်စံချိန်မီစွာ ကုမ္ပဏီက မထုတ်လုပ်ပေးနိုင်သဖြင့် “General Services Administration (အထွေထွေစီမံအုပ်ချုပ်ရေးဌာန)”က “NIB(National Industries for the Blind) (မျက်မမြင်လုပ်သားများစီမံခန့်ခွဲရေးဌာန)”အား ဘောပင် သန်း ၇၀ ထုတ်လုပ်ပေးရန် အလုပ်အပ်ခဲ့သည်။ NIB သည် ဘောပင်များကို မထုတ်လုပ်ဖူးသော်လည်း ထိုစိန်ခေါ်ချက်ကို လက်ခံပြီး၊ ၁၉၆၇ မှစ၍ မျက်မမြင် စက်ရုံအလုပ်သမားများသည် စစ်မှုထမ်းများ တွင်ကျယ်စွာ အသုံးပြုသော ထိုစာရေးကရိယာကို သတ်မှတ်စံချိန်အတိုင်း ထုတ်လုပ်ပေးခဲ့သည်။ ထိုဘောပင်များကို ပြောင်းပြန်ထား၍ ‌ရေးသားနိုင်သည်၊ မင်ရည်ကို တစ်မိုင်အရှည်ထိ အသုံးပြုနိုင်ပြီး ပြင်းထန်သော အပူချိန်ဒဏ်ကို ခံနိုင်ရည်ရှိပြီး မပျက်စီးပါ။

လူသားတစ်ယောက်စီသည် ဘုရားသခင်၏ပြည့်စုံသော သတ်မှတ်ချက်များဖြင့် ဖန်ဆင်းခြင်းခံရကြောင်း “ထိုသို့ ဘုရားသခင်သည် မိမိပုံသဏ္ဌာန်နှင့်အညီ ... လူယောကျ်ား မိန်းမကို ဖန်ဆင်းတော်မူ၏”ဟု (က ၁:၂၇)က ကျွန်ုပ်တို့ကို သတိပေးသည်။ ကျွန်ုပ်တို့ဖန်ဆင်းခံရပုံက ဘုရားသခင်၏သဘောတော်နှင့် သဘာဝကို ထင်ဟပ်စေသည်။ ဘုရားသခင်၏ ပုံသဏ္ဌာန်တော်နှင့်အညီ ဖန်ဆင်းခံရခြင်းက လူတိုင်းသည် လူ့ဂုဏ်သိက္ခာနှင့် တန်ဖိုးကို မွေးရာပါပိုင်ဆိုင်ထားခြင်းဟု ဆိုလိုသည်။ လူတစ်ဦးချင်းစီ၏ဘဝသည် ဘုရားသခင်၏ပုံသဏ္ဌာန်နှင့် တစ်သဏ္ဌာန်တည်း ဖန်ဆင်းခံထားရခြင်းနှင့် အစပြုထားသည်ဟု ဘုရားသခင်မိန့်တော်မူသည် (က ၁:၂၆)။ ဤသမ္မာတရားသည် လူသား၏ဂုဏ်သိက္ခာ၊ ဖြစ်တည်မှု၊ အခြားသူများနှင့်ဆက်ဆံရေးကို နားလည်စေသော အခြေခံအုတ်မြစ် ဖြစ်သည်။

ထိုဘောပင်များသည် အရေးကြီးသောအခန်းကဏ္ဍ၌ ရှိသကဲ့သို့ ကျွန်ုပ်တို့လည်း အ‌ရေးပါသည့် ကဏ္ဍ၌ ရှိနေသည်။ မိမိကိုယ်ကိုယ် အထင်မကြီးလောက်ဟု ခံစားရသော်လည်း ကျွန်ုပ်တို့တစ်ယောက်စီ၌ ဘုရားသခင်ဖန်ဆင်းထားသော ကိုယ်ပိုင် တန်ဖိုးနှင့် ရည်ရွယ်ချက်ရှိသည်။ ဖန်ဆင်းရှင်သည် ကျွန်ုပ်တို့ကို တန်ဖိုးထားပြီး၊ “အလွန်ကောင်း”သည်ဟု (က ၁:၃၁)၊ မိန့်မြွက်သည်ကို သိမှတ်လျက် မိမိ၏ဘဝကို ခံယူရှင်သန်နိုင်ပါစေသား။
စာရေးသူ မာဗင်ဝီလီယံ

ဘုရားသခင်၏ပုံသဏ္ဌာန်နှင့်အညီ ဖန်ဆင်းခံရသည့်အတွက် သင့်ဘဝကို သင်မည်သို့ ခံယူရှင်သန်သနည်း။ သင်၏ပုံရိပ်နှင့် ဖြစ်တည်မှုကို ဘုရားရှင်မည်သို့တည်ဆောက်ထားသနည်း။

ဖန်ဆင်းရှင်ဘုရားသခင်၊ ကျွန်ုပ်အား ကိုယ်တော်၏သဏ္ဌာန်တော်နှင့်အညီ ဖန်ဆင်းထားခြင်းအတွက် ကျေးဇူးတင်ပါ၏။

****************************************
အသက်တာကို ပြောင်းလဲပေးနိုင်စွမ်းရှိသည့် ဘုရားသခင်၏နှုတ်ကပတ်တော်မှ မိတ်ဆွေခွန်အားရရှိမည်ဟု ကျွန်ုပ်တို့မျှော်လင့်ပါသည်။ နေ့စဥ်ခွန်အားအမှုတော်လုပ်ငန်းအတွက် ဆုတောင်းပေးရန် မေတ္တာရပ်ခံပါသည်။ မိမိတတ်နိုင်သလို ထောက်ပံ့ကူညီလိုပါက ကျွန်ုပ်တို့ထံ ဆက်သွယ်နိုင်ပါသည်။ မိတ်ဆွေ၏အကူအညီအတွက် ကျွန်ုပ်တို့ အလွန်ဝမ်းမြောက် ကျေးဇူးတင်မည်ပင်။ ဘုရားသခင်၏ ကွယ်ကာစောင်မမှုအားဖြင့် မိတ်ဆွေ၏အသက်တာသည် လုံခြုံ၍အသီးပွင့်လန်းသောအသက်တာ ဖြစ်ပါစေသော်။

30/04/2026

ဘုရားသခင်၏လမ်းအတိုင်း လိုက်လျှောက်ပါ

ကြာသပတေးနေ့ | ဧပြီလ (၃၀) ရက်

နေ့စဉ်ခွန်အားဖတ်ရန် ။ ။

ဖတ်ရန် ဟဂ္ဂဲအနာဂတ္တိကျမ်း ၁:၁၊ ၅-၁၁ | သမ္မာကျမ်းစာတစ်နှစ်တာ
၃ ရာ ၈-၉ နှင့် လု ၂၁:၁-၁၉

ကောင်းကင်ဗိုလ်ခြေအရှင်ထာဝရဘုရားမိန့်တော်မူသည်ကား၊ ကိုယ်ကျင့်သောအကျင့်တို့ကို ဆင်ခြင်ကြလော့။ [ ဟဂ္ဂဲ ၁:၅ ]

ခန်န်(Ken) သည် သူ၏အဆောက်အအုံတွင် ရွှေ့ပြောင်းအလုပ်သမားများကို ရှောင်ခဲ့သည်။ သူတို့၏အကျင့်နှင့် ဘဝနေထိုင်ပုံက သူနှင့်အလွန်ခြားနားသဖြင့် သူ့စိတ်အနှောင့်အယှက် ဖြစ်ရသည်။ သို့သော် တစ်နေ့တွင် ခန်န် ဆုတောင်းနေစဉ် “သူတို့က မင်းနဲ့အိမ်နီးချင်းဖြစ်ခဲ့တာ နှစ်အတော်ကြာခဲ့ပြီ။ ဒါပေမယ့် သူတို့ကို တစ်ခါမျှ သတင်းကောင်း မင်းမဝေမျှခဲ့ဖူးဘူး။ သူတို့အပေါ်ထားတဲ့ မင်းရဲ့သဘောထားကို သေချာစဉ်းစားပါ”ဟူသော အတွေးတစ်ခုက ဝင်လာသည်။

ဘုရားသခင်သည် ဣသရေလလူတို့အား “ကိုယ်အကျင့်တို့ကို ဆင်ခြင်ကြလော့”(ဟဂ္ဂဲ ၁:၇)ဟု အလားတူ သတိပေးချက်နှင့် ထိပ်တိုက်တွေ့စေခဲ့ကြောင်း သမ္မာ ကျမ်းစာက ပြောထားသည်။ ဗာဗုလုန်တွင် ကျွန်ပြုဖမ်းခေါ်ခံရပြီးနောက် ကိုယ်တော်၏ လူများ ဗိမာန်တော်ကို ပြန်လည်တည်ဆောက်ရန် တာဝန်ဖြင့် ယေရုရှလင်သို့ ပြန်လာခဲ့သည်။ ဘုရားသခင်သည် ပေရသိရှင်ဘုရင် ကုရုမင်းကို နှိုးဆော်တော်မူသောအားဖြင့် (ဧဇ ၁:၁) အိမ်တော်ကို တည်ဆောက်ရမည်အကြောင်းနှင့် အလှူများကို မစရန် (:၂-၄) ဖြစ်သည်။ သို့သော် အုတ်မြစ်ချပြီးနောက် နှောင့်ယှက်မှုများ တိုးလာသည်(၄:၁-၅)။ ထို့ကြောင့် သူတို့သည် တည်ဆောက်ရေး စီမံကိန်းကို ဆက်မလုပ်နိုင်ဘဲ ၁၄ နှစ်မျှ လျစ်လျူရှုခဲ့သည်။

ပရောဖက်ဟဂ္ဂဲအားဖြင့် ဘုရားသခင်က “ကိုယ်အကျင့်တို့ကို ဆင်ခြင်ကြလော့။ ... ‘ငါ့အိမ်တော်မှာပျက်စီးယိုယွင်းလျက်နှင့် သင်တို့အသီးသီးသည် ကိုယ့်အိမ်ဖို့သာ အလုပ်များနေကြသောကြောင့်ဖြစ်၏’”(ဟဂ္ဂဲ ၁:၇၊ ၉-စံမီ) ဟု မိန့်တော်မူသည်။

“သင်တို့မည်သို့နေထိုင်အသက်ရှင်သည်ကို သေချာစွာ ဆင်ခြင်ပါ။ ငါပြုစေချင်သည်အရာကို သင်တို့ပြုသလား”ဟု ဘုရားသခင် ပြောနေခြင်းဖြစ်သည်။
ဘုရားသခင်သည် သူ၏လူများကို ဆုံးမသွန်သင်ခဲ့သည် (:၅-၁၁)။ သို့သော် သူတို့သည် ဆောက်လုပ်မှုလုပ်ငန်းစဉ်ကို ပြန်လည်စတင်သောအခါ ဘုရားသခင်က “ငါသည် သင်တို့နှင့်အတူရှိ၏၊ . . . မစိုးရိမ်ကြနှင့်” (၂:၄-၅)ဟု သူတို့ကို အားပေးခဲ့သည်။ ငါးနှစ်မပြည့်မီတွင် ဗိမာန်တော်သည် ပြီးစီးခဲ့သည်။
ကျွန်ုပ်တို့၏အသက်တာမည်သည့်ကဏ္ဍ၌ “ကိုယ်အကျင့်တို့ကို ဆင်ခြင်ရန်” လိုအပ်သနည်း။ ဘုရားသခင်၏ ပြုပြင်ပေးမှုကို လိုက်နာနိုင်အောင် လမ်းပြရန်၊ မစရန် တောင်းခံကြပါစို့။
စာရေးသူ Karen Huang

ဘုရားသခင်၏လမ်းက သင်နှင့် မည်သို့ကွာခြားသနည်း။ ကိုယ်တော်ကို အမှန်တကယ်နာခံရန် မည်သည်ကို သင်ပြောင်းလဲရန် လိုအပ်သနည်း။

ချစ်သောဘုရားသခင်၊ ကိုယ်တော်၏လမ်းကို လိုက်လျှောက်ရန် ကျွန်ုပ်အား မစတော်မူပါ။

****************************************
အသက်တာကို ပြောင်းလဲပေးနိုင်စွမ်းရှိသည့် ဘုရားသခင်၏နှုတ်ကပတ်တော်မှ မိတ်ဆွေခွန်အားရရှိမည်ဟု ကျွန်ုပ်တို့မျှော်လင့်ပါသည်။ နေ့စဥ်ခွန်အားအမှုတော်လုပ်ငန်းအတွက် ဆုတောင်းပေးရန် မေတ္တာရပ်ခံပါသည်။ မိမိတတ်နိုင်သလို ထောက်ပံ့ကူညီလိုပါက ကျွန်ုပ်တို့ထံ ဆက်သွယ်နိုင်ပါသည်။ မိတ်ဆွေ၏အကူအညီအတွက် ကျွန်ုပ်တို့ အလွန်ဝမ်းမြောက် ကျေးဇူးတင်မည်ပင်။ ဘုရားသခင်၏ ကွယ်ကာစောင်မမှုအားဖြင့် မိတ်ဆွေ၏အသက်တာသည် လုံခြုံ၍အသီးပွင့်လန်းသောအသက်တာ ဖြစ်ပါစေသော်။

28/04/2026

ဘုရားဘက်မှကြည့်မြင်ခြင်း

အင်္ဂါနေ့ | ဧပြီလ (၂၈) ရက်

နေ့စဉ်ခွန်အားဖတ်ရန် ။ ။

ဖတ်ရန် ဆာလံကျမ်း ၁၂၁ | သမ္မာကျမ်းစာတစ်နှစ်တာ ၃ ရာ ၃-၅ နှင့် လု ၂၀:၁-၂၆

ထာဝရဘုရားသည် သင်၏ထွက်ခြင်းနှင့် ဝင်ခြင်းတို့ကို ယခုမှ စ၍ အစဉ်မပြတ် စောင့်တော်မူလိမ့်မည်။ [ ဆာ ၁၂၁:၈ ]

ထရီးနာသည် လက်မှတ်ပြတ်သွားသောရှိုးပွဲအတွက် အခမဲ့လက်မှတ်ကို လက်ခံရရှိပြီး၊ ထိုလက်မှတ်ကို သူမ၏ကျမ်းစာအုပ်၌ ညှပ်ထားခဲ့သည်။ ထို့နောက်တွင် စားစရာများထားသောဘီရို၌ သူမသည် ထိတ်ပျာစွာ တစ်စုံတစ်ခု ရှာနေသည်ကို သူမ၏သားက တွေ့လိုက်သည်။ သူမက “ကျမ်းစာအုပ်ပျောက်နေလို့”ဟု ရှင်းပြရာ၊ သားက “ဘာလို့ စားစရာဘီရိုထဲ ရှာနေတာလဲ”ဟု ပြန်မေးလိုက်သည်။ သူမက “တစ်အိမ်လုံးကို ရှာနေတာ၊ ပွဲက နောက်နာရီဝက်ဆို စတော့မှာ၊ တစ်ချက်လေးတောင် အလွတ်မခံချင်ဘူး”ဟု ပြောသည်။ သားက ရယ်လိုက်ပြီး “အသက်ရှူပါအုံး အမေရယ်။ ကျွန်တော့်အထင် အမေက တစ်ခုခုပျောက်သွားမှာကို စိုးရိမ်ထိတ်လန့်တဲ့ FOMO(ဖိုမို)ဝေဒနာ ခံစားနေရတယ်ထင်တယ်”ဟု ပြောသဖြင့် သူမ ရယ်လေသည်။ သားလည်း ကူညီရှာစဥ် ထရီးနာ၏ခင်ပွန်းက သူကျမ်းစာအုပ်ကို ကိုင်ပြီး ဝင်လာကာ “မင်းကားထဲမှာ ကျန်ခဲ့တယ်လေ”ဟုပြောလိုက်သည်။

မျှော်လင့်မထားသောကောင်းချီးများ၊ နားရက်ရှည်များ၊ တစ်သက်မှာတစ်ခါရသော အခွင့်အရေးများကို ခံစားပျော်မွေ့ခြင်းက အမှားမဟုတ်သော်လည်း ခံစား ပျော်မွေ့လိုစိတ်က တစ်ခုခုပျောက်သွားမှာကို စိုးရိမ်ထိတ်လန့် စိတ်သို့ အလွယ်တကူ ပြောင်းသွားနိုင်သည်။ ဘုရားသခင် ကျွန်ုပ်တို့ကို ထိမ်ချန်ထားသလား (သို့) ကျွန်ုပ်တို့ကို မျက်ခြေပြတ်နေလားဟု တွေးရန် ကျွန်ုပ်တို့သွေးဆောင်ခံရသည်။ သို့ရာတွင် “ကောင်းကင်နှင့်မြေကြီးကို ဖန်ဆင်းသောအရှင်”(ဆာ ၁၂၁:၂)သည် ကျွန်ုပ်တို့ကို အစဉ်အမြဲ စောင့်ကြည့်ပြီး၊ မည်သည့်အခါမျှ ငိုက်မြည်း အိပ်ပျော်ခြင်း မရှိသော ကျွန်ုပ်တို့ကို ဖြည့်ဆည်းပံ့ပိုးပေးသူနှင့် ကျွန်ုပ်တို့ကို ကွယ်ကာသူ (:၃-၇) ဖြစ်သည်။ ထို့ကြောင့် လမ်းလွှဲမှုများ၊ ကြန့်ကြာမှုများသာမက အခွင့်အရေးများပျောက်မှာ ကျွန်ုပ်တို့ပူပန်ရန် မလိုပါ။ ထာဝရဘုရားသည် ကျွန်ုပ်တို့၏“ထွက်ခြင်း နှင့်ဝင်ခြင်းတို့ကို ယခုမှစ၍ အစဉ်မပြတ်စောင့်တော်မူလိမ့်မည်”(:၈)။

ဆင်းရဲဒုက္ခကာလ၊ ပေါကြွယ်သောကာလနှင့် ကျွန်ုပ်တို့လူသားများအကြား ဘုရားသခင်စီစဉ်ထားသည့် သာမန်အခိုက်အတန့်တိုင်းတွင် ကျွန်ုပ်တို့သည် ကိုယ်တော်၏မြင်ကွင်း၌ အစဉ်အမြဲရှိနေသည်။ ကျွန်ုပ်တို့ခံစားရန်အဖို့ ဘုရားသခင် စီစဉ်ထားသည့် မည်သည့်အရာကိုမျှ ကျွန်ုပ်တို့လက်လွတ်ဆုံးရှုံးရမည် မဟုတ်ပါ။
စာရေးသူ ဆိုချီးလ်ဒစ်စင်

ဘုရားသခင်၏မြင်ကွင်း၌ရှိနေခြင်းက သင့်အသက်တာကို မည်သည့်သက်ရောက်မှုဖြစ်စေသနည်း။ တစ်ခုခုကို ဆုံးရှုံးရခြင်းက မမျှော်လင့်သောကောင်းချီးဆီသို့ မည်သည့်အချိန်က ဦးတည်သွားခဲ့သနည်း။

သစ္စာရှိသောဘုရားသခင်၊ ကျွန်ုပ်ကို ကိုယ်တော်၏မြင်ကွင်း၌ ထားရှိသည့်အတွက် ကျေးဇူးတင်ပါ၏။

****************************************
အသက်တာကို ပြောင်းလဲပေးနိုင်စွမ်းရှိသည့် ဘုရားသခင်၏နှုတ်ကပတ်တော်မှ မိတ်ဆွေခွန်အားရရှိမည်ဟု ကျွန်ုပ်တို့မျှော်လင့်ပါသည်။ နေ့စဥ်ခွန်အားအမှုတော်လုပ်ငန်းအတွက် ဆုတောင်းပေးရန် မေတ္တာရပ်ခံပါသည်။ မိမိတတ်နိုင်သလို ထောက်ပံ့ကူညီလိုပါက ကျွန်ုပ်တို့ထံ ဆက်သွယ်နိုင်ပါသည်။ မိတ်ဆွေ၏အကူအညီအတွက် ကျွန်ုပ်တို့ အလွန်ဝမ်းမြောက် ကျေးဇူးတင်မည်ပင်။ ဘုရားသခင်၏ ကွယ်ကာစောင်မမှုအားဖြင့် မိတ်ဆွေ၏အသက်တာသည် လုံခြုံ၍အသီးပွင့်လန်းသောအသက်တာ ဖြစ်ပါစေသော်။

27/04/2026

စိတ်လျှော့ပြီး ငြိမ်ဝပ်စွာနေခြင်း

တနင်္လာနေ့ | ဧပြီလ (၂၇) ရက်

နေ့စဉ်ခွန်အားဖတ်ရန် ။ ။

ဖတ်ရန် ယေရမိအနာဂတ္တိကျမ်း ၁၈:၁-၆ | သမ္မာကျမ်းစာတစ်နှစ်တာ ၂ ရာ ၂၃-၂၄ ၃ ရာ ၁-၂ နှင့် လု ၁၉:၂၈-၄၈

အိုးထိန်းသမားသည် အလိုအလျောက် အသစ်ပြုပြင်၍၊ အခြားသောအိုးကို လုပ်ပြန်လေ၏။ [ ယေ ၁၈:၄ ]

အက်ဒလေးဒ်ဖိုးလာဒ် (Adelaide Pollard) အကြောင်းကို ကျွန်ုပ်တို့အများကြီး မသိရပါ။ သို့သော် ထိုသို့ မသိရခြင်းက အကြောင်းရှိသည်။ သူမသည် သူ့အတွက် မည်သည့် အသိအမှတ်ပြုမှုကိုမျှ မလိုချင်သော ဘုရားသခင်၏နှိမ့်ချသော အစေခံတစ်ဦး ဖြစ်သည်။ သူမအသက် ၄၀ အရွယ်တွင် အာဖရိကတိုက်သို့ သာသနာပြုရန် ကြီးလေးသော ‌စေခိုင်းမူခြင်းကို ခံစားခဲ့ရသော်လည်း ထိုအခွင့်အ‌ရေး ပိတ်သွားသောကြောင့် သူမအလွန်စိတ်ပျက်ခဲ့သည်။ သို့သော်လည်း “အိုးမြေသည် အိုးထိန်းသမားလက်၌ရှိသကဲ့သို့ သင်တို့သည် ငါ့လက်၌ရှိကြ၏” (ယေ ၁၈:၆) ဟူသောကျမ်းချက်ကို သူမအမှတ်ရသည်။ နောက်ပိုင်းတွင် “ကိုယ်တော်ရှင်အိုးထိန်း၊ ကျွန်ုပ်အိုးမြေ”ဟူသော ဓမ္မသီချင်းစာသားများကို သူမရေးခဲ့သည်။

ယေရမိအနာဂတ္တိကျမ်း၌ရှိသော ဤသရုပ်ပုံရိပ်က ကျွန်ုပ်တို့အသက်တာကို များစွာ စကားပြောသည်။ “အိုးမြေဖြင့်လုပ်သောအိုးသည်၊ အိုးထိန်းသမားလက်၌ ပျက်စီးသောကြောင့်၊ သူသည် အလိုအလျောက် အသစ်ပြုပြင်၍၊ အခြားသောအိုးကို လုပ်ပြန်လေ၏” (ယေ ၁၈:၄)။ ၎င်းမှာ ဘုရားသခင်သည် ကျွန်ုပ်တို့ကို သူ၏ ပိုမိုကောင်းမွန်သော ရည်ရွယ်ချက်သို့ မည်သို့ပြန်လည်ပြောင်းလဲပုံသွင်းခဲ့သည်ကို ပြနေသည်။ လုပ်သင့်သည်၊ ဖြစ်သင့်သည်ဟု ကျွန်ုပ်တို့တွေးတိုင်း၊ ဘုရားသခင်၌လည်း “အိုးမြေသည် အိုးထိန်းသမားလက်၌ ရှိသကဲ့သို့ သင်တို့သည် ငါ့လက်၌ ရှိကြ၏”(:၆) ဟူ၍ ကျွန်ုပ်တို့၏အသက်တာအတွက် အခြားပုံစံတစ်ခု ရှိနိုင်သည်။

နောက်ဆုံးတွင် အက်ဒလေးဒ်သည် အာဖရိကသို့ သွားခဲ့ရသော်လည်း သူမဘဝကို ဘုရားသခင်ပုံသွင်းခြင်းက အခြားသောအမှုအတွက် ပို၍ ဖြစ်နိုင်သည်။ ပြောရမည်ဆိုလျှင် လူသန်းပေါင်းများစွာအတွက် နှိုးဆော်မှုဖြစ်စေသည့် “အလိုတော်ရှိရာ၊ ပြုတော်မူပါ”ဆိုသည့် ဓမ္မသီချင်းကို ရေးသားရန်အတွက် ဖြစ်ကောင်းဖြစ်နိုင်သည်။ မိမိလုပ်ချင်သောအရာကို “ဆိုင်းငံ့ထားရန်” ခံစားရချိန်တွင် ဘုရားသခင်သည် ထိုအချိန်အတွင်း ကျွန်ုပ်တို့အား မည်သို့ ပုံဖော်နေသနည်းဟု ကျွန်ုပ်တို့ တွေးကောင်းတွေးမိမည်။ ဘုရားသခင်၏ကြီးမားသော ရည်ရွယ်ချက်အလို့ငှာ သူ၏ အလိုတော်အတိုင်းပြုရန် အခွင့်ပေးပြီး “အလျှော့ပေး၍ ငြိမ်ဝပ်စွာ” စောင့်ဆိုင်းခြင်းက ကျွန်ုပ်တို့အတွက် အကောင်းဆုံးပင် ဖြစ်သည်။
စာရေးသူ Kenneth Petersen

ယနေ့ သင်၏ဘဝပန်းတိုင်များနှင့် ပတ်သက်၍ မည်သို့စိတ်ဓာတ်ကျနေသနည်း။ သင့်အသက်တာအတွက် အလိုတော်အတိုင်းပြုရန် ဘုရားသခင်အား သင်မည်သို့အခွင့်ပေးနိုင်မည်နည်း။

ချစ်ရပါသောဘုရားသခင်၊ ကိုယ်တော်၏အိုးထိန်းလက်သို့ မိမိကိုယ်ကိုအပ်နှံရန် မစတော်မူပါ။

****************************************
အသက်တာကို ပြောင်းလဲပေးနိုင်စွမ်းရှိသည့် ဘုရားသခင်၏နှုတ်ကပတ်တော်မှ မိတ်ဆွေခွန်အားရရှိမည်ဟု ကျွန်ုပ်တို့မျှော်လင့်ပါသည်။ နေ့စဥ်ခွန်အားအမှုတော်လုပ်ငန်းအတွက် ဆုတောင်းပေးရန် မေတ္တာရပ်ခံပါသည်။ မိမိတတ်နိုင်သလို ထောက်ပံ့ကူညီလိုပါက ကျွန်ုပ်တို့ထံ ဆက်သွယ်နိုင်ပါသည်။ မိတ်ဆွေ၏အကူအညီအတွက် ကျွန်ုပ်တို့ အလွန်ဝမ်းမြောက် ကျေးဇူးတင်မည်ပင်။ ဘုရားသခင်၏ ကွယ်ကာစောင်မမှုအားဖြင့် မိတ်ဆွေ၏အသက်တာသည် လုံခြုံ၍အသီးပွင့်လန်းသောအသက်တာ ဖြစ်ပါစေသော်။

26/04/2026

ပြန်လည်ထူထောင်ရေး ကြိုးပမ်းမှုများ

တနင်္ဂနွေနေ့ | ဧပြီလ (၂၆) ရက်

နေ့စဉ်ခွန်အားဖတ်ရန် ။

ဖတ်ရန် ဧဇရမှတ်စာ ၂:၆၈၊ ၃:၁၊ ၃-၇ | သမ္မာကျမ်းစာတစ်နှစ်တာ
၂ ရာ ၂၃-၂၄ နှင့် လု ၁၉:၁-၂၇

အချင်းချင်းတိုက်တွန်း၍ တစ်ယောက်ကိုတစ်ယောက် တည်ဆောက်ကြလော့။ [ ၁ သက် ၅:၁၁ ]

၂၀၁၉ ခုနှစ် ဧပြီလတွင် မြို့ဂုဏ်ဆောင် အလယ်ခေတ် ဝတ်ပြုကျောင်းတော်ကြီး နော့ထရာဒမ်ဒါပါရီ (Notre-Dame de Paris)တွင် မီးလောင်မှုဖြစ်ပွားပြီး၊ ခေါင်ချွန်းနှင့် ဝက်သစ်ချသစ်သားယက်မဖြင့် ပိုးထားသည့် ခဲခေါင်မိုးတို့ ပျက်စီးသွားသည်။ ချက်ချင်းဆိုသလိုပင် ဘုရားကျောင်းကို ပြန်လည်ပြုပြင်ရန် စီစဉ်လုပ်ဆောင်ခဲ့သည်။ ကမ္ဘာတစ်ဝန်းမှလှူဒါန်းမှုများ တဖွဲဖွဲဝင်လာပြီး၊ လက်သမားဆရာများက တူညီသောအဆောက်အအုံ နည်းပညာများနှင့် မူလတည်ဆောက်ပုံတွင် အသုံးပြုသည့် သစ်သားနှင့် ကျောက်အမျိုးအစားများကို အသုံးပြု၍ ပြန်လည်ပြုပြင်ခဲ့သည်။

ဘီစီ ၅၈၆ တွင် နေဗုခဒ်နေဇာသည် ယေရုရှလင်မြို့ကို ဝိုင်းထားပြီး ဘုရားသခင်၏ဗိမာန်တော်ကို မီးရှို့ရန် သူ၏တပ်များကို ညွှန်ကြားခဲ့၍ ဗိမာန်တော်ပျက်စီးသွားသည်(၄ရာ ၂၅:၉)။ ဗာဗုလုန်တွင် ဆယ်စုနှစ်များစွာ ဖမ်းဆီးကျွန်ပြုခံရပြီးနောက် ယေရုရှလင်မြို့သို့ ပြန်လာသောအခါ လူအပေါင်းတို့သည် “ဗိမာန်တော်ကို တည်ဆောက်ခြင်းငှာ၊ မိမိဆန္ဒရှိသည့်အတိုင်း လှူဒါန်း”(ဧဇ ၂:၆၈)ခဲ့ကြသည်။

ရှေးဦးစွာ ယဇ်ပလ္လင်ကိုပြန်တည်ပြီးနောက်၊ သူတို့သည် “ပန်းရန်သမားနှင့် လက်သမားတို့အား ငွေကိုပေး”ပြီး၊ ဗိမာန်တော်အုတ်မြစ်အတွက် “လေဗနုန်မှ ရေကြောင်းဖြင့် သယ်လာသောအာရဇ်သစ်တုံးများ”(၃:၇)ကို မှာယူခဲ့သည်။ သူတို့၏ကြိုးပမ်းမှုများကို ဆန့်ကျင်သည့် အဖျက်အမှောင့်များ ကြုံခဲ့ရသော်လည်း နောက်ဆုံးတွင် လုပ်ငန်းပြီးဆုံးသွားပြီး ဘုရားသခင်၏လူများသည် ဗိမာန်တော်၌ ကိုယ်တော်ကို တစ်ဖန် ပြန်လည်ဝတ်ပြုကိုးကွယ်ခဲ့ကြသည် (၆:၁၄-၂၂)။
သခင်ယေရှုကို ယုံကြည်သူများအနေဖြင့် ကျွန်ုပ်တို့သည် ဘုရားသခင်၏ ဗိမာန်တော်ဖြစ်ကြသည် (၁ ကော ၃:၁၆-၁၇)။ ဘုရားသခင်သည် ယုံကြည်သူများသည် အချင်းချင်းကို စဉ်ဆက်မပြတ် ပြန်လည်တည်ဆောက်ရန်၊ သစ်သား၊ ကျောက်များနှင့်မဟုတ်ဘဲ၊ အားပေးစကားများ၊ ဆုတောင်းခြင်းနှင့် ဝိညာဉ်ဆုကျေးဇူးများဖြင့် “အချင်းချင်း တိုက်တွန်း၍...တည်ဆောက်ရန်”(၁ သက် ၅:၁၁) ကျွန်ုပ်တို့အား ဘုရားသခင် ပြင်ဆင်ပံ့ပိုးပေသည်။
စာရေးသူ ခါစတန်ဟုမ်းဘာ့ဂျ်

သခင်ယေရှု၌ယုံကြည်သူများကို သင်မည်သို့ တိုက်တွန်းတည်ဆောက်သနည်း။ မကြာသေးမီက သင့်ကို မည်သူက မည်သို့တည်ဆောက်ခဲ့သနည်း။

ချစ်သောအဘဘုရား၊ ကိုယ်တော်၏ဗိမာန်တော်အဖြစ် အချင်းချင်းကို တည်ဆောက်ပြုပြင်ရန် လိုအပ်သောအရာများကို ကျွန်ုပ်တို့အား ပံ့ပိုးပေးသည့်အတွက် ကျေးဇူးတင်ပါ၏။

****************************************
အသက်တာကို ပြောင်းလဲပေးနိုင်စွမ်းရှိသည့် ဘုရားသခင်၏နှုတ်ကပတ်တော်မှ မိတ်ဆွေခွန်အားရရှိမည်ဟု ကျွန်ုပ်တို့မျှော်လင့်ပါသည်။ နေ့စဥ်ခွန်အားအမှုတော်လုပ်ငန်းအတွက် ဆုတောင်းပေးရန် မေတ္တာရပ်ခံပါသည်။ မိမိတတ်နိုင်သလို ထောက်ပံ့ကူညီလိုပါက ကျွန်ုပ်တို့ထံ ဆက်သွယ်နိုင်ပါသည်။ မိတ်ဆွေ၏အကူအညီအတွက် ကျွန်ုပ်တို့ အလွန်ဝမ်းမြောက် ကျေးဇူးတင်မည်ပင်။ ဘုရားသခင်၏ ကွယ်ကာစောင်မမှုအားဖြင့် မိတ်ဆွေ၏အသက်တာသည် လုံခြုံ၍အသီးပွင့်လန်းသောအသက်တာ ဖြစ်ပါစေသော်။

25/04/2026

သခင်ခရစ်တော်ကဲ့သို့ အစေခံပါ

စနေနေ့ | ဧပြီလ (၂၅) ရက်

နေ့စဉ်ခွန်အားဖတ်ရန် ။ ။

ဖတ်ရန် ဖိလိပ္ပိဩဝါဒစာ ၂:၃-၈ | သမ္မာကျမ်းစာတစ်နှစ်တာ ၂ ရာ ၂၁-၂၂ နှင့် လု ၁၈:၂၄-၄၃

ယေရှုခရစ်၌ရှိသော ထိုစိတ်သဘောကို သင်တို့၌လည်း ရှိစေကြလော့။ [ ဖိ ၂:၅ ]

ဆေးရုံ၌ လူနာတစ်ဦးထံ ကျွန်မသွားရောက်စဉ် အတွေ့အကြုံနုနယ်သေးသော အထွေထွေရောဂါကုဆရာဝန်အဖွဲ့မှ လူငယ်ဆရာဝန်တစ်ဦး၏အပြုအမူကြောင့် ကျွန်မအံ့အားသင့်ခဲ့ရသည်။ ပို၍အတွေ့အကြုံများသော ဆရာဝန်ကြီးက လူနာ၏ ကျန်းမာရေးအခြေအနေကို ရှင်းလင်းပြနေပြီး၊ အခြားဆရာဝန်များက နားထောင်နေကြစဥ်၊ ရုတ်တရက် လူနာသည် မသက်မသာနှင့် အိမ်သာသွားလိုကြောင်း ပြောသည်။ သို့သော်လည်း သူကိုယ်၌က မထိုင်နိုင်။ သူ့အား အိမ်သာသို့ တွဲခေါ်သွားမည့်သူနာပြုအကူ လာသည်အထိလည်း သူမစောင့်နိုင်ပါ။

ထိုသို့ ကသုတ်ကရက်ဖြစ်နေစဉ် လူငယ်ဆရာဝန်လေးက အိပ်ရာသုံးအိမ်သာခွက်ကိုယူပြီး လူနာအား ကူညီပေးလိုက်သည်။ သူနာပြုအကူရောက်လာသည့်အခါ လူနာကို ကူညီပေးပြီးဖြစ်သည်ကို တွေ့လိုက်ရ၍ အံ့သြတုန်လှုပ်မိသွားသည်။ ခေါင်းဆောင်ဆရာဝန်က လူငယ်ဆရာဝန်လေး၏လုပ်ရပ်ကို အသိအမှတ်ပြုကာ ဂုဏ်ယူမိသွားသည်။

သခင်ခရစ်တော်သည် သူ၏ဘုရားဇာတိကို ဆုပ်ကိုင်ထားပြီး၊ လူသားတို့အား မငြင်းပယ်ဘဲ၊ မကူညီဘဲ မနေခဲ့ပါ။ ထိုသခင်သည် “ဘုရားသခင်၏သဏ္ဌာန်တော်နှင့်ပြည့်စုံတော်မူသည်ဖြစ်၍ ဘုရားသခင်နှင့်ပြိုင်သောအမှုကို လုယူခြင်းအမှုဟူ၍ မထင်မမှတ်ပါ”(ဖိ ၂:၆)။ လူသားအနေနှင့် ခရစ်တော်သည် ကျွန်ုပ်တို့ လွန်ကျူးသော အပြစ်များအတွက် သူ့ကိုယ်သူ ယဇ်အဖြစ် ခံယူကာ ကျွန်ုပ်တို့အတွက် စွန့်လွှတ်ပူဇော်ခဲ့သည်။ ကျွန်ုပ်တို့သည် မစမှုနှင့် ကယ်တင်ခြင်းကို လိုအပ်နေသူများဖြစ်ကြောင်း သခင်သည် သိမြင်ပြီး၊ နှိမ့်ချစွာဖြင့် ကျွန်ုပ်တို့အတွက် အသေခံခဲ့သည်(:၈)။ “မိမိအသရေကိုစွန့်၍ အစေခံကျွန်၏သဏ္ဌာန်ကို ယူဆောင်” ခဲ့သည်ဟု (:၇) ရှင်ပေါလု ရေးသားခဲ့သည်။

အခြားသူများနှင့် ပေါင်းသင်းဆက်ဆံရေးများ၌ သခင်ယေရှု၏စိတ်နေ သဘောထားနှင့် ကိုယ်ကျိုးစွန့်ခြင်းတို့ ကို အတုယူရန် ကျွန်ုပ်တို့အား ဘုရားရှင်ခေါ်ယူစေစားပါသည်။ ကျွန်ုပ်တို့ကို ကိုယ်တော်မစသည်ဖြစ်၍ လူ့အမြင်၌ မည်မျှပင်နိမ့်ကျသည့် အလုပ်ဖြစ်ပါစေ နှိမ့်ချစွာ အစေခံကြပါစို့။
စာရေးသူ Katara Patton

သခင်ယေရှု၏စိတ်သဘောထားနှင့်လမ်းစဉ်များကို သင်မည်ကဲ့သို့ထင်ဟပ်ပြသမည်နည်း။ ယနေ့တွင် သင့်အတွက် မည်သည့်လုပ်ရပ်မျိုးက လူတစ်စုံတစ်ဦးအား နှိမ့်ချစွာ အစေခံခြင်းဖြစ်မည်နည်း။

သခင်ယေရှုဘုရား၊ ကျွန်ုပ်၏အပြစ်အတွက် ကိုယ်ကိုနှိမ့်ချပြီး အသက်ပေးသည့်အတွက် ကျေးဇူးတင်ပါ၏။ အခြားသူများအား မည်သို့ကိုယ်ကျိုးစွန့်လျက် အစေခံနိုင်သည်ကို ကျွန်ုပ်အား သွန်သင်လမ်းပြတော်မူပါ။

****************************************
အသက်တာကို ပြောင်းလဲပေးနိုင်စွမ်းရှိသည့် ဘုရားသခင်၏နှုတ်ကပတ်တော်မှ မိတ်ဆွေခွန်အားရရှိမည်ဟု ကျွန်ုပ်တို့မျှော်လင့်ပါသည်။ နေ့စဥ်ခွန်အားအမှုတော်လုပ်ငန်းအတွက် ဆုတောင်းပေးရန် မေတ္တာရပ်ခံပါသည်။ မိမိတတ်နိုင်သလို ထောက်ပံ့ကူညီလိုပါက ကျွန်ုပ်တို့ထံ ဆက်သွယ်နိုင်ပါသည်။ မိတ်ဆွေ၏အကူအညီအတွက် ကျွန်ုပ်တို့ အလွန်ဝမ်းမြောက် ကျေးဇူးတင်မည်ပင်။ ဘုရားသခင်၏ ကွယ်ကာစောင်မမှုအားဖြင့် မိတ်ဆွေ၏အသက်တာသည် လုံခြုံ၍အသီးပွင့်လန်းသောအသက်တာ ဖြစ်ပါစေသော်။

24/04/2026

ဖြတ်ကျော်ရမည့်မြစ်များ

သောကြာနေ့ | ဧပြီလ (၂၄) ရက်

နေ့စဉ်ခွန်အားဖတ်ရန် ။ ။

ဖတ်ရန် ယောရှုမှတ်စာ ၃:၉-၁၁၊ ၁၃-၁၇ | သမ္မာကျမ်းစာတစ်နှစ်တာ ၂ ရာ ၁၉-၂၀ နှင့် လု ၁၈:၁-၂၃

ငါသည် မောရှေနှင့်အတူရှိသကဲ့သို့ သင်နှင့်အတူရှိသည်။ [ ယောရှု ၃:၇ ]

လီလီယံကိုလုံ(Lillian Colon)သည် မိဘမဲ့ဂေဟာတွင် ကြီးပြင်းလာသူဖြစ်ပြီး၊ ကမ္ဘာကြီး၏အာရုံစူးစိုက်ခံရသည့် အဖွဲ့လိုက် အကပြိုင်ပွဲတွင် ပြိုင်ဘက်အသင်းမှ ကချေသည် အယောက် ၄၀၀ ကို အနိုင်ယူခဲ့သူဖြစ်သည်။ သူမသည် ညီညာစွာကတတ်ရန် စည်းကမ်းအလွန်ကြပ်မတ်သည့် လေ့ကျင့်မှုအောက်တွင် အသက် ၄၀ ကျော်သည် အထိ ထိုအကအဖွဲ့တွင် ပါဝင်ခဲ့သည်။ ယခုအခါ သူမသည် အသက် ၇၀ ရှိပြီဖြစ်ကာ၊ အကဆရာမအဖြစ် သင်တန်းသားများအား “အတူတကွလုပ်ဆောင်ခြင်း”ဟူသည့် တိကျသေချာသောကကွက်များကို ဆက်လက် လက်ဆင့်ကမ်း သင်ကြားပေးလျက်ရှိသည်။ “ကျွန်မတို့ရဲ့အသက်တာဟာ စင်ပေါ်မှာဖြစ်စေ၊ စင်အောက်မှာဖြစ်စေ နက်နဲစွာယှက်နွယ်လျက်ရှိတယ်။ ... “တစ်ဦးနှင့်တစ်ဦး ဂရုစိုက်ပြီး ပံ့ပိုးကူညီကြတဲ့အခါ ကျွန်မတို့ပိုပြီးတိုးတက်လာပါတယ်”ဟုပြောပြသည်။

အရေးပါသော ထိုနိယာမကို ရှင်ပေါလုသိသည်။ သခင်ခရစ်တော်၌ သဟဇာတဖြစ်ခြင်းသည် ဘုရားသခင်ကို ချီးမြှောက်ချီးမွမ်းရသည့်အကြောင်းရင်း အစစ်အမှန်ဖြစ်သည်။ ရှင်ပေါလုက ရောမမြို့ရှိ ယုံကြည်သူ ယုဒလူမျိုးများနှင့် တစ်ပါးအမျိုးသားများအား စည်းလုံးညီညွတ်မှုရှိရန် နှိုးဆော်သွန်သင်ခဲ့ပြီး၊ “သင်တို့သည် ငါတို့သခင်ယေရှုခရစ်၏ခမည်းတော်တည်းဟူသောဘုရားသခင်ကို တညီတညွတ်တည်း နှုတ်မြွက်၍ ချီးမွမ်းစေခြင်းငှာ၊ ယေရှုခရစ်‌၏အလိုတော်အတိုင်း အချင်းချင်းစိတ်တညီတညွတ်တည်း ရှိရမည့်အကြောင်းသည်းခံခြင်း၊ သက်သာခြင်း၏အရှင်ဘုရားသခင်သည် ကယ်မသနားတော်မူပါစေသော”ဟုရေးသားခဲ့သည်(ရော ၁၅:၅-၆)။

အမျိုးမျိုးကွဲပြားသောအမြင်များက အထက်ပါ ရလဒ်ကောင်းကို ထွက်ပေါ်စေမည် မဟုတ်ပါ။ တစ်ဦးနှင့်တစ်ဦး၊ တစ်ဖွဲ့နှင့်တစ်ဖွဲ့ ကပ်သတ်မနေဘဲ ဘုရားသခင်ကို ချီးမွမ်းရန် အချင်းချင်းပူးပေါင်းခြင်းက ခရစ်တော်အားဖြင့် စည်းလုံးညီညွတ်ခြင်းဟူသည့် ရည်ရွယ်ချက်အမှန်သို့ ပေါက်ရောက်စေသည်။ ဘုရားသခင်၏ဘုန်းတော် ထင်ရှားစေရေး “ခရစ်တော်သည်...သင်တို့ကို လက်ခံတော်မူသည်နည်းတူ သင်တို့သည် တစ်ယောက်ကိုတစ်ယောက် လက်ခံကြလော့”(:၇)ဟု ရှင်ပေါလုရေးသားခဲ့သည်။ ဘုရားရှင်၏မစမှုကို တောင်းခံလျှင် ကျွန်ုပ်တို့ အတူတကွ ဘုန်းတော်ထင်ရှားအောင် လုပ်ဆောင်ရာ၌ စိတ်တညီတညွတ်တည်းရှိအောင် ဘုရားရှင်နှိုးဆော်ပေသည်။
စာရေးသူ ပက်ထရစ်ရှာရေဗန်

ဘုရားသခင်အား အတူချီးမွမ်းရန် မည်သူနှင့်သင်ပူးပေါင်းနိုင်မည်နည်း။ စိတ်တညီတညွတ်တည်း ချီးမွမ်းမှုကို သင်မည်သို့ ဦးစားပေးလုပ်ဆောင်မည်နည်း။

ချစ်သောဘုရားသခင်၊ အခြားသူများနှင့်အတူတစ်ကွ ညီညွတ်စွာ ချီးမွမ်းနိုင်ရန် ကျွန်ုပ်၏စိတ်နှလုံးကို ဖွင့်ပေးတော်မူပါ။

****************************************
အသက်တာကို ပြောင်းလဲပေးနိုင်စွမ်းရှိသည့် ဘုရားသခင်၏နှုတ်ကပတ်တော်မှ မိတ်ဆွေခွန်အားရရှိမည်ဟု ကျွန်ုပ်တို့မျှော်လင့်ပါသည်။ နေ့စဥ်ခွန်အားအမှုတော်လုပ်ငန်းအတွက် ဆုတောင်းပေးရန် မေတ္တာရပ်ခံပါသည်။ မိမိတတ်နိုင်သလို ထောက်ပံ့ကူညီလိုပါက ကျွန်ုပ်တို့ထံ ဆက်သွယ်နိုင်ပါသည်။ မိတ်ဆွေ၏အကူအညီအတွက် ကျွန်ုပ်တို့ အလွန်ဝမ်းမြောက် ကျေးဇူးတင်မည်ပင်။ ဘုရားသခင်၏ ကွယ်ကာစောင်မမှုအားဖြင့် မိတ်ဆွေ၏အသက်တာသည် လုံခြုံ၍အသီးပွင့်လန်းသောအသက်တာ ဖြစ်ပါစေသော်။

22/04/2026

AI (Artificial Intelligence) ဟာ စာတန် သို့မဟုတ် မိစ္ဆာတစ်ခု မဟုတ်ပါဘူး။ ၎င်းဟာ လူသားတွေ ဖန်တီးထားတဲ့ **နည်းပညာဆိုင်ရာ ကိရိယာ (Tool)** တစ်ခုသာ ဖြစ်ပါတယ်။ ဒီကိစ္စနဲ့ ပတ်သက်ပြီး ပိုမိုရှင်းလင်းစေဖို့ အချက်အလက်အချို့နဲ့ ရှင်းပြပေးချင်ပါတယ် -

# # # ၁။ AI ဆိုတာ ဘာလဲ

AI ဆိုတာ သင်္ချာဆိုင်ရာ တွက်ချက်မှုတွေ (Algorithms) နဲ့ အချက်အလက် (Data) တွေအပေါ်မှာ အခြေခံပြီး တည်ဆောက်ထားတဲ့ software တစ်ခုပါ။ ၎င်းမှာ ကိုယ်ပိုင် စိတ်ဝိညာဉ်၊ ခံစားချက် ဒါမှမဟုတ် ကောင်းကျိုးဆိုးကျိုးကို ခွဲခြားနိုင်တဲ့ "ကိုယ်ကျင့်တရား" မရှိပါဘူး။ လူသားတွေက ခိုင်းစေတဲ့အတိုင်း၊ သင်ကြားပေးထားတဲ့အတိုင်းသာ လုပ်ဆောင်တာ ဖြစ်ပါတယ်။

# # # ၂။ ဘာကြောင့် စိုးရိမ်မှုတွေ ရှိနေတာလဲ
လူတော်တော်များများက AI ကို ကြောက်ရွံ့ကြတာဟာ အကြောင်းရင်း အချို့ကြောင့် ဖြစ်နိုင်ပါတယ် -

* **သိပ္ပံစိတ်ကူးယဉ် ရုပ်ရှင်များ:** ရုပ်ရှင်တွေထဲမှာ AI က ကမ္ဘာကြီးကို ဖျက်ဆီးတယ်လို့ ပုံဖော်ကြတာကြောင့် လူတွေရဲ့ စိတ်ထဲမှာ စိုးရိမ်စိတ် ဝင်နေတတ်ပါတယ်။

* **အလုပ်အကိုင် အပြောင်းအလဲ:** AI ကြောင့် လူတွေ အလုပ်လက်မဲ့ ဖြစ်ကုန်မလားဆိုတဲ့ စိုးရိမ်မှုတွေ ရှိပါတယ်။

* **နားလည်မှု လွဲမှားခြင်း:** AI က လူတွေလိုပဲ တုံ့ပြန်နိုင်တဲ့အခါ ၎င်းမှာ ထူးခြားတဲ့ စွမ်းအားတွေ ရှိနေသယောင် ထင်ရတတ်ပါတယ်။

# # # ၃။ ကောင်းကျိုးနှင့် ဆိုးကျိုး (အသုံးချသူပေါ် မူတည်သည်)

ဓားတစ်ချောင်းဟာ ဟင်းသီးဟင်းရွက် လှီးရင် အသုံးဝင်သလို၊ လူသတ်ရင်လည်း အန္တရာယ်ရှိပါတယ်။ AI ဟာလည်း ထိုနည်းတူပါပဲ -

* **ကောင်းကျိုး:** ရောဂါရှာဖွေခြင်း၊

ပညာရေးဆိုင်ရာ ကူညီပေးခြင်း၊ သိပ္ပံနည်းကျ သုတေသနပြုခြင်းနဲ့ နေ့စဉ်အလုပ်တွေကို ပိုမိုမြန်ဆန်အောင် ကူညီပေးပါတယ်။

* **ဆိုးကျိုး:** လူသားတွေက AI ကို အသုံးချပြီး သတင်းအမှားဖြန့်တာ ဒါမှမဟုတ် မကောင်းတဲ့ ရည်ရွယ်ချက်နဲ့ သုံးရင်တော့ ဆိုးကျိုးဖြစ်စေနိုင်ပါတယ်။

**နိဂုံးချုပ်**

ဘာသာရေး ရှုထောင့်ကကြည့်ရင်ပဲဖြစ်ဖြစ်၊ သိပ္ပံရှုထောင့်ကကြည့်ရင်ပဲဖြစ်ဖြစ် AI ဟာ လူသားတွေရဲ့ ဉာဏ်ရည်ကို တုပထားတဲ့ စက်ပစ္စည်းတစ်ခုသာ ဖြစ်ပါတယ်။ ၎င်းဟာ "စာတန်" မဟုတ်သလို၊ ကောင်းတဲ့ဘက်မှာ အသုံးချရင် လူသားတွေအတွက် အလွန်အကျိုးရှိစေမယ့် လက်နက်တစ်ခု ဖြစ်ပါတယ်။
အရေးကြီးတာက AI ကို ဘယ်လို "ထိန်းချုပ်မလဲ" နဲ့ "မှန်ကန်တဲ့ နေရာမှာ ဘယ်လိုသုံးမလဲ" ဆိုတဲ့ လူသားတွေရဲ့ ဆုံးဖြတ်ချက်ကသာ ပိုအရေးကြီးပါတယ်။

𝐏𝐚𝐮𝐥 𝐓𝐮𝐧𝐦𝐢𝐧 𝐌𝐢𝐧𝐢𝐬𝐭𝐫𝐲

22/04/2026

မစကူညီဖို့ ဘုရားသခင်နှင့်ပူးပေါင်းစို့

ဗုဒ္ဓဟူးနေ့ | ဧပြီလ (၂၂) ရက်

နေ့စဉ်ခွန်အားဖတ်ရန် ။ ။

ဖတ်ရန် ဆာလံကျမ်း ၇၂:၁၂-၁၄ | သမ္မာကျမ်းစာတစ်နှစ်တာ ၂ ရာ ၁၄-၁၅
နှင့် လု ၁၇:၁-၁၉

“ကိုးကွယ်ရာမရှိ၍ ဆင်းရဲသောသူကိုလည်းကောင်း ချမ်းသာပေးတော်မူလိမ့်မည်။ [ ဆာ ၇၂:၁၂ ]

၂၀၂၁ ခုနှစ်တွင် တာလီဘန်များသည် အာဖဂန်နစ္စတန်အစိုးရအား လျင်မြန်စွာ အနိုင်ယူစိုးမိုးခဲ့ချိန်၌ လူထောင်ပေါင်းများစွာတို့မှာ ထွက်ပြေးလွတ်မြောက်ရန်
လမ်းမရှိဘဲ ချောင်ပိတ်မိနေကြပြီး၊ ဘာလုပ်ရမှန်းမသိ ဖြစ်နေခဲ့သည်။ သာမန်ပြည်သူများက ထိုပြဿနာကို ဖြေရှင်းရန် နည်းလမ်းရှာရာ၊ လူငယ်တစ်ဦးက အင်စတက်ဂရမ်ပေါ်တွင် သူတို့ ထွက်ပြေးလွတ်မြောက်ရန် လေယာဉ်ပျံငှားရမ်းခ ငွေ ဒေါ်လာ ၇ သန်း ရရှိရေး ရံပုံငွေရှာဖွေရေးအစီအစဉ်ကို စတင်ခဲ့သည်။ သူက သတင်းဌာနတစ်ခုသို့ “နိုင်ငံရေးအရ မတူညီကွဲပြားနေသော ဤအခြေအနေဆိုးကြီးတွင် ရုန်းကန်နေကြရသည့် လူတန်းစားအသီးသီးအတွက် အတူပါဝင်ပြီး ဤသူတို့ကို ဝိုင်းဝန်းကယ်တင်ရအောင်” ပြောခဲ့သည်။ ရှုပ်ထွေးပွေလီသည့်အမှုအရေးတွင် သူတို့ဝင်ရောက်ကူညီရန် ရွေးချယ်ခဲ့ကြသည်။

အာဖကန်နစ္စတန်နိုင်ငံ တစ်နိုင်ငံတည်းသာ မဟုတ်ပါ။ မိုးမျှော်တိုက်နှင့်မြို့ပြများမှအစ တောရွာဇနပုဒ်အထိ ကမ္ဘာအနှံ့တွင် လူများစွာတို့သည် အထီးကျန်ဖြစ်လျက် ကြေကွဲဝမ်းနည်းစိတ်၏ဖိစီးမှုကို အလူးအလဲ ခံစားနေကြရသည်။ ထိုသို့ ဆင်းရဲဒုက္ခနှင့် မျှော်လင့်ချက်မဲ့သောနေရာများတွင် ဘုရားသခင်၏အာရုံစူးစိုက်မှု သက်ရောက်သည်ကို အံ့သြဖွယ်တွေ့ရှိရသည်။ မည်သို့ပင်ဖြစ်စေ ဘုရားသခင်သည် သူ့နည်းသူ့ဟန် သူ့အချိန်တွင် “ငတ်မွတ်သောသူ ...၊ ကိုးကွယ်ရာမရှိ၍ ဆင်းရဲသောသူကို... ချမ်းသာပေးတော်မည်”(၇၂:၁၂)။ ထို့အပြင် ကျွန်ုပ်တို့မှတစ်ဆင့် ဘုရားသခင်၏ကူညီမစမှုရောက်ရှိစေခြင်းနည်းလမ်းက အံ့ဩဖွယ်ဖြစ်သည်။ ဆာလံ ၇၂ တွင် ရှောလမုန်မင်းကြီး၏လုပ်ဆောင်မှုနှင့်ဘုရားသခင်၏ လုပ်ဆောင်မှုကို ဖော်ပြထားပြီး၊ သူတို့၏လုပ်ဆောင်မှုကို တစ်ခုနှင့်တစ်ခု ခွဲခြားရန် မလွယ်ကူပါ။ သခင်ဘုရားသည် ကယ်တင်သူဖြစ်ပြီး သူနှင့်အတူ ပူးပေါင်းလုပ်ဆောင်ရန် ကျွန်ုပ်တို့အား ဖိတ်ခေါ်လျက်ရှိသည်။

မတရားမှုနှင့်ဆင်းရဲဒုက္ခများကို ကြုံတွေ့ရင်ဆိုင်ရသည့်အခါ ကျွန်ုပ်တို့သည် ပြဿနာ၏ဗဟိုချက်သို့ဝင်ရောက်ပြီး ကိုယ်တော်နှင့်အတူ ပူးပေါင်းဖြေရှင်းနိုင်ပါသည်။ ဘုရားသခင်နောက်တော်သို့လိုက်၍ ကူညီဖေးမမည့်သူ မည်သူမျှ မရှိသည့်နေရာသို့ ကျွန်ုပ်တို့သွားရောက်ကူညီနိုင်ပါသည်။
စာရေးသူ ဝင်းကော်လီယာ

ဝင်ရောက်ကူညီသူ မည်သူမျှမရှိဟုထင်ရသည့် မည်သည့်အခြေအနေမျိုးကို သင်တွေ့ကြုံခဲ့ဖူးသနည်း။ ထိုနေရာတွင် ဘုရားသခင်နှင့် သင်မည်ကဲ့သို့ပူးပေါင်းလုပ်ဆောင်မည်နည်း။

ချစ်သောဘုရားသခင်၊ ကျွန်ုပ်တို့ကိုကူညီမစရန် ကတိပေးသည်သာမက၊ အခြားသူများကို ကူညီမစရာတွင် ကိုယ်တော်နှင့်အတူ ပူးပေါင်းရန် ကျွန်ုပ်တို့အား ဖိတ်ခေါ်သည့်အတွက် ကျေးဇူးတင်ပါ၏။

****************************************
အသက်တာကို ပြောင်းလဲပေးနိုင်စွမ်းရှိသည့် ဘုရားသခင်၏နှုတ်ကပတ်တော်မှ မိတ်ဆွေခွန်အားရရှိမည်ဟု ကျွန်ုပ်တို့မျှော်လင့်ပါသည်။ နေ့စဥ်ခွန်အားအမှုတော်လုပ်ငန်းအတွက် ဆုတောင်းပေးရန် မေတ္တာရပ်ခံပါသည်။ မိမိတတ်နိုင်သလို ထောက်ပံ့ကူညီလိုပါက ကျွန်ုပ်တို့ထံ ဆက်သွယ်နိုင်ပါသည်။ မိတ်ဆွေ၏အကူအညီအတွက် ကျွန်ုပ်တို့ အလွန်ဝမ်းမြောက် ကျေးဇူးတင်မည်ပင်။ ဘုရားသခင်၏ ကွယ်ကာစောင်မမှုအားဖြင့် မိတ်ဆွေ၏အသက်တာသည် လုံခြုံ၍အသီးပွင့်လန်းသောအသက်တာ ဖြစ်ပါစေသော်။

21/04/2026

ပျောက်သွားခဲ့သည်။ သို့သော် ယခုပြန်တွေ့ပြီ

အင်္ဂါနေ့ | ဧပြီလ (၂၁) ရက်

နေ့စဉ်ခွန်အားဖတ်ရန် ။ ။

ဖတ်ရန် ရှင်လုကာခရစ်ဝင် ၁၅:၈-၁၀ | သမ္မာကျမ်းစာတစ်နှစ်တာ ၂ ရာ ၁၂-၁၃ နှင့် လု ၁၆

ပျောက်သောငွေကို ငါတွေ့ပြီ။ ငါနှင့်အတူ ဝမ်းမြောက်ကြလော့ဟု ဆိုတတ်သည် မဟုတ်လော။ [ လု ၁၅:၉ ]

လွန်ခဲ့သည့်နှစ်များစွာက ကျွန်မ၏ဖခင်နှင့်အတူ အီကွေဒေါနိုင်ငံ၊ အမေဇုံတောထဲသို့ ရောက်ခဲ့စဉ် စက်လှေဖြင့် ရွာငယ်လေးတစ်ရွာသို့ သွားရောက်လည်ပတ်ကာ ထိုဒေသခံလူမျိုးတို့၏ နေထိုင်မှုဓလေ့ကို လေ့လာခဲ့သည်။ ကျွန်မချစ်သောဖေဖေက ကျွန်မအတွက် နားကပ်တစ်စုံအပါအဝင် ကျောက်စီလက်မှုတန်ဆာများ ဝယ်ပေးသည်။ ထိုနားကပ်လှလှလေးကို ကျွန်မမွေးနေ့ရက်တွင် အစ်မအိမ်သို့သွားလည်ချိန် အပါအဝင် နေ့ထူးနေ့မြတ်များတွင်သာ ဝတ်လေ့ရှိသည်။ အမထံမှအပြန် ကျွန်မ၏နားကပ်တစ်ဘက် ကျပျောက်သွားသည်ကို သိလိုက်ရ၍ အလွန်တုန်လှုပ်မိပြီး နေရာအနှံ့ ကျွန်မ လိုက်ရှာခဲ့သည်။

နားကပ်သေးသေးလေးဖြစ်သော်လည်း ၎င်းကိုပြန်အစားထိုးရန်အတွက် အမေဇုံသို့တစ်ခေါက်ပြန်သွား၍ ရှာဝယ်ရမည်ဖြစ်သည်။ အံ့သြစရာမှာ အစ်မက ကျွန်မမွေးနေ့ကျင်းပသည့် စားသောက်ဆိုင်သို့သွားပြီး ပစ္စည်းပျောက်ဆုံး/ပြန်တွေ့ဌာနမှ နားကပ်ပြန်ရရှိခဲ့၍ ကျွန်မအလွန်ဝမ်းသာခဲ့သည်။

အမျိုးသမီးတစ်ဦး၏ငွေဒင်္ဂါးပျောက်သွားသည့်အကြောင်း ပုံပမာကို သခင်ယေရှုပြောပြခဲ့သည်။ ပျောက်သွားသော အဖိုးတန်ငွေဒင်္ဂါးကို သူ မနားမနေ ရှာဖွေခဲ့သည်။ “...တစ်စုံတစ်ယောက်သောမိန်းမ၌ ငွေဆယ်ပြားရှိ၍ တစ်ပြားပျောက်လျှင် ဆီမီးကိုထွန်း၍ မတွေ့မီတိုင်အောင် တစ်အိမ်လုံးကိုလှည်း၍ စေ့စေ့မရှာဘဲ နေမည်လော” (လု ၁၅:၈)။ ငွေဒင်္ဂါးကိုပြန်တွေ့သောအခါ အလွန်ဝမ်းမြောက်ခြင်းရှိ၏ (:၉)။

ကျွန်မတို့သည် ဘုရားသခင်အတွက် မည်မျှတန်ဖိုးရှိသည်ကို ဖော်ပြလို၍ ထိုပုံပမာကို သခင်ယေရှု ပြောရခြင်း ဖြစ်သည်။ လူသားသည် “ပျောက်သောသူတို့ကိုရှာ၍ ကယ်တင်အံ့သောငှာ ကြွလာသတည်း” (၁၉:၁၀)။ တစ်ခါက ကျွန်မတို့ပျောက်ဆုံးခဲ့ကြသော်လည်း ယခု ကျွန်မတို့ကို ပြန်လည်တွေ့ပြီဖြစ်၍ ကောင်းကင်သားတို့ အလွန်ဝမ်းမြောက်ကြပေသည်။
စာရေးသူ Nancy Gavilanes

မိမိသည် ဘုရားသခင်အတွက် အဖိုးတန်သူဖြစ်ကြောင်း သိရသောအခါ သင်မည်ကဲ့သို့ ခံစားရသနည်း။ မိမိအား ပြန်တွေ့သောအခါ ကောင်းကင်သားတို့ ဝမ်းမြောက်သည်ကို သိရခြင်းက မည်သို့ ခံစားရစေသနည်း။

ချစ်လှစွာသောအဘဘုရား၊ ကျွန်ုပ်ကို လိုက်လံရှာဖွေသည့်အတွက် ကျေးဇူးတင်ပါ၏။

****************************************
အသက်တာကို ပြောင်းလဲပေးနိုင်စွမ်းရှိသည့် ဘုရားသခင်၏နှုတ်ကပတ်တော်မှ မိတ်ဆွေခွန်အားရရှိမည်ဟု ကျွန်ုပ်တို့မျှော်လင့်ပါသည်။ နေ့စဥ်ခွန်အားအမှုတော်လုပ်ငန်းအတွက် ဆုတောင်းပေးရန် မေတ္တာရပ်ခံပါသည်။ မိမိတတ်နိုင်သလို ထောက်ပံ့ကူညီလိုပါက ကျွန်ုပ်တို့ထံ ဆက်သွယ်နိုင်ပါသည်။ မိတ်ဆွေ၏အကူအညီအတွက် ကျွန်ုပ်တို့ အလွန်ဝမ်းမြောက် ကျေးဇူးတင်မည်ပင်။ ဘုရားသခင်၏ ကွယ်ကာစောင်မမှုအားဖြင့် မိတ်ဆွေ၏အသက်တာသည် လုံခြုံ၍အသီးပွင့်လန်းသောအသက်တာ ဖြစ်ပါစေသော်။

𝐏𝐚𝐮𝐥 𝐓𝐮𝐧𝐦𝐢𝐧 𝐌𝐢𝐧𝐢𝐬𝐭𝐫𝐲

01/05/2026

01/05/2026

30/04/2026

28/04/2026

27/04/2026

26/04/2026

25/04/2026

24/04/2026

22/04/2026

22/04/2026

21/04/2026

Address

Telephone

Website

Alerts

Contact The Place Of Worship

Shortcuts

Share

Category