06/08/2021
Tuipigei Aihkeh Sehnelgam
ARIZONA, U.S.A. | Aug. 7
Diana Fish, 56
Ka pasal, Loren tawh ka sunmang uh ka semkhia uh hi. Amah pen mi thapiak siam mahmah a, ke’n Adventist Health Center ah ka sem hi. Florida tuipigei-a om pen nuam ka sa uh hi. Ahizong banghiam khat kisam ka kisa uh hi. Ka nupa un full-time ministry ah ka sepkhop theih nadingun Pasian kiangah thu ka ngen uh hi. Siang gen lehang, ka tu ka tate’ omna Tennessee ah ka om uh zahin mundang nuam kasa kei uh hi. North American Division a, Women’s Ministries makaih khawmpi ah ka kikhawm hi. Tua lai ah nakpi taka thungetna le Pasian’ kiangah ki-apna kinei khawm hi. Tua khit ciangin Holbrook Seventh-day Adventist Indian School pana hong pai te’ van-tuamtuam lahna bukneu khatah ka lut leh sangnaupang numeino melhoih pawlkhat in leibeel na bawlbawl uh hi. Keizong sakol-sam leibeel acihte uh thum ka lei hi. Ka lei laitakin tua lai-a om nupi khat in ka nasep hong dongh hi. Khantohna center ah ka seplam ka gen leh tua nu in lamdang sakna tawh buk sunga om, a pam-a nupi khat kawkphei veva kawmin, “Hia nu pen i khantohna center director nu ei ve. Tun bel pensen khinta” ci hi. Tua banah Holbrook pen Arizona state ah om hi, hong ci hi. “Tua lai-ah ten theih nading lampi lah om lo a maw” ci in ka ngaihsun hi. Arizona’ sehnelgam ah teen ding ka geel ngeikei uh hi. Kha 6 hong cingto ta a, Loren tawh thunget ka zomzom lai uh hi. Lawmte khat in Loren pen Tennessee a social work khat ah professor mun awng cih hong gen hi. Tua ahih manin tua lai ah kituah ding ka ngaihsun leuleu uh hi. Loren in Texas state Antonio khuapi a, 2015 General Conference Session ah pai dingin khentat hi. Tua lai-ah a om laitakin sakol-sam beelte a kilak ziahzuahna innpi khat mu a, Holbrook Indian School booth ah a tungta ahihlam kiphawk hi. Tua lai-a nupi khatin Loren’ ngawng-a a –awh “LCSW” badge a muh ciangin theipah hi. “Tua laimal pen, ‘Licensed clinical’ a cih nopna ahia?” ci-in dongh hi. Loren in a lu susuk kawmin, “Licensed Clinical Social Worker” acihna hi ci-in dawng hi. “Tua bang mi khat a kisam hi ve ung” nupinu’n ci hi. Loren in lamdang sakawm, nuihsan kawmin paikhiatsan sawm hi. Ahizongin tua nu in a lawmnu’ nasep zong dotbeh lai hi. Florida Hospital ah khantohna lam semin om hi ci hi. “Tua bang mi khat mah zong, a kisam hi ve ungh” ci leuleu hi. Tua kawmin a gei-a, a pasal (Holbrook a Siapipa hileh kilawm pa) khutvan kawmin sam hi. Tua thuteng Loren in hong nunggen kik hi. “Aw hi maw!” ka ci hi.
nipikaal bangzah hiam khat khit ciangin Holbrook ah khalsung hun awng khat ciang, va hawh dingin ka khentat uh hi. Ka tun ma un, Southern Adventist University panin sapna lai khat Loren in ngah hi. Nasep pen ngah nai lo hi. Buaina lianpi khat hong omvat hi. Pasian in Ama’ hong sawlsawlna ah ka pai nuam takpi uh hiam, ci-in hong ze-et phot bangin ka ki ngaihsun hi. Ka nupa un Holbrook siate tawh, American naupangte leh khangnote kianga, Sang’ min tawh nasep vai ding nai 9 sung bang ka kik*m khop uh hi. Ka kiho khit uh ciangin tua lai-a khangnote le naupangte’ lungsim gimna, buainate a kikuppih thei ding mi, a panpih thei ding mi a kisap lam uh hong gen uh hi. Tua zanin ka ihmut suak het lo hi. Ahizongin zingsang ka thawh ma in, ka lungsim sungah Holbrook ah nasepzia ding teng hong taai dandan hi. Lupna tungpan diang khia-in, ka laibu tau tung-a laibu khat ka man hi. Ka nungpuak ip sung sawksukin General Conference Session lai-a ka pasal laibu ngah ka dok khia hi. Tua laibu min pen, “Follow: Anytime, Anywhere, at Any Cost” “Bang hun, Bang mun, Bangzah takin Haksa taleh: Zui in” cih hi-a, Don Maclafferty’ gelh ahi hi. Tua ka muh phetin, Pasian in Holbrook Indian School ah hong sam taktak hi, ci-in ka kitel hi. Tua lungsim mah Loren’ lungtang sungah a na guansak nadingin Pasian kiangah ka gen pah hi. Thu ngenin ka ngak hi. Ni tampi khit ciangin, Florida-a ka inn vuah ka lut phet uh leh Loren in, Holbrook ah pai dingin Pasian in a deihna hong pulaak khia hi. Tua nitakin kithawi pahin ka vante uh ka guang uh hi. Kaal nih khit ciangin hong kicial pah hi. Holbrook ah Pasian zuithei kahih manun ka lungdam mahmah uh hi.
A beisa k*m 3 lai-a, Sabat 13na i mission sumpi tawh Holbrook Seventh-day Adventist Indian School ah aki lamthak: Gym le Cidamna Phualpi nong huh manun lungdam mahmah hi.
By Diana Fish
