17/05/2026
Amun: Bethel siyin baptist church (Nanphalong myoma13)
Ahun : 9:30Am
Ani : 17.5.2026
Thupi : KHROS ZAWTNA LAMPI
👏🙌👏 khros zawtna lampi ti thupi manga hoilim thei dinga taksa damna leh hun pha ei petu Pa Pathian chungin kipak thu i gen masa ahi.khros i tiphat leh i lalpa jesu khrist genna ahi.khros lampi ite phat leh lekha zik tu khat in Khros lampi chu pakcha leilak lampi a hipon ling pi leilak ah lampi ahi zawl.🙏
👉 Zia khawvel i chennau ahin,mi zosia hi hun khat let mipha hileh misia hileh,khat vei chu Pathian Vaihawmna ma ah dingchiat ding i hiu.(Heb9:27)Zia hun ah chun nang leh keile thiamchang ah I lalpa Jesu zal ah ium theina dingin khros lampi hi izawt tei a ngai hi. Khros hi Pathian tawh mihiam kichamna ahi'n khawvel tawh kikhenna ahi. A ziak chu Eden a Adam leh Evi in Pathian thupiak ala palkek tak ziak un Pathian leh mihiamte kigui zawpna chu ala tan ta'n. Mihiam te chunga Pathian hepi na tawp lo ziak in, a chapa neisun chun khawvel a hun sawl ahi.(Jh3:16)
👉 Zia Chapa jesu zal chun Pathian leh mihiam ten kichamna inei thei kit tau ahi.Pathian leh mihing kikal ah palai khat bep a um ah ama chu Jesu chamna lal chapa ngei chu ahi.(1Tim2:5,Isai9:6). Zia ziak chun Khros bul va tunna lo in Pathian tawh kichamna a um thei puan, khros lampi panglo in vangam, Pa kiang tun thei ahi puai.Mi khat chun Khros lampi a zawt phat leh Ama mihina hi neu suk tial tial intin, a tawpna leh Zero hung hi ding ahi. Nangma chu zero a la um ah Pathian chu number one a la kawi phat leh bangkim a la puak gik zosia jang ta'na.(Mtt11:28-30)Zia ziak chun kuale Pa kianga tung ding kisa zosia chun khros lampi a zawt chiat ding bep uh hilo in, a phak tei diu ahi. Khros bul phazo lo chu Pa ngaidamna chang pua'n tin, a melhet le hi puana.(Gal4:9)mihing zosia hi Pathian in khros bul a kihou champi dingin ei ko chiat uh ahi.(Isai1:18)khros bul a che lo in kuama'n Pathian tawh kichamna nei pua'n tin,Pathian gam le lut pua'na, a ziak chu Khros hi vangam kawtkhak ahi.(Jh10:1-5)
👉 Khros bul tunna dingin chaan ngam phot a ngai hi,a khros ki puakin ei zui hen.(Mtt16:24) jesu khrist ading in zero point a um ngam phot ngai ahi ziak in kua hileh khawvel a minthan ding leh thuneina, Vaihawmna dawi leh chang nuam ten a zuan nuam puau.(Mtt19:16-30)
👉Khros bul tungzo lo khristian te chu a hinkhua a bei hun leh a kumtuang inn ding chu gawtmun meidil chu ahi ta'n,a pel theilo hial ding ahi.Amei lah mitlo ding,ama thagau lah thilo ding,a thi theilo ngawn Kawi khawmna mun ding ahi.(Mk9:43-49) Ziaziak chun
( la hin theina dingin thi masa'nla, la hau theina dingin chaan ngam phawt inla, la let theina ding in neu masa'nla, la pil theina dingin ngawl masa'n).
la thi nung tak leh nuam tak ah um la nawp chun zia khawvel a la damlai nite hi la khualzinna gam ahin malzin la hi dan kihet zing inla, khawvel nawpsakna hawlna ziakin Pathian dawilo lam tak in la hinkhua um nalai te mangliam kha'nla haksa ma leh khros lampi hi petsan him him lo dingin chingthei tak in kalsawn hiti.
Sum Gul(Numb21:1-9)
👉Moses hun lai inle israel chate kannan gam zuan ah a chia lai un Pathian in Hor tang apat Edom pel dingin tuipi san lam ah apui tak ziakin, israel mipi ten, Pathian leh mosi chu a gensia tau a, lalpa lungnatna ziakin mipite lak in gul hangsante a thalut in a thi tau hi.Mose kiang in ngaidam a hung dawn un. Mose lalpa thupiak dungzui in sum eng chu gul lim in a siam ah mawl khat in atak dawk a. Sum eng gul lim kisiam chu a en taphawt in damna a nei hi.ahinlah a en nuamlo te chu adam diak puau hi.nangle khros lam en nuam diak lo la hi chun adamlo nalaite lak ah pang ngei hinla, a pang kha la hi chun kipan ngal dingin i lalpa jesu min in ikichial ahi.
Simtu te zosei Pa Pathian in mailsawm ta hen.
Pastor :- Paugolian Vaiphei
