26/07/2025
#ဒီနေ့ဖြေဖြစ်တဲ့_ဗဟုသုတအဖြေလေး။
*********************************
(မေး)။ ။အရှင်ဘုရား၊ ဂါထာနဲ့ မန္တန် ကွာခြားပုံလေးနဲ့ အစွမ်းထက်ပုံလေး ရှင်းလင်းပေးပါဦးဘုရား။
လိုင်းပေါ်မှာ မန္တန်တွေ ခေတ်စားနေလို့။ မန္တန်တွေက "ဥုံ" ပါတယ်ဘုရား။
********************************
(ဖြေ)။ ။ (ဂါထာနဲ့မန္တန် အထူး)
မြန်မာစာ အဘိဓာန်မှာတော့ အောက်ပါသဘောမျိုး ရေးထားပါတယ်---
✓ ဂါထာဆိုတာ=
၁။ ဆန်းကျမ်းတွင် ပြဆိုထားသည့် စည်းကမ်းတို့နှင့်အညီ ရေးစီသော ပါဠိကဗျာ။
(ဆန်းကျမ်းဆိုတာ ပထမကြီးတန်းရောက်ရင် သင်ရပါတယ်။)
၂။ လိုအင်ဆန္ဒ ပြည့်ဝစေကြောင်း ဩောင်း,ဥုံ ခံ၍ ရွတ်ရသောစာ။
(ဂါထာဆိုတဲ့ စကားလုံးက ပါဠိစာပေ ဝေါဟာရ။)
✓မန္တန်ဆိုတာ=
မန်းမှုတ် ရွတ်ဆိုရသော စကားစု။
(မန္တန်ဆိုတဲ့ စကားလုံးက သက္ကတစာပေ ဝေါဟာရ။)
*******************************
✓(ဥုံပါခြင်း ဥုံမပါခြင်း)
"ဥုံ"က ဟိန္ဒူဗြဟ္မဏ ကျမ်းစာတွေမှ ဆင်းသက်လာတဲ့ စကားလုံး ဖြစ်ပါတယ်။
"ဥုံ"ဆိုတာ (အ-ဥ-မ)စကားလုံး သုံးလုံးကို ကိုယ်စားပြုထားတာ ဖြစ်ပါတယ်။
ဘုရားဟော ပါဠိမှာ ၁။ ဂါထာ ၂။ စုဏ္ဏိယ(ပါဠိစကားပြေ)ဆိုပြီး ၂-မျိုးပဲ ရှိပါတယ်။ မန္တန်ဆိုတာ မရှိသလောက်ကို ရှားပါတယ်။ မရှိဘူးပဲ ပြောရမယ်။
မန္တန်တွေမှာတော့ "ဥုံ"ခံပြီးရွတ်ကြတာ များများတွေ့ရပါတယ်။
ဂါထာတွေမှာတော့ ဘုရားဟောဂါထာတွေမှာ "ဥုံ"မခံပါဘူး။
သာမန်ပညာရှင်တွေရေးတဲ့ ဂါထာအချို့မှာတော့ "ဥုံ"ခံတာ အနည်းငယ် တွေ့ရပါတယ်။ "ဥုံ"မခံတာက များပါတယ်။
*******************************
✓(အစွမ်းထက်ခြင်း အစွမ်းမထက်ခြင်း)
အစွမ်းထက်ခြင်း မထက်ခြင်က- ရွတ်ဖတ်သူရဲ့ ကိုယ်ကျင့်တရားနဲ့ ယုံကြည်မှုအပေါ်မှာ မူတည်မယ် ထင်ပါတယ်။
ထေရဝါဒ ဗုဒ္ဓဘာသာကို ယုံကြည်လက်ခံသူအတွက်တော့ လောကီဂါထာ မန္တန်တွေထက်, ဘုရားဟောဂါထာတွေက ယုံကြည်ဖို့ အကောင်းဆုံး၊ အလေးနက်ဆုံး၊ အစွမ်းထက်ဆုံး၊ တန်ဖိုးအရှိဆုံးပါပဲ။
ဘာကြောင့်လဲဆိုတော့ "ဧကံ ဂါထာပဒံ သေယျော"ဆိုတဲ့အတိုင်း ဘုရားဟောဂါထာတိုင်းမှာ အကျိုးရှိတဲ့ အနှစ်သာရရှိသော အဆုံးအမနဲ့ သစ္စာစကားတွေ ပါနေလို့ပါပဲ။
(ကိုယ်၏ကျန်းမာခြင်း စိတ်၏ချမ်းသာခြင်းနဲ့ ပြည့်စုံပါစေ။)
**********************************
