19/11/2023
"ဝေဘူဆရာတော်ဘုရား၏ တရားထူးရဖို့"
ဒကာ - တပည့်တော်တို့ ပါရမီများ နည်းပါးနေလို့လား
မသိဘူးဘုရား။ မှတ်တော့ မှတ်တာပဲ။
မှတ်ပြီးတဲ့နောက် ပျောက်၊ ပျောက်သွားပါတယ် ဘုရား။
ဆရာတော် - ဒါကတော့ ဒကာကြီးရယ်၊
အခု မိုးတွေ၊ ဘာတွေ ရွာတယ် မဟုတ်လား။
ဒကာ - ရွာပါတယ် ဘုရား။
ဆရာတော် - ရွာတဲ့ အခါကျတော့ အိမ်က မိုးယိုရောဗျ။
အဲသည်လို မိုးယိုတာဟာ အိမ် ကောင်းလို့လား ၊
အိမ်မ ကောင်းလို့လား၊ ဘယ်ဟာ မကောင်းတာလဲ။
ဒကာ - မိုးယိုတာကတော့ အိမ် မကောင်းလို့ပါ ဘုရား။
တရား အားထုတ်တုန်း ဖားအော်သံ ကြားတာကတော့
တပည့်တော်မှာ ပါရမီ နည်းလို့ပါ ဘုရား။
ဆရာတော် - အိမ်က ညံ့လို့လား၊ အိမ်ရှင်က
မပြင်လို့လား။
ဒကာ - အိမ်ရှင်က မပြင်လို့ပါ ဘုရား။
ဆရာတော် - ဒါနဲ့များ မိုးယိုတာ အိမ်ကို အပြစ်တင်
ရသလားဗျ။
ဒကာ - အိမ်က ဘာမှ ပြန်မပြောတတ်တော့
အိမ်ကိုပဲ အပြစ်အားလုံး ပုံချလိုက်ရတာပါ ဘုရား။
ဆရာတော် - ဒါ အိမ်ရှင် အပြစ်လား၊
အိမ်ရဲ့အပြစ်လားဗျ။
ဒကာ _ အိမ်ရှင် အပြစ်ပါ ဘုရား။
ဆရာတော် - ဒါဖြင့် ဖားအော်တဲ့ ဆူညံတာတွေ
ကြားတာကကော ပါရမီ နည်းပါးလို့လားဗျ။
ဒကာ - ပါရမီရှိတဲ့ လူတွေက ခုလို ဆူညံသံတွေ
ရှိလည်း မှတ်နိုင်တယ်လို့ မှတ်သားဖူးပါတယ် ဘုရား။
တပည့်တော်တို့က ပါရမီနည်းပါးတော့ စိတ်ထဲလည်း
ထားလျက်၊ ဆူညံသံကလည်း ကြားလျက်နဲ့
စိတ်က ဟိုရောက်၊ သည်ရောက်။ တရားထူး ရဖို့ကို
တော့ လိုချင်လိုက်တာ၊ တပည့်တော်ထက်
လိုချင်တဲ့သူ မရှိဘူးလို့ ထင်မိပါတယ် ဘုရား။
ဆရာတော် - ကောင်းပါ့ဗျာ။
တရားထူး ရဖို့ လိုချင်တယ်ဆိုရင် ဒကာကြီး
ထမင်းဆာရင် စားချင်တယ် မဟုတ်ပါလား။
ဒကာ - စားချင်ပါတယ် ဘုရား။
ဆရာတော် - အဟုတ်စားချင်တဲ့ အခါကျတော့
ဒကာမကြီး ခူးမကျွေးရင် ဘယ့်နှယ်လဲ။
ဒကာ - ကိုယ်တိုင်ခူးပြီး စားလိုက်တာပါပဲ ဘုရား။
ဆရာတော် - ခူးမပေးရင် ငါတော့ မစားသေးဘူး လို့များ
လုပ်သေးသလား။
ဒကာ - ခူးပြီး စားပါတယ် ဘုရား။
ဆရာတော် - အခုလည်း တရားအားထုတ်ပါ ဆိုတော့
ဆူညံသံတွေ ကြားတယ်၊ အနှောက်အယှက်တွေ
ဖြစ်တယ် ဆိုတာက တရားထူး ရဖို့ကို အဟုတ်
လိုချင်ရင် ကြားပါ့မလားဗျ။
ဒကာ - တပည့်တော် သံသရာဝဋ်ဆင်းရဲကနေ
လွတ်မြောက်တဲ့ တရားထူး ရဖို့ကို အဟုတ်တော့
လိုချင်ပါတယ် ဘုရား။
တပည့်တော်ရဲ့ ပါရမီက နည်းပါးနေလို့
ထင်ပါတယ် ဘုရား။
ဆရာတော် - အခုန ထမင်း အဟုတ်စားချင်တယ်
မဟုတ်လား။
ဒကာ - စားချင်ပါတယ် ဘုရား။
ဆရာတော် - အဟုတ်စားချင်တော့ သူတို့က
မကျွေးလည်း နေပါစေ ဆိုပြီး နေသလားဗျ။
ဒကာ - မကျွေးလည်း နေပါစေ ဆိုပြီး မနေပါ ဘုရား။
ကိုယ်တိုင် ခူးခပ်ပြီး စားလိုက်တာပါပဲ ဘုရား။
ဆရာတော် - အခုလဲ သံသရာဝဋ်ဆင်းရဲက
လွတ်မြောက်ဖို့ တရားထူး ရဖို့ကို အဟုတ်
လိုချင်ရင် ဘယ့်နှယ်လဲ၊ သည်ဖားတွေ အော်နေလို့
ဆိုပြီး လှည့်ပတ် နေဦးမှာလား။
ဒကာ - ဖားတွေကို လှည့်ပတ် မချတော့ပါဘူး ဘုရား။
ဖားသံအပေါ်မှာ ကိုယ့်နားကိုပဲ ဝီရိယ တင်ပေး ရမှာပါ
ဘုရား။
ဆရာတော် - ဒါဖြင့် သည်လိုလုပ်ဗျ။
သာသနာတော်နဲ့ ကြုံရတဲ့ ခေတ်မှာ လူလာဖြစ်တာ
ဆိုတော့ လူတိုင်းမှာ ရှေးပါရမီက နည်း၊ များ မဆို
ရှိကြပါတယ်ဗျာ၊ ဘာက လိုနေတာလဲဗျာ့။
ဒကာ - ဝီရိယ လိုနေပါတယ် ဘုရား။
ဆရာတော် - ဟုတ်တယ်။
တရားထူး ရဖို့က ဝီရိယ တင်ပေးဖို့ လိုတယ်။
#ကျေးဇူးတော်ရှင်
ဝေဘူ ဆရာတော်ဘုရားကြီး
🙏🙏🙏
- Original Writer🙏
ကိုယ်စိတ်နှစ်ဖြာ ရွှင်လန်းချမ်းမြေ့ကြပါစေ
