08/09/2023
သင်ခန်းစာ (၁) ဘုရားသခင်၏နှုတ်ကပတ်တော် (သမ္မာကျမ်းစာ)ကို ခံယူနည်း။
၁။ ဘုရားသခင်၏မှုတ်သွင်း (တိုက်တွန်း)ခြင်းအားဖြင့် ဘုရားသခင်၏သန့်ရှင်းသောပုဂ္ဂိုလ်များက ရေးသားခဲ့ကြသည်။
ခရစ်ယာန်တို့ကိုင်စွဲထားသည့်သမ္မာကျမ်းစာအုပ်(ကျမ်းစောင် ၆၆ ကျမ်းပေါင်းချုပ်)ကို ဘုရားသခင်နှင့်သူ၏သန့်ရှင်းသောသူ ၄ဝ ဦးခန့်တို့သည် ဘုရားသခင်၏တိုက်တွန်းခြင်း၊ ပို့ဆောင်ခြင်း၊ ဖော်ပြခြင်း၊ အိပ်မျက်ပေးခြင်း၊ ရူပါရုံများပေးခြင်းကိုခံကြ၍ ရေးသားခဲ့ကြသည်။ မိမိတို့၏စိတ်ထဲမှအမြင်များကိုကိုယ်တိုင်ထွင်၍ရေးသားကြခြင်းမဟုတ်ပါ။ ရေးသားသူများသည်လူတန်းစားအမျိုးမျိုးမှဖြစ်ကြ၍၊ ဘီစီ ၁၄၀၀ ခန့် မှအေဒီ ၁ဝဝ ခန့်အထိ၊ နှစ်ပေါင်း ၁၅ဝဝ ခန့် အတွင်း ရေးသားခဲ့ကြသော်လည်း ကျမ်းများသည်တစ်ခုနှင့်တစ်ခုလိုက်လျောညီထွေမှုရှိကြသည်။ ရေးသားသည့်သမ္မာတရားများ၏ရည်ရွယ်ချက်သည်လည်းလိုက်လျောညီထွေမှုရှိကြသည်။
ထို့ကြောင့်သမ္မာကျမ်းများအားလုံးသည် ဘုရားသခင်တဆူတည်းထံမှလာကြောင်း ထင်ရှားပါသည်။
သမ္မာကျမ်းများသည် အနန္ဒတန်ခိုး၊ အနန္ဒဥာဏ်နှင့်ပြည့်စုံပြီး၊ ထာဝရအသက်ရှင်တော်မူသောဘုရားသခင်သည်မိမိ၏အလိုတော်နှင့်အညီ၊ အပြစ်ဒုစရိုက်၌ကျဆုံး၍ ၎င်း၌ကျင်လည်နေကြသော လူသားများအား ထာဝရသေကြေပျက်စီးခြင်းမှကယ်တင်ရန် သူ၏မဟာစီမံကိန်းကိုအကောင်အထည်ဖော်နိုင်ရန်နှင့် ၎င်းကိုလူသားများက ရှင်းလင်းစွာ နားလည်သိရှိနိုင်ရန် ဖတ်ရှုလေ့လာဖို့ ဤသမ္မာကျမ်းများကိုရေးသားခိုင်းတော်မူသည်။
ဤသမ္မာကျမ်းတရားများသည်ဘုရားသခင်ထံမှလာသည့်အတွက် လူတို့၏ စိတ်နှလုံးကိုပြောင်းလဲပေးနိုင်ပါသည်။ ဒုစရိုက်အပြစ်သားများကို ကောင်းသောသူ၊ သန့်ရှင်းဖြောင့်မတ်သောသူ၊ အပြစ်ကင်းသောသူ၊ ချစ်ခြင်းမေတ္တာရှိသောသူအဖြစ်သို့ ပြောင်းလဲပေးနိုင်၍၊ ပြောင်းလဲပေးလေ့ရှိသည်။ ကမ္ဘာတစ်ဝှမ်းလုံးနှင်သက်ဆိုင်သည့်အတိတ် ကာလ၊ ပစ္စုပ္ပန်ကာလ၊ အနာဂါတ်ကာလတို့၌ဖြစ်ပျက်ခဲ့ သည့်(ဖြစ်ပျက်ဦးမည့်) အရေးကြီးသောအချက်များကို ကြိုတင်ဖော်ပြပေး၍၊ ပြည့်စုံလျှက်ရှိသည်။ လူမျိုးပေါင်းစုံ၊ ဘာသာပေါင်းစုံ၊ နတ်ကိုးကွယ်သူများ၊ ဘာသာတရားမရှိသူများ၊ ကမ္ဘာ့သိပ္ပံပညာရှင်များတို့သည် သမ္မာကျမ်းစာကို စစ်ဆေး၊ လေ့လာပြီး၊ လက်ခံယုံကြည်ခဲ့ကြသူများ နေ့စဉ် တိုးပွါးလျှက်ရှိသည်။ သမ္မာကျမ်းစာကိုလေးနက်စွာစစ်ဆေးလေ့လာခြင်းမရှိ၊ အတွင်းကျကျ နားလည်ခြင်းမရှိသောသူများသည်ဝေဖန်၊ တိုက်ခိုက်မည်ဖြစ်သော်လည်း၊ အတွင်းကျကျ၊ လေးနက်စွာလေ့လာ၊ နားလည်သူတိုင်း လက်မခံပဲမနေနိုင်ကြပါ။
ကျမ်းစာ၏မကုန်ဆုံးနိုင်သောထူးဆန်းနက်နဲ၊ အံ့ဖွယ်ရာများကို နေ့စဉ်ဖတ်ရှုလေ့လာရာမှရရှိ ခဲ့ကြသည်။ ဝမ်းမြောက်ခြင်း၊ ငြိမ်သက်ခြင်း၊ ရောင့်ရဲတင်းတိမ်ခြင်း၊ စိတ်နှလုံးပြောင်းလဲခြင်းကို အသစ်တဖန်တွေ့ကြုံခံစားစေ လေ့ရှိသည်။ ထို့ကြောင့်ဤသမ္မာကျမ်းစာ၌ပါသော တရားများသည် ယုံကြည်အားကိုးထိုက်သည့်အနန္ဒတန်ခိုးတော်နှင့်ပြည့်စုံသော ဘုရားသခင်ထံမှလာကြောင်း တွက်၊ ကျမ်းစာ၏တရားများသည်မိမိ၏ဘဝအသက်တာအတွက်ဖြစ်ကြောင်း လုံးလုံးလျားလျား ယုံကြည်ကိုးစား၊ လက်ခံသင့်ပါသည်။
၂။ သမ္မာကျမ်းစာသည် တစ်ခုတည်းသော ထာဝရအသက်ကို ပေးနိုင်သည့်ကယ်တင်ခြင်းလမ်းပြစာအုပ်ဖြစ်သည်။
ခရစ်ယာန်သမ္မာကျမ်းစာအုပ် ၆၆ ကျမ်းသာလျှင် လူသားများကို ထာာဝရအသက်ပေးနိုင်သည့် သမ္မာတရားများဖြစ်သည့် ဘုရားသခင်၏အလိုတော်အလုံးစုံကို ဖော်ပြသောတရားများ၊
ဖြောင့်မတ်သန့်ရှင်းခြင်းလမ်းကို သွန်သင်ပေးနိုင်သည့်ကျမ်းများ၊ ကောင်းကင်နိုင်ငံကို ပို့ဆောင်ပေးနိုင်သည့်ကျမ်းများဖြစ်သည်။ ၎င်း ၆၆ ကျမ်းများသာလျှင် ဘုရားသခင်ကိုယုံကြည်သူများအတွက် တွေးခေါ်ကြံစဉ်၊ ပြောဆို၊ စားသောက်၊ ဝတ်ဆင်၊ သွားလာ၊ နေထိုင်၊ လုပ်ကိုင်ခြင်း၌ တစ်မျိုးတည်းသော လမ်းပြစာစောင်များဖြစ်ကြသည်။ ဤ ၆၆ ကျမ်းများမှအပ၊ ထာဝရအသက်ရှင်ရန်လမ်းပြသည့် အခြားစာအုပ်တစ်အုပ်မျှ ကမ္ဘာမှာမရှိတော့ပါ။ ဤ ၆၆ ကျမ်းသည်ပြီးပြည့်စုံသည့်သမ္မာတရားများဖြစ်သည်။ အခြားမည်သည့်လမ်းပြကျမ်းမျှ မလိုအပ်တော့ပါချေ။ (တရားဟော ၃၂း၄၇။ ဆာ ၁၁၉း၁ဝ၅။ ဟေရှာ ၄ဝး၈။ လု ၂၄း၄၄။ ယော ၅း၃၉။ ၁၇း၁၇။ ၂ တိ ၃း၁၅-၁၇)
၃။ ဤသမ္မာကျမ်းစောင် ၆၆ ကျမ်းအပြင်၊ အခြားမည်သည့်ကျမ်းမျှ ထပ်၍အသစ်မသွင်းရ၊ နှုတ်ပယ်ခြင်းလည်းမပြုရပါ။
ဤခရစ်ယာန်ကျမ်းစာ ၆၆ ကျမ်းသည် ထာဝရအသက်ရရန်ကယ်တင်ခြင်းအတွက်သော်လည်းကောင်း၊ ဘုရားသခင်၏အလိုတော်နှင့်အညီအသက်ရှင်ရန်နည်းလမ်းပြအတွက်သော်လည်းကောင်း ပြည့်စုံလုံလောက်ပါသည်။ အကြောင်းမှာ ယင်း ၆၆ ကျမ်းများသည်ဓမ္မဟောင်းခေတ်နှင့်ဓမ္မသစ်ခေတ် အဆက်ဆက်၌ သန့်ရှင်းသောဘုရားသခင်၏လူများအားလုံးသည် လက်ခံ၊ အသုံးပြု၊ ကျင့်သုံးခဲ့သည့်ကျမ်းများဖြစ်ခြင်း၊ ဘုရားသခင်၏သန့်ရှင်းသော လူများ၊ ပရောဖက်များ၊ တမန်တော်များ၊ ရှင်ဘုရင်များတို့၏ရေးသားသောကျမ်းစာစောင်များဖြစ်ခြင်း၊ ယင်းကျမ်းများတို့သည် ကျမ်းတစ်ခုနှင့်တစ်ခုကိုးကားကြခြင်း၊ လိုက်လျောညီထွေမှုရှိကြခြင်း၊ လူ၏အပြစ်ဒုစရိုက်အသက်တာမှ သန့်ရှင်းဖြောင့်မတ်သည့်အသက်တာသို့ပြောင်းလဲပေးခြင်းတို့ကြောင့်ဖြစ်သည်။
ထိုကြောင့် သမ္မာကျမ်း ၆၆ သည် ဘုရားသခင်၏အလိုတော်အပြည့်အစုံရေးသားထားသည့်ကျမ်းများဖြစ်သည့်အတွက် ဤ ၆၆ ကျမ်းမှအပ၊ အခြားကျမ်းများကို ထပ်၍ထည့်သွင်းခြင်း၊ သို့မဟုတ် (၆၆) ကျမ်းထဲမှ တရားစကားတစ်ချို့ကို နှုတ်ပယ်ခြင်းမပြုလုပ်ရန် ဘုရားသခင်သည် သေချာစွာ လူတိုင်းအား သတိပေးခဲ့ပြီးဖြစ်ပါသည်။ (တရားဟော ၄း၂။ သုတ္တံ ၃ဝး၅၊ ၆။ ဂလာ ၁း၈၊ ၉။ ၁ ပေ ၁း၂၂-၂၅။ ၄း၁၁။ ဗျာ ၂၂း၁၈-၁၉)။
၄။ တရားသတင်းစကားတစ်ခုခုကို သမ္မာကျမ်းစာနှင့်သော်လည်းကောင်း၊ ပညတ်တော်နှင့်သော်လည်းကောင်း ကိုက်ညီမှသာ ဘုရားသခင်ထံမှလာသည့်တရားအဖြင့် လက်ခံရမည်။
လူတစ်ဦး သို့မဟုတ် အဖွဲ့အစည်းတစ်ဖွဲ့၏ပြောဆို၊ ဟောပြော၊ သွန်သင်သည့်တရားသည် သမ္မာကျမ်း ၆၆ ကျမ်းနှင့်သော်လည်းကောင်း၊ ပညတ်တော်(၁ဝ)ပါးနှင့်သော်လည်းကောင်း ကိုက်ညီခြင်းမရှိလျှင် ယင်းတရားကို လက်မခံသင့်ပါ။ ၎င်းတရားမျိုးသည် ဘုရားသခင်၏အလိုတော်နှင့်ဆန့်ကျင်နေသည်ကို သတိချပ်နားလည်ရမည်။ ထိုသို့သောတရားမျိုး၌အလင်းမရှိ၊ လိုက်သူများအတွက် ထာဝရအသက်ဆုံးရှုံးသွားမည်ဖြစ်သည် (ဟေရှာ ၈း၂ဝ။ ၂၈း၁ဝ၊ ၁၃။ ၃၄း၁၆။ မဿဲ ၄း၄-၁ဝ။ တမန် ၄း၁၉။ ၅း၂၉။ ဂလာ ၁း၈၊ ၉။ ၁ သက် ၂း၁၃)။
ထို့ကြောင့်လူပုဂ္ဂိုလ်တစ်ဦးဦး(သို့)အသင်းအဖွဲ့အစည်းတစ်ခုခု၏တရားနှင့်သူတို့၏ဟောပြော၊ သွန်သင်ချက်များသည်သမ္မာကျမ်းစာ ၆၆ ကျမ်း၏သွန်သင်ချက်များနှင့်သော်လည်းကောင်း၊ ပညတ်တော်(၁ဝ)ပါးတို့နှင့်သော်လည်းကောင်း ကိုက်ညီမှုရှိမှသာလိုက်ခံသင့်ပါသည်။ အကယ်၍ထိုကဲ့သို့ကိုက်ညီမှုမရှိလျှင် မိမိ၏မိသားစုနှင့်ဆွေမျိုးတော်စပ်ခြင်း၊ အသင်းအဖွဲ့၏ခင်တွယ်ဆက်သွယ်မှု၊ ကူညီမစမှု၊ ခမ်းနားကြီးကျယ်မှုတွေကို အားနာလိုက်လျောခြင်း၊ ခြိမ်းခြောက်ပြစ်တင်ညှင်းဆဲမှုတွေကို ကြောက်ရွံ့ခြင်းမရှိပဲ၊ ငြင်းပယ်၊ စွန့်ခွါ၊ ကျောခိုင်းဝံ့ရမည်။ ခရစ်တော်က၊ သူ၏နာမကြောင့် မိမိ၏ညီအကိုမောင်နှမ၊ သားသမီး၊ မိဘ၊ ပစ္စည်းဥစ္စာ၊ အိမ်၊ လယ်ယာ၊ အသက်ကိုပါစွန့်ရဲ၍၊ ၎င်းတို့ကိုငြင်းပယ်ခြင်းမရှိသောသူသည် သူ၏နောက်လိုက်၊ တပည့်မဖြစ်နိုင်ကြောင်းပြောခဲ့ပါသည်။ (ထွက် ၃၄း၂၇။ ယေရမိ ၁း၂။ ယေဇ ၁း၃။ ဂလာ ၁း၁၂။ ၂ တိ ၃း၁၆။ ၂ ပေ ၁း၂ဝ၊ ၂၁။ ဗျာ ၁း၁၁၊ ၁၉)။
၅။ သမ္မာတရားများကို စိတ်နှလုံးဖွင့်ပေးခြင်းနှင့် သန့်ရှင်းသောဝိညာဉ်တော်ကူညီပေးမှသာ နားလည်၊ ကျင့်သုံး၊ လိုက်လျှောက်နိုင်သည်။
ဘုရားသခင်၏နှုတ်ကပတ်တရားများသည်ဘုရားသခင်ထံမှလာသည့်တရားများဖြစ်သလို၊ လူ၏ညာဏ်ပညာ၊ ခွန်အား အားဖြင့် နားလည်၊ လိုက်လျှောက်နိုင်ခြင်းမဖြစ်နိုင်ပါ။ သန့်ရှင်းသော ဝိညာဉ်တော်ဘုရား၏အကူအညီဖြင့်သာ ဘုရားသခင်၏တရားများကို နားလည်၊ လိုက်လျှောက်နိုင်သောကြောင့်၊ သူ၏နှုတ်ကပတ်တရားများကိုလေ့လာ၊ ဖတ်ရှုရာ၌နားလည်သဘောပေါက်ရန်နှင့်မျမိအသက်တာ၌တရားတော်များကိုလိုက်လျှောက်၊ ကျင့်သုံးနိုင်ရန် စိတ်နှလုံးအကြွင်းမဲ့ဖြင့်လေ့လာပြီး၊ သန့်ရှင်းသောဝိညာဥ်တော်၏အကူအညီကို တောင်းခံရပါမည်။ ၎င်းတရားများကိုလည်း နားလည်နိုင်ရန်နှင့်လိုက်လျှောက်နိုင်ရန် စိတ်နှလုံးနှိမ့်ချပြီး၊ ဆက်ကပ်ခြင်းရှိရန်လိုအပ်ပါသည် (ဟေရှာ ၅၅း၁ဝ-၁၁။ ယောဟန် ၇း၁၇။ ၁၆း၁၃။ ၁ ကော ၂း၁ဝ-၁၄။ ၂ တိ ၂း၁၅။ ၂ ပေ ၃း၁၅-၁၈)။
၆။ ဓမ္မဟောင်းကျမ်းနှင့်ဓမ္မသစ်ကျမ်း (၆၆) ကျမ်းများမှအပ၊ အပိုကရိဖာ(Apocrypha)ကျမ်းများကို လက်မခံသင့်ပါ။ အကြောင်းမှာ-
(၁) အပိုကရီဖာကျမ်းများသည်ဟေဗြဲလူမျိုးတို့လက်ခံသည့်ကျမ်းများထဲတွင်ထည့်သွင်းရေတွက်ခြင်းမရှိပါ။ (၂) ခရစ်တော်နှင့်တမန်တော်များသည်တစ်ခါမျှ ၎င်းကျမ်းများမှကောက်နှုတ်ခြင်းမရှိပါ။
(၃) သမ္မာကျမ်းစာ၏သွန်သင်ချက်များနှင့်ဆန့်ကျင်နေကြသည်။
(၄) သမိုင်းနှင့်ပထဝီဖော်ပြချက်တွေလည်း များများလွဲမှားနေကြသည်။
(၅) ရှေးဦးအသင်းတော်သည် ၎င်းကျမ်းများကိုပယ်ခဲ့သည်။ အေဒီ ၄ဝဝ တိုင်အောင်မည်သည့်ခရစ်ယာန်အသင်းကမျှ လက်ခံခြင်းမရှိခဲ့ပါ။
(၆) ၎င်းကျမ်းများကိုရေးသားသူများ မသိရပါ။
(၇) ၎င်းသွန်သင်ချက်များသည်ဝိညာဉ်ရေးအသက်တာစံနှင့်ကိုက်ညီခြင်းမရှိပါ။
ထို့ကြောင့်သမ္မာကျမ်း ၆၆ ကျမ်း၌တစ်ခုခုနှင့်ဆန့်ကျင်၊ လိုက်လျောညီထွေမှုမရှိသော အပိုခရိဖာ (Apocrypha) ကျမ်းများကို ဘုရားသခင်၏မှုတ်သွင်းသည့်ကျမ်းအဖြင့် လက်ခံရန်မဖြစ်နိုင်ပါချေ။ ၎င်းကျမ်းမျိုးကိုလက်ခံနေရလျှင် ကောင်းကင်နိုင်ငံ၌အသက်ပင်နှင့်အခြားသောထာဝရအကျိုးများကို ဘုရားသခင်နှုတ်ပယ်တော်မူမည်ဖြစ်သည် (ဟေရှာ ၈း၂ဝ။ ဂလာ ၁း၈၊ ၉။ ၂ တိ ၃း၁၅-၁၇။ ၁ ပေ ၁း၂၂၊ ၂၅။ ဗျာ ၂၂း၁၈၊ ၁၉)။
၇။ ဓမ္မကျမ်း (Testament) နှင့် ပဋိညာဉ် (Covenant) မတူကြပါ။ အဓိပ္ပါယ်တခြားစီဖြစ်သည်။
ဓမ္မကျမ်း (Testament)ဆိုသည်မှာ ဘုရားသခင်၏သန့်ရှင်းသောလူများ ရေးသားသည့် မှန်သောသမ္မာတရား(ဓမ္မကျမ်း) ၆၆ ကျမ်းကိုဆိုလိုသည်။
ဓမ္မကျမ်း(သမ္မာကျမ်း)များထဲတွင် အဟောင်းနှင့်အသစ်မရှိပါ၊ သမ္မာကျမ်းစာရေးသားသူများသည်လည်း သမ္မာကျမ်းစာ(အဟောင်းနှင့်အသစ်) ခွဲခြားထားခြင်းမရှိကြပါ။ “ဓမ္မဟောင်းကျမ်း၊” “ဓမ္မသစ်ကျမ်း” ဆိုသည့်စကားစုသည်သမ္မာကျမ်းစာအသင်းမှ တီထွင်ထားသည့်စကားစုများဖြစ်သည်။ ဓမ္မကျမ်းစာ (၆၆) စောင်ထဲတွင် “ဓမ္မဟောင်းကျမ်း” (သို့) “ဓမ္မသစ်ကျမ်း” ဆိုသည့်စကားစု တစ်လုံးမျှမပါရှိပါ။ သမ္မာကျမ်းစောင်(၆၆)ကျမ်းထဲတွင်အဟောင်းနှင့်အသစ်လည်းမရှိပါ။ ထို့ကြောင့်သမ္မာကျမ်း(၆၆)ကျမ်းစလုံးကို ဘုရားသခင်၏နှုတ်ကပတ်တရား(သမ္မာတရား/ဓမ္မတရား)များအဖြစ် လက်ခံအသုံးပြုရမည်ဖြစ်သည်။
ပဋိညာဉ်(Covenant)ဆိုသည်မှာ လူနှစ်ဦး (သို့) အဖွဲ့နှစ်ဖွဲ့အကြား၌ ပြုထားသည့် လေးနက်သောကတိဝန်ခံချက်ပြုခြင်း (solemn promise/covenant) ကိုဆိုလိုသည်။ ဥပမာ- ဘုရားသခင်နှင့်အာဗြဟံအကြားပြုသည့်ကတိ၊ ဘုရားသခင်နှင့်ဣသရေလူများအကြားပြုသည့်ကတိ (ကမ္ဘာ ၁၂း၂။ ဂလာ ၃း၁၆)။
ပဋိညာဉ်(Covenant) မှာမူ ပဋိညာဉ်အဟောင်းနှင့်ပဋိညာဉ်အသစ်ရှိပါသည်။ ပဋိညာဉ်အဟောင်းနှင့်ပဋိညာဉ်အသစ်၏ခြားနားချက်နှင့်တူညီချက်များကိုနားလည်နိုင်ရန် ဆက်လက်လေ့လာကြပါစို့။
၈။ လူတို့နှင့်ပြုခဲ့သည်ဘုရားသခင်၏ ပဋိညာဉ်(လေးနက်သည့်ကတိ)များ။
(၁) အာဗြဟံထံဘုရားသခင်၏ပဋိညာဉ် (ပဋိညာဉ်အဟောင်းနှင့်ပဋိညာဉ်အသစ်) (အချိန်- ဘီစီ ၂ဝဝဝ ခန့်)။
- ဘုရားသခင်၏ပဋိညာဉ်(ကတိ)- “သင့်ကိုလူမျိုးကြီးဖြစ်စေမည်။ သင်အားဖြင့်လူအပေါင်းတို့သည် ကောင်းကြီးမဂ်လာကိုခံရလိမ့်မည်” (က ၁၂း၂-၃။ ၂၂း၁၆-၁၈။ ဂလာ ၃း၁၆။ ဟေဗြဲ ၆း၁၄-၁၇)။
- အာဗြဟံ၏ တုန့်ပြန်မှု- “အာဗြဟံသည် ထာဝရဘုရားကိုယုံကြည်သည်ဖြစ်၍၊ သူ၏ယုံကြည်ခြင်းကို ဖြောင့်မတ်ခြင်းကဲ့သို့မှတ်တော်မူ၏” (က ၁၅း၆။ ရောမ ၄း၃)။ ဘုရားသခင်၏စကားကိုနားထောင်၍ အရေဖျားလှီးသည်။ ဘုရားသခင်၏ပညတ်အမျိုးမျိုးတို့ကို စောင့်ရှောက်ခဲ့သည်။ သူ၏သားကိုလည်း ယဇ်အနေဖြင့်ပူဇော်သည့်တိုင်အောင်ဘုရားကိုယုံကြည်၍နားထောင်ခဲ့သည် (က ၁၂း၁-၅။ ၁၇း၉-၂၆။ ၂၆း၅။ ရောမ ၄း၁၂။ ဟေဗြဲ ၁၁း၈၊ ၁၇။ ယာကုပ် ၂း၂ဝ-၂၆)။ ထို့ကြောင့်ဘုရားသခင်သည်အာဗြဟံအပေါ်ြပုသည့် ဤပဋိညာဉ်(ကတိ)ကိုပြည့်စုံစေခဲ့ပါသည်။ သို့သော်၎င်းပဋိညာဥ်(ကတိ)တော်ကိုအောင်မြင်စေရန် အာဗြဟံ၌ယုံကြည်ခြင်းဖြင့် ဘုရားသခင်၏စကားကိုနားထောင်ခြင်းရှိရန်လိုအပ်သလို၊ ဘုရားသခင်ကိုယုံကြည်ခြင်းဖြင့်နားထောင်ခဲ့ပါသည်။ ဤအချက်သည်အာဗြဟံ၏အမျိုးမှဣသရေလလူမျိုးကြီး ပေါ်ပေါက်လာခြင်းဖြင့်ပြည့်စုံခဲ့ပါသည်။
သို့သော်ဤပဋိညာဉ်၌ ဟောင်းသွားသည့်အပိုင်းမှာ သင့်ကိုလူမျိုးကြီးဖြစ်စေမည် ဆိုသောအပိုင်းကဏ္ဏဖြစ်သည်။ အကြောင်းမှာ ဣသရေလလူမျိုးတို့သည် ဘုရားသခင်နှင့်ပဋိညာဥ်(ကတိ)ဖွဲ့သည့်အပေါ်၌သစ္စာမရှိပဲ၊ ၎င်းပဋိညာဥ်ကိုချိုးဖောက်၍၊ ယုံကြည်ခြင်းမရှိကြသောကြောင့် သူ၏လူမျိုးကြီးအဖြစ်မှ ပယ်ရှားပစ်ခြင်းခဲ့ကြသည်။ ထို့ကြောင့်ဘုရားသခင်သည်သူတို့ကို မကြည့်ရှုမပြုစုပဲ၊ နေခဲ့သည် (ရောမ ၉း၃ဝ-၃၃။ ဟေဗြဲ ၈း၇-၉၊ ၁၃)။
(၂) ဣသရေလလူတို့နှင့်ဘုရားသခင်၏ပဋိညာဉ်(ဟောင်းသွားသည့်ပဋိညာဉ်) (အချိန်- ဘီစီ ၁၄၄ဝ ခန့်)။
တဖန်၊ ဘုရားသခင်သည်ဣသရေလလူမျိုးနှင့်သိနာ (Sinai)တောင်ခြေတွင် ပဋိညာဥ်ဖွဲ့ခဲ့သည်။
- ဘုရားသခင်၏ပဋိညာဉ်(ကတိစကား)- “သင်တို့သည် ငါ့စကားကိုနားထောင်လျှင် သင်တို့သည်ငါပိုင်သော ဘဏ္ဍာဖြစ်ရမည်” (ထွက် ၁၉း၅-၈)။
- ဣသရေလလူများ၏ပဋိညာဉ်(ကတိစကား)- “ထာဝရဘုရားမိန့်တော်မူသမျှအတိုင်း အကျွန်ုပ်တို့ပြုပါမည်” (ထွက် ၁၉း၅-၈။ ၂၄း၃-၈)။
*ဤပဋိညာဉ်(ကတိစကား)ပြည့်စုံအောင်မြင်နိုင်ရန် ဣသရေလလူများသည်ဘုရားသခင်ကိုယုံကြည်ခြင်းနှင့်သူ၏စကားကိုနားထောင်ခြင်းရှိဖို့လိုအပ်ပါသည်။ သို့သော် သူတို့မယုံကြည်ကြ၊ နားမထောင်ကြပါ။ ထို့ကြောင့် ၎င်းပဋိညာဉ်ကို ဘုရားသခင်သည်ပြယ်စေတော်မူသည်၊ ဟောင်းသွားစေတော်မူသည် (ရောမ ၉း၃ဝ၊ ၃၁။ ဟေဗြဲ ၈း၆-၁၃)။ ဟောင်းသွားသည့်ပဋိညာဉ်ဆိုသည်မှာ ဤပဋိညာဉ်ပဲဖြစ်သည်။ သမ္မာကျမ်းများ-ကမ္ဘာဦးကျမ်းမှမာလခိကျမ်းများ ဟောင်းသွားသည်မဟုတ်ပါ၊ ဟောင်းသွားကြောင်းသမ္မာကျမ်း၌မရှိပါ၊ သမ္မာကျမ်းစာ (သို့) ပညတ်တော်(၁ဝ)ပါးသည် ဟောင်းသွားခြင်းမရှိပါ။
ဤနေရာတွင်လူတချို့သည် “ကမ္ဘာဦးကျမ်းမှမာလခိကျမ်းအထိ ကျမ်းအားလုံးဟောင်းသွားပြီ၊ ပညတ်တော်(၁ဝ)ပါးလည်းဟောင်းသွားပြီ၊ လက်ဝါးကပ်တိုင်မှာပြီးဆုံးသွားပြီ၊ ပညတ်တော်(၁ဝ)ပါး လည်းစောင့်ဖို့မလိုတော့ဘူး၊” ဟု ထင်မြင်ပြောဆိုတတ်ကြသည်။ ဤသို့ယူဆခြင်းသည် မှားသောယူဆချက်ဖြစ်သည်။ အဘယ်ကြောင့်ဆိုသော်-
* ဓမ္မကျမ်းများ (သို့) ပညတ်တော်(၁ဝ)ပါးသည် ပဋိညာဉ်မဟုတ်ပါ။ ပဋိညာဉ်သည်ဘုရားသခင်၏လေးနက်သောကတိတော်ဖြစ်သည်။ ပဋိညာဉ်(ကတိတော်)ကို ပြည့်စုံစေနိူင်ရန် လိုက်နာရမည့်စည်းမျဉ်း၊ ပညတ်များသာဖြစ်သည်။
အကြောင်းမှာ- အာဗြဟံသည်ဘုရားသခင်ကိုယုံကြည်သောအားဖြင့်ဖြောင့်မတ်ခြင်းရရှိခဲ့ပြီးသည့် နောက်ပိုင်းတွင်လည်း ပညတ်အမျိုးစုံတို့ကို စောင့်ရှောက်ခဲ့သည် (ကမ္ဘာ ၁၇း၁။ ၂၆း၅)။ ပညတ်တော်စောင့်ခြင်းသည်ယုံကြည်ခြင်း၏အသီး၊ ဖြောင့်မတ်သူတို့၏စောင့်ရမည့်ပညတ်ဖြစ်သည်။ သခင်ယေရှုက၊ “ငါ့ကိုချစ်လျှင်ငါ့ပညတ်တို့ကိုစောင့်ရှောက်ကြလော့” (ယောဟန် ၁၄း၁၅) ဟုပြောခဲ့သလို သူနှင့်ပဋိညာဉ်ပြုသူသည် ပညတ်တော်(၁ဝ)ပါးအပါအဝင်၊ သူ၏အသက်တာစည်းမျဉ်းဥပဒေများကို စောင့်လျှေက်ရမည်ဖြစ်သည် (ထွက် ၁၉း၅။ ၂၄း၇)။ ထိုနည်းတူ ပဋိညာဉ်အသစ်မှာလည်း ယုံကြည်သူများသည် ပညတ်တော်ကိုကျောက်ပြားပေါ်၌မရေးတော့ပဲ၊ စိတ်နှလုံးအထဲ၌ရေးသားခြင်းခံရသည့်အတွက် (ဟေဗြဲ ၈း၁ဝ။ ၁ဝး၁၆)၊ ချစ်ခြင်းမေတ္တာရှိလျှင် ပညတ်တော်နှင့်အညီအသက်ရှင်ရမည်ဖြစ်သည် (ယော ၁၄း၁၅။ ရော ၁၃း၈-၁ဝ)။
* ဣသရေလလူမျိုးနှင့်ဘုရားသခင်တို့စပ်ကြား၌ဖွဲ့ထားသည့်ပဋိညာဉ် တည်မြဲပြည့်စုံရန် ယုံကြည်ခြင်းနှင့်နားထောင်ခြင်းလိုအပ်ပါသည်။
(၃) ဘုရားသခင်နှင့်လူတိုင်းတို့၏စပ်ကြားတွင်ဖွဲ့ရသည့်ပဋိညာဉ်အသစ် (အေဒီ ၃၁-…)
- ဘုရားသခင်၏ပဋိညာဉ်(ကတိ) - “သားတော်ကိုယုံကြည်သောသူအပေါင်းတို့သည်ပျက်စီးခြင်းသို့မရောက်၊ ထာဝရအသက်ကိုရမည်…” (ယောဟန် ၃း၁၆၊ ၁၈)။ ရောမ ၁ဝး ဧဖက် ၂း၈-၁ဝ။ ဟေဗြဲ ၈း၆-၁၃)။
- လူသားအားလုံး တုန့်ပြန်ရမည့်ပဋိညာဉ် -
“ယုံကြည်သောအားဖြင့်ကျေးဇူးတော်ကြောင့် ကယ်တင်ခြင်း(ဖြောင့်မတ်ရာ)သို့ရောက်ရ၏” (ဧဖက် ၂း၈-၁ဝ။ ဂလာ ၃း၁၆။ ရောမ ၉း၃ဝ)။ ယုံကြည်ခြင်းမရှိလျှင်စိတ်တော်နှင့်မတွေ့နိုင်ပါ (ဟေဗြဲ ၁၁း၆)။
- သို့သော် ယုံကြည်ခြင်းသည်ကောင်းသောအကျင့်ရှိရမည် (ဧဖက် ၂း၁ဝ)။ အသက်ရှင်သည့်ယုံကြည်ခြင်း(အကျင့်ရှိ၍၊ နားထောင်ခြင်းရှိသည့်ယုံကြည်ခြင်း)ဖြစ်ရမည် (ယာကုပ် ၂း၁၄-၂၆)။ တနည်းအားဖြင့်ဆိုသော် ပညတ်တော်ကိုလည်း စောင့်သည့်ယုံကြည်ခြင်းမျိုးဖြစ်ရမည် (ယောဟန် ၁၄း၁၅။ ရောမ ၃း၃၁။ ဧဖက် ၂ဂ၉-၁ဝ။ ဟေဗြဲ ၈း၆-၁၃။ ၁ ယော ၂း၃-၆)။
*ဤပဋိညာဉ်(ကတိ)အသစ်သည်လည်း ပြည့်စုံစေရန် ယုံကြည်ခြင်းနှင့်နားထောင်ခြင်းရှိရမည်။
၉။ လက်ဝါးကပ်တိုင်မှာ ပြီးဆုံးသည့်ပညတ်တရားများနှင့် ဆက်လက်တည်ရှိသည့်ပညတ်တရားများ။
(၁) ကပ်တိုင်၏အရိပ်များ/ကပ်တိုင်မှာပြီးဆုံးသွားသည့်ပညတ်တရားများ။
- တိရစ္ဆာန်ဖြင့်ယဇ်ပူဇော်ခြင်း (ဝတ် ၁-၃။ ဟေဗြဲ ၁ဝး၄-၇)။
- အရေဖျားလှီးခြင်း (က ၁၇◌း၁ဝ-၁၄။ ဝတ် ၂ဝး၁-၃။ ဂလာ ၅း၆။ ၆း၁၅)။
- ပွဲနေ့များ (ဝတ် ၂၃း တော ၂၉း၁-၁၁။ တရားဟော ၁၆း၁-၁၇။ ဂလာ ၄း၁ဝ။ ကော ၂း၁၆၊ ၁၇)။
- လူ၊ နေအိမ်၊ ပစ္စည်းများကို ရေဖြင့်ဆေးကြောသန့်စင်ခြင်း (ဝတ် ၁၂-၁၅။ မာကု ၇◌း၁-၈)။
- ပညတ်တရား လွန်ကျူးသည့်အတိုင်း အပြစ်ဒဏ်ပေးခြင်း (ဝတ် ၂ဝ။ ၂၄း၂၂။ မဿဲ ၅း၃၈-၄၈)။
(၂) ကပ်တိုင်၏အရိပ်မဟုတ်သည့်/ကပ်တိုင်မှာ မပြီးဆုံးသည့်ပညတ်တရားများ။
- ပညတ်တော်ဆယ်ပါး (ထွက် ၂ဝး၃-၇။ မဿဲ ၅း၁၇-၄၈။ ရောမ ၂း၁၁-၁၆။ ၃း၃၁။ ၁၃း၈-၁ဝ)။
- ဆယ်ဖို့တစ်ဖို့နှင့်အလှူပေးကမ်းခြင်း (ဝတ် ၂၇း၃ဝ-၃၂။ မာလ ၃း၈-၁ဝ။ မဿဲ ၂၃း၂၃)။
- မစင်ကြယ်သည့်အသားနှင့်အသွေးမစားရန် (က ၇း၂-၃။ ဝတ် ၇း၂၆။ ၁၁။ ဟေရှာ ၆၆း၁၇။
တမန် ၁၅း၁၉-၂ဝ)။
- မှန်သည့်ချိန်ခွင်/အလေး/အတိုင်းအတာကိုသာသုံးရန် (ဝတ် ၁၉း၃၅-၃၇။ တရား ၂၅း၁၃၊ ၁၄)။
- မှန်ကန်စွာ/မျှတစွာ တရားစီရင်ရန်။ တံစိုးလက်ဆောင်မယူရန် (ထွက် ၂၃း၂၊ ၃၊ ၆-၈)။
- ပြည့်တန်ဆာအလုပ် မလုပ်ရန် (ဝတ် ၁၉း၂၉။ တရား ၂၃း၁၇)။
- လိင်တူလက်ထပ်ခြင်း မပြုရန် (ကမ္ဘာ ၂း၂၄။ ၁၉း၄၊ ၅။ ဝတ် ၁၈း၂၂)။
- ရန်သူကို ချစ်ရန် (ထွက် ၂၃း၄၊ ၅။ ဝတ် ၁၉း၁၃-၁၈၊ ၃၄။ မဿဲ ၅း၄၄)။
- ဗေဒင်/နတ်ဝင်/မှော်/စုန်းများနှင့်မပတ်သက်ရန် (ဝတ် ၁၉း၂၆၊ ၃၁။ တရား ၁၈း၉-၁၄)။
၁ဝ။ သမ္မာကျမ်းစာ၏အနာဂါတ္တိစကားများသည် ရာနှုန်းပြည့် ပြည့်စုံသောကြောင့် သမ္မာကျမ်းစာကို ဘုရားသခင်၏နှုတ်ကပတ်တရားအနေနှင့် ယုံကြည်၊ အားကိုလက်ခံသင့်သည်။
ကမ္ဘာကအသိအမှတ်ပြုသည့်ပြည့်စုံခဲ့ကြသောသမ္မာကျမ်းစာ၏အနာဂါတ္တိစကားများစွာထဲမှလေးခုကိုသာ ဤနေရာ၌ဖော်ပြပါမည်။ ကမ္ဘာ့သမိုင်းစာပေများနှင့်အင်တာနက်တွင်လည်းတွေ့မြင်နိုင်ပါသည်။
ရှေးခေတ် အီဂျစ်၊ ဗာဗုလုန်၊ ပါးရ်ရှန်း၊ ဂရိ၊ ရောမ စသည်တို့၏ကျောက်စာပေများမှလည်းသမ္မာ ကျမ်းစာ၏ရေးသားချက်များ မှန်ကန်ကြောင်း လေ့လာသိရှိနိုင်သည်။ (ဥပမာ - Rosetta Stone, Behistun Inscription နှင့် Cuneiform စာပေများကို လေ့လာခြင်းဖြင့် သိရှိနိုင်သည်။)
(၁) ဗာဗုလုန်မြို့ပျက်စီးမည့်အကြောင်း ဘီစီ ၇၅ဝ ခန့်၌ ကြိုတင်ဟောထားချက်သည် ဘီစီ ၅၃၈ (နောက်နှစ်ပေါင်း ၂၁၂) တွင်ပြည့်စုံသွားခဲ့သည် (ဟေရှာ ၁၃း၁၉-၂၂။ ယေရမိ ၅၁း၁၊ ၁၁။ ဒံ ၅း၈-၃၁)။
(၂) တုရုမြို့ပျက်စီးမည့်အကြောင်း ဘီစီ ၅၉ဝ ခန့်၌ ကြိုတင်ဟောထားချက်သည် အေဒီ ၁၁၂၄ ခန့် (နှစ်ပေါင်း ၅၃၄) တွင်ပြည့်စုံသွားခဲ့သည်။ (ယေဇ ၂၆း၃-၅)။
(၃) ဂရိအင်ပါယာ ကျဆုံးမည့်အကြောင်း ဘီစီ ၆ဝဝ ခန့်၌ ကြိုတင်ဟောထားချက်သည် ဘီစီ ၁၆၈ (နှစ်ပေါင်း ၄၃၂) တွင် ပြည့်စုံသွားခဲ့သည် (ဒံ ၂း၃၉၊ ၄ဝ။ ၇◌း၆၊ ၇၊ ၁၇။ ၈း၃-၉၊ ၁၉-၂၃)။
(၄) ယေရုဆလင်မြို့ကိုရန်သူများက ဝိုင်းထားမည်ဟု အေဒီ ၃ဝ ခန့်၌ သခင်ယေရှုကိုယ်တိုင် ကြိုတင်ဟောထားခဲ့သလို အေဒီ ၇ဝ ခန့် (နောက်နှစ်ပေါင်း ၄ဝ ခန့်) တွင်ပြည့်စုံခဲ့သည် (မဿဲ ၂၄း၁-၃၊ ၁၅-၂ဝ)။
အထက်ပါအချက်တို့သည် သာဓကအနေဖြင့်အနည်းငယ်သာတင်ပြပေးခြင်းဖြစ်သည်။ သမ္မာကျမ်းစာ၌
အခြားသောအနာဂါတ်ဟောထားချက်များစွာပြည့်စုံခဲ့ကြောင်းတွေ့မြင်နိုင်ပါသေးသည်။ ထို့ကြောင့် သမ္မာကျမ်းစာကို ဘုရားသခင်၏နှုတ်ကပတ်သမ္မာတရားများအဖြစ် လက်ခံနိုင်သည်၊ အားကိုနိုင်သည်၊ ထာဝရဘုရားသခင်ကို ယုံကြည်ကိုးကွယ်နိုင်ပါသည်။ ဘုရားသခင်သည်ဤကမ္ဘာကိုဖျက်ဆီးပြီး၊ ထာဝရမပျက်စီးတော့မည့်ကမ္ဘာသစ်ကို ပြန်လည်ထူထောင်လာတော့မည်ဖြစ်သည်။ ၎င်းကမ္ဘာသစ်တွင် အပြစ်ဒုစရိုက်စိုးစီးမျှရှိတော့မည်မဟုတ်ပါ။ အပြစ်ဒုစရိုက်၊ အိုခြင်း၊ နာခြင်း၊ သေခြင်း မရှိတော့ပါ။ ထာဝစဉ်နုပျိုခြင်း၊ ကျန်းမာပကတိရှိခြင်း၊ ချစ်ခြင်းမေတ္တာစိုးမိုးခြင်း၊ အစဉ်ဝမ်းမြောက်ပျော်ရွှင်ခြင်းဖြင့် ထာဝရအသက်ကိုရရှိခံစားရင်း မေတ္တာတော်အရှင်ဘုရားသခင်နှင့်အတူ ဘုန်းတော်ခံစားရမည်ဖြစ်သည်။ ၎င်းအတွက်အဓိကလိုအပ်သည့်အရာမှာ ကယ်တင်ရှင်ယေရှုကို မိမိ၏အရှင်ဘုရားကယ်တင်ရှင်သခင်အဖြစ် လက်ခံယုံကြည်အားကိုးပြီး၊ သူ၏နှုတ်ကပတ်တော်သမ္မာကျမ်းစာအတိုင်း အသက်ရှင်ရန်သာ လိုအပ်ပါသည်။
ဖိတ်ခေါ်ခြင်း။ ဖန်ဆင်းရှင်ဘုရားသခင်၊ သခင်ယေရှုသည် လူသားအားလုံးအတွက် ထာဝရအသက်ကိုပေးနိုင်သူ၊ ကောင်းကင်နိုင်ငံသို့ပို့ဆောင်ပေးနိုင်သူဖြစ်ပြီး၊ သူ၏နှုတ်ကပတ်တရား၊ သမ္မာကျမ်းစာသည်တစ်ခုတည်းသော ထိုထာဝရအသက်ကိုရရှိစေနိုင်သည့်လမ်းပြစာအုပ်ဖြစ်သည်။ ဘုရားသခင်၊ ယေရှုခရစ်တော်ကိုမိမိ၏ကယ်တင်ရှင်သခင်အဖြစ်လက်ခံပြီး၊ သူ၏နှုတ်ကပတ်တော် သမ္မာကျမ်းစာ၏သွန်သင်သည့်အတိုင်းသာ ယုံကြည်၊ ပြောဆို၊ ကျင့်ကြံ၊ နေထိုင် အသက်ရှင်ရန်လိုအပ်ပါသည်။
သခင်ယေရှုက၊ “ကျမ်းစာအားဖြင့် ထာဝရအသက်ကိုရမည်ဟု စိတ်ထင်နှင့်သင်တို့သည်ကျမ်းစာကို စေ့စေ့ကြည့်ရှုကြ၏။ ထိုကျမ်းစာပင်ငါ၏သက်သေဖြစ်၏” (ယောဟန် ၅း၃၉)။ သင်တို့သည်ငါ့ကိုချစ်လျှင်ငါ့ပညတ်တို့ကိုစောင့်ရှောက်ကြလော့” ဟုမိန့်တော်မူပါသည် (ယော ၁၄း၁၅)။
ထာဝရအသက်ကိုရရှိနိုင်ရန်ယနေ့စိတ်နှလုံးဆက်ကပ်လိုက်ပါ။ ဘုရားသခင်သည်သင့်ကို မစကူညီပါမည်။ သင့်ကိုကောင်းကြီးပေးပါစေ။
**************
