17/12/2020
ပျိုးခင်းစာစောင် အမှတ်စဉ် ( ၄၂ )
စာမျက်နှာ ( ၁၂ ) အမှုတော်ဆောင်အသက်တာ
အမှတ်စဉ် ( ၁ ) ဧလိသားတို့၏ စရိုက်
အမှုတော်ဆောင်သည် ဘုရားသခင်၏ကျွန်ဖြစ်သည်။ ကျွန်သည်အစေခံဖြစ်သည်။ အစေခံသည် စေခိုင်းသမျှကိုပြုရန်ဖြစ်သည်။ မိမိစိတ်ကြိုက်အသက်ရှင်၍မဖြစ်ချေ။ မိမိကိုမိမိမပိုင်၊ သခင်သည် မိမိကိုပိုင်သည်။ သခင်စိတ်နှင့်အသက်ရှင်ရမည်။ အမှုတော်ဆောင်သည် ဘုရားသခင်၏ထိန်းချုပ်မှုအောက်၌ အသက်ရှင်သည့် အရုပ်တရုပ်ကဲ့သို့ မိမိကိုယ်ကို ခံယူနိုင်ရမည်။
အမှုတော်ဆောင်သည် သာမန်ခရစ်ယာန်ကဲ့သို့ သမ္မာတရား၌ကျင်လည်ရုံမျှ အသက်ရှင်၍မဖြစ်ချေ။ ဘုရားသခင့် စိတ်တော်ကို နူးညွတ်နှစ်သက်စေရန် သတိကြီးစွာ အားထုတ်အသက်ရှင်ရမည်။ ဧလိသား ယဇ်ပုရောဟိတ်ပျိုဟောဖိနပ်နှင့် ဖိနဟတ်ကဲ့သို့သော မှားယွင်းမှုမျိုး မလွန်ကျူးမိစေရန် အရေးကြီးလှသည်။ ထိုယဇ်ပုရောဟိတ်ပျိုတို့သည် ဘုရားကိုမသိ၊ အဓမ္မလူဖြစ်ကြသည်။
အမှုတော်ဆောင်သည် မိမိ၏အလုပ်ရှင် မိမိသခင်ကို မသိ၍မဖြစ်ချေ။ သိရုံမက အကျွမ်းဝင်ရမည်။ မိမိသခင်၊ မိမိအရှင်၏အကြိုက်ကိုသိရမည်။မိမိအရှင်၏ အကြိုက်ကိုလိုက်ရမည်။ မိမိအရှင်နှစ်သက်သည့်စရိုက်ကိုကျင့်ရမည်။ အဓမ္မလူမဖြစ်ရ။ ဖြောင့်မတ်ရမည်။ သစ္စာရှိရမည်။ ကောင်းမြတ် ရပါမည်။ အမှုတော်ဆောင်လည်းလူဘဲဟူ၍ မိမိကိုမိမိ မညှာတာရ၊ ပေါ့ပေါ့ပျက်ပျက်မတွေးခေါ်ရချေ။
ဖခင်ဧလိသည် မိမိသားတို့အား ဆုံးမသော်လည်းကြပ်တည်းစွာမဆုံးမ၊ သူ၏သားတို့သည်ဘုရားဝတ်ကို လူများရွံစရာဖြစ်အောင်ပြုကြသည်။ ယဇ်ပူဇော်ခြင်းငှာ လာရောက်သည့်သူများထံမှ မိမိအစေပါတို့ကိုစေလွှတ်ပြီး ကင်စရာအမဲသားအစိမ်းကိုသာပေးရန် တောင်းစေသည်။ ပြုတ်ပြီးသောအမဲသားကိုမယူ ဟုဆိုလေ့ရှိကြသည်။
ယဇ်ပူဇော်သောသူက ဆီဥကိုအရင်မီးရှို့ပါရစေဟု တောင်းပန်သော်လည်း နားမထောင်တတ်၊ မပေးလျှင်အနိုင်ပြုမည်ဟုဆိုတတ်ကြသည်။ ထို့အပြင် ပရိတ်သတ်စည်းဝေးရာ တဲတော်တံခါးနားမှာ စည်းဝေးသော မိန်းမနှင့် မှားယွင်းခြင်းအမှုလည်းပြုကြသည်။ ဖခင်ဧလိသည် သားတို့အားသတိပေးသော်လည်း သူတို့သည်နားမထောင်ဘဲနေကြ၏။
ဘုရားသခင်၏လူတယောက်သည် ဧလိထံရောက်လာပြီး သင့်အဘအမျိုးကို ငါ့ရှေ့မှာ အစဉ်သွားလာရလိမ့်မည်ဟု ငါဆိုမိသော်လည်း တဖန် ထာဝရဘုရားမိန့်တော်မူသည်ကား ထိုကတိသည် ငါနှင့်ဝေးပါစေ။ ငါ့ကိုချီးမြှောက်သောသူတို့ကို ငါချီးမြှောက်မည်။ ငါ့ကို မထီမဲ့မြင်ပြုသောသူတို့သည် ဂုဏ်အသရေပျက်ရကြလိမ့်မည် ဟုအမိန့်တော်ကိုပြန်ပေးခဲ့သည်။
ဧလိသည် မိမိ၏သားတို့ကို ဘုရာသခင့်အပေါ်မှာ ချီးမြှောက်သောကြောင့် ဧလိအမျိုး၌ အိုသောသူမရှိရ ဟုဘုရားသခင်မိန့်တော်မူလေသည်။ ဧလိသည် သားတို့နှင့်တကွ တရက် တည်းသေခဲ့ရလေသည်။ ဘုရားသခင့်အမှုတော်မြတ်၌ ကိုးကွယ်ခြင်းဆိုင်ရာဝတ်တွင် အကြီးဆုံးပုဂ္ဂိုလ်အဖြစ် ချီးမြှောက်ခြင်းခံရသော်လည်း ဘဝနိဂုံးကို အရုပ်ဆိုးစွာ အဆုံးသတ်ခဲ့ကြရလေသည်။
ယနေ့အမှုတော်ဆောင် သင်းအုပ်ဆရာ၊ ဓမ္မဆရာများလည်း သတိပြုကြရန် အထူးလိုအပ်သည်။ ခရစ်ယာန်များ၏ အဦး အနု အထွဋ် ဆယ်ဘို့တဘို့ တို့ကိုစားသောက်ကြရပြီး ကောင်းပေ့မှန်သမျှကိုခံယူဆက်ဆံကြရသည်ကို သတိပြုရမည်။ ဧလိသားများကဲ့သို့ ဘုရားကို အကျွမ်းမဝင်ဘဲ အမှုတော်ဆောင်လုပ်နေပါက ဘုရားဝတ်ကို သူတပါးရွံရှာဖွယ်ဖြစ်စေသူ၊ ဘုရားအမျက်တော်ကိုနှိုးဆော်သူ ဖြစ်ကြပေမည်။
အမှုတော်ဆောင်သည် ငွေကိုမတပ်မက်ရ။ မစင်ကြယ်သောစီးပွားကို လက်မခံရ။ မတရားသဖြင့် သူတပါးဥစ္စာကို မလုယူ အနိုင် မသိမ်းယူရ။ ဘုရားဝတ်ပြုရန်ရောက်လာသည့် မိန်းမများကို မပြစ်မှားရ။ အပျိုဖြစ်စေ၊ မိန်းမလွတ်ဖြစ်စေ၊ မုတ်ဆိုးမဖြစ်စေ၊ လင်ရှိမိန်းမဖြစ်စေ မပြစ်မှားရ။ ယောက်ျားတို့၏ တပ်မက်စိတ်ကို ဖယ်ရှားရမည်။
အမှုတော်ဆောင်သည် မိမိတဦးတည်း ဘုရားစိတ်တော်တွေ့အောင်နေရမည်မဟုတ်ချေ။ မိမိ၏ဇနီး သားသမီး မိသားစုဝင်အားလုံးကို ကောင်းမွန်စွာ သွန်သင်ဆုံးမပြီး အုပ်စိုးနိုင်ရပါမည်။ မိသားစုရှေ့၌၎င်း၊ ခရစ်ယာန်အများရှေ့၌၎င်း မိမိကိုယ်တိုင် ပုံသက်သေပြနိုင်သူဖြစ်ရမည်။ လောဘလွန်ကျူးခြင်းကို လုံးဝရှောင်ကြဉ်ရမည်။ မှားယွင်းမှုကို သတိနှင့်ဖယ်ရှားရမည်။
အမှုတော်ဆောင်သည် ထင်တိုင်းကြဲ၍ မရချေ။ မိမိစိတ်အလိုဆန္ဒရှိသည်အတိုင်းမလုပ်ဆောင်ရချေ။ သမ္မာတရားအတိုင်း ကျင့်စောင့်ရမည်။ ဆိုးရွားသောအမှုတော်ဆောင်မဖြစ်ရ။ ကိုယ်တိုင်ဘုရားကိုရိုသေရမည်။ ဘုရားဝတ်ကိုလည်း ပရမ်းပတာမပြုရ။ စားသော်ရှိသောက်သော်ရှိသခင်ဘုရား မျက်နှာကိုထောက်ရှုရမည်။ မိမိသိုးစုရှေ့၌ အလင်းပြရမည်။
ပတ်ဝန်းကျင်၌လည်း ဂုဏ်အသရေရှိသူဖြစ်ရန်လိုပါသည်။ ကျင့်ကြံ၊ပြုမူ၊ ပြောဆို၊ နေထိုင်၊ သွားလာရာမှာလည်း သမ္မာသတိရှိရမည်။ ဘုန်းနာမတော်ကို ရှုတ်ချစေသည့် အမှု လုံးဝမပြုမိရန်အရေးကြီးလှသည်။ သူတပါးကို လမ်းပြသွန်သင်နိင်သူဖြစ်ရန်လိုအပ်သည်။ စိတ်ဖြေးညင်းသောသူဖြစ်ပြီး ကြမ်းတမ်းရိုင်းစိုင်းသည့်အမူအကျင့်မရှိရန် အထူးဂရုစိုက်ရမည်။
သူတပါးကိုချစ်တတ်သူ၊ ကိုယ်အမှုကိုသာမရှုမှတ်ဘဲ သူ့အမှုကိုရှုမှတ်တတ်သူလည်းဖြစ်ရန်လိုသည်။ စင်ကြယ်စွာအသက်ရှင်ပြီး လူတိုင်းနှင့် အသင့်အတင့် နေနိုင်ရန် ကြိုးစားရမည်။ ဧဝံဂေလိတရားနှင့်ဆက်ဆံပြီး ဆင်းရဲခံနိုင်ရမည်။ ဩဝါဒ ပေးခြင်း၌ မပျင်းရိဘဲအားထုတ်ရမည်။ ဆုတောင်းပဌနာပြုခြင်း၊ သမ္မာတရား၌ လေ့ကျက်ခြင်းရှိရန် အစဉ်ကြိုးစားရမည်။
ဒုစရိုက်မပြုဘဲ သုစရိုက်ကိုသာပြုကျင့်ရမည်။ ဘုရားကိုရိုသေသဖြင့် လှူကြသည့် အလှူငွေကို အလွဲသုံးစားမပြုရ။ မိမိ၏ ပြုမူကျင့်ကြံလေရာမှာ ဘုရားသခင်ကို ချီးမြှောက်ရမည်။ မိမိကိုယ်ကိုမှစ၍ မိမိ၏ သားသမီးများကို မချီးမြှောက်ရ။ ကျေးဇူးတော်နှင့်ထိုက်လျောက်စွာ ကျင့်ရမည်။ မိမိ၏ ဘုရားသခင်ကိုသာ ချီးမြှောက် ပစားရမည်။
ဧလိသည် ဘုရားထက် မိမိသားတို့ကို ချီးမြှောက်သဖြင့်၎င်း၊ မိမိသားတို့အား ဆုံးမသော်လည်း ကြပ်တည်းစွာ မပြုသဖြင့်၎င်း ဘုရားသခင်ကိုစိတ်ပျက်စေခဲ့သည်။ ထို့ကြောင့် သူ၏မျိုးစဉ်ဆက် အသက်တိုကြရသည်။ ဧလိသားနှစ်ယောက်သည်လည်း ဘုရားကိုမသိကြသဖြင့်၎င်း၊ ဘုရားဝတ်ကို သူတပါးရွံရှာဖွယ် ဖြစ်အောင်ပြုကြသဖြင့်၎င်း၊ တဲတော်၌စုဝေးသောမိန်းမနှင့် တဲတော်တံခါးနားမှာ မှားယွင်းသဖြင့်၎င်း ဘုရား၏အမျက်တော်ကိုခံရကြသည်။
ဧလိသားနှစ်ယောက် တို့သည် အဘ၏ဆုံးမစကားကို လစ်လျူသဖြင့် သတိပေးခြင်းကို နာမခံဘဲနေသောကြောင့် ရန်သူလက်၌ ပျက်စီးရကြသည်။ ယနေ့ အမှုတော်ဆောင်တို့ အမြင့်ဆုံးသော ဘုရားသခင်၏ အမှုတော်ကို ထမ်းရွက်ခွင့်ရသည့်အရာကို တန်ဖိုးထားတတ်လျက် သတိရှိစွာ အသက်ရှင်လုပ်ဆောင်ရမည်။ ဓမ္မဆရာ၊ ဆရာမ အဖြစ်ကိုခံယူသူသည် အဓမ္မအမှုကိုပြုပြီး မမှားယွင်းမိစေရန်နှင့် ငွေကိုတပ်မက်ပြီး တရားကိုမလွန်ကျူးမိစေရန် အထူးသတိပြုရမည်။
အမှုတော်ဆောင် တဦး၏ အကျင့်သီလနှင့် မစပ်အပ်သည့် ဧလိသားနှစ်ယောက်၏ စရိုက်ကဲ့သို့ ပြုကျင့်နေပါက နောင်တနှင့် အမြန်ပြင်ဆင်ရမည်။ ဧလိကဲ့သို့ မိမိသားသမီးများအားတတ်တိုင်းထားပါက အရှက်တကွဲ အကျိုးနည်းရပြီး ထာဝရဆုံးရှုံးခြင်းသို့ ရောက်ရှိကြရမည်ကို အမှုတော်ဆောင် ဓမ္မဆရာ၊ဆရာမတိုင်း သတိပြုကြစေလိုပါသည်။
" ငါ့ကိုချီးမြှောက်သောသူတို့ကို ငါချီးမြှောက်မည်။ ငါ့ကိုမထီမဲ့မြင်ပြုသောသူတို့သည် ဂုဏ်အသရေပျက်ရကြလိမ့်မည်။ " ဟူသော *ထာဝရဘုရား၏ မိန့်တော်မူချက်ကို အမှုတော်ဆောင် အယောက်စီတိုင်းသတိနှင့် မှတ်သားစေလိုပါသည်။
ပြီးပါပြီ။
