ရန်တိုင်းအောင် မြို့ဦးစေတီတော် - လားရှိုး Yan Tine Aung Pagoda

22/11/2022

22/11/2022

လားရှိုးမြို့ရန်တိုင်းအောင်ဆုတောင်းပြည့်မြို့ဦးစေတီတော်ပရဝုဏ်အတွင်းတည်ဆောက်လျက်ရှိသောဘုရားဆင်းတုတော်ဇရပ်ရေကန်

16/11/2022

16/05/2022

ထေရဝါဒ ဗုဒ္ဓသာသနာထွန်းကားစည်ပင်ပြန့်ပွားခဲ့သော မြန်မာ့အတိတ်သမိုင်းများတွင် ဘုန်းလက်ရုံးနှင့်ပြည့်စုံခဲ့သည့် သာသနာပြု မင်းကောင်းမင်းမြတ်တို့သည် သဗ္ဗညုတ ဗုဒ္ဓဘုရားရှင်တို့၏ ဂုဏ်ကျေးဇူးတော်တို့ကို အစဉ်အမြဲသတိရအောက်မေ့နိုင်စေခြင်းငှာ ဘုရား၊ စေတီ၊ ပုထိုးတော် စသည့်သာသနိကဆိုင်ရာ အထွဋ်အမြတ်များကို အံ့ချီးဖွယ်ရာ တည်ထားပူဇော်ခဲ့ကြပါသည်။

သမိုင်းမတင်မီခေတ်ကာလကပင် မြန်မာနိုင်ငံအဝန်း၌ ဘုရား၊ စေတီ၊ ပုထိုးတော်တို့မှာ မရေမတွက်နိုင်အောင် တည်ထားကိုးကွယ်ခဲ့ကြရာတွင် အထင်ကရဖြစ်သော သာသနိကအဆောက်အအုံများတို့ကို ကာလအလိုက် အုပ်ချုပ်ခဲ့ကြသည့် မင်း၊ အစိုးရများက မပြတ်မွမ်းမံပြုပြင်ခြင်း၊ အသစ်တည်ဆောက်ခြင်းများစွာ ဆောင်ရွက်ခဲ့ကြပါသည်။

ရှမ်းပြည်နယ်(မြောက်ပိုင်း)မြို့တော် ဤလားရှိုးဒေသသည် ဗုဒ္ဓဘာသာကို သက်ဝင်ယုံကြည်ကြသော ရှမ်းမျိုးနွယ်စုများအပါအဝင် တိုင်းရင်းသားလူမျိုးပေါင်းစုံတို့နေထိုင်ကြသည့် တိုင်းရင်းသားမြို့တော်ဖြစ်သဖြင့် ဗုဒ္ဓဘာသာ ရောင်ဝါထိန်လင်းပြန့်ပွားစည်ပင်စေရန် အလို့ငှာ လားရှိုးမြို့အဝင် မုခ်ဦးဝဲဘက်ရှိ ဝိဇယဘူမိမဟာအောင်မြေကုန်းတော် ပေါ်၌ ရန်တိုင်းအောင်ဆုတောင်းပြည့်မြို့ဦးစေတီတော်မြတ်ကြီးကို အံ့မခန်းကြည်ညိုဖွယ်ရာ တည်ထားကိုးကွယ်နိုင်ခဲ့ပြီ ဖြစ်ပါသည်။

ကျွန်ုပ်တို့ ရှမ်းပြည်နယ် (မြောက်ပိုင်း) အတွင်းရှိ ဗုဒ္ဓဘာသာဝင်တိုင်းရင်းသားညီအစ်ကိုမောင်နှမများအတွက် ရန်ကုန်မြို့ရှိ ရွှေတိဂုံစေတီတော်အား သွားရောက်ဖူးမြော်ခွင့်ရရန် ကြုံကြိုက်ခဲလှပါ၍ ထိုရွှေတိဂုံစေတီတော်နှင့် တစ်ပုံစံတည်းတူညီသော ရန်တိုင်းအောင်ဆုတောင်ပြည့်မြို့ဦးစေတီတော်ကို တည်ထားကိုးကွယ်ခဲ့ခြင်းဖြစ်ပါသည်။

ရန်တိုင်းအောင်ဆုတောင်းပြည့်မြို့ဦးစေတီတော်မြတ်ကြီးအား ဖူးမျှော်ကြသည့် ပုဂ္ဂိုလ်အပေါင်းတို့မှာ မြန်မာနိုင်ငံအဝန်းရှိ တန်ခိုးကြီးဘုရားများအားလုံးကို တစ်နေရာတည်း၊ တစ်ချိန်တည်းတွင် ဖူးမျှော်ရသကဲ့သို့ အကျိုးသက်ရောက်စေရန် သမိုင်းမတင်မီခေတ်တွင် အထင်ကရဖြစ်သည့် ဘုရား၊ စေတီ၊ ပုထိုးများ၊ ပုဂံခေတ်၊ ပင်းယခေတ်၊ စစ်ကိုင်းခေတ်၊ အင်းဝခေတ်၊ တောင်ငူခေတ်၊ ကုန်းဘောင်ခေတ်၊ စစ်ကြိုခေတ်၊ စစ်ပြီးခေတ်၊ မျက်မှောက်ခေတ် ခေတ်အဆက်ဆက်တို့၌ ခုနှစ်၊ ဒေသအလိုက်တည်ရှိနေကြသော သမိုင်းဆိုင်ရာအချက်အလက်ပြည့်စုံစွာဖော်ပြ၍ နံရံရုပ်လုံးရုပ်ကြွအနုလက်ရာများဖြင့် ထုလုပ်ထားရှိခြင်းမှာ ဤစေတီတော်မြတ်၏ ထူးခြားချက်ဝိသေသ တစ်ရပ်ဖြစ်ပါသည်။

ဤစေတီတော်မြတ်ဖြစ်ပေါ်လာခဲ့ရာတွင် တည်ဆောက်ရေးကော်မတီ၏ စနစ်တကျစီစဉ်ဆောင်ရွက်နိုင်မှု၊ ကြီးကြပ်မှုကော်မတီ၏ ကြိုးပမ်းအားထုတ်မှု၊ ဆောက်လုပ်ရေးပညာရှင်၊ ဗိသုကာပညာရှင်၊ မြန်မာမှုအနုလက်ရာပညာရှင်တို့၏ အချိန်နှင့်တစ်ပြေးညီဆောင်ရွက်နိုင်မှုတို့ကြောင့် သတ်မှတ်ကာလအတွင်း အောင်မြင်စွာ ပြီးမြောက်ခဲ့ခြင်းဖြစ်ကြောင်း မှတ်တမ်းတင်အပ်ပါသည်။

ရန်တိုင်းအောင်စေတီတော်မြတ်ကြီး၏ ရွှေထီးတော်တင်လှူပွဲနှင့် ဗုဒ္ဓါဘိသေကအနေကဇာတင်မဟာမင်္ဂလာအခမ်းအနားကို မြန်မာသက္ကရာဇ် ၁၃၆၇ ခု၊ တပေါင်းလပြည့်ကျော် ၆ ရက် (ခရစ်သက္ကရာဇ် ၂၀၀၆ ခုနှစ်၊ မတ်လ ၁၉ ရက်) တနင်္ဂနွေနေ့ နံနက် ၇ နာရီခွဲ တွင် အောင်မြင်စွာကျင်းပနိုင်ခဲ့ပါသည်။

ဤစေတီတော်မြတ်ကြီးတည်ထားပြီးမြောက်ခဲ့သည်မှာ ရှမ်းပြည်နယ် (မြောက်ပိုင်း) လားရှိုးဒေသ၏ ထူးခြားထင်ရှားသည့် ဘာသာ သာသနာတော်ထွန်းကားမှုပြယုဂ် သမိုင်းမှတ်တိုင်အဖြစ် အဓွန့်ရှည်ကြာစွာ တည်တံ့နေမည့် အခြင်းအရာတစ်ခုပင်ဖြစ်ပါလိမ့်မည်။ နှောင့်လူတို့အနေဖြင့်လည်း ဤဒေသ၊ ဤစေတီတော်နှင့် သာသနိကအဆောက်အဦးများကို မပျက်မယွင်းစေရန် ကမ္ဘာတည်သရွေ့ တည်တံ့စေအံ့သောငှာ ထိန်းသိမ်းစောင့်ရှောက်ကြရမည်ဖြစ်ပါသည်။

ရန်တိုင်းအောင်ဆုတောင်းပြည့်မြို့ဦးစေတီတော်မြတ်ကြီး တည်ထားကိုးကွယ်ရာ၌ သဒ္ဓါတရားပြည့်ဝစွာဖြင့် လှူဒါန်းမှုပြုခဲ့ကြသော စေတနာရှင်ပြည်သူများ၊ အတတ်ပညာရှင်များ၊ ကျရာတာဝန်အရပ်ရပ်ကို အားထုတ်ကြိုးပမ်းဆောင်ရွက်ခဲ့ကြသူများသည် မိမိတို့ဆောင်ရွက်မှုကုသိုလ် အကျိုးတရားများကို အမြဲသတိရအောက်မေ့ကြလျက် ကြည်ညိုသဒ္ဓါပွားများခြင်းဖြင့် မိမိတို့ လိုလားတောင့်တအပ်သော အမြတ်ဆုံးဖြစ်သည့် နိဗ္ဗာန်ချမ်းသာကို ဧကန်မုချရနိုင်ကြပါစေရန် ဆုမွန်ကောင်းတောင်းအပ်ပါသတည်း။