09/08/2026
အိပ်ချင်တာမှတ်လည်း တရားဖြစ်ပါတယ်
*************************************
ဒီနေ့ညနေ လေးနာရီ တရားနာ/တရားလျှောက်ချိန်မှာ ပြောဖို့ ရည်ရွယ်သွားတာက အရင်နေ့ကအဆက် မပြီးပြတ်သေးတဲ့ စင်္ကြန်လျှောက်မှတ်နည်းလေး ဆက်လက်သင်ပြပေးဖို့နဲ့ ဒီလိုအသေးစိပ်မှတ်ပေးဖို့ သင်ပြပေးရတာဟာ ခဏိကသမာဓိကို အခြေပြုကာသွားရတဲ့ ဝိပဿနာယာနိကနည်းနဲ့ အားထုတ်နေသူတွေအတွက် အရေးကြီးလှပုံကို ရှင်းလင်းပြောပြပေးရင်း သမထယာနိကနည်းနဲ့ ဝိပဿနာယာနိကနည်း ကွာခြားချက်လေးတွေကို ခွဲခြားပြပေးဖို့ပါ။
တကယ့်တကယ်ကျ ယောဂီတစ်ယောက်က "မနက်စောစောအချိန်နဲ့ နေ့ဆွမ်းစားပြီးချိန်မှာ အိပ်ငိုက်တာ ထိန်းမရဘူး"လို့ ထလျှောက်တာနဲ့ပဲ ငိုက်နည်းပယ်ရှား ခုနှစ်ပါးအကြောင်းနဲ့ ထိနမိဒ္ဓကို ရှု့မှတ်ပုံ ရှု့မှတ်နည်းလေးပြောပြ၊စစ်ပွဲနဲ့ တရားဝင်ပွဲဟာ အတူတူပါပဲ၊ကိုယ်က ရဲရဲဝံ့ဝံ့ တိုက်ယူမှ ရတဲ့အကြောင်းလေးတွေ ပြောပြရင်းကနဲ့တင် နာရီကကျော်သွားပါတော့တယ်။
ပြောပြဖြစ်တာတွေက အများသားဆိုတော့ ရေးပြရတာမလွယ်ပါဘူး။
အဲ့ဒီထဲကမှ ထိနမိဒ္ဓမှတ်ရင် တရားဖြစ်,မဖြစ်ဆိုတာလေးပဲ ရေးလိုက်ချင်ပါတယ်။
ထိနမိဒ္ဓကို "အိပ်ချင်အားကြီး ထိုင်းမှိုင်းမှု့"လို့ မြန်မာမှု့ပြုကြပါတယ်။
တစ်ပုဒ်ချင်းအနက်အဓိပ္ပါယ်ပြောရရင်တော့ ထိနဆိုတာ စွမ်းအားမထုတ်,တွန့်ဆုတ်တာကို ခေါ်ပါတယ်။
မိဒ္ဓဆိုတာကတော့ စွမ်းအားမထုတ် တွန့်ဆုတ်လာတဲ့အခါကျ စိတ်အားကိုယ်အားတွေ လျော့ကျလာတဲ့သဘော,ပျော့ခွေသွားတဲ့သဘောပါ။
သူက ဝီရိယရဲ့ဆန့်ကျင်ဘက်ဆိုတော့ အိပ်ချင်တဲ့အခါမှဖြစ်တာတော့မဟုတ်ပါဘူး၊အခက်အခဲတစ်ခုခုနဲ့ ဆုံတွေ့ရတဲ့အခိုက်မှာ စွမ်းအားမထုတ်လိုပဲ တွန့်ဆုတ်တွန့်ဆုတ်ဖြစ်သွားတဲ့အခါမျိုးတွေမှာလဲ ဖြစ်တတ်ပါတယ်။အားလျှော့လိုက်တာနဲ့ အားပျော့သွားတာဟာ ထိနနဲ့မိဒ္ဓရဲ့သဘောတွေပါ။
သူတို့နှစ်ခုက သဘောကွဲပေမယ့် ဖြစ်ပွားတဲ့အခါကျ ခွဲလို့မရပဲ တတွဲတည်းဖြစ်တတ်လို့ အမြဲတမ်း နှစ်ပုဒ်တွဲပြလေ့ရှိတာပါ။ ထားတော့
ပြောချင်တာက အိပ်ချင်စိတ်ကိုမှတ်ရင် တရားဖြစ်,မဖြစ် ဆိုတာလေးပါ။
ဒါလေး ပြောပြရတာကလဲ ဆရာတော်တစ်ပါးက "အိပ်ချင်နေပါတယ်ဆိုမှ အိပ်ချင်တယ် အိပ်ချင်တယ်မှတ်နေလို့ ဘယ်တရားဖြစ်ပါ့မလဲ"ဆိုကာ ပြောကြားသံလေး ကြားဖူးလို့ပါ။
အမှန်က သူပြောသလိုမဟုတ်ပါဘူး။အိပ်ချင်တာကို အိပ်ချင်တယ်လို့မှတ်ပေးရင် တရားကဖြစ်နေပါတယ်။
သူက ရုပ်နာမ်နှစ်ခုရောတဲ့ ဓမ္မာနုပဿနာထဲမှာ ပါပါတယ်။
အိပ်ချင်တာကို "အိပ်ချင်တယ် အိပ်ချင်တယ်"ဆိုကာ အိပ်ချင်စိတ်ဖြစ်တဲ့ဆီပို့မှတ်ပေးရင် စစချင်းမှာ အိပ်ချင်စိတ်ပေါ်လာတာနဲ့ ခေါင်းကအစ လေးခဲလာပြီး တစ်ကိုယ်လုံးက ပျော့ခွေကျသွားတော့မလို မြင်တွေ့လာရပါတယ်။
ဒီလို မြင်သိလာတာဟာ အိပ်ချင်စိတ်ကို မှတ်လိုက်လို့ အိပ်ချင်စိတ်ကြောင့် ဖြစ်ပွားလာတဲ့ ရုပ်သဘောတရားတွေကို သိလာရတာပါ။
နောက် မှတ်ပေးပါများရင် ထိနမိဒ္ဓ စဝင်လာတာနဲ့ သူ့ကြောင့်ဖြစ်တဲ့ရုပ်တွေ ဘယ်လိုအလုပ်လုပ်နေပုံကအစ မြင်တွေ့လာရပါတယ်၊
ဒီလိုသိလာတာဟာ ကိုယ့်မှာ အမှတ်သတိရှိလို့ပါ၊အမှတ်သတိမှမရှိရင် ဘာရုပ်ဖြစ်ပုံမှ မယ်မယ်ရရ မသိနိုင်ပါဘူး။
နောက် ဒီလိုသိအောင် မှတ်ပေးနိုင်တာဟာ ဝီရိယအား စိုက်ထုတ်ကာမှတ်ပေးလို့ စိတ်ကလေးက မှတ်စရာပေါ်တည်သွားတာပါ။ဒါဟာ ဝီရိယနဲ့သမာဓိပါ။
ဒီလိုတည်အောင်လုပ်နိုင်လို့လဲ ထိနမိဒ္ဓကြောင့်ဖြစ်ပေါ်လာတဲ့ ရုပ်ဖြစ်ပေါ်ပြောင်းလဲပုံတွေကို ဖြစ်စဉ်အမှန်အတိုင်း သိလာတာပါ။ဒါသည်ပင်လျှင် ပညာပါပဲ။
ဆိုတော့ အိပ်ချင်စိတ်ဝင်လာရင် အိပ်ချင်တယ် အိပ်ချင်တယ်ဆိုကာ မှတ်လိုက်တာနဲ့ အိပ်ချင်စိတ်က မကောင်းတဲ့တရားပေမယ့် သူ့အကြောင်းပြုကာ မှတ်ပေးလိုက်နိုင်လို့ ဖြစ်ပွားလာတာတွေက သတိအား သမာဓိအား ပညာအားဆိုတာတွေပါပဲ။
"တရားအားထုတ်တယ် တရားအားထုတ်တယ်"လို့ဆိုတာ ကိုယ့်ခန္ဓာထဲက ဒီသတိ ဝီရိယ သမာဓိ ပညာစတဲ့ တရားအားတွေ ထွက်လာအောင် ထုတ်ယူတာကို ခေါ်တာပါ။
နောက်ကျ မှတ်ပါများလာရင် အိပ်ချင်စိတ်ကိုရော သူ့ကြောင့်ဖြစ်လာတဲ့ ရုပ်တွေကိုပါ ရှင်းလင်းစွာ မြင်သိလာရပါတယ်။
အဲ့သလိုမြင်သိလာတာနဲ့အမျှ ထိနမိဒ္ဓဝင်လာတော့မယ်ဆို ကိုယ်က လက်ဦးစွာ မှတ်ပေးပြီးသား ဖြစ်ဖြစ်သွားပါတော့တယ်၊
အဲ့ဒီအခြေအနေ အချိန်အခါမျိုးရောက်ပြီဆိုရင် ဘယ်တော့မှ တရားထိုင်ရင်း အိပ်ငိုက်တယ်ဆိုတာ မဖြစ်တော့ပါဘူး။
ဒီလို အိပ်ချင်စိတ်ကိုရော သူ့ကြောင့်ပေါ်လာတဲ့ ရုပ်ဖြစ်စဉ်ကြီးရဲ့သဘောကိုရော တစ်ဆက်တည်း ရောထွေးမြင်အောင်မှတ်နိုင်ရင် ဓမ္မာနုပဿနာဖြစ်ပါတယ်။
အင်း စာနဲ့ရေးပြရတာက နုတ်နဲ့ ပြောပြရတာလောက် မလွယ်ကူ မရှင်းလင်းဘူးရယ်။
