28/03/2025
Manmaw Sasana, Saradaw Ginwang ting a matu sum kaba, myit npyaw lam, myit machyi, yawn kaba mung rai mat sai.
Karai wa Sasana magam ni, Hpung masha ni hte mung chying mung masha ni yawng hpe matut na, hkam jan lu ai n'gun atsam, shimlum ai, Hkam kaja ngwi pyaw, kraw shi hpang gara nhkrum ai hte ra nga ai shaman chyeju jaw ya u galaw.
Shimlum ai, Simsa ngwi pyaw ai, Tara rap ra ai hte Buga mare kahtawng ni de a lawan bai lu wa lu na chyeju jaw ya u ga.
Anhte yawng matut na Kyu hpyi ja ja naw rai ga law.
wa yawng hpe bau sin makawp maga ya u ga.
Roman Kahtawlik Sasana Jawng Wang Hte Manmaw San Patrick's Cathedral Nawku Htingnu Hten Za Hkrum Ai Lam
++++++++++++++++++++
Ndai Roman Kahtawlik Sasana wang gaw Jinghpaw mungdaw, Manmaw saradaw ginwang, Kokko Taw lawk ginra hta nga ai rai nga ai. Sasana wang ginra hta shara garan masat nna nta 5 gap da ai; San Patrick Nawku Htingnu kaba, 2 shara gaw Jau ni a nta (nnan hte dingsa), Nawku Htingnu hte Boarding nta ni rai nga ai.
Manmaw muklum hta 2024 ning December shata praw 4 ya shani kaw nna Hpyen Dap hte Wunpawng Mungdan Shanglawt Hpyen Dap woi awn ai laknak lang hpung lahkawng a lapran grai laja lana majan byin wa ai. 2025 ning February shata kaw nna, sasana wang hte dai makau grup yin hta lahkawng maga a gasat gala ai shara tai wa ai rai nga ai.
Dai Jau ni a nta dingsa hpe gaw February 26 ya shani wan nat kau ya ai. San Patrick’s Nawku Htingnu hpe gaw 2025 ning March shata 16 ya shana hkying 4:00 pm aten hta wan nat kau ya ai a majaw tsawmra mi htenza mat ai hpe chye lu ai. Raitim, dai nawku htingnu gaw mau hpa hku nna, hpang shani 17 march ya shani San Patrick a poi nhtoi hta e mau hpa hku nna naw agrin nga ai hpe mu lu ai (dai masa hpe teng sha chye lu na matu matut nna sawk sagawn nga ga ai).
San Patrick's Nawku Htingnu gaw 1958-1959 ning laman hta Columban sasana hpung ni kawn gawgap lai wa ai hpung shingkang rawng ai Nawku Jawng langai mi rai nga ai hte 1960 ning hta atsawm sha shangut ap jaw da ai lai wa ai rai nga ai. Tsa ban mi jan Labau shang nawku htingnu rai nga ai hte masha law law a Karai Kasang hpe nawku daw jau ai hte shakawn shagrau ai shara hku nna nga nga ai mung rai nga ai.
Jau ni a nta nnan hte Nawku Htingnu hta lai nna, dai nawku jawng wang ting gaw ya aten hta wan n-ga tai mat ai daram rai nga ai. Ya na zawn Sasana wang hpe jahten kau ya hkrum ai majaw anhte grai mau ai hte myit n pyaw yawn hkyen nga ga ai.
Ndai masa hta simsa lam hte tara rap ra ai lam hta anhte a makam masham hte myit mada lam matut grin nga lu na matu akyu hpyi garum ya marit.
Wa Saradaw Raymond Sumlut Gam
Manmaw Saradaw Sasana
