22/03/2020
Ny FAMPANANTENANA OMEN'ANDRIAMANITRA NY OLONY AMIN'IZAO FAHORIANA SY FIZAHAN-TOETRA IZAY MIHATRA AMIN'IZAO TONTOLO IZAO ITY.
Apokalypsy. 7:1-3
Rehefa afaka izany, dia hitako fa indreo, nisy anjely efatra nitsangana teo amin'ny vazan-tany efatra, nihazona ny rivotra efatra amin'ny tany, mba tsy hisy rivotra hitsoka amin'ny tany, na amin'ny ranomasina, na amin'ny hazo akory aza. Ary hitako fa, indro, nisy anjely hafa koa niakatra avy tany amin'ny fiposahan'ny masoandro, nanana ny fanombohan-kasen'Andriamanitra velona; ary izy niantso ny anjely efatra izay navela hanimba ny tany sy ny ranomasina tamin'ny feo mahery nanao hoe: Aza manimba ny tany, na ny ranomasina, na ny hazo, mandra-panisinay tombo-kase eo amin'ny handrin'ny mpanompon'Andriamanitsika.
Araka izany soratra masina izany dia: manome toky ireo mpanompony Andriamanitra fa tsy ho voakasik'izay rehetra mety ho loza hanimba ny tany, satria, efa voahisy tombo-kase mialoha, mba tsy ahakasika azy ny loza rehetra navela hanimba ny tany; satria amin'izao fotoana izao dia maro ireo tranga miseho maneran-tany, izay famantarana hatrany fa efa miha-manakaiky ny farany; koa amin'ireo fahoriana ireo dia betsaka ny mametra-panontaniana hoe: Iza marina no fototr'izao fahoriana izao, Andriamanitra ve sa Satana?
Raha ny marina dia i Satana no fototr'izao fahoriana izao, kanefa, Andriamanitra irery ihany no mamela azy hanatanteraka izany, mba ho fizahan-toetra ny monina ambonin'ny tany; kanefa, tsy tokony hatahotra velively izay zavatra rehetra miseho ny mpino satria, Andriamanitra mihitsy no efa nampanantena fa hiaro ireo mpanompony, mba tsy ho simban'ny loza rehetra izay hihatra amin'ny monina ambonin'ny tany. Koa miantso anao ny Tompo amin'izao fotoana izao mba hanekenao Azy ho Tompo sy Mpamonjy anao, hibebaho avokoa ireo otanao rehetra, mba ho arovana amin'ny loza koa ianao.
