11/08/2025
Mofonaina anio 11/08/25
💌 Matio 18. 15 - 20 💌
Miresaka mpirahalahy samy mpino nefa tsy nifankahazo ity mofon'aina ity. Fanoharana nataon'i Jesoa momba ny famelan-keloka no sarisary hita eto. Hatao ahoana ireo rahalahy mpino nefa mbola manota ihany? Manome valiteny i Jesoa eto. Hafatra roa no ho raisintsika miainga avy amin'izao perikopa izao.
🔹 MBOLA MIALA NENINA AMINTSIKA ANDRIAMANITRA
Raha mijery ny tantara isika dia mahita fa i Jesoa mihitsy no nampianatra hoe: Raha manota aminao ny rahalahinao, dia mankanesa any aminy ary dia miresaha tsara ianareo. Izany hoe, raha manota ianao dia maniraka olona Andriamanitra hifanatrika tsara aminao sy hifampiresaka aminao ary hilaza ny fahadisoanao. Raha tsy mety mihaino azy ianao dia asain'i Jesoa indray ilay olona nirahiny hitady vavolombelona roa na telo hananatra anao. Raha mbola tsy mihaino ihany ianao dia lazain'i Jesoa hoe: ambarao amin'ny Fiangonana, aleo ny fiangonana indray no hananatra anao. Raha tsy mihaino ny Fiangonana ianao izay vao atao tahaka ny jentilisa sy ny mpamory hetra. Raha jerena tsara ity fanoharana ity dia milaza hoe, raha misy olona mpino nefa manota dia aza maika ny hanameloka azy aloha, fa ialao nenina tanteraka aloha izy izay vao ampidirina ao amin'ny kilasin'ny mpanota tahaka ny jentilisa sy ny mpamory hetra. Izany hoe, miala nenina ny amintsika Andriamanitra. Ataony daholo izay fialà-nenina rehetra mba hahatsapanao fa mpanota ianao ary tokony hibebaka. Koa fotoana izao hibebahanao, aza be fangatak'andro f'andrao hitondra anao any amin'ny fahaverezana izany. Hararaoty fa mbola miala nenina ny amintsika Andriamanitra.
🔹 MBOLA VONONA HIARA-DALANA AMINTSIKA I JESOA
Manomboka eo amin'ny and.18 dia manome fahefana ny mpianatra i Jesoa, ka na inona na inona fehezin'izy ireo ety ambonin'ny tany dia ho fehezina any an-danitra, ary na inona na inona vahan'izy ireo ety ambonin'ny tany dia ho vahana any an-danitra. Izany hoe, Fahefana iainana ety ambonin'ny tany kanefa fankatoavana avy any an-danitra no nanaovana azy noresahin'i Jesoa eto. Midika izany, fa na inona na inona fanapahan-kevitra raisintsika Kristiana ety an-tany dia ataovy an-tsaina aloha hoe nankatoavin'Andriamanitra ve ity fanapahan-kevitra noraisina ity. Tena sitrak'Andriamanitra tokoa ve izao zavatra atao izao? Rehefa azonao antoka tokoa fa nankatoavin'Andriamanitra ny fanapahan-kevitrao dia tanteraho. Fa tsy izany ihany fa eny amin'ny and.20 farany i Jesoa dia manome toky hoe: " Fa na aiza na aiza no iangonan'ny roa na telo amin'ny Anarako, dia eo afovoany Aho". Izany dia midika fa i JESOA KRISTY dia mbola vonona ny hiara-dia amintsika hatrany, na aiza na aiza toerana misy antsika, rehefa ataontsika ho antom-pisiantsika IZY dia manatrika antsika hatrany ary eo afovoantsika hatrany. Mbola vonona hiara-dia aminao i Jesoa, koa na aiza na aiza misy anao, na inona na inona ataonao dia ataovy amin'ny Anaran'i Jesoa mandrakariva.
✨ Tsarovy fa tena fialà-nenina nataon'Andriamanitra ho antsika ny nandefasany an'i JESOA KRISTY hidina tety an-tany mba hamonjy antsika olombelona mpanota. Araka izany dia hoy ny Soratra Masina hoe: " Esory ny masirasira ela, mba ho vongana vaovao ianareo, araka izay tsy maha-misy masirasira anareo. Fa voavono Kristy, P***a ho antsika" I Korintiana 5 : 7 ✨
SOLI DEO GLORIA
🖊️ Soarivololona Elena Rakotomanga , Mpitandrina
