Barinarivo Rajosoa

Barinarivo Rajosoa Katsaho aloha ny Fanjakan'Andriamanitra sy ny fahamarinany

24/05/2026

Mofonaina Alatsinainy 25 Mey 2026
Jaona 20. 21-23
JESOA MANIRAKA ANTSIKA HAMELA HELOKA REHEFA AVY NANDRAY NY FANAHY MASINA

Ary hoy indray Jesoa taminy: Fiadanana ho anareo; tahaka ny nanirahan'ny Ray Ahy no anirahako anareo kosa. 22 Ary rehefa nilaza izany Izy, dia nanisy fofonaina, ka hoy Izy taminy: Raiso ny Fanahy Masina; 23 na helok'iza na helok'iza no avelanareo, dia voavela izany; ary na an'iza na an'iza kosa no tsy avelanareo, dia tsy voavela izany.
---------------
Rehefa nitsangana tamin’ny maty Jesoa dia niseho tamin’ny mpianany tao amin’ny efitrano nihidy. Nihidy aman-trano tao ny mpianatra noho izy ireo natahotra sao hosamborin’ny Jiosy ka hovonoin’izy ireo koa. Jesoa rahateo efa tsy eo, ary noheverin’izy ireo fa tsy mbola nitsangana tamin’ny maty. Rehefa niseho tamin’ny mpianatra Jesoa dia

1. Nanome fiadanana (and 19)
“Ary rehefa harivan'ilay andro voalohany amin'ny herinandro, raha voarindrina ny varavaran'izay niangonan'ny mpianatra, noho ny fahatahorana ny Jiosy, dia tonga Jesoa ka nitsangana teo afovoany, dia nanao taminy hoe: Fiadanana ho anareo”
Rehefa nahita ny mpianany tao anaty tahotra Jesoa dia nanaisotra ny tahotra tao amin’izy ireo. Nanonona fiadanana ho azy ireo Izy. Mampianatra antsika Jesoa fa fomba iray manaisotra ny tahotra ao amin’ny olona ny fanononana fiadanana ho azy. Fiadanana izay tsy tahaka ny fanomen’izao tontolo izao araka ny tenin’i Jesoa. amin’izao fotoana tena mampitebiteby sy mampiahiahy ny olona izao no tena mila olona hanonona fiadanana Jesoa Kristy. Meteza arak’izany ho irany hanonona fiadanana ho an’ny manodidina anao.

2. Mamerina fifaliana
Noho ny tahotra ny Jiosy dia tsy nanana intsony na dia fifaliana aza ny mpianatra. Manaisotra ao amin’ny olona ny fifaliana tokoa mantsy ny tahotra. Soa fa niseho tamin’izy ireo Jesoa, namerina indray ny fifaliana. Ary io fifaliana io dia fifaliana tena izy noho izy nateraky ny fahitana an’i Jesoa nandresy ny fasana sy ny fahafatesana. Noho ny fahasarotana maro samihafa iainan’ny olona dia maro no efa tsy manana fifaliana intsony. Mila hoentina eo amin’izy ireo Jesoa, mila aseho an’izy ireo Jesoa fa izany ihany no mamerina ny fifaliana eo. Izay tsy tonga ao amin’i Jesoa, izay tsy mifandray sy tsy mahita an’i Jesoa dia tsy hanam-pifaliana na oviana na oviana, mety hamoy fo aza noho izao fiainana manahirana izao. Handeha isika ho fitaovana mahomby eo am-pelantanan’Andriamanitra hitondra an’i Jesoa eo amin’ny olona rehetra mba hamerina indray ny fifaliana eo amin’izay manodidina antsika.

3. Maniraka (and 21ss)
“Ary hoy indray Jesoa taminy: Fiadanana ho anareo; tahaka ny nanirahan'ny Ray Ahy no anirahako anareo kosa”
Miseho amin’ny maha-Andriamanitra Azy Jesoa eto. Lazainy mazava tsara fa naniraka Azy ny Ray, ary anjarany indray izao no maniraka ireo Apostoly. Tsy mifanohitra tamin’izay nanirahana Azy no hanirahany. Raha ny marina ireto iraka dia manohy ihany izay efa natombony. Irahina izy ireo ka omena Fanahy Masina, irahina izy ireo mba hanambara famelan-keloka. Izay manana Fanahy Masina arak’izany no afaka hanonona famelan-keloka ho an’izay mila izany. raha ny marina dia iraka mpanambara famelan-keloka ny fiangonana. Koa izay mino dia ilazana fa vita fihavanana amin’Andriamanitra izy ireo ary mahazo famelan-keloka. Izay tsy mety mino kosa dia tsy hahazo famelan-keloka ary tsy ho vita fihavanana amin’Andriamanitra. Meteza ho iraka matoky ka hanaiky ny asan’ny Fanahy Masina hanonona famelan-keloka ho an’ny olona rehetra – indrindra ireo mino.

Barinarivo Rajosoa Mpitandrina

22/05/2026

Mofonaina Sabotsy 23 Mey 2026
Galatiana 5. 22-25
NY VOKATRY NY FANAHY

Fa ny vokatry ny Fanahy kosa dia fitiavana, fifaliana, fiadanana, fahari-po, fahamoram-panahy, fanaovan-tsoa, fahamarinana, 23 fahalemem-panahy, fahononam-po; tsy misy lalàna manohitra izany. 24 Fa izay an'i Kristy Jesosy dia efa nanombo ny nofony mbamin'ny faniriany sy ny filàny tamin'ny hazo fijaliana. 25 Raha velon'ny Fanahy isika, dia aoka handeha araka ny Fanahy.
----------------
Taomin’i Paoly ny Kristianina mba handeha araka ny Fanahy. Ny hoe mandeha araka ny Fanahy araka izay nampianarina antsika dia mandeha tarihin’ny Fanahy Masina. Ireto zavatra efatra ireto no porofo hahafantarana fa mandeha amin’izay itarihan’ny Fanahy Masina isika

1. Fitiavana (and 22)
« Fa ny vokatry ny Fanahy kosa dia fitiavana »
Manam-pitiavana izay manaiky tarihin’ny Fanahy Masina. Azo lazaina fa tena fanomezana avy amin’ny Fanahy Masina koa ny fitiavana. Raha miresaka fitiavana anefa isika dia tsy maintsy mahatsiaro fa ny tena fitiavana dia mandray roa. Ny fitiavana an’Andriamanitra aloha sy ny fitiavana ny namana koa. Izay tarihin’ny Fanahy Masina dia tarihiny hanana fitiavana an’Andriamanitra sy ny mpiara-belona aminy. Raha miresaka fitiavana koa isika dia mila mahatsiaro fa Jesoa no tena fitiavana, Izy no fitiavan’Andriamanitra. Izy irery no tena tia an’Andriamanitra sy ny namany (ny olona rehetra). Voafintina sy voaporofon’ny hazo fijaliana rahateo izay fitiavan’i Jesoa izany. Meteza hotarihin’ny Fanahy Masina dia ho be fitiavana isika : fitiavana an’Andriamanitra sy ny namantsika.

2. Fifaliana (and 22)
« Fa ny vokatry ny Fanahy kosa dia … fifaliana »
Manam-pifaliana izay manaiky hotarihin’ny Fanahy Masina. Manam-pifaliana eto amin’izao tontolo izao be fahoriana, manam-pifaliana eto amin’izao tontolo izao be olana sy zava-tsarotra sedraina. Manam-pifaliana eto amin’izao tontolo izao mirimorimo ka mampitotototo ny ankamaroan’ny olona. Io fifaliana io no manaisotra ao amin’ny olona ny toe-po amam-panahy mitady hivily ho amin’ny famoizam-po eo anatrehan’ny zava-tsarotra sedraina. Io fifaliana io koa no mitahiry azy amin’ny finoana sy ny fanompoana an’Andriamanitra marina. Meteza hotarihin’ny Fanahy Masina dia ho falifaly lalandava tokoa.

3. Fiadanana (and 22)
« Fa ny vokatry ny Fanahy kosa dia … fiadanana »
Manam-piadanana izay manaiky hotarihin’ny Fanahy Masina. Manam-piadanana eto amin’izao tontolo izao izay mikorontana sy miady lava, eto amin’izao tontolo izao izay mihazakazaka tsy misy fiafarany, eto amin’izao tontolo izao izay maha-be tebiteby sy mampatahotra. Ny hoe fiadanana mantsy dia toe-po amam-panahy tony miatrika ny zavatra rehetra. Tena fanomezana avy amin’ny Fanahy Masina izay fiadanana miatrika ny zavatra rehetra izany. Mampitoetra ny fiadanana nampanantenain’i Jesoa tokoa ny Fanahy Masina. Ilay fiadanana izay tsy hain’izao tontolo izao ny manome azy. Meteza hotarihin’ny Fanahy Masina dia hiadana.

4. Fahamarinana (and 22)
« Fa ny vokatry ny Fanahy kosa dia … fahamarinana »
Asan’ny Fanahy Masina ao amin’ny olona, ao amin’ny mino ny fahamarinana. Jesoa raha nivavaka dia nilaza mazava tsara tamin’Andriamanitra mba tsy hanaisotra ny mino eto amin’izao tontolo izao fa ny hiaro azy amin’ny ratsy. Anisan’ny fiarovan’Andriamanitra ny mino ny fanomezana azy ny Fanahy Masina izay mitarika azy hanao ny marina mandrakariva. Miaina eto amin’izao tontolo izao izay tena hanjakan’ny tsi-fahamarinana amin’ny endriny maro isika. Ny fanekentsika hotarihin’ny Fanahy Masina ihany no hahatonga antsika ho marina amin’ny zavatra rehetra. Jesoa dia tena marina, Izy rahateo no Fahamarinana, tsy mahagaga izany fa nanaiky ny nofenoin’Andriamanitra ny Fanahy Masina Izy. Soa fianatra amin’i Jesoa ny fanekena ny fahafenoan’ny Fanahy Masina mba ho marina amin’ny zavatra rehetra isika.

Barinarivo Rajosoa Mpitandrina

21/05/2026

Mofonaina Zoma 22 Mey 2026
1 Mpanjaka 3. 26-28
MATAHOTRA MPANJAKA HENDRY NY VAHOAKA

Fa niteny tamin'ny mpanjaka ravehivavy, renin'ny zaza velona satria nandevilevy ny fony noho ny amin'ny zanany ka nanao hoe: Tompokolahy ô, trarantitra ianao, omeo azy ihany ary ny zaza velona, fa aza dia vonoina re! Fa hoy kosa ny iray: Aoka tsy ho ahy tsy ho anao, fa zarao mihitsy. 27 Dia namaly ny mpanjaka ka nanao hoe: Omeo itsy ny zaza velona, fa aoka tsy hovonoina; fa io mihitsy no reniny. 28 Ary raha ren'ny Isiraely rehetra izany fitsarana nataon'ny mpanjaka izany, dia natahotra ny mpanjaka izy, satria hitany fa misy fahendren'Andriamanitra ao am-pony ho entiny mitsara.
---------------
Ity mofonaina ity dia mitantara amintsika ny fomba nampiasan’i Solomona ny fahendrena nomen’Andriamanitra azy raha nangataka izany tamin’Andriamanitra izy. Noho io fahaiza-mitsara ny adin’ireto vehivavy janga roa ireto dia tonga nalaza Solomona ary ambaran’ny tantara fa natahotra azy ny vahoaka. Hendry tokoa ny mpanjaka rehefa

1. Azon’ny olona hatonina hitarainana (and 16)
“Ary tamin'izany dia nisy vehivavy janga roa nankao amin'ny mpanjaka ka nitsangana teo anatrehany”
Voalaza eto amin’ny fitantarana ny mombamomba ireto vehivavy nanatona nitondra ny adiny teo amin’i Solomona ireto. Vehivavy tsy mba manan-kaja akory fa lazaina hoe janga, ratsy fitondrantena izany. Ny iray tamin’izy ireo aza moa dia aseho ho olona, vehivavy tsy tomponandraikitra fa nahafaty ny zanany raha natory tamin’ny alina. Olona ohatra izany no nahazo nanatona ny Mpanjaka, olona toa izany no neken’ny mpanjaka hitondra ny adiny teo aminy. Raharaha kely tsy dia manao ahoana koa no noentina teo aminy kanefa dia nekeny izany. Hendry arak’izany ny mpitondra rehefa azon’ny olona rehetra hatonina, indrindra amin’izay mahatery sy manahirana azy.
Meteza koa isika ho tomponandraikitra azon’ny olona rehetra hatonina amin’izay manahirana azy. meteza isika ho olona mora fanahy ka mandray ny olona rehetra, ary tsy mieritreritra ny zava-manahirana ny olona ho zavatra kely sy bitika.

2. Mahay mamantatra ny marina (and 27)
“Dia namaly ny mpanjaka ka nanao hoe: Omeo itsy ny zaza velona, fa aoka tsy hovonoina; fa io mihitsy no reniny”
Hoy ny fahendrena Malagasy hoe: “ny marina toy ny trondro vaventy, tsy hita raha tsy ao amin’ny lalina”. Midika izany fa tsy zavatra mora ny mahita ny marina, mila miditra lalina, mila manadihady lalina. Fisaka rahateo ny marina ka sarotra ny mikaroka izany. Tamin’ny alalan’ny valin-tenin’ilay vehivavy iray tena tompon-janaka no nahafantaran’i Solomon any maha-renin’ilay zaza azy. Raha nosedraina Solomona momba io fahendrena azony avy amin’Andriamanitra io dia asehon’ny tantara fa afa-panadinana izy. Na dia sarotra tokoa aza ny mamantatra ny marina, izay manam-pahendrena avy amin’Andriamanitra kosa dia mahay mamantatra izany ka tonga mahay mandamina ireo disadisa manahirana eo amin’ny fiarahamonina. Tsy misy marina azo fantarina ivelan’izay fanomezam-pahasoavana avy amin’ny Tompo.

3. Hajain’ny vahoaka izy (and 28)
“Ary raha ren'ny Isiraely rehetra izany fitsarana nataon'ny mpanjaka izany, dia natahotra ny mpanjaka izy, satria hitany fa misy fahendren'Andriamanitra ao am-pony ho entiny mitsara”
Ny hoe matahotra dia ho enti-milaza fanajana avy amin’ny vahoaka. Hajaina ny mpitondra rehefa hita fa Hendry izy. Ambara eto amin’izao mofonaina izao fa ren’ny vahoaka ny fahaiza-mitsara tao amin’i Solomona. Ambara ihany koa fa hitan’ny vahoaka ny fahendren’Andriamanitra tao aminy. Tsy zava-miafina arak’izany ny fahendrena, tsy zava-miafina toa izany koa ny hadalana. Rehefa hita sy tsapan’ny hoentina fa Hendry ny mpitondra azy dia mipetraka ho azy ny tahotra sy fanajana azy. Tsy zavatra hangatahina rahateo izany fa tena azon’izay manam-pahendrena. Tsy tonga tonga ho azy ny fanajana sy ny tahotra ny mpitondra, tena vokatry ny asan’Andriamanitra ao aminy izany. Meteza iasan’ny Fanahy Masina dia hanam-pahendrena avy amin’Andriamanitra isika.

Barinarivo Rajosoa Mpitandrina

20/05/2026

Mofonaina Alakamisy 21 Mey 2026
Jeremia 3. 1-5
ADNRIAMANITRA FITIAVANA JEHOVAH

Fa hoy Izy: Raha misy lehilahy misao-bady, Ary efa miala ravehivavy ka vadin'olon-kafa, Moa mahazo miverina aminy indray va ralehilahy? Tsy haloto tokoa va izany tany izany? Fa hianao dia efa nijangajanga tamin-tsakaiza maro, Ka moa mahazo miverina amiko va hianao? hoy Jehovah. 2 Andrandrao amin'ny tendrombohitra mangadihady ny masonao, ka jereo, Taiza no tsy nandrian'olona taminao? Teny an-dàlambe no niandrasanao azy Toy ny Arabo any an-efitra; Ary ny fijangajanganao sy ny faharatsianao no nandotoanao ny tany, 3 Ka dia voasakana ny orana mivatravatra, Sady tsy tonga ny fara-orana; Ary ny handrinao dia handrin'ny vehivavy janga Ka tsy manan-kenatra. 4 Moa tsy hitaraina amiko va hianao amin'izao sisa izao hoe: Ry Raiko ô, Hianao no nahazatra ahy, hatry ny fony aho mbola tanora? 5 Ho tezitra mandrakizay va Izy? Hitahiry fahatezerana hatramin'ny farany va Izy? Indro, efa niteny toy izany hianao, nefa nanao izany ratsy izany ihany ka nahatanteraka izany.
-----------------------
Jeremia dia mpaminany niasa nandritra ny vanim-potoana farany tamin’ny fanjakan’i Joda, talohan’ny faharavan’i Jerosalema sy ny nandefasana ny jiosy ho babo tany Babilona (manodidina ny taonjato faha-7 tal. J.K.). Tamin’izany nivily tamin’Andriamanitra ny vahoaka, nanompo sampy, nanao fifanarahana politika tamin’ny firenena hafa, ary simba ny fiainana ara-panahy sy ara-moraly. Jeremia dia nantsoina hampitandrina fa hiteraka fitsarana izany fivadihana izany. Ao amin’i Jeremia ny hoe Isiraely dia ho enti-milaza vady nivadika. Andriamanitra mampitaha an’i Israely amin’ny vehivavy manitsakitsa-bady. Raha misy vehivavy misaraka amin’ny vadiny ka manambady hafa, dia tsy tokony hiverina amin’ny vadiny taloha intsony. Fa eto Andriamanitra milaza zavatra manaitra fa na dia nivadika imbetsaka aza Israely, mbola antsoiny hiverina ihany izy. Izany no mampiseho ny fahamasinan’Andriamanitra, nefa koa ny famindram-pony lehibe.

1. Vahoaka mpijangajanga ny Jiosy
Tsy resaka fijangajangana ara-nofo fotsiny no tiana lazaina eto. Ny “fijangajangana” eto dia fanompoan-tsampy, fitokisana amin’ny hery hafa fa tsy amin’Andriamanitra, fivadihana amin’ny fanekena. Izany no olana lehibe indrindra izay tsy olana politika na ara-toekarena, fa fivadihan’ny fo amin’Andriamanitra. Io fivadihana amin’Andriamanitra io no mampalahelo Azy indrindra koa anefa.
Eo amin’ny and 4,5 anefa dia miantso an’Andriamanitra Ray ny vahoaka. Kanefa tsy tena mibebaka marina izy ireo. Izay no tsikera mafy ataon’i Jeremia satria tokoa mety ho tsara ny teny fivavahana, nefa tsy miova ny fiainana. Izany no iray amin’ireo lohahevitra lehibe ao amin’i Jeremia, tsy ampy ny fombafomba ara-pivavahana raha tsy misy fiovam-po marina.
Raha miasa ao amin’ny mino ny Fanahy Masina arak’izany dia Izy no mitarika ny mino ho tokam-po, ary mitaona sy mampirisika azy hibebaka marina tokoa. Mba irio, mba irio koa ny asan’ny Fanahy Masina fa manatsara ny fifandraisana amin’Andriamanitra Izy.

2. Andriamanitra fitiavana Jehovah
Tena tsy fanao tokoa teo amin’ny fiarahamonina Jiosy ny hoe efa nandeha, efa nisara-bady nefa mbola nifamerina indray. Eto kosa anefa, Andriamanitra mihitsy no miantso ny vahoakany hiverina Aminy indray.
Raha miresaka an’Andriamanitra isika dia miresaka zavatra roa: Andriamanitra marina Izy sy Andriamanitra mamindra fo Izy. Ilay fahamarinany dia manosika Azy hitsara arak’izany fahamarinany izany. Ilay famindrampony kosa dia manery Azy hanaiky ny fiverenan’ny vahoakany na dia efa niala Taminy aza. Matanjaka be ny maha-Andriamanitry ny fahamarinana Azy, fa tsy latsa-danja amin’izany koa ny maha-Andriamanitra famindrampo Azy. Raha tsy ity faharoa ity Andriamanitra dia efa tsy hay izay niafarantsika teto.
Ny asan’ny Fanahin’Andriamanitra eo amintsika dia mampianatra antsika ny maha-fitiavana an’Andriamanitra sady tsy hanararaotra izany. Hahay hisitraka tsara ny famindrampony.

Barinarivo Rajosoa Mpitandrina

20/05/2026

Mofonaina Alarobia 20 Mey 2026
Efesiana 4. 1-6
MANDEHA MENDRIKA NY FIANTSOANA

Ary noho izany izaho, mpifatotra noho ny amin'ny Tompo, dia mangataka aminareo mba handeha miendrika ny fiantsoana izay niantsoana anareo, 2 amin'ny fanetren-tena rehetra sy ny fahalemem-panahy, amin'ny fahari-po mifandefitra amin'ny fitiavana, 3 mazoto mitana ny firaisana avy amin'ny Fanahy amin'ny fehim-pihavanana. 4 Iray ny tena, ary iray ny Fanahy, dia toy ny niantsoana anareo ho amin'ny fanantenana iray momba ny fiantsoana anareo; 5 iray ny Tompo, iray ny finoana, iray ny batisa, 6 iray Andriamanitra sady Rain'izy rehetra, Izay ambonin'izy rehetra sy manerana azy rehetra ary ao amin'izy rehetra.
-----------------------
Ny Epistily nosoratan’i Paoly ho an’ny Efesianina dia mizara roa mazava tsara :
- Efe 1 – 3 dia tena mifantoka amin’ireo fampianaram-pinoana maha-Kristianina
- Efe 4 – 6 kosa dia hampianaran’i Paoly antsika ny fomba fampiharana izany eo amin’ny fiainana an-davanandro eo anivon’ny fiarahamonina.
Ny epistily ho an'ny Efesiana dia nosoratan’i Paoly mba hamporisihana ny mino hahatakatra ny maha-izy azy ao amin’i Kristy (toko 1-3) sy hiaina araka izany ao anatin’ny firaisan-kina, ny fahamasinana, ary ny fijoroana ho vavolombelona eo amin’izao tontolo izao (toko 4-6). Ny toko faha-4 dia manomboka amin’ny fanentanana hitandroana ny firaisan-kina ao amin’ny Fiangonana sy hanekena ireo fanomezam-panahy omen’i Kristy ho fanorenana ny tenany, dia ny vatany. Nantsoina ho Kristianina ny mino araka ny and 1 amin’ny mofonaina, noho izany dia ilaina tokoa ny

1. Maneho toe-panahy mendrika (and 1,2)
« Mba handeha miendrika ny fiantsoana izay niantsoana anareo, 2 amin'ny fanetren-tena rehetra sy ny fahalemem-panahy, amin'ny fahari-po mifandefitra amin'ny fitiavana »
Sarobidy ny manana toe-panahy araka an’Andriamanitra eo amin’izay hijoroana ho vavolombelon’i Jesoa Kristy. Toe-panahy ateraky ny fitiavana avokoa ny fahaiza-manetry tena, fahalemem-panahy, fahari-po sy fandeferana. Samy hita teo amin’i Kristy avokoa ireo ka ilaina hita eo amin’ny mpino ihany koa. Rehefa be fitiavana ny olona dia miseho ho azy ireo toe-panahy araka an’Andriamanitra ireo. Paoly manentana ny mino mba hiaina mendrika ny fiantsoana masina. Toe-panahy ilaina:
- Fanetren-tena: miseho ho tsy miavonavona, fa manaiky ny maha-voaantso noho ny fahasoavana.
- Fahalemem-panahy: Miaraka amin’ny fihetsika tsy mahery setra, fa manome aina ho an’ny hafa.
- Fahari-po sy fandeferana amin’ny fitiavana: Fampiharana ny fitiavana araka an’i Kristy, manam-paharetana sy miahy ny hafa, na amin’ny fotoana sarotra aza.

2. Makamamy ny fiombonana (and 3)
« Mazoto mitana ny firaisana avy amin'ny Fanahy amin'ny fehim-pihavanana »
Saropady tamin’ireo Apostoly ny fiombonan’ny fiangonana. Endrika hita mason’ny fifankatiavana sy finoana velona an’i Kristy izany. Fa tena fijoroana ho vavolombelona ihany koa. Ny firaisana dia tsy maintsy tadiavina sy tanana mafy, satria vokatry ny asan’ny Fanahy Masina ao amin’ny mpino. Io fanahy Masina io no mampiombona ny mino rehetra ho ao am-bala iray, Izy ihany koa no manome toe-panahy tia fiombonana sy firaisana. Tena mampiray ny mino ara-bakiteny tokoa ny Fanahin’Andriamanitra. Iray ny Tompo, iray ny finoana, iray ny batisa, ary iray ny Andriamanitra. Tsy misy fisaratsarahana amin’ny fanekena izany firaisana izany. Izay tia fiombonana arak’izany dia manaiky hotehirizin’ny Fanahin’Andriamanitra ao anatin’ny fiombonana mandrakariva. Tena mbola iasan’ny Fanahy Masina ny mino rehefa mbola ao aminy tsara ny fakamamiana ny fiombonana masina.

3. Mampiasa ny fanomezam-pahasoavana (and 7)
« Fa samy nomena ny fahasoavana araka ny ohatry ny fanomezan'i Kristy avy isika rehetra »
Nomena ny fanomezam-pahasoavana avy amin’ny Fanahy Masina ny mino ho enti-manompo an’Andriamanitra eo amin’ny fiangonana. Samy nomena ho enti-milaza izany fa maro ny fanomezam-pahasoavana eo amin’ny fiangonana. Natao maro izany mba handroso haingana araka ny sitrapon’Andriamanitra ny fiangonana. Natao maro izany mba tsy hahatsiaro hisy fahabangana amin’ny fanompoana an’Andriamanitra ny fiangonana. Kristy, taorian’ny fandreseny ny fahotana sy ny fahafatesana, dia nanome fanomezam-pahasoavana ho an’ny mpino rehetra. Ny fanomezam-pahasoavana dia nomena ho an’ny tsirairay mba hanompoana, hanamafisana, ary hampandrosoana ny vatana, izay ny Fiangonana. Raha amanapitrisa arak’izany ny isan’ny Kristianina dia toa izany koa no isan’ny fanomezam-pahasoavana miasa hampandroso ny finoana sy ny filazantsara, ny fanjakan’Andriamanitra eto amin’izao tontolo izao. Ny hafatra lehibe dia ny fananana fiainana ara-panahy miorina mafy amin’ny firaisana sy ny fanompoana, satria ny fiainana Kristianina dia fiantsoana masina mitaky fijoroana ho vavolombelona amin’ny asa sy toe-panahy tsara.

Barinarivo Rajosoa Mpitandrina

18/05/2026

Mofonaina Talata 19 Mey 2026
Lioka 2. 22-28
SIMEONA : LEHILAHY NANANA FANAHY MASINA TAO AMINY

Ary rehefa tapitra ny andro fidiovany, araka ny lalàn'i Mosesy, dia nitondra Azy niakatra tany Jerosalema izy mba hatolotra ho an'ny Tompo 23 araka ny voasoratra ao amin'ny lalàn'ny Tompo hoe: "Ny lahy voalohan-teraka rehetra hatao hoe masina ho an'i Jehovah" (Eks. 13. 2) 24 ary mba hanatitra fanatitra araka izay voalaza ao amin'ny lalàn'ny Tompo hoe: "domohina roa, na zana-boromailala roa" (Lev. 12. 8). 25 Ary, indro nisy lehilahy atao hoe Simeona tao Jerosalema; ary marina sady mpivavaka tsara izany lehilahy izany ka niandry ny fampiononana ny Isiraely; ary ny Fanahy Masina dia tao aminy. 26 Ary efa nambaran'ny Fanahy Masina taminy fa tsy hahita fahafatesana izy mandra-pahitany ny Kristin'ny Tompo. 27 Ary nentin'ny Fanahy Masina niditra teo an-kianjan'ny tempoly izy; ary rehefa nampidirin'ny ray aman-dreniny Jesosy zaza mba hanaovany araka ny fomban'ny lalàna ny amin'ny zaza, 28 dia nitrotro Azy izy ka nidera an'Andriamanitra
--------------------------
Rehefa mamaky ny Filazantsara isika dia toa endrika maloka no hitantaran’ireo mpanoratra ny filazantsara ny amin’ireo Jiosy. Izy ireo rahateo araka ny tantara dia tsy nandray an’i Jesoa, Izay mpamonjy izao tontolo izao. Tsy ny Jiosy rehetra anefa no nanana laza ratsy fa mba nisy ihany ireo Jiosy tsara laza voatantara ao amin’ny filazantsara. Iray amin’izy ireny i Simeona. Ireto no mampiavaka an’i Simeona

1. Lehilahy marina izy (and 25)
« Ary, indro nisy lehilahy atao hoe simeona tao Jerosalema; ary marina… izany lehilahy izany »
Tamin’ny olona rehetra tao Jerosalema dia ambara fa marina Simeona. Ny hoe marina dia azo adika hoe manana fiainana mifanaraka amin’ny Soratra Masina, mifanaraka amin’ny tenin’Andriamanitra, mifanaraka amin’ny Sitrapon’Andriamanitra. Ny maha-marina eo anatrehan’Andriamanitra sy eo anatrehan’ny fiarahamonina dia ny miaina mifanaraka amin’ny tenin’Andriamanitra. Hita teo amin’i Jesoa io fahamarinana io satria nifanaraka tamin’ny tenin’Andriamanitra ny fiainany.

2. Lehilahy mpivavaka tsara izy (and 25)
« Ary, indro nisy lehilahy atao hoe simeona tao Jerosalema… mpivavaka izany lehilahy izany »
Misy karazan’olona maro eo amin’ny fiangonana : mpivavaka ratsy – mpivavaka – mpivavaka ihany – mpivavaka tsara. Simeona dia ambaran’i Lioka fa mpivavaka tsara. Ny mivavaka araka ny famaritana fototra sy tsotra indrindra dia mariky ny fifandraisana amin’Andriamanitra. Misy arak’izany ratsy fifandraisana amin’Andriamanitra, misy eo eo ihany, misy kosa tsara. Simeona dia tsara fifandraisana amin’Andriamanitra. Jesoa koa dia ambaran’ny Soratra Masina fa tena tsara fifandraisana tamin’Andriamanitra : Izy no mpivavaka TENA tsara. Handeha hianatra Aminy.

3. Lehilahy be fanantenana izy (and 25)
« Ary, indro nisy lehilahy atao hoe simeona tao Jerosalema… niandry ny fampiononana ny Isiraely »
Noho izy mpivavaka tsara, niezaka niaina tamin’ny tenin’Andriamanitra dia niandry ny famonjena ny fireneny izy. Niandry izay hahatongavan’ny Mpamonjy (Kristy) hanafaka azy sy ny firenena amin’ny fahoriana noho ny fanjanahan-tany Romanina izy. Natanjaka tao aminy izany fanantenana ny hiavian’ny Mpamonjy ny fireneny izany. Rehefa tsara fifandraisana amin’Andriamanitra koa isika dia hatanjaka ao amintsika Malagasy ny fanantenana fa mbola ho afaka amin’izao fahantrana mangidy izao isika.

4. Lehilahy notarihin’ny Fanahy Masina izy (and 25-27)
« Ary, indro nisy lehilahy atao hoe simeona tao Jerosalema… ary ny Fanahy Masina dia tao aminy… Ary nentin'ny Fanahy Masina niditra teo an-kianjan'ny tempoly izy »
Iray amin’izay nampiavaka an’i Simeona ny fitarihan’ny Fanahy Masina azy. Ny Fanahy Masina izay nanome teny fampanantenana fa hahita an’i Jesoa izy, ny Fanahy Masina izay nitaona azy hifandray tsy tapaka tamin’Andriamanitra raha nitarika azy tao amin’ny kianjan’ny tempoly. Asan’ny Fanahy Masina arak’izao ny mampifandray mandrakariva ny olona amin’Andriamanitra. Meteza hotarihan’ny Fanahy Masina, mitarika anao ho amin’ny sehatra hifandraisana tsy tapaka amin’ny Tompo Izy.

5. Lehilahy nifandray feno tamin’i Jesoa izy (and 27,28)
« Ary nentin'ny Fanahy Masina niditra teo an-kianjan'ny tempoly izy; ary rehefa nampidirin'ny ray aman-dreniny Jesosy zaza mba hanaovany araka ny fomban'ny lalàna ny amin'ny zaza, 28 dia nitrotro Azy izy »
Ilay fitarihan’ny Fanahy Masina azy dia nitondra azy tamin’ny fihaonana tamin’i Jesoa. Amin’izay itarihan’ny Fanahy Masina ihany arak’izany no hahitana an’i Jesoa ka hifandraisana feno Aminy. Ilay fitrotroana an’i Jesoa mantsy dia tena fifandraisana feno sy tanteraka. Handeha atao vavaka isan’andro ny hoe : « Fanahy Masina ô, tariho mandrakariva aho mba ho tafahaona amin’i Jesoa ».

6. Lehilahy tsy natrahotra fahafatesana (and 29)
« Tompo ô, ankehitriny ny mpanomponao dia alefanao amin'ny fiadanana araka ny teninao »
Rehefa tafahaona tamin’i Jesoa Simeona, rehefa azony antoka ny famonjena azy dia tsy nampaninona azy ny ho faty amin’izay. Tsy nataony zavatra hofikirina mafy ny eto amin’izao tontolo izao. Tsapany koa fa nitana ny teniny ny Tompo ka hitany maso tokoa Jesoa araka ny tenin’ny Fanahy Masina taminy. Ataovy azo antoka ny famonjena anao dia ho tombony ho anao ny fahafatesana fa tsy mpampahory anao. Tombony satria fiampitany ho any amin’izay tsara lavitra kokoa, any amin’izay misy an’i Jesoa.

7. Lehilahy nidera an’Andriamanitra (and 27,28)
« Ary nentin'ny Fanahy Masina niditra teo an-kianjan'ny tempoly izy; ary rehefa nampidirin'ny ray aman-dreniny Jesosy zaza mba hanaovany araka ny fomban'ny lalàna ny amin'ny zaza, 28 dia nitrotro Azy izy ka nidera an'Andriamanitra »
Rehefa tafahaona tamin’i Jesoa Simeona dia nidera an’Andriamanitra. Vokatry ny fihaonana amin’i Jesoa arak’izany ny fiderana an’Andriamanitra. Matoa ny olona iray mahay midera an’Andriamanitra dia satria velona sy feno ny fifandraisany tamin’i Jesoa. Rehefa tonga ao amin’i Jesoa ny olona dia mahay midera an’Andriamanitra mandrakariva izy. Ianao koa, mba tsy ho endrika ivelany fotsiny ny fideranao an’Andriamanitra dia tongava ao amin’i Jesoa, Izy no mahay mampianatra anao ny fiderana marina an’Andriamanitra.

Barinarivo Rajosoa Mpitandrina

17/05/2026

Mofonaina Alatsinainy 18 Mey 2026
Nomery 11. 24-27
IZAY ITOERAN’NY FANAHY MASINA

Dia nivoaka Mosesy ka nilaza ny tenin'i Jehovah tamin'ny olona; dia nanangona fito-polo lahy tamin'ny loholon'ny firenena izy ka nampitoetra azy manodidina ny trano-lay. 25 Ary nidina teo amin'ny rahona Jehovah ka niteny taminy, dia nangalany ny Fanahy Izay tao amin'i Mosesy ka napetrany tao amin'ny loholona fito-polo lahy; ary raha mbola nitoetra tao aminy ny Fanahy, dia naminany izy, nefa tsy nanao intsony. 26 Fa nisy roa lahy nijanona teo an-toby, Eldada no anaran'ny anankiray, ary Medada no anaran'ny anankiray; ary ny Fanahy nitoetra tao aminy; ary isan'izay voasoratra izy roa lahy, nefa tsy mba nankeo amin'ny trano-lay; dia naminany teo an-toby izy roa lahy. 27 Ary nisy zatovo nihazakazaka, dia nilaza tamin'i Mosesy ka nanao hoe: Eldada sy Medada maminany etsy an-toby.
--------------------------
Rehefa tany an’efitra ny Zanak’Isiraely dia nimonomonona mandrakariva tamin’Andriamanitra sy Mosesy mpanompony. Nampitaraina an’i Mosesy tokoa izany fimonomononan’ny Zanak’Isiraely izany. Ny fimonomononana moa dia tsy tokony hohadinoina fa mariky ny tsy fahatokiana an’Andriamanitra sy Mosesy, mariky ny tsy fahaiza-mankasitraka an’Andriamanitra sy Mosesy koa. Teo anatrehan’izany olana izany dia notoron’Andriamanitra hevitra Mosesy ka

1. Nizara andraikitra izy (and 24)
DIEM « nisindra kely i Mosesy ka nilaza ny tenin’ny Tompo tamin’ny vahoaka. Nangoniny avy eo ireo fitopolo lahy tamin’ny loholom-bahoaka, dia napetrany nanodidina ny Tranolay fihaonana»
Manampy be hampahomby ny fitariham-bahoaka ny fizarana andraikitra, indrindra rehefa tena tsapa ho mavesatra izany. Tsy voatery ho mora mantsy ny mitarika ny olona ho any amin’ny tany Kanana. Na dia tany soa aza ny tany Kanana, ny làlana nankany dia tena sarotra ka antony nahatonga ny fimonomononana.
Izao mofonaina izao dia mampianatra antsika mamaky ankehitriny fa tsy voatery ho mora ny mitaona olona ho amin’ny ho avy tsara kokoa. Na dia tsy noterena aza ny Zanak’Isiraely ho any amin’ny tany Kanana dia sarotra ny nitaona azy ho any. Tsy terena toa izany koa isika ho any amin’ny Kanana Vaovao, fa tsy mora ny mankany. Tsy voatery hifampimonomonona sy hanome tsiny ny mpitarika mankany.

2. Nomen’Andriamanitra Fanahy Masina izay nandray andraikitra (and 25)
« Ary nidina teo amin'ny rahona Jehovah ka niteny taminy, dia nangalany ny Fanahy Izay tao amin'i Mosesy ka napetrany tao amin'ny loholona fito-polo lahy; ary raha mbola nitoetra tao aminy ny Fanahy, dia naminany izy »
Rehefa nanaiky niara-niasa tamin’i Mosesy ireto loholona teo amin’ny Isiraely dia nomena ny Fanahy Masina. Noho ny asan’ny Fanahy Masina dia naminany izy ireo. Midika izany fa izay hiasa ho an’Andriamanitra dia tsy maintsy mahazo ny Fanahy Masina, ary izay mahazo ny Fanahy Masina dia miasa ho an’Andriamanitra. Ny faminaniana mantsy dia asa fanambarana ny hafatr’Andriamanitra, asan’Andriamanitra.
Azo atao tsara arak’izao ny mangataka ny Fanahin’Andriamanitra amin’ny asan’Andriamanitra nankinina tamintsika. Tsy misy koa na iza na iza olona mahazo ny Fanahy Masina ka hanao asa ankoatra izay an’Andriamanitra. Tonga manompo an’Andriamanitra izay mahazo ny Fanahiny.

Barinarivo Rajosoa Mpitandrina

15/05/2026

Mofonaina Sabotsy 16 Mey 2026
‎Isaia 11. 1-5
‎JESOA KRISTY NO SOLOFON’I JESE
‎
‎Ary hisy Solofo mitsimoka eo amin'ny fototr'i Jese, ary hisy mitrebona avy eo amin'ny fakany; 2 Ary ny fanahin'i Jehovah hitoetra ao aminy, dia ny Fanahin'ny fahendrena sy ny fahazavan-tsaina; Ny Fanahin'ny fanoloran-tsaina sy ny faherezana; Ny Fanahin'ny fahalalana sy ny fahatahorana an'i Jehovah; 3 Ary ho hanitra ankasitrahana aminy ny fahatahorana an'i Jehovah, ka tsy hitsara araka ny hitan'ny masony izy, na hampiaiky araka ny ren'ny sofiny; 4 Fa hotsarainy amin'ny fahamarinana ny malahelo; Ary homeny rariny ny mpandefitra amin'ny tany; hamely ny tany amin'ny tsorakazon'ny vavany Izy, ary ny fofonain'ny molony no hamonoany ny ratsy fanahy. 5 Fahamarinana no ho fisikinany, ary fanahy mahatoky no ho fehin-kibony 6 Ary ny amboadia hiara-mitoetra amin'ny zanak'ondry; Ny leoparda hiara-mandry amin'ny zanak'osy; Ary ny zanak'omby sy ny liona tanora sy ny ombikely mifahy hiray toerana, Ary ny zazakely no hiroaka azy. 7 Ary ny ombivavy sy ny bera hiara-komana; Ny zanany hiara-mandry; Ary ny liona hihina-mololo tahaka ny omby; 8 Ny zaza minono hilalao amin'ny lavaky ny vipera, ary ny zaza mitsaha-nono haninjitra ny tànany ao amin'ny lavaky ny menarana. 9 Ary tsy handratra na hanimba eran'ny tendrombohitro masina izy; Fa ny tany ho henika ny fahalalana an'i Jehovah, tahaka ny anaronan'ny rano ny fanambanin'ny ranomasina. 10 Ary amin'izany andro izany ny solofon'i Jese, Izay hitsangana ho fanevan'ny firenena, dia Izy no hotadiavin'ny jentilisa; Ary ny fitoerany dia ho voninahitra.
‎--------------------------
‎William MacDonald, izay mpanazava Soratra Masina dia nanambara fa ny Isaia 11 no iray amin’ny hafatra lehibe indrindra ho amin’izao taonarivo fahatelo izao. Hoy izy : « Esaïe 11 est l’un des passages les plus importants sur le millenium, de l’AT comme du NT ». Nahoana tokoa moa ? Ny bokin’i Isaia dia ambaran’ny mpandinika fa Filazantsaran’ny Testamenta Taloha, noho izy manambara miharihary sy mivantambantana momba ny Mesia. Ary eto amin’ity Isaia 11 dia fanambarana sahady ao amin’ny tontolon’ny Testamenta Taloha ny amin’i Jesoa izay Mesia hitsimoka, na hivoaka avy amin’ny taranak’i Davida. Arak’izany, Jesoa no solofon’i Jese izay
‎
‎1. Nitoeran’ny Fanahy Masina (and 2)
‎« Ary ny fanahin'i Jehovah hitoetra ao aminy, dia ny Fanahin'ny fahendrena sy ny fahazavan-tsaina; Ny Fanahin'ny fanoloran-tsaina sy ny faherezana; Ny Fanahin'ny fahalalana sy ny fahatahorana an'i Jehovah »
‎Ny hoe solofon’i Jese dia ho enti-manambara ny maha-olombelona an’i Jesoa. Na dia olombelona aza Jesoa dia nanana izay nampiavaka Azy manokana Izy. Noho ny asan’ny Fanahy Masina izay nitoetra tao Aminy dia lehilahy feno fahatahorana an’Andriamanitra Izy. Tena nanam-pahendrena tsy manam-paharoa, ary anisan’izay nahira-tsaina indrindra teo amin’ny tantaran’ny olombelona. Noho ny fahendrena sy ny fahiratan-tsaina izay nananan’i Jesoa dia tena olom-banona tokoa Izy. Ny fahendrena sy ny saina nananany dia nampiasainy noenti-namaha olana samihafa teo amin’ny fiarahamonina nisy Azy.
‎Azo atao tsara ny ho tonga olona miavaka toa an’i Jesoa, mila manaiky ny asan’ny Fanahy Masina ao amintsika isika. Io Fanahy Masina tao amin’i Jesoa io ihany mantsy no ao anatintsika Kristianina ankehitriny koa. Koa izay fahendrena sy fahiratan-tsaina tao amin’i Jesoa dia afaka ho ao amintsika koa. Ilay fanahin’ny fahatahorana an’Andriamanitra tao amin’i Jesoa dia afaka ho ao amintsika Kristianina ankehitriny koa. Sarobidy ny fitoeran’ny Fanahy Masina ao amin’ny olona fa mahatonga ny olona hiavaka amin’ny besinimaro izany.
‎
‎2. Niasa tamin’ny fahamarinana (and 4,5)
‎« Fa hotsarainy amin'ny fahamarinana ny malahelo; Ary homeny rariny ny mpandefitra amin'ny tany; hamely ny tany amin'ny tsorakazon'ny vavany Izy, ary ny fofonain'ny molony no hamonoany ny ratsy fanahy. 5 Fahamarinana no ho fisikinany, ary fanahy mahatoky no ho fehin-kibony »
‎Iray tamin’izay nampiavaka an’i Jesoa teto amin’izao tontolo izao ny fomba fiasany. Ambara mazava tsara eto fa nanao izany tamin’ny fahamarinana Izy. Efa voafaritra mialohan’ny nahaterahany ny fomba fiasany. Ary rehefa tena tonga teto amin’izao tontolo izao Jesoa dia nandeha araka izay nanoratana Azy. Tsy zavatra tongatonga ho azy anefa izany fa tena vokatry ny asan’ny Fanahin’Andriamanitra tao amin’i Jesoa. Io Fanahin’Andriamanitra io no nanolo-tsaina Azy tamin’izay rehetra notanterahiny sy nataony.
‎Anisan’izay manahirana indrindra ankehitriny ny resaka fahamarinana, ampianarin’i Isaia isika fa azo atao tsara ny ho marina amin’izay rehetra atao amin’ny alalan’ny fanekena ny fitarihan-dalan’ny Fanahy Masina. Tena Andriamanitra manampy antsika hanao ny marina ny Fanahy Masina. Jesoa dia tena niankina tanteraka tamin’izany !

Barinarivo Rajosoa Mpitandrina

Address

Maintirano

Telephone

+261348105095

Website

Alerts

Be the first to know and let us send you an email when Barinarivo Rajosoa posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Barinarivo Rajosoa:

Shortcuts

Share

Category