Fédération Madagascar Nord-Ouest

10/05/2026

PASTEUR MARK FINLEY : NOMEN-BONINAHITRA “DOCTOR HONORIS CAUSA”

Ny Pasteur Mark Finley dia nahazo mari-pahaizana manokana “Doctor Honoris Causa” tao amin’ny Andrews University ny zoma lasa teo. Na dia mbola nisy fiantraikany taminy aza ilay ratra mafy nahazo azy tamin’ny volana martsa, izay nahadiso toerana ny taolan-tehezany (fémur), dia nijoro tamim-pifaliana sy tamim-pankasitrahana teo anoloan’ireo olona maro tonga nanatrika izy nandritra ny famakiana ny teny fanomezam-boninahitra nataon’i Arthur Stele, filohan’ny filankevi-pitantanan’ny Oniversite Andrews.
Izao no ampahany tamin’izany teny izany :
“Efa nanompo ny Fiangonana Advantista Mitandrina ny Andro Fahafito nandritra ny enimpolo taona teo ho eo i Mark Finley, tamin’ny maha-mpitandrina, evanjelistra, mpampianatra ary mpitantana azy. Ny fahavononany hitarika olona ho eo amin’i Jesosy, hitory ny Filazantsara ary hanofana ireo taranaka vaovao amin’ny asa fanompoana dia nisy fiantraikany tamin’ny fiainan’olona tsy tambo isaina.
Manana mari-pahaizana licence momba ny Teolojia sy maîtrise pastorale izy. Nahazo mari-boninahitra manokana ihany koa avy amin’ny Oniversite Advantista Southwestern sy ny Oniversite Advantista Montemorelos izy.
Nanomboka ny asa fanompoany tamin’ny taona 1967 izy, tamin’ny naha-mpitandrina azy tao amin’ny Southern New England Conference sy Cumberland Conference any Georgia. Tamin’ny 1974 dia niverina tao amin’ny New England Conference izy tamin’ny maha-evanjelistra azy, ary dimy taona taty aoriana dia lasa filoha sy mpampianatra tao amin’ny Lake Union Institute of Evangelism.
Nandritra izany fotoana izany dia nampianatra mpianatra seminera maro nanohy maîtrise momba ny Teolojia izy, nampiorina azy ireo tamin’ny fanoloran-tena ho an’i Kristy, ny fitiavana ny Tenin’Andriamanitra ary ny fahaizana manompo ny fiarahamonina amin’ny lafiny ara-batana, ara-tsaina, ara-tsosialy ary ara-panahy.
Teo anelanelan’ny taona 1985 sy 1991 dia niasa ho sekreteran’ny Ministerial Association ao amin’ny Diviziona Trans-Européenne izy, sady mpampianatra sy evanjelistra tany amin’ny firenena eoropeana 17. Nitarika fitoriana lehibe tany Pologne, Hongrie, Yougoslavie ary Rosia izy.
Nandritra ny asa fanompoany dia nitarika fivoriana evanjelistika iraisam-pirenena mihoatra ny 200 izy, anisan’izany ireo tany Nizeria, Tanzania ary Kenya, izay nahatonga olona an’aliny hibebaka sy hanatona an’i Kristy. Nadika tamin’ny fiteny mihoatra ny 50 ny toriteniny.
Tamin’ny 1991 dia lasa mpanolotra sy talen’ilay fandaharana fahitalavitra iraisam-pirenena ‘It Is Written’ izy. Tao anatin’izany andraikitra izany dia nampivelatra ny asa ka nahatratra fiangonana maherin’ny arivo tany amin’ny firenena 40, ary nanangana foibe satellite vaovao tany amin’ny firenena 10.
Namoaka fandaharana radio maherin’ny 400 ihany koa izy ho an’ny Salem National Radio Network ary anisan’ny filankevi-pitantanan’ny Hope Channel International TV sy Adventist World Radio.
Tamin’ny 2004 dia niditra tao amin’ny Foibe Iraisam-pirenen’ny Fiangonana Advantista izy amin’ny maha-talen’ny Evangelisation Mondiale azy. Tamin’ny 2005 dia voafidy ho filoha lefitra misahana ny Evangelisation Mondiale nandritra ny Session de la Conférence Générale izy ary nitana izany andraikitra izany hatramin’ny taona 2010. Nanomboka teo dia niasa ho mpanampy ny filohan’ny Conférence Générale izy.
Nanoratra boky maherin’ny 70 momba ny fiainana kristianina, ny foto-pampianarana ara-Baiboly ary ny faminanian’i Daniela sy Apokalypsy ihany koa izy.
Mark Finley dia filohan’ny Living Hope Evangelistic Ministries, izay namokatra horonantsary an-jatony ho an’ny fantsona YouTube HopeLives365 ary mitantana ivon-toerana fitsaharana ho an’ny mpitandrina any Haymarket, Virginia.
Izy mivady dia niara-niasa tao amin’ny asa fitoriana nandritra ny 50 taona mahery ary mbola manohy manompo amin’ny sekoly sy fivoriambe pastoraly maneran-tany.
Noho ny fanoloran-tenany tsy tapaka amin’ny fanabeazana sy fanofanana tanora amin’ny asa fitoriana eran-tany, ary noho ny asa goavana vitany teo amin’ny sehatry ny haino aman-jery, dia faly ny Oniversite Andrews manome voninahitra an’i Mark Finley amin’ny mari-pahaizana Doctor Honoris Causa momba ny Divinity.”
Avy amin’ny Monde Adventiste no nizara ity ampahany amin’ny tantaram-piainan’ity lehilahin’Andriamanitra ity, izay nanokana ny fiainany hitory ny Filazantsara.

Loharano : Andrews University ao amin’ny YouTube
Sary : Tambajotra sosialy

10/05/2026

Ho antsika izay nanontany ny programme sy ny momba ny fodiamandrin'i Zoky Elian Andriamitantsoa dia indro ny fampahafantarana izany. Mirary fiononana feno fanantenana hatrany ho an'ny fianakaviana mana-manjo.

04/05/2026

30/04/2026

“RADIO LIVE” : HETSIKA MIVANTANA HOTANTERAHIN’NY RADIO OASIS MAHAJANGA

Mitohy ny ezaka ataon’ny Radio Oasis Mahajanga amin’ny fampielezana hafatra mampahery sy manakaiky ny mpihaino sy ny fiaraha-monina. Ho fanamafisana izany dia mikarakara hetsika lehibe “Radio Live ! " Radio an-tsehatra izy ireo, izay hatao mivantana miaraka amin’ny mpihaino.
Hotanterahina ny Sabotsy 02 Mey 2026 manomboka amin’ny 3 ora tolakandro ny hetsika, ao amin’ny Fiangonana Advantista Zoara Famojena (Tsy Kivy Sotena).
Ny tanjon’ity hetsika ity dia ny hampivondrona ny mpihaino sy ny mpankafy ny Radio Oasis, sady hanolotra fandaharana mivantana ahitana votoaty manabe sy mampahery. Hisy ao anatin’izany
Ireo fandaharana tianao rehetra.
Fampianarana sy fanentanana ara-panahy
Mozika sy hira mampahery, tsy ahafahana mankafy fotsiny fa koa miaina sy henoina mivantana
Araka ny nambaran’ny mpikarakara, dia natao indrindra ho sehatra ifampizarana hafaliana sy finoana ity “Radio Live” ity, ka anasana ny rehetra tsy an-kanavaka, miaraka amin’ny ankohonana sy ny namana, hanatrika izany.
Mamporisika ny rehetra ihany koa izy ireo handray anjara mavitrika amin’ny hetsika, araka ny teny filamatra manao hoe: “IANAO AKAIKY ANAY, ZAHAY ANILANAO - OASIS 106.4" Tongava maro fa hifaly sy hifankahita mivantana isika hoy hatrany n'y ekipa rehetra efa vonona n'y hihaona amin'ny mpankafy sy mpanaraka n'y radio.
Tsiahivina fa ny Radio Oasis Mahajanga, raisina amin'ny mari-drefy 106.4 FM, dia mitondra hatrany hafatra mampahery sy feno fanantenana ho an’ny mponina eto Mahajanga, ka ho toerana fakan'aina ao anatin'ny efitra karakaina.

30/04/2026

FANAMBARANA OFISIALY : APETRAHO EO AMIN’NY FO NY TANANA REHEFA MANDEHA NY HIRAM-PIRENENA

Namoaka fanambarana ofisialy ny Ministeran’ny Serasera sy ny Kolontsaina mikasika ny fanajana ny hiram-pirenena malagasy, izay iray amin’ireo mariky ny maha-firenena sy maha-izy antsika.
Araka ny fanambarana, dia angatahana ny olom-pirenena rehetra mba hametraka ny tanana eo amin’ny fo rehefa maneno ny hiram-pirenena. Fihetsika tsotra kanefa manan-danja izany, izay maneho fanajana lalina ny firenena sy ny soatoavina iombonana.
Voalaza ao anatin’izany ihany koa fa atombohy amin’ny fiovam-pihetsika tsotra ny fanavaozana, ka ny fanandratana ny soatoavina sy ny fanajana ny fanjakana ary ny firenena no tanjona. Izany dia heverina ho dingana iray manan-danja amin’ny fanamafisana ny firaisankina sy ny maha-olom-pirenena tompon’andraikitra.
Nanentana ny rehetra ny ministera mba hanao fihetsika tsotra maneho ny maha olom-pirenena, indrindra amin’ny fotoan-dehibe iombonana, toy ny fanamarihana ofisialy na hetsika ampahibemaso.
Amin’ny alalan’ity hetsika ity, antenaina fa hiroborobo ny fahatsapana ho anisan’ny firenena sy ny fitiavan-tanindrazana eo amin’ny Malagasy, ka hanampy amin’ny fananganana fiaraha-monina mirindra sy manaja ny soatoavina iombonana.