20/06/2024
21. ANDRO-FAHA IRAIKA AMBY ROAPOLO
NY FO MASIN'I JESOA NO MAMPIANATRA ANTSIKA NY FAHADIOVANA
Ao amin'ny tonon-kiran'i Salomona misy teny toy izao: lasa nankaiza ihany ny malalanao, ry fanahy tsara indrindra? Andeha hiara-kitady Azy aminao izahay... Tsia, fa lasa nankany an-tanimboliny Izy... hanangona ny voninkazo fotsy...fa faly mihinana eo am-povoan'ny voninkazo fotsy Izy (Tononk. 5, 17; 6, 1-2).
I Jesoa-Kristy no ilay malala fatra-pitia loatra ny voninkazo fotsy, izany hoe : ny fahadiovana. Diniho tokoa fa hatrany hatrany dia olona madio no nofidiny hiarahana mitoetra. Virjiny no reny niteraka Azy; virjiny no lehilahy mpitaiza Azy; virjiny i Joany Baptista mpialoha Azy; virjiny i Joany, ilay apôstôly malalany indrindra. Tety ambonin'ny tany dia nankalaza ny fahavirjiniana Izy, ary Izy ihany indray no nilaza tamintsika tamin'ny alàlan'i Paoly apôstôliny, fa ny faha-virjiniana dia ambony noho ny fanambadiana.
Ary izay antsoin'i Jesoa-Kristy hanao raharaha lehibe amin'ny Egliziny, dia tiany ho virjiny; satria izay tsy manam-bady, dia mitandrina izay an'Andriamanitra mba hahafinaritra Azy. Ka fantatsika amin'izany, fa ny fahadiovana, indrindra fa ny fahavirjiniana no hatsaram-panahy mamin'ny Fo Masin' Jesoa tokoa. Koa toy ny inona ihany moa ny fahadiovana ilain'ny kristianina ? Dia ny fahadiovan'ny fo sy ny fahadiovan’ny vatana.
Misy ihany diso hevitra ka manao ho tsy fahotana ary minia mihevitra zavatra maloto, na ny mikolokolo ao am-po fanirian-dratsy. Nefa fahotana tokoa izany, na dia tsy tanteraka amin'ny nofo aza ireo hevitra sy faniriana ratsy ireo ! Fa hoy i Jesoa-Kristy: Izay rehetra mijery vehivavy ka maniry azy, dia efa nijangajanga taminy tao am-pony sahady (Mat.-5, 28). Ary ny olona toy izany indrindra no nanarin'i Jesoa mafy hoe: Lozanareo ry mpanora-dàlana Farisiana mpihatsara-velatsihy fa ny vohon'ny kapoaka sy ny lovia diovinareo nefa ny ao anatiny feno halatra tsy fihononana. Ry Farisiana jamba! diovy aloha ny atin'ny kapoaka sy ny lovia mba ho madio koa ny vohony (Mat. 23, 25-26). Koa mba fantarontsika tsara àry fa ny fo no miteraka ny fahotana: fa hoy indray ny
Soratra Masina : Ny fo no ihavian'ny hevitra ratsy, ny famonoan'olona, ny fakam-badin'olona, ny fijanga- jangana, ny halatra, ny ampanga lainga, ny fitenenana
ratsy (Mat. 15, 19).
Ny fahadiovana dia azo ampitahaina amin'ny rakitra feno volamena, ka mampitsiriritra ny mpangalatra izaitsizy, na azo ampitoviana amin'ny zava-manitra voatahiry anaty tavoahangy mora vaky. Ny rakitra feno volamena, raha tsy voatandrina tsara, dia tsy maintsy ho lasan'ny mpangalatra, ary ny tavoahangy feno ranomanitra raha hanaovana mosalahy, dia tsy maintsy ho vaky ka ho raraka ny zava-manitra. Torak'izany koa ny amin'ny fahadiovana; raha kitoatoa ny fitandremantsika azy, dia tsy maintsy ho lasan'ny demony ary ho afaka ilay fofon'ny hanitra soa ananany. K'inona àry no tokony hataontsika mba hitahirizantsika azy tsara?
Dia tokony hivavaka matetika isika araka ny hafatra nataon'i Jesoa-Kristy tamintsika hoe: "Tsy maintsy hivavaka lalandava, ary tsy hitsahatra (Lk. 18, 1). Ao amin'ny komonio misy ny Fo Masin'i Jesoa indrindra no hanovozantsika herim-po, izay hampaharitra antsika amin'ny fahadiovana. Ka Masina Maria renintsika no tokony hiangaviantsika mba hampahazo antsika izany fahasoavana lehibe izany. Ary ny fivavahana fanaontsika, aoka hataontsika hary fomba; izany hoe: fivavahana atao am-pitandremana, am-pinoana, ampanetren-tena ary am-pahatokiana. Ny fivavahana atao toy izany dia tsy maintsy hamporisika antsika hitandrina tsara ny fandresen'ny vatana mba tsy ho very fahadiovana.
Kanefa raha ny fivavahana ihany, dia mbola tsy ampy; fa tsy maintsy hasiana asa fivalozana sy fijalijaliana tsy mahalana loatra. Fa hoy indray Jesoa-Kristy : Tsy azo roahina afa-tsy amin'ny fivavahana sy ny fifadian-kanina izany karazana demony izany" (Mk 9, 28), Ka tsy ny fifadiana ao am-po ihany no lazain'ny Tompo tamin'izany teny izany, fa ny fampijaliana ny nofo koa. Fa hoy Md.Paoly manazava izany: "Asiako mafy ny tenako ary andevoziko mihitsy aza sao ny sasany efa nitoriako fa ny tenako kosa hatosika" (1 Kor. 9, 27).
Ry Fon'i Jesoa, fototry ny fahadiovana rehetra, mba hamasino ny tenanay sy ny fonay. Aoka ho madio izahay mba hanompo Anao sy hanao mandrakariva izay mahafaly Anao!
Volan'ny FO Masin'i Jesoa
