FJKM Antsirabe Fitiavana

27/05/2026

🥖Mofonaina Alarobia 27 May 2026.
📜MIASA AO AMIN'NY MINO
NY FANAHY MASINA

📖Lio.3.21-22
Ary rehefa natao batisa ny vahoaka rehetra, ary Jesoa koa efa natao batisa sy nivavaka, dia nisokatra ny lanitra;ary ny Fanahy Masina nidina teo amboniny, ka ny endriny dia tahaka ny voromailala; ary nisy feo avy tany an-danitra nanao hoe: Ianao no Zanako malalako; Ianao no sitrako.

✨✨✨✨✨✨✨✨✨✨✨✨✨✨

I- NY TRINITÉ TAMIN'NY BATISAN’I JESOA
Eto dia miseho mazava ireo Persona telo ao amin’ny Trinité:
1- Andriamanitra Ray
— Izy no niteny avy any an-danitra hoe:
“Ianao no Zanako malalako.”
Midika izany fa misy ilay Ray Izay miteny.
2- Andriamanitra Zanaka: Jesoa Kristy
— I Jesoa no natao batisa teo amin’ny rano.
Izy ilay Zanaka raisin’ny Ray ho malalany.
3- Andriamanitra Fanahy Masina
— Nidina tahaka ny voromailala teo ambonin’i Jesoa.
Maneho ny fanatrehan’ny Fanahy Masina izany.
Noho izany dia hita miaraka nefa samy hafa Persona: ny Ray miteny, ny Zanaka atao batisa, ary ny Fanahy Masina midina.
Izany no iray amin’ireo andininy mazava indrindra manambara ny Trinité Masina.

II- TSY NALENTIKA ANATY RANO NY BATISA
Porofo eto fa tsy ny firobohana rano no tena zava-dehibe amin’ny batisa.
Ao amin’ny andininy dia tsy misy milaza hoe:
naroboka tanteraka tao anaty rano i Jesoa,
na hoe ny habetsahan-drano no fototry ny batisa.
Fa ny tena nasongadina dia: nisokatra ny lanitra, nidina ny Fanahy Masina, ary nisy ny fanambaran’Andriamanitra.
Midika izany fa ny hevi-panahy sy ny asan’Andriamanitra no votoatin’ny batisa, fa tsy ny fomba fampidirana na fandetehana anaty rano fotsiny.
Ny rano dia famantarana ivelany ihany: ny fanadiovana, ny fibebahana, ary ny fiainam-baovao.
Fa ny tena zava-dehibe dia: ny fahasoavan’Andriamanitra, ny finoana, ary ny fanatrehan’ny Fanahy Masina.
Izany no antony tsy anaovan’ny fiangonana batisa: amin’ny fandrobohana satria tsy asan'ny rano ny Barisa fa asan’Andriamanitra amin’ny herin’ny Fanahy Masina.

III- HAFA MIHITSY NY BATISAN’I JESOA
Hafa mihitsy ny batisan’i Jesoa
Ny batisan’i Jesoa dia tsy mitovy amin’ny an’ny olona tsotra satria:
1. Tsy batisa fibebahana noho ny ota.
Ny olona nataon’i Jaona batisa dia nibebaka noho ny fahotany.
Fa i Jesoa kosa tsy nanana ota.
2. Fanamasinana sy fanombohana asa.
Ny batisan'i Jesoa dia:
- fanambarana ampahibemaso fa Izy no Mesia,
- fanombohan’ny asa famonjena hoataony,
- ary fanamasinana ny batisa ho an’ny olombelona.
3. Fanehoana ny maha-Zanak’Andriamanitra Azy
Tamin’io fotoana io dia :
- nisokatra ny lanitra,
- nidina ny Fanahy Masina,
- niteny ny Ray.
Koa ny batisan’i Jesoa dia fanambarana avy amin’Andriamanitra fa: Jesoa no Zanaka malala Mpamonjy izao tontolo izao.
4. Batisa mitondra Fanahy Masina
Jaona aza nilaza hoe:
“Izaho manao batisa amin’ny rano, fa Izy kosa hanao batisa amin’ny Fanahy Masina.”
Noho izany dia ambony lavitra noho ny batisan’i Jaona ny an’i Jesoa, satria mitondra:
fiainam-baovao, fahateraham-panahy, ary famonjena.
🙏🏻Ho an'Andriamanitra irery ny Voninahitra.
Amena.

26/05/2026

Ny alatsinaininay
Fitsangatsanganana tao anaty fiombonana sy fifankatiavana.
Fa ny vokatry ny Fanahy dia Fitiavana. Galatiana 5:22

26/05/2026

🥖MOFONAINA Talata 26 Mey 2026

📜MIASA AO AMIN'NY MINO
NY FANAHY MASINA

📖« Filipiana 1. 27 - 30 »

Fa hany ataoko: aoka ny fitondran-tenanareo ho miendrika ny filazantsaran'i Kristy, mba handrenesako ny toetrareo (na ho tonga aho ka hahita anareo, na tsy ho tonga), fa maharitra amin'ny fanahy iray ianareo ka miray fo hiara-miezaka hampandroso ny finoana ny filazantsara,ka tsy ho azon'ny fahavalo ampitahorina ianareo na amin'inona na amin'inona; fa amin'ireo dia mariky ny fahaverezana izany, nefa mariky ny famonjena anareo kosa, sady avy amin'Andriamanitra.Fa ianareo efa nomena noho ny an'i Kristy, tsy ny hino Azy ihany, fa ny hiharam-pahoriana koa noho ny aminy,dia manana izany ady izany ianareo, izay hitanareo teo amiko sady mbola renareo fa ato amiko ihany ankehitriny.

,✨✨✨✨✨✨✨✨✨✨✨✨

Matetika ny fanoherana sy ny fahasahiranana no mampihemotra antsika tsy hijoro amin'ny fahamarinana. Ny Apostoly Paoly anefa anio dia mampianatra fa ny Fanahy Masina no mampiray antsika ary manome hery hiaretana ny fitsapana am-pahasahiana, ho voninahitry ny Filazantsara.

🫴MIORINA TSARA AMIN'NY FANAHY IRAY
Mankahery ny fiangonana i Paoly mba hanana fitondran-tena mendrika ny Filazantsaran'i Kristy. Ny tena irariany dia ny handrenesana fa "mijoro tsara amin'ny fanahy iray ianareo ary miara-miezaka amin'ny fo iray ho an'ny finoana ny filazantsara". Mamporisika izy mba tsy hatahotra na kely akory aza manoloana ny mpanohitra, satria izany dia "mariky ny fahaverezany, fa mariky ny famonjena anareo kosa". Ambaran'ny andininy faha-29 fa nomena antsika tsy ny hino an'i Kristy ihany, fa ny hijaly ho Azy koa.

,🫴🏻Lesona
Miasa mampitambatra ny fiangonana ho "fanahy iray sy fo iray" ny Fanahy Masina. Io firaisankina avy amin'ny Fanahy io no fitaovam-piadiana mahery indrindra iatrehana ny mpanohitra. Ary Izy ihany koa no manome fahasahiana antsika hanaiky ny fijaliana ho an'i Kristy ho toy ny fanomezam-pahasoavana fa tsy ho toy ny sazy.

🫴🏻Fampiharana
Rehefa miatrika olana na fanoherana eo anivon'ny raharaham-piangonana ianao anio na avy amin'ny tsy fifankahazoan-kevitra izany, na avy amin'ny fitantanana ireo tetezamita isan-karazany dia aza mamaly amin'ny nofo. Mivavaha mba hiasan'ny Fanahy Masina hampiray fo ny mpiara-miasa rehetra. Rehefa miorina tsara amin'ny Fanahy iray ianareo, dia tsy hisy mpanohitra hahorohoro anareo.

🫴Ry havana, aoka isika hiara-miezaka amin'ny fanahy iray anio. Ny Fanahin'Andriamanitra no miaro antsika tsy hatahotra, na dia anaty fitsapana aza. Amena.
🙏🏻Ho an'Andriamanitra irery ny Voninahitra. Amena
-- Vatsim-panahy ho anao --

23/05/2026

🥖Mofonaina Sabotsy 23 Mey 2026
📜 MIASA AO AMIN'NY MINO
NY FANAHY MASINA

📖Galatiana 5. 22-25

🫴NY VOKATRY NY FANAHY

22 Fa ny vokatry ny Fanahy kosa dia fitiavana, fifaliana, fiadanana, fahari-po, fahamoram-panahy, fanaovan-tsoa, fahamarinana, 23 fahalemem-panahy, fahononam-po; tsy misy lalàna manohitra izany. 24 Fa izay an'i Kristy Jesosy dia efa nanombo ny nofony mbamin'ny faniriany sy ny filàny tamin'ny hazo fijaliana. 25 Raha velon'ny Fanahy isika, dia aoka handeha araka ny Fanahy.
✨✨✨✨✨✨✨✨✨✨✨✨

Taomin’i Paoly ny Kristianina mba handeha araka ny Fanahy. Ny hoe mandeha araka ny Fanahy araka izay nampianarina antsika dia mandeha tarihin’ny Fanahy Masina. Ireto zavatra efatra ireto no porofo hahafantarana fa mandeha amin’izay itarihan’ny Fanahy Masina isika

1. Fitiavana (and 22)
« Fa ny vokatry ny Fanahy kosa dia fitiavana »
Manam-pitiavana izay manaiky tarihin’ny Fanahy Masina. Azo lazaina fa tena fanomezana avy amin’ny Fanahy Masina koa ny fitiavana. Raha miresaka fitiavana anefa isika dia tsy maintsy mahatsiaro fa ny tena fitiavana dia mandray roa. Ny fitiavana an’Andriamanitra aloha sy ny fitiavana ny namana koa. Izay tarihin’ny Fanahy Masina dia tarihiny hanana fitiavana an’Andriamanitra sy ny mpiara-belona aminy. Raha miresaka fitiavana koa isika dia mila mahatsiaro fa Jesoa no tena fitiavana, Izy no fitiavan’Andriamanitra. Izy irery no tena tia an’Andriamanitra sy ny namany (ny olona rehetra). Voafintina sy voaporofon’ny hazo fijaliana rahateo izay fitiavan’i Jesoa izany. Meteza hotarihin’ny Fanahy Masina dia ho be fitiavana isika : fitiavana an’Andriamanitra sy ny namantsika.

2. Fifaliana (and 22)
« Fa ny vokatry ny Fanahy kosa dia … fifaliana »
Manam-pifaliana izay manaiky hotarihin’ny Fanahy Masina. Manam-pifaliana eto amin’izao tontolo izao be fahoriana, manam-pifaliana eto amin’izao tontolo izao be olana sy zava-tsarotra sedraina. Manam-pifaliana eto amin’izao tontolo izao mirimorimo ka mampitotototo ny ankamaroan’ny olona. Io fifaliana io no manaisotra ao amin’ny olona ny toe-po amam-panahy mitady hivily ho amin’ny famoizam-po eo anatrehan’ny zava-tsarotra sedraina. Io fifaliana io koa no mitahiry azy amin’ny finoana sy ny fanompoana an’Andriamanitra marina. Meteza hotarihin’ny Fanahy Masina dia ho falifaly lalandava tokoa.

3. Fiadanana (and 22)
« Fa ny vokatry ny Fanahy kosa dia … fiadanana »
Manam-piadanana izay manaiky hotarihin’ny Fanahy Masina. Manam-piadanana eto amin’izao tontolo izao izay mikorontana sy miady lava, eto amin’izao tontolo izao izay mihazakazaka tsy misy fiafarany, eto amin’izao tontolo izao izay maha-be tebiteby sy mampatahotra. Ny hoe fiadanana mantsy dia toe-po amam-panahy tony miatrika ny zavatra rehetra. Tena fanomezana avy amin’ny Fanahy Masina izay fiadanana miatrika ny zavatra rehetra izany. Mampitoetra ny fiadanana nampanantenain’i Jesoa tokoa ny Fanahy Masina. Ilay fiadanana izay tsy hain’izao tontolo izao ny manome azy. Meteza hotarihin’ny Fanahy Masina dia hiadana.

4. Fahamarinana (and 22)
« Fa ny vokatry ny Fanahy kosa dia … fahamarinana »
Asan’ny Fanahy Masina ao amin’ny olona, ao amin’ny mino ny fahamarinana. Jesoa raha nivavaka dia nilaza mazava tsara tamin’Andriamanitra mba tsy hanaisotra ny mino eto amin’izao tontolo izao fa ny hiaro azy amin’ny ratsy. Anisan’ny fiarovan’Andriamanitra ny mino ny fanomezana azy ny Fanahy Masina izay mitarika azy hanao ny marina mandrakariva. Miaina eto amin’izao tontolo izao izay tena hanjakan’ny tsi-fahamarinana amin’ny endriny maro isika. Ny fanekentsika hotarihin’ny Fanahy Masina ihany no hahatonga antsika ho marina amin’ny zavatra rehetra. Jesoa dia tena marina, Izy rahateo no Fahamarinana, tsy mahagaga izany fa nanaiky ny nofenoin’Andriamanitra ny Fanahy Masina Izy. Soa fianatra amin’i Jesoa ny fanekena ny fahafenoan’ny Fanahy Masina mba ho marina amin’ny zavatra rehetra isika.

🙏🏻Ho an'Andriamanitra irery ny Voninahitra. Amena

22/05/2026

🥖Mofonaina Zoma 22 Mey 2026
📜 MIASA AO AMIN'NY MINO
NY FANAHY MASINA

📖1 Mpanjaka 3. 26-28

MATAHOTRA MPANJAKA HENDRY NY VAHOAKA

26 Fa niteny tamin'ny mpanjaka ravehivavy, renin'ny zaza velona satria nandevilevy ny fony noho ny amin'ny zanany ka nanao hoe: Tompokolahy ô, trarantitra ianao, omeo azy ihany ary ny zaza velona, fa aza dia vonoina re! Fa hoy kosa ny iray: Aoka tsy ho ahy tsy ho anao, fa zarao mihitsy. 27 Dia namaly ny mpanjaka ka nanao hoe: Omeo itsy ny zaza velona, fa aoka tsy hovonoina; fa io mihitsy no reniny. 28 Ary raha ren'ny Isiraely rehetra izany fitsarana nataon'ny mpanjaka izany, dia natahotra ny mpanjaka izy, satria hitany fa misy fahendren'Andriamanitra ao am-pony ho entiny mitsara.
✨✨✨✨✨✨✨✨✨✨✨✨✨

Ity mofonaina ity dia mitantara amintsika ny fomba nampiasan’i Solomona ny fahendrena nomen’Andriamanitra azy raha nangataka izany tamin’Andriamanitra izy. Noho io fahaiza-mitsara ny adin’ireto vehivavy janga roa ireto dia tonga nalaza Solomona ary ambaran’ny tantara fa natahotra azy ny vahoaka. Hendry tokoa ny mpanjaka rehefa

1. Azon’ny olona hatonina hitarainana (and 16)
“Ary tamin'izany dia nisy vehivavy janga roa nankao amin'ny mpanjaka ka nitsangana teo anatrehany”
Voalaza eto amin’ny fitantarana ny mombamomba ireto vehivavy nanatona nitondra ny adiny teo amin’i Solomona ireto. Vehivavy tsy mba manan-kaja akory fa lazaina hoe janga, ratsy fitondrantena izany. Ny iray tamin’izy ireo aza moa dia aseho ho olona, vehivavy tsy tomponandraikitra fa nahafaty ny zanany raha natory tamin’ny alina. Olona ohatra izany no nahazo nanatona ny Mpanjaka, olona toa izany no neken’ny mpanjaka hitondra ny adiny teo aminy. Raharaha kely tsy dia manao ahoana koa no noentina teo aminy kanefa dia nekeny izany. Hendry arak’izany ny mpitondra rehefa azon’ny olona rehetra hatonina, indrindra amin’izay mahatery sy manahirana azy.
Meteza koa isika ho tomponandraikitra azon’ny olona rehetra hatonina amin’izay manahirana azy. meteza isika ho olona mora fanahy ka mandray ny olona rehetra, ary tsy mieritreritra ny zava-manahirana ny olona ho zavatra kely sy bitika.

2. Mahay mamantatra ny marina (and 27)
“Dia namaly ny mpanjaka ka nanao hoe: Omeo itsy ny zaza velona, fa aoka tsy hovonoina; fa io mihitsy no reniny”
Hoy ny fahendrena Malagasy hoe: “ny marina toy ny trondro vaventy, tsy hita raha tsy ao amin’ny lalina”. Midika izany fa tsy zavatra mora ny mahita ny marina, mila miditra lalina, mila manadihady lalina. Fisaka rahateo ny marina ka sarotra ny mikaroka izany. Tamin’ny alalan’ny valin-tenin’ilay vehivavy iray tena tompon-janaka no nahafantaran’i Solomon any maha-renin’ilay zaza azy. Raha nosedraina Solomona momba io fahendrena azony avy amin’Andriamanitra io dia asehon’ny tantara fa afa-panadinana izy. Na dia sarotra tokoa aza ny mamantatra ny marina. Izay manam-pahendrena avy amin’Andriamanitra kosa dia mahay mamantatra izany ka tonga mahay mandamina ireo disadisa manahirana eo amin’ny fiarahamonina. Tsy misy marina azo fantarina ivelan’izay fanomezam-pahasoavana avy amin’ny Tompo.

3. Hajain’ny vahoaka izy (and 28)
“Ary raha ren'ny Isiraely rehetra izany fitsarana nataon'ny mpanjaka izany, dia natahotra ny mpanjaka izy, satria hitany fa misy fahendren'Andriamanitra ao am-pony ho entiny mitsara”
Ny hoe matahotra dia ho enti-milaza fanajana avy amin’ny vahoaka. Hajaina ny mpitondra rehefa hita fa Hendry izy. Ambara eto amin’izao mofonaina izao fa ren’ny vahoaka ny fahaiza-mitsara tao amin’i Solomona. Ambara ihany koa fa hitan’ny vahoaka ny fahendren’Andriamanitra tao aminy. Tsy zava-miafina arak’izany ny fahendrena, tsy zava-miafina toa izany koa ny hadalana. Rehefa hita sy tsapan’ny hoentina fa Hendry ny mpitondra azy dia mipetraka ho azy ny tahotra sy fanajana azy. Tsy zavatra hangatahina rahateo izany fa tena azon’izay manam-pahendrena. Tsy tonga tonga ho azy ny fanajana sy ny tahotra ny mpitondra, tena vokatry ny asan’Andriamanitra ao aminy izany. Meteza iasan’ny Fanahy Masina dia hanam-pahendrena avy amin’Andriamanitra isika.
🙏🏻Ho an'Andriamanitra irery ny Voninahitra. Amena.

21/05/2026

🥖 Mofon'aina Alakamisy 21 Mey 2026.
📜 MIASA AO AMIN'NY MINO
NY FANAHY MASINA

📖Jeremia 3: 1-5.

hoy Izy: Raha misy lehilahy misao-bady, ary efa miala ravehivavy ka vadin'olon-kafa, moa mahazo miverina aminy indray va ralehilahy? Tsy haloto tokoa va izany tany izany? Fa ianao dia efa nijangajanga tamin-tsakaiza maro, ka moa hahazo miverina amiko va ianao? hoy Jehovah. Andrandrao amin'ny tendrombohitra mangadihady ny masonao, ka jereo. Taiza no tsy nandrian'olona taminao? Teny an-dalambe no niandrasanao azy toy ny Arabo any an'efitra; Ary ny fijangajanganao sy ny faharatsianao no nandotoanao ny tany,Ka dia voasakana ny orana mivatravatra, sady tsy tonga ny fara-orana; Ary ny handrinao dia handrin'ny vehivavy janga ka tsy manan-kenatra.Moa tsy hitaraina amiko va ianao amin'izao sisa izao hoe: Ry Raiko o, Ianao no nahazatra ahy, hatry ny fony aho mbola tanora?Ho tezitra mandrakizay va Izy? Hitahiry fahatezerana hatamin'ny farany va Izy? Indro, efa niteny toy izany ianao, nefa nanao izany ratsy izany ihany ka nahatanteraka izany.
✨✨✨✨✨✨✨✨✨✨✨

INONA NY ZAVA-MITRANGA REHEFA TSY MANAIKY HIASAN' NY FANAHY MASINA NY MINO ?

Mamaly izany izao tenin' Andriamanitra izao.

Toy izao ny fintin' ny tantara:

Naminany tamin'ny andron'ny Mpanjaka Josia sy Joakima i Jeremia (faran'ny taonjato faha-7 talohan'i Kristy). Ny firenen'i Joda dia niankohoka tamin'ireo sampy (Bala sy Astarta) teny amin'ny havoana.

Rehefa nisy hain-tany nahazo ny tany (and- 3), dia nanao fombafomba fotsiny izy ireo saingy tsy niova fo.

Ny and-1 dia miresaka mivantana ny Deo 24:1-4. Araka io lalàna io, raha misaraka ny mpivady ka lasan'olon-kafa ny vehivavy, dia tsy mahazo miverina amin'ny vadiny voalohany intsony izy satria "efa voaloto".

Jeremia dia mampiasa ity sarin-teny ity hampisehoana fa araka ny lalàna dia tsy tokony heken'Andriamanitra intsony i Joda satria efa nanolo-tena hiray tamin'ny sampy maro. Saingy ny fahagagana eto dia ny antson'Andriamanitra hoe: "Mbola tia hampiverina anao ihany Aho".

Raha ambara fa "Miasa ao amin'ny mino ny Fanahy Masina" dia hita mihitsy eto ny antony ilana Azy satria tsy misy afatsy ny Fanahy Masina no mampiaiky ny olona ny fahotany (Jaona 16:8) sy manome ny fo vaovao (Ezekiela 36:26).

Ny Fanahy Masina no manasitrana ny "tsy fahalalana menatra intsony". Ny vahoaka mantsy ao amin'ny and-3 dia efa tsy nahalala henatra intsony. Ohatry ny hoe normale ilay mijangajanga na ara-nofo na ara-panahy.

Raha tsy miasa ny Fanahy Masina, ny olona dia ho jamban'ny fivavahana ivelambelany fotsiny ihany. Mody mivavaka nefa ny atao hatao ihany.

☝️Aza hadinoina ary fa :

👉 NY FIANGONANA MANAIKY HIASAN'NY FANAHY MASINA dia voataona ho AMIN'NY FIOVAM-PO MARINA

🫴Ny asa voalohany ataon'ny Fanahy Masina ao amin'ny mino dia tsy ny fahagagana , fa ny fampianarana ny fo ho mora hankahala fahotana. Ny mino iasan'ny Fanahy Masina dia mahay mitomany ny fahalemeny fa tsy manamarin-tena lava.

🫴Rehefa miasa ny Fanahy Masina dia tsy mamela antsika ho mpivavaka amin'ny alahady fotsiny Izy. Ny Fanahy Masina dia mampitovy ny teny lazain'ny vavantsika sy ny asa ataon'ny tanantsika amin'ny andavanandro.

👉Andriamanitra dia mbola miantso antsika hiverina Aminy na dia ratsy aza ny lasantsika (and-1).

Tsy amin'ny herintsika anefa no ahafahantsika miova, fa amin'ny fanekena ny asan'ny Fanahy Masina ao anatintsika.

Maneke hiasan' ny Fanahy Masina ! Aza mamita-tena intsony isika. Saino izany anio

🙏🏻Mahereza ry havana. Ho an'Andriamanitra irery ny voninahitra. Amen !

20/05/2026

20/05/2026

🥖Mofon'aina Alarobia 20 Mey 2026.
📜 MIASA AO AMIN'NY MINO
NY FANAHY MASINA

📖Efesiana 4:1-6.

noho izany izaho, mpifatotra noho ny amin'ny Tompo, dia mangataka aminareo mba handeha miendrika ny fiantsoana izay niantsoana anareo, amin'ny fanetren-tena rehetra sy ny fahalemem-panahy, amin'ny fahari-po mifandefitra amin'ny fitiavana,mazoto mitana ny firaisana avy amin'ny Fanahy amin'ny fehim-pihavanana.Iray ny tena, ary iray ny Fanahy, dia toy ny niantsoana anareo ho amin'ny fanantenana iray momba ny fiantsoana anareo;iray ny Tompo, iray ny finoana, iray ny batisa,iray Andriamanitra sady Rain'izy rehetra, Izay ambonin'izy rehetra sy manerana azy rehetra ary ao amin'izy rehetra.
✨✨✨✨✨✨✨✨✨✨✨✨

☝️NY MINO IASAN'NY FANAHY MASINA dia itakiana toetra roa eto:
1- Toetra anaty
2- Toetra ivelany.

1- TOETRA ANATY:

* Ny Fahamasinan' ny fifandraisana amin' Andriamanitra:

Ny asa voalohany sy lehibe indrindra ataon'ny Fanahy Masina ao amin'ny mino dia ny fanavaozana ny tontolo anaty dia ny fo sy ny saina mba hifanaraka amin'ny sitrapon'
Andriamanitra.

* Ny Fankatoavana sy ny fahatsorana:

Ny olona iasan'ny Fanahy Masina dia manana fo mora tefena sy vonona hanoa ny tenin'Andriamanitra, fa tsy mafy hatoka.

* Ny Fiainam-bavaka :

Ny Fanahy Masina no mampianatra sy mampitambatra ny fontsika hitady an'Andriamanitra hatrany (Rom 8:26). Ny mino dia tokony hiaina ao anatin'ny fahatsiarovan-tena mandrakariva fa tempolin'ny Fanahy Masina ny tenany.

* Ny Fahadiovan'ny Fo (Fahamasinana):

Ity toe-panahy ity dia miseho amin'ny alalan'ny fandosirana ny fahotana sy ny fankahalana ny ratsy, satria ny Fanahy Masina dia manome hery handresena ny filan'ny nofo.

"Fa ny vokatry ny Fanahy dia fitiavana, fifaliana, fiadanana, fahari-po, fahamoram-panahy, tsara fanahy, fahatokiana, fahalemem-panahy, fahononam-po." — Gal 5:22-23

2. TOETRA IVELANY.

* Ny Toetra Eo Amin'ny Fiarahamonina:

Ny Fitiavana sy ny fanompoana ny hafa no anehoana izany.
Ny asa ataon'ny Fanahy Masina dia tsy mijanona ho an'ny tena samirery ihany, fa tsy maintsy mipoitra ivelany ho hita maso eo amin'ny fifandraisana amin'ny olona samy olona sy ny fiangonana.

* Ny Fitiavana feno fahafoizana (Agape):

Ity no mari-pamantarana lehibe indrindra. Tsy fitiavana ara-pihetseham-po fotsiny izany, fa fanapahan-kevitra hanao soa amin'ny namana, eny fa na dia amin'ny fahavalo aza, izay maneho ny herin'ny Fanahy Masina.

* Ny Fandeferana sy ny fampihavanana:

Ny mino iasan'ny Fanahy Masina dia mpitondra fiadanana. Mahay mamela heloka izy, manetry tena, ary mitady mandrakariva ny firaisankina fa tsy ny fisarahana na ny fifandirana.

* Ny Fahavononana hanompo (Ny fampiasana ny talenta):

Ny Fanahy Masina dia manome fanomezam-pahasoavana (charismes) ho an'ny mino. Ny toe-panahy takiana eto dia ny fampiasana izany amin' ny fanetren-tena ho fampandrosoana ny hafa sy ho voninahitr'Andriamanitra, fa tsy ho amin' ny fireharehan'ny tena.

🫴🏻Raha fintinina izay rehetra izay, ny mino iasan'ny Fanahy Masina dia olona manana fiainana miorina tsara ao amin'Andriamanitra (toetra anaty) sy fiainana mamiratra ho an'ny namany (toetra ivelany).

Ny fifandoritan'ireo hevitra roa ireo no mampiseho ny fahafenoan'ny asan'ny Fanahy Masina ao amin'ny olona iray.

Maneke ary hiasan' ny Fanahy Masina, mba hitafiantsika ireo toetra rehetra ireo, izay mendrika ny olona efa nandray famonjena tamin' ny alalan' i Jesoa Kristy.

🙏🏻Mahereza ry havana. Ho an'Andriamanitra irery ny voninahitra. Amen !

18/05/2026

🥖Mofonaina Alatsinainy 18 May 2026
📜MIASA AO AMIN'NY MINO
NY FANAHY MASINA

📖Nomery 11.24-27
Dia nivoaka Mosesy ka nilaza ny tenin'i Jehovah tamin'ny olona; dia nanangona fito-polo lahy tamin'ny loholon'ny firenena izy ka nampitoetra azy manodidina ny trano-lay.Ary nidina teo amin'ny rahona Jehovah ka niteny taminy, dia nangalany ny Fanahy izay tao amin'i Mosesy ka napetrany tao amin'ny loholona fito-polo lahy; ary raha mbola nitoetra tao aminy ny Fanahy, dia naminany izy, nefa tsy nanao intsony.Fa nisy roa lahy nijanona teo an-toby, Eldada no anaran'ny anankiray, ary Medada no anaran'ny anankiray; ary ny Fanahy nitoetra tao aminy; ary isan'izay voasoratra izy roa lahy, nefa tsy mba nankeo amin'ny trano-lay; dia naminany teo an-toby izy roa lahy.Ary nisy zatovo nihazakazaka, dia nilaza tamin'i Mosesy ka nanao hoe: Eldada sy Medada maminany etsy an-toby.

✨✨✨✨✨✨✨✨✨✨✨

🫴: “Ny Fanahin’Andriamanitra miasa amin’ny olony”

👉I: NIZARA NY FANAHINY TAMIN'IREO LOHOLONA JEHOVAH (and. 24-25)
- Nangonin’i Mosesy teo amin’ny tranolay fihaonana ireo loholona fito-polo araka ny baikon’Andriamanitra.
- Nidina tao amin’ny rahona Jehovah ary naka tamin’ny Fanahy izay tao amin’i Mosesy ka nanome izany tamin’ireo loholona.
- Rehefa tonga teo aminy ny Fanahy dia naminany izy ireo.
Midika izany fa tsy tian’Andriamanitra hitondra irery ny enta-mavesatra i Mosesy. Zarainy amin’ny olona hafa ny andraikitra sy ny hery ilaina amin’ny fanompoana.
☝️Fampiharana:
- Tsy natao hitondra irery ny asa fanompoana sy ny olana rehetra ianao irery.
- Andriamanitra manome hery sy fahendrena ho an’izay antsoiny hanompo Azy.
- Mila mianatra miara-miasa sy mizara andraikitra ianao ao amin’ny fanompoana eo amin’ny fiangonana sy ny fiainanao manokana.

👉 II: MIASA NA AIZA NA AIZA NY FANAHIN’ANDRIAMANITRA (and. 26-27)
- Nisy lehilahy roa, Eldada sy Medada, tsy tonga tao amin’ny tranolay nefa mbola nilatsahan’ny Fanahy ka naminany tany an-toby.
- Gaga ny olona ka nisy zatovo nilaza izany tamin’i Mosesy.
- Mampiseho izany fa tsy voafetra amin’ny toerana iray na fomba iray ihany ny asan’Andriamanitra. Afaka miasa amin’izay fidiny sy amin’ny fomba tiany Izy.
☝️Fampiharana:
- Tsy tokony hifehy na hametra ny fomba fiasan’Andriamanitra ianao.
- Afaka mampiasa olona samihafa Andriamanitra, na dia tsy ireo heverinao aza.
- Tokony hifaly ianao rehefa miasa amin’ny hafa koa ny Fanahin’Andriamanitra fa aza be fialonana.
🙏🏻Ho an'Andriamanitra irery ny Voninahitra
Amena.

16/05/2026

🥖Mofon'aina Sabotsy 16 Mey 2026.
📜 MIASA AO AMIN'NY MINO
NY FANAHY MASINA

📖Isaia 11: 1-5.

hisy Solofo mitsimoka eo amin'ny fototr'i Jese, ary hisy mitrebona avy eo amin'ny fakany;Ary ny fanahin'i Jehovah hitoetra ao aminy, dia ny Fanahin'ny fahendrena sy ny fahazavan-tsaina; Ny Fanahin'ny fanoloran-tsaina sy ny faherezana; Ny Fanahin'ny fahalalana sy ny fahatahorana an'i Jehovah;Ary ho hanitra ankasitrahana aminy ny fahatahorana an'i Jehovah, ka tsy hitsara araka ny hitan'ny masony izy, na hampiaiky araka ny ren'ny sofiny;Fa hotsarainy amin'ny fahamarinana ny malahelo; Ary homeny rariny ny mpandefitra amin'ny tany; hamely ny tany amin'ny tsorakazon'ny vavany Izy, ary ny fofonain'ny molony no hamonoany ny ratsy fanahy.Fahamarinana no ho fisikinany, ary fanahy mahatoky no ho fehin-kibony.
✨✨✨✨✨✨✨✨✨✨✨

ny fanahin'i Jehovah hitoetra ao aminy, dia ny Fanahin'ny fahendrena sy ny fahazavan-tsaina; Ny Fanahin'ny fanoloran-tsaina sy ny faherezana; Ny Fanahin'ny fahalalana sy ny fahatahorana an'i Jehovah. — Isaia 11 : 2.

MIASA AO AMIN'NY MINO NY FANAHY MASINA.

Hodinihantsika aloha ireo toetra 7 mampiavaka ny Fanahy Masina. Inona avy no ilazana ny Fanahy Masina eto ?

1- Fanahin'i Jehovah:
* Maha Andriamanitra sy ny fifandraisana mivantana amin'ny Ray izany.

2- Fahendrena
*Fahaizana mampihatra ny fahamarinana amin'ny fiainana.

3- Fahazavan-tsaina na Fahafantarana
*Fahalalinana ara-tsaina sy ny fahaizana manavaka.

4- Fanoloran-tsaina
*Fahaizana manome torohevitra tsara sy mitantana .

5-Faherezana na Hery
*Hery hanatanterahana ny sitrapon'Andriamanitra.

6- Fahalalana
*Fifandraisana lalina sy ny fahafantarana ny fon'Andriamanitra.

7- Fahatahorana an'i Jehovah
*Ny fanajàna an'Andriamanitra izay fototry ny fiainana masina.

INONA ARY NO HAFATRA HO ANTSIKA.

1- Matetika eto amin' izao tontolo izao feno korontana izao isika , dia mitady mpitarika sy hery manokana.

Ny Isaia 11:2 dia mampiseho fa ny hery tena izy dia tsy avy amin'ny fahaizan'olombelona, fa avy amin'ny Fanahy Masina izay mitoetra ao amin'i Kristy, ary koa ao amintsika izay mino.

Tsy ampy ny manana saina fotsiny, fa mila ny Fanahin'Andriamanitra isika mba hahafantarantsika ny tsara sy ny ratsy amin'izao vanim-potoana sarotra izao.

Mangataha fahendrena alohan'ny hanapa-kevitra amin'ny fiainana (asa, fianakaviana, sns).

2- Aza mandeha irery amin' izao fiainana izao. Mila ny tari-dàlana sy "torohevitra" (fanoloran-tsaina) mandrakariva amin' ny alalan' ny Fanahy Masina isika, dia hahazo hery rehefa mihareraka na mitady ho kivy iny.

Ny Kristiana dia tsy natao ho osa, fa manana ny herin'ny Fanahy handresena ny fakam-panahy sy ny fitsapana.

Etsy ankilany, ataovy matanjaka ny fiombonam-piainana amin' Andriamanitra amin' ny alalan' ny fivavahana sy ny famakiana Teniny. Mampitombo ny fahatahorantsika Azy izany.

🫴Raha mitoetra ao amintsika ny Fanahin'i Kristy, dia hiova ny fomba fijerintsika sy ny fomba fiainantsika.
Tsy hiankina amin'ny herintsika intsony isika, fa amin'ilay Fanahy fito sosona izay mampandresy antsika.
Matetika ny Kristiana ankehitriny dia mitady fahagagana fotsiny nefa manadino ny fahendrena sy ny fahalalana voalaza eto.
☝️Ny Fanahy Masina dia tsy hery entina hisehosehoana, fa Fanahy manome fahamatorana feno ho antsika kristiana.

☝️Ry havana ! Moa ve ny fiainantsika mba mitaratra ireo toetra fito ireo, sa dia mbola mandeha amin' ny fahazarana ihany isika ka miankina amin'ny fahaiza-manao sy ny teknolojia fotsiny
🫴🏻Jesoa ihany anie no ambaran' izany rehetra izany e !

Banjino Jesoa Ilay Fahendren' Andriamanitra, dia tsy ho diso làlana amin' izao fiainana izao ianao ary hahatratra ny tanjona ara-panahy rehetra.

🙏🏻Mahereza ry havana. Ho an'Andriamanitra irery ny voninahitra. Amen !

15/05/2026

🥖MOFON'AINA ZOMA 15 MAI 2026
📜MIASA AO AMIN'NY MINO
NY FANAHY MASINA
📖 KOLOSIANA 3:1-4

Koa raha niara-natsangana tamin'i Kristy ianareo, dia katsaho ny zavatra any ambony, any amin'ny itoeran'i Kristy, Izay mipetraka eo an-tanana ankavanan'Andriamanitra.Saino ny zavatra any ambony, fa tsy ny zavatra ety an-tany.Fa efa maty ianareo, ary ny fiainanareo miara-miafina amin'i Kristy ao amin'Andriamanitra.Raha hiseho Kristy fiainantsika, dia hiara-miseho aminy koa amin'ny voninahitra ianareo.

✨✨✨✨✨✨✨✨✨✨✨✨✨

"𝙆𝙤𝙖 𝙧𝙖𝙝𝙖 𝙣𝙞𝙖𝙧𝙖-𝙣𝙖𝙩𝙨𝙖𝙣𝙜𝙖𝙣𝙖 𝙩𝙖𝙢𝙞𝙣'𝙞 𝙆𝙧𝙞𝙨𝙩𝙮 𝙞𝙖𝙣𝙖𝙧𝙚𝙤, 𝙙𝙞𝙖 𝙠𝙖𝙩𝙨𝙖𝙝𝙤 𝙣𝙮 𝙯𝙖𝙫𝙖𝙩𝙧𝙖 𝙖𝙣𝙮 𝙖𝙢𝙗𝙤𝙣𝙮, 𝙖𝙣𝙮 𝙖𝙢𝙞𝙣'𝙣𝙮 𝙞𝙩𝙤𝙚𝙧𝙖𝙣'𝙞 𝙆𝙧𝙞𝙨𝙩𝙮, 𝙄𝙯𝙖𝙮 𝙢𝙞𝙥𝙚𝙩𝙧𝙖𝙠𝙖 𝙚𝙤 𝙖𝙣-𝙩𝙖𝙣𝙖𝙣𝙖 𝙖𝙣𝙠𝙖𝙫𝙖𝙣𝙖𝙣'𝘼𝙣𝙙𝙧𝙞𝙖𝙢𝙖𝙣𝙞𝙩𝙧𝙖"
(👉 Kolosiana 3 : 1)

☝️Toe-panahy mendrika ny Filazantsara‼️

1- 𝗠𝗶𝗸𝗮𝘁𝘀𝗮𝗸𝗮 𝗻𝘆 𝘇𝗮𝘃𝗮𝘁𝗿𝗮 𝗺𝗼𝗺𝗯𝗮 𝗻𝘆 𝗮𝗻𝘆 𝗮𝗻-𝗱𝗮𝗻𝗶𝘁𝗿𝗮
"𝘚𝘢𝘪𝘯𝘰 𝘯𝘺 𝘻𝘢𝘷𝘢𝘵𝘳𝘢 𝘢𝘯𝘺 𝘢𝘮𝘣𝘰𝘯𝘺, 𝘧𝘢 𝘵𝘴𝘺 𝘯𝘺 𝘻𝘢𝘷𝘢𝘵𝘳𝘢 𝘦𝘵𝘺 𝘢𝘯-𝘵𝘢𝘯𝘺" (2)

✅️ Niasa mahery tao amin’ireo Kolosiana ny Filazantsara ka nahatonga azy ireo hiorina mafy, na teo aza ireo fampianaran-diso izay nanozongozona ny finoan’ny sasany. Eto dia mampahery azy ireo hatrany i Paoly, ary mampitodika azy mba hikatsaka ny zavatra momba ny fiainana mandrakizay, araka izay nambarany eto. Tsy hafa izany fa ilay fiainana mandrakizay, any amin’izay itoeran’i Jesoa Kristy eo ankavanan’Andriamanitra. Ilay tanana andrasan’ny Kristiana am-panantenana any an-danitra dia tsara lavitra noho ny fonenana izay iainan’ny Kristiana eto amin’izao tontolo izao. Noho izany dia tsy tokony ho variana amin’izao fiainana mandalo izao ny mpino fa hibanjina ny mandrakizay amin’ny alalan’ny fanoherana sy fisarahana amin’ny fanandevozan’ny filan’ny nofo.

2- 𝗠𝗶𝗼𝗺𝗮𝗻𝗮 𝗮𝗺𝗶𝗻’𝗻𝘆 𝗳𝗶𝘃𝗲𝗿𝗲𝗻𝗮𝗻’𝗶 𝗞𝗿𝗶𝘀𝘁𝘆
"𝘙𝘢𝘩𝘢 𝘩𝘪𝘴𝘦𝘩𝘰 𝘒𝘳𝘪𝘴𝘵𝘺 𝘧𝘪𝘢𝘪𝘯𝘢𝘯𝘵𝘴𝘪𝘬𝘢, 𝘥𝘪𝘢 𝘩𝘪𝘢𝘳𝘢-𝘮𝘪𝘴𝘦𝘩𝘰 𝘢𝘮𝘪𝘯𝘺 𝘬𝘰𝘢 𝘢𝘮𝘪𝘯'𝘯𝘺 𝘷𝘰𝘯𝘪𝘯𝘢𝘩𝘪𝘵𝘳𝘢 𝘪𝘢𝘯𝘢𝘳𝘦𝘰" (4)

🚩 Amin’izao andro iainantsika izao dia tsy hita maso ny fanjakan’ Kristy, fa amin’ny alalan’ny Fanahy Masina no iasany sy anatrehany ny mpino eto amin’izao tontolo izao. Fa amin’ny andro farany kosa, raha hiseho amin’ny voninahiny Izy, dia hampiasa ny heriny ka hampanaiky ny olona rehetra sy ny fanapahana rehetra, ary tsy hisy intsony fahefana afaka hanohitra Azy. Amin’izany andro izany dia hiseho ny fahefany amin’ny maha Mpitsara Azy. Ka izay rehetra mino dia hanana anjara amin’ny voninahitr’i Kristy satria izy ireo dia efa niara-natsangana tamin’i Kristy tamin’ny alalan’ny batisa, sady hiara-manam-boninahitra Aminy eo an-tànana ankavanan’ny Ray any an-danitra.
🙏🏻Ho an'Andriamanitra irery ny Voninahitra. Amena