Seventh Day Adventist Fiherezana

Seventh Day Adventist Fiherezana Sady manantena no mampahafaingana ny fiavin'i Kristy fanindroany

14/09/2026

Mofon’Aina Alatsinainy 14 Septambra 2026 JESOSY, ILAY MPISOLOVAVA ANTSIKA

1 Jao. 2:1. « Anaka, izany zavatra izany no soratako aminareo mba tsy hanotanareo. Ary raha misy manota, dia manana Solovava ao amin’ny Ray isika, dia Jesosy Kristy, Ilay Marina. »

Rehefa alaim-panahy hanota isika, aoka hotsaroantsika fa mifona ho antsika ao amin’ny fitoerana masina any an-danitra i Jesosy. Rehefa miala amin’ny fahotantsika isika ka manatona Azy am-pinoana, dia ny vavany mihitsy no manonona ny anarantsika eo anatrehan’ny Rainy, ka hoy Izy: “efa vitako tombo-kavatsa eo am-pelatanako izy; fantatro amin’ny anarany izy.” Dia manome baiko ny anjely Izy mba hiaro antsika. Ary hoy Izy rehefa mandalo fitsapana mahamay isika: « Mandehana, ry oloko, midira ao amin’ny efi-tranonao, ary mirindrina varavarana ianao, ka miere kely indray mipi-maso monja mandra-pahalasan’ny fahatezerana. » - Isa. 26:20. Ao amin’ny efi-trano manao ahaona moa no tokony hieren’izy ireo? Fiarovana avy amin’i Kristy sy ireo anjely masina izany. Tsy ho tafiaraka ao amin’ny toerana iray avokoa tsy akory ny vahoakan’Andriamanitra. Ho any anaty vondrona samy hafa sy any amin’ny faritra samy hafa eto an-tany izy ireo, ary hozahan-toetra manokana tsirairay, fa tsy isam-bondrona. Tsy maintsy miatrika ny fitsapana ho an’ny tenany manokana ny tsirairay.

Raha misy fotoana ilan’ny vahoakan’Andriamanitra indrindra ny fitakiana ireo teny fikasany, dia ankehitriny izany. Aoka ny tanan’ny finoana hangorobaka ny aizina sy hamikitra Ilay sandry mahery mandrakizay. Mila miala amin’ny fahotana isika, ary aoka tsy hohadinointsika fa tonga teto amin’izao tontolo izao i Kristy mba hamonjy ny mpanota, ary « mahavonjy tokoa izay manatona an’Andriamanitra amin’ny alalany Izy » - Heb. 7:25. Tombontsoantsika ny mino fa mahay manadio antsika ho afaka amin’ny fahalotoan’ny fahotana rehetra ny rany. Aoka tsy ho ferantsika ny herin’Ilay Masin’ny Isiraely. Maniry antsika hanatona Azy amin’izao maha-isika antsika izao Izy, dia mpanota sy maloto. Mahavonjy ny rany. (...) Raha lavo amin’ny fakam-panahy ianao, aza ketraka. Manakoako hatramin’izao androntsika izao ilay teny fikasana hoe: « Raha misy manota, dia manana Solovava ao amin’ny Ray isika, dia Jesosy Kristy, llay Marina. » - RH, 19 Nôvambra 1908.

13/09/2026

Mofon’Aina SEPTAMBRA
NY FANJAKAN'NY LANITRA

Alahady, 13 Septambra 2026
MANOHITRA NY ONJAN'NY FAHARATSIANA

« Dia hoy ny anankiray taminy: Tompoko, moa vitsy va no hovonjena? Ary hoy Izy tamin'ny olona: miseseha hiditra amin’ny varavarana ety hianareo; fa hoy Izaho aminareo: Maro no hitady hiditra, fa tsy ho afaka. »
Lioka 13:23,24

Raha voalaza fa maro no hitady hiditra, nefa tsy ho afaka, dia inona no tokony hatao mba hahombiazantsika? Te hahafantatra ny valiny isika. Fanambarana tsy mahafaly antsika izany hoe misy ireo izay tsy ho tafiditra amin’ny vavahady ety satria te hiditra fotsiny izy ireo, fa tsy misesika. (…)

Ao anatin’ny tontolo anjakan’ny fahotana sy ny tsy fahamarinana isika, ary te hahafantatra izay tokony hatao mba handovana ny fiainana. Tsy azontsika atao ny manao tsirambina ilay valisoa lehibe hatolotra an’izay mandresy. Ahoana no ahafantarantsika fa mandroso mankany an-danitra isika fa tsy eto an-tany? (...)

Andraikitra goavana no mipetraka amintsika izay milaza ho mankatò ny didin’Andriamanitra, dia ny haneho amin’izao tontolo izao fa manitsy mankany an-danitra ny diantsika. Ary eo am-panoherantsika ny riaka izay mipaoka ny rehetra hidina any ambany, dia tokony ho fantatsika ho amin’ny inona no itolomantsika. Tokony hiezaka hanatratra ny marika hahazoantsika ny lokan’ny fiantsoan’Andriamanitra any ambony ao amin’i Kristy Jesôsy isika. Tsy mety raha feno tsy firaihana isika, nefa te hahazo ny loka koa. (...)

Mila mitombo isika mandra-pahatongantsika ho lehilahy sy vehivavy lehibe, mahatratra ny ohatry ny halehiben’ny fahafenoan’i Kristy, ka anorenantsika tempoly sarobidy ho an’ny Tompo. Hoy Izy: «Honina eo aminy Aho sy handeha eo aminy; ary ho Andriamaniny Aho, ary izy ho oloko.» - 2 Kôr. 6:16. (...) Ny Fanahin’Andriamanitra ao anaty fanahintsika no ilaintsika. Mila miandrandra mandrakariva ny lanitra isika. Ary rehefa tsapantsika fa mitady hahazo laka ao anatintsika ny fahotana, dia tsy maintsy mitolona isika. (...)

Mijoro eo anilanao eo Ilay Mpamonjy be fangorahana mba hanampy anao. Haniraka ny anjeliny be voninahitra rehetra Izy hanampy anao handresy an’i Satana, eo am-pitolomanao amin’ny fahotana (...). Tonga olombelona i Kristy, (...) fantany tsara ny fomba hanampiana antsika amin’ny tolona tsirairay atrehintsika. – Ms, 5, 1886.

12/09/2026

Mofon’Aina SEPTAMBRA
NY FANJAKAN'NY LANITRA

Sabata, 12 Septambra 2026
TSY MISY TOKONY HO RESY

« Sambatra izay olona maharitra fakam-panahy; fa rehefa voazaha toetra izy, dia handray ny satroboninahitra fiainana, izay nolazain’ny Tompo homena izay tia Azy. »
Jakôba 1:12

Rehefa tonga eo amin’ny fiainantsika ny fitsapana, rehefa mampanjombona ny faravodilanitra ny raho-mainty, dia mora amintsika erÿ ny manadino fa i Jesôsy no Mpamonjy antsika, fa mamirapiratra ao ambadik’ireny rahona ireny ilay Masoandron’ny Fahamarinana, ary misy anjely miaro antsika amin’ny ratsy eo anilantsika eo. Hoy aho amin’izay mamoy fo: jereo dia ho velona ianareo. Manantenà an’Andriamanitra, fa nisy fanatitra tonga lafatra natao ho anao teo amin’ny hazo fijalian’i Kalvary. I Jesôsy no Sakaizan’ny mpanota, Mpanavotra ny mpanota. Fifaliana sy fahasambarana mandrakizay no miandry ireo izay manolo-tena tanteraka ho an’i Kristy. Aza mijery ny tenanao fa banjino i Jesôsy, Izay mifona ho anao eo anoloan’ny seza fiandrianan’Andriamanitra. Henoy ny teniny: «Mankanesa atÿ amiko, (...) fa Izaho no hanome anareo fitsaharana.» «.Izay manatona Ahy dia tsy mba holaviko mihitsy» - Mat. 11:28; Jao. 6:37. Fikiro amin’ny tanam-pinoana ny teny fikasan’Andriamanitra. Raiso ho anao manokana ireo fitahiana ireo anio, fa tsy amin’ny ho avy. — HP 262.2

Tsy manala tsiny ny fahotana ny fakam-panahy mahery vaika indrindra. Na manao ahoana na manao ahoana hamafin’ny fanerena mihatra amin’ny fanahy, ny fandikan-dalàna dia asan’ny tenantsika ihany. Tsy manana fahefana hanery olona iray hanao ratsy na ny tany na ny helo. Mamely eo amin’izay faritra mampalemy antsika indrindra i Satana, nefa tsy voatery ho resy isika. (...) Efa nanomana fanampiana ho antsika Andriamanitra, ary ao amin’ny heriny no ahafahantsika mandresy. Amin’ny fotoana ilantsika fanampiana indrindra, rehefa mila hanafotra ny fanahy ny hakiviana, no akaiky antsika i Jesôsy. (...)— HP 262.3

Aza mihevitra fa tsy maintsy mandalo amin’ny aloka rehefa miara-dia amin’i Jesôsy. Ny olona sambatra indrindra eto an-tany dia ireo izay mitoky amin’i Jesôsy sy manao ny sitrapony am-pifaliana. Izy no fahazavan’aina. Voaroaka tsy ho eo amin’ny fiainan’izay manaraka Azy ny ahiahy sy ny tsy fahafaliana. (...) «Làlana mahafinaritra ny làlany, Ary fiadanana ny alehany rehetra» - Ohab. 3:17. – RH, 18 Avrily 1907.

07/09/2026

Mofon’Aina SEPTAMBRA
Alatsinainy, 07 Septambra 2026
TSY MISY TSY IHARAN'NY FAKAM-PANAHY

« Izay arovan’ny herin'Andriamanitra amin’ny finoana ho amin’ny famonjena efa vonona haseho any am-parany. Izany no iravoravoanareo, na dia ampalahelovina vetivety ankehitriny amin’ny fakam-panahy maro samy hafa aza hianareo, raha tsy maintsy hisy izany. »
1 Petera 1:5,6

Aza mihevitra fa tsy misy fakam-panahy ny fiainan’ny Kristianina. (...) Tsy maintsy handalo fizahan-toetra na ny Kristianina na izay tsy manaiky an’i Kristy ho Tompony. Izao no maha-samy hafa azy: manompo tompo lozabe sady manao ny asa ratsiny ireo izay tsy manaiky an’i Kristy; fa ny Kristianina kosa dia manompo Ilay nahafoy ny ainy mba hanome azy fiainana mandrakizay. Aza atao mahagaga ny fizahan-toetra, fa raiso ho toy ny fomba fanadiovana sy fanatanjahana antsika izany. "Ataovy ho fifaliana avokoa, raha iharan'ny fakam-panahy samy hafa ianareo.” Hoy i Jakôba, “Satria fantatrareo fa ny fizahan-toetra ny finoanareo dia mahatonga faharetana." – Jak. 1:2,3.

Ho takatsika any amin’ny fiainana ho avy ny amin’ireo toe-javatra izay naha-very hevitra antsika tety. Ho hitantsika ny halehiben’ny herin’Ilay namonjy antsika, sy ny fomba nanirahana ny anjelin’Andriamanitra hiambina antsika teo am-panarahantsika ny tolo-tsaina avy amin’ny tenin’Andriamanitra.

Izay rehetra mandray Azy dia homen’i Kristy hery ho tonga zanak’Andriamanitra. Mpamonjy vonona mandrakariva amin’ny fotoana ilàna ny fanampiany Izy. (...) Tsy afaka hanameloka afa-tsy ny tenany ireo izay resy noho ny tsy nanoherany ny fahavalo. Afaka mankeo amin’i Kristy avokoa izay rehetra misafidy hanao izany, ka hahazo ny fanampiana ilainy.

Eo aminao Ilay Mpanolo-tsaina mahery nandritra fotoana nifandimby, manasa anao mba hatoky Azy tanteraka. Hiala Aminy ve isika ka hitodika amin’olombelona tsy azo antoka, izay tsy maintsy miankina amin’Andriamanitra tahaka antsika ihany? Tsy takatsika ve ny tombontsoa ananantsika? Tsy meloka ve isika satria lely fanantenana ary tsy mangataka amin’Andriamanitra izay iriny fatratra homena antsika?

"Ny famindram-pon’i Jehovah no hambarako, dia ny fiderana an’i Jehovah araka izay rehetra nataony tamintsika sy ny haben’ny fahasoavana tamin'ny taranak’Isiraely. (...) Fa hoy Izy: Oloko tokoa ireo, dia zanaka tsy mba handainga; ka dia tonga Mpamonjy azy Izy. Tamin’ny fahoriany rehetra dia niory koa Izy, ary Ilay Anjelin’ny tavany no namonjy ireo.” – Isa. 63:7-9. – RH, 9 Jona 1910.

01/09/2026

Mofon’Aina SEPTAMBRA
NY FANJAKAN'NY LANITRA

Talata, 01 Septambra 2026
NY ANTON'NY FAKAM-PANAHY

« Tsy misy fakam-panahy nahazo anareo afa-tsy izay zakan’ny olombelona; nefa mahatoky Andriamanitra ka tsy hamela anareo halaim-panahy mihoatra noho izay zakanareo; fa momba ny fakam-panahy dia hasiany làlana hahafahanareo koa mba hahazakanareo izany. »
1 Kôrintiana 10:13.

Inona no atao hoe fakam-panahy? Io dia fitaovana izay isedrana sy izahan-toetra ireo izay mitonona ho zanak’Andriamanitra. Voalaza fa nizaha toetra an’i Abrahama Andriamanitra, ary nizaha toetra ny zanak’Isiraely. Midika izany fa namela toe-javatra hitranga Izy mba hisedrana ny finoan’izy ireo sy hitarihana azy hitodika any Aminy mba hahazoany fanampiana. Mamela ny fakam-panahy ho tonga amin’ny vahoakany Andriamanitra ankehitriny mba hahatsapan’izy ireo fa Izy no mpanampy azy. Raha manatona Azy izy ireo rehefa alaim-panahy, dia hohatanjahiny mba hahatohitra ny fakam-panahy. (...)

Ho fizahana ny toetrantsika mandritra ny androm-pahasoavana ny fakam-panahy. (...) Hihanjahanja ny ao am-pontsika. Tsy fahotana ny iharan’ny fakam-panahy, fa tonga kosa ny fahotana rehefa lavo amin’izany isika. (...)

Voamarina ny fankatoavan’i Abrahama an’Andriamanitra rehefa niara-dalana tamin’i Isaka izy, ho setrin’ilay baiko hoe: «Ento ny zanakao, ny lahitokanao izay tianao, dia Isaka, ka mankanesa any amin’ny tany Moria; ary atero any izy ho fanatitra dorana (...)» - Gen. 22:2.

Navela hijaly i Joba, nalaim-panahy mafy, nefa tsy nanonona na dia teny iray aza hanohitra an’Andriamanitra. Naka fanahy an’i Kristy tamin’ny fomba rehetra ireo mpanora-dalàna sy Fariseo, izay nampirisihin’i Satana, nandritra ny fiainany teto an-tany. Nefa tsy navelany na oviana na oviana hitarika Azy hiala amin’ny lalan’ny fankatoavana ireny fakam-panahy ireny. (...)

Mampianatra antsika ny ohatra nasehon’i Kristy fa ny hany fanantenantsika hahazoana fandresena dia ny fanoherana tsy tapaka ny famelezan’i Satana. Mahafantatra ny herin’i Satana amin’ny taranak’olombelona Ilay nandresy ny fahavalon’ny fanahy tamin’ny ady tamin’ny fakam-panahy, ary efa nandresy ho antsika Izy. Amin’ny maha-mpandresy Azy, dia nomeny ho tombony ho antsika ny fandreseny, mba hahafahantsika mampiray ny fahalementsika amin’ny heriny, ary ny maha-tsinontsinona isika antsika amin’ny fahamendrehany, eo am-piezahantsika hanohitra ny fakam-panahin’i Satana. (...) Dia hahatohitra izany amin’ny Anarany tsitoha isika, ary handresy tahaka ny nandreseny. – ST, 12 Marsa 1912.

31/08/2026

Mofon’Aina AOGOSITRA
NY FANJAKAN'NY LANITRA

Alatsinainy, 31 Aogositra 2026
MIOMANA HIHAONA AMIN'I JESOSY

« Ary ankehitriny, anaka, tomoera ao aminy, mba hananantsika fahasahiana, raha hiseho Izy, ka tsy ho menatra eo anatrehany amin’ny fihaviany. »
1 Jaona 2:28

Ny fahalalana an’Andriamanitra eto amin’izao fiainana izao ihany no ahafahantsika miomana hihaona Aminy amin’ny fiaviany. (...) I Kristy no fanehoana tonga lafatra ny momba an’Andriamanitra ao amin’ireo lesona nomeny sy ny asa lehibe nataony. Io Kristy io no nanambara tamin’ny tsindrimandry nomeny ny mpanoratra ny filazantsara hoe: “Tsy nisy nahita an’Andriamanitra na oviana na oviana; fa ny Zanakalahy Tokana, Izay ao an-tratran'ny Ray, Izy no nanambara Azy.” – Jao. 1:18. “Ny zavatra rehetra natolotry ny Raiko Ahy; ary tsy misy mahalala tsara ny Zanaka, afa-tsy ny Ray; ary tsy misy mahalala tsara ny Ray, afa-tsy ny Zanaka sy izay tian’ny Zanaka hanehoana Azy.” – Mat. 11:27. Ireo teny ireo no maneho ny lanjan’ny fandinihana ny toetran’i Kristy. (...)

Amin’ny maha-solontenantsika Azy dia mijoro eo amin’ny toerana ambony indrindra i Kristy. Fony tonga teto amin’izao tontolo izao Izy (...) dia nitondra ny famonjen’Andriamanitra teo an-tanany. Napetraka teo an-tanany ny olombelona rehetra, satria tao Aminy no nitoeran’ny fahafenoan’ny fomban’Andriamanitra rehetra. (...)

Rehefa mibanjina an’i Kristy isika dia voaova hanahaka Azy ary voaomana hihaona Aminy amin’ny fiaviany. Ankehitriny no fotoana hiomanana ho amin’ny fiavian’ny Tompontsika. (...) Ny fiambenana sy ny fiasana amin-kafanam-po no fiomanana ho amin’izany toe-javatra manetriketrika izany. Ny fikambanan’ireo roa ireo no mahatanteraka antsika ao amin’i Kristy. (...) Amin’izany no anomezan’ny zanany voninahitra an’Andriamanitra. Ao anatin’ireo raharahan’izao fiainana izao no handrenesana ny feon’izy ireo manao teny mitory fampaherezana sy fanantenana ary finoana. Hatokany ho an’i Kristy ny sitrapony sy ny fitiavany rehetra. Tahaka izany no iomanany hihaona amin’ny Tompony; ary rehefa ho avy Izy, dia hanao izao teny feno fifaliana izao izy ireo: “Indro Andriamanitsika, izay nandrasantsika hamonjy antsika.” – Isa. 25:9 – RH, 20 Jolay 1897

30/08/2026

Mofon’Aina AOGOSITRA
NY FANJAKAN'NY LANITRA

Alahady, 30 Aogositra 2026
NY FIADANANA OMEN'I KRISTY

« Fiadanana no avelako ho anareo, ny fiadanako no omeko anareo; tsy tahaka ny fanomen'izao tontolo izao no fanomeko anareo. »
Jaona 14:27

Talohan’ny nidiran’ny Tompontsika tao amin’ny fijaliany teo amin’ny hazo fijaliana dia nanao ny fanambarany farany Izy. Tsy nanana volafotsy na volamena na trano havela ho an’ny mpianany Izy. Nahantra Izy raha ny amin’ny haren’ny tany. Vitsy tamin’ireo tao Jerosalema no nahantra tahaka Azy. Kanefa, fanomezana sarobidy lavitra noho izay azon’ny mpanjaka eto an-tany omena ny vahoakany no navelany ho an’ireo mpianany. (...) Ny fiadanana izay nananany nandritra ny fiainany teto an-tany no navelany ho azy ireo, fiadanana izay tao anatiny raha tao anatin’ny fahantrana Izy, raha nenjehina, ary mbola tao anatiny izany nandritra ny fahoriany tao Getsemane sy teo amin’ilay hazo fijaliana lozabe.

(...) Hahita fiadanam-po ireo izay mino sy matoky tanteraka ny tenin’i Kristy sy manolotra ny fony hotandremany ary mampilefitra ny fiainany eo ambany fitarihany. Tsy misy zavatra eto amin’izao tontolo izao hampalahelo azy ireo raha i Jesôsy no mampifaly azy amin’ny Fanatrehany. Misy fiadanana feno ao amin’ny fanekena tanteraka. Hoy ny Tompo: “Ny saina tsy miovaova dia harovanao ao amin'ny fiadanana tanteraka, satria matoky Anao izy.” – Isa. 26:3.

Ny fitiavan-tena no manimba ny fiadanantsika. Raha mbola velona ny “izaho”, dia vonona mandrakariva isika hiaro azy tsy ho tratry ny fahafaham-baraka sy ny faniratsirana; fa rehefa maty kosa ny “izaho” ary miara-miafina amin’i Kristy ao amin’Andriamanitra ny fiainantsika, dia tsy horaisintsika ho zava-dehibe intsony ny fanaovan-tsinontsinona sy ny fanamavoana. (...)

Rehefa mampiantrano an’i Kristy ao am-po isika ka mampitoetra Azy ao, dia hiaro ny fontsika sy ny saintsika ny fiadanan’Andriamanitra, izay mihoatra noho ny fahalalana rehetra. Izany ihany no fototry ny fiadanana. Ny fahasoavan’i Kristy, izay raisina ao am-po, dia mampitsahatra ny fifandrafiana sy mampitony ny ady ary mameno fitiavana ny fanahy. Izay mihavana amin’Andriamanitra sy amin’ny namany dia tsy mba ho ory. (...) Ny fo izay miara-mitepo amin’ny fon’Andriamanitra dia mpiombona amin’ny fiadanan’ny lanitra ary hampiely ny hery miasa mangina feno fitahiana avy aminy eo amin’izay manodidina azy rehetra. – Wm, 7 Avrily 1908.

28/08/2026

Mofon’Aina AOGOSITRA

Zoma, 28 Aogositra 2026
TSY MISY TOERANA HO AN’NY FAHAKIVIANA

« Ka misaotra ny Ray, Izay nampahamendrika antsika hanana anjara amin'ny lovan’ny olona masina eo amin’ny mazava, sady nahafaka antsika tamin’ny fahefan’ny maizina ka namindra antsika ho amin’ny fanjakan’ny Zanany malalany. »
Kôlôsiana 1 : 12,13

Endrey ny hakanton’izany teny izany! Raha miezaka mandanja izany ianao, dia hahita fa lalina sy mafonja tokoa ny hevitra fonosiny. Isika izao dia volavolaina mba ho vonona honina any amin’ireo fonenana nandehanan’i Kristy mba hanomanany izany ho an’izay tia Azy.

“Nahafaka antsika tamin’ny fahefan’ny maizina.” Raha marina izany, inona àry ny fialan-tsiny ananantsika amin’ny firesahana momba ny fahakiviana sy ny tsy finoana (...), ka manangona ny haizina hanodidina antsika toy ny akanjo tafiana? (...) Arakaraka ny iresahana momba ny finoana no hampitombo ny finoana.

Arakaraka ny ifantohana amin’ny fahakiviana, ka iresahanao amin’ny hafa ny fahorianao sy hampitomboanao izany mba hahazoanao fangorahana, no hitomboan’ny fahakiviana sy ny fitsapana. Nahoana ianao no mitomany noho ny amin’izay tsy azonao idifiana? (…)

Miomana ho amin’ny fisondrotan-toerana isika, avy amin’ny sekolin’ity tany ity izay mamolavola ny toetrantsika, ho amin’ny fiainana ho avy izay tsy misy fahafatesana, dia ny sekolin’ny lanitra, izay toeram-pianarana ambony kokoa noho ny eto. Tsy natao hiankina amin’ny hery voafetra anefa ny olona, mba handreseny ny zava-tsarotra. Amim-pinoana no tokony hijereny an’Andriamanitra, aoka izy hino fa azony ampiasaina mba hahazoany fandresena ny fanomezana rehetra avy amin’ny lanitra. Anjelin’ny lanitra an’arivony maro sy an’alinalina no miasa ho an’ireo izay handova famonjena.

Manasa antsika Andriamanitra mba hanakatona ny varavarana mitodika amin’ny tany ary hanokatra ireo izay mifanandrify amin’ny lanitra, mba handrotsahany mivatravatra ao am-pontsika ny voninahitra izay mamirapiratra avy eo an-tokonan’ny lanitra. – Ms, 102, 1901.

Manasa antsika rehetra tsy ankanavaka tompoko.
22/08/2026

Manasa antsika rehetra tsy ankanavaka tompoko.

21/08/2026

Mofon’Aina AOGOSITRA
NY FANJAKAN'NY LANITRA

Zoma, 21 Aogositra 2026
RENIRANO ANY AN'EFITRA

« Ny marina hamololona tahaka ny rofia; hisandrahaka tahaka ny sedera any Libanona izy. »
Salamo 92:12

Alao sary an-tsaina ny mpandeha sasatra iray, miezaka mamakivaky ny fasika mafanan’ny tany efitra, tsy misy fialofana hiaro azy amin’ny hafanan’ny masoandro migaina. Lany ny tahirin-dranony (...). Maina ny lelany ary mivembena toy ny mamo izy. Mandalo ao an-tsainy ny sarin’ny ankohonany sy ireo havany, raha mihevitra izy fa efa ho faty. Tampoka eo anefa, dia tazany avy lavitra ny hazo rofia iray mitsangana eo afovoan’ny fasika mangadihady, maitso sady velona tsara. Velombelona indray ny fanantenany; mandroso izy, satria fantany fa ny hery sy ny fahavelomana ao amin’io hazo rofia io (...) dia afaka hanome azy aina vaovao indray.

Tahaka ny hazo rofia any an’efitra (...) no tokony hataon’ny Kristianina ho an’izao tontolo izao. Izy no tokony hitarika ireo fanahy sasatra sy feno ahiahy, izay efa ho faty any an’efitry ny ota, hankeo amin’ny rano velona. Izy no tokony hampitodika ny olona rehetra hijery Ilay manao ny fanasana hoe: “Raha misy olona mangetaheta, aoka izy hanatona Ahy ka hisotro." – Jao. 7:37

Na dia mihantona aza ny orana, ary mety hamely ny fakan’ny hazo rofia ny fasika mahamay ary handrakotra ny vatany, dia mbola ho velona hatrany ilay hazo, maitso sy matanjaka. Esory ny fasika dia ho hitanao ny tsiambaratelon’ny fahavelomany: midina lalina any amin’ireo rano miafina any ambanin’ny tany ny fakany.

Toy izany koa ny Kristianina. Miara-miafina amin’i Kristy ao amin’Andriamanitra ny fiainany. (...) Ny finoany dia tahaka ny fakany madinika amin’ny hazo rofia, izay midina lalina any amin’izay tsy hitan’ny maso ka mandray aina avy amin’ilay Loharanon’aina. Ary na dia eo anivon’ny fahalotoan’izao tontolo izao aza, dia marina sy mahatoky amin’Andriamanitra izy. (...)

Misoritra eo amin’ny endrik’ireo lehilahy sy vehivavy miara-mandeha sy miara-miasa amin’Andriamanitra ny fiadanan’ny lanitra. (...) Manana ny fifalian’i Kristy izy ireo — fifaliana avy amin’ny maha-fitahiana ho an’ny olombelona azy. Voninahitra ho azy ny aneken’ny Tompo hampiasa azy (...). – Wm, 5 Mey 1908 (ST, 6 Aogôsitra 1902).

Address

Antananarivo
00101

Telephone

+261347671163

Website

Alerts

Be the first to know and let us send you an email when Seventh Day Adventist Fiherezana posts news and promotions. Your email address will not be used for any other purpose, and you can unsubscribe at any time.

Shortcuts

Share

Category