https://www.facebook.com/156397911697008/

Jesosy Filazantsara Fiainana, Antananarivo (2026)

02/02/2026

Na inona na inona zavatra maningotra ny fiadananao ankehitriny dia tononina ho anao ny fiainambaovao ho amin' ny fahatsarana. Ny fahatsarana dia ao amin' Andriamanitra Irery ihany.

👉 Ho fiainana tsara, hatrany am-pamoronana

Efa nirian' Andriamanitra hatrany am-boalohany ho eo amin' ny fiainan' ny olona ny fahatsarana. Tia ny olona hatrany am-pamoronana Izy ; fahatsarana ny nifofonan' Andriamanitra fofonaina mahavelona ny vavoron' ny olona noforoniny, ka nahatonga azy ho olombelona ; fahatsarana ny naharian' Andriamanitra ny olona hitovy endrika Aminy sy hanahaka Azy. Tsara ny fiainana nomeny ho fampanjakany ny olona amin' ny biby rehetra, ny nanomezany ho sakafo ho azy ireo ny zavamaniry amin' ny tany. Fahatsarana ny nanolorany ny olona ny fahefana hiasa sy hitandrina ny tany izay honenany.
Niavaka tamin' ny voahary rehetra nohariana ny olona ary nanana fifandraisana manokana tamin' Andriamanitra mihitsy Izy. Tsara indrindra tamin' Andriamanitra izany !
Ny fahatsarana tahaka izany no mbola irin' Andriamanitra ho an' ny fiainanao ankehitriny.

👉 Fahafahana amin' ny fahotana : famonjena ho amin' ny fahatsarana

Noho ny fahotan' ny olona teo anatrehan' Andriamanitra anefa dia rava io fifandraisana nampifamatotra ny roa tonta io. Niala tamin' ny olona ny fiainana feno fahatsarana. Tanjon' Andriamanitra àry ny hanafaka ny olona amin' ny fahotana mba ahafahany misitraka indray izany fiainana izany. Nidina tety an-tany naka endrika Nofo tamin' ny alalan' i Jesosy Andriamanitra mba hamonjy ny olona ka hanafaka azy amin' io fahotana io : Jesosy no mampihavana antsika amin' Andriamanitra. Manasa ny olona hino an' i Jesosy Andriamanitra raha te-ho afaka amin' ny fahotana izy ka ho voadio amin' izany. Raha mino an' i Jesosy isika dia handray ny famonjeny ka hiaina fiainana feno fahatsarana avy aminy.

Ny hoe mino an' i Jesosy dia :

🙏 mino fa nentin' i Jesosy niara-maty taminy teo amin' ny hazofijaliana ny fahotantsika. Maty tamin' ny ota isika. Voavela heloka isika.

🙏 mino fa rehefa maty tamin' ny ota isika dia natsangan' i Jesosy ho olom-baovao noho ny fitsanganany tamin' ny maty. Lazaina hoe nohamarininy na nodioviny tamin' ny fahotana isika rehefa avy namela ny fahotantsika Izy. Atao koa hoe miara-belona aminy isika rehefa mino ny fitsanganany tamin' ny maty.

👉 Fiainana feno fahatsarana

Miahy antsika toy ny Mpiandry ondry Tsara Izy ary isika no ondry fiandriny, nahafoy ny Ainy ho antsika Izy. Tia antsika sy mikarakara ary mamelona antsika Izy. Mitondra ny entamavesatsika Izy. Manome fitsaharana sy fitsaharan' ny fanahintsika Izy. Momba antsika sy miaradalana ary mitoetra eo amintsika Izy. Manome fiadanana sy fifaliana ho antsika Izy. Miantoka ny fiainantsika rahatrizay Izy. Izany no fiainana be dia be avy Aminy.

1 Pierre 2:7a; Gen 1: 26-31; Gen 2: 15; Isaia 59: 2; Matio 1: 21; 2. Kor. 5: 18; Titosy 2: 14 ; 1 Petera 2: 24; Jaona 10: 9-14; Matio 11: 28-30; Hebreo 13: 5b; Jaona 3: 36.

16/12/2025

Jésus ...

29/11/2025

DIOVY NY FO

✅ Ireo isan' ny mandoto ny fon' ny olona

Ny alahelo mitoetra ao amin' ny fo sy ny hatezerana tsy voafehy ary ny lolompo, no tena isan' ny mandoto ny fon' ny olona. Manome alahelo antsika ohatra ny fifamaliana vokatry ny tsy fitovian-kevitra amin' ny hafa, ny fanambaniana, ny fanilikilihana, ny fanendrikendrehana, ny fivadihampitokisana, ny fisalovanan' ny hafa izay anjara tokony ho an' ny tena. Miteraka alahelo sy hatezerana ary lolompo ao anatintsika ihany koa ny tsy fankasitrahana ireo mpitantana isan' ambaratonga mitondra eo amin' ny fiarahamonina misy antsika. Ny tsy fiheveran' izy ireo ny olona entiny, na fankahalàna "bika aman-tarehy" tsotra fotsiny izao, na koa ny tsy faharetana sy ny tsy fahatokiana no isan' ny anton' izany.

✅ Ny vokatry ny hatezerana tsy voafehy sy ny lolompo

🚨 Eo amin' ny hafa

Ny alahelo mety ho lasa hatezerana. Ny hatezerana tsy voafehy no mampisafoaka, mampitabataba, mampiteny ratsy sy mampiteny mahamenatra, manafintohina ny hafa, manevateva olona, manompa sy manozona azy. Ny hatezerana voatahiry maharitra ao am-po dia antsoina hoe lolompo na otri-po. Amin' ny fotoana iray, raha mitroatra ao anaty ka mipoaka ety ivelany ny lolompo dia mbola mitranga avokoa ireo toetra ratsy voalaza teo ireo, manampy azy ny fanelingelenana ny fiainan' ny hafa, ny fanimbana na fanakanana ankolaka ny fisitrahany ny zony, ny fanaovana valifaty ary ny fifofoana ny aina mihintsy aza indraindray.

🚨 Eo amin' ny tena

Tsy ny hafa ihany no simbàn' ny alahelo sy ny hatezerana ary ny lolompo fa ny tenantsika ihany koa. Ireny lotom-paharatsiana rehetra avy ao amin' ny fontsika na mitoetra ao am-pontsika ireny dia manavesatra sy mandratra azy ka tsy ananany fitsaharana (tsy ampy fitoniana sy fahamarinana ary fitiavana). Mahatonga fisentoana matetika, fahataitairana, misendoatra tampoka, tsy fahamarinan-toeran' ny tosidrà, havizanana sy aretina samihafa avy amin' ny tsy fahasalaman' ny fo (Ohabolana 17: 22).

✅ Fahotana ny lolompo

Hitantsika araka izany ny voka-dratsin' ny fahotana ateraky ny alahelo sy ny hatezerana ary ny lolompo. Fahotana eo anatrehan' Andriamanitra izany satria taratry ny tsy fananantsika fitiavana : fitiavana an' Andriamanitra sy ny fitiavana ny hafa. (Matio 22: 36-40). Ny fitiavana no tsy ahatongavana amin' ny fahotana (1 Pet. 4: 8) sy haha olona tanteraka antsika manoloana an' i Kristy (Kol. 3: 14).

✅ Efa mino ve ianao? fadio ny fahotana avy amin' ny alahelo sy ny hatezerana ary ny lolompo

Mitodika amintsika rehetra ny sitrapon' Andriamanitra mahakasika izany, indrindra isika izay efa mino, mampianatra tenin' Andriamanitra, miandraikitra Sampana, mitondra fiangonana, mitory Filazantsara ... sy ny sisa.

Raha mino isika dia isika no ilay "efa niova fo" tokoa, na "efa nandray an' i Jesosy", na "efa nateraka indray", na "efa voavonjy" : efa nibebaka sy voavela heloka ary voadio tamin' ny fahotana ho olombaovao ka efa nandray ny famonjen' Andriamanitra ao amin' i Jesosy. Tokony efa tsy hiainantsika intsony izany lolompo izany : "Aoka ianareo tsy ho mpanao an-dolompo, tsy ho vinitra, tsy ho mora tezitra, tsy ho avo vava, tsy hanevateva : esory lavitra anareo avokoa izany, miaraka amin' ny haratsiam-panahy isan-karazany. Fa aoka samy ho mora fo sy antra amin'ny namany avy ianareo ; mifamela heloka, tahaka ny namelan' Andriamanitra heloka anareo noho ianareo miray amin' i Kristy". (Ef. 4: 31-32).

✅ Fanalahidy tsy hahatongavana amin' ny lolompo

Tezera fa aza manota ; aza mandratra fon' olona sy manimba ny fiainany, aza tehirizina am-po ho lolompo ny alahelo sy ny hatezerana. (Efesiana 4: 26).

Mamelà heloka tsy misy fepetra hampisinda ny alahelo : raha tsapanao ho meloka taminao ny hafa dia avelao ny helony, na dia tsy nangata-pamelana taminao aza izy _ tahaka ny namelan' i Jesosy ny helok' ireo izay nanombo Azy ho faty. (Lioka 23: 34a).

Ny fo feno fitiavana no mahay mamela heloka ary manana fiadanana : fiadanana tsy azo noho ny ezaka ataontsika fa fiadanana ampitoerin' i Jesosy ao ampontsika (Kolosiana 3: 13-15). Rehefa manantona an' i Jesosy isika dia hanjary fitoniana sy fifaliana ny alahelo sy ny hatezerana _ hody fiadanana ny ratrampo _ ho lasa fahamoram-panahy ny fitabatabana, ny fanevatevana, ny fanozonana ary ny lolompo.

11/06/2025

MISAFOTOFOTO
(Zah Mamafy Teny Fiainana)

Misafotofoto mafy lotra Jesosy ô,
Izany onjam-pianana entiko,
Te hanimba ahy e!,
Te handredrika ahy,
Tsy misy fitsaharana izy ity isan' andro,
Tsy aiko hotaterina fa tena tsy zaka e!

Ohhh! Jesosy mila anao anie aho e! hampintsahatra azy,
Manenjika ahy to handredrika ahy,
Ny ahavon' ny onja entiny,
Ny rivotra mahery to tsy tohatro,
Sakanonao re....

Refrain :

Ohhh ampangino Jesosy o! Oh! hatsaharo e!
Oh hatsaharo teneno mafy izy io, tsy handredrika ahy,
Fa mahery loatra ka tsy voatohatro,
Miady irery aho e! miady irery aho,
Ko mila izany sandrinao aho,
Hanohana ahy Jesosy malala o!

Lay sambokeliko efa ho mila ho vaky,
Voavelin' ny onja, mahery mahafaty,
Tafiditry ny rano e! Idiran' angano,

Tsy misy mahita aho, tsy misy mijery,
Faingana hamonjy ahy, f' izaho miady irery,
Ohoh! Jesosy mila anao anie aho hampitsahatra azy,

Tolory tanana aho fa miandry anao,
Ny teninao Tompo o! no andrasako..
Hoeee Mangina, mitsahara e!
Dia vita ny adiko...

09/06/2025

FITSAHARANA

✅ TSY LAVORARY NY FIAINANA TSY MISY AN' ANDRIAMANITRA

Raha mbola ny maha olombelona fotsiny ny tenantsika samirery, dia ny maha nofo antsika ahitana ny faniriany sy ny filàny (1) _ raha mbola ny tenantsika manohitra ny sitrapon' Andriamanitra (2) _ raha mbola ny tenantsika mpanota (3) no entintsika miatrika ny fiainana, dia tsy ho lavorary izany. Tsy maintsy ho tojo fahasahiranana isika ary tsy hanam-piadanana. Ambaran' ny tenin' Andriamanitra fa "Ny fon' ny olona mihevitra tsara ny halehany ; fa Jehovah ihany no mahalavorary ny diany" (4) ; “Tsy misy fiadanana ho an’ny ratsy fanahy, hoy i Jehovah" (5).

Ny fiainana tsy miaraka amin' Andriamanitra dia tsy maintsy hisy fotoana ahatsapantsika tahaka izao :

📌 Manampetra ny maha olona.

📌 Tsy mahefa amin' ny ampahany betsaka, ary tsy mahefa na inona na inona amin' ny maro, amin' ireo zavatsarotra tokony hatrehintsika eo amin' ny fiainana isika.

📌 Tsy ho afamanoatra intsony amin' ireo zava-tsarotra mitambesatra amintsika isika. Tsy tratry ny herintsika intsony ny handingana na hamaha ireny olana samihafa ireny.

📌 Mety ho nahavonjy ihany ny ezaka nataontsika tamin' ny herim-batana sy ny fahaizantsika, ny namana sy ny olom-pantatra, fa nandalo fotsiny ihany izany. Toa mihevitra koa ny maro fa hahasambatra azy ho lavitry ny olana ny vola aman-karena na ny fahefana sy ny voninahitra fa tsy mitondra ho amin' ny fiainana misy ny tena fifaliana sy fiadanana izany, tsy ahazoana na mahavidy fihavanana, fifankatiavana, fahasalamana, ary aina ireny !
Mijanona eo ihany mangeja antsika hatrany ny olana.

📌 Tsy hahita izay ho sarangotina intsony ary mila famonjena isika. Mahantra mila fanampiana, malahelo mila fampaherezana, marefo mila taridalana sy fanohanana.

Ny firaisana amin' Andriamanitra no mampirindra ny fiainantsika sy manome fahafahampo amin' izany.

✅ ENDRIKY NY FIAINANA TSY LAVORARY, TSY MISY FIADANANA

🌀 Reraka ve ianao? mikorotan-tsaina? malahelo? kivy? tratry ny fahaketrahana ary sanatria ho tonga amin' ny famoizam-po sy famonoan-tena?

🌀 Tsy mba manana ny ampy ve ianao? voafetra amin' ny filàna miohatra amin' ny zanaky ny hafa? Sahirana amin' ny fanatontosàna ny fianarana? Tratry ny fahadisoam-panantenana teo amin' ny fitiavan' olon-droa?

🌀 Tsy araky ny herim-batanao intsony angamba ny asa aman-draharaha? tsy tratranao intsony ny manejika ny vidim-piainana? tsy vita intsony ny adidy eo amin' ny fianakaviana sy ny fiarahamonina? raha sanatria misy marary, tsy misy ho enti-manana amin' izay fitsaboana? Tsy efa intsony izay mba filàna amin' ny fiainana andavanandro!

🌀 Malahelo ve ny fonao noho ny avonavona sy ny fireharehana ary fanilikilihina ataon' ny hafa? na noho ny fanendrikendrehana amin' ny zavatra izay tsy nataonao akory? na noho ny tsindrihazolena sy fanararaotam-pahefana? na noho ny tsy rariny ataon’ ny hafa izay tsy mahatsapa ny fahadisoany akory? na koa noho ny fisarahana aman' aina tamin' ireo olona akaiky anao?

Ireny no asa mafy sy entamavesatra iantsorohantsika samirery ka manasatra antsika, tsy ananantsika fiadanana.

✅ MISY BANGA TSY HAINTSIKA FENOINA AO ANATINTSIKA AO, MILA FITSAHARANA ISIKA

🔰 Tsy fantatro hoe tahaka ny ahoana ny haben' ny olana eo aminao sy ny halalin' ny fahoriana miafina ao anatinao ao. Tsy haiko refesina ny hamafin' ny tahotra sy ny fanahiana ao am- ponao ao. Tsy takatry ny saiko ny fangirifirian' ny fanahinao any anatinao lalina any.

🔰 Tsy hainao intsony hoe ho aiza ianao? Tena tonga amin' ilay fitenenana hoe "tapidalan-kaleha toy ny Sokina manani-bato" isika.

🔰 Tena reraka ny vatana, torovana ny saina, maratra sy malahelo ny fo. Sasatra ny fanahintsika satria ao amin' ny fanahy no itoeran' ny fisainantsika sy ny sitrapontsika ary ny fihetseham-pontsika,

🔰 Misy fahabangana lehibe tiantsika fenoina ao anatintsika ao, ilaintsika ny havizanana hisolo tanjaka, ny harerahan-tsaina hisolo faherezana sy fahavitrihana, ary ny ratra sy ny alahelon' ny fo hody famelankeloka sy fifaliana ary fiadanana. Ny FITSAHARAN' ny fanahintsika mihintsy no ilaintsika. Io no BANGA mila fenoina ao anatintsika ao !

✅ JESOSY IRERY IHANY NO AFAKA HANOME NY TENA FITSAHARANA AO ANATINTSIKA

Matio 11: 28-30

Jesosy irery ihany no afaka mameno io banga io satria tsy misy anarana hafa ambanin' ny lanitra ahazoana famonjena afa-tsy amin' ny anaran' i Jesosy irery ihany (6). Miantso antsika rehetra tsy an-kanavaka hanantona Azy Izy, hanolorany ilay fitsaharana ho antsika amin' ireo asa manasatra sy entamavesatra eo amin' ny fiainantsika (7) ; manome safidy malalaka ny tsirairay Izy amin' izany ka nanambaràny ny tenany ho malemy Fanahy sady tsy miavona am-po (8).

🗾 Ny atao hoe "FITSAHARANA" dia fiatoana amin' ireo zava-manasatra sy fanovozana hery vaovao indray hiatrehana sy hanamaivana azy ireny.

Ny fiatoana dia ny faharesen-dahatra fa voafetra ny hery maha olombelona miatrika ny fiainana ka manapakevitra hiantoraka amin' i Jesosy handray ny fanampiany.

Ny hery vaovao ateraka ao anatintsika ahafahana mihoatra na mandresy mihintsy ny sarotra dia ny fanantenana avy amin' ny fahatokiana ny famonjen' i Jesosy amin' izany :“Fa izay miantehitra amin’i Jehovah dia mandroso hery kosa… handeha izy, nefa tsy ho reraka.” (9).

Ataon' i Jesosy amintsika izany satria Izy no Mpiandry tsara ary isika no ondry fiandriny. Tia antsika Izy, mikarakara sy mamelona antsika, manome ny tena fiainana, dia fiainana be dia be, misy ny fitsaharana sy fifaliana ary fiadanana (10).

🗾 Mila mitondra ny ziogany sy mianatra amin' i Jesosy isika mba handray ny fitsaharany (11).

Ny zioga dia ny fandavantsika ny maha olombelona fotsiny ny tenantsika, dia ny tenantsika tsy misy an' Andriamanitra, ny tenantsika mpanota anjakan' ny fahendren' olombelona, feno ny faniriana sy ny filàn' ny nofo toy ny fitiavan-karena ohatra, araka ny voatanisa terÿ am-piandohana. Ny fahotana no mitondra olana sy fahasimbana foana amin' ny fiainantsika (12).

Ny fampianarana raisintsika amin' i Jesosy dia ny fankatoavana ny sitrapon' Andriamanitra, izay mitondra fiainana.

Tanterahantsika ambany fitantanany ireo zavatra roa ireo ka nahatonga Azy hiteny fa mora ny ziogany ary maivana ny entany (13). Mampianatra, manolotsaina, mitaridàlana sy momba antsika amin' ny alalan' ny FANAHY MASINA Jesosy amin' izay ataontsika rehetra (14).

✅ NY FINOANA AN' I JESOSY NO ANTOKA HANDRAISANTSIKA NY FITSAHARANY

Tsy afaka ny handray ny FITSAHARANA na ny fitsaharan' ny fanahy avy amin' i Jesosy isika raha tsy mino Azy. Ny FINOANA an' i Jesosy dia :

❤️ Manapakevitra hiala amin' ny fahotana ary mitodi-doha manantona an' i Jesosy : mibebaka.

❤️ Mino fa nanao sorona ny Ainy teo amin' ny hazofijaliana Jesosy ho sandan' ny fahotantsika. Nentiny niara-maty taminy teo amin' ny hazo fijaliana ny fahotantsika. Maty tamin' ny ota isika. Voavela heloka isika. (15).

❤️ Mino fa rehefa maty tamin' ny ota isika dia natsangan' i Jesosy ho olom-baovao noho ny fitsanganany tamin' ny maty. Nohamarininy na hoe nodioviny tamin' ny fahotana isika rehefa avy namela ny fahotantsika Izy. Lazaina koa hoe miara-belona taminy isika rehefa mino ny fitsanganany tamin' ny maty. (16).

Tsy ny fitsaharana eo amin' ny fiainana ihany no raisintsika noho ny finoana Azy, fa indrindra ny fitsaharana ho avy, dia ny FIAINANA MANDRAKIZAY, aorian' ny fitsaràn' Andriamanitra (17).

(1) Galatiana 5: 19-21 ; (2) 1 Petera 4: 2
(3) Isaia 59: 1-2 ; (4) Ohabolana 16: 9
(5) Isaia 48: 22 ; (6) Asa 4: 10 sy 12
(7) Matio 11: 28 sy 29d ; (8) Matio 11: 29b
(9) Isaia 40: 31 ; (10) Jaona 10: 9-11
(11) Matio 11: 29a ; (12) Salamo 32: 3-4
(13) Matio 11: 30 (14) (Jaona 14: 26 ; Romana 8: 26 ; Jaona 16: 13)
(15) (Titosy 2: 14a ; 1 Petera 2: 24a)
(16) (Titosy 2: 14b ; 1 Petera 2: 24b ; Romana 6: 8)
(17) Romana 6: 22

27/03/2025

Ho an' izay rehetra tsy mbola miaina ny Fifaliana sy ny Fiadanan' Andriamanitra ao amin' i Jesosy, Ilay Mpamonjy ny olona.

♥️ NOMBAN' NY VONINAHITR' ANDRIAMANITRA NY FANAMBARAN' NY ANJELINY NY HIHAVIAN' NY MPAMONJY DIA KRISTY JESOSY

Tamimboninahitra no nanambaran' Andriamanitra ny fahatongavan' i Jesosy tety an-tany : nanelatrelatra nanodidina ireo mpiandry ondry ny Voninahitr' Andriamanitra tamin' ny fotoana nanambaran' ny anjely tamin' izy ireo ny hahaterahan' i Jesosy Tompo (Lioka 2: 9). Taorian' izany fanambarana izany dia nanolotra ny Voninahitra ho an' Andriamanitra ireo anjely rehetra teo tamin' ny fiderana Azy (Lioka 2: 14a). Manamafy ny maha Irak' Andriamanitra sy ny maha Andriamanitra an' i Jesosy izany.

♥️ FIFALIANA SY FIADANANA NO HIAINAN' IREO OLONA REHETRA MANDRAY AN' I JESOSY HO MPAMONJY AZY

Afaka manantena Fifaliana lehibe avy amin' i Jesosy ny olombelona rehetra tsy misy an-kanavaka noho ny famonjena entiny. Raisin' izay rehetra mino ny asam-pamonjeny izany (Lioka 2: 10-11). Tahaka izany koa ny Fiadanana ; miaina Fiadanana ny olona rehetra ankasitrahan' Andriamanitra, izany hoe ireo olona rehetra manaiky handray ny famonjen' Andriamanitra ao amin' i Jesosy (Lioka 2: 14b).

Nambaran' Andriamanitra tamin' ny alalalan' ireo anjeliny izany Fifaliana sy Fiadanana ao amin' i Jesosy ho an' olona izany fahizay, ary mbola ho antsika ankehitriny koa satria tsy mba miova omaly sy anio ary ho mandrakizay Jesosy (Hebreo 13: 8).

♥️ AO ANATY SY AVY AO ANATIN' NY FON' NY OLONA IZAY MANDRAY NY FAMONJEN' I JESOSY NY FIFALIANA SY FIADANANA

Ny Fifaliana sy Fiadanana azontsika avy amin' Andriamanitra amin' ny alalalan' i Jesosy dia tsy mifidy toerana ara-jeografika (eto Madagasikara na any an-dafy, an-drenivohitra na ambanivohitra ohatra...), ary tsy mifidy olona araka ny faripiainany (manana fiara sy trano ary ambimbava mahavita taona maro, na tsy manan-katokona ohatra), tsy miankina amin' ny firazanana, tsy misy ifandraisany amin' ny asa iandraiketantsika andavanandro na ny maripahaizana ananantsika, ary tsy azo noho ny fahefana eo am-pelatanantsika.

Araka izany tsy miankina amin' ny zavatra sy ny tontolo ety ivelan' ny olona izany Fifaliana sy Fiadanana omen' i Jesosy izany : Fiadanana tsy tahaka ny fanomen' izao tontolo izao, fa manala ny alahelo sy tahotra ao anatin' ny fo (Jean 14: 27). Mihoatra lavitra ary tsy afaka mitaha akory amin' ny fiadanana avy amin' ny fahendren' olombelona tsy misy an' Andriamanitra ny Fiadanana azon' Andriamanitra omena azy : Fiadanana hiaro ny fo sy ny saina amin' ny ahiahy sy tebiteby ary tahotra (Filipiana 4: 6-7). Fifaliana avy anatin' ny fo na dia anaty olana aza. Na dia ory aza ianao, izany hoe iharan' ny fanenjehana na tsindrihazolena na fanilikilihina na fanambakana na sedra mafy, na fakampanahy, ka ao anatin' ny finoana an' i Jesosy na noho ny finoana Azy, dia tsy maintsy hiaina io Fifaliana io (Matio 5: 4).

♥️ MANAPAKEVITRA NY HITADY SY HAHITA AN' I JESOSY IREO MINO AZY REHEFA MANDRE FA IZY NO MPAMONJY ARY AFAKA MANOME NY TENA FIFALIANA SY FIADANANA

Hoy ireo mpiandry ondry : Andeha isika hankany Betlehema ka hizaha izany zavatra vao tonga izany, izay nampahafantarin'ny Tompo antsika. Dia nandeha faingana izy ka nahita an' i Maria sy Josefa, ary ny Zazakely nandry teo am-pihinanam-bilona (Lioka 2: 15-16).

Ianao koa ; efa nandre ny amin' i Jesosy ve ianao? nandre Azy tao amin' ny Tenin' Andriamanitra dia ny Baiboly? nandre Azy tamin' ny toriteny na fitoriana ny Filazantsara nataon' ireo mpanompon' Andriamanitra? Efa nandre ny amin' ny maha Mpamonjy ny olombelona Azy ve ianao ka afaka manome ny tena Fifaliana sy Fiadanana ho anao Izy ao anatin' izany?

Maro ireo anton-javatra manavesatra ny fontsika sy ny saintsika ary ny fanahintsika ka mety tsy hananantsika fifaliana sy fiadanana : eo ny ady sy ny fifanandrinana ara-politika ary ny fahantrana amin' ny firenena maro maneran-tany, eo ireo loza voajanahary taona vitsivitsy izao vokatry ny fiovaovan' ny toetrandro, ny fahasahiranana iainan' ny isan-tokantrano, ny fahadisoam-panantenana mitranga, ny tebiteby sy tahotra mby an-koditra, ny alahelo mety mianjady vokatry ny ataon' ny hafa. Anatin' ireny rehetra ireny, efa renao ve ary efa nahaliana anao tamin' ny fo sy ny saina, fa misy tokoa ny tena Fifaliana sy ny Fiadanana ary ny fitsaharan' ny fanahy homen' i Jesosy anao, ary afaka hitoetra eo amin' ny fiainanao?

Mba ho tahaka ireo mpiandry ondry ve ianao ka hino ny fahatongavan' i Jesosy hamonjy anao ary hitondra ny tena Fifaliana sy Fiadanana eo amin' ny fiainanao? Hanapakevitra toa azy ireo ve ianao izay nandao ny fiandrasan' ondriny aloha mba hitady an' i Jesosy sy hifanatritava Aminy rehefa nandre ny fahatongavany? Taratry ny fandraisan' izy ireo ao am-pony ny Mpamonjy izany!

Dia tahaka izany koa ; afaka ialanao ve ireo sakantsakana eo aminao toy ny gejan' ny asa fivelomana (fa tsy ny asa fivelomana akory), ny fatoran' ny fitiavambola aman-karena, ny gadran' ny filam-pahefana sy voninahitra, ny fandalàna ny kitranoantrano sy ny kolikoly, ny fanaovana tsindrihazolena, ny fankahalana, ny fireharehana sy avonavona, ny tsy famelana ny heloky ny hafa ... Tsy avy amin' ireny mihintsy ny tena Fifaliana sy Fiadanana ho anao. Tadiavo sy ataovy izay hiaonana amin' i Jesosy, Ilay Andriamanitra Mpamonjy ny olombelona rehetra, raiso ao am-po Izy, dia hiaina ny tena Fifaliana sy Fiadanana ianao!

♥️ ARY NONY EFA HAHITA IZY, DIA NAMPIELY IZAY TENY NOLAZAINA TAMINY NY AMIN' IZANY ZAZA IZANY (Lioka 2: 17)

Maniry izahay ny hinoanao ny maha Andriamanitra Mpamonjy an' i Jesosy ka hikatsahanao Azy amin' ny fonao manontolo. Ny fifikiranao Aminy no hampanjaka izany Fifaliana sy Fiadanana izany eo amin' ny fiainanao. Rehefa tsapanao ny hatsaràn' izany, indrindra ao anatin' izao fahasarotana amin' ny lafiny maro, ary saika isam-batan' olona ka hatramin' ny firenena rehetra maneran-tany izao, dia ambarao amin' ny hafa indray. Marobe ireo izay mila izany toy ny nataon' ireo mpiandry ondry fahizay.

23/02/2025

IRAK' ANDRIAMANITRA JESOSY

FAMINANIANA NY NAHATONGAVAN' ILAY MPANOMPON' ANDRIAMANITRA, MPITONDRA FAMONJENA HO AN' NY ISIRAELY SY NY FIRENENA REHETRA. (Isaia 42).

Tamin' ny faminanian' Isaia no nanambaran' Andriamanitra fa indreo efa miseho ny amin' ny zavatra taloha, fa zava-baovao indray no ambarany sy hampahafantariny na dia mbola tsy miseho aza (1).
Ny zavatra taloha dia ny fifaneken' Andriamanitra Tsitoha tamin' ireo olony, sy ny nandraisany an-tanana manokana ny firenen' Isiraely.
Ny zava-baovao kosa dia ny hisehoan' ilay Mpanompon' Andriamanitra amin' ny ho avy, mpitondra famonjena ho an' ny Isiraely sy ny firenena rehetra. Voalazany eo amin' ny andininy voalohany io : Hanolotra io Mpanompony io Andriamanitra, Izay tohanany sy voafidiny sady ankasitrahany. Nametrahany ny Fanahiny Izy mba hamoaka ny lamina ara-drariny ho an' ny firenena (2).
Ny fanazavan' i Matio dia isan' ny ahitantsika fa Jesosy Zanaka Lahitokan’ Andriamanitra io Mpanompony ho avy voatondro tamin' ny faminaniana io (3).

NIRAHIN' ANDRIAMANITRA HANAO NY ASANY JESOSY, DIA NY HITONDRA FAMONJENA HO AN' NY FIRENENA REHETRA.

Amin' ny maha Mpanompony Azy dia hanao ny asan' Andriamanitra Ray ka anirahany Azy Jesosy : Ny haniko hoy Jesosy dia ny manao ny sitrapon' izay naniraka Ahy sy ny mahavita ny asany, ny asan' Andriamanitra Ray izay naniraka Ahy no tsy maintsy ataontsika hoy Jesosy (4).
Nambaran' i Jesosy mazava fa ny hitory ny teny soa mahafaly, [atao koa hoe Vaovao mahafaly, na Filazantsara (avy amin' ny teny Grika)] no asa nanirahan' Andriamanitra Azy (5).
Ny Teny Soa Mahafaly na Filazantsara dia ny fahatongavan' i Jesosy hitondra famonjena ho an' ny olombelona rehetra tsy misy avahana. Fifaliana lehibe ho an' ireo olona izay miandrandra io famonjeny io izany, dia ireo izay hino an' i Jesosy (6).
Araka izany, hitondra ny Famonjen' Andriamanitra ho an' ny olombelona rehetra no asa nanirahany an' i Jesosy.
Amin' ny maha Andriamanitra an' i Jesosy dia toa naniratena (naniraka Tena) mihintsy Andriamanitra Ray raha naniraka an' i Jesosy. Jesosy no Andriamanitra tonga nofo ho Olona ka mitoetra eo amintsika (7). Andriamanitra tonga hamonjy ny olona Jesosy ary mifototra amin' ny fanafahany ny olona amin' ny fahotana izany famonjena izany (8). Andriamanitra mitoetra eo amin' ireo izay mino Azy Jesosy (9).

VOAHOSOTR' ANDRIAMANITRA TAMIN' NY FANAHINY HAMONJY NY OLOMBELONA REHETRA JESOSY.

Isan' ny maneho ny maha Andriamanitra an' i Jesosy ny Fanahy Masina ; notorontoronina tamin' ny Fanahy Masina sy nateraky ny Fanahy Masina Izy (10).
Ankoatra izany, ny fifidianan' Andriamanitra sy ny fanohanany ary ny fankasitrahany an' i Jesosy ho Mpanompony dia miseho amin' ny fanosorany Azy ny Fanahy Masina (11).
Jesosy no Mesia na Kristy izay samy midika hoe "llay Voahosotr' Andriamanitra".
Nasehon' Andriamanitra teo amin' ny fotoana nanaovan' i Jaona batisa an' i Jesosy ny nanosorany Azy ny Fanahiny, narahan' ny fanambarany ny fankasitrahany Azy ; nisokatra tamin' i Jesosy ny lanitra, nilatsaka teo Aminy ny Fanahy Masina ary nisy feo avy tany an- danitra nanao hoe : "Ity no Zanako malalako Izay sitrako" (12).
Niharihary ampahibemaso tamin' ireo olona nanatrika ny fotoam-pivavahana tao amin' ny Synagogan' i Nazareta ny namakian' i Jesosy ny Soratra Masina (izay faminanian' Isaia ihany, Isaia 61: 1-2) ka nanambarany ny tenany ho Ilay voasoratra : Voahosotr' Andriamanitra tamin' ny Fanahy Masina, hitondra ny Famonjena amin' ny malahelo (na mahantra) Izy. Ireo mahantra dia ireo olona rehetra mahantra amin' ny lafiny rehetra maha-olona manontolo azy ka mila fanafahana amin' izany : ny torotoro fo hositraniny, ny babo na voafatotra hafahany, ny jamba sy ireo anaty haizina hampahiratiny sy havoakany ho amin' ny mazava, ireo izay nampahoriana hafahany, hahazo fampiononana ny malahelo. Nambaran' i Jesosy fa ankasitrahan' Andriamanitra ny hamonjeny ny olona ary hotsarain' Andriamanitra hizaka ny fanamelohana kosa ireo tsy mino izany famonjena izany (13).
Raha te handray ny famonjena isika dia tsy maintsy mino ny Filazantsara, izany hoe mino an' i Jesosy (14) : Jesosy no henointsika (15), hankatoavina sy hinoana.

(1) Isaia 42: 9 (9) Matio 1: 23, DIEM
(2) Isaia 42: 1,DIEM (10) Lio.1: 34-35;Mat. 1: 18-20
(3) Matio 12: 14-18 (11) Matio 12: 18
(4) Jaona 4: 34 ; 9: 4a (12) Matio 3: 16
(5) Lioka 4: 18a (13) Isaia 61: 1-2 ; Lioka 4: 18-21
(6) Lioka 2: 10-11 (14) Marka 16: 15-16
(7) Jaona 1: 1, sy 14 (15) Marka 9: 7-8
(8) Matio 1: 21

24/12/2024

ANDRIAMANITRA JESOSY.

👉Ohatra ny amin' ny faminaniana ny maha Andriamanitra an' i Jesosy.

Andriamanitra Jesosy. Efa nambaran' ny faminanian' Isaia Azy izany ; Jesosy Ilay Zazalahy hateraka ho antsika, Izay Andriamanitra Mahery manana ny fanapahana ho eo an-tsorony (1). Araka an' i Isaia ihany, Jesosy Ilay Zazalahy hateraky ny virijiny izay antsoina ihany koa hoe Imanoela, ary ny Imanoela dia midika hoe "Andriamanitra miaraka amintsika." (2). Ny hoe Jesosy moa dia midika hoe : Jehovah na Andriamanitra no Mpamonjy (3).

👉 Ohatra ny amin' ny fanambaran' i Jesosy ny maha Andriamanitra Azy tamin' ireo mpianany.

Raha ny resak' i Jesosy tamin' i Tomasy sy Filipo dia toy izao : mahafantatra an' Andriamanitra Ray ianareo satria efa mahafantatra Ahy hoy Jesosy ary mbola nampiany hoe : izay nahita Ahy dia nahita an' Andriamanitra Ray. Nambarany fa Izy dia ao amin' ny Ray ary ny Ray dia ao Aminy. Ny teny izay lazaiko aminareo hoy Jesosy dia tsy avy amiko fa asan' Andriamanitra Ray ato amiko. (4).
Ireo rehetra ireo dia anehoan' i Jesosy ny maha endrik' Andriamanitra Ray Azy. Andriamanitra Jesosy.

👉 Ohatra ny amin' ny fanambaran' i Jesosy ny maha Andriamanitra Azy tamin' ireo Jiosy

Rehefa nanontany an' i Jesosy ny maha Kristy Azy na tsia ireo Jiosy mba tsy hisalasalany intsony dia hoy Jesosy : efa nilaza taminareo ihany Aho fa tsy nino ianareo. Ny asa izay ataoko avy amin' Andriamanitra Ray hoy izy no manambara Ahy. Mazava izay ambaran' i Jesosy eto : Izy no Kristy voahosotr' Andriamanitra hitondra ny famonjena izay nandrasan' ny Jiosy, manatanteraka ny asan' Andriamanitra Ray ety an-tany ho famonjena ny olombelona rehetra, ho an' izay mino Azy Izy. Nampian' i Jesosy hoe : Izaho sy ny Ray dia iray ihany. Tezitra ireo Jiosy ka nikasa hitora-bato Azy satria hoy izy ireo : manao ny tenanao ho Andriamanitra ianao kanefa dia olombelona ihany. Tsy nandà ny amin' ny maha Andriamanitra Azy, araka ny nandraisan' ireo Jiosy izay nambarany anefa Jesosy. (5).

👉Manamafy ny maha Andriamanitra an' i Jesosy ireto :

Nisy talohan' ny zavatra rehetra Jesosy ary efa tao amin' Andriamanitra talohan'ny nahariana izao tontolo izao (6). Tao amin' i Jesosy no naharian' Andriamanitra ny zavatra rehetra any an-danitra sy eto an-tany, ny hita sy ny tsy hita, na fiandrianana, na fanjakana, na fanapahana, na fahefana. Izy no naharian' Andriamanitra ny zavatra rehetra, ho Azy ny zavatra rehetra ary ao Aminy no aharetan' ny zavatra rehetra. (7).

Taorian' ny nitsanganan' i Jesosy tamin' ny maty dia nanamafy tamin' ny mpianany Izy manao hoe : "Efa nomena Ahy ny fahefana rehetra any an-danitra sy ety an-tany (8), Izy no Lohan' ny fanapahana sy ny fahefana rehetra (9). Fahefan' Andriamanitra izany, fahefana amin' ny maha Andriamanitra Azy.

(1) Isaia 9: 5 ; (2) Isaia 7: 14 ; Matio 1: 22-23
(3) Matio 1: 21 ; (4) Jaona 14: 7-11
(5) Jaona 10: 24-33 ; (6) Jaona 17: 5
(7) Kolosiana 1: 16-17 ; (8) Matio 28: 18
(9) Kolosiana 2: 10 b

19/12/2024

MAHALALA AN' I JESOSY VE ISIKA ?

Tsy lavina fa mety efa nisy olona nanambara sy nitory taminao ny amin' i Jesosy, raha mbola tsy nisy anefa izany dia mbola mety hisy koa olona hananatanteraka izany aminao. Hahafantatra an' i Jesosy ihany ianao raha renao tsara izay ambaran' ilay olona aminao. Fa ny tena isan' ny fahalalana an' i Jesosy dia raisina avy amin' Andriamanitra Ray, ao amin' ny tenin' Andriamanitra na ny Soratra Masina,

Andriamanitra Ray amin' ny alalan’ ny teniny no manambara Ahy hoy Jesosy. Rehefa tsy manana ny tenin' Andriamanitra mitoetra ao anatiny ny olona dia tsy hahafantatra an' i Jesosy mihintsy ary tsy afaka ny hino Azy akory. (Jaona 5: 37,38).

Hoy Jesosy : "Dinihinareo ny Soratra Masina, ataonareo fa ao aminy no anananareo fiainana mandrakizay, ary ireny no manambara Ahy". (Jaona 5: 39).

Tsy vitan' ny saina maha olona fotsiny ihany koa anefa izany fahatakarana ny maha Izy Azy an' i Jesosy ao amin' ny tenin' Andriamanitra izany. Feno ny fahalalantsika an' i Jesosy rehefa ombàn' ny fiasa-maherin' ny Fanahy Masina izany : ny Fanahy Masina no vavolombelona hanambara Ahy hoy Jesosy (Jaona 15: 26 ; ampio Jaona 14: 26a). Ny mahakasika izay nanambaran' i Jesosy ny momba ny tenany manokana ao amin' ny tenin' Andriamanitra dia anisan' izay hampianarin' ny Fanahy Masina sy hampahatsiahivin' ny Fanahy Masina antsika izany (Jaona 14: 26b).

Asan' ny Fanahy Masina eo amintsika ny manome ny fahalalana ny fahamarinan' ny Tenin' Andriamanitra sy ny tena fahalalana an' i Jesosy.

Jesosy Filazantsara Fiainana

02/02/2026

16/12/2025

29/11/2025

11/06/2025

09/06/2025

27/03/2025

23/02/2025

24/12/2024

19/12/2024

Address

Telephone

Website

Alerts

Shortcuts

Share

Category