Manako isan'andro

26/05/2026

2Samoela 5:1-16
Tonga mpanjakan’ny Israely i Davida
1Tan 11.1-9
1Tonga tao amin’i Davida tao Hebrona ny firenen’Israely rehetra ka niteny hoe: Indreto izahay, fa taolanao sy nofonao. 2Fa hatry ny fahiny koa aza, raha mbola nanjaka taminay i Saoly dia ianao no efa mpitarika ny Israely nandeha niady sy niverina avy any; ary NY TOMPO efa nilaza taminao hoe: Ianao no ho mpiandry ny Israely oloko, ianao no ho mpanapaka azy. 3Eny, tonga tao amin’ny mpanjaka tao Hebrona ny loholon’ny Israely rehetra ary nanao fanekena taminy tao Hebrona teo anatrehan’NY TOMPO i Davida mpanjaka. Dia nanosotra an’i Davida ho mpanjakan’ny Israely izy ireo.
4Telopolo taona i Davida fony izy nanomboka nanjaka, ary efapolo taona no nanjakany. 5Tao Hebrona no nanjakany tamin’ny Joda nandritra ny fito taona sy enim-bolana; ary tany Jerosalema no nanjakany tamin’ny Israely sy ny Joda rehetra nandritra ny telo amby telopolo taona.
Ny namaboan’i Davida an’i Jerosalema
6Nankany Jerosalema hiady amin’ny Jebosita tompon-tany ny mpanjaka sy ny olony, ary hoy ireo tompon-tany tamin’i Davida: Tsy ho tafiditra ato ianao; fa na dia ny jamba sy ny mandringa aza dia hahasakana anao; ny heviny tamin’izany dia toy ny hoe: Tsy ho tafiditra ato i Davida. 7Kanjo azon’i Davida ihany ny manda fiarovana, dia i Ziona, Tanànan’i Davida izany. 8Ary hoy i Davida tamin’io andro io: Izay mamely ny Jebosita dia aoka hananika ny lalan-drano ka hamely ny mandringa sy ny jamba izay halan’ny fon’i Davida. Izany no nahatonga ny fitenenana hoe: Izay jamba sy mandringa tsy hiditra ao amin’ny Trano. 9Dia nitoetra tao anatin’ny manda fiarovana i Davida ka ny anarany nataony hoe Tanànan’i Davida. Ary narafitr’i Davida ny manodidina, hatrany Milo, mbamin’ny ao anatiny. 10Dia nandroso nisandratra i Davida, satria NY TOMPO, Andriamanitra Tompon’izao rehetra izao, no nomba azy.
1Tan 14.1-2
11Nandefa iraka tany amin’i Davida Hirama, mpanjakan’i Tiro, ka nampanatitra hazo sedera ary nandefa mpandrafitra sy tambato; dia nanorina trano ho an’i Davida ireo. 12Dia fantatr’i Davida fa NY TOMPO no nampitoetra azy ho mpanjakan’ny Israely ka nanandratra ny fanjakany noho ny amin’ny Israely olony.
Ireo zanakalahy naterak’i Davida tany Jerosalema
1Tan 3.5-9; 14.3-7
13Mbola naka vady tsindrano sy vady hafa tany Jerosalema koa i Davida rehefa tonga avy tany Hebrona; ary nisy zanakalahy sy zanakavavy koa naterak’i Davida. 14Izao no anaran’ny naterany tany Jerosalema: Samoa, Sobaba, Natana, Solomona, 15Jibara, Elisoa, Nafega, Jafia, 16Elisama, Eliada ary Elifeleta.

26/05/2026

2 Samoela 1.17-27
MITODIKA @ A/TRA NA MALAHELO AZA

📖Hitantsika teo aloha teo fa maty I Saoly sy Jonatana ary nasain'i Davida novoina ilay Amalekita nilaza ho namono an’i Saoly. Ka rehefa vita izany dia hitantsika eto fa naneho ny alahelony I Davida ka naseho amin’ny alalan’ny hira atao hoe Tsipika izany ary nampianarina ny taranak’I Joda.

✅Ny zavatra hita taratra voalohany dia ny hoe tsy nitana lolom-po t@ Saoly mihitsy i Davida raha ity hira ity no jerena. Tsy niresaka ny momba ny fanenjehana na ny fialonana nataon’ny mpanjaka taminy izy. Toa ny zavatra tsara ary no lazainy eto sy hahatsiarovany azy. Ny olona rehetra mantsy dia misy endrik’Andrimanitra avokoa na dia simban'ny fahotana aza izany endrik’Andrimanitra izany.

✅Ny teny fiderana ho an'i Jonatana indray dia hahitana fitiavana lalina toa manaitra ihany koa: niaiky i Davida fa ny fitiavan'io namany (rahalahy) io dia mihoatra lavitra noho ny fitiavan'ny vehivavy. Fitiavana miorina amin'ny fanekena nataon'izy roa tonta izany (1 Sam 18:3) fa tsy fitiavana taitaitra akory ka miha lefy.

✅Ity lahatsoratra ity dia hahitana fa malahelo I Davida kanefa alahelo maneho fitiavana na dia ireo fahavalo aza. Tsy nanafina ny fahoriany i Davida, fa natolony ho an'Andriamanitra tamin'ny alalan'ny tononkalo izany. Tsy mampianatra antsika ho vato fo akory ny Soratra Masina, fa miantso antsika hitodika hatrany any amin’Andrimanitra na dia anaty halahelo aza.

✅Manaraka izany, ny fihetsik'i Davida tamin'i Saoly dia mampahatsiahy antsika fa misy endrik’ Andrimanaitra hatrany na dia any amin’ireo izay nanao ratsy antsika aza ka mendrika ho tiavina na iza na iza.

⏩ Ny fitiavan'i Davida an'i Jonatana dia toa mampatsiahy ny fitiavan'i Kristy ny Fiangonany: fitiavana miorina amin'ny fanekena, tsy mivadika. Izany fitiavana fahavalo sy fitiavana tsy mivadika izany anefa dia tsy haintsika raha tsy mianatra amin’ilay Jeso nahavita izany isika.

26/05/2026

2Samoela 1:17-27
Ny alahelon’i Davida ny amin’i Saoly sy i Jonatana
17Nisaona an’i Saoly sy i Jonatana zanany tamin’izao hira fisaonana izao i Davida, 18ary nasainy nampianarina ny taranak’i Joda ny hira atao hoe Tsipìka; indro, voasoratra ao amin’ny bokin’i Jasara izany:
19Ilay voninahitrao, ry Israely, no voalefona teo amin’ny havoananao!
Indrisy! Lavo ny mahery!
20Aza ambaranareo any Gata izany,
aza torinareo ho fifaliana any an-dalamben’i Askelona,
fandrao mifaly ny zanakavavin’ny Filistina,
fandrao miravoravo ny zanakavavin’ny tsy mifora.
21Ianareo tendrombohitra Gilboa,
aza misy ando aman’orana intsony eny aminareo,
na saha mahavokatra!
Satria tany no nanariana ny ampingan’ny mahery,
dia ny ampingan’i Saoly ka tsy nohosorana diloilo.
22Ny tsipìkan’i Jonatana dia tsy nihemotra
raha tsy nahazo ny ran’ny maty
sy ny tavin’ny mahery;
ary ny sabatr’i Saoly dia tsy mba niverina foana.
23I Saoly sy i Jonatana izay tiana sady maha te ho tia fony fahavelony
dia tsy nosarahina na tamin’ny nahafatesany aza;
haingam-pandeha noho ny voromahery izy ireo
ary mahery noho ny liona.
24Ry zanakavavin’Israely, mitomania an’i Saoly,
fa nahafinaritra ny nampitafiany lamba jaky anareo
sady nasiany firavaka volamena ny fitafianareo.
25Indrisy! Lavo teo amin’ny ady ny mahery!
Voalefona teo amin’ny havoananao i Jonatana!
26Ory noho ny aminao aho, ry Jonatana rahalahiko!
Nahafinaritra ahy indrindra ianao;
nahagaga ny fitiavanao ahy mihoatra noho ny fitiavan’ny vehivavy.
27Indrisy! Lavo ny mahery!
Levona ny fiadiana!

25/05/2026

2 Samoela 1.1-16
HITADY SITRAKA @ OLONA VE?

📖Tsara ho fantatra fa ao amin’ny ISamoela 1:31 dia misy ny tantara nahafaty an’i Saoly ary dia mitohy amin’izay indray ity tantara eto ity. Tsy nahafantatra tokoa Davida hoe maty I Saoly satria araka ny hita eto dia nanafika ireo Amalekita izy ka nitoetra roa andro tao Ziklaga.

✅Ka raha ny tantara an’ilay Amalekita eto dia toa tsy mitovy amin’ilay voalaza ao amin’ny ISamoela satria ny voaloaza ao dia namono tena i Saoly. Nefa eto dia milaza ilay Amalekita fa izy no namono an’I Saoly. Eny azo lazaina tokoa hoe namono tena ihany izany satria toa nampaniraka ilay amalekita izany izy hamono azy.

✅Haintsika ihany koa anefa ny tantaran'i Saoly izay efa nikasa hamono an’I Davida. Kanefa rehefa fanatr’i Davida hoe maty I Saoly dia tsy nitondra hafaliana ho azy akory izany, fa dia nitomany an’i Saoly sy Jonatana sy ireo olona maty izy. Ary ho fanehoana io alahelo io dia nandrovitra ny akanjony sy nifady hanina ihany koa izy.

✅Maro anefa ny olona raha teo amin’ny toeran’I Davida no mety ho faly satria maty ilay olona nikasa hamono, ary mety ho izay ve no nilazan’ity Amalekita ity io vaovao io an’I Davida? mety nitady sitraka ve izy?

❌❌Mety gaga tokoa angamba ilay amalekita nahare ity fanontaniana :
⏩Avy aiza ianao?
⏩Nahoana ianao no tsy natahotra hanainga ny tànanao hamono ny voahosotry NY TOMPO?

Satria ny zava-dehibe tokoa dia tsy ny hoe maty ny fahavalo, fa hoe sitrakiny TOMPO ve ny zava-mitranga. Nataony Davida mazava tsara eto fa :
⏩⏩"Satria ny vavanao ihany no efa niampanga anao hoe: Izaho no namono ny voahosotry NY TOMPO".

Eny tokoa! Indraindray tokoa ve isika toa mitady sitraka na mihevitra hoe ‘tsara ity zavatra ataoko ity’ ka dia hadinontsika ny manontany tena hoe sitrakiny TOMPO ve izy ity sa hahazoko tombotsoa fotsiny ihany.

Toa maro mantsy ny zavatra toa tsara raha jerena haingana nefa toa lamba mihosin-dra ihany izany raha ho an’Andriamanitra.

⏩⏩Ny an’i Davida kosa eto dia tsy ny tombotsoany no hitany voalohany fa ny hoe : "Nisy namono ilay voahosotry NY TOMPO". Ka mila mihatra ny fahamarinana.
Ka toa mampatsiharo an’I Jeso izay nivavaka ho’izay nampijaly Azy.

❌❌Satria tsy ny valifaty sy ny tombotsoa no tadiavin’ny zakan’Andriamanitra fa ny hahatanteraka ny sitrapony.❌❌

25/05/2026

2Samoela 1:1-16
Ny nandrenesan’i Davida ny fahafatesan’i Saoly
1Taorianan’ny nahafatesan’i Saoly, rehefa niverina avy nanafika ny Amalekita i Davida, dia nitoetra roa andro tao Ziklaga izy. 2Tamin’ny andro fahatelo dia indro, nisy lehilahy iray tonga avy tany amin’ny miaramilan’i Saoly, rovidrovitra ny akanjony sady nihosin-tany ny lohany; rehefa tonga teo amin’i Davida izy dia niankohoka tamin’ny tany ka nitsaoka azy. 3Hoy i Davida taminy: Avy taiza moa ianao? Dia hoy izy taminy: Afaka nandositra avy tany amin’ny tobin’ny Israely aho. 4Hoy i Davida taminy: Inona no zava-nitranga tany? Miangavy anao aho, ambarao amiko. Dia hoy izy: Nandositra tamin’ny ady ny olona ary be koa ny miampatrampatra sy maty; maty koa i Saoly sy Jonatana zanany. 5Ary hoy i Davida tamin’ilay zatovo izay nanambara taminy: Ahoana no nahafantaranao fa maty i Saoly sy i Jonatana zanany? 6Dia nanambara taminy ilay zatovo hoe: Sendra tao an-tendrombohitra Gilboa aho no indro i Saoly nitehina tamin’ny lefony; ary indreo, ny kalesy fitondra miady sy ny mpitaingin-tsoavaly nanenjika azy mafy. 7Dia niherika izy ka nahita ahy; ary niantso ahy izy ka hoy aho: Inty aho. 8Dia hoy izy tamiko: Iza moa ianao? Dia hoy aho taminy: Amalekita aho. 9Hoy indray izy tamiko: Miangavy anao aho, manatòna ka vonoy aho fa fanina, nefa mbola ato anatiko ihany ny aiko. 10Dia nanatona azy aho ka namono azy, satria fantatro fa tsy ho velona intsony izy taorianan’ny nahavoa azy; dia nalaiko ny satroboninahiny teo an-dohany sy ny fehin-tanana teo amin’ny sandriny ka nentiko etỳ amin’ny tompoko izany.
11Dia noraisin’i Davida ny fitafiany ka notriariny; dia mba nanao toy izany koa ny olona rehetra teo aminy. 12Nisaona sy nitomany ary nifady hanina izy ireo mandra-paharivan’ny andro noho ny amin’i Saoly sy i Jonatana zanany sy ny olon’NY TOMPO ary ny taranak’Israely satria lavon-tsabatra ireny.
13Hoy i Davida tamin’ilay zatovo izay nanao tatitra taminy: Avy aiza ianao? Ary hoy izy: Zanaky ny vahiny amalekita aho. 14Dia hoy i Davida taminy: Nahoana ianao no tsy natahotra hanainga ny tananao hamono ny voahosotry NY TOMPO? 15Dia niantso zatovo iray i Davida ka niteny hoe: Manatòna dia vonoy io; dia nasiany izy ka maty. 16Ary hoy i Davida taminy: Aoka ho eo amin’ny lohanao ny ranao, satria ny vavanao ihany no efa niampanga anao hoe: Izaho no namono ny voahosotry NY TOMPO.

24/05/2026

24/05/2026

Asan'ny apostoly 2:1-13
NILATSAHAN'NY FANAHY MASINA

✅Nivory tao Jerosalema ny mpianatra sy ny olona avy @ Firenena Maro samihafa mba hankalaza ny Pentecôte na fetin'ny voaloham-bokatra. Anisan'ny voaloham-bokatry ny Fanahy Masina ireto olona ireto.

✅Ny Firotsahan'ny Fanahy masina dia fahatanterahan'ny tenin'i Jesoa Kristy ao @ 1:8 sy Jao 14:16-18:
- Manome hery ny mpianany izy hahatanteraka ny asany,
- Momba azy ireo mandrakariva (mitoetra miaraka aminy) sy ireo zay rehetra mino an' i J.K.

✅Mandrava ny fisarahana nisy nanomboka t@ tilikambon'i Babela ny Fanahy masina:
☑Fisarahana eo @ samy olona Tsy nitovy fiteny teo @ ireto olona ireto kanefa nohon'ny asan'ny Fanahy masina t@ Apostoly dia rava izany tsy fifankazahoana izany

☑Fisarahana t@ Andriamanitra:
Lasa afaka mahafantatra ny asan'Andriamanitra ireto olona rehetra ireto (mahalala ny famonjena) Ka tsy ho an'ny Jiosy irery intsony, ilay firenena nofidin'Andriamanitra, izany famonjena izany fa ho an' ny olona rehetra

24/05/2026

Asan’ny Apostoly 2:1-13
ANY JEROSALEMA
Ny nirotsahan’ny Fanahy Masina
1Nony tonga ny andro Pentekosta, dia teo amin’ny toerana iray izy rehetra. 2Ary nisy feo tonga tampoka avy tany an-danitra toy ny rivotra mahery mifofofofo ka nanenika ilay trano niangonany. 3Ary nisy lela maro mitarehin’afo niseho taminy, izay nizarazara, ary nipetraka tamin’izy rehetra isan’olona. 4Dia samy feno ny Fanahy Masina izy rehetra ka niteny tamin’ny fiteny maro samihafa, araka ny nampitenenan’ny Fanahy Masina azy.
5Nisy Jiosy nonina tany Jerosalema; olona mpivavaka tsara avy tany amin’ny firenena rehetra ambanin’ny lanitra izy ireo. 6Rehefa niely izany feo izany dia olona maro no vory sady very hevitra, satria samy nahare azy ireo niteny tamin’ny fiteniny avy izy rehetra. 7Dia talanjona sady gaga izy ireo ka niteny hoe: Indreo, tsy Galiliana va ireo rehetra miteny ireo? 8Koa ahoana no andrenesantsika azy amin’ny fitenintsika avy izay nahabe antsika, 9isika izay Partiana, Mediana, Elamita, mponina any Mezopotamia, Jodia, Kapadokia, Ponto, Azia, 10Frigia, Pamfilia, Ejipta sy ny faritr’i Libia izay manodidina an’i Kirena, ary vahiny avy any Roma, 11Jiosy sy prozelita, Kretana, Arabo, koa ahoana no andrenesantsika azy ireo miteny amin’ny fitenintsika avy ny asa lehibe ataon’Andriamanitra? 12Dia talanjona izy rehetra sady sahiran-tsaina ka nifampiresaka hoe: Inona no tokony ho hevitr’izany? 13Ny sasany kosa dia nihomehy sady niteny hoe: Mamon-divay mamy ireo.

23/05/2026

Filemona 15-25
FIFANKATIAVAN'NY MINO: mihoatra ny fenitr’izao tontolo izao ny fiarahan’ny mpino.

Amin’ity tapany-2 ity, dia hijery kokoa ny lafiny pratika isika. Koa andeha haka ny toeran’ny tsirairay voakasik’ity olana ity, hianatra fiainana amin’izy ireo.

1⃣Raha Paoly isika:
🧓❌Tsy amin’ny lafiny maha Apostoly azy, fa @ ilay hoe nitantarana olana. Rehefa avy nihaino ilay manana olana, tsy mitsara izy, fa ny famerenana ilay olona amin’Andriamanitra, amin’ny filazantsara aloha no nataony lohalaharana. Ny filazantsara ihany no manova olona (10-12).

❌❌Arakarakiny hikitikitihana ilay olana ivelan’ny filazantsara no mampihisatra ny fivoahana ao satria tsy mahay manao na inona na inona isika raha misaraka amin’i Kristy (Jn 15.5). Izay no fanehoany fitiavana taminy mialohan’ny fanampiany azy hanao dingana hanantona ilay olona voaratra (Filemona) (13-17).

2⃣Raha Onesimosy isika:
🥹❌Izany hoe, isika ilay nanao fahadisoana, tsy mandeha irery izy eto fa mitady rahalahy mahatoky toa an’i Paoly (10) sy Tykiko (Kol 4.7-9). Nanantona avy hatrany ilay nanaovana fahadisoana izy. Niaiky. Izay no voa mendrika ny fibebahana nasehony (10-12; Col 4.9)

3⃣Raha Filemona isika:
🧐❌Isika ilay naratra niharan’ny fahadisoana. Nikolokolo toe-po vonona hamela mandrakariva sy hamboly fifandraisana vaovao izy (17) anaty sitrapon’Andriamanitra (21), ary handeha lavitra aza (21-22). Famelana madio tanteraka vokatry ny fitiavana.

⏩Efa voalazantsika tao amin’ilay tapany voalohany ny anton’ireo.

❌❌Izao anefa, tsy vita izany raha tsy misy fototra. Ny iorenan’ireo rehetra dia izay nataon’i Kristy (18-19). Manonitra ny fahadisoany i Onesimosy, saingy Paoly no manao izany eo amin’ny toerany. Sarin’ny nataon’i Kristy ho an’ny olony. Tonga Izy, nitondra ny otan’ny mino ary nandoa feno ny onitra rehetra sazin’ny otan’izy ireo t@ fahafatesany teo amin’ny hazo fijaliana.

⏩⏩Vokany, voavela tanteraka ary mandrakizay ny helok’izy ireo rehetra. Satria, na dia efa zanak’Andriamanitra malaza amin’ny finoana toa an’i Filemona aza (4-7), dia tsy ampy ny mahalala, fa mila ny fahasoavan’Andriamanitra, miasa amin’ny fanahin’ny mino (25). Izany hoe ilay finiavana hanapakevitra sy maha olona feno mihitsy no mila ny fahasoavan’Andriamanitra isan’andro, raha tsy izany mijanona ho fahalalana fotsiny izany.

❓❓❓Inona no ota mahamenatra indrindra vitanao? Efa navelan’i Kristy izany, raha mino ianao (Rm 8.1). Izany no manala ny tahotry ny mino sy miaina marina ny fifamelana. Fahasoavana fa tsy ezaky ny tena. Izany hoe fanomezan’Andriamanitra ny fankatoavana.

😍🥰Tsara ny Tompo, fanomezana tsy mendrika antsika ny “fahasoavana”, ny fahafahana manao ny sitrapony na sarotra aza izay lalovana. Satria tia antsika Izy, dia afaka mianatra mitia ihany koa isika na aiza amin’ireo toerana telo ireo no misy antsika na aiza.

23/05/2026

Filemona 15-25
15Izany angamba no nialany vetivety teo aminao mba hanananao azy mandrakizay, 16tsy ho toy ny andevo intsony anefa fa mihoatra noho ny andevo: Rahalahy malala indrindra ho ahy izy, mainka fa ho anao, na ao amin’ny nofo na ao amin’ny Tompo. 17Koa raha ataonao fa namanao aho dia raiso toa ahy izy. 18Raha nanao izay tsy marina taminao izy na nitrosa taminao dia ataovy ho anjarako izany. 19Izaho Paoly no manoratra izany amin’ny tanako, izaho no handoa izany, mba tsy hilazako aminao fa ianao mihitsy indray no manan-trosa amiko. 20Eny, ry rahalahy, mba ataovy ho fifaliako avy aminao ao amin’ny Tompo izany; ampandrio ny saiko noho ny amin’i Kristy.
Hafatra sy fanaovam-beloma
21Noho ny fahatokiako fa hanaiky ianao no anoratako aminao, koa fantatro fa hanao mihoatra noho izay lazaiko aza ianao. 22Ary izao koa: Mba anomany efitrano hitoerako aho; fa manantena aho fa hahazo fahafahana noho ny vavaka ataonareo.
23Manao veloma anao i Epafra, mpifatotra namako ao amin’i Kristy Jesosy, 24i Marka, i Aristarko, i Demasy ary i Lioka, mpiara-miasa amiko.
25Ho amin’ny fanahinareo anie ny fahasoavan’i Jesosy Kristy Tompo.

22/05/2026

Filemona (tapany voalohany)
FIFANKATIAVAN'NY MINO : mihoatra ny fenitr’izao tontolo izao

✅Idovirantsika raha azo atao ny olana amin’ny rahalahy. Angamba ny mino tsirairay, teo amin’ny fiainany, indray mandeha farafahakeliny, efa teo amin’ny iray amin’ireto toerana ireto:
1⃣Na Paoly : Tsy maha Apostoly azy akory fa ilay lafiny hoe itantaran'ny mpino iray ny olana manjo azy (10)
2⃣Na Onesimosy : Nanao fahadisoana tamin’ny mpino iray (15, 18-19)
3⃣Na Filemona : Niharan’ny fahadisoana nataon’ny olona iray. (15, 18-19)

Sady “grave” no sarotra ity tranga eto ity satria :
📌i Onesimosy dia andevon’i Filemona. Tamin’izy tsy mbola mpino, dia sady namitaka no nitsoaka io tompony io. (16)
📌i Filemona, Tompo mpanakarena mitondra fiangonana ao kolosia (1-2). Asaina mamela ka mandray an’i Onesimosy indray, mihoatra noho ny andevo, satria efa niova fo izy. (16)
📌i Paoly koa tafiditra amin’ity raharaha ity satria ao aminy no mipetraka ilay andevo namitaka sy nitsoaka ny tompony (10).

✅Hafa ity tranga ity, satria fifandraisana tamin’ny olona 2 talohan’ny niovan’iray fo. Kanefa nosoratany ho an’ny fiangonana, noho izany, natao ho an’ny mino satria tenin’Andriamanitra (And 1-2).

⏩Amin’ity tapany voalohany ity, andeha hijanona hatreo amin’ny andininy faha 14 ihany isika. Tena iray mandrakizay ny mpino na inona na inona olana lalovan’izy ireo (1-3).
⏩Amin’ny fotoana rehetra, ny fiainan’ny mpino iray ny sitrapon’Andriamanitra toy ny laza tsaran’ny finoana ananan’i Filemona (4-7) dia mampitombo ny fiombonana sy mamelombelona ny hafa (6) satria io no toerana tsara indrindra ho an’ny mino (8).
⏩Anaty fotoan-tsarotra, ny fiverenana marina amin’ny filazantsara foana no fototra, tahak’izay nataon’i Paoly tamin’i Onesimosy (10) ary manantona ny hafa hanao ny sitrapon’Andriamanitra amin’ny fitiavana fa tsy amin’ny teritery (14).

❓❓Ahoana ary no fampiharana niatrehan’izy ireo ity olana ity?

⏩Amin’ny tapany faharoa, hipetraka eo amin’ny toeran’izy ireo tsirairay isika ary hijery izay ahafahany miaina marina ny sitrapon’Andriamanitra tao anatin’izany.
Fa hatreto aloha, efa nandray ny filazantsara marina ve ianao ka isan’izany ankohonan’Andriamanitra miaina ny fitiavana mihoatra noho ny fenitr’izao tontolo izao izany?

🥰Andeha hidera an’Andriamanitra satria novainy noho ny filazantsara isika ka afaka hitia ny hafa tahaka ny nitiavany antsika, ny fahamarinan’ny filazantsara no entintsika miatrika ireo olana atrehintsika.