Assemblée de Dieu Anosibe - Iraka feno fahasoavana

10/06/2026

"Mivavaha, ka aza mitsahatra" (1 Tesaloniana 5:17).

Enga anie ity Tenin'Andriamanitra ity hampahery antsika hitoetra mandrakariva ao anatin'ny vavaka. Na amin'ny fifaliana na amin'ny fahasarotana, aoka isika hifikitra hatrany amin'Andriamanitra amin'ny alalan'ny vavaka.

Hotahian'ny Tompo anie isika rehetra. 🙏

09/06/2026

"Enga anie ka ho azoko izay angatahiko, ary homen'Andriamanitra ahy anie izay iriko". (Joba 6:8)

08/06/2026

" Fotoana fiderana sy fanompoam-pivavahana tao anatin'ny fanatrehan'i Tompo." (Alahady 07 jona 2026)

- Culte béni
- Blessed worship service
- Thank you Missionary Doug Lowenberg and Missionary Jim Thacker

07/06/2026

⏰Alahady 07 Juin 2026
🚨Lohahevitra: Mpamonjy izao tontolo izao Jesosy
📕 Mpitory teny: Dr Doug Lowenberg

Matio 15:21-28
📌80 km no elanelan’i Galilia sy Tyro sy Sydona. Programan’i Jesosy mihintsy no andeha ho any fa tsy kisendrasendra. Anisan’ireo kananita izay tsy voaraoka tamin’ny nanafihan’i Josoa ny tany Kanana ireo.
📌Nanantona an’i Jesosy ity vehivavy ity nohon’ny fampahorian’ny demonia ny zanany. Nanantona am-panetren-tena an’i Jesosy izy ary niaiky ny maha- Tompo sy Mesia Azy. Tsy namaly ilay vehivavy akory aloha Jesosy
📌Tsy ilay vehivavy ihany no voaresaka ao amin’io tantara io fa ny mpianatra ihany koa. Tian’i Jesosy homanina izireo ho amin’ny iraka ampanaovina azireo rehefa hiakatra ho any an-danitra Izy. Ny mpianatra tonga dia nanilika azy sy niezaka nandroaka azy satria nihevitra izireo fa tonga ho an’ny jiosy irery ihany Jesosy. Mbola tsy nanana toe-tsaina vonona ho amin’ny iraka lehibe izireo. Mbola nisy fanavakavahana tao anatin’izireo. Nanaiky ny fombafomba napetraky ny fariseo mikasika ny fanasana tanana aza izireo fa tsy tena nanaiky ny hevitr’i Jesosy. Nanazava Izy fa Andriamanitra mijery ny fo satria io no mahaloto ny olona eo anatrehan’ Andriamanitra fa tsy izay miditra amin’ny vava. Noraisin’izireo tahakan’ny olona maloto ny hafa firenena izay manompo sampy.
📌Namaly Jesosy fa tsy tonga afa-tsy ho an’ny ondry very tao amin’ny taranak’israely. Tsy ilay vehivavy no novalian’i Jesosy teto fa ny mpianatra. Nolazainy izany mba hampisehoana ny fiheveran-diso tao anatin’ izireo. Tsy marina anefa izany satria tonga ho an’izao tontolo izao ary tia ny olona rehetra hovonjena Jesosy fa tsy hoe ny jiosy ihany.
📌 Nanakaiky amin’izay ilay vehivavy ka namaly azy Jesosy hoe tsy tokony omena ny amboakely ny mofon-jaza. Nihevitra ny mpianatra fa izireo ihany no zanak’ Andriamanitra ka mendrika ny hihinana amin’ny latabatra ary ilay vehivavy kosa no amboakely tsy manana anjara amin’izany.
📌Namaly anefa ilay vehivavy hoe marina izay nolazain’i Jesosy kanefa ny amboakely aza dia mihinana izay sombintsombiny latsaka amin’ny latabatry ny tompony. Nino ity vehivavy ity fa manana fahasoavana sy famonjena ary hery lehibe loatra Andriamanitra ka na ny ampahany amin’izany ihany aza no azony dia ampy ho azy.
📌Niaiky Jesosy fa lehibe ny finoan’ity vehivavy ity satria nino izy fa mihoatra ary tsy azo refesina sy tohaina ny hery sy fahefana nananan’i Jesosy mba hamonjy sy hanafaka. Tsy noferan’ity vehivavy ity tao anaty boaty Jesosy. Nino izy fa mihoatra lavitra noho izay fetra rehetra apetraky ny olona Jesosy.
📌Ny mpianatra kosa dia netin’i Jesosy tany mba hanahaka Azy ka ho tia ny olona rehetra. Tokony hijery ny olona rehetra amim-pitiavana isika ka hangoraka ny olona izay lavitra an’ Andriamanitra fa tsy hanilikilika azireo. Tian’i Jesosy hiova ny toe-tsaintsika fa tsy natao ho an’ny olona manokana ihany ny filazantsara fa ho an’ny olona rehetra. Mpamonjy ny olona rehetra Jesosy.

31/05/2026

Fotombavaka Alahady maraina - Fetin'ny Reny

“ Tahaka ny olona ampiononin-dreniny No hampiononako anareo; Eny, ao Jerosalema no hampiononana anareo.”
(‭‭Isaia‬ ‭66‬:‭13)

🌷 Mirary soa ho an'ny Reny rehetra 🌷

31/05/2026

⏰Alahady Fetin’ny reny 2026
🚨Lohahevitra: Fitondran-tenan’ny vehivavy kristiana
📕 Romana 12:14-21.
🎤Mpitory teny: Pr Robertine

📌Sarotra ny mitondra tena tsara satria:
📍Galatiana 5:17.
Ny nofo miady amin’ny fanahy.
Romana 12:2.
📍Izao tontolo izao dia mitaona antsika hanao ratsy. Fomba eto amin’izao tontolo izao ny fampirafesana kanefa tsy tokony ho fombantsika.
📍Matio 7:14.
Ny lalana mankany amin’ Andriamanitra mihintsy no tery. Tsy tia fifehezana isika fa te hanao izay tiantsika. Tsy maintsy mifankatia isika na dia misy manafintohina aza.

📌Inona no olana ao amin’ny fitondran-tena?
📍Resin’ny ratsy ny olona.
-Misy mamaly ratsy ny ratsy.
2 Samoela 13. Amnona dia nanao tetika ratsy mba hanolana an’i Tamara izay anabavin’i Absaloma. Tezitra Absaloma dia namono an’i Amnona. Samy ratsy avokoa ireo. Tsy hoe mety daholo ny ataon’ny olona any an-tananantsika any kanefa tsy tokony hamaly ratsy isika.
-Manozona izay manozona azy
Misy na ny zanany aza nozoniny. Tsy mety amintsika ny manozona.
2 Mpanjaka 2:23-24. Elisa nanozona ireo ankizilahy maromaro izay nanabiraby azy ka nisy bibidia namiravira azireo. Mila mitandrina isika tsy hanao tsinontsinona mpanompon’ Andriamanitra. Tsy tokony hanao tahaka izany isika kristianina satria tsy tokony ho faly ny amin’ny fahavoazan’ny olona.
📍Misy olona tia mamaly faty.
Romana 12:17.
Andriamanitra no tokony hamaly fa tsy isika. Namaly ratsy an’i Sekema i Simeona sy Levy nohon’ny nataony tamin’ny anabaviny. Ny azontsika atao dia ny mivavaka ho an’izay manisy ratsy antsika.
📍Misy olona tarihin’ny fahatezerany.
Abela tsy nanao na inona na inona kanefa ny fahatezeran’i Kaina no nitarika ny fahafatesany.

📌Inona no vahaolana:
📍Reseo amin’ny soa ny ratsy.
Romana 12:21.
📍Asain’ Andriamanitra misaotra izay manozona antsika isika.
Josefa dia tsy namaly faty sady tsy nanozona ireo rahalahiny na dia mafy aza ny nataon’ireo taminy. Tsapan’i Josefa aza fa ny ratsy izay nataon’izireo dia navadik’ Andriamanitra ho soa.
📍Romana 12:21.
Omeo rano sy hanina ny fahavalonao. Asio soa ho valin’ny ratsy natao taminao. Nisy fotoana ny miaramilan’i Syria dia nanaovan’ny zanak’israely sakafo ka tsy sahy nanafika azireo na dia fahavalony aza.
📍Aoka ho tia fihavanana
Romana 12:16; 18.
Ny mpiandry ondrin’i Abrahama sy Lota dia niady fa i Abrahama kosa nanetry tena nanantona sy nandamina.
📍Mila miezaka miray saina isika.
Asa 4:22. Niray saina ny fiangonana voalohany. Na dia nisy tsy nahafaly aza tao amin’ireo fiangonana voalohany dia nifankatia izireo. Tenan’ i Kristy isika. Na dia mamoaka zavatra hafahafa aza ny orona dia tiantsika foana.

29/05/2026

🎉Sary Fitsangatsanganana Alatsinainin’ny Pentekosta.
🎁“Endrey, tsara sady mahafinaritra Raha ny mpirahalahy no miara-monina. Tahaka ny ando any Hermona, izay milatsaka amin'ny tendrombohitra Ziona; Fa voadidin'i Jehovah ho eo ny fitahiana, Dia fiainana ho mandrakizay.”
‭‭Salamo‬ ‭133‬:‭1‬, ‭3‬

28/05/2026

🚨Fintina an-tsary Alahadin’ny Pentekosta (fidirana faharoa)
🌹“Ary samy feno ny Fanahy Masina izy rehetra, ka dia niteny tamin'ny fiteny maro samy hafa, araka ny nampitenenan'ny Fanahy Masina azy.”
‭‭Asan'ny Apostoly‬ ‭2‬:‭4‬
📷Joella Randria - Photographer

25/05/2026

24/05/2026

⏰Alahadin’ny Pentekosta 2026
🚨Lohahevitra: Hitsoka indray ny rivotry ny Fanahy Masina
📕 Mpitory teny: Pr Joasy

📌Asa 2:1-4. Jaona 3:8.
Rivotra nifofofofo be tamin’ny andro pentekosta. Ny toetr’andro sy ny tontolo iainantsika miankina betsaka amin’ny rivotra. Rehefa cyclone dia ny rivotra no tena olana raha oharina amin’ny ranonorana. Rehefa mankany ambany vohitra dia hafa mihintsy ny rivotra satria madio. Ny rivotra hiainantsika eto an drenivohitra na anisan’ny antony mahatonga ny aretin’ny taovam-pisefoana rehetra io. 3 minitra tsy mifoka rivotra ny ankamaroantsika dia efa tsy velona intsony. Ny rivotra dia manan-danja be eo amin’ny fiainantsika na dia tsy hitan’ny masontsika aza. Ny rivotry ny Fanahy dia manan-danja be mihoatra lavitra noho izany eo amin’ny fiainantsika manokana sy ny fiangonana. Tahakan’ny rivotra no ampitahaina ny Fanahy Masina

📌Karazana rivotra 4 no resahan’ny Baiboly.
📍Rivotra avy any atsinanana
Eksodosy 10:13.
Nitondra fitsarana sy faharavana izany.
📍Rivotra avy any andrefana
Eksodosy 10:19.
Manambara ny fanafahana sy ny fanavaozana avy amin’ Andriamanitra.
📍Rivotra avy any avaratra
Ezekiela 1: 4.
Rivotry ny fahatsarana sy ny voninahitr’ Andriamanitra.
📍Rivotra avy any atsimo:
Lioka 12: 55 Ary raha avy any atsimo ny rivotra, dia hoy ianareo: Hafana ny andro; dia tonga izany.
Io dia rivotra mialohan’ny hisian’ny fiovana.
Rivotra avy any an efitra io ka misy hafanana be avy eo. Rivotra mialohan’ny fiiovana.

📌Andriamanitra ny mifehy ny rivotra rehetra.
📍Salamo 148: 7. Matio 8:26.
Niteny fotsiny aza Jesosy dia nangina ny rivotra. Ny rivotry ny fanenjehana vao mainka nahatonga ny fiangonana voalohany nandeha nitory filazantsara. Ny fahasarotana dia vao mainka manosika antsika hanompo an’ Andriamanitra
Misy rivo-doza mitsoka eo amin’ny fiainanao. Aza matahotra Andriamanitra no manjaka amin’ny rivotra sy ny ranomasina.
Rehefa amin’ny fotoana tsara eo amin’ny fiainanao dia tsara Andriamanitra. Amin’ny fotoana ratsy eo amin’ny fiainanao dia mbola tsara foana Andriamanitra. Na inona rivotra mitsoka eo amin’ny fiainanao dia mahery nohon’ny rivotra rehetra eo amin’ny fiainanao Andriamanitra.
📍Misy rivotra avy any atsinanana nalefan’ Andriamanitra hitondra ny valala fa avy eo nisy rivotra avy any andrefana nalefany hanaisotra ny valala. Hain’ Andriamanitra ny mamadika izay rivotra mitsoka eo amin’ny fiainanao. Raha rivotry ny fahangahatsiahana ara-panahy dia hampitsoka rivotry ny firehetana ara-panahy indray izy. Raha rivotry ny faharatsiana dia hampitsoka rivotry ny fahamarinana. Raha rivotry ny tahotra dia hampitsoka rivotry ny fahatokiana an’ Andriamanitra Izy.
Raha rivotry ny disadisa ao an-tokantrano dia hampitsoka rivotry ny fiadanana sy fifankatiavana indray. Rivotry ny tsy fahombiazana, rivotry ny fanambinana. Raha rivotry ny aretina sy ny fahafatesana avadik’ Andriamanitra ho rivotry ny fanasitranana sy ny fahavelomana.

📌Rehefa mitsoka ny rivotry ny Fanahy
📍Mameno
Mameno ivelany sy anatiny ny rivotry FANAHY MASINA. Nanenika ny trano niangonany dia nameno azireo
Galatiana 5:22-23
Vokatra iray ihany ireo fa tsy hoe mizarazara. Rehefa feno ny Fanahy Masina ianao dia miaraka mameno anao ireo vokatra ireo. Tsy fitiavan-tena intsony no mameno anao fa fitiavana an Andriamanitra sy ny hafa. Tsy fitiavam bola intsony fa fahalalahan-tanana. Tsy avonavona sy fahotana intsony fa ny fanatrehan’ Andriamanitra.
📍Mampiteny:
1 Korintiana 14:2, 4
Izay te handroso dia miteny amin’ny fiteny tsy fantatra. Vao mainka mitsoka ny rivotry ny Fanahy rehefa miteny amin’ny fiteny tsy fantatra ianao. Mazotoa miteny amin’ny fiteny tsy fantatra na aiza na aiza misy anao. Tsy ny paozinao mivavaka no mahakasika an’ Andriamanitra fa ny fonao mifandray aminy. Mila mitsoka indray eo anivon’ny tokantranontsika ny Fanahy Masina.
📍Mampandroso ny hafa
Asan'ny Apostoly 2:14
Vao feno ny Fanahy izireo tonga dia ny hitory an’i Jesosy amin’ny hafa no tao am-pony sy tao an-tsainy. Tonga dia ny hizara ny zavatra tsara izay nananany. Mitondra hetsika ho an’ny fanjakan’ Andriamanitra ny fahafenoan’ny Fanahy. Tsy maintsy mihetsika ho an’ny fanjakan’ Andriamanitra ny olona tena feno ny Fanahy. Mihetsika miaraka amin’ izay ireo fanomezam-pahasoavana rehetra. Mila avelantsika mitsoka araka izay tiany ny rivotry ny Fanahy Masina.