11/12/2020
දැයම අවදි කල සෝම සමිදුන් අභිරහස් ලෙස අපවත් කර වසර 17 යි..!
මෙරට කිසි කලෙක නොවූ විරූ පරිදි මිත්යාදෘෂ්ටික මතයන්ගෙන් ගහණ වූ සමයක මෙරට බෞද්ධ ජනතාවගේ පිනට පහළ වූ බුද්ධ පුත්රයන් වහන්සේනමක් ලෙස ගංගොඩවිල සෝම හිමි හඳුන්වා දිය හැකිය.
වර්ෂ 1948 බක් මස 24 දින ධර්මදාස පියාණන්ට හා චාලට් වීරතුංග මෑණියන්ට දාව මෙලොව එළිය දුටු සෝමරත්න දරුවා කුඩා කල සිටම දහමට නැඹුරුවීමක් දක්නට ලැබුණි. විසුද්ධි මාර්ගය, සද්ධර්ම සාගරය. අංගුත්තර නිකාය වැනි ගැඹුරු දහම් ග්රන්ථ පරිශීලනයට දැඩි නැඹුරුවක් දැක්වූ සෝමරත්න දරුවා වයස 26 වන විට ජීවිතයේ සැබෑ යථාර්ථය තේරුම් ගනිමින් අම්පිටියේ රාහුල සහ අග්ගමහා පණ්ඩිත මඩිහේ පඤ්ඤාසීහ මහා නාහිමි දෙපළගේ සෙවනේ ගංගොඩවිල සෝම නමින් සසුන් ගත විය. නායක හිමිවරුන්ගේ පා සෙවනේ මැනවින් දහම් කරුණු උගත් සෝම හිමියෝ විචිත්ර ධර්ම දේශකයාණන් වහන්සේ නමක් බවට පත්වූහ.
උන්වහන්සේගේ ධර්ම දේශනා විලාසය අනෙකුත් දේශකයාණන් වහන්සේලාට වඩා සුවිශේෂී මුහුණුවරක් ගත් දේශනා විලාසයක් වූහ. ධර්ම දේශනාව මුල සිට අග දක්වාම අසා සිටින අයට නීරසක් නොවන අයුරින් හා ධර්මය ශ්රවණය කරන පිරිසගෙන් ප්රශ්න අසමින් දේශනාව තුළ ඔවුන් රඳවා ගැනීමේ සුවිශේෂී හැකියාවක් උන්වහන්සේ තුළ වූහ. සාම්ප්රදායික දේශන විලාසයෙන් ඉවත් වූ උන්වහන්සේ කාලානුරූපීව හා දේශානුරූපීව තම ධර්ම දේශනා පැවැත්වූ සේක.
පානදුරේ අරියධම්ම ස්වාමීන් වහන්සේගෙන් පසු විශාල පිරිසක් ධර්ම ශ්රවණය කිරීමට පැමිණියේ නම්, ඒ අපේ ගංගොඩවිල සෝම හිමියන්ගේ බණ ඇසීමට යැයි මා පැවසුවහොත් කිසිවකු එයට විරුද්ධ නොවනු ඇත. සෝම හිමියන්ගේ ධර්ම දේශනා සඳහා මෙරට බෞද්ධයන් මෙන්ම විදෙස් රටවල බෞද්ධයන් ද වැල නොකැඩී පැමිණියහ.
මහරගම සිරි වජිරඥාන ධර්මායතනයේ තරුණ සීල සමාදානය පාදක කරමින් ඇරඹි තම ධර්ම දූත සේවා මෙරට පමණක් නොව විදේශයන්හි පවා පතුරුවා හැරීමට උන්වහන්සේ කටයුතු කළහ. එහි ප්රතිඵලයක් වශයෙන් 1986 වසරේ දී ඕස්ට්රේලියාවට වැඩම කළ සෝම හිමියන් එරට වික්ටෝරියා ප්රාන්තයේ බෞද්ධ මධ්යස්ථානයක් ඇරඹූ අතර අපවත් වන තුරුම එහි විහාරාධිපති ධුරය දරන ලදී.
තරුණ ජීවිතය ධාර්මිකව හැඩගස්වා ගැනීම සඳහා අවශ්ය දහම් කරුණු තම ධර්ම දේශනා තුළින් සමාජ ගතකිරීමේ ප්රතිඵලයක් ලෙස අප හිමියන් වටා තරුණ පිරිස් විශාල වශයෙන් එක්රොක් වන්නට වූහ. සෝම හිමි තරුණ හදවත්වලට කොතරම් සමීප ද යන්න උන්වහන්සේගේ ආදාහන පූජෝත්සවය සඳහා නිදහස් චතුරශ්රය වෙත ලක්දිව සිව්දෙසින් පැමිණි තරුණ පිරිස් කදිම සාක්ෂියකි.
අපේ සෝම හිමියන් බෞද්ධයන්ට දේශනා කරන ලද්දේ ගැඹුරු දහම් කරුණු ගැන නොව බෞද්ධයාගේ නිත්ය ශීලය වන පංචශීල ප්රතිපදාව තුළින් පුද්ගල සංවර්ධනය ඇතිකර ගැනීම පිළිබඳවය.
අද්යතනය වන විට ජනතාව බිලිවී ඇති මිථ්යාදෘෂ්ටික මතයන්ට එරෙහිව අප හිමියෝ තම ධර්ම දේශනා තුළින් ජනතාවට සත්යය කුමක් දැයි පැහැදිලි කර දුන්හ. එසේම මූලධර්මවාදීන් විසින් විවිධ වරප්රසාදයන් දෙන මුවාවෙන් මෙරට බෞද්ධ ජනතාව මූලධර්මවාදී ආගම්වලට බඳවා ගනිමින් මෙරට බුදු දහමට මරු පහරක් එල්ල කරමින් සිටියදී ඊට නොබියව මුහුණ දෙමින් මිථ්යාදෘෂ්ටික දර්ශනයන්ගෙන් අන්ධවෙමින් සිටි ජනතාව ඉන් මුදා ගැනීම සඳහා උන්වහන්සේ ගම් නියම්ගම් පුරා සැරිසරමින් ධර්ම ප්රචාරක කටයුතුවල නිරතවෙමින් සද්ධර්මය නැමති කගපතින් මිසදිටු අසුරයන් විනාශ කළහ. සිදුවෙමින් යන මෙම විනාශය පිළිබඳ ප්රසිද්ධියේ විවේචනය කිරීම හේතුවෙන් දැඩි අපහසුතාවයන්ට පවා අප හිමියන් ලක්වූ අවස්ථා නැතුවාම නොවේ.
යහපත් යමක් කිරීමට යාමේදී එම කටයුත්ත සඳහා හිමිවිය යුත්තේ මල් වුව ද ඒ සඳහා එල්ල වනුයේ ගල් ය. එය පසක් කරමින් මීට ඉහත දී පැවසූ පරිදි අප හිමියන්ට ද මල්වලට වඩා එල්ල වූයේ ගල් ප්රහාරයන්ය. එහෙත් එම කිසිම දෙයකින් උන්වහන්සේ අධෛර්යමත් නොවූ අතර ඉන්ද්රඛීලයක් සේ නොබියව තම සසුනට, රටට හා ජාතියට තමා වෙතින් ඉටුවිය යුතු යුතුකම නොපිරිහෙළා ඉටු කළහ.
බෝධි පූජාව හා සෙත් පිරිත්, ධම්ම චින්තා, බුදු ගුණ මෛත්රී ශාන්තිය, මේ විපතින් ජාතිය ගලවන්නට නම්, සෞභාග්යයේ දොරටුව, රාහුල මාතා, දේව සංකල්ප, ධම්ම පදය, ලොව්තුරු සුවඳ හා බුද්ධ ස්ථූප වැනි දහම් ග්රන්ථ රචනය තුළින් ද අපේ හිමියන් බෞද්ධ ජනයා වෙත නිර්මල බුදු දහමේ පණිවුඩය බෙදා දුන් අතර, මිසදිටු වීමෙන් බුදු සස්න වැනසේ, කර්ම නියාමය, වසල සූත්රය, ධර්ම චරියාව, බුදු ගුණ දේශනය, මෛත්රී ප්රතිපදාව – කරණීය මෙත්ත සූත්රය ඇසුරෙන් පවුලේ වගකීම යන කැසට් පට මඟින් ද උන්වහන්සේ ජනතාව වෙත දහම් කරුණු රැගෙන යාමට පියවර ගත්හ. ජනවිජය පදනම බිහිකිරීමේ පූර්වගාමියා ලෙස කටයුතු කරන ලද උන්වහන්සේ ඒ තුළින් දුසිරිතයෙන් තොර සමාජයක් බිහිකිරීමට මහත් වෙහෙසක් ගත්හ. මෙරට අපගේ බෞද්ධ ඉතිහාසය ගත් කළ වාදිභසිංහ, මිගෙට්ටුවත්තේ ගුණානන්ද හිමි, වල්පොල ශ්රී රාහුල හිමි, පානදුරේ අරියධම්ම හිමි වැනි සංඝ පීතෘවරුන්ගෙන් හිස්වූ සසුනේ අවකාශය සපුරන්නට සමත්කමක් ඇත්තා වූ මෑත කාලයේ සිටි එකම සංඝ පීතෘවරයාණන් වූයේ අපේ ගංගොඩවිල සෝම ස්වාමීන් වහන්සේය.
මීට වසර 19 කට පෙර උදා වූ දෙසැම්බර් 12 දින මෙරට මෙන්ම සුවහසක් බෞද්ධ ජනතාවගේම හදවත සසල කළ ඒ මහා මූසල රාත්රිය ඔබට මතක ඇතැයි මම සිතමි. එදිනද වෙනදා මෙන් චන්ද්රයා අහස් තලයේ පායා අන්ධකාරය පලවා හැර තිබූ නමුත් සුවහසක් බෞද්ධ ජනතාවට නම් එදින අමාවක දිනයක්ම විය. මන්දයත් සසුනඹරේ දිලුණු ඒ සුන්දර ප්රභාවත් චන්ද්රයෙකු බඳු වූ අති පූජනීය ගංගොඩවිල සෝම නා සමිඳු මව්බිමෙන් සැතපුම් දහස් ගණනක් ඈත රුසියාවේ සීතල කඳු පන්තියක් අතර අභිරහස් ලෙස තම අවසන් හුස්ම පොද වා තලයට මුදාහැර තිබීමය. අප සෝම හිමියන්ගේ ආදාහන පූජෝත්සවයට පැමිණි ලක්ෂ සංඛ්යාත ජනකායකගේ දෙනෙත්වලින් මළ හිරු බසින සැන්දෑ යාමයේ අප හිමියන්ගේ ශ්රී දේහය ගිනිදැල් වෙළා ගනිද්දී ගලා ගිය කඳුළු ගංඟාවෙන් කියාපෑවේ ඒ සුන්දර සදහම් ස්වරය, ලෝකය පුරා පැතිරී ගිය පිරිත් ස්වරය කවදා නම් නැවත අසන්න ද යන්නයි.
සෝම හිමියන් අපවත් වී වසර 19 ක් ගතවන මේ වසර වන විට නැවතත් විවිධ නම්වලින් අටවාගත් මූලධර්මවාදීන්ගේ අඳුරු සෙවනැලි හොල්මන් කරමින් සිටින බව සඳහන් කළ යුතුය. එමනිසා එවැනි මූලධර්මවාදීන්ගෙන් බුදු දහම ආරක්ෂා කර ගැනීම සඳහා සියලු බෞද්ධයන් පෙළගැසිය යුතු කාලය එළඹ ඇත. එසේ වුවහොත් පමණක් තම ජීවිතය පවා කැපකර සසුනේ උන්නතිය වෙනුවෙන් ක්රියා කළ පූජ්ය ගංගොඩවිල සෝම හිමිගේ නිර්මල පැතුම ඉටුකිරීමට අප සැමට හැකිවනු ඇතැයි මම සිතමි.
අප තිලෝගුරු සම්මා සම්බුදු රජාණන් වහන්සේ විටෙක මෙසේ දේශනා කළ සේක. “ධම්මෝච විනයෝච මමච්ඡයේන සත්ථා.” එනම් එහි තේරුම වන්නේ මාගේ ඇවෑමෙන් ධර්මය හා විනය ශාස්තෘවන්නේය යන්නයි. එසේම අද අපට ද සෝම හිමි නැත. එහෙත් උන්වහන්සේ අප වෙත දායාද කළ මාර්ගයක් ඇත. එම මඟෙහි ගමන් කිරීම අප සැමගේ යුතුකම වන්නේය. දෙසැම්බර් මස 12 දිනට උන්වහන්සේ අපට අහිමිව වසර 19 ක් ගතවුවද ගංගොඩවිල සෝම හිමිගේ ශ්රී නාමය අප සිත් තුළින් නොමැකී පවතිනු ඇත. සඟ රජ පදවි නොලැබුවත්, අපේ කාලයේ නිල නොලත් “සඟ රජ” ලෙස ජනතාව සදාකල් පුද දෙන “සිරි ධම්මරක්ඛිත වංසාලංකාර අනුවිජ්ජක අති පූජනීය ගංගොඩවිල සෝම නා සමිඳුට” අජරාමර නිවන් සුව අත්වේවා! යි පතමි.
----------------------------------------------------
පුජ්ය ගංගොඩවිල සෝම හිමියන් අපවත් කල අයුරු ....
මෑත කාලයේ දැයට පහළ වූ මහා යතිවරයාණෝ අති පූජනීය ගංගොඩවිල සෝම හිමිපාණන් වහන්සේ මූලධර්මවාදී මිසදුටුවන් විසින් අභිරහස් ලෙස අපවත් කර නව වසක් ගෙවුණද මේ වන තාක් එම ඝාතනය පිළිබද පිළිගත හැකි කිසිදු සාධාරණ පරීක්ෂණයක් සිදු වී නැත.
තවමත් ඝාතකයන් නිදැල්ලේය. ඝාතනයේ සියලු සාක්ශීන් මේ වන විටත් මකා දමා ඇතුවාට සැකයක් නැත. නිර්මල බුදු දහම මේ බිමෙන් තුරන් කරවීම සදහා ක්රියාත්මක කුරිරු අදිසි බලවේගය එදාටත් වඩා සක්රීයව අද අප අතරම සැරිසරයි. අදටත් නිශ්චිතවම නොවිසදුනු සෝම හිමි අභිරහස් අපවත් කිරවීම ගැන වෛද්ය බන්දුල සිරිවර්ධන මහතාගේ හෙළිදරව්වයි මේ...
සෝම හිමියන්ගේ අපවත්වීම කුමන්ත්රණයක්.
ගංගොඩවිල සෝම හිමියන්ගේ අපවත්වීම පිළිබඳව තවමත් අපගේ මතය වන්නේ එය ස්වාභාවික මරණයක් නොවේය යන්නයි. එය මගේ පමණක් නොව ලංකාවාසී අති බහුතරයකගේත් අදහසයි. මෙම ඛේදනීය සිදුවීමෙහි කොතනක හෝ වරදක් සිදුවී ඇති බව අදටත් ජනතාව සිතති. නිසැකවම සෝම හිමියන් අභාවප්රාප්ත වූයේ හෘදයාබාධයකින් විය හැකිය. (කෘතිමව ඇති කරන ලද)
එහෙත් කතාන්දරය එතෙකින් නිමාවට පත් නොවේ. බුද්ධිමත් පාඨකයාට මෙම ලිපිය පදනම් වන තර්ක පැහැදිලි කරදෙනුයේ මම මෙහිදී සරල උදාහරණයක් ගනිමි. ඒ මෙසේය. සුනිල් සහ නිමල් මිතුරු වෙසින් සිටින සතුරන් දෙදෙනෙකි. ඔවුහු දෙදෙනාම එක්ව නාන්නට ගියෝය. නිමල්ගේ ප්රමාදයක් බලා සුනිල් නිමල්ව නාන ළිඳට තල්ලු කළේය. අනතුරුව නිමල් මියයන තෙක් බලා සිට කෑ ගසා මිනිසුන් කැඳවා සිරුර ගොඩගෙන හඬා වැලපෙමින් තමාට නිමල් බේරා ගැනීමට බැරි වීම ගැන දුක් වූයේය.
අධිකරණ වෛද්ය නිලධාරී මහතා ඉතා උනන්දුවෙන් පශ්චාත් මරණ පරීක්ෂණය සිදුකර පෙණහළු සියුම් ලෙස විච්ජේදනය කරමින් නිමල්ගේ මරණය දියේ ගිලී මියයාම බව තීරණය කළේය. නිමල්ගේ ප්රකාශය වූයේ මුත්රා කිරීම සඳහා තමා ළිඳ ළඟින් මඳකට ඉවත් වූ අවස්ථාවේදී මෙය සිදුවී ඇති බවය. වෙනත් සාක්ෂි තිබුණේ නැත.
මෙහිදී සිදු වූයේ කුමක්ද? මිනී මැරුමකි. මිනී මැරුමක් බව ඔප්පු කිරීම ඉතා අසීරු මිනීමැරුමකි. නමුත් මරණ පරීක්ෂණය සිදු කළ දොස්තර මහතාද කියන්නේ බොරු නොවේ. නිමල් මියගියේ දියේ ගිලීමෙනි. එය මරණයට හේතුවයි. හුස්ම ගැනීම නතර වී මොළය මියයාම සඳහා සිරුර අභ්යන්තරයේ ඇතිවන හේතුවයි. එහෙත් මරණ පත්කරු මරණයට පත්වීමේ සැබෑ හේතුව ඔහුව ජලයට තල්ලු කිරීමයි.
මේ අයුරින් මරණයට පත්වීමේ හේතුව සොයා ගැනීම සඳහා පොලිසි සහ බුද්ධි අංශ අවශ්ය වේ. තර්කනය සහ සාක්ෂි අවශ්ය වේ.
මෙවැනි තන්හිදී අධිකරණ වෛද්ය නිලධාරිවරයාට කරුණු ඉදිරිපත් කළ හැක්කේ එක්තරා සීමාවක් දක්වා පමණි. ඉදිරිපත් කෙරුණු සාක්ෂිවලින් පෙනී යන්නේ සුව වෙමින් පැවැතැණු හෘදයාබාධයක් හදිසියේ උත්සන්න වීමෙන් සෝම හාමුදුරුවන් අපවත් වූ බවය. හෘදයාබාධයකින් මියයාමත් සුව වෙමින් පවතින හෘදයාබාධයක් හදිසියේ උත්සන්න වීමත් අතර බරපතළ වෙනසක් ඇත. මක්නිසාද යත් දෙවැන්නේ රෝග ප්රතිකාර මාලාවෙහි අසාර්ථකභාවයක්ද ගැබ්විය හැකි බැවිනි.
අද වන තෙක් කිසිවෙකු අධිකරණ වෛද්ය-වාර්තාවට අභියෝග කර නැති බව විශේෂඥ වෛද්යවරයා ප්රකාශ කරයි. එය සත්යයකි. මෙම වෛද්ය වාර්තාව සම්බන්ධව අපට ගැටලුවක් නැත. කලින් කී උදාහරණයේ නිමල් දියේ ගිලී මියයෑම පිළිබඳව වෛද්ය වාර්තාව පිළිබඳව ගැටලුවක් නැති සේමය.
මෙම වෛද්ය වාර්තාවට අභියෝගයක් නැතැයි කීවද හිටපු ජනපතිනිය මේ ගැන සෙවීමට කොමිසමක් පත් කිරීමද ඊට එක්තරා ආකාරයකින් එල්ල වූ අභියෝගයකි. ඇය පත් කළ ත්රිපුද්ගල කමිටුවට ප්රධාන සාධක පහක් ඔස්සේ කරුණු එක් කිරීමට සිදුවිය. සෝම හාමුදුරුවන්ගේ පෙර අසනීප වල සිට ගමනේදී අසනීප වීමත් අවසානයේ අපවත්වීම දක්වාම සියලුම කරුණුද මෙම වාර්තාවේ උන්වහන්සේට විරුද්ධවාදීන් සිටියේද, එසේ නම් කුමන්ත්රණයක් සිදු වූයේද යන්නද මෙහිදී ගැඹුරින් සලකා බැලුණි. කරුණු යෙදුණු ආකාරය පිළිබඳව යම් ආලෝකයක් ලබා ගැනීමට රුසියානු ගමන ආසන්නයේ ලංකාවේදී උන්වහන්සේගේ තිබුණු අරමුණු ගැන මඳක් විමසා බැලීම වටී.
උන්වහන්සේගේ අදහස වූයේ බුදු සසුන බේරා ගැනීමට සහ සිංහලයාගේ අභිවෘද්ධිය සඳහා මහා සංඝයාවහන්සේලාට දේශපාලන බලය අවශ්ය බවය. මේ සඳහා ක්රියාකාරී සැලැස්මක් සෝම හාමුදුරුවෝ වෙත විණි. මේ සැලැස්ම ක්රියාත්මක කිරීමට උන්වහන්සේට මුදල්ද අවශ්ය විණි. එවකට උන්වහන්සේ ලබා තිබූ බොදු ජනතා ප්රසාදයේ කොතෙක්ද යත් ඕනෑම මැතිවරණයකදී උන්වහන්සේට බලය ලබා ගැනීමට හැකි බව මනාව පෙනෙන්නට තිබුණි. එසේම එසේ ලබාගන්නා බලය බෞද්ධයා උදෙසා මනා කැපවීමකින් යෙදවෙන බවද බෞද්ධ ජනතාව සුඛිත මුදිත කිරීමට ස්වාමීන් වහන්සේ එම බලය අනතුරුව යොදවන බවද පැහැදිලි විය. මෙම ලිපියට අදාළ නැති වුවත් මේ ලෙසටම දේශපාලන බලය ලබා ගැනීමට බලාපොරොත්තුව සිටි අවස්ථාවක උපාලි විජේවර්ධන මහතාද අබිරහස් ලෙස අතුරුදහන් විය.) උන්වහන්සේගේ මෙම අදහසම උන්වහන්සේට අභිරහස් සතුරන් නිර්මාණය කළ බව වටහාගත යුතුය.
උන්වහන්සේගේ මොස්කව් ගමන සංවිධානය කළේ සිසිර ජයසේකරය. ඔහු දේවගැතියෙකි. ඔහු හාමුදුරුවන්ගේ ‘ජන විජය’ පුවත්පතට පැමිණියේ ලලිත් කොතලාවල ළඟ සිටියදීය. ඔහු මෙම රැකියාවට පැමිණියේ හාමුදුරුවන්ට තමා කවුදැයි සඟවා බවට සාක්ෂි දැකිය හැකිය. හාමුදුරුවන් දිගටම ඔහු ඇමතුවේ “මිස්ට ජයසේකර යනුවෙනි. උන්වහන්සේ ආචාර්ය උපාධිය සමග කෝටි දහයක මුදලක් රුසියාවේදී ලබාදෙන බවට සපථ කළේ ක්රිස්තියානි මූලධර්ම කණ්ඩායමකි. උන්වහන්සේගේ ධර්ම දේශනා තුළින් දේව විශ්වාසවලට පහර පිට පහර වැදෙමින් තිබූ බව මෙහිදී අප අමතක නොකළ යුතුය. මේ පසුබිම යටතේ උන්වහන්සේ සිටියේත් මෙම රුසියානු ගමන සිදු වූයේ මිතුරන් අතරම නොවන බව පැහැදිලිය. සාමාන්ය තත්ත්වයකදී වුවද හෘදයාබාධයකින් සුවය ලැබිම අසීරු කටයුත්තක් වන අතර සතුරන් අතර දී සුවය ලැබිම ඉමහත් අසීරු කටයුත්තකි.
දැන් අපි මෙම සිදුවීමෙහි කාලාන්තරය නිරූපණය කළ යුතුය. උන්වහන්සේට පපුවේ අමාරුව වැලදුනේ මොස්කව් ගමනේ දවෛනි කොටසේදීය. පළමුවෙනි කොටසෙහි දී උන්වහන්සේ සමග මිතුරු මහේස්ත්රාත්වරයෙක් සිටියේය. ඔහු සමග සිටි කාලය තුළ උන්වහන්සේට අපහසුවක් නොවූ බව ඔහු පවසයි. 2003-10-11 දින මොස්කව් නගරයට සෙන්දුවනවාත් සමගම හෘදයාබාධය වැලදිනි. නමුත් ප්රතිකාර ගැනීමට නතර නොවී උන්වහන්සේ කි.මී. 700 දුරින් වූ පීටර්ස්බර්ග් නුවරට කැඳවාගෙනගොස් එහි රෝහලට ඇතුලත් කරන ලදී. දරුණු හෘදයාබාධයක් වැලඳී ඇති බව දැන ගත් එහි හෘද රෝග ඒකකය ඇන්ජියෝ ප්ලාස්ට් සැත්කම තුළින් Stem කපාටයක් සවි කරන ලදී. ඉන් අනතුරුව දින 3ක් දැඩිසත්කාර ඒකකයේදී අනතුරුව සති 2ක් හෘද රෝග ඒකකයේ උන්වහන්සේ ප්රතිකාර ලබා සුව විය. ඉන් අනතුරුව උන්වහන්සේ විවේක සුවයෙන් “රැසිනා” නමැති හෘද රෝග පුනරුත්ථාපන මධ්යස්ථානයේ සිටියේය. 2003-11-30 වන විටත් උන්වහන්සේ සිටියේ ‘රැසිනා’ හීය. මේ වන විට උන්වහන්සේ උපාධි සහතික පත්රයක් ලැබි තිබුණි.
2003/12/2 උන්වහන්සේ නැවතත් නාගරික රෝහලට වැඩම කරන්නේ තව දුරටත් හෘද සැත්කමක් අවශ්යදැයි දැන ගැනීමටය. 2003/12/8 උන්වහන්සේව පූර්ණ පරීක්ෂාවකට භාජනය කළ වෛද්යවරු උන්වහන්සේගේ තත්ත්වය සතුටුදායක බවත් හදිසි සැත්කමක් අනවශ්ය බවත් පැවැසුහ. මෙය ඉතා වැදගත් ප්රකාශයකි. මොස්කව් බෞද්ධ සමිතියේ රූපසිරි පෙරේරා මහතාගේත් තානාපතිතුමාගේත් එසේම ච්ප. කරුනාණන්දගේ ප්රකාශවලිනුත් උන්වහන්සේ මැනවින් සුවය ලබමින් සිටි බව පැහැදිලි වේ. උන්වහන්සේට ඉතිරිව තිබුණේ සියරටට පැමිණීම පමණි.
දැන් ඉතින් අපි මෙම ජාතික ව්යසනයේ අවසාන දින වෙත පමිණෙමින් සිටිමු. දෙසැ. 8,9,10 උන්වහන්සේ යහපත් සෞඛ්ය තත්ත්වයෙන් සිටි බව පෙනේ. එහෙත් දෙසැ. 12 තත්ත්වය හදිසියේ වෙනස් විණි. ඒ සමගම උන්වහන්සේ දැඩිසත්කාර ඒකකයට ඇතුල් කරන ලදී. මම සිතන ආකාරයට කුමන්ත්රණයේ උග්රම අවස්ථාවට පැමිණියේ දෙසැ 11 වනදා බවය, උන්වහන්සේ ස්වාභාවික අපවත්වීමකට ගමන් කරන්නේ ද යන්න පිළිබඳව කුමන්ත්රණකරුවන් විමසිලිමත් වන්න ඇති. එසේ නොවන තැන යම්කිසි මැදිහත් වීමක් සිදු කළ බව පෙනේ. මෙවැනි ඉතා නවීන රෝහලකදී කෘතහස්ත වෛද්යවරුන් අතරේ ඉතා මැනවින් උන්වහන්සේ ප්රතිකාර ලද බව පැහැදිලිය. දියවැඩියාව, රුධිර පීඩනය පාලනය කර රුධිරය කැටි නොගැසෙන Clopidogrel වැනි බෙහෙත් උන්වහන්සේ ලබාගන්නට ඇත. මේ වෙන විට Stem එකක් දමා මාස දෙකක් ඉක්මගොස් ඇත. දෙසැ 8 වනදා උන්වහන්සේ පරීක්ෂා කළ වෛද්යවරු උන්වහන්සේගේ තත්ත්වය සතුටුදායක බව පැවැසූහ. සියල්ල උඩු යටිකුරු වුයේ 11 වනදා රාත්රියෙහිය. සිදු වුයේ කුමක්ද යන්න නිශචිතවම කිව නොහැකි නමුත් මගේ පෞද්ගලික මතය එය පොටෑසියම් ලවණය ශරීර ගත කිරීමක් විය හැකි බවයි.
- වෛද්ය බන්දුල සිරිවර්ධන.
