26/05/2026
පින්කරමු එකසිතින් මියනොයමු හිස්අතින්
🌸බුද්ධ උපස්ථාන මහේශාඛ්ය ඖශධ පූජාව🌸
පින් කරමු එක සිතින් මිය නොයමු හිස් අතින් කල්යාණ මිත්ර සමූහයේ උතුම් වෙසක් මාසයේ උතුම් පුණ්යකටයුත්තයි.....🙏🪷
තුන්ලෝකාග්ර වූ ලොව්තුරා භාග්යවතුන් වහන්සේ ජීවමානව වැඩසිටින උතුම් රුවන්වැලිමහාසෑ සමිදුන් අභියස ඉතා ශ්රද්ධාවෙන් ගෞරවයෙන් යුක්තව පූජා කරන්නට යෙදුනාවු මහේශාක්ය ඖශධ පූජාව සතුටු සිතින් දැක බලා අනුමෝදන් වෙත්වා......🙏🙏🙏🙏
මේ උතුම් පුන්යකටයුත්ත තුලින් රැස් කරගත්තාවූ උදාරතර කුසලයන් අප සමූහයේ පින්වත් කල්යාණ මිත්රයන්ටත් මේ සදහා වචනයකින් හෝ දැකබලා අනුමෝදන් වන්නාවු සියලු දෙනාටත් උතුම් වූ චතුරාර්ය සත්ය ධර්මය අවබෝධ වීම පිනිසම හේතු උපකාර වේවා...🙏🙏
වෙසක් මස 22 දින උදෑසනම පිරිසිදු බ්රහ්මචාරී පංචශීලය සමාදන්ව ද්රෝණයක් සර්වඥ ධාතුන් වහන්සේලා විරාජමානව වැඩ හිදින මෙම මගුල් සක්වලෙහි උතුම්ම ස්ථානය වූ ස්වර්ණමාලී මහා සෑ රජාණන් අභියසදී, අනන්තඥාන, අනන්තසෘද්ධි, අනන්තබලයෙන් යුතු, සකල ලෝකවාසීන් විසින් ගරු කළයුතු හෙයින් භාග්යවත් වූත්, දෝත නඟා වඳින්නහුට පවා නොයෙක් දෙව් මිනිස් සැප ලබා දීමට සමත් අචින්තනීය අප්රමේය ගුණස්කන්ධයක් යුක්තවූ හෙයින් අරහත් වූත්, අනේක කෙලෙස් රෝගයන්ගෙන් පෙළෙමින් සසර දුක් විඳිනා අසරණ සත්ත්වයන්ගේ සකල කායික මානසික රෝගයන් මතු කිසිකලෙක නූපදනා පරිදි සුව කිරීමට සමත් ශ්රේෂ්ඨ වූ, මහා කාරුණික වූ මහා වෛද්යවරයාණන් වහන්සේවු, ලොව්තුරා බුදු රජාණන් වහන්සේ අරමුණු කරගනිමින් ජීවමාන සංඥා උපදවමින්, ශ්රද්ධාවෙන්, ප්රඥාවෙන් යුතුව, දෙතිස් මහා පුරුෂ ලක්ෂණයෙන් හා අසු අනුව්යඤ්ජන ලක්ෂණයෙන් ද කේතුමාලාවෙන් හා ව්යාමප්රභාවෙන් ද නීල පීතාදී ෂඩ්වර්ණ රශ්මි මාලාවෙන් ද බබලන්නාවූ ශ්රී බුද්ධ ශරීරයෙහි නීරෝගී භාවය, සුවපත් භාවය උදෙසාත්, උන් වහන්සේගේ සුඛ විහරණය උදෙසාත් කරන්නට යෙදුනාවූ මෙම මහේශාඛ්ය මධුර, ප්රණීත ඖෂධ පූජාව අනුමෝදන් වෙත්වා.
අප ගෞතම බුදු රජාණන් වහන්සෙට වැළදුන තුනටියේ අමාරුව, නිතර ඇතිවන හිසරදය, ලෝහිත පක්ඛන්දිකා නොහොත් ලේ අතීසාරය රෝගයන් විශෙෂයෙන් අරමුණු කර ගනිමින්, මිනිස් සිරුරේ හිසේ සිට පාදාන්තය දක්වා, වා, පිත්, සෙම් කිපීමෙන් හටගන්නා වූ අට අනූවක් රෝග සදහා ( දියවැඩියාව, වකුගඩු මූත්රා රෝග, අක්මා රෝග, අර්ශස්, පිලිකා, මොලේ රෝග, ශ්වසන රෝග, වාත රෝග, හන්දි රෝග, කැඩුම් බිදුම්, තුවාල, සමේ රෝග, අමාශ රෝග, ඇස් රෝග, කණ් රෝග, මුඛ දන්ත රෝග, ක්ලාන්තය, ශරීරයේ දුර්වලතා ආදී අනේක රොගයන් සදහා ) ස්වාභාවික, පිරිසිදු, මධුර ප්රණීත ආර්යුවේද තෙල් වර්ග, ආලේපන, පැණි, ක්වාත, අරිශ්ඨ, චූරණ, රසායන සහ විටමින් පෙති වර්ග තෝරාගන්නට යෙදුනෙමු.
එලෙස තොරාගත්තා වු ඖෂධයන් හිමිදිරි උදෑසනම මහ සෑ රජාණන් අභියස රෝස වතුරෙන් දෝවනය කර පිරිසිදු කරන ලද ආසන මත පිලිවෙලින් මනරම් ලෙස සකසා, එම ඖෂධ පානයන් වලට අවශ්ය ගිතෙල්, දුං තෙල්, තල තෙල්, එලකිරි, එලුකිරි, දෙහියුශ, මී පැණි, උක් පැණි, වෙඩරු ආදී අනුපානයන්ද, ඖෂධීය පත්තුන්, හුමාලයෙන් තැම්බීමට, තෙල් උණුකිරීමට, අවශ්ය පහසුකම්ද, වෙලුම් රෙදි, වෙලුම් පටි, කතුරු, පුළුන්, ප්ලස්ටර්, කොටන් බඩ්, බැන්ඩේජ්, ඇස් බෙහෙත්, කන් බෙහෙත්, මුව, මුඛ, ශරීරය පිරිසිදු කිරීමට උණු පැන්, සිසිල් පැන්, ඖෂධීය මිශ්රන, නොයෙක් ප්රමාණ තුවා, සබන් වර්ග, දත් බෙහෙත්, බුරුසු ආදී අනේක ඖෂධයන්ද, වියලි ඖෂධයන්ද වෙනත් අවශ්ය දෑද, විසිතුරු මල්ද සමගින් "මනා ලෙසින් සකසාම" කරන්නට යෙදුනු පූජාවක් ලෙසින් පූජා කලෙමු.
ඖෂධ පූජාවේ අනුසස්
බක්කුල තෙරුන්ගෙ කතාව
මේ මහා භද්ර කල්පයට ඒකාසංඛ්ය කල්ප ලක්ෂයකට පෙර බුදු වූ අනෝමදස්සී බුදුරජාණන් වහන්සේගේ කාලයේ බක්කුල තෙරුන් වහන්සේ වේදත්රයේ කෙළ පැමිණි බ්රාහ්මණයෙක් ලෙසින් ඉපිද තාපස පැවිද්ද ලබා ශිෂ්ය පිරිසක් සමඟන් හිමාලය අසල අසපුවක වාසය කරන කල්හි, අනෝමදස්සී තථාගතයන් වහන්සේ විවේක සුවයෙන් සිටින ඒ අසපුවට වැඩිය අවස්ථාවකදි, මහත් වූ වාතාබාධයක් හට ගත්තෙය. ඒ අවස්ථාවේ එම බ්රාහ්මණයා තමන්ගෙ ශිෂ්ය පිරිස සමඟ පර්වතයකට නැග ඖෂධ සොයා බෙහෙත් සකස් කර දී තථාගතයන් වහන්සේට වැළඳුණ උදරාබාධය සංසිඳවන්න කටයුතු කළහ. ඒලෙසින් සිදුකරගත් පින් බලයෙන් උපනූපන් ජාතිවල කිසිම ආබාධයක් නොවේවයි ප්රාර්ථනාත් කළහ.
වාතාබාධයෙන් නිරෝගි සුවයට පත් අනෝමදස්සී බුදුරජාණන් වහන්සේ බ්රාහ්මණයා සිදු කරනලද ඖෂධ පූජාවේ අනුසස් මේ අයුරින් දේශනා කළහ. මේ බෙහෙත් පූජා කළ පිනෙන් කල්ප ලක්ෂයක් දෙව් ලොව ඉපදී දිව්ය සැප විඳ, මිනිස් ලොව ඉපදී දහස් වරක් චක්රවර්තී රජ බවට පත් වෙයි. පස්වන කල්පයේ සතර මහා දිවයින් හා සිවු මහාසාගරකෙළවර කර ඇති පෘථීවියට අධිපති, සතුරු රජවරුන් ජයගන්නා සත්රුවනින් යුතුව ජම්බුද්වීපයේ මහත් බල ඇති අනෝම නම් චක්රවර්ති රජෙක් වී තව්තිසා දෙව්ලොවත් කළඹවමින් අධිපති බව කරයි. දෙව් මිනිස් දෙගතියේ කොහේ උපත ලැබුවත් ලෙඩ රෝගවලින් මිදී නිරෝගි සුව ලබා, මෙයින් කල්ප ලක්ෂයකට පසු ඔක්කාන නම් කුළයේ ගෞතම නම් බුදුවරයෙක් ලොව පහළ වෙන සේක. එම කාලයේ බක්කුල නමින් ඉපදී පැවිදි වී සියලු කෙළෙස් නසා අරිහත්වයට පත්වී නිරෝගි භික්ෂූන් අතර අග තනතුරු ලබන සේක.
පිළින්දිවච්ඡ මහ රහතන් වහන්සෙ
පිළින්දිවච්ඡ මහ රහතන් වහන්සේට බෙහෙත් පිදීමෙන් පහත අනුසස් දහයක් ලැබුණා හ.
දීර්ඝායුෂ ලැබේ.
බලවන්තයෙකු වේ.
වීර්යය වන්තයෙකු වේ.
වර්ණ සම්පත් ලැබේ.
යශස් ඇත්තේ වේ.
සැප ඇත්තේ වේ.
උපද්රව නැත්තේ වේ.
අන්තරා නැත්තේ වේ.
හැම කල්හි ම ගරු කරන ලද්දේ වේ.
ප්රිය විප්පයෝග දුක් නො ලැබේ.
අප විසින් මෙලෙසින් සිදු කරන ලද උතුම් ඖෂද පුජාවන්ද, අමතරව කරන ලද උණු පැන්,සිසිල් පැන්, පිරිකර පූජාවෙන්ද, පිරිසිදු ,පිවිතුරු, මනරම් මල් පූජාවෙන්ද ජනිත වූ සියලුම කුසල් සම්බාරයන් මෙයට ධනයෙන්, ශ්රමයෙන් හා වෙනත් අයුරින් දායක වුත්, දැක බලා අනුමෝදන් වුත් සියළු දෙනාටමත්, පින් කැමති, පින් බලාපොරොත්තු වන, පින් අනුමෝදන් වන සියලු මනුෂ්ය, අමනුෂ්ය, දෙවියන්, බ්රහ්මයන් ඇතුළු සියලු සත්ත්වයන්ටද මේ පින් ඒ අයුරින්ම අත් වේවා. සියලු සත්ත්වයෝ සතුටින් අනුමෝදන් වෙත්වා.
ආයුෂය, වර්ණය, සැපය, බලය, ඥානය වැඩේවා. දෙව් මිනිස් සුගති භවයන්හි උපතට හේතු වී, පහත් කුලවල නොඉපිදී උසස් කුලවල උපත ලැබේවා. සිත එකඟ කරගත හැකි සමාධියත්, බලගතු විදසුන් ප්රඥාවත්, ලෙඩ රෝගවලින් තොර කායික, මානසික සුවයත්, සීත උෂ්ණ ආදියෙන් නොපීඩාවන සුවවත් දිවියත් මෙම මහා පුණ්ය කර්මයේ ආනිසංස ලෙස ලැබේවා. මහත් බෝග සම්පත්, අගනා වස්ත්රාභරණ, කැමති යාන වාහන, ගෞරවයෙන් පිරි කීර්තිය හා නොබිඳෙන පිරිවර මෙම පුණ්ය බලයෙන් ලැබේවා.
මේ සියලු පින් අවසානයේ, භව ගමන කෙටි කරමින්, සසර දුක් නිමා කරමින්, තම ප්රාර්ථනා පරිදි 'සුඛා පටිපදා ඛිප්පාභිඤ්ඤා' වෙන්ම නිවනට පැමිණීමට හේතු වන උතුම් පාරමිතාවක්ම වේවා.
භාවනාව පටන් ගන්නා මොහොතේදීම සිත තැන්පත් වේවා. සිත සමාධි වේවා. පරිකරම, උපචාර, අර්පණා භාවනාවන් වැඩේවා: සමාධින් වැඩේවා. පංච අභිඥා හා අෂ්ඨ සමාපත්ති ලැබේවා. විදර්ශනා භාවනාව වැඩේවා, විදර්ශනා සමාධිය වැඩේවා. නව මහා විදර්ශනා ඥානයන් වැඩේවා, මාර්ග ඵල ලැබ නිවන් සුව අත්වේවා.
තෙරුවන් සරණයි.
