ඈගල්ල ඓතිහාසික ගල්ලෙන් විහාරය - Egalla Historical Cave Temple

28/03/2022

ඈගල්ල ඓතිහාසික ගල්ලෙන් විහාරයේ චෛත්‍ය රාජයාණන් වහන්සේගේ පාදම කොටසේ මූලික ඉදිකිරීම් සඳහා අවශ්‍ය ගල් වැලි සම්පාදනය කරගන්නා ලදී.

ඒ සඳහා දායකවූ පින්වතුන් සියලු දෙනා හට පුණ්‍යානුමෝදනාවයි..

මෙම අනර්ඝ දුර්ලභ පින්කමට දායකත්වය දැක්වූ ඔබට එම සියලූ පින් උතුම් චතුරාර්ය සත්‍යාවබෝධය සඳහාම හේතුවාසනා වේවා..එමෙන්ම මෙම පින්කම අවසාන වන තෙක්ම එහි අනගි පළ නෙලාගැනීමට සියලූ දෙනා හට වාසනාව ශක්තිය ලැබේවා..

තෙරුවන් සරණයි..!

28/03/2022

පුණ්‍යානුමෝදනාවයි..!

07/03/2022

එංගලන්තයේ පදින්චි නදී චන්ද්‍රිකා අබේගුණවර්ධන මැතිනියගේ පෞද්ගලික ධන පරිත්‍යාගයෙන් ලබාදුන් රු 550,000/= ක සැදැහැවත් දායකත්වයෙන් ඈගල්ල ඓතිහාසික ගල්ලෙන් විහාරස්ථානයේ ධර්ම ශාලාවේ අත්තිවාරම කොටස ඉදිකිරීම් සඳහා අවශ්‍යව තිබූ කම්බි ප්‍රමානය මිලදී ගැනීමට හැකිවිණි..නොබෝ දිනකින් පළමු ඉදිරිකිරීම ලෙස එම අත්තිවාරම් කොටස සහ කොන්ක්‍රීට් කණු ඉහළට එසවෙනු ඇත..

ඔබගේ පින්වන්ත දායකත්වයන් ලබාගැනීම දැන් ආරම්භකොට ඇති බව ශාසන ලැදි සියල්ලන්ට දැනුම් දීමට කැමැත්තෙමු..

වැඩිදුර විස්තර සඳහා අමතන්න - ආරණ්‍යවාසී පූජ්‍ය කහඳවැලිපොත ධම්මසුජාත හිමි 0778278007 / 0771818080

තෙරුවන් සරණයි..!!

02/02/2022

ඈගල්ල ඓතිහාසික ගල්ලෙන් විහාරය නැවත ගොඩනැගීමේ වැඩසටහන දැන් ජාතික ව්‍යාපාරයක් ලෙසින් දියත්වන බව සතුටින් දැනුම් දෙමු..ඒ සඳහා ශ්‍රී සම්බුද්ධ ශාසනයේ චිරස්ථිතිය අපේක්ෂා කරන පින්වත් දෙස් විදෙස් ජනතාවගේ සහයෝගය අත්‍යාවශ්‍යව ඇත..ඔබගේ පින්වන්ත දායකත්වයන් ලබාගැනීම දැන් ආරම්භකොට ඇති බව ශාසන ලැදි සියල්ලන්ට දැනුම් දීමට කැමැත්තෙමු..

වැඩිදුර විස්තර සඳහා අමතන්න - 0771818080

තෙරුවන් සරණයි..!!

18/12/2021

ඈගල්ල ඓතිහාසික ගල්ලෙන් විහාරය නැවත ගොඩනැගීමේ වැඩසටහනේ මූලික අදියරයේ ප්‍රධාන කාර්යයක් ලෙසින් ධර්ම ශාලා පරිශ්‍රය ඉදිකිරීමේ වැඩකටයුතු ආරම්භ කෙරිණි..මෙහිදී ධර්ම ශාලාවේ පදනම් කොටසේ බේස් වළවල් කපා ඒවා ඉදිකිරීම මේ වනවිට සිදුකරමින් පවතී..

බෙලිගල ශ්‍රී විජයසුන්දරාරාම රාජමහා විහාරාධිපති අතිපූජ්‍ය දම්මල ධම්මාලෝක හිමිපාණන් වහන්සේගේ අනුශාසකත්වයෙන්, ආරණ්‍යවාසී පූජ්‍ය කහඳවැලිපොත ධම්මසුජාත හිමියන්ගේ මූලිකත්වයෙන් සහ ගරුතර සංඝරත්නයේ මගපෙන්වීමෙන් මෙන්ම ප්‍රදේශ වාසී ජනතාවගේ සහභාගීත්වයෙන් සහ පුජාවිද්‍යා නිලධාරීන්ගේ අධීක්ෂණයෙන් මෙම කටයුතු සිදුවේ..

මෙම මහා පින්කමේ කටයුතු සඳහා ශාසන ලැදි පින්වත් ඔබ සියලු දෙනාගේ දායකත්වය ලැබේවා..

තෙරුවන් සරණයි..!!

18/11/2021

“චරථ භික්ඛවේ චාරිකං, බහුජනහිතාය බහුජනසුඛාය ලෝකානුකම්පාය අත්ථාය හිතාය සුඛාය දේවමනුස්සානං.

‘පින්වත් මහණෙනි, බොහෝ ජනයාට හිත පිණිස, බොහෝ ජනයාට සැපය පිණිස, ලෝකානුකම්පාව පිණිස, දෙව්මිනිසුන් හට අර්ථය පිණිස හිතසුව පිණිස චාරිකාවේ හැසිරෙන්න’

“මා ඒකේන ද්වේ අගමිත්ථ. දේසේථ භික්ඛවේ ධම්මං, ආදි කල්‍යාණං, මජ්ඣේ කල්‍යාණං, පරියෝසාන කල්‍යාණං, සාත්ථං සබ්‍යඤ්ජනං කේවලපරිපුණ්ණං පරිසුද්ධං බ්‍රහ්මචරියං පකාසේථ.

‘දෙදෙනෙකු එක මගකින් නොගොස්, මහණෙනි, ධර්මය දේශනා කරන්න. ආරම්භයත් සුන්දර වූ, මැදත් සුන්දර වූ, අවසානයත් සුන්දර වූ, අර්ථවත් වූ, පැහැදිලි ප්‍රකාශන වලින් යුක්ත වූ, මුළුමනින්ම පිරිපුන් පිරිසිදු බඹසර ජීවිතය (නිවන් මග) ප්‍රකාශ කරන්න’

10/11/2021

ඈගල්ල ඓතිහාසික ගල්ලෙන් විහාරය නැවත ගොඩනැගීමේ වැඩසටහනේ තවත් විශේෂ සංධිස්ථානයක් පසුගියදා සිදුකෙරිණි. එම වැඩසටහනේ මූලික අදියර ලෙස චෛත්‍ය රාජයාණන් වහන්සේට සහ ධර්ම ශාලා පරිශ්‍රයේ මුල් ගල තැබීමෙන් අනතුරුව බෙලිගල ශ්‍රී විජයසුන්දරාරාම රාජමහා විහාරාධිපති අතිපූජ්‍ය දම්මල ධම්මාලෝක හිමිපාණන් වහන්සේගේ අනුශාසනාවට අනුව චෛත්‍යය සහ ධර්ම ශාලාව ඉදිකිරීමේ සංගමයක් පිහිටවීම සඳහා කටයුතු සිදුකෙරිණි. එම අනුශාසනාවට අනුව ඈගල්ල ඓතිහාසික ගල්ලෙන් විහාරයේ වැඩවසන ආරණ්‍යවාසී පූජ්‍ය කහඳවැලිපොත ධම්මසුජාත හිමියන්ගේ මගපෙන්වීමෙන් ඈගල්ල, බෙලිගල, රාගල්කන්ද සහ හෑලියගොඩ යන ප්‍රදේශ වල ප්‍රදේශවාසී මහත්ම මහත්මීන්ගේ සහභාගීත්වයෙන් අතිපූජ්‍ය දම්මල ධම්මාලෝක හිමිපාණන් වහන්සේගේ ප්‍රධානත්වයෙන් එම සංගමය පිහිටවීම සිදුකෙරන ලදී.

එහිදී ගරු අනුශාසක ධූරයෙන් මෙන්ම සභාපති ධූරයෙන් අතිපූජ්‍ය දම්මල ධම්මාලෝක නායක හිමිපාණන් වහන්සේද, සම සභාපති ලෙස පූජ්‍ය කහඳවැලිපොත ධම්මසුජාත ස්වාමීන් වහන්සේද, ලේකම් ලෙසින් හේරත් මුදියන්සේලාගේ පොඩිබණ්ඩා මහතාද, උප ලේකම් ලෙසින් ආර්. ඒ රණතුංග මැණිකේ මහත්මියද, භාණ්ඩාගාරික ලෙසින් විමුක්ත පත්මසිරි මහතාද, සම්බන්ධීකාරක ලෙසින් ආර්. චමින්ද රණසිංහ මහතාද සභාවේ යෝජනා ස්ථිරත්වයෙන් පත්කරගන්නා ලදී. කාරක සභික මහත්ම මහත්මීන්ද තෝරා පත් කරගන්නා ලදී.

"ඈගල්ල ඓතිහාසික ගල්ලෙන් විහාරය නැවත ගොඩනැගීමේ ජාතික ව්‍යාපාරය" නමින් පිහිටවන්නට යෙදුණු එම සංගමයේ ව්‍යවස්ථාවද එම සභාවේදීම ඒකමතිකව සම්මත කරගන්නා ලදී.

නුදුරු අනාගතෙයි ශ්‍රී සම්බුද්ධ ශාසනයේ චිරස්ත්තිය උදෙසා ඉදිවන්නට නියමිත එම පුණ්‍යභූමිය ඉදිකිරීමේ ව්‍යාපෘතිය "ඈගල්ල ඓතිහාසික ගල්ලෙන් විහාරය නැවත ගොඩනැගීමේ ජාතික ව්‍යාපාරය" නමින් මින් ඉදිරියට ක්‍රියාත්මක වනු ඇත..

තෙරුවන් සරණයි..
🙏🙏🙏🙏🙏

03/11/2021

ඉතා දිගු කාලයක සිට නොසලකාහැරීම් රැසක් මෙන්ම විවිධ අකටයුතුකම් රැසකට මුහුණදෙමින් අභාවයට යමින් තිබූ ඈගල්ල ඓතිහාසික ගල්ලෙන් විහාරයේ අදටත් ශේෂව ඇති පුරාවිද්‍යා වටිනාකම් රැසකින් පෝෂණයවූ පෞරාණික නෂ්ටාවශේෂ අතුරෙන් දැනට හඳුනාගත් කිහිපයක් මෙහි දැක්වේ..

මෙම ප්‍රෞඪ බෞද්ධ උරුමය අති ගෞරවණීය බුද්ධ පුත්‍රයන් වහන්සේලාගේ සහ ශාසන ලැදි පිරිසකගේ අතිමහත් පරිශ්‍රමයෙන් පසු නැවත ප්‍රතිසංස්කරණය උදෙසා මේ වනවිට කටයුතු යෙදෙමින් පවතී..

ශාසන ලැදි පින්වත් ඔබට ඒ සඳහා දායකත්වය ලබාදීමේ වරම් නුදුරේදීම හිමිවනු ඇත..එතෙක් ඔබගේ කල්‍යාණ මිතුරන් මෙන්ම හැකි සියල්ලන් මේ පිළිබඳ දැනුවත් කිරීමෙන් මේ ජාතික කර්තව්‍යයට ඔබගේ දායකත්වය සැපයීම යුතුකමක් වනු නොඅනුමානය..

තෙරුවන් සරණයි..!

🙏🙏🙏🙏🙏

26/10/2021

බෙලිගල ඈගල්ල ඓතිහාසික ගල්ලෙන් විහාරයේ ප්‍රතිසංස්කරණ කටයුතු ඇරඹීම සම්බන්ධව 2021-10-25 වන දින දිනමිණ ජාතික පුවත්පතේ පළවූ පුවත..

22/10/2021

කෑගල්ල දිස්ත්‍රික්කයේ වරකාපොළ ප්‍රාදේශීය ලේකම් කොට්ඨාසයේ ඈගල්ල ඓතිහාසික ගල්ලෙන් විහාරය පෞරාණික වටිනාකම් රැසකින් යුතු ඉපැරණි විහාරස්ථානයකි..අතීත රජ දරුවන්ගේ නිරන්තර පුද සත්කාරයන්ට පත්ව විරාජමානව පැවතියද දිගු කලක සිට ගරාවැටෙමින් විනාශමුඛයට පත්වෙමින් තිබූ මෙම විහාරස්ථානය යළිත් අතීතයේ පැවති ශ්‍රී විභූතියට පත්කරලීම උදෙසා බාධක කම්කටොලු රාශියක් පසුකරමින් ශ්‍රී බුද්ධ වර්ෂ 2565ක් වූ වප් මස 21ක් වන දින (ක්‍රි.ව 2021/10/21) නැවත ප්‍රතිසංස්කරණ කටයුතු සඳහා බෙලිගල ශ්‍රී විජයසුන්දරාරාම රාජමහා විහාරාධිපති පුජ්‍ය ධම්මල ධම්මාලෝක ස්වාමින් වහන්සේ ප්‍රමුඛ මහා සංඝරත්නයේ මූලිකත්වයෙන් මුල් ගල තබන ලදී..ජාතික උරුම, ප්‍රාසාංග කලා හා ග්‍රාමීය කලා ශිල්පී ප්‍රවර්ධන කටයුතු රාජ්‍ය අමාත්‍ය විදුර වික්‍රමනායක මැතිතුමාද මෙම අවස්ථාවට සහභාගී වෙමින් චෛත්‍ය රාජයාණන් වහන්සේට මුල් ගල තබන ලදී..

පසුගිය ජනවාරි මස ජාතික උරුම,ප්‍රාසාංග කලා හා ග්‍රාමීය කලා ශිල්පී ප්‍රවර්ධන කටයුතු රාජ්‍ය අමාත්‍ය විදුර වික්‍රමනායක මැතිතුමාගේ පැමිණීමෙන් පසු මෙම ස්ථානයේ මැනුම් කටයුතු සිදුකර වෙන් කරන ලෙස පුරාවිද්‍යා දෙපාර්තමේන්තුවට සිදුකළ දැනුම්දීමෙන් අනතුරුව දින 7ක පමණ කාලයක් සම්පූර්ණ මැනුම් කටයුතු සිදුකර අක්කර 32කට ආසන්න පුරාවිද්‍යා වටිනාකම් සහිත පෞරාණික විශාල පර්වතය වෙන්කරන ලදී..ඉන්පසු මෙම කාර්යයන්ට මූලිකත්වය ගෙන කටයුතු කරන එම පුණ්‍ය භූමියේ ආරණ්‍යවාසීව වැඩවසන පූජ්‍ය කහඳවැල්පොත ධම්මසුජාත ස්වාමීන් වහන්සේ ඇතුළු ගම්වාසීන් විසින් බෙලිගල ශ්‍රී විජයසුන්දරාරාම රාජමහා විහාරාධිපති පුජ්‍ය ධම්මල ධම්මාලෝක ස්වාමින් වහන්සේව දැනුවත් කිරීමෙන් අනතුරුව උන්වහන්සේගේ නිර්දේශ සහ මගපෙන්වීම සහිතව ඓතිහාසික ගල්ලෙන් විහාරයේ ධර්ම ශාලාව සහ චෛත්‍ය රාජයාණන් වහන්සේ ඉදිරිකිරීමට පුරාවිද්‍යා නිර්දේශය ලබාදෙන ලෙසට ඉල්ලීමක් සිදුකරන ලදී..එම ඉල්ලීම සලකා බලා පුරාවිද්‍යා අධ්‍යක්ෂ ජනරාල් මහාචාර්ය අනුර මනතුංග මහතාගේ අධීක්ෂණයෙන් පුරාවිද්‍යා දෙපාර්තමේන්තුව විසින් එම ප්‍රතිසංස්කරණ කටයුතු සඳහා අවසරය ලබාදීම සිදුකෙරිණි.

ශ්‍රී ලංකා රාමඤ්ඤ මහා නිකායේ කෑගල්ල ප්‍රාදේශීය සංඝ සභාවේ ලේඛකාධිකාරී පුජ්‍ය බලවින්නේ මුණින්දානන්ද ස්වාමින්වහන්සේ, මිනුවන්ගොඩ මෙත් සිසිල සේනාසනාධිපති පුජ්‍ය මහඔය මහින්ද ස්වාමින් වහන්සේ, මැණික්හින්නේ ධම්මවීර ස්වාමින් වහන්සේ, විජිතපුර දුටුගැමුණු ආරණ්‍ය සේනාසනාධිපති කම්මට්ඨානාචාර්ය සෙනරත්පුර වංශාන්නද ස්වාමීන්වහන්සේ, කරඳ නා සෙවණ විහාරවාසී අකුරැස්සේ අමිත ස්වාමින්වහන්සේ ඇතුළු මහා සංඝරත්නය, පුරාවිද්‍යා දෙපාර්තමේන්තුවේ නිලධාරින්, දැදිගම පොලිස් නිලධාරීන්, ඈගල්ල රාගල්කන්ද ඇහැලියගොඩ සහ අවට සියලු ගම් වාසීන්, රජිත රූපසිංහ, ලහිරු මගලේගොඩ, කේශාන් මිලින්ද, දුන්හේන, අන්නාසිගල, කවුඩාවුල්ල සහ කෑගල්ල අවට තරුණ පිරිසත් මෙම අවස්ථාවට සහභාගී විය.

පෞරාණික චෛත්‍ය රාජයාණන් වහන්සේ සහ ධර්ම ශාලා පරිශ්‍රයේ ඉදිකිරීම් මූලික අදියර ලෙස සිදුකෙරෙනු ලැබේ..

ඉදිරියේදී මෙම නිල ෆේස්බුක් පිටුව මගින් මේ මහා පින්කමට සම්මාදම් වීමට සිතැති පින්වත් ඔබ සියලු දෙනාව දැනුවත් කෙරෙනු ඇත.

තෙරුවන් සරණයි..

🙏🙏🙏🙏🙏

21/10/2021