16/08/2024
ගැහැණිය ඔසවාගත් භික්ෂුව
ජපානයේ එක කලෙක එකම ආරාමයක භික්ෂුන් වහන්සේලා දෙපලක් වාසය කළහ. ඉන් එක නමක් සාස්තර කියමින් කේන්දර බලමින් නිමිති කියමින් නැකැත් හදමින් මුදල් උපයමින් සිටි අතර
සිසු හිමියෝ නිර්වාන මාර්ගය වඩමින් , බණ භාවනා කරමින් කාලය ගත කළේය. මේ හේතුවෙන් ගම්වාසීහු සිසු හිමියන්ට මහත් ගෞරව සම්පන්න බවක් දැක්වූහ. මෙය අනෙක් ගුරු හාමුරුවන්ගේ සිත් අමනාපයට හේතුවිය.
ගුරු හාමුදුරුවෝ නිතර කීවේ "අපි මේ තරම් සේවයක් ගමේ උන්ට කරනවා. ඒවායේ බහක් ගමේ උන්ට නැහැ. ඒත් මේ පොඩි නම මොනවද කරන්නෙ , නිකං බණ කියනවා විතරයි. ගමේ උන්ට එයා තමයි ලොකු."
මේ සියලු අපවාද උපේක්ෂාවෙන් බැහැර කළ සිසු හිමියෝ තමාගේ කටයුතුවල නියෑළුණේය.
වර්ෂා කාලය එළඹුනේය . ඇළ දොළ පිටාර ගලා ගියේය. දිනක් මියගිය තැනැත්තෙක් වෙනුවෙන් කරන දානමය පිංකමක් සඳහා මේ හිමිවරුන් දෙනමට ආරාධනාවක් ලැබිණ. මේ දානමය කටයුත්තට පිටත් වූ හිමිවරුන් දෙදෙනාට පිටාර ගලන ඇළකින් එගොඩට වීමට සිදුවිය.
මේ ඇළ අසල රුවැති නව යොවුන් තරුණියක් හඬමින් සිටියාය. ඉදිරියෙන් ගමන් කළ ගුරු හිමි ඇය දෙස බලන්නේවත් නැතිව ඇළෙන් එගොඩට ගියේය. ඒ ඇලෙහි වතුර උරහිස් මට්ටමට ඇළෙහි ජලය පිරී තිබිණ.
පසුපසින් පැමිණි සිසු හිමියෝ 'නැගණිය කුමක් හෙයින් නුඹ මෙතැන හඬමින් සිටින්නේදැයි තරුණියගෙන් විමසීය.
ඇයට එගොඩට යා නොහැකිව මෙතැන සිටින්නේ යෑයිද හවසට තවත් වතුර වැඩි වන හෙයින් තමාට හැඬුම් ආ බවද ඇය වැඩිදුරටත් ප්රකාශ කළාය.
නැගණියෙනි , මා නුඹට උදව් කරන්නේ යෑයි කාරුණිකව කී උන්වහන්සේ ඇයව ඔසවාගෙන ගොස් ඇළෙන් එගොඩ තැබීය.
තරුණිය සිසු හිමිගේ බෙල්ලේ එල්ලී ආ අයුරු දුටු ගුරු හිමි කෝප වුයේය. සිසු හිමි කරන ලද ක්රියාව ඒ මොහොතේ හෙළා දැක්කහ. මේ සියල්ල සිසු හිමියෝ උපේක්ෂාවෙන් දරා සිටි අතර නිහඩව දානමය කටයුත්ත සදහා ගමන් කලහ.
දානය නිමා කොට ආපසු ආරාමය වෙත පැමිණෙන අතරතුරද ආරාමයට පැමිණි පසුවද ගුරු හිමි කතා නොකළහ.
සිසු හිමියෝ ගුරු හිමියන් වෙත ගොස් වැඳ මහත් ගෞරවයෙන් කතා කලමුත් ගුරු හිමියන් ඇතුලත කෝපයෙන් යුතු බව දුටුවේය.
"ස්වාමිනි, අප හා කතා නොකරන්නේ මන්ද?" උන්වහන්සේ ඇසුහ.
"තමුන් හාමුදුරු නමකට හරියන වැඩක්ද අර කලේ? "
ගුරු හිමි කෝපයෙන් ඇසුහ.
"ස්වාමිනි, මම ඒ ගැහැණිය මෙගොඩ ගං ඉවුරේ තබා මෙහි පැමිණියෙමි. මම ඇය තවත් ඔසවාගෙන සිටින්නේ නැත.
නමුත් ඔබ වහන්සේ ඇය තවමත් ඔසවාගෙන සිටින්නේ ඇයි." සිසු හිමියෝ කීහ.
මෙය ඇසු ගුරු හිමියන්ට සත්යය තේරුම් ගියේය.
සීලය කය මුල්කර නොපිහිටයි. සීලය සිත මුල්කොට පවතී. එනිසා යමෙකු සතු සීලය කිසිවිට මතුපිටින් දැකිය නොහැක.
උපුටා ගැනීමක්
