14/05/2026
අතිපූජනීය මූන්හේනේ මේත්තාරාම නාහිමි ගුණානුස්මරණ පුණ්ය අනුමෝදනාව
සම්බුදු සසුනේ චිරස්ථිතිය උදෙසාත්, අසරණ ජනතාවගේ හිතසුව පිණිසත් අපමණ මෙහෙවරක් ඉටුකොට වදාළ, අප සැමගේ ගෞරවනීය ආචාර්යෝත්තම අතිපූජනීය මූන්හේනේ මේත්තාරාම නාහිමිපාණන් වහන්සේ කෙරෙහි ඇති අපරිමිත ගුරු ගෞරවය පෙරදැරිව මෙම පින්කම සංවිධානය කරන ලදී.
උන්වහන්සේ විසින් අපට පෙන්වා දුන් ඒ උතුම් මාවතෙහි යමින්, පාලුගම මහමෙව්නා භාවනා අසපු පින්බිමේදී සිව් සම්බුදු සෑ රදුන් ඉදිරිපිට පසුගිය මැයි 10 වන දින පවත්වන්නට යෙදුණු ලේ දන්දීමේ මහා පින්කමෙන් රැස්කරගත් සියලු පුණ්යධර්මයන්, අපවත් වී වදාළ අතිපූජනීය මූන්හේනේ මේත්තාරාම නාහිමියන්ටත්, එම ගුරු පරපුරේ අපවත් වී වදාළ සියලු නාහිමිවරුන්ටත්, මහමෙව්නාවේ අපවත් වී වදාළ සියලුම ස්වාමීන් වහන්සේලාටත් අනුමෝදන් වෙත්වා! ඒ උතුමන්ගේ පරලොව ජීවිත සැපවත් වෙත්වා, සුවපත් වෙත්වා, උතුම් ධර්මාවබෝධය පිණිසම මෙම පින් හේතු වාසනා වේවා!
එසේම රැස්වුණු සියලු පුණ්යධර්මයන් පින්වත් ලොකු ස්වාමීන් වහන්සේටත්, පාලුගම අසපුවේ විහාරාධිපති පූජ්ය දොරලියද්දේ විනීත ස්වාමීන් වහන්සේටත්, සියලු පින්වත් ස්වාමීන් වහන්සේලාටත් අනුමෝදන් වෙත්වා!
මෙම ලේ දන්දීමේ පින්කමේදී විවිධාකාරයෙන් උදව් උපකාර කළ සියලු දෙනාටම මෙම පින් අනුමෝදන් වෙත්වා! ඒ සියලු දෙනාට නිදුක් නිරෝගී සුවපත්භාවයත්, උතුම් ධර්මාවබෝධය පිණිස වාසනාවත් උදාවේවා!
තවද, සිව් සම්බුදු සෑය ඉදිකිරීම් කටයුතු සඳහා උදව් උපකාර කරන ලක්වැසි ලෝවැසි සියලු දෙනාටම මෙම පින් බලයෙන් සියලු රැකවරණය සැලසේවා!
තෙරුවන් සරණයි!
