ශු. බයිබලීය දැණුම / Holy Bible Study

ශු. බයිබලීය දැණුම / Holy Bible Study ❤️Glory❤️

16/01/2025

Daily Bread🍞🍷✝️📖*පහසුයි *
ජනවාරි 16 2025

නික්මයාම 14:5-14
[5] සෙනඟ පලාගිය බව මිසරයේ රජුට දන්වනලද්දේය. එවිට ඵාරාවෝ සහ ඔහුගේ මෙහෙකරුවන්ගේ සිත් සෙනඟට විරුද්ධව වෙනස්වී ඉශ්‍රායෙලිතයන් අපට මෙහෙකිරීමෙන් යන්ට හැර අප විසින් කළේ මොන ක්‍රියාවක්දැයි ඔව්හු කීවෝය. [6] ඔහු තමාගේ රථය සූදානම්කර ගෙන තමාගේ සෙනඟ තමා සමඟ රැගෙන, [7] තෝරාගත් රථ හසියයක්ද මිසරයේ සියලු රථද ගත්තේය, ඒවා සියල්ල කෙරෙහි සේනා නායකයන්ද පත්කෙළේය. [8] ස්වාමීන්වහන්සේ මිසරයේ රජවූ ඵාරාවෝගේ සිත දැඩි කළසේක, ඔහු ඉශ්‍රායෙල් පුත්‍රයන් ලුහුබැඳ ආයේය. මක්නිසාද ඉශ්‍රායෙල් පුත්‍රයෝ ධෛර්යවත් ලෙස නික්ම ගියෝය. [9] මිසරවරු එනම් ඵාරාවෝගේ සියලු අසුන් සහ රථද ඔහුගේ අසරුවෝද ඔහුගේ සේනාවද ඔවුන් ලුහුබැඳ විත් බාල්-ශෙඵොන් ඉදිරිපිට පී-හහීරොත්හි මුහුදුබඩ කූඩාරම් ගහගන සිටි ඔවුන්ට ළංවූය. [10] ඵාරාවෝ ළංවූ කල්හි ඉශ්‍රායෙල් පුත්‍රයෝ තමන්ගේ ඇස් ඔසවා මිසරවරුන් තමන් පස්සේ එනවා දැක අතිශයින් භයවූවෝය. එබැවින් ඉශ්‍රායෙල් පුත්‍රයෝ ස්වාමීන්වහන්සේට මොරගැසුවෝය. [11] ඔව්හු මෝසෙස්ට කථාකොට: කාන්තාරයෙහි මැරෙන්ට නුඹ අප ගෙනාවේ මිසරයෙහි මිනීවළවල් නැති නිසාද? මිසරයෙන් අප ගෙනවුත් අපට මෙලෙස ක්‍රියා කෙළේ මක්නිසාද? [12] මිසරවරුන්ට මෙහෙකරන්ට අප අත්හරින්ටය කියා මිසරයෙහිදී අප කීවේ මේක නොවේද? වනාන්තරයෙහි මැරෙනවාට වඩා මිසරවරුන්ට මෙහෙකිරීම අපට යහපතැයි මෝසෙස්ට කීවෝය. [13] මෝසෙස්ද: භයනොවන්න, නිශ්චලව සිට ස්වාමීන්වහන්සේ අද නුඹලාට සිදුකර දෙන ගැළවීම බලන්න. මක්නිසාද නුඹලා අද දුටු මිසරවරුන් නැවත තවත් කවදාවත් නොදක්නහුය. [14] ස්වාමීන්වහන්සේ නුඹලා උදෙසා සටන්කරනසේක, නුඹලා නිශ්ශබ්දව සිටිය යුතුයයි සෙනඟට කීවේය.

_*‘සටන් කිරීමට වන බව ඔවුන් දකින කල ඇතැම් විට ඔවුන් සිත වෙනස් කරගෙන මිසරයට ආපසු යත හැකි ය’*_

මාර්ක් නැඟීඑන තරුණ සභාපාලකයෙක් විය. එක් උදෑසනක ඔහුගේ පුත් ඕවන් ඔහු සමඟ බෝලයකට පයින් ගසමින් සිටියදී වැටී මිය ගියේය. මාර්ක්ට එය දරා ගත නොහැකි වූ අතර ඔහු තවමත් ඒ ගැන දුක්වන්නේය. නමුත් ඔහුගේ වේදනාව තුළින් ඔහු වඩාත් සානුකම්පිත සභාපාලකයෙකු වී ඇත. මාර්ක් සමඟ මා දුක් වූ අතර, ඔහුගේ පරීක්ෂාව ඒ ඩබ්ලිව් ටෝසර් සඳහන් කළ: “දෙවියන් වහන්සේට, මිනිසෙකු හට දැඩිව ගැඹුරින් රිදවන තුරු ඔහුට මහත් සේ ආශීර්වාද කළ හැකිද යන්න සැක සහිතය.” යන කීම සැබෑවක්දැයි මට බියක් දැනේ.

සමහරවිට එය එතරම් සරළ නොවේ. ඉශ්‍රායෙල්වරුන්ගේ නික්මයාම දෙස විමසිල්ලෙන් බලන විට දෙවියන් වහන්සේගේ මාර්ගවල තිබෙන සංකීර්ණත්වය අපට පෙනේ. දෙවියන් වහන්සේ අලුත් ජාතිය පහසු මාර්ගයකින් ගෙන ආසේක. “සටන් කිරීමට වන බව ඔවුන් දකින කල ඇතැම් විට ඔවුන් සිත වෙනස් කරගෙන මිසරයට ආපසු යත හැකි ය’ කියා උන් වහන්සේ සිතූ බැවිනි” (නික්මයාම 13:17). නමුත් පද කිහිපයකට පසුව දෙවියන් වහන්සේ මෝසෙස්ට කීවේ ඵාරාවෝ ඔහුගේ හමුදාව රැස්කරගෙන සටනට එනු ඇත (14:1-4) කියාය. ඵාරාවෝ ඇම ගිල්ලේය. ඉශ්‍රායෙලිතයෝ මහත් සේ බිය වී “ සමිඳාණන් වහන්සේට මොරගැසූ හ” (10 පදය). මෝසෙස් උත්තර දෙමින් “උන් වහන්සේ ඔබ උදෙසා සටන් කරන සේක. ඔබ නිශ්චල ව සිටිය යුතු ය”යි කී ය (14 පදය).

දෙවියන් වහන්සේ තම සෙනඟ වර්ධනය කර උන්වහන්සේට මහිමය ගෙන ඒම සඳහා පහසු සහ අසීරු ක්‍රම භාවිතා කරන සේක. උන්වහන්සේ පොරොන්දු වුනේ, “පාරාවෝ සහ ඔහුගේ සියලු හමුදාවන් පරාජය කිරීමෙන් මම ගෞරවය සලසා ගනිමි. මෙයින් මා සමිඳාණන් වහන්සේ බව මිසර වාසීහු දැනගන්නෝ ය” (4 පදය). ඉශායෙල් එසේ කළහ. අපටද එසේ කළ හැකිය. පහසු වුවත් අසීරු වුවත් සෑම සෝදිසි කිරීමකින්ම දෙවියන් වහන්සේ අපගේ ඇදහිල්ල වර්ධනය කරන සේක. ජීවිතය පහසු වන විට දෙවියන් වහන්සේ තුළ විවේක ගන්න. ජීවිතය අසීරු වන විට උන්වහන්සේට ඔබ ඔසවාගෙන යාමට ඉඩ දෙන්න.

_❤️ඔබගේ වර්ධනයට වේදනාව උපකාර වී තිබෙන්නේ කෙසේද? පහසු සහ අසීරු සෝදිසි කිරීම් යන දෙකම දෙවියන් වහන්සේ භාවිතා කරන බව ඔබ සිතන්නේ ඇයි?_

*🙏ආදරණිය ජේසුනී, සෑම සෝදිසි කිරීමකටම ඔබ සෑහේ.*

අපගේ දිනපතා භෝජනය s/=

07/01/2025

Daily Bread 🍞🍷📖✝️
*මැවිල්ල තුළ දෙවියන්වහන්සේව දැකීම*
ජනවාරි 7 2025

ජෝබ් 42:1-6
[1] එවිට යෝබ් ස්වාමීන්වහන්සේට උත්තරදෙමින් කියනුයේ: [2] ඔබවහන්සේට සියල්ලම පුළුවන් බවත් ඔබගේ කිසි අදහසක් වලක්වන්ට බැරි බවත් දනිමි. [3] දැනගැන්ම නැතිකමෙන් මන්ත්‍රණය අඳුරුකරන මොහු කවුද? එබැවින් මට නොතේරෙන්නාවූ, මා දැනනොගත්, මට ඉතා පුදුමවූ දේවල් කීවෙමි. [4] අනේ ඇසුව මැනව, එවිට මම කථාකරන්නෙමි; මා ඔබගෙන් අසන කල්හි මට දැන්නුව මැනව. [5] මා ඔබ ගැන කනින් අසා තිබුණේය; නුමුත් දැන් මාගේ ඇසින් ඔබ දකිමි. [6] එබැවින් මම මටම පිළිකුල්කොට, දූවිල්ලෙත් අලුවලත් හිඳ පශ්චාත්තාපවෙමියි කීවේය.

_*කලින් මා ඔබ ගැන කනින් අසා තිබුණේ ය. එහෙත්, දැන් මාගේ ම දෙනෙතින් මම ඔබ දැක ගතිමි.*_

දෙවියන් වහන්සේ තුළ ඇදහිල්ල නැතිවූ පසු සභාව අත්හැර ගිය කෙනී වසර ගණනකට පසුව නැවත එම සභාවේ සෙනඟ ඉදිරියෙහි පෙනී සිටියේය. ඔහුගේ ඇදහිල්ල නැවත ගොඩනැඟුණු බව ඔහු පැවසීය. කෙසේද? මැවිල්ලේ අලංකාරය සහ රටාව දැකීම තුළින් දෙවියන් වහන්සේ තම සිත ස්පර්ශ කළ බව ඔහු කීවේය. ස්වාභාවික ලෝකය තුළ ඔහු දුටු දෙවියන් වහන්සේගේ පොදු එළිදරව්වේ සාක්ෂියෙන් ඔහු නැවත වරක් විශ්ම පත්වී සිටියේය. ශුද්ධ ලියවිල්ලේ ඇති විශේෂ එළිදරව්වෙහි ප්‍රඥාව ඔහු දැන් වැළඳ ගත්තේය. ඔහුගේ කථාව බෙදා ගත් පසුව කෙනී, සභාව ඉදිරියෙහි තිබුන ජල ටැංකියට බැස්සේය. ඔහුගේ පියා ඇස්වල සතුටු කඳුලු සහිතව, ජේසුස් වහන්සේ තුළ ඔහුගේ ඇදහිල්ල අනුව කෙනීව බව්තීස්ම කළේය.

ජීවිතයේ බොහෝ දේවල් නැති වූ පසුව, යෝබ්ගේ ඇදහිල්ලද චංචලවී තිබිණ. “මා ඔබට හඬ නැඟුවත් ඔබ පිළිතුරු නොදෙන සේක; මා නැඟිට අයැදුම් කළත් මට පිහිටක් නැත; (යෝබ් 30:20) “එවිට දෙවිඳාණෝ කුණාටුව මැදින් ජෝබ්ට මෙසේ පිළිතුරු දුන් සේක”, (38:1) උන්වහන්සේ ප්‍රකාශ කළේ සිදුවී ඇත්තේ උන්වහන්සේ යෝබ් දෙස නොබැලීම නොව දෙවියන් වහන්සේගේ විශ්මිත, සංකීර්ණ මැවිල්ල ගැන සළකා බැලීම සඳහා යෝබ්ගේ දර්ශණය පුලුල් වීමේ අවශ්‍යතාවය පවතින බවය. “පොළොවේ පදනම්”, “පහන්තරු”, (4-7 පද). සියලු සත්ත්වයන්, ගස් වැල්, ඒ අතර ඇති ජල ධාරා, (8-41 පද), පෙන්වා ඇත්තේ යෝබ්ට විශ්වාසය තැබිය හැකි විශ්මිත ප්‍රේමයේ සහ බලයේ දෙවියන් වහන්සේ වෙතට යොමුකර වීමටය. “කලින් මා ඔබ ගැන කනින් අසා තිබුණේ ය. එහෙත්, දැන් මාගේ ම දෙනෙතින් මම ඔබ දැක ගතිමි.” (42:5 පදය) කියමින් යෝබ් ප්‍රතිචාර දැක්වූයේය.

ක්‍රිස්තුස් වහන්සේ තුළ ඔබගේ ඇදහිල්ලට සැකය තර්ජනය කරන විට දෙවියන් වහන්සේගේ මැවිල්ලේ තේජවන්තකම ගැන සැලකිලිමත්ව බලන්න. ඒවා බැලීමට අපට ඇස් ඇත්නම් පමණක් උන්වහන්සේව ඒ තුළින් එළිදරව් වෙනසේක.

_❤️දෙවියන් වහන්සේ මැවිල්ල තුළින් උන්වහන්සේව එළිදරව් කර ඇත්තේ කෙසේද? දෙවියන් වහන්සේගේ විශ්මිත බව සහ උන්වහන්සේ තුළ ඇදහිල්ල එකට සම්බන්ධ වී ඇත්තේ කෙසේද?_

*🙏මැවුම්කාර දෙවියන් වහන්ස මැවිල්ල තුළින් ඔබව දැකීමට මට උදව් කිරීම ගැන ස්තුතියි.*

අපගේ දිනපතා භෝජනය s/=

01/01/2025

*යේසුස්වහන්සේගේ කථාව*
ජනවාරි 1 2025

1 යොහන් 1:1-5 SROV
[1] පටන්ගැන්මේ සිට තිබුණාවූ, අප විසින් අසා තිබෙන්නාවූ, අපේ ඇස්වලින් දැක තිබෙන්නාවූ, අප විසින් බැලුවාවූ, අපේ අත්වලින් ඇල්ලුවාවූ දේ වන ජීවනයේ වාක්‍යයාණන් ගැන, [2] නුඹලාත් අප සමඟ පංගුකාරකම ලබන පිණිස, අප දුටුවාවූ ඇසුවාවූ ඒ දේ නුඹලාටත් ප්‍රකාශකරමුව. [3] (ඒ ජීවනය ප්‍රකාශකරනු ලැබීය, අපි ඒ දැක සාක්ෂිදෙමින්, පියාණන්වහන්සේ සමඟ තිබුණාවූ අපට ප්‍රකාශකරනලද්දාවූ ජීවනය, එනම් සදාකාල ජීවනය නුඹලාට ප්‍රකාශ කරමුව.) එසේය, අපේ පංගුකාරකම පියාණන්වහන්සේද ස්වකීය පුත්‍රවූ යේසුස් ක්‍රිස්තුස්වහන්සේද සමඟය. [4] මේ දේවල් ලියා එවන්නේ අපේ ප්‍රීතිය සම්පූර්ණවන පිණිසය. [5] අප විසින් උන්වහන්සේගෙන් අසා තිබෙන්නාවූ, නුඹලාට දන්වන්නාවූ පණිවිඩය නම්, දෙවියන්වහන්සේ ආලෝකය බවත් උන්වහන්සේ තුළ කිසිම අන්ධකාරයක් නැති බවත්ය.

_*මේ ජීවනය දෘශ්‍යමාන විය. අපි එය දැක, ඒ ගැන සාක්ෂි දරමින්...*_

බොහෝ දෙනා කේට් හැන්කි ගැන අසා නැත. නමුත් ඇය අද්විතීය කාන්තාවකි, ගුරුවරියකි, එවැන්ජලිස්තවරියකි, පාසැල් සංවිධායකවරියකි, මිෂනාරිවරියකි, කිවිඳියකි. ඇය 1800 ගණන්වල, එංගලන්තයේදී යේසුස්වහන්සේට සේවය කළාය. 1867 දී කේට් හට භයානක රෝගයක් වැළදිණ. ඇයගේ සුවවීමේ කාලය තුළදී ඇය කොටස් දෙකකින් සමන්විත දීර්ඝ කවියක් ලීවාය. “අවශ්‍යවූ කථාව” සහ “කීව කථාව” නම්වූ කවියෙන් විස්තර කරන්නේ ඇයට යේසුස්වහන්සේ සමඟ තිබුණු පෞද්ගලික සම්බන්ධතාවය සහ උන්වහන්සේගේ ජීවිත සිද්ධීන්ය.

මුලු ලියවිල්ල පෙන්වන්නේ ජේසුස් වහන්සේවය. ජොහන් තම ලිපිය ආරම්භ කරන්නේ ඔවුන් ජේසුස් වහන්සේව පෞද්ගලිකව අත් දැක ඇති ආකාරය මතක්කර දෙමිනි. “ජීවනයේ ධර්මයාණන් ගැන අපි ඔබට ලියමු. අපි උන් වහන්සේ කනින් ඇසීමු, අපේ ඇස්වලින් දුටිමු; දැක බලා, අපේ අත්වලින් ස්පර්ශ කෙළෙමු” (1 ජොහන් 1:1-3). අපෝස්තුලු තුමා ලියන්නේ උන්වහන්සේ ගැන අත්දැකීම නිසා අපි ජේසුස් වහන්සේගේ කථාව කියන්නෙමු යනුවෙනි. “අප ඔබටත් ප්‍රකාශ කරන්නේ අප ඇසූ දුටු ඒ දේ ම ය” (1ජොහන් 1:3 පදය) පසුව ජොහන් විශ්මිත ප්‍රකාශයක් කරයි. නුඹලා තුළ දෙවියන්වහන්සේගේ වචනය (2:14) පවතියි කියාය. වෙනත් වචනවලින් පවසන්නේ නම් ජේසුස් වහන්සේගේ කථාව, අපගේ ද කථාව වේ. අපව කැඳවා ඇත්තේ උන්වහන්සේ සමඟ අපගේ අත්දැකීම් තුළින් ක්‍රිස්තුස්වහන්සේගේ කථාව පවසන පිණිසය.

කේට් හැන්කි තම කවියෙන් කළේ එයයි. කාලයක් ගතවන විට ඇයගේ කවිය මෙම ගීතිකා බවට පත්විය. “කථාව කීමට මම ආශාකරමි” සහ “පැරණි කථාව මට කියන්න” සමහරවිට කේට් මෙන් අපටද අපගේ වචන සොයාගෙන, ජේසුස් වහන්සේගේ කථාව අන් අය සමඟ බෙදා ගත හැකිය. උන්වහන්සේ අපට ප්‍රේමකර අප වෙත පැමිණ අප ගැළවූ අසමසම ක්‍රමයයි.

_❤️ජේසුස් වහන්සේ සමඟ ඔබගේ කථාව කුමක්ද? ජේසුස් වහන්සේ ඔබ වෙත පැමිණ ඔබව ගැළෙව්වේ කෙසේද?_

*🙏ආදරණීය ජේසුනි, මාව ගළවා ඔබවහන්සේගේ ප්‍රේමනීය කාර්යය මාගේ ජීවිතයේ කරන නිසා ස්තුතියි.*

අපගේ දිනපතා භෝජනය s/=

30/12/2024

Daily Bread🍞🍷📖✝️
*දෙවියන්වහන්ස ඇයි මම?*
දෙසැම්බර් 30 2024

ගීතාවලිය 13:1-6 SROV
[1] ස්වාමිනි, ඔබ කොපමණ කල් මා නිතරම සිහි නොකර සිටිනසේක්ද? කොපමණ කල් ඔබගේ මුහුණ මාගෙන් සඟවනසේක්ද? [2] කොපමණ කල් මාගේ ආත්මයෙන් මන්ත්‍රණ යොදමින්, දවස මුළුල්ලේ මාගේ සිතෙහි ශෝකය ඇතුව සිටිම්ද? කොපමණ කල් මාගේ සතුරා මා කෙරේ උසස්වන්නේද? [3] මාගේ දෙවිවූ ස්වාමිනි, මා සලකා මට උත්තරදුන මැනව. මරණ නින්දට මා නොපැමිණෙන පිණිස මාගේ ඇස් එළියකළ මැනව. [4] නැත්නම්: ඔහුගෙන් ජයගතිමියි මාගේ සතුරා කියන්නේය; මා චංචලවන කල මාගේ එදිරිකාරයෝද ප්‍රීතිවන්නෝය. [5] එහෙත් මම වනාහි ඔබගේ කරුණාව විශ්වාසකෙළෙමි; මාගේ සිත ඔබගේ ගැළවීමෙහි ප්‍රීති වන්නේය. [6] ස්වාමීන්වහන්සේ මට යහපත්කම් කළ නිසා උන්වහන්සේට ගායනාකරන්නෙමි.

_*ස්වාමිනි, ඔබ කොපමණ කල් මා නිතරම සිහි නොකර සිටිනසේක්ද?*_

මස් පිඩු සහ ධමනි වල රෝගයකින් ජිම් වසරකට වඩා පීඩා වින්දේය. ඔහුගේ මස් පිඩු දියවෙමින් තිබුණි. ඔහුගේ ධමනි ක්‍රියාකාරිත්වය අඩු නිසා තම අත් පා පාලනයෙන් තොර වී තිබේ. ඔහුට තවදුරටත් කමිසයේ බොත්තම් දමා ගැනීමට හෝ සපත්තුවේ ලේස් ගැට ගසා ගැනීමට හෝ කෑම කෑමට භාවිතා කරන චොප්ස්ටික් හැසිරවීමට හෝ කිසිදු හැකියාවක් නොතිබුණි. ජිම් තමාගේ තත්ත්වය සමග අරගල කරමින් මෙය සිදුවීමට දෙවියන්වහන්සේ ඉඩ හැරියේ මන්ද කියා ප්‍රශ්න කරයි. ඇයි මම?

තම ප්‍රශ්න දෙවියන්වහන්සේ වෙත ගෙන එන තවත් ඇදහිලිවතුන් සමග ඔහු සමාගම් පවත්වයි. ගීතාවලිය 1 හි දාවිත් මොර ගසමින් “ස්වාමිනි, ඔබ කොපමණ කල් මා නිතරම සිහි නොකර සිටින සේක්ද` කොපමණ කල් ඔබගේ මුහුණ මාගෙන් සඟවන සේක්ද? කොපමණ කල් මාගේ ආත්මයෙන් මන්ත්‍රණ යොදමින් දවස මුළුල්ලේ මාගේ සිතෙහි ශෝකය ඇතුව සිටිම්ද?” කියා අසයි (1-2 පද).

අපටද අපගේ ව්‍යාකූලතා සහ ප්‍රශ්න දෙවියන්වහන්සේ වෙත ගෙන ගිය හැකිය. අපි “කොපමණ කල්ද” “ඇයි” යනාදි වශයෙන් මොර ගසනවා උන්වහන්සේ තේරුම් ගන්නා සේක. පාපය සහ මරණය ජයගත් යේසුස්වහන්සේ තුළ උන්වහන්සේගේ අවසන් පිළිතුර උන්වහන්සේ අපට දී තිබේ.

අපි කුරුසිය සහ හිස්වූ සොහොන දෙස බලන කල දෙවියන්වහන්සේගේ නොවෙනස්වන ප්‍රේමය ගැන විශ්වාස කරමින් අපට ස්ථිරත්වයක් ලබා ගෙන උන්වහන්සේගේ ගැළවීම තුළ ප්‍රීති විය හැකිය (5 පදය). අඳුරුම රාත්‍රී වලදී පවා “ස්වාමීන්වහන්සේ මට යහපත්කම් කළ නිසා උන්වහන්සේට ගායනා කරන්නෙමි” (6 පදය) යනුවෙන් අපට කිව හැකිය. ක්‍රිස්තුස්වහන්සේ තුළ අපගේ ඇදහිල්ල නිසා උන්වහන්සේ අපගේ පාප කමා කර අපව දරුවන් සේ හදා වඩා ගෙන අපගේ ජීවිත වල උන්වහන්සේගේ සදාකාලික යහපත් අරමුණු ඉෂ්ට කර ගන්නා සේක.

_❤️දෙවියන්වහන්සේ වෙත ගෙන ආ යුතු ඔබගේ ප්‍රශ්න මොනවාද? ඔබගේ අඳුරුම රාත්‍රියන්හි පවා උන්වහන්සේගේ යහපත්කම පෙන්වා ඇත්තේ කෙසේද?_

*🙏ප්‍රේමණීය පියාණෙනි, ඔබවහන්සේ මට සළකන නිසා ස්තුතියි. මගේ ජීවිතය අලංකාර දෙයක් කරන බව විශ්වාස කිරීමට මට උපකාර කළ මැනව.*

අපගේ දිනපතා භෝජනය
S/=

27/12/2024

Daily Bread🍞🍷📖✝️
*අනුග්‍රහයේ ක්‍රියාවන්*
දෙසැම්බර් 27 2024

2 රාජාවලිය 6:18-23
[18] ඔවුන් එලිෂා ළඟට බැස්ස කල ඔහු: මේ සෙනඟ අන්ධකළ මැනවයි ස්වාමීන්වහන්සේට යාච්ඤාකෙළේය. උන්වහන්සේ එලිෂාගේ වචනය ලෙස ඔවුන් අන්ධකළසේක.
[19] එවිට එලිෂා ඔවුන්ට කථාකොට: ඒ පාර මේක නොවේ,ඒ නුවරත් මේක නොවේ. මා පසුපස්සේ එන්න, නුඹලා සොයන මනුෂ්‍යයා ළඟට මම නුඹලා ගෙනයන්නෙමියි කියා ඔවුන් සමාරියට ගෙනගියේය. [20] තවද ඔවුන් සමාරියට පැමුණුණ විට එලිෂා: ස්වාමීන්වහන්ස, පෙනෙන පිණිස මොවුන්ගේ ඇස් පැහැදුව මැනවයි කීවේය. ස්වාමීන්වහන්සේ ඔවුන්ගේ ඇස් පැහැදුසේක; ඔව්හු බැලූ විට තමුන් සමාරිය මැද සිටින බව දුටුවෝය. [21] ඉශ්‍රායෙල් රජ ඔවුන් දැක: මාගේ පියාණෙනි, ඔවුන්ට පහරදෙම්ද? පහරදෙම්දැයි එලිෂාගෙන් ඇසුවේය. [22] ඔහු: නුඹ ඔවුන්ට පහර නොදිය යුතුය; නුඹේ කඩුවෙන්ද නුඹේ දුන්නෙන්ද අල්වාගත් තැනැත්තන්ට නුඹ පහරදෙන්නෙහිද? ඔවුන් කා බී තමුන්ගේ ස්වාමියා ළඟට යන පිණිස ඔවුන් ඉදිරියෙහි කෑමද වතුරද තබන්නැයි කීවේය. [23] ඔහු ඔවුන්ට මහත් කෑමක් පිළියෙළ කෙළේය. ඔවුන් කෑවායින් බීවායින් පසු ඔහු ඔවුන් පිටත්කර හැරියේය, ඔව්හු තමුන්ගේ ස්වාමියා ළඟට ගියෝය. සිරියේ සේවා කණ්ඩායම් තවත් ඉශ්‍රායෙල් රටට නාවෝය.

_*නුඹ ඔවුන්ට පහර නොදිය යුතුය;... ඔවුන් කා බී තමුන්ගේ ස්වාමියා ළඟට යන පිණිස ඔවුන් ඉදිරියෙහි කෑමද වතුරද තබන්නැයි කීවේය.*_

“අනුග්‍රහය ගැන” යන නව කථාවේ ඩේවිඩ් වින්ක්ලර්ට තම දියණිය සොයා ගැනීමට ආශාවූ අතර ඒ සඳහා ඔහුට උපකාර කළ හැකි එකම පුද්ගලයා වූයේ හර්මන් ෂීලර් පමණක් බව ඔහු දැන සිටියේය. නමුත් එහි ගැටළුවක් තිබුණි. ඩේවිඩ්ගේ දියණිය උපත ලැබුවේ හර්මන්ගේ භාර්යාව සමග ඩේවිඩ්ගේ සම්බන්ධතාවය නිසාවෙනි. එම නිසා කිසිම විටෙක ඔවුන් නැවත මුණ නොගැසෙන ලෙසට හර්මන් විසින් ඩේවිඩ්ට අනතුරු අඟවා තිබුණි.

ඩේවිඩ් තමා කළ දේ ගැන සමාව ඉල්ලා හර්මන්ට ලියන විට දශක ගණනාවක් ගෙවී ගොස් තිබුණි. “මාගේ දියණිය ගැන මා දන්නේ ඉතා අල්ප වශයෙන් නිසා මගේ ජීවිතයේ කුහරයක් තිබේ” යනුවෙන් සඳහන් කරමින් ඔහු තම දියණිය ගැන තොරතුරු දැන ගැනීමට බැගෑපත් වූයේය. හර්මන් ඔහුට උපකාර කරාවිදැයි ඔහු බලා ගෙන සිටියේය.

අපට වැරදි කළ අය ගැන අප ක්‍රියා කළ යුත්තේ කෙසේද? හාස්කමකින් ඔහුගේ සතුරන් ඔහුගේ හස්තයට පත්වූ විට ඉශ්‍රායෙල් රජුද මෙම ප්‍රශ්නයට මුහුණ දුන්නේය (2 රාජාවලිය 6:8-20). “ඔවුන්ට පහර දෙම්ද?” කියා ඔහු අනාගතවක්තෘ එලිෂාගෙන් ඇසුවේය. නැත කියා එලිෂා පවසයි. “ඔවුන් කා බී තමුන්ගේ ස්වාමියා ළඟට යන පිණිස ඔවුන් ඉදිරියෙහි කෑමද වතුරද තබන්නැයි කීවේය” (21-22 පද). මෙම අනුග්‍රහයේ ක්‍රියාව නිසා තම සතුරන් සමග ඉශ්‍රායලයට සමාදානය ලැබුණේය (23 පදය).

හර්මන් ඩේවිඩ්ගේ ලිපියට පිළිතුරු සපයයි. ඔහුට නිවසට ආරාධනා කර ඔහුට ආහාරයක් පිළියෙල කරයි.
“ස්වාමිවූ යේසුනි, මෙම වසර ගණනාව පුරාම මාවත් ඩේවිඩ්වත් ආරක්‍ෂා කළ නිසා ස්තුතියි” කියා කෑමට පෙර ඔහු යාච්ඤා කළේය. දියණිය සොයා ගැනීමට ඔහු ඩේවිඩ්ට උපකාර කරයි. පසුව ඩේවිඩ් ඔහුගේ ජීවිතය ගළවයි. දෙවියන්වහන්සේගේ හස්තයේ සිටින විට අපට වැරදි කරන්නවුන්ට අප දක්වන අනුග්‍රහයේ ක්‍රියාවන් වල ප්‍රතිඵලය වන්නේ එය අපට ආශිර්වාදයක් වීමෙන්ය.

_❤️අතීතයේදී ඔබව ජ්වලිත කළේ කවරෙකුගේ අනුග්‍රහයේ ක්‍රියාවක්ද? අද දවසේ කෙනෙකු වෙනුවෙන් ඔබට කළ හැකි අනුග්‍රහයේ ක්‍රියාව කුමක්ද?_

*🙏ආදරණීය යේසනි, මට වැරදි කළ අයට අනුග්‍රහය දීමට මට ප්‍රඥාව සහ බලය ලබා දුන මැනව.*

අපගේ දිනපතා භෝජනය s/-

23/12/2024

Daily Bread🍷🍞📖✝️
*මිත්‍ර ඉලක්කය*
දෙසැම්බර් 23 2024

හෙබ්‍රෙව් 10:19-25
[19] එබැවින්, සහෝදරවරුනි, යේසුස්වහන්සේ ස්වකීය මාංසය නමැති තිරය මැදින් අප උදෙසා කැපකළාවූ මාර්ගය වන අලුත්වූ ජීවමාන මාර්ගයකින්, [20] උන්වහන්සේගේ ලේ කරණකොටගෙන ශුද්ධස්ථානයට ඇතුල්වීමට අපට නිදහස්කම තිබෙන බැවින්ද, [21] දෙවියන්වහන්සේගේ ගෘහය කෙරෙහි අපට උතුම්වූ පූජකයෙක් සිටින බැවින්ද, [22] නපුරු හෘදයසාක්ෂියකින් පිරිසිදුවීම පිණිස අපගේ සිත් ඉසිනු ලැබ, අපේ ශරීරය පිරිසිදු වතුරෙන් සෝදනු ලැබ, සැබෑවූ සිතක් ඇතුව ඇදහීමේ නිසැකකමින් ළඟාවෙමු. [23] අපේ බලාපොරොත්තුවේ ප්‍රකාශකිරීම චංචල නොවන පිණිස එය තදින් අල්ලාගෙන සිටිමු; මක්නිසාද පොරොන්දුව දුන් තැනන්වහන්සේ විශ්වාසවසිටිනසේක. [24] තවද ප්‍රේමයටද යහපත් ක්‍රියාවලටද පොලඹවන පිණිස එකිනෙකා ගැන සිතේ තබාගනිමු. [25] සමහරුන්ගේ පුරුද්ද ලෙස අපේම රැස්වීම අත් නෑර, ඒ දවස ළංවන බව නුඹලාට පෙනෙන ප්‍රකාරයට වඩ වඩා එකිනෙකාට අවවාදකරමු.

_*තවද ප්‍රේමයටද යහපත් ක්‍රියාවලටද පොලඹවන පිණිස එකිනෙකා ගැන සිතේ තබාගනිමු.*_

නාසියානාස්හි ග්‍රෙගරි සහ කයිසාරියේ බැසිල් සමීප මිතුරන් වූ අතර සිව්වන සියවසේ සභාවේ සැමරීමට ලක්වූ නායකයන්ද වූහ. ඔවුන් මුලින් මුණ ගැසුණේ දර්ශනවාදය ඉගෙන ගන්නා සිසුන් මෙනි. පසුව ග්‍රෙගරි පැවසුවේ ඔවුන් “එක් ආත්මයක් සහ ශරීර දෙකක්” ඇත්තන් වූ බවයි.

ඔවුන්ගේ වෘත්තීය මඟ සමාන වූ නිසා පහසුවෙන් දෙදෙනා අතර එදිරිවාදිකම් මතු වීමට ඉඩ තිබුණි. නමුත් ග්‍රෙගරි පසුව විස්තර කළේ ඇදහිල්ලේ බලාපොරොත්තුවේ සහ යහපත් ක්‍රියාවන්ගේ ජීවිතයක් ඔවුන්ගේ එකම අරමුණ කර ගනිමින් මෙම පරීක්‍ෂාව යටපත් කර ගෙන ඉන්පසුව තමා නොව අනෙකාව මෙම ඉලක්කයේ සාර්ථක කරවීමට පෙළඹවීය යනුවෙනි. එහි ප්‍රතිඵලයක් වශයෙන් දෙදෙනාම ඇදහිල්ලේ වර්ධනය වී ගැටුම් නැතිව නායකත්ව මට්ටමේ ඉහළට ගියහ.

හෙබ්‍රෙව් පොත ලියා ඇත්තේ අපට ඇදහිල්ලේ ශක්තිමත්ව සිටීමටය (හෙබ්‍රෙව් 2:1). “අපේ බලාපොරොත්තුවේ ප්‍රකාශ කිරීම කෙරෙහි අවධානය තබා ගෙන” ප්‍රේමයටද යහපත් ක්‍රියාවලටද පොළඹවන ක්‍රියා කිරීමටය (10:23-24). මේ ආඥාව දී ඇත්තේ සභාවේ සංදර්භයට (25 පදය) නමුත් එය තම මිත්‍රත්වයට අදාළ කර ගනිමින් ග්‍රෙගරි සහ බැසිල් වර්ධනය වීමට එකිනෙකාට දිරිදෙමින් තමන් අතර “තිත්තකමේ මුලක්” නොවැඩෙන ලෙස ක්‍රියා කළහ (12:15).

අපගේ මිත්‍රත්වයන් තුළ ඇදහිල්ල, බලාපොරොත්තුව සහ යහපත් ක්‍රියා අපගේ ඉලක්කය කර ගෙන අපගේ සාර්ථකත්වය නොව මිතුරාගේ සාර්ථකත්වය ඉලක්ක කර ගත හොත් කෙබඳු වේද? කාර්යයන් දෙකේදීම අපට උපකාර කිරීමට ශුද්ධාත්මයාණන් වහන්සේ සුදානම්ව සිටින සේක.

_❤️ග්‍රෙගරි සහ බැසිල්ගේ මිතුරුකමේ ඔබ දකින ගුණාංග මොනවාද? ඇදහිල්ල, බලාපොරොත්තුව සහ යහපත් ක්‍රියාවලින් වර්ධනය වීමට ඔබගේ මිතුරන්ව දිරිගන්වන්නේ කෙසේද?_

*🙏යේසුනි, මගේ මිත්‍රත්වය ඇදහිල්ල, බලාපොරොත්තුව සහ යහපත් ක්‍රියා වලින් පෝෂණය කළ මැනව.*

අපගේ දිනපතා භෝජනය s/=

22/12/2024

Daily Bread🍷🍞📖✝️
*ස්පර්ශවන ප්‍රේමය*
දෙසැම්බර් 22 2024

1 යොහන් 4:13-21
[13] අප උන්වහන්සේ තුළද උන්වහන්සේ අප තුළද සිටින බව අප විසින් දැනගන්නේ උන්වහන්සේ තමන්ගේ ආත්මයාණන් අපට දී තිබෙන නිසාය. [14] පියාණන්වහන්සේ විසින් පුතායාණන් ලෝකයාගේ ගැළවුම්කාරයා කොට එවූ බව අපි දුටිමුව, ඊට සාක්ෂිදෙමුව. [15] යේසුස්වහන්සේ දෙවියන්වහන්සේගේ පුත්‍රයාණන් බව යමෙක් ඒත්තුගන්නේද, දෙවියන්වහන්සේ ඔහු තුළත් ඔහු දෙවියන්වහන්සේ තුළත් ඇත්තේය. [16] දෙවියන්වහන්සේ අප කෙරෙහි ඇති ප්‍රේමය අපි දැන විශ්වාසකරගන සිටිමුව. දෙවියන්වහන්සේ ප්‍රේමයය; ප්‍රේමයෙහි පවතින්නා දෙවියන්වහන්සේ තුළ සිටි, දෙවියන්වහන්සේද ඔහු තුළ සිටිනසේක. [17] අප තුළ ප්‍රේමය සම්පූර්ණව තිබීම නම්, ඒ තැනන්වහන්සේ සිටින ආකාරයටම අපත් මේ ලෝකයෙහි සිටින බැවින්, විනිශ්චය දවස ගැන නිසැකකම ඇතුව සිටීමය. [18] ප්‍රේමයෙහි භය ඇත්තේ නැත. සම්පූර්ණ ප්‍රේමය භය දුරුකරයි, මක්නිසාද භය දඬුවමින් යුක්තය; භයවන තැනැත්තේ ප්‍රේමයෙහි සම්පූර්ණ නොවී සිටියි. [19] අප ප්‍රේමකරන්නේ උන්වහන්සේ පළමුකොට අපට ප්‍රේමකළ නිසාය. [20] යමෙක්: දෙවියන්වහන්සේට ප්‍රේමකරමියි කියා තමාගේ සහෝදරයාට වෛරකෙරේ නම්, ඔහු බොරුකාරයෙක්ය. මක්නිසාද තමා දුටු සහෝදරයාට ප්‍රේම නොකරනවා නම්, තමා නුදුටු දෙවියන්වහන්සේට ප්‍රේමකරන්ට ඔහුට නුපුළුවන. [21] දෙවියන්වහන්සේට ප්‍රේම කරන තැනැත්තේ තමාගේ සහෝදරයාටත් ප්‍රේමකරාවා යන මේ ආඥාව අපි උන්වහන්සේගෙන් ලැබීමුව.

_*අප ප්‍රේමකරන්නේ උන්වහන්සේ පළමුකොට අපට ප්‍රේමකළ නිසාය.*_

රෝහල් ඇඳෙහි වැතිර සිටින මාගේ මිතුරිය වන මාග්‍රට් අසළ මා වාඩිවී වෙනත් රෝගීන්ගේ, වෛද්‍ය කාර්ය මණ්ඩලයේ සහ අමුත්තන්ගේ කාර්ය බහුලභාවය ගැන බලා සිටියෙමි. ඒ අසළ තම රෝගී මව සමග සිටි තරුණ කාන්තාවක් මාග්‍රට්ගෙන් ඇසුවේ “ඔබව බලන්න නිතරම පැමිණෙන මෙම අය කව්ද?” කියාය. “ඒ මගේ සභා පවුලේ අයය” කියා මාග්‍රට් පිළිතුරු දුන්නාය. මෙවැනි දෙයක් කිසිදා ඇය දැක නැති බවත් ඇයට හැඟුණේ බොහෝ අමුත්තන් “ස්පර්ශ වන ප්‍රේමයක්” වගේ කියා එම තරුණ කාන්තාව පැවසුවාය. මාග්‍රට් සිනහවකින් යුතුව පිළිතුරු දුන්නේ “ඒ සියල්ල පැමිණෙන්නේ දෙවියන්වහන්සේගේ පුත්‍රයාණන් වන යේසුස් ක්‍රිස්තුස්වහන්සේ තුළින් අප දෙවියන්වහන්සේට දක්වන ප්‍රේමය නිසාය” යනුවෙනි.

ඇයගේ පිළිතුරෙන් මාග්‍රට් දෝංකාර දුන්නේ අවසාන කාලයෙහි ප්‍රේමයෙන් පූර්ණ වූ ලිපි තුනක් ලිවූ යොහන් ගෝලයාටය. ඔහුගේ පළමු ලිපියෙහි ඔහු කීවේ “දෙවියන්වහන්සේ ප්‍රේමයය. ප්‍රේමයෙහි පවතින්නා දෙවියන්වහන්සේ තුළ සිටී. දෙවියන්වහන්සේද ඔහු තුළ සිටින සේක” (1 යොහන් 4:16) යනුවෙනි. එනම්
“යේසුස්වහන්සේ දෙවියන්වහන්සේගේ පුත්‍රයාණන් බව (15 පදය) පිළිගන්නා අය තුළ දෙවියන්වහන්සේ ජීවත් වන බව “උන්වහන්සේගේ ආත්මයාණන්වහන්සේ” (13 පදය) මගින් අපි දැන ගන්නෙමු. අප අන් අයට ප්‍රේමයෙන් සළකන්නේ කෙසේද? “අප ප්‍රේමකරන්නේ උන්වහන්සේ පළමුකොට අපට ප්‍රේම කළ නිසාය” (19 පදය).

දෙවියන්වහන්සේගේ ප්‍රේමය නැමති ත්‍යාගය නිසා මටවත් අපගේ සභාවේ අන් අයටවත් මාග්‍රට් බැලීමට යාම කරදරයක් මෙන් පෙණුනේ නැත. මා දුන්නාට වඩා මට ලැබුණි. මාග්‍රට්ගෙන් පමණක් නොව ඇයගේ ගැළවුම්කරුවාණන් වන යේසුස්වහන්සේ ගැන ඇය දුන් අලංකාර සාක්‍ෂියෙනි. අද දවසේ දෙවියන්වහන්සේ ඔබ තුළින් අන් අයට ප්‍රේම කරන්නේ කෙසේද

_❤️ඔබගේ ජීවිතයේ දෙවියන්වහන්සේගේ ප්‍රේමයෙන් දැක ඔබව පුදුම කළ කෙනෙක්ව ඔබ දුටුවේ කවදාද? අන් අයට සේවය කිරීමට උන්වහන්සේගේ ප්‍රේමය ඔබව උද්දීපනය කරන්නේ කෙසේද?_

*🙏ප්‍රේමණීය දෙවියන්වහන්ස, මම ප්‍රේම කරන්නේ ඔබවහන්සේ මට පළමුකොට ප්‍රේම කළ නිසාය. ඔබවහන්සේගේ ආත්මය මා තුළින් බැබළෙන පිණිස මාගේ ප්‍රේමය වැඩි කළ මැනව.*

අපගේ දිනපතා භෝජනය s/=

21/12/2024

Daily Brrad 🍷🍞📖✝️
*විශ්මයට කව්ළුවක්*
දෙසැම්බර් 21 2024

එළිදරව් 21:23-27 එළිදරව් 22:1-5 SROV
[23] දෙවියන්වහන්සේගේ තේජසින් නුවර ආලෝකවූ බැවින්ද බැටළුපැටවාණන් එහි පහන වන බැවින්ද එහි බැබළීමට සූර්යයාවත් චන්ද්‍රයාවත් ඕනෑ නැත. [24] ජාතීහු එහි එළියෙහි ඇවිදිති. පොළොවේ රජවරු තමුන්ගේ තේජස ඊට ගෙනෙති. [25] එහි දොරටු දවාලේ කිසිසේත් වසනු නොලබන්නේය. මක්නිසාද එහි රාත්‍රියක් නොවන්නේය. [26] ඔව්හු ජාතීන්ගේ තේජසත් ගෞරවයත් ඊට ගෙනෙනවා ඇත. [27] බැටළුපැටවාණන්ගේ ජීවන-පොතෙහි ලියනලද්දවුන් මිස අපවිත්‍ර දෙයක්වත් පිළිකුල්වූ බොරුවූ දයෙක් කරන්නෙක්වත් කිසිසේත් එහි ඇතුළු නොවන්නේය.

[1] තවද දෙවියන්වහන්සේගේද බැටළුපැටවාණන්ගේද සිංහාසනයෙන් නික්ම එන්නාවූ පළිඟු මෙන් දීප්තිමත්වූ ජීවනදායක වතුර ඇති ගංගාවක්, [2] එහි වීථිය මැද ඔහු මට පෙන්විය. ගඟේ මේ පැත්තේද ඒ පැත්තේද දොළොස් ආකාරයක ඵල දරන, මාස්පතා ඵල දෙන, ජීවන-වෘක්ෂය තිබුණේය. ඒ වෘක්ෂයේ කොළ ජාතීන්ගේ සුවවීම පිණිසය. [3] කිසි ශාපයක් තවත් නොවන්නේය. එහි දෙවියන්වහන්සේගේද බැටළුපැටවාණන්ගේද සිංහාසනය වන්නේය. උන්වහන්සේගේ මෙහෙකරුවෝ උන්වහන්සේට මෙහෙකරන්නෝය; [4] ඔව්හු උන්වහන්සේගේ මුහුණ දකින්නෝය; උන්වහන්සේගේ නාමයද ඔවුන්ගේ නළල්වල තිබෙන්නේය. [5] එහි රාත්‍රියක් තවත් නොවන්නේය. පහන් ආලෝකයවත් සූර්යාලෝකයවත් ඔවුන්ට ඕනෑ නැත; මක්නිසාද ස්වාමිවූ දෙවියන්වහන්සේ ඔවුන්ට ආලෝකය දෙනසේක. ඔව්හු සදාකාලේටම රජකම්කරන්නෝය.

_*එහි රාත්‍රියක් තවත් නොවන්නේය. පහන් ආලෝකයවත් සූර්යාලෝකයවත් ඔවුන්ට ඕනෑ නැත; මක්නිසාද ස්වාමිවූ දෙවියන්වහන්සේ ඔවුන්ට ආලෝකය දෙනසේක.*_

ඡායාරූප ශිල්පි රොන් මරේ ශීත කාලගුණයට කැමැතිය. “සීතල යනු පැහැදිළි අහසක්” ඔහු විස්තර කරයි. “එයට විශ්මයේ කවුළුවක් විවර කළ හැකිය”.

ලෝකයේ ඉතා විශ්මිත ආලෝක සන්දර්ශන සෙවීම සඳහා රොන් ඇලස්කන් ඡායාරූප සංචාර සංවිධානය කරයි. එනම් උතුරු ආලෝකයක් වන “ඔරේරා බොරියාලිස්ය”. මරේ එය ගැන කථා කරන්නේ ඉතා ආත්මික අත්දැකීමක් ලෙසටය. ඔබ අහස පුරා දිලෙන විවිධ වර්ණ වල මෙම නැටුම දුටුවහොත් එසේ ඔහු කියන හේතුව ඔබට වැටහෙනු ඇත.

නුමුත් ආලෝක ඇත්තේ උතුරු කොටසේ පමණක් නොවේ. බොරියාලිස්ට සමාන “ඔරේරා ඔස්ටේ්‍රයාලිස්” ඒ සමගම දකුණේද සිදුවේ. එකම ආකාරයේ ආලෝකයන්ය. නත්තල් කථාව කියන යොහන් එඬේරුන් සහ ගවමඩුව ගැන නොකියා සෘජුව සැමට “ආලෝකය” වූ තැනන්වහන්සේ වෙත යන්නේය (යොහන් 1:4). පසුව යොහන් ස්වර්ගීය නුවරක් ගැන කියන විට ඔහු එම ආලෝකයේ මූලාශ්‍රය ගැන පවසයි. “දෙවියන්වහන්සේගේ තේජසින් නුවර ආලෝක වූ බැවින්ද බැටළු පැටවාණන් එහි පහන වන බැවින්ද එහි බැබළීමට සූර්යයාවත් චන්ද්‍රයාවත් ඕනෑ නැත” (එළිදරව් 21:23). මෙම ආලෝක මූලාශ්‍රය යේසුස්වහන්සේය. ඒ යොහන් 1 හි දක්වා ඇති එකම ආලෝක මූලාශ්‍රය වන්නේය. අනාගතයේ මෙම නිවහනේ ජීවත්වන්නාවූ අයට “එහි රාත්‍රියක් තවත් නොවන්නේය. පහන් ආලෝකයවත් සූර්යයාලෝකයවත් ඔවුන්ට ඕනෑ නැත. මක්නිසාද ස්වාමිවූ දෙවියන්වහන්සේ ඔවුන්ට ආලෝකය දෙන සේක” (22:5).

ඔරේරා බොරියාලිස් සහ "ඔස්ටේ්‍රයාලිස්” මැවූ තැනන්වහන්සේගේ මෙම ආලෝකය අපගේ ජීවිත විදහා දක්වන විට අපි සත්‍යයවූ විශ්මයට කවුළු විවර කරන්නෙමු.

_❤️ස්වාභාවික විශ්මයන් ඔබව මවිත කළේ කවදාද? හෝ කෙසේද? දෙවියන්වහන්සේගේ ආලෝකය ලොවට මුදා හැරීමෙන් ඔබව වළක්වන්නේ කුමක්ද?_

*🙏විශ්වයේ මැවුම්කරුවාණෙනි, රාත්‍රී අහසේ අලංකාරය ඔබවහන්සේ ලෝකයේ සත්‍යය ආලෝකය බව මට සිහිපත් කෙරේවා.*

අපගේ දිනපතා භෝජනය s/=

20/12/2024

Daily Bread🍷🍞📖✝️
*සත්‍යය කිසිදා වෙනස් නොවේ*
දෙසැම්බර් 20 2024

යෙසායා 40:1-8
[1] මාගේ සෙනඟ සනසන්න, සනසන්නැයි නුඹලාගේ දෙවියන්වහන්සේ වදාරනසේක. [2] යෙරුසලමට කරුණාවෙන් කථාකොට: ඇගේ සටන කෙළවරවීයයි කියාද ඇගේ වරද ගෙවී ගියේය කියාද ඇගේ සියලු පාපවලට ස්වාමීන්වහන්සේ අතින් ඈට දෙගුණයක් ලැබුණේය කියාද ඈට මොරගසා කියන්න. [3] කාන්තාරයෙහි ස්වාමීන්වහන්සේගේ මාර්ගය සාදා, අපේ දෙවියන්වහන්සේට වනයෙහි මාවතක් සමතලාකරන්න. [4] සියලු මිටි තැන් උස්වන්නේය, සියලු කඳු හා හෙල් පහත්කරනු ලබන්නේය. ඇද තැන් ඇදහරිනු ලබන්නේය, රළු තැන් සමතලාකරනු ලබන්නේය. [5] එවිට ස්වාමීන්වහන්සේගේ තේජස ප්‍රකාශවන්නේය, සියලු මනුෂ්‍යයෝ එක්ව එය දකින්නෝය. මක්නිසාද ස්වාමීන්වහන්සේගේ මුඛය එය වදාළසේකැයි මොරගසන්නෙකුගේ හඬක් වන්නේය. [6] මොරගසන්නැයි කියන කෙනෙකුගේ හඬක් වේ. මම කුමක් කියා මොරගසම්දැයි කෙනෙක් ඇසීය. මාංසමයවූ සියල්ලෝ තෘණය, ඔවුන්ගේ සියලු අලංකාරය කෙතේ මලක් මෙන්ය. [7] ස්වාමීන්වහන්සේගේ හුස්ම ඒවාට ගසන බැවින් තණකොළ වියළෙයි, මල පරවෙයි; සැබවින් සෙනඟ තෘණය. [8] තණකොළ වියළෙයි, මල පරවෙයි. නුමුත් අපේ දෙවියන්වහන්සේගේ වචනය සදාකාලේටම පවත්නේය කියාය.

_*තණකොළ වියළෙයි, මල පරවෙයි. නුමුත් අපේ දෙවියන්වහන්සේගේ වචනය සදාකාලේටම පවත්නේය කියාය.*_

මගේ පුතා සේවියර් කුඩා කාලයේ මම ඔහුට ප්‍රබන්ධ ළමා කථාවක් කියෙව්වෙමි. ඒ තමා විසින් නම් තබන ලද පෑනක් ගැන ගුරුවරියකට විරුද්ධව කැරළි ගැසූ පිරිමි ළමයෙක් ගැනය. ඔහු විසින් තබන ලද නම පෑනට පාවිච්චි කරන ලෙසට ඔහු පහේ පංතියේ ළමුන් පෙළඹවූහ. ඔහු තැබූ නම පිළිබඳ ආරංචිය මුළු නගරය පුරාම පැතුරුණි. ක්‍රම ක්‍රමයෙන් රට පුරා ජනතාව ඔවුන් පෑන් වලට සඳහන් කළ නම වෙනස් කළේ පිරිමි දරුවා සෑදු නම යථාර්ථයක් ලෙස ඔවුන් පිළිගත් හෙයිනි.

ඉතිහාසය පුරා විකෘතිවූ මනුෂ්‍යය වර්ගයා සැමදා වෙනස් වන ඔවුන්ට සරිලන යථාර්ථයක් සහ වෙනස්වන සත්‍යයන් පිළිගෙන තිබුණි. කෙසේ වෙතත් බයිබලය පෙන්වන්නේ එක් සත්‍යයකි. එකම සත්‍යය දෙවියන්වහන්සේ කෙනෙක් ගැන සහ ගැළවීම සඳහා එකම මාර්ගයක් ගැනය. ඒ මෙසියස්වහන්සේය. උන්වහන්සේ තුළින්
“ස්වාමීන්වහන්සේගේ තේජස ප්‍රකාශ වන්නේය” (යෙසායා 40:5). අනාගත වක්තෘ යෙසායා ස්ථිර කළේ සෙනඟ සියලු මැවිල්ල මෙන් තාවකාලික බවත් වැරදි කළ හැකි බවත් විශ්වාස කළ නොහැකි බවත්ය (6-7 පද). ඔහු පැවසුවේ “තණකොළ වියළෙයි. මල පරවෙයි. නුමුත් අපේ දෙවියන්වහන්සේගේ වචනය සදාකාලේටම පවත්නේය කියාය” (8 පදය).

එන්නාවූ මෙසියස් වහන්සේ ගැන වූ යෙසායාගේ අනාවැකිය යැපිය හැකි අත්තිවාරමක්ද ආරක්‍ෂිත බලකොටුවක්ද ස්ථිර බලාපොරොත්තුවක්ද දෙන්නේය. යේසුස්වහන්සේම වචනය වන නිසා අපට දෙවියන්වහන්සේගේ වචනය විශ්වාස කළ හැකිය (යොහන් 1:1). කිසිදා වෙනස් නොවන සත්‍යය යේසුස්වහන්සේය.

_❤️ අන් අය සත්‍යය වෙනකක් යයි පිළිගන්නා නිසා බයිබලය පවසන දෙය ප්‍රතික්‍ෂේප කිරීමට ඔබ පෙළඹුණේ කවදාද? යේසුස්වහන්සේ වචනය බව දැන ගැනීමත් දෙවියන්වහන්සේගේ පොරොන්දු ඉටුවීමත් ඔබට සහනය ගෙන ආවේ කෙසේද?_

*🙏ආදරණීය යේසුනි, බයිබලය නොවෙනස් වන සත්‍යය බව මම විශ්වාස කරන බව පෙන්වන ආකාරයට ජීවත් වීමට මට උපකාර කළ මැනව.*

අපගේ දිනපතා භෝජනය s/=

19/12/2024

Daily Bread🍷🍞📖✝️
*දෙවියන්වහන්සේ අපව දකින ආකාරය*
දෙසැම්බර් 19 2024

උත්පත්ති 1:1-10
[1] පටන්ගැන්මෙහිදී දෙවියන්වහන්සේ අහසත් පොළොවත් මැවූසේක. [2] පොළොව වනාහි පාළුව හිස්ව තිබුණාය; ගැඹුර පිට අන්ධකාරය විය. දෙවියන්වහන්සේගේ ආත්මය ජලමතුයෙහි හැසිරෙමින් සිටිසේක. [3] දෙවියන්වහන්සේ: එළිය වේවයි කීසේක; එවිට එළිය විය. [4] එළිය යහපත් බව දෙවියන්වහන්සේ දුටුසේක. දෙවියන්වහන්සේ අන්ධකාරයෙන් එළිය වෙන්කොට [5] එළියට දවාලය කියාද අන්ධකාරයට රාත්‍රියය කියාද නම් තැබූසේක. සවස විය, උදය විය, ඒ එක දවසක්ය. [6] දෙවියන්වහන්සේ: ජල මධ්‍යයෙහි අවකාශයක් වේවා, එය කරණකොටගෙන ජලය ජලයෙන් වෙන්වේවයි කීසේක. [7] දෙවියන්වහන්සේ අවකාශය සාදා අවකාශයට උඩින් තිබුණු ජලයෙන් අවකාශයට යටින් තිබුණු ජලය වෙන්කළසේක; ඒ එසේ විය. [8] දෙවියන්වහන්සේ අවකාශයට අහසය කියා නම් තැබූසේක. සවස විය, උදය විය. ඒ දෙවෙනි දවසක්ය. [9] දෙවියන්වහන්සේ: අහසට යටින් තිබෙන ජලය එක් තැනකට රැස් වේවා, වියළි බිම පෙනේවයි කීසේක. ඒ එසේ විය. [10] දෙවියන්වහන්සේ: වියළි බිමට පොළොවය කියාද රැස්වූ ජලයට මුහුදය කියාද නම් තැබූසේක. දෙවියන්වහන්සේ ඒ යහපත් බව දුටුසේක.

_*දෙවියන්වහන්සේ ඒ යහපත් බව දුටුසේක.*_

ඒ 1968 වසරය. ඇමරිකාව වියට්නාමය සමග යුද්ධයක පැටලීි සිටියේය. නගරවල ජාතිවාදය පිපිරෙමින් තිබූ අතර ප්‍රසිද්ධ දෙදෙනෙකු ඝාතනය වී තිබුණි. ඊට වසරකට පෙර ගගනගාමීන් තිදෙනෙකුගේ ජීවිත ගින්නෙන් විනාශ වුනි. එම නිසා සඳට යෑම දීර්ඝ සිහිනයක් බඳු විය. කෙසේ වෙතත් නත්තලට දින කිහිපයකට පෙර ඇපලෝ 8 යැවීමට හැකි වුනි.

සඳ වටා ගිය පළමු මිනිස් දූතනය එය විය. බෝර්මන්, ඇන්ඩර්ස් සහ ලවල් යන යානයේ සේවකයන් සියලු දෙනාම ඇදහිල්ලේ මනුෂ්‍යයන් වූ අතර ඔවුහු නත්තලට පෙර දිනයේ පණිවුඩයක් බෙදා ගත්හ. “පටන්ගැන්මේදී දෙවියන්වහන්සේ අහසත් පොළොවත් මැවූ සේක” (උත්පත්ති 1:1). ඒ දවස්වල ලොව රූපවාහිනීවල වැඩි දෙනෙක් නැරඹූ සිද්ධිය වූයේ එයයි. මිලියින ගණනක් දෙනා දෙවියන්වහන්සේ පොළොව දෙස බලන ආකාරය චිත්‍රයක් ලෙස බෙදා ගත්හ. ෆ්‍රෑන්ක් බෝර්මන් කියවීම අවසන් කළේ “දෙවියන්වහන්සේ ඒ යහපත් බව දුටු සේක” (10 පදය) කියමිනි.

සමහර විට අප දෙස බැලීම ඉතා අසීරුය. අප ගිලී සිටින්නාවූ සියලු අසීරුතාවන් දෙස බලා යහපත් දෙයක් දැකීම අපහසුය. නමුත් අප මැවීමේ කථා පුවතට ගොස් අප දෙස දෙවියන්වහන්සේ බලන ආකාරය ගැන සෙවිය හැකිය. “දෙවියන්වහන්සේ තමන් ස්වරූපයෙන් මනුෂ්‍යයා මැවූ සේක” (27 පදය). තවත් දිව්‍ය දැක්මක් අපි බලමු. “දෙවියන්වහන්සේ ...... ලෝකයාට ප්‍රේම කළ සේක” (යොහන් 3:16). අද දෙවියන්වහන්සේ ඔබව මැවූ බවත් පාපය තිබුණද උන්වහන්සේ ඔබ තුළ ඇති යහපත දකින බවත් උන්වහන්සේ මැවූ ඔබට උන්වහන්සේ ප්‍රේම කරන බවත් මතක තබා ගන්න.

_❤️ඔබ එරී සිටින අසීරුතාවයන් සහ පාපයන් මොනවාද? ඔබ දෙවියන්වහන්සේගේ ස්වරූපයෙන් මවා තිබීම ඔබට අර්ථවත් වන්නේ කෙසේද?_

*🙏ආදරණීය දෙවියන්වහන්ස, මම මේ දිනවල අරගල කරමින් සිටිමි. ඔබවහන්සේ මා තුළින් දකින දෙය ඔබවහන්සේ දකින ආකාරයෙන් දකින්න මට උපාකර කළ මැනව.*

අපගේ දිනපතා භෝජනය s/=

18/12/2024

Daily Bread🍷🍞📖✝️
*අප ඇහුම්කන් දෙන්නේ කාටද*
දෙසැම්බර් 18 2024

ද්වීතීය කථාව 18:15-18
[15] මා සමාන අනාගතවක්තෘකෙනෙකු නුඹලා අතරෙන් නුඹේ සහෝදරයන්ගෙන් නුඹේ දෙවිවූ ස්වාමීන්වහන්සේ නුඹට නැගුටුවා දෙනවා ඇත; නුඹලා එතුමාට ඇහුම්කන් දෙන්නහුය. [16] ඒ හැටියට හොරේබ්හි රැස්වීමේ දවසේදී නුඹ කථාකොට: මා නොනස්නා පිණිස මාගේ දෙවිවූ ස්වාමීන්වහන්සේගේ හඬ නැවත මට නොඇසේවා, මේ මහත් ගින්නත් තවත් මට නොපෙනේවයි කියා නුඹේ දෙවිවූ ස්වාමීන්වහන්සේගෙන් නුඹ ඉල්ලුවෙහිය. [17] ස්වාමීන්වහන්සේ මට කථාකොට: ඔවුන් කී දේ මනා ලෙස කීවෝය. [18] මම ඔවුන්ගේ සහෝදරයන්ගෙන් නුඹ සමාන අනාගතවක්තෘ කෙනෙකු ඔවුන්ට නැගුටුවා දී මාගේ වචන ඔහුගේ මුඛයෙහි තබන්නෙමි, මා ඔහුට අණකරන සියල්ල ඔහු ඔවුන්ට කියන්නේය.

_*මා සමාන අනාගතවක්තෘකෙනෙකු නුඹලා අතරෙන් නුඹේ සහෝදරයන්ගෙන් නුඹේ දෙවිවූ ස්වාමීන්වහන්සේ නුඹට නැගුටුවා දෙනවා ඇත; නුඹලා එතුමාට ඇහුම්කන් දෙන්නහුය.*_

“මම හදිසි අවස්ථාවක් ප්‍රකාශ කළ යුතුයි. මගේ ගුවන් නියමුවා මිය ගිහින්”. ඩග් වයිට් වෙවුලමින් තම ගුවන් යානයට උපදෙස් දෙන පාලක මැදිරියට දැනුම් දුන්නේය. ගුවන් ගතවී විනාඩි කිහිපයකට පසුව ඩග් විසින් කුලියට ගත් ගුවන් යානයේ ගුවන් නියමුවා මිය ගියේය. වඩා නවීන නොවූ ගුවන් යානයක මාස තුනකට වඩා පුහුණුවක් ලබා නොසිටි ඩග් ගුවන් නියමු කුටියට පා තැබීය. ගුවන් යානය ගොඩ බස්සන තුරු ඔහු සමග කථා කරමින් සිටි ප්‍රාදේශීය ගුවන් පාලකයන්ට ඩග් ප්‍රවේසමෙන් සවන් දුන්නේය. පසුව ඩග් පැවසුවේ “ඔව්හු ඒකාන්ත ගිනි මරණයකින් මගේ පවුල ගළවා ගත්තේය” කියාය.

අපගේ ජීවිත අභියෝග වලදී අපට මඟ පෙන්විය හැකි එක් අයෙක් සිටී. ඉහ්‍රායෙල්වරුන්ට කථා කරමින් මෝසෙස් කීවේ “මා සමාන අනාගතවක්තෘ කෙනෙකු නුඹලා අතරෙන් ..... නුඹේ දෙවිවූ ස්වාමීන්වහන්සේ නුඹට නැගුටුවා දෙනවා ඇත. නුඹලා එතුමාට ඇහුම්කන් දෙන්නහුය” (ද්විතිය කථාව 18:15) කියාය. උන්වහන්සේගේ සෙනඟ වෙනුවෙන් පත් කරන ලද දෙවියන්වහන්සේගේ අනාගතවක්තෘන් පෙළකට මෙම පොරොන්දුව අදාළ වේ. එසේම එය මෙසියස් වහන්ස් ගැනද කථා කරයි. පේත්‍රෑස් සහ ස්තේපන් යන දෙදෙනාම මෙම අවසන් අනාගතවක්තෘ යේසුස්වහන්සේ බව පවසයි (ක්‍රියා 3:19-22; 7:37; 51-56).

දෙවියන්වහන්සේගේ ප්‍රේමණීය සහ ණැනවත් උපදෙස් අපට කීමට පැමිණියේ උන්වහන්සේය (ද්විතීය කථාව 18:18).

ක්‍රිස්තුස්වහන්සේගේ ජීවිත කාලයේදී පියවූ දෙවියන්වහන්සේ පැවසුවේ “මේ මාගේ ප්‍රේමවන්ත පුත්‍රයාය. මොහුට ඇහුම්කන් දීපල්ලා” (මාර්ක් 9:7) කියාය. ණැනවත්ව ජීවත් වී විනාශ නොවී නොදැවී සිටීමට දේව වචනය සහ ශුද්ධාත්මය මගින් කථා කරන යේසුස්වහන්සේට අපි ඇහුම්කන් දෙමු. උන්වහන්සේට ඇහුම් කන් දීමෙන් පූර්ණ වෙනස ඇති කරයි.

_❤️මෙම ලෝකයේ ක්‍රිස්තුස්වහන්සේගේ හඬ ඇසීම අභියෝගයක් වන්නේ මන්ද? අද දවසේ උන්වහන්සේගේ ණැනවත් සහ ප්‍රේමණීය වචන හොඳින් අනුගමනය කරන්න හැක්කේ කෙසේද?_

*🙏ආදරණීය යේසුනී, ඔබවහන්සේගේ හඬට ඇහුම්කන්දී කීකරුවන්න මට උපකාර කළ මැනව.*

අපගේ දිනපතා භෝජනය s/=

17/12/2024

Daily Bread🍷🍞📖✝️
*අපගේ ගැළවුම්කරුවූ යේසුස්වහන්සේ*
දෙසැම්බර් 17 2024

ශු. මතෙව් 1:18-25
[18] යේසුස් ක්‍රිස්තුස්වහන්සේගේ උත්පත්තිය මෙසේ විය. උන්වහන්සේගේ මවුවූ මරියා යෝසෙප්ට විවාහබස් දී සිටියදී, ඔවුන් එක්වෙන්ට පළමුවෙන්, ශුද්ධාත්මයාණන් කරණකොටගෙන ඈ ගර්භිණීවූ බව දැනගන්නාලදී. [19] ධර්මිෂ්ඨයෙක්ව සිටි ඇගේ පුරුෂයාවූ යෝසෙප් ඈ නින්දාවට පමුණුවන්ට නොකැමතිව, රහසින් ඈ අත්හරින්ට සිතුවේය. [20] නුමුත් ඔහු මේ කාරණා කල්පනාකරමින් සිටියදී, බලව, ස්වාමීන්වහන්සේගේ දූතයෙක් ස්වප්නයකින් ඔහුට පෙනී: දාවිත්ගේ පුත්‍රවූ යෝසෙප්, නුඹේ භාර්යාවවූ මරියා පාවාගන්ට භය නොවන්න. මක්නිසාද ඈ තුළ පිළිසිඳුණාවූ යමක් ඇද්ද එය ශුද්ධාත්මයාණන් කරණකොටගෙනය. [21] ඈ පුත්‍රයෙකු බිහිකරන්නීය; උන්වහන්සේට යේසුස් යන නාමය තබන්න; මක්නිසාද තමන්ගේ සෙනඟ ඔවුන්ගේ පාපවලින් ගළවන්නේ උන්වහන්සේයයි කීවේය. [22] මේ සියල්ල සිද්ධවූයේ– බලව, කන්‍යාව ගර්භිණීව පුත්‍රයෙකු බිහිකරන්නීය; උන්වහන්සේට එම්මානුවෙල් යන නාමය තබනවා ඇත. කියා [23] ස්වාමීන්වහන්සේ අනාගතවක්තෘ ලවා කියෙවු කීම සම්පූර්ණවන පිණිසය. ඒ නාමයේ අර්ථය නම් දෙවියන්වහන්සේ අප සමඟය යනුයි. [24] එවිට යෝසෙප් නින්දෙන් පිබිද, ස්වාමීන්වහන්සේගේ දූතයා ඔහුට අණකළ ලෙස කරනුයේ, තමාගේ භාර්යාව පාවාගත්තේය; [25] නුමුත් ඈ පුත්‍රයෙකු බිහිකරන තුරු ඔහු ඈ නොහැඳින්නේය. ඔහු උන්වහන්සේට යේසුස් යන නාමය තැබීය.

_*උන්වහන්සේට යේසුස් යන නාමය තබන්න; මක්නිසාද තමන්ගේ සෙනඟ ඔවුන්ගේ පාපවලින් ගළවන්නේ උන්වහන්සේයයි කීවේය.*_

පකිස්තානු මිටියාවතක් හරහා ආරම්භ කළ සාමාන්‍ය කේබල් රථ ගමනක් බිහිසුණු අත්දැකීමක් බවට පත් විය. ගමන ආරම්භ වී ටික වේලාවකින් එය දරා තිබුණු කම්බි දෙකක් කැඩුණි. පාසැල් දරුවන් ඇතුලු මගීින් අට දෙනෙක් අඩි සිය ගණනක් ඉහළ අහසෙහි සිරවුනි. දුෂ්කර තත්ත්වය නිසා පකිස්තානු හමුදාව හෙලිකොප්ටර් සහ අනිකුත් ආධාරකද සහිතව පැය දොළහක මෙහෙයුමක් කළේය.

එම හොඳින් පුහුණු වූ ගළවන්නන් ප්‍රශංසාවට ලක් විය යුතුය. නමුත් පාපයෙන් සහ මරණයෙන් අපව ගළවා ගැනීම සඳහා වූ යේසුස්වහන්සේගේ සදාකාලික දූතනය හා සසඳන විට ඔවුන්ගේ කාර්යය ඉතා අල්පය. ක්‍රිස්තුස්වහන්සේගේ උපතට පෙර දේවදූතයෙක් යෝසෙප්ට උපදෙස් දුන්නේ මරියාගේ ගර්භණීභාවය ශුද්ධාත්මයෙන් වන නිසා ඇයව කැඳවා ගෙන යන ලෙසටය (මතෙව් 1:18, 20). තම පුත්‍රයාට යේසුස් යන නම තබන ලෙසද යෝසෙප්ට දන්වන ලදී. මන්දයත් “තමන්ගේ සෙනඟ ඔවුන්ගේ පාපවලින් ගළවන්නේ උන්වහන්සේ” නිසා වන බැවිනි (21 පදය). මෙම නම පළමු ශත වර්ෂයේදී පොදු නමක් වුවද ගැළවුම්කරුවෙක් වීමට සුදුසු වූයේ මෙම දරුවා පමණි (ලූක් 2:30-32). හරි වෙලාවේදී යේසුස්වහන්සේ පැමිණියේ පසුතැවිලි වී උන්වහන්සේව විශ්වාස කරන සියල්ලන් ගළවන පිණිසය.

සදාකාලිකව දෙවියන්වහන්සේගෙන් වෙන්වූ මිටියාවතක පාපයේ සහ මරණයේ කේබල් රථයේ අපි සියලු දෙනාම සිරවී සිටියෙමු. නමුත් උන්වහන්සේගේ ප්‍රේමයෙන් සහ කරුණාවෙන් යේසුස්වහන්සේ අපව ගළවා ගැනීමට පැමිණ අපගේ ස්වර්ගීය පියාණන්වහන්සේ වෙතට අපව ගෙන ආ සේක.

_❤️මරියාගේ දරුවාට තිබෙන්නේ කුමන වැදගත් දූතනයක්ද? යේසුස්වහන්සේ ස්ථිර කළ ගැළවීම ඔබට අර්ථවත් වන්නේ කෙසේද?_

*🙏ආදරණීය යේසුනි, ඔබවහන්සේගේ අනුග්‍රහය නිසා වරක් නැතිවී සිටි මාව දැන් සම්භවී ඇත යන යථාර්ථයේ ප්‍රීති වන්න මට උපකාර කළ මැනව.*

අපගේ දිනපතා භෝජනය s/=

Address

Colombo

Website

Alerts

Be the first to know and let us send you an email when ශු. බයිබලීය දැණුම / Holy Bible Study posts news and promotions. Your email address will not be used for any other purpose, and you can unsubscribe at any time.

Shortcuts

Share

Category