06/10/2026
හිරු අවරගිරට ප්‍රේම බඳින සැන්දෑ සමයක් අභිමුව..කිසිම හැල් හොල්මනක් නැතිව ..නිරුත්තර වුණ, කඳුළු හංගන පුංචි අවිහිංසකාවියෙ...ගොම්මන් අඳුරේම අඳුර රජයල ජීවිතේම අඳුරු කරගන්න හිතන්න එපා මගෙ දුව..
අතීත මතක් වලට කොනිති ගහන පපු ගැඹුර සුව වෙන්නම ඕන තප්පරයක් ගානෙම..සසර කියන්නේ පතන්නේ තරම් සුන්දර ඉසව්වක් නෙවෙයි මගෙ දුවේ..
පපුවෙම තියාන ආදරේ කරන, කරපු මිනිස්සු වෙනස් නොවී රැකගන්න අපට බෑ..හුස්ම ගන්නෙත් කොහොමද කියල හිතාගන්න බැරිව..මගෙ දුව තව මහ රැයවල් කීයක් ඔහොම අඬන්න හිතාන ඉන්නවා ද.. මගෙ දුව කොහොම දරාගනීවිද කියලාවත් නොහිතා.. වෙනස් වෙන මිනිස්සු... වැරදි කර කර ගෑණු කම් පාගන්න හදන මිනිස්සු..
එහෙම මිනිසුන් මගෙ දුවගේ ජීවිතේ ඉන්න ඕන අය නෙවෙයි, අසීමිත මානසික වද හිංසන දෙන මිනිසුන්වම ආය ආයම පතන්නේ තරම් කෙළෙස් වලට වහල් වෙන්න එපා මගෙ දුවේ...
පිළිගන්න ඕනවටත් වඩා ප්‍රත්‍යක්ෂම වුණ සාක්ෂි තියෙද්දීත් වැරදි බවට,මගෙ දුව තවත් වැඳ වැටෙන වනම්..සෙනහස හිඟා කනවා නම්..එතන තියෙන්නේ මගෙ දුවගේ මෝහයේ බලවත් කම.. තමන්ගෙ ජීවිතේ දවස් ගානේ විනාශ කරපු පුද්ගලයෙක් අත හැර ගන්න බෑ කියන්නේ..එතන තියෙන්නේ දැඩි ලෝභය, තෘෂ්ණාව...
මගෙ දුව ඒ රූපේ මගෙ කරගෙන ආදරේ කරපු නිසා,ඒ කටහඬ ආත්මයෙන් ගත්ත නිසා ඒ ස්පර්ශ පහසට තියන ඇල්ම ආශාව ..කාමුකත්වය නිසයි ඔය හිත වැලපෙන්නේ මගෙ දුවේ..ඒක තමයි පිළිගන්න ම අමාරුයි වුණත් සහසිකම ඇත්ත..
ඒකයි තමා දැඩිව බැඳුණු තැන නරක වුණත් අත ඇරගන්න වීර්යය නැත්තේ,හිතේ තියන බලවත් තෘෂ්ණාව නිසාමයි..
ඉතින් පුංචි සුරංගනාවියෙ..මේ අහන්න..
කෙළෙස් තමා සන්තකයේ පවත්වන්න ඔට්ටු වෙන්න එපා ,වෙහෙස තමන්ටමයි.. වෙනස් වෙලා යන ධර්මතා එක්ක ස්ථිර ගිවිසුම් ගහන්න අපි කාටවත්ම බෑ...
නරක නපුරු කෙනෙක් නිසා මගෙ පුංචි සුරංගනාවිගෙ ජීවිතේ අඳුරු වෙන්න දෙනව නම්,අර නරක පුද්ගලයා ට වහල් කම් කරන නරක කෙනෙක් ම වෙනව මගෙ දුවත්..
ස්ත්‍රීය ස්වභාවයෙන්ම බැඳෙන්නේ හැගීම් එක්ක නිසා වේදනායි බව මට තේරෙනවා මගෙ දුව, ඒත්..මගෙ දුව දැන් නැගිටින්න ඕන..
කාමරේ තනි වෙලා මූසල කමට මගෙ දුවව යට වෙන්න දෙන්න එපා.. ලස්සන ට ඉන්න.. පිළිවෙලට ඉන්න.. හොඳ ට නාගන්න.. පිරිසිදු වෙන්න.. උණුසුම් තේ එකක් බොන්න..
පහනක් දල්වලා, හඳුන්කූරු සුවඳ අතුරලා මොහොතකට සන්සුන් ව ඉඳගෙන ඔය තරු ඇස් දෙක පියානෝ, හොඳින් හුස්ම ගන්න... හුස්ම වාර කිහිපයකට පස්සේ ඇස් අරින්න.. එකක් හොඳට මතක් තියාගන්න රත්තරන් දුවේ..ඇස් අරින්න ඕන ජීවිතේ මම කොහොම හරි නැගිටිනවා කියන අධිෂ්ඨානයෙන්මයි..
දැන් ඔය ෆෝන් එකෙ තියන පණිවිඩ සේරම මකලා දාන්න අදාල පාර්ශවේ..හිත කැළ එන්න පුළුවන් කියල හිතෙන ෆොටෝ එකක්වත් තියාගන්න එපා.. ඒවත් මකලා දාන්න..
දැන් දවස් ගානක් මග ඇරපු අම්මා අප්පච්චි එක්ක කතාබහ කරන්න..ආස දෙයක් කරන්න.. ඇවිදින්න යන්න.. පුළුවන් තරම් කාර්ය බහුල වෙන්න.. කාලයත් එක්ක සුවපත් වෙන්න මගෙ දුවට අනිවාර්ය යෙන් ම පුළුවන්!
ධර්මයෙන් හැඩ කරලා ජීවිතේ දිව්‍ය විමානයක් කරගන්න කැප වෙන්න මගෙ දුව,වැරදුණ අතීතේ අනාගතයට පන්නරයක් කරගෙන වර්තමානයේ කැප වෙන්න සුන්දර ඉලක්ක වෙනුවෙන්...
ඉතින් නැගිට ගෙන ලස්සන ගමනක් යන්න ඔය පා දෙක ශක්තිමත් නම්,පියවර තියපු මොහෙතෙම මෙහෙණින් වහන්සේවත් දැනුවත් කරන්න..ඒක සැනසීම ට කාරණා වේවී..
සදා ජය පතමි... පින්සර සුරඟනන් ට!
නුවරඑළියේ ධම්මශ්වේතා මෙහෙණින් වහන්සේ.
