06/07/2026
Մխիթարեան Միաբանութեան Միջին Արեւելքի Մեծաւոր՝ Հայր Մեսրոպ վրդ. Սիւլահեան, Պիքֆայայի Մխիթարեան Դպրեվանքին մէջ բարեկամական այցելութեամբ հիւրընկալեց ՀՅԴ Բիւրոյի անդամ, Միջին Արեւելքի պատասխանատու եւ Հայկական երեսփոխանական պլոքի ներկայացուցիչ պատուարժան Յակոբ Բագրատունին։
Ջերմ ու մտերմիկ մթնոլորտի մէջ տեղի ունեցած հանդիպման ընթացքին, երկու կողմերը լայնօրէն անդրադարձան Մխիթարեան Միաբանութեան ներկայ առաքելութեան, կրթական, մշակութային եւ հոգեւոր գործունէութիւններուն, ինչպէս նաեւ Միաբանութեան դիմագրաւած մարտահրաւէրներուն եւ ապագայի ծրագիրներուն։
Զրոյցին ընթացքին նաեւ քննարկուեցան Միջին Արեւելքի հայութեան յուզող ներկայ իրավիճակը, շրջանին մէջ տիրող իրադարձութիւններու ազդեցութիւնը հայկական գաղութներուն վրայ, եւ ազգային, կրթական ու համայնքային կեանքին առնչուող բազմաթիւ հարցեր։
Երկուստեք վերահաստատուեցաւ ազգային ու հոգեւոր հաստատութիւններու միջեւ գործակցութեան ամրապնդման, համատեղ ճիգերու եւ փոխադարձ աջակցութեան կարեւորութիւնը՝ ի նպաստ հայ ժողովուրդին, յատկապէս Միջին Արեւելքի հայկական գաղութներու կենսունակութեան եւ ազգային ինքնութեան պահպանման։
#Մխիթարեան #ՄխիթարեանՄիաբանութիւն
