27/12/2021
Anaaf isa duwwaatu beeka bu’aa ba’ii na wajjin deeme
Kanan hiriyaakoo dhoksu waan hundumaan isatti hime
Lafti an itti gatamee ture as miti baay’ee fagoodha
Akkamitti asiin na geesse Gooftaa ko kun naaf hibboodha
Waan baay’eedhaaf na gargaare inni an dursee si filadhee
Fokkuu baay’ee dhokfadheera fannookee da’oo godhaadhee
Duwwaa qodaakoo naaf guutte malee eegee nan taasifne
Mannikee waan hundaa qaba harka ormaa nan ilaalchifne
Malkaa baay’ee na ceesifte barruukee gubbaatti na baattee
Sichis nuffitee nan buuftu Gooftaa atoo garaa jabaattee
Haala ilaaltee nan dheessinee guyyaa rakkoof gidiraatti
An takkaa leeyya’ee hin beeku Gooftaa sitti waamamuutti
Aara galfii lafa onaa kan taliila namaaf yaasu
Sichi ergaan si mi’eeffadhee homtinuu sittii nan baasu
Dhaadannoo waan biraa hin qabu dhiiga keetu na fayyisee
Qaraaniyoon siif ragaadha waa’ee keetiif yoon callisee
Utuu ati wabii naan taanee gatii cubbuu maaltu baasaa
Madaa’uu keetiinan fayye oolmaa keetu garaa na raasa
Qabata kan biraa hin qabuu fayyuun koo sababii keefi
Haadhaaf abbaarra naaf caalta madaallii hin qabdu ati anaafi
Baroota keessatti hin turre fureen cubbuu kan of laatu
Naanoo jechatu na hanqatee maqaan kee naaf haa ulfaatu
Kan kee kuni baay’ee narra baay’atee gatiin oolma kee
Daangaa darbee sammuu kootiin ol ta’ee naaf gargaarsi kee
Gochaa keetu dandeettii koon ol ta’ee lafee koo nyaata
Yoon maal jedhe jecha kamiinan garaa si ciibsa laata
