SOURP HAGOP - Ս. Յակոբ Եկեղեցի

05/04/2026

ՔՐԻՍՏՈՍԻ ՀՐԱՇԱՓԱՌ ՅԱՐՈՒԹԵԱՆ ՏՕՆԸ ՀԱՆԴԻՍԱՒՈՐ ՍՈՒՐԲ ՊԱՏԱՐԱԳՈՎ ՆՇՈՒԵՑԱՒ ՍՈՒՐԲ ՅԱԿՈԲ ԵԿԵՂԵՑՒՈՅ ՄԷՋ

Քրիստոսի հրաշափառ Սուրբ Յարութեան տօնի առաւօտուն, Կիրակի, 5 Ապրիլ 2026-ին, հաւատացեալներ համախմբուեցան Էշրէֆիէի Սուրբ Յակոբ եկեղեցւոյ մէջ Սուրբ եւ Անմահ Պատարագի մատուցման։ Ս. եւ Անմահ պատարագը մատոյց եւ յաւուր պատշաճի քարոզեց եկեղեցւոյ հոգեւոր հովիւ` Արժ. Տ. Սիմէոն Քհնյ. Կարապետեան։

Ս. Սեղանին սպասարկեցին եկեղեցւոյ սարկաւագներն ու դպիրները։ Սուրբ Պատարագի երգեցողութիւնը կատարեց դպրաց դասը, խմբավարութեամբ դպրապետ Բարշ. Ֆիլիփ Սրկ. Ժինեանի։

Յաւարտ Սուրբ Պատարագին, ներկայ հաւատացեալ ժողովուրդը հաւաքուեցան եկեղեցւոյ սրահէն ներս, ուր տեղի ունեցաւ հիւրասիրութիւն եւ աւանդական հաւկթախաղ։ Եւ անգամ մը եւս իրարու շնորհաւորելով աւետեցին ըսելով`

ՔՐԻՍՏՈՍ ՅԱՐԵԱՒ Ի ՄԵՌԵԼՈՑ.
ՕՐՀՆԵԱԼ Է ՅԱՐՈՒԹԻՒՆՆ ՔՐԻՍՏՈՍԻ։

03/04/2026

ՔՐԻՍՏՈՍԻ ԹԱՂՄԱՆ ԿԱՐԳԸ ՍՈՒՐԲ ՅԱԿՈԲ ԵԿԵՂԵՑՒՈՅ ՄԷՋ

Աւագ Ուրբաթ, 3 Ապրիլ 2026-ի երեկոյեան ժամը 4-ին, Էշրէֆիէի Սուրբ Յակոբ եկեղեցւոյ մէջ կատարուեցաւ մեր Տիրոջ՝ Յիսուս Քրիստոսի Թաղման Կարգը, հանդիսապետութեամբ` Գերպ. Տ. Շնորհք Ծ. Վրդ. Աշըգեանի, սարկաւագներուն ու դպիրներուն աղօթքասացութեամբ եւ հոգեթով շարականներու երգեցողութեամբ։ Եկեղեցին կը վայելէր ներկայութիւնը մեծ թիւով հաւատացեալներու եւ մասնակցութիւնը Հ.Մ.Ը.Մ. Պէյրութի սկաուտներուն։

Եկեղեցական կարգէն ետք, թաղման հանդիսաւոր թափօրը տեղի ունեցաւ շրջանիս մէջ։
Թափօրէն վերադարձին գերապատիւ հայր սուրբը Քրիստոսի յաղթական Սուրբ Խաչով օրհնեց հաւատացեալ ժողովուրդը, որմէ ետք, մեր եկեղեցւոյ աւանդութեան համաձայն, հաւատացեալները խոնարհեցան Քրիստոսի գերեզմանին առջեւ։

03/04/2026

ԱՒԱԳ ՀԻՆԳՇԱԲԹԻՆ Ս. ՅԱԿՈԲ ԵԿԵՂԵՑՒՈՅ ՄԷՋ

Ս. ՀԱՂՈՐԴՈՒԹԵԱՆ ՊԱՏԱՐԱԳ

Աւագ Հինգշաբթի, 2 Ապրիլ 2026-ի առաւօտեան ժամը 10-ին, եկեղեցւոյս հոգեւոր հովիւ` Արժ. Տ. Սիմէոն Քհնյ Կարապետեան մատուցեց Ս. Հաղորդութեան հաստատման Ս. եւ Անմահ Պատարագը, ի յիշատակ Վերջին Ընթրիքին։

ՈՏՆԼՈՒԱՅ

Երեկոյեան ժամը 4-ին, հանդիսաւոր կերպով կատարուեցաւ Ոտնլուայի հոգեպարար արարողութիւնը։
Ոտնլուան կատարեց եւ քարոզեց Մեծի Տանն Կիլիկիոյ Կաթողիկոսութեան միաբաններէն` Գերպ. Տ. Վաղինակ Աբղ. Մելոյեան:

Աղօթքներու, շարականներու ընդմէջէն յիշատակուեցաւ մեր Տիրոջ Յիսուս Քրիստոսի կատարած այն հրաշալի արարքին, ուր Ան իր աշակերտներուն ոտքերը լուաց, նոյնպէս Քրիստոսի օրինակին հետևելով գերապատիւ հայր սուրբը մէջքին ղենջակ կապած լուաց խորանին վրայ գտնուողներուն ոտքերը եւ ապա փոխանցեց օրուան խորհուրդը հաւատացեալ ժողովուրդին։

ԽԱՒԱՐՄԱՆ ԳԻՇԵՐ

Ժամը 7:30-ին, սկիզբ առաւ մեր Տիրոջ ու Փրկիչին՝ Յիսուս Քրիստոսի Կարգ Չարչարանացը (Խաւարման Գիշեր)։

Մեր ժողովուրդի զաւակներուն ներկայութեամբ՝ աւետարանական ընթերցումներուն, հոգեզմայլ շարականներուն եւ «Ո՞ւր ես, մայր իմ» հոգեթով ու յուզումնախառն երգին ընդմէջէն յիշատակուեցաւ Քրիստոսի վերջին ընրթրիքի, Յուդայի մատնութեան եւ Քրիստոսի չարչարանքներուն դրուագները։

Եկեղեցական արարողութեան աւարտին, «Խաչի Քո Քրիստոս» շարականին երգեցողութենէն ետք, եկեղեցւոյս քահանայ հայրը «Պահպանիչ» աղօթքով օրհնեց հաւատացեալ ժողովուրդը։

02/04/2026

01/04/2026

ՏԱՍԸ ԿՈՒՍԱՆԱՑ ՅԻՇԱՏԱԿԻ ԺԱՄԵՐԳՈՒԹԻՒՆ ԿԱՏԱՐՈՒԵՑԱՒ ՍՈՒՐԲ ՅԱԿՈԲ ՄԷՋ

Աւագ Երեքշաբթի, 31 Մարտ 2026-ի երեկոյեան ժամը 05։00-ին, Էշրէֆիէի Սուրբ Յակոբ եկեղեցւոյ մէջ տեղի ունեցաւ տասը կոյսերու յիշատակի ժամերգութիւն, որ կ՚ընդգրկէ Քրիստոսի երկրորդ գալուստեան խորհուրդը։

Արարողութեան մասնակցեցան իգական սեռի հաւատացեալներէն խումբ մը։ Անոնք եկեղեցական շապիկ հագած ու լապտերներ բռնած՝ ներկայացուցին աւետարանական տասը կոյսերը։

Աւետարանի ընթերցումի պահուն, աշակերտները վիճակ քաշեցին. «իմաստուն»ները իրենց մոմերը վառած պահեցին, խորհրդանշելով Տէրը դիմաւորելու արթուն ու պատրաստ կեցած իմաստուն կոյսերը, իսկ «յիմար»ները՝ մարեցին, ներկայացնելով անտարբեր ու անպատրաստ կոյսերը։

30/03/2026

ԾԱՂԿԱԶԱՐԴԻ ՏՕՆԸ Ս. ՅԱԿՈԲ ԵԿԵՂԵՑՒՈՅ ՄԷՋ

Մեր Տիրոջ Յիսուս Քրիստոսի յաղթական մուտքը Երուսաղէմ, հանդիսաւորապէս նշուեցաւ Ս. Յակոբ եկեղեցւոյ մէջ։ Տօնին առիթով, մատուցուեցաւ հանդիսաւոր Ս. եւ Անմահ Պատարագ, ինչպէս նաեւ Պատարագի աւարտին տեղի ունեցաւ թափօր-անդաստան եւ դռնբացէքի արարողութիւն։

Ս. եւ Անմահ Պատարագը մատոյց, յաւուր պատշաճի քարոզեց եւ դռնբացէքին հանդիսապետեց, Մեծի Տանն Կիլիկիոյ Կաթողիկոսութեան երիտասարդ միաբաններէն` Հոգշ. Տ. Մովսէս Աբղ. Եօսուլքանեան։

Պատարագին աղօթակից դարձաւ եկեղեցւոյս հոգեւոր հովիւ` Տ. Սիմէոն Քհնյ. Կարապետեանը, իսկ Ս. Խորանին սպասարկեցին եկեղեցւոյս սարկաւագներն ու դպիրները։ Պատարագի երգեցողութիւնը կատարեց դպրաց դասը, ղեկավարութեամբ դպրապետ` Բարշ. Ֆիլիփ Սրկ. Ժինեանի։

Հաւատացեալներու հոծ բազմութիւնը ներկայ գտնուեցաւ պատարագին, հաղորդուեցաւ օրուան խորհուրդով եւ աւարտին մասնակից դարձաւ շքեղ թափօր-անդաստանին եւ դռնբացէքի հոգեպարար արարողութեան։

Բարի Ծաղկազարդ եւ Օրհնեալ Աւագ Շաբաթ։

27/03/2026

Սիրով կը հրաւիրենք մեր ժողովուրդի զաւակներուն, մասնաւորաբար երիտասարդ ընտանիքներուն, ներկայ գտնուելու եւ մասնակցելու Սուրբ Պատարագին ու մանուկներու թափօրին, ինչպէս նաեւ տեղի ունենալիք Դռնբացէքի արարողութեան։

23/02/2026

Ս. ՅԱԿՈԲ ԵԿԵՂԵՑՒՈՅ ՆՆՋԵՑԵԱԼ ԲԱՐԵՐԱՐՆԵՐՈՒՆ ՀՈԳԵՀԱՆԳԻՍՏ

Արտաքսման Կիրակիին, 22 Փետրուարին, յաւարտ Ս. եւ Անմահ Պատարագի, տեղի ունեցաւ հոգեհանգստեան պաշտօն եկեղեցւոյս բոլոր ննջեցեալ բարերարներուն համար։
Պատարագէն ետք ներկաները հաւաքուեցան եկեղեցւոյս «Տիրան Պապիկեան» սրահէն ներս։ Յիշատակի հաւաքի ընթացքին խօսք առաւ թաղական խորհուրդի ատենապետ` Յակոբ Էքմէքճեան, ուր յիշեց բարերարները եւ անոնց մեծ ներդրումը եկեղեցւոյ պայծառացման աշխատանքին մէջ, ապա մատուցուեցաւ հոգեսուրճ։
Նշենք որ պատարագէն առաջ, թաղական խորհուրդի անդամներ այցելեցին բարերարներու շիրիմները եւ մոմավառութեամբ ու աղօթքով իրենց յարգանաքի տուրքը մատուցեցին անոնց քաղցր յիշատակին։