19/08/2026
ພິທີປິດຊຸດຝືກອົບຮົມວຽກງານຄຸ້ມຄອງ ເອກະສານ ໃຫ້ແກ່ອົງການພຸດທະສາສະໜາສັມພັນລາວ 4 ແຂວງພາກໃຕ້ແລະ 1 ແຂວງພາກກາງ.
ການຝືກອົບຮົມ ໃນຄັ້ງນີ້ມີ ສຳມະນາກອນເຂົ້າຮ່ວມທັງໝົດ 95 ອົງ/ທ່ານ ທີ່ມາຈາກ 5 ແຂວງຄື: ຄະນະ ອພສ ແຂວງສາລະວັນ, ຄະນະ ອພສ ແຂວງຈໍາປາສັກ, ຄະນະ ອພສ ແຂວງເຊກອງ, ຄະນະ ອພສ ແຂວງອັດຕະປື, ຄະນະ ອພສ ແຂວງສະຫວັນນະເຂດ ແລະ ຄະນະ ອພສ 5 ຕົວເມືອງຂອງແຂວງສາລະວັນ, ພ້ອມດ້ວຍຄະນະການນຳຂັ້ນແຂວງ, ຂັ້ນເມືອງ, ແລະຂັ້ນບ້ານ ເຂົ້າຮ່ວມຢ່າງພ້ອມພຽງ.
ການຝຶກອົບຮົມປະກອບມີ: ການແຕ່ງເອກະສານ, ປະເພດເອກະສານ, ການສໍາເນົາເອກະສານ, ການຈັດເກັບເອກະສານ, ເອກະສານທາງລັດຖະການ, ການບໍລິຫານ ຫ້ອງການຂອງອົງການພຸດທະສາສະໜາສັມພັນລາວແຕ່ລະຂັ້ນ,
ການຝຶກອົບຮົມວຽກງານການຄຸ້ມຄອງເອກະສານ ແມ່ນວຽກງານໜຶ່ງທີ່ຈຳເປັນ ແລະ ມີ ຄວາມສໍາຄັນ ໂດຍສະເພາະການຮ່າງເອກະສານທາງລັດຖະການ ທີ່ນໍາໃຊ້ໃນວຽກງານບໍລິຫານຫ້ອງການ ຂອງອົງການພຸດທະສາສະໜາສັມພັນລາວ ໃນແຕ່ລະແຂວງ. ເພື່ອເຮັດໃຫ້ວຽກງານການບໍລິຫານຫ້ອງການ ມີຄວາມເຂັ້ມແຂງໜັກແໜ້ນທາງດ້ານກົງຈັກການຈັດຕັ້ງ, ແບບແຜນວິທີການເຮັດວຽກ ໃຫ້ຖືກຕ້ອງ ສອດຄ່ອງກັບຫຼັກສິນທໍາຄໍາສອນ, ທຳມະນູນສົງລາວ, ແນວທາງນະໂຍບາຍ, ດໍາລັດ, ກົດໝາຍ ແລະ ລັດຖະທຳມະນູນ ແຫ່ງ ສປປ ລາວ,
#ຈຸດປະສົງ:
ເພື່ອສ້າງຄວາມເຂັ້ມແຂງໃຫ້ແກ່ພຣະສົງໃນການບໍລິຫານງານຫ້ອງການ, ການຄຸ້ມຄອງ, ການຮ່າງເອກະສານທາງລັດຖະການ ໃຫ້ມີຄວາມຖືກຕ້ອງ ສອດຄ່ອງ ກັບບັນດາ ນິຕິກຳຕ່າງໆ ທີ່ປະກາດໃຊ້ໃນແຕ່ລະໄລຍະ, ພ້ອມດຽວກັນນີ້ກໍເພື່ອສ້າງຄວາມເປັນເອກະພາບໃຫ້ແກ່ໃຫ້ເຄື່ອນໄຫວວຽກງານຂອງພຣະສົງ, ການປະສານງານກັບການຈັດຕັ້ງພັກ-ລັດແຕ່ລະຂັ້ນ ມີຄວາມຖືກຕ້ອງ, ສະດວກ ວ່ອງໄວ ຫຼາຍຂຶ້ນຕື່ມ.
#ເນື້ອໃນ
- ວັນທີ 15-17 ສິງຫາ 2026 ທາງຜູ້ເຂົ້າຮ່ວມຝຶກອົບຮົມ ໄດ້ຮັບຟັງການບັນຍາຍເອກະສານ ກ່ຽວກັບຄວາມຮູ້ພື້ນຖານກ່ຽວກັນນິຕິກຳກ່ຽວຂ້ອງກັບການຮ່າງເອກະສານເຊັ່ນ: ກົດໝາຍວ່າດ້ວຍ ການສ້າງຕິນິກຳ, ກົດໝາຍວ່າດ້ວຍ ເອກະສານ, ຄຳແນະນຳກ່ຽວກັບການຈັດຕັ້ງປະຕິບັດ ກົດໝາຍວ່າເອກະສານ. ນອກຈາກນີ້ ຍັງໄດ້ຮັບຟັງກ່ຽວກັບ ລະບຽບ ແລະ ຫຼັກການຄຸ້ມຄອງເອກະສານທາງການ, ການຮ່າງ, ການກວດກາເອກະສານ, ການຈັດຊັ້ນຄວາມລັບ, ການກໍານົດລະຫັດເອກະສານ, ການລົງທະບຽນເອກະສານຂາເຂົ້າ-ຂາອອກ ໃຫ້ຖືກຕ້ອງຕາມລະບຽບການຂອງຮ່າງເອກະສານລັດ. ເຕັກນິກການຈັດເກັບ ແລະ ຄົ້ນຫາເອກະສານ: ວິທີການຈັດ ໝວດໝູ່ເອກະສານ ເພື່ອໃຫ້ສາມາດຄົ້ນຫາເອກະສານໄດ້ຢ່າງວ່ອງໄວ ແລະ ບໍ່ສູນຫາຍ, ເຊິ່ງເປັນການນຳສະເໜີໂດຍທ່ານ ແສງດາວເດດ ກັດຕິຍະສັກ ຮອງຫົວໜ້າກົມເອກະສານແຫ່ງຊາດ ຫ້ອງວ່າການສຳນັກງານນາຍົກລັດຖະມົນຕີ;
- ວັນທີ 18 ສິງຫາ 2026 ທາງຜູ້ເຂົ້າຮ່ວມໄດ້ຮັບຟັງການເຜີຍແຜ່ເອກະສານກ່ຽວລະບົບການຈັດຕັ້ງຂອງສູນກາງອົງການພຸດທະສາສະໜາສັມພັນ ແຫ່ງ ສປປ ລາວ, ໂຄງຮ່າງທາງດ້ານບຸກຄະລາກອນ, ຂໍ້ກຳນົດຂອງຫ້ອງການບໍລິຫານງານ ສູນກາງອົງການພຸດທະສາສະໜາສັມພັນ ແຫ່ງ ສປປ ລາວ, ຂອດການປະສານງານກັບພາກສ່ວນການຈັດຕັ້ງພັກ-ລັດ, ການກຳນົດຮ່າງເອກະສານທີ່ເປັນມາດຕະຖານຂອງແຕ່ລະແຂວງໃຫ້ມີຄວາມເປັນເອກະພາບກັນໃນການຈັດຕັ້ງປະຕິບັດຕົວຈິງ ແລະ ສອດຄ່ອງກັບນິຕິກຳ ທີ່ວາງອອກໃນແຕ່ລະໄລຍະ ເຊິ່ງນຳສະເໜີໂດຍ ພຣະອາຈານ ອາໂນຊາ ໄມຕີຈິດ ຮອງຫົວໜ້າຫ້ອງການບໍລິຫານງານ ສູນກາງອົງການພຸດທະສາສະໜາສັມພັນ ແຫ່ງ ສປປ ລາວ;
- ວັນທີ 19 ສິງຫາ 2026 ທິດສະດີ ຫຼັກການ ການເຮັດວຽກງານຂອງອົງການພຸດທະສາສະໜາ ສັມພັນ ແຫ່ງ ສປປ ລາວ ແຕ່ລະຂັ້ນ, ຫຼັກການບໍລິຫານໃນຮູບຂອງຄະນະສົງ, ຫຼັກທັມມະ ທີ່ຖືກນຳໃຊ້ເຂົ້າໃນການຈັດຕັ້ງປຕິບັດວຽກງານຕົວຈິງ ຂອງຜູ້ບໍລິຫານອົງການ.
#ປະເມີນຜົນໄດ້ຮັບ.
ຜ່ານການຈັດຕັ້ງປະຕິບັດຝຶກອົບຮົມເປັນໄລຍະເວລາ 5 ວັນ ສາມາດປະເມີນໄດ້ຜົນໄດ້ຮັບ ດັ່ງນີ້:
ດ້ານຄວາມຮູ້-ທັກສະ: ໄດ້ຮັບຄວາມເຂົ້າໃຈທີ່ເລິກເຊິ່ງກ່ຽວກັບຂັ້ນຕອນການຄຸ້ມຄອງເອກະສານແບບມືອາຊີບ ລະບົບການບໍລິຫານງານອົງການພຸດທະສາສະໜາສັມພັນ ແຫ່ງ ສປປ ລາວ ແລະ ໄດ້ຫຼຸດຜ່ອນຂໍ້ຜິດພາດໃນການຮ່າງເອກະສານທາງການ;
ການນໍາໃຊ້ສູ່ການປະຕິບັດງານ: ຈະນໍາເອົາເຕັກນິກການຄຸ້ມຄອງເອກະສານ ມາປັບປຸງເອກະສານຂັ້ນຂອງຕົນໃຫ້ຖືກຕ້ອງຕາມລະບຽບການ, ນຳເອົາຮູບການບໍລິຫານອົງການໃນແຕ່ລະຂັ້ນ ມານຳໃຊ້ເປັນແບບແຜນໃນການສ້າງຄວາມເຂັ້ມແຂງພາຍໃນອງົການຂັ້ນຂອງຕົນ.
ການສົ່ງຕໍ່ຄວາມຮູ້: ຈະຈັດກອງປະຊຸມແລກປ່ຽນບົດຮຽນໄລຍະສັ້ນ ໃຫ້ກັບທີມງານ ເພື່ອໃຫ້ມີຄວາມເຂົ້າໃຈ ແລະ ນຳໃຊ້ລະບົບຄຸ້ມເອກະສານ, ການບໍລິຫານອົງການໄປໃນທິດທາງດຽວກັນ.
ຝືກອົບຮົມ ຈະດໍາເນີນເປັນເວລາ 5 ວັນ, ເປີດໃນວັນທີ 15 ສິງຫາ 2026 ແລະ ໄດ້ສຳເລັດລົງ ໃນວັນທີ 19 ສິງຫາ 2026 ທີ່ຫ້ອງປະຊຸມ ພະແນກອຸດສາຫະກຳ-ການຄ້າແຂວງ, ເມືອງສາລະວັນ ແຂວງສາລະວັນ.
#ຂໍ້ມູນ:ບົດລະງານການຝຶກອົບຮົມຂອງ ອພສ ແຂວງ ສາລະວັນ
ລົງວັນທີ 19/8/2026
