23/08/2026
ຂໍເຊີນຍາດໂຍມພາລູກຫຼານມາສະມັກເຂົ້າອົບຮົມຂອງຄ້າຍທຳມະ ເພື່ອເຍົາວະຊົນ ແລະ ຊາວໝຸ່ມ
ຢູ່ ສູນພຸດທະທັມ ວັດສີພຸດທະບາດ ບ້ານຊຽງມ່ວນ ນະຄອນຫຼວງພະບາງ ຈະໄດ້ເປີດຮັບສະມັກນັບແຕ່ມື້ນີ້ຮອດວັນທີ່ 26 ສິງຫາ 2026
ເປັນກິດຈະກໍາທີ່ດີ ໃຫ້ລູກຫລານມາເຝິກອົບຮົມໃຫ້ລູກຫຼານເປັນຄົນດີຕໍ່ພໍ່ແມ່ ຮູ້ຈັກຮິດຄອງປະເພນີ ມີຄວາມເຄົາລົບຮັກແພງພໍ່ແມ່ ແລະ ໝູ່ເພື່ອນ
ເປີດອົບຮົມວັນທີ່ 26-30/8/2026 (ໃຊ້ເວລາ 5 ມື້) ມາເຊົ້າແລງກັບບ້ານ.
——————
ຈັດໂດຍຄະນະກໍາມາທິການເຜີຍແຜ່ສີລະທໍາ ແລະປະຕິບັດກໍາມະຖານ ສູນກາງ ຮ່ວມກັບອົງການພຸດທະສາສະນາສໍາພັນລາວ ແຂວງຫຼວງພະບາງ
ໄດ້ຈັດກິດຈະກຳຕັ້ງຄ້າຍທຳມະ ເພື່ອເຍົາວະຊົນ ແລະ ຊາວໜຸ່ມ ຂຶ້ນ ໂດຍມີຈຸດປະສົງດັ່ງນີ້:
1. ເພື່ອປູກຝັງຄຸນນະທຳ, ຈະລິຍະທໍາ,
2. ສົ່ງເສີມການຮຽນຮູ້ຫຼັກທໍາຄຳສອນຂອງພຸດທະສາສະໜາ
3. ສ້າງຈິດສຳນຶກໃຫ້ເຍົາວະຊົນ ແລະ ຊາວໜຸ່ມ ນຳຫຼັກທຳໄປປະຍຸກໃຊ້ໃນຊີວິດປະຈຳວັນ
ເຊິ່ງກິດຈະກໍາດັ່ງກ່າວຈະໄດ້ຈັດຂຶ້ນ ເປັນເວລາ 5 ວັນ( 26 ສີງຫາ ຫາ 30 ສິງຫາ 2026) ຈື່ງຈະສໍາເລັດ.
ຈຸດປະສົງຂອງການຈັດກິດຈະກໍາຕັ້ງຄ້າຍທັມມະໃນຄັ້ງນີ້ ກໍ່ເພື່ອເປັນການເຜີຍແຜ່ພຣະທັມຄໍາສອນຂອງພຣະພຸທທະເຈົ້າໃຫ້ເຂົ້າເຖິງ ບັນດາລູກຫຼານເຊຶ່ງເປັນຜູ້ສືບທອດອະນາຄົດຂອງຊາດ. ເພື່ອຈັດຕັ້ງປະຕິບັດແຜນຍຸດທະສາດ ຂອງກັມມະທິການເຜີຍແຜ່ສີລະທັມແລະປະຕິບັດກຳມະຖານ ທີ່ວ່າ “ຊຸມຊົນມີສີລະທັມ ສັງຄົມມີຄວາມຜາສຸກ”
ເພື່ອເຮັດໃຫ້ຊຸມຊົນໃນສັງຄົມ ລວມທັງເຍົາວະຊົນ ແລະ ຊາວໜຸ່ມ ໄດ້ຮຽນຮູ້ຄໍາສອນຂອງພຣະພຸດທະເຈົ້າ, ໄດ້ຮຽນຮູ້ສີລະທັມ, ໄດ້ຮຽນຮູ້ຄວາມເປັນຜູ້ມີລະບຽບວິໃນ, ຮູ້ຈັກເຄົາລົບກົດໝາຍບ້ານເມືອງ, ຮູ້ຈັກຮີດຄອງປະເພນີອັນດີງາມຂອງຊາດ, ມີຈິດໃຈອ່ອນໂຍນມີຄວາມເມດຕາ, ມີຄວາມກະຕັນຍູຮູ້ບຸນຄຸນ, ຮູ້ຈັກໃຊ້ເວລາໃຫ້ເປັນປະໂຫຍດໃນຊ່ວງພັກໂຮງຮຽນ ແລະ ຫ່າງໄກສິ່ງເສບຕິດ.
ເຊິ່ງເນື້ອໃນທີ່ນໍາມາສອນໃນຄັ້ງນີ້ ປະກອບມີ:
1. ສາສະນະພິທີ ແລະ ຮຽນຮູ້ການກາບ-ໄຫວ້ພຣະຣັຕຕະນະໄຕຣ
2. ມາລະຍາດຊາວພຸດ
3. ພຸດທະປະຫວັດ
4. ອະນິສົງຂອງການມີສິນ ແລະ ວິບາກທຸສິນ
5. ໜ້າທີ່ທີ່ຕ້ອງປະຕິບັດຕາມທິດ 6
6. ອະບາຍຍະມຸກ 6
7. ການຕອບແທນບຸນຄຸນມານດາບິດາຢ່າງສູງສຸດ
8. ຂັນ 5 ແລະ ກົດໄຕຣລັກ ໂດຍສັງເຂບ
9. ອະລິຍະສັດ 4 ໂດຍສັງເຂບ
10. ເລື່ອງຂອງກັມ ໂດຍສັງເຂບ
11. ອິດທິບາດ 4
12. ຝຶກວິປັດສະນາກັມມະຖານ (ສະມາທິ - ພາວະນາ ແລະ ຍ່າງຈົມກົມ); ທ່ອງຈໍາ ກົດອິທະປັດຈາຍະຕາ - ປະຕິຈະສະມຸປບາທ
13. ສິນຫ້າ
14. ຜົນຮ້າຍຂອງສິ່ງເສບຕິດ ແລະ ການນໍາໃຊ້ມືຖື ຫລື ສື່ອອນໄລ ທີ່ບໍ່ຖືກວິທີ
15. ຟັງທັມມະເທດສະໜາຈາກພຣະສົງຄູບາອາຈານ ໃນຫົວຂໍ້ຕ່າງໆ.
ສໍາລັບກິດຈະກຳຕັ້ງຄ້າຍທັມມະ ໃນຄັ້ງນີ້ ຖືເປັນໂອກາດອັນດີເລີດ ທີ່ຈະໄດ້ນໍາເອົາຫຼັກທໍາຄໍາສັ່ງສອນ ໃນພຸດທະສາສະໜາ ມາປູກຝັງ ແລະ ປັບໃຊ້ໃນຊີວິດປະຈຳວັນ ຂອງນ້ອງໆ. ບໍ່ວ່າຈະເປັນ ການເຝິກອົບຮົມ ສີລະທັມ ແລະ ຄວາມມີລະບຽບວິໃນ; ການເຝິກສະມາທິ-ກຳມະຖານ ເພື່ອສ້າງຄວາມສະຫງົບ, ສຸມຈິດໃຈ ແລະ ປັນຍາ.
ການສ້າງຈິດສໍານຶກ ຄວາມກະຕັນຍູ, ກະຕະເວທີ, ຄວາມຮັກຊາດ, ຄວາມສາມັກຄີ ແລະ ການຢູ່ຮ່ວມກັນໃນສັງຄົມຢ່າງມີຄວາມສຸກ ແລະເຊື່ອໝັ້ນວ່າ ນ້ອງໆ ຈະໄດ້ຮັບທັງຄວາມຮູ້ປະສົບການທີ່ດີ ແລະ ແຮງບັນດານໃຈ ໃນການເປັນຄົນດີ, ເປັນລູກທີ່ດີຂອງພໍ່ແມ່, ເປັນສິດທີ່ດີຂອງຄູ-ອາຈານ ແລະ ເປັນພົນລະເມືອງດີຂອງຊາດ ແລະຮຽກຮ້ອງໃຫ້ນ້ອງໆ ເຍົາວະຊົນ ແລະ ຊາວໜຸ່ມ ທຸກຄົນ ຈົ່ງຕັ້ງໃຈເກັບກ່ຽວເອົາຄວາມຮູ້ ແລະ ສີລະທັມ ນໍາໄປປະຕິບັດໃນຊີວິດປະຈຳວັນໃຫ້ເກີດປະໂຫຍດສູງສຸດ.
ຂອບໃຈຂໍ້ມູນ ພາບ-ຂ່າວ:ດາວເພັດ
_____________
#ຂໍບອກບຸນຍາດໂຍມ ຂໍເຊີນຍາດໂຍມຜູ້ໃນບຸນທັງມາຮ່ວມເປັນເຈົ້າພາບອຸປະຖຳ ງານບຸນຈັດຄ້າຍທັມມະ ເພື່ອເຍົາວະຊົນ ແລະ ຊາວໜຸ່ມ ທີ່ ສູນພຸດທະທັມ ວັດສີພຸດທະບາດ ບ້ານຊຽງມ່ວນ ຫຼວງພະບາງ ມີເຍົາວະຊົນເຂົາອົບຮົມປະມານ 100 ຄົນ ມີພຣະອາຈານມາເທດແລະນໍາພາປະຕິບັດປະມານ 10 ອົງ
ຂໍແຜ່ນໍ້າດື່ມນໍາທ່ານສັດທາທັງຫຼາຍ 100 ແພັກ ອາຫານທ່ຽງຄາບລະ 5 ລ້ານກີບ ຫຼື ຕາມກໍາລັງສັດທາ
#ຕິດຕໍ່ສອບຖາມ:
1. ຕິດຕໍ່ໂມທະນານໍາສາທຸສົມບັດ ບຸດຕະສິດ ຫົວໜ້າເຜີຍແຜ່ສິນລະທັມ ແລະ ຫົວໜ້າສູນພຸດທະທັມ 020 55080448
2. ຕິດຕໍ່ລົງສະມັກເຂົ້າອົບຮົມ ນໍາສາທຸສົມກຽດ ສະມະຫິໂຕ ໂທ 020 77827486
