24/06/2026
១ម៉ឺនរៀល ១ម៉ឺននាក់ ទាំងអស់គ្នាដើម្បីទារក និងកុមារនៅកម្ពុជា ពិធីប្រគល់ថវិកាបរិច្ចាគរបស់គណៈសង្ឃនាយនៃព្រះរាជាណាចក្រកម្ពុជា ក្នុងយុទ្ធនាការ ១ម៉ឺនរៀល ១ម៉ឺននាក់ ឆ្នាំ២០២៦ របស់មូលនិធិគន្ធបុប្ផាកម្ពុជា
ព្រឹកថ្ងៃពុធ ១០កើត ខែបឋមាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៤ ខែមិថុនា ឆ្នាំ២០២៦
គណៈសង្ឃនាយក គណៈមហានិកាយ នៃព្រះរាជាណាចក្រកម្ពុជា យាងដឹកនាំដោយ សម្ដេចព្រះមហាសុមេធាធិបតី អំ លីមហេង សម្ដេចព្រះសង្ឃនាយក គណៈមហានិកាយ នៃព្រះរាជាណាចក្រកម្ពុជា អមដោយ សម្តេចព្រះពោធិវ័ង្ស ណយ ច្រឹក សម្តេចព្រះព្រះសង្ឃនាយករងទី១ សម្តេចព្រះវនរ័ត មួង រ៉ា សម្តេចព្រះសង្ឃនាយករងទី២ សម្តេចព្រះពុទ្ធជ័យមុនី បណ្ឌិត ឃឹម សន សម្តេចព្រះសង្ឃនាយករងទី៣ សម្តេច ព្រះរាជាគណៈ ព្រះមន្ត្រីសង្ឃ គណៈមហានិកាយ បានប្រគល់ថវិកាចំនួន ១៦០,០០០,០០០ រៀល (មួយរយហុកសិបលានរៀល) ក្នុងយុទ្ធនាការ ១ម៉ឺនរៀល ១ម៉ឺននាក់ ឆ្នាំ២០២៦ ជូនលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្រ្តែយ៍កាកបាទក្រហមកម្ពុជា អគ្គស្នងការសមាគមកាយឬទ្ធិនារីកម្ពុជា និងជាប្រធានកិត្តិយសនៃមូលនិធិគន្ធបុប្ផាកម្ពុជា។
តាងនាមគណៈសង្ឃនាយក គណៈមហានិកាយ នៃព្រះរាជាណាចក្រកម្ពុជា សម្ដេចព្រះមហាសុមេធាធិបតី អំ លីមហេង សម្ដេចព្រះសង្ឃនាយក ទ្រង់បានសម្ដែងមុទិតាធម៌ ត្រេអរអនុមោទា និងការគាំទ្រដោយព្រះទ័យសោមនស្សចំពោះមូលនិធិគន្ធបុប្ផាកម្ពុជា ដែលបានធ្វើយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៦ សម្រាប់កុមារកម្ពុជា ក្រោមគំនិតផ្ដួចផ្ដើមនិងដឹកនាំយុទ្ធនាការដោយផ្ទាល់ពីសំណាក់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា ចាប់ផ្តើមពីថ្ងៃទី១ ដល់ថ្ងៃទី៣០ ខែមិថុនា ឆ្នាំ២០២៦ ដើម្បីចូលរួមអបអរសាទរទិវាកុមារអន្តរជាតិ ១ មិថុនា ឆ្នាំ២០២៦ និងកៀរគរថវិកាសប្បុរសធម៌ចូលរួមគាំទ្រកិច្ចដំណើរការនិងរក្សានិរន្តរភាពរបស់មន្ទីរពេទ្យគន្ធបុប្ផាទាំងនៅរាជធានីភ្នំពេញ និងនៅខេត្តសៀមរាប។
សម្ដេចព្រះមហាសុមេធាធិបតី សូមកោតសរសើរនិងវាយតម្លៃខ្ពស់ចំពោះមន្ទីរពេទ្យគន្ធបុប្ផា ដែលមានបេសកកម្មពិនិត្យនិងព្យាបាលជំងឺដល់ទារកនិងកុមាររាប់ម៉ឺននាក់ក្នុងមួយឆ្នាំៗ ប្រកបដោយគុណភាព ដោយឥតគិតថ្លៃនិងមិនមានការរើសអើង។ ក្នុងរយៈពេល២៣ឆ្នាំ (១៩៩៥-២០១៨) ចុងក្រោយនេះ តាមរបាយការណ៍ មន្ទីរពេទ្យគន្ធបុប្ផា បានព្យាបាលអ្នកជំងឺសរុបចំនួន១៣លាននាក់និងកុមារមានស្ថានភាពជំងឺធ្ងន់ចំនួន ១,៥៦លាននាក់។ ទារកនិងកុមារជាច្រើន ដែលធ្លាប់ទទួលបានការពិនិត្យ ព្យាបាល ថែទាំពីមន្ទីរពេទ្យគន្ធបុប្ផា ហើយកុមារទាំងនោះ បាន ក្លាយជាមូលធនមនុស្សចូលរួមចំណែកថែរក្សារក្សាសន្តិភាព និងការអភិវឌ្ឍប្រទេសជាតិ ក្រោមការដឹកនាំ របស់រាជរដ្ឋាភិបាលនីតិកាលមុនៗ ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខ និងរាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី តែងយកចិត្តទុកដាក់ខ្ពស់ចំពោះសុខមាលភាពសង្គម ជាពិសេសសុខភាពកុមារកម្ពុជា។
សម្ដេចព្រះសង្ឃនាយក សម្ដេចព្រះសង្ឃនាយករង សម្ដេច ព្រះរាជាគណ ព្រះមន្ត្រីសង្ឃ ព្រះសង្ឃគ្រប់ព្រះអង្គ នៅពេលបានឃើញមន្ទីរពេទ្យគន្ធបុប្ផា ប្រជាពលរដ្ឋខ្មែរតែងនឹកដល់បុគ្គលអស្ចារ្យមួយរូបគឺ លោក សាស្ត្រាចារ្យវេជ្ជបណ្ឌិត បេអាត រិចឈ្នឺរ (Prof. Dr. Beat Richner) ស្ថាបនិកមូលនិធិគន្ធបុប្ផា ដែលពេញមួយជីវិតរបស់លោកបានលះបង់ដើម្បីសុខភាពកុមារកម្ពុជា ខ្ញុំព្រះករុណា អាត្មាភាព ជឿជាក់ថា បដិសន្ធិវិញ្ញាណរបស់លោកសាស្ត្រាចារ្យវេជ្ជបណ្ឌិត បេអាត រិចឈ្នឺរ ពិតជាអញ្ជើញទៅសោយសុខក្នុងសុគតិភព ព្រោះថា ព្រះពុទ្ធបរមគ្រូបានត្រាស់សម្ដែងថា “នរជនណាបានមើលថែអ្នកជំងឺ បានបុណ្យដូចមើលថែព្រះសម្មាសម្ពុទ្ធ”។
គណៈសង្ឃនាយក គណៈមហានិកាយ នៃព្រះរាជាណាចក្រកម្ពុជា ក្នុងព្រះបរមនាមសម្តេចព្រះអគ្គមហាសង្ឃរាជាធិបតី នន្ទ ង៉ែត សម្តេចព្រះមហាសង្ឃរាជ ព្រះមេគណទាំង២៥រាជធានី ខេត្ត ព្រះគ្រូអនុគណ ក្រុង ស្រុក ខណ្ឌ និងព្រះចៅអធិការគ្រប់វត្តទូទាំងប្រទេស បានចូលរួមបំផុសចលនាក្នុងយុទ្ធនាការដ៏មានសារសំខាន់នេះយ៉ាងសកម្មផុសផុល ក្នុងស្មារតី «ខ្មែរជួយខ្មែរ» តាមរយៈគណៈសង្ឃនាយក ដោយបានប្រមូលថវិកាសរុបចំនួន ១៦០,០០០,០០០ រៀល (មួយរយហុកសិបលានរៀល) ដើម្បីជូនដល់មូលនិធិគន្ធបុប្ផាកម្ពុជា និងចូលរួមចំណែកជាមួយរាជរដ្ឋាភិបាលសម្រាប់សកម្មភាពមនុស្សធម៌ពិនិត្យនិងព្យាបាលកុមារកម្ពុជា។
ឆ្លៀតក្នុងវរោកាសនៃពិធីប្រគល់ថវិកាបរិច្ចាគរបស់គណៈសង្ឃនាយនៃព្រះរាជាណាចក្រកម្ពុជា ក្នុងយុទ្ធនាការ ១ម៉ឺនរៀល ១ម៉ឺននាក់ ឆ្នាំ២០២៦របស់មូលនិធិគន្ធបុប្ផាកម្ពុជាពិធីនេះ សម្ដេចព្រះមហាសុមេធាធិបតី អំ លីមហេង សម្ដេចព្រះសង្ឃនាយក គណៈមហានិកាយ នៃព្រះរាជាណាចក្រកម្ពុជា បានចម្រើនពរថ្លែងអំណរគុណយ៉ាងជ្រាលជ្រៅ ចំពោះ លោកជំទាវបណ្ឌិត ពេជ ចន្ទមុន្នី ប្រធានកិត្តិយសនៃមូលនិធិគន្ធបុប្ផាកម្ពុជា ដែលបានឆ្លៀតពេលអញ្ជើញដោយផ្ទាល់ផ្តល់គារវកិច្ចយ៉ាងកក់ក្តៅជាទីបំផុតនិងបានរៀបរាប់ថ្វាយនូវស្ថានភាពនៃបេសកកម្មរបស់មន្ទីរពេទ្យគន្ធបុប្ផា។ កាយវិការប្រកបដោយសប្បុរសធម៌ មេត្តា ករុណារបស់លោកជំទាវបណ្ឌិត ពិតជាបានផ្ដល់ភាពកក់ក្ដៅ និងក្ដីសង្ឃឹមសម្រាប់កុមារកម្ពុជាគ្រប់រូប។
សម្ដេចព្រះសង្ឃនាយក បានកោតសរសើរនិងវាយតម្លៃខ្ពស់ចំពោះសប្បុរសជនគ្រប់ទិសទីដែលបានចូលរួមចំណែកជាមួយលោកជំទាវបណ្ឌិតក្នុងការទ្រទ្រង់មន្ទីរពេទ្យគន្ធបុប្ផា សំដៅធានានិរន្តរភាពបេសកម្ម ប្រសិទ្ធភាព ក្នុងការពិនិត្យ ព្យាបាលទារកនិងកុមារកម្ពុជាជានិច្ចនិរន្តរ៍តទៅ និងថ្លែងអំណរគុណ ចំពោះ លោកវេជ្ជបណ្ឌិត ថ្នាក់ដឹកនាំ បុគ្គលិក មន្ទីរពេទ្យគន្ធបុប្ផាទាំងអស់ ដែលតែងខិតខំបំពេញការងារអស់ពីកម្លាំងកាយចិត្ត ក្នុងការមើលថែទាំកុមារ ដែលបានមកទទួលការពិនិត្យព្យាបាល និងសម្រាកនៅមន្ទីរពេទ្យគន្ធបុប្ផានេះ ប្រកបដោយកាយវិការសប្បុរសធម៌បំផុត។
សូមប្រគេនពរ និងជូនពរ សម្តេច ព្រះរាជាគណៈ ព្រះថេរានុត្ថេរ គ្រប់ព្រះអង្គ និងសូមជូនពរ លោកជំទាវបណ្ឌិត ឯកឧត្តមរដ្ឋមន្រ្តី ឯកឧត្តម លោកជំទាវ លោក លោកស្រី សូមបានប្រកបដោយពុទ្ធពរ៤ប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕
