09/06/2026
#ធម្មយាត្រាដេីម្បីបរិស្ថានលេីភ្នំខ្នងផ្សារ ស្រុកឱរ៉ាល់ ខេត្តកំពង់ស្ពឺ
សម្ដេចព្រះពុទ្ធជ័យមុនី បណ្ឌិត ឃឹម សន បាននិមន្តដឹកនាំព្រះសង្ឃ សិស្សគណ និងពុទ្ធបរិស័ទ ធ្វើដំណើរដោយថ្មើរជើងឡើងទៅកាន់ភ្នំខ្នងផ្សារ ក្នុងគោលបំណងផ្សារភ្ជាប់ព្រះពុទ្ធសាសនាជាមួយការអភិរក្សបរិស្ថាន។ ដំណើរនេះមិនត្រឹមតែជាការសិក្សាស្វែងយល់អំពីធម្មជាតិ រុក្ខជាតិ និងសត្វព្រៃប៉ុណ្ណោះទេ ប៉ុន្តែក៏ជាឱកាសដ៏មានតម្លៃក្នុងការដាស់ស្មារតីស្រឡាញ់ និងការពារធនធានធម្មជាតិដែលជាមរតកដ៏មានតម្លៃសម្រាប់មនុស្សជំនាន់ក្រោយផងដែរ។
ក្នុងរដូវវស្សាដ៏ស្រស់បំព្រងនេះ យេីងបានទស្សនាទេសភាពដ៏អស្ចារ្យនៃសមុទ្រពពក ព្រៃឈើខៀវស្រងាត់ ពន្លឺថ្ងៃរះ និងថ្ងៃលិចដ៏ត្រកាល ដែលបង្ហាញពីសម្រស់ និងភាពសម្បូរបែបនៃធម្មជាតិកម្ពុជា។ ទេសភាពទាំងនេះបានរំលឹកឱ្យយើងដឹងថា ធម្មជាតិមិនត្រឹមតែជាប្រភពជីវិតប៉ុណ្ណោះទេ ប៉ុន្តែថែមទាំងជាមូលដ្ឋាននៃសុខសន្តិភាព និងសុខុមាលភាពរបស់មនុស្សគ្រប់រូបផងដែរ។
កម្ពុជាមានព្រៃភ្នំ ទន្លេ និងប្រព័ន្ធអេកូឡូស៊ីដ៏មានតម្លៃ ដែលសមនឹងទទួលបានការការពារ ថែរក្សា និងអភិរក្សដោយការចូលរួមពីគ្រប់ភាគី ដើម្បីឱ្យធនធានធម្មជាតិទាំងនេះនៅតែបន្តផ្តល់ប្រយោជន៍ដល់សង្គម និងកូនចៅជំនាន់ក្រោយជារៀងរហូត។
📍 ស្ថិតនៅភូមិតាំងបំពង តំបន់រលាក់កង់ជើង ឃុំតាសាល ស្រុកឱរ៉ាល់ ខេត្តកំពង់ស្ពឺ។
ថ្ងៃអង្គារ ៩រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៩ ខែមិថុនា ឆ្នាំ២០២៦
June 9, 2026
#ធម្មយាត្រាព្រះពុទ្ធសាសនានិងបរិស្ថាន #ភ្នំខ្នងផ្សារ
#អភិរក្សបរិស្ថាន #ស្រឡាញ់ធម្មជាតិ
#កម្ពុជាបៃតង
