01/06/2026
នារសៀលនេះ ព្រះសាសនមុនី ហ៊ឹម ប៊ុនធឿន ធម្មត្ថេរោ បាននិមន្តជាព្រះអធិបតី ប្រទានឱវាទក្នុងពិធីបើកវគ្គបដិបត្តិវិបស្សនាវគ្គខ្លី លើកទី១០ រយៈពេល ១០ថ្ងៃ ដែលបានប្រព្រឹត្តទៅក្រោមបរិយាកាសស្ងប់ស្ងាត់ ពោរពេញដោយសទ្ធាជ្រះថ្លា និងបីតិសោមនស្សយ៉ាងក្រៃលែង។
ក្នុងពិធីដ៏អធិកអធមនេះ មានការនិមន្ត និងអញ្ជើញចូលរួមពីព្រះអនុប្រធាន ព្រះរាជាគណៈ ព្រះមន្ត្រីសង្ឃ ព្រះធម្មាចារ្យ ព្រះថេរានុត្ថេរៈ ធម្មាចារ្យ ធម្មាចារិនី សីលវន្ត និងសីលវតី ជាសិក្ខាកាមយោគី និមន្ត-អញ្ជើញចូលរួមសរុបចំនួន ៤០០ អង្គ/នាក់ ដើម្បីរួមគ្នាសិក្សា និងបដិបត្តិវិបស្សនាកម្មដ្ឋាន តាមគន្លងមាគ៌ាព្រះពុទ្ធសាសនាដ៏ផូរផង់។ វត្តមានយ៉ាងច្រើនកុះកររបស់សិក្ខាកាមគង់ស្នាក់នៅពុទ្ធមណ្ឌលវិបស្សនាធុរៈ បានបង្ហាញឱ្យឃើញពីសទ្ធាជ្រះថ្លា និងការយកចិត្តទុកដាក់ខ្ពស់ចំពោះការអប់រំទូន្មានចិត្ត និងការអនុវត្តធម៌ក្នុងជីវិតប្រចាំថ្ងៃ។
ក្នុងឱកាសនោះ ព្រះសាសនមុនី បានប្រទានឱវាទ និងធម្មីកថាដ៏មានតម្លៃ ដល់សិក្ខាកាម ឱ្យខិតខំប្រឹងប្រែងបដិបត្តិសមាធិ និងវិបស្សនាកម្មដ្ឋាន ដោយមានសតិ សមាធិ និងការអត់ធ្មត់ខ្ពស់។ ព្រះអង្គបានសង្កត់ធ្ងន់ថា ការបដិបត្តិធម៌ គឺជាមាគ៌ាដ៏ប្រសើរ ក្នុងការបណ្តុះចិត្តឱ្យស្ងប់សុខ បន្ថយកិលេស និងបង្កើនប្រាជ្ញា ដើម្បីឱ្យយល់ដឹងពីសភាពពិតនៃជីវិត និងអាចរស់នៅដោយសុខដុមរមនាក្នុងសង្គម។ ព្រះអង្គក៏បានលើកទឹកចិត្តឱ្យសិក្ខាកាមគ្រប់រូប ប្រឹងប្រែងហ្វឹកហាត់ផ្លូវចិត្តឱ្យបានខ្ជាប់ខ្ជួន ដោយយកការបដិបត្តិធម៌ជាគោល ។
សិក្ខាកាមទាំងអស់ បានថ្វាយខ្លួនសមាទានសីល និងបដិបត្តិសមាធិវិបស្សនាកម្មដ្ឋាន រយៈពេល ១០ថ្ងៃ សម្រាប់ព្រះសង្ឃ សីលវន្ត និងសីលវតី ដែលគង់ស្នាក់នៅពុទ្ធមណ្ឌលវិបស្សនាធុរៈ ដោយចាប់ផ្តើមពីថ្ងៃទី១ ដល់ថ្ងៃទី១០ ខែមិថុនា។ ការបដិបត្តិនេះ គឺជាឱកាសដ៏ប្រសើរសម្រាប់សិក្ខាកាម ក្នុងការហ្វឹកហាត់ អប់រំទូន្មានចិត្ត បណ្តុះសតិ អភិវឌ្ឍសមាធិ និងបង្កើនគុណធម៌ សីលធម៌ ដើម្បីឱ្យជីវិតមានភាពសុខដុមរមនា និងប្រកបដោយការយោគយល់អធ្យាស្រ័យ។
ដោយអានុភាពនៃការសិក្សា និងការបដិបត្តិសមាធិវិបស្សនាកម្មដ្ឋាននេះ សូមឱ្យព្រះសទ្ធម្ម ស្ថិតស្ថេររុងរឿងជានិច្ចនិរន្តរ៍ និងសូមឱ្យការបដិបត្តិធម៌នេះ ក្លាយជាមគ្គុទ្ទេសក៍ដ៏ប្រសើរ ក្នុងការដឹកនាំសាធុសប្បុរស ឱ្យបានប្រណិប័តន៍តាមផ្លូវបដិបទា ឈានទៅរកសេចក្តីសុខស្ងប់ សេចក្តីចម្រើនផ្លូវចិត្ត និងរួចផុតពីវដ្តទុក្ខតាមគន្លងព្រះសម្មាសម្ពុទ្ធ។ ជាមួយគ្នានេះ សូមឱ្យសិក្ខាកាមទាំងអស់ ទទួលបាននូវសេចក្តីសុខ សេចក្តីចម្រើន និងជោគជ័យក្នុងការបដិបត្តិធម៌ ដើម្បីជាប្រយោជន៍ដល់ខ្លួនឯង សង្គម និងព្រះពុទ្ធសាសនាតទៅ ។
━━━━━━━━━━━━
ពុទ្ធមណ្ឌល,ថ្ងៃចន្ទ ១រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១ ខែមិថុនា ឆ្នាំ២០២៦
#ពុទ្ធមណ្ឌល #ហ៊ឹមប៊ុនធឿន #វិបស្សនា #សមាធិ #កម្ពុជា
